ယင်ႇလိုၵ်ႉၵမ်ႉယၼ် တွၼ်ႈသၢဝ်းသွင်

တီႈၼိူဝ်တပ်ႉၼႆၵေႃႈ ၸဝ်ႈမွင်ႇ ၵေႃႉဢၼ်ပဵၼ်ၽူႈၵွၼ်းၶဝ်ၼၼ်ႉ တင်းလုၵ်ႈၼွင်ႉႁူမ်ႇလူမ်ႈမၼ်းသေ ႁွတ်ႈမႃးၽႅဝ်မႃးတူၺ်းယဝ်ႉ ၼင်ႈလိုဝ်ႈၼင်ႈသင်ယဝ်ႉၵေႃႈ ထိုင်ၶိင်ႇၶၢဝ်းၵိၼ်ၶဝ်ႈယဝ်ႉလႄႈ “လုၵ်ႈဢွၼ်ႇ ၵိၼ်ၶဝ်ႈယဝ်ႉၼႄႇ”

“ပႆႇလႆႈၵိၼ်ၶႃႈ”

“တွင်ႉမႆႈယဝ်ႉဢိူဝ်ႈၼႆႉၵဝ်တႄႉ”

“ၽၵ်းတႄႉသုၵ်းယဝ်ႉ ၵူၺ်းၵႃႈၵူၼ်းႁဝ်းပႆႇမႃးၸေးၵၼ်ဢေႃႈ ပေႃႈႁဝ်းတေၵိၼ်ယဝ်ႉၼႄႇ”

“ဢိူဝ်ႈ ၵွၼ်ႉမႃးလႄႈ”

ၸဝ်ႈမိုဝ်ႉၶဝ်ၼၼ်ႉၵေႃႈ တၵ်းၵွၼ်ႉဢဝ်ၽၵ်းၵုတ်ႇၵႅင်ၼၼ်ႉ ၵႂႃႇတမ်းပၼ်ယူႇဢိူဝ်ႈ။ မၼ်းၵေႃႈၵိၼ်ယူႇႁင်းၵူၺ်းမၼ်း တင်းၽၵ်းဢၼ်မၼ်းပႃးမႃးတီႈႁိူၼ်း ၼိူဝ်ႉမူၶူဝ်ႈၼၼ်ႉယဝ်ႉ။

ၸဝ်ႈပိုၼ်းႁၢၼ်လႄႈတင်းၵူၼ်းလိူဝ်ႈမႆႉၶဝ်ၼၼ်ႉၵေႃႈ ႁွတ်ႈမႃးၸွမ်းၵၼ်သေ ၶဝ်ၸင်ႇတေႁွင်ႉၵၼ်ၵိၼ်ၶဝ်ႈၵႂႃႇ။

“ဢၢႆႈသၢၼ်း မႂ်းၵႂႃႇဢဝ်မႃးထူဝ်ႇၼဝ်ႈၼမ်ႉၽိတ်ႉတီႈၼွၼ်းၵဝ်ၼၼ်ႉလူး ပီႈလူဝ်းသူပၼ်မႃး ၵဝ်လိုမ်းဢိူဝ်ႈၼၼ်ႉ ၵႂႃႇဢဝ်မႃးၸီႇလဵင်ႉၵၼ်လႄႈ”

“ဢေႃႈၶႃႈ”

“ဢၢႆႈသၢၼ်း ၵဵပ်းမႃးပႃးမၢၵ်ႇၽိတ်ႉႁေလႄႈၼႃႈမိူဝ်ႈလႂ်မိူဝ်ႈၵႂႃႇယဝ်ႉၵေႃႈ” ဢၢႆႈသူၺ်ႇႁွင်ႉလၢတ်ႈၸူးမၼ်းယူႇ။

“သူၵေႃႈၽုၵ်ႇၸွႆႈၵဝ်ၽွင်ႈလေႃႇမေႃႉ ၵဝ်တင်းပႆႇတၼ်းလႆႈပိတ်း သူမႃးပိတ်းပေႃးဢမ်ႇၵိုတ်းဢၼ်ၼုမ်ႇမၼ်းယဝ်ႉ”

“မိူဝ်ႈၸဝ်ႈႁဝ်းမိူဝ်း ႁဝ်းႁူတ်းၼမ်ႉပၼ်ယူႇ”

