ယင်ႇလိုၵ်ႉၵမ်ႉယၼ် တွၼ်ႈသၢဝ်းႁူၵ်း

ဝၢႆးသေႁဵတ်းႁိူၼ်းယဝ်ႉၼႆၵေႃႈ ႁၼ်ဝႃႈတီႈယူႇတီႈသဝ်းမၼ်းၵႂၢင်ႈၼႆသေ ပိူၼ်ႈၵေႃႈၽိူမ်ႉၵူၼ်းမႃးလႄႈ ၸဝ်ႈမွင်ႇၵေႃႈ ႁႂ်ႈမႃးယူႇၸွမ်းတီႈႁိူၼ်းၸဝ်ႈပိုၼ်းႁၢၼ်ၵႂႃႇ မီးၽူႈမၢႆ 3 ၵေႃႉ၊ မေႃယႃထႅင်ႈ 1 ၵေႃႉ၊ တီႈႁိူၼ်းမၼ်းၼၼ်ႉတႄႉ ဝႆႉၵူၼ်းယူႇၸွမ်းၵူၺ်း ၵူၼ်းႁဵတ်းၵၢၼ်ၼႆၵေႃႈ ဝႆႉတီႈႁိူၼ်းၸဝ်ႈပိုၼ်းႁၢၼ်ၼၼ်ႉတင်းမူတ်းယဝ်ႉ လိူဝ်ၼၼ်ႉ ၸဝ်ႈပိုၼ်းႁၢၼ်ၵေႃႈသမ်ႉဢဝ်ၵူၼ်းယူႇၸွမ်းထႅင်ႈၵေႃႉၼိုင်ႈယူႇ။

ပေႃးယူႇၵူၼ်းၼမ်မႃးၵေႃႈ ဢၼ်ၵိၼ်ဢၼ်ယႅမ်ႉ လူဝ်ႇၼမ်မႃးယဝ်ႉဢိူဝ်ႈ။

မိူဝ်ႈယၢမ်းၼၼ်ႉၵူၼ်းသိုၵ်းၼႆႉ ငိုၼ်းလိူၼ်ၼႆၵေႃႈ လႆႈမႃးယဝ်ႉ သႂ်ႇၵႃႈၽၵ်းၼိုင်ႈၶိုင်ႈ၊ ၵႃႈၽၵ်းၼႆၵေႃႈ ပေႃးသိုဝ်ႉမွၵ်ႈၵရိယႃႇၽၵ်းၼၼ်ႉၵူၺ်း ႁႂ်ႈဝႃႈလႆႈၵိၼ်ၼိူဝ်ႉၵိၼ်ပႃၼႆၼၼ်ႉတႄႉ ႁႃဢဝ်ၼႂ်းထိူၼ်ႇၼၼ်ႉယဝ်ႉ။ ၽၵ်းယိူဝ်ႈၼၢင်းၶဵဝ်ၼၼ်ႉၵေႃႈ ပေႃးၽုၵ်ႇၵေႃႈလႆႈၵိၼ် ဢမ်ႇၽုၵ်ႇၵေႃႈႁႃၵိၼ်ၸွမ်းထိူၼ်ႇဢၼ်ဢွၵ်ႇၸွမ်းၶၢဝ်းၼၼ်ႉၵူၺ်း။

မၢင်ၸိူဝ်းယူႇၸွမ်းလွႆၸွမ်းတပ်ႉသေ မီးၼႃႈႁိူၼ်းတႃယေးၼႆၵေႃႈ ဢွၼ်ၵၼ်ႁႃ ႁဵတ်းႁႆႈၶဝ်ႈၸိူဝ်းၼႆႉၵေႃႈ လႆႈၵိၼ်လဵင်ႉၵၼ်ၵႂႃႇယူႇ။

ဢၼ်ယူႇၼႂ်းဝၢၼ်ႈႁဵတ်းၵၢၼ်လုမ်း တေႃႈၼင်ႇၼၼ် ပေႃးဝၼ်းလိုဝ်ႈ ပေႃးၶၢဝ်းလိုဝ်ႈၼႆၵေႃႈ ဢွၼ်ၵၼ်ႁဵတ်းဢွၼ်ၵၼ်ႁႃႁင်းၽႂ်ႁင်းမၼ်း။ မၢင်ၸိူဝ်းၵေႃႈၸႂ်ယႂ်ႇပေႃႈမႄႈပီႈၼွင်ႉတၢင်းႁိူၼ်းတၢင်းလင်ၸိူဝ်း။ မၢင်ၸိူဝ်းယူႇၸွမ်းၵူၼ်းလူင်ၵေႃႈ ဢမ်ႇပေႃးလႆႈမႆႈၸႂ်သင် လုၵ်ႈၼွင်ႉၽႂ်ၵေႃႈ ႁူဝ်ၼႃႈမၼ်းလဵင်ႉယူႇဢိူဝ်ႈ။