“ၸၢင်ႈလူဝ်ႇႁူတ်းၼမ်ႉတီႈလႂ် ၾူၼ်တူၵ်းယူႇၵူႈဝၼ်း”

ၸူဝ်ႈၼိုင်ႈ ဢၢႆႈသၢၼ်းၵေႃႈ ဢဝ်ၸွၵ်းထူဝ်ႇၼဝ်ႈမႃးသေ မႃးၸီႇၾႆးလဵင်ႉၵၼ်ယူႇယဝ်ႉ။ တႃႉသေဝႃႈပဵၼ်တႆးထူဝ်ႇၼဝ်ႈလႃႈ မွင်းဝႃႈမၼ်းသုၵ်းၵူၺ်း ၵေႃႉပိတ်းၵေႃႉပွတ်း ၶႅပ်းၼိုင်ႈဢမ်ႇတၼ်းႁၼ် ပေႃးမူတ်းယဝ်ႉ၊ မၢင်ၵေႃႉၶႅၼ်းၼႃႇ ပေႃးဝႃႈပဵၼ်ထူဝ်ႇၼဝ်ႈၼမ်ႉၽိတ်ႉၼႆ ၵိၼ်လပ်းမၼ်းၵူၺ်းၼႃႇ။ ထူဝ်ႇၼဝ်ႈၼႆႉမၼ်းၵိၼ်ၽႄႈၼႃႇ ၶဝ်ႈၼိုင်ႈၵမ်းၵိၼ်ၼိုင်ႈၽိတ်ႇၵူၺ်းၵေႃႈ ဝၢၼ်ၼႃႇယဝ်ႉလႃႈ။ သူတ်ႉၼမ်ႉၽၵ်းၵုတ်ႇၶဝ်ႁေ ၶူပ်းမၢၵ်ႇၽိတ်ႉၸွမ်းသေ တႃႇၶဝ်ႈၶဝ်ၵေႃႈယဝ်ႉၵႂႃႇတႃႇၼိုင်ႈယဝ်ႉ ဢဝ်ၶဝ်ႈပဵၼ်ႁႅင်းယဝ်ႉၵေႃႈ သိုပ်ႇႁဵတ်းၵၢၼ်ၵႂႃႇထႅင်ႈ။

ၸဝ်ႈမွင်ႇၼၼ်ႉ မႃးတူၺ်းၵေႃႈမႃးတူၺ်းၵူၺ်း ၵိၼ်ၶဝ်ႈယဝ်ႉ သမ်ႉပေႃးဢဝ်ၵွင်ႈယၢမ်းမၼ်း လမ်ထိူၼ်ႇလမ်ၶိူဝ်း ၵႂႃႇႁႃလႄႇထိူၼ်ႇယဝ်ႉဢိူဝ်ႈၼႃႇ။ ၵၢင်ၶမ်ႈလိုၵ်းမႃး ဢမ်ႇလႆႈသင်ယဝ်ႉၼႆၵေႃႈ မႃးၼွၼ်းႁေ တိုၼ်ႇမႃးၵၢင်ၼႂ် လုင်းသၢမ်ၵႂႃႇလႄႇထိူၼ်ႇသေ လႆႈၽၢၼ်းမႃးတူဝ်ၼိုင်ႈ မၼ်းသမ်ႉတေမိူဝ်းၼႆလႄႈ

“ဢဝ်ပၼ်ၵဝ်မိူဝ်းၽွင်ႈလူးဢႃႈ” ၸုၵ်းႁေတူၺ်းပိူၼ်ႈယႃႉၼိူဝ်ႉမၼ်းယူႇ ၼႂ်းၵၢင်ပၢင်ႇၼၼ်ႉ။

“ဢဝ်ဢၼ်လီလီၼၼ်ႉလေႃႇဢ”

ၶဝ်ၵေႃႈဢဝ်ဢၼ်လီလီႁေႃႇတွင်ႁေ ပၼ်ၵႂႃႇပွတ်းၼိုင်ႈ

“သႂ်ႇထႅင်ႈႁေပွတ်းလႄႈ ႁိုဝ်ပေႃးၵိၼ်ၼႄႇ”