ၸဝ်ႈပိုၼ်းႁၢၼ်ၼႆၵေႃႈ ပဵၼ်ၵူၼ်းႁဵတ်းႁႃၵိၼ်လဵင်ႉတွင်ႉ ႁုင်လဝ်ႈ ႁဵတ်းႁႆႈႁဵတ်းသူၼ်ၵူၺ်းလႄႈ တႃႇတေႁႃလဵင်ႉလုၵ်ႈၼွင်ႉၼၼ်ႉၵေႃႈ ဢမ်ႇလႆႈဝႃႈမီးငိုၼ်းပၼ်တႃႇသေႇ တွၼ်းႁေဝႃႈငိုၼ်းလိူၼ်ၶဝ်ၼၼ်ႉ ဢမ်ႇဢဝ်သေ လဵင်ႉၶဝ်ၵႂႃႇ ဢမ်ႇပၼ်ၵၼ်ဢိုပ်းလႆႈၵူၺ်း ႁဝ်းၵိၼ်ၸိူင်ႉႁိုဝ်ၵေႃႈ လုၵ်ႈၼွင်ႉႁဝ်းၵေႃႈ ၵိၼ်ၸိူင်ႉၼၼ်မိူၼ်ၵၼ် ယူႇၸွမ်းၵၼ်ၼင်ႇပဵၼ်ၵူၼ်းႁိူၼ်းလဵဝ်ၵၼ်ၵႂႃႇၵူၺ်း။

သမ်ႉဝႃႈမႃးယူႇၸွမ်းၼႆသေတႃႉၵေႃႈ ဢမ်ႇၸႂ်ႈဝႃႈမႃးပဵၼ်ၵူၼ်းႁဵတ်းၵၢၼ်သုၼ်ႇတူဝ်ပၼ်ၵူၺ်း ၽူႈမၢႆၵေႃႈႁဵတ်းၵၢၼ်ၽူႈမၢႆ၊ မေႃယႃၵေႃႈႁဵတ်းၵၢၼ်မေႃယႃ ၵၢၼ်ၽႂ်ၵၢၼ်မၼ်း ႁႂ်ႈလႆႈႁဵတ်းတဵမ်တီႈလႄႈ ၶၢဝ်းယၢမ်းၵေႃႈမီးပၼ်တဵမ်တီႈ။

မီးၵူၼ်းယူႇၸွမ်းၵူၺ်း ၸဝ်ႈပိုၼ်းႁၢၼ်ၵႂႃႇလႂ် ႁဵတ်းသင်ၼႆၵေႃႈ ၵႂႃႇၸွမ်းတႃႇသေႇ။ တေႃႉၽိုၼ်းလိူဝ်ႈမႆႉ ႁဵတ်းၵၢၼ်ယၢပ်ႇႁၢပ်ႇၵၢၼ်မဝ် ဢဝ်ၵၼ်ဝႃႈပႃးၵၼ်ပဵၼ် သွင်ၵေႃႉတင်းသၢင်ႇမူၼ်း။ တေႃႉၽိုၼ်းလိူဝ်ႈမႆႉ သွင်ၵေႃႉၵႂႃႇႁႃလိူဝ်ႈၸွမ်းၵၼ်ယဝ်ႉ ပေႃးတေႃႉမၼ်းၵေႃႈ ၽူႈမၢႆၶဝ်မေႃယႃၶဝ်ၵႂႃႇၸွႆႈသေ ပေႃးလူဝ်ႇၽႃႇၽိုၼ်းၼႆၵေႃႈ ၽႂ်တၼ်းၶၢဝ်းလႂ်ၵေႃႈၽႃႇၸွႆႈၵၼ်ၵႂႃႇ။

ပေႃးႁုင်လဝ်ႈတႄႉၵေႃႈ လိူဝ်သေၸဝ်ႈပိုၼ်းႁၢၼ်ယဝ်ႉတႄႉ ဢမ်ႇမီးၽႂ်မေႃႁုင်လႄႈ တူဝ်မၼ်းၵူၺ်းၵေႃႉလႆႈလူင်းၵႂႃႇႁုင် မၢင်ပွၵ်ႈၵေႃႈလုၵ်ႈၼွင်ႉမၼ်းတေႃႉၸွႆႈႁေ ပေႃးဝၼ်းလိုဝ်ႈၶဝ်တႄႉၵေႃႈ ပၼ်ၶဝ်လိုဝ်ႈၵႂႃႇ။