သမ်ႉဝႃႈဢမ်ႇၶႂ်ႈပၼ်ထႅင်ႈၵေႃႈ ၵႃႈလႆႈၼႃႈတူႇၼႃႈလမ်သေ ပၼ်ၵႂႃႇယဝ်ႉ။

ၸဝ်ႈမွင်ႇၼၼ်ႉၵေႃႈ လႆႈၵႂႃႇၼင်ႇႁၢၼ်ႉၸႂ်မၼ်းသေ တင်းလုၵ်ႈၼွင်ႉမၼ်း ဢွၼ်ၵၼ်ပွၵ်ႈမိူဝ်းၵႂႃႇယဝ်ႉ။ ဝၢႆးသေမၼ်းမိူဝ်းၵႂႃႇၵူၺ်း

“ၶၢၼ်ႉႁၼ်ၼႃႇ ၺႃးမိူဝ်ႈလႂ်ၵေႃႈ ယွၼ်းၵၼ်လၢႆလၢႆတႃႇသေႇ ပေႃးမိူဝ်းႁိူၼ်းၶဝ်တႄႉ ၶဝ်ႈၵူၺ်းၵေႃႈတင်းဢမ်ႇၶႂ်ႈလဵင်ႉပိူၼ်ႈလႃႈ” လုင်းသၢမ်ပွင်ႉယူႇဢုမ်းဢုမ်း။

“ဢဝ်မိူဝ်းၼမ်ၼႃႇၵႃႈ” လုင်းသေႃး လၢတ်ႈၸူးမၼ်း

“မီးယူႇယူဝ်ႉမွၵ်ႈသၢမ်လူဝ်းၼႆႉ”

“ဢလူဝ်ႈ ပေႉဢဝ်မိူဝ်းၼမ်ၼႃႇလႃႇ”

“ဢီႈႁင်ၵေႃႈယွၼ်းဢဝ်ယွၼ်းဢဝ်တိၵ်းတိၵ်း”

“ဢဝ်မိူဝ်းလႅၵ်ႈငိုၼ်းၵူၼ်းလူင်ၵႃႈတူၺ်းတႄႉ” လုင်းလူႇလၢတ်ႈၸူး

“မၼ်းတႄႉမႃးယွၼ်းႁဝ်းႁေလႆႈငိုၼ်းယဝ်ႉ တင်းဢမ်ႇလဵင်ႉႁဝ်း လႅၼ်းယႃႈသလိၵ်ႉၵူၺ်းၵေႃႈ ဢမ်ႇတွၼ်ႉပၼ်ႁဝ်းႁေပွၵ်ႈၼႄႇၼၼ်ႉ”

“ၸၢင်ႈႁဵတ်းႁိုဝ်လႃႇ ပဵၼ်ၵူၼ်းလူင်ႁဝ်းလႄႇဢိူဝ်ႈ”

ၸဝ်ႈမွင်ႇၼၼ်ႉ ဢဝ်တင်းၼိူဝ်ႉၽၢၼ်း မိူဝ်းၸူးၵူၼ်းလူင်ႁေ

“ၵႂႃႇလႄႇမႃးယဝ်ႉၼႄႇတပ်ႉမႂ်ႇ”

“ၵႂႃႇမႃးယဝ်ႉၶႃႈ”

“ယဝ်ႉထိုင်လႂ်ယဝ်ႉ”

“တိုၵ်ႉႁဵတ်းယူႇတိၵ်းတိၵ်းဢေႃႈ”

“မွၵ်ႈသွင်လိူၼ်ၼႆႉၸွင်ႇလႅပ်ႈယဝ်ႉလႆႈႁႃႉ”

“ယဝ်ႉလႆႈဢေႃႈ ၸမ်ယဝ်ႉယဝ်ႉၼင်ႇၵွၼ်ႇၶႃႈ”

“လီယဝ်ႉပေႃးၼၼ်”

“ၸွင်ႇပေႃႈႁဝ်းၵိၼ်ၼိူဝ်ႉၽၢၼ်းၶႃႈ”

“ဢိူဝ်ႈ ၶႅမ်ႉဢိူဝ်ႈၼၼ်ႉ”

“ၶႃႈဢဝ်မႃးတွၼ်ႈ ပေႃႈႁဝ်းဢေႃႈ”

“ၵႃႈႁိုဝ်လႃႇၼၼ်ႉ”

“ဢဝ်ၼင်ႇပေႃႈႁဝ်းၶႂ်ႈပၼ်ၵူၺ်းၶႃႈ”

မိူဝ်ႈယၢမ်းၼင်ႇၼၼ် ၵူၼ်းလူင်မၼ်းၵေႃႈ ဢဝ်တင်းငိုၼ်းႁဵင်ၼိုင်ႈ ပၼ်မၼ်းၵႂႃႇယဝ်ႉ။ မၼ်းၵေႃႈၸူမ်းၸူမ်းသိူဝ်းသိူဝ်းယုမ်ႉယုမ်ႉယၢႆႈယၢႆႈ သိုဝ်ႉၵိၼ်သိုဝ်ႉယႅမ်ႉ မိူဝ်းတွၼ်ႈလုၵ်ႈတွၼ်ႈမေးမၼ်းယူႇယဝ်ႉၼႃႇ။

တီႈတေႉပေႃးၼပ်ႉသွၼ်ႇတူၺ်းႁႅင်းၵူၼ်းလႄႈ တင်းၶၢဝ်းယၢမ်းၼၼ်ႉၵူၺ်းတႄႉ ၶၢဝ်းတၢင်းသွင်လိူၼ် ဢမ်ႇယဝ်ႉလႆႈ၊ တႃႇတေတေႃႉမႆႉမႃးၼၼ်ႉၵူၺ်းၵေႃႈဢမ်ႇငၢႆႈငၢႆႈ။ ပေႃးဝႃႈမၼ်းပွၵ်ႈမိူဝ်းယဝ်ႉၵေႃႈ မိူဝ်းဢွၵ်ႇၶေႃႈသင်ႇ ႁႂ်ႈမၼ်းယဝ်ႉၵႂႃႇ ၼႂ်းၶၢဝ်းတၢင်းသွင်လိူၼ်ၼႆယဝ်ႉ။

မိူဝ်ႈၸဝ်ႈပိုၼ်းႁၢၼ်လႆႈငိၼ်းၵေႃႈ ဢမ်ႇႁူႉတေႁဵတ်းႁိုဝ်ႁိပ်ႈလႆႈယဝ်ႉ ႁႅင်းၵူၼ်းၵေႃႈဢမ်ႇၵုမ်ႇထူၼ်ႈၸိူင်ႉၼၼ် ၸင်ႇလၢတ်ႈႁႂ်ႈၵႂႃႇယွၼ်းတၢင်းၸွႆႈထႅမ် တီႈႁူင်းၽိုၵ်းသွၼ်ၼႆသမ်ႉ ႁႂ်ႈၸဝ်ႈပိုၼ်းႁၢၼ်ၵေႃႉၵပ်းၶဝ်သေ ၸတ်းၵၢၼ်ၵႂႃႇၵူၺ်းၼႆ။

ၸဝ်ႈပိုၼ်းႁၢၼ်ၵေႃႈ ၸၢင်ႈတေႁဵတ်းႁိုဝ် ဝူၼ်ႉႁၼ်လုၵ်ႈၼွင်ႉမၼ်း ဢၼ်ႁဵတ်းႁိူဝ်ႉၵၼ်ယူႇတၢင်းဝၼ်းတၢင်းဝၼ်းၼၼ်ႉ ၵႃႈလႆႈၵပ်းသၢၼ်ပၼ်ယူႇၵူၺ်းဢိူဝ်ႈ။

ပေႃးဝႃႈၶဝ်လိူဝ်ႈမႆႉလိူဝ်ႈသင်ယဝ်ႉၵေႃႈ ၸင်ႇမီးၵူၼ်းႁူင်းၽိုၵ်းသွၼ်ၶဝ် မႃးမႅၵ်ႇတေႃႉၸွႆႈယဝ်ႉ။ ၸွႆႈၵၼ်ႁၢမ်ၸင်ႇမဝ် ၸွႆႈၵၼ်ဢဝ်ၸင်ႇလႆႈ ဢမ်ႇႁိုင်ၵေႃႈ ယဝ်ႉၵႂႃႇယဝ်ႉလႄႈ လူဝ်ႇမႄးဢိတ်းဢွတ်းၵူၺ်းယဝ်ႉ ၸဝ်ႈပိုၼ်းႁၢၼ်ၵေႃႈ သင်ႇၶဝ်ဝႆႉသေ မိူဝ်းယူႇတီႈႁိူၼ်းၶိုၼ်း၊ ၼိုင်ႈဝူင်ႈၸင်ႇတေမႃးၸႂ်းၶဝ်ၼိုင်ႈပွၵ်ႈ။ ပေႃးဝႃႈႁဵတ်းယဝ်ႉယဝ်ႉ ဢွၼ်ၵၼ်ပၵ်းသဝ်းယူႇၵႂႃႇသေ ၸဝ်ႈပိုၼ်းႁၢၼ်ၵေႃႈ ဢမ်ႇပေႃးသူႈၵႂႃႇယဝ်ႉ။ သင်ဝႃႈမီးၶေႃႈသင်ႇ ႁႂ်ႈၵႂႃႇလႄႇၸွမ်းတပ်ႉၸွမ်းတႃႇၼႆၵေႃႈ ၵႆႉၵႆႉၵႂႃႇလႄႇၵႂႃႇၸႂ်းၶဝ် ၵႂႃႇပၼ်ႁႅင်းၶဝ်ယူႇၼင်ႇၵွၼ်ႇ။

ယင်ႇလိုၵ်ႉၵမ်ႉယၼ် တွၼ်ႈသၢဝ်းပႅတ်ႇ

ႁိူၼ်းဢၼ်ဝႃႈၼၼ်ႉ တွၼ်ႈတႃႇ ၸဝ်ႈပိုၼ်းႁၢၼ်လႄႈ ၼၢင်းသိုဝ်ႉလူႇၼႆၵေႃႈ တိုၵ်ႉၸင်ႇႁႃမီးမႃးမိူဝ်ႈယူႇတီႈၼိူဝ်လွႆၼႆႉၵူၺ်းလႄႈ ပဵၼ်တီႈၸုၵ်းမၼ်ႈယင်ႇႁၢၵ်ႈမၼ်းဝႆႉယဝ်ႉသေ ၵႂႃႇတၢင်းလႂ်ယူႇတၢင်းလႂ်ၵေႃႈ ဢမ်ႇမိူၼ်ၼင်ႇတီႈႁိူၼ်းၼႆႉလႆႈတေႉဢိူဝ်ႈ။ ၸဝ်ႈပိုၼ်းႁၢၼ်ၵေႃႈ မိူဝ်ႈၵေႃႉလဵၵ်ႉ...

ယင်ႇလိုၵ်ႉၵမ်ႉယၼ် တွၼ်ႈသၢဝ်းၸဵတ်း

ယူႇၼႂ်းဝၢၼ်ႈၵေႃႈ လႆႈႁဵတ်းၵၢၼ်ၼႃႈဝၢၼ်ႈ ၼၢင်းသိုဝ်ႉလူႇၼၼ်ႉၵေႃႈ သမ်ႉမီးဝႆႉၼႂ်းမူႇၸုမ်းၼၢင်းယိင်းလႄႈ တီႈႁူင်းႁဵၼ်းၼၼ်ႉၵေႃႈ မူႇၸုမ်းၼၢင်းယိင်းၶဝ် ပွၵ်ႉၼိုင်ႈလႄႈပွၵ်ႉၼိုင်ႈ လႆႈပၼ်ႇပုတ်ႈၵၼ်သေၵႂႃႇႁဵတ်းယဝ်ႉ။ ၼၢင်းသိုဝ်ႉလူႇၼၼ်ႉၵေႃႈ...

ယင်ႇလိုၵ်ႉၵမ်ႉယၼ် တွၼ်ႈသၢဝ်းႁူၵ်း

ဝၢႆးသေႁဵတ်းႁိူၼ်းယဝ်ႉၼႆၵေႃႈ ႁၼ်ဝႃႈတီႈယူႇတီႈသဝ်းမၼ်းၵႂၢင်ႈၼႆသေ ပိူၼ်ႈၵေႃႈၽိူမ်ႉၵူၼ်းမႃးလႄႈ ၸဝ်ႈမွင်ႇၵေႃႈ ႁႂ်ႈမႃးယူႇၸွမ်းတီႈႁိူၼ်းၸဝ်ႈပိုၼ်းႁၢၼ်ၵႂႃႇ မီးၽူႈမၢႆ 3 ၵေႃႉ၊ မေႃယႃထႅင်ႈ...