ဝၼ်းၼိုင်ႈ မၼ်းၵေႃႈၵႂႃႇတင်ႈလဝ်ႈသေ ယၢမ်းႁူဝ်ၶမ်ႈလပ်းသိင်ႇၸွမ်ႉႁွမ်ႉယဝ်ႉၼၼ်ႉ တဵင်ႇတင်းပုင်းလဝ်ႈလူင်ၶိုၼ်ႈမိူဝ်း တွင်ႉမၼ်းသမ်ႉၶႂ်ႈၸဵပ်းမႃးသွင်သၢမ်ဝၼ်းယဝ်ႉ ဢမ်ႇဢၢပ်ႈပဵၼ်သင်ၼႆသေ ၵႂႃႇႁဵတ်းၵၢၼ်။ ၵူၺ်းၵႃႈ ဝၼ်းမိူဝ်ႈၼႆႉသမ်ႉ ပႆတၢင်းၵူၺ်းတင်းဢမ်ႇၶႂ်ႈလႆႈလီလီယဝ်ႉၼႃႇ ၸဵပ်းၼႃႇဢမ်ႇတၢၼ်ႇ ထိုင်တီႈသမ်ႉပေႃးဢမ်ႇၶႂ်ႈမီးႁႅင်းယဵပ်ႇယၢင်ႈတမ်းတိၼ်ပႆလႆႈယဝ်ႉ။ ပုင်းလဝ်ႈမၼ်းၵေႃႈ ပႅတ်ႈဝႆႉၵၢင်တၢင်းၼၼ်ႉသေ မိူဝ်ႈၼၼ်ႉ ၾူၼ်းၵေႃႈပႆႇမီး တႃႇၵပ်းသိုပ်ႇၸူးၵၼ်ၼၼ်ႉ လၢတ်ႈၸၢၵ်ႈဢဝ်လၢႆလၢႆ တႃႇၵႂႃႇႁႃၵၼ်ၼၼ်ႉၵေႃႈ ႁႅင်းၶႃၵူၺ်းၵူၺ်း။

“မႆႉဢေႃႈ မႆႉယူမ်းႁွင်ႉ ၸွင်ႇငိၼ်း”

“မႆႉဢေႃႈလႆႈငိၼ်းယဝ်ႉ”

“ၽႂ်မီးတီႈႁိူၼ်း မႃးႁပ်ႉမႆႉယူမ်းတၢင်းတႃႈၼမ်ႉၼႆႉၽွင်ႈ ဢမ်ႇမီးႁႅင်းယဝ်ႉ”

“လၢႆၵေႃႉၶႃႈ”

“ၽႂ်တၼ်းၵေႃႈမႃးလႃႈ”

ၸိူဝ်းၶဝ်သီႇၵေႃႉ ၵေႃႈဢွၼ်ၵၼ်လူင်းၵႂႃႇမူတ်းဢိူဝ်ႈ သၢင်ႇမူၼ်းတႄႉၵေႃႈ ၵၢင်ၶမ်ႈၵႂႃႇလႄႇသၢဝ်လႄႈ ဢမ်ႇပႆႇပွၵ်ႈႁိူၼ်း။

ၵႂႃႇႁၼ်ၸဝ်ႈပိုၼ်းႁၢၼ် ၼွၼ်းဢိင်ယူႇၶၢင်ႈတၢင်းၼၼ်ႉယဝ်ႉၼႃႇ မေႃယႃၼၼ်ႉၵေႃႈ တူၺ်းၽၢင်ႁၢင်ႈဢမ်ႇပေႃးလီယဝ်ႉလႄႈ

“ၼႅတ်ႈဢွၼ်ၵၼ်ဢဝ်မိူဝ်းၶႃႈလႃႈ”

သွင်ၵေႃႉ ၽႃၽိူဝ်းၸဝ်ႈပိုၼ်းႁၢၼ်သေ ၵေႃႉၼိုင်ႈၵေႃႈထွင်ႇၾႆး ထႅင်ႈၵေႃႉၼိုင်ႈၵေႃႉတဵင်ႇပုင်းလဝ်ႈမိူဝ်းၵႂႃႇ။ မိူဝ်းထိုင်ႁိူၼ်း သမ်ႉပေႃးဢမ်ႇၶႂ်ႈႁူႉတူဝ်ယဝ်ႉဢိူဝ်ႈ မေႃယႃၵူတ်ႇထတ်းၸႅတ်ႈတူၺ်းယဝ်ႉ လႅပ်ႈတေပဵၼ်သႆႈၵိင်ႇၼႆသေ ၼႅတ်ႈၵႂႃႇပွင်ႇပၼ်တီႈႁူင်းယႃၵမ်းလဵဝ် ပေႃးတူၵ်းလိုၼ်းတႄႉ တေၸၢင်ႈတၢႆလႆႈယူႇ။

ဢေးၼၢင်းဢွၼ်ႇဢၼ်ႁၼ်ဢူႈၶဝ်ပဵၼ်ၼၼ်တႄႉၵေႃႈ ဢမ်ႇႁူႉႁင် ၵႂႃႇတူၺ်းထီႇဝီႇမႃးသေ ၵၢၼ်းၶဝ်ႈမိူဝ်းၼွၼ်းၵႂႃႇယဝ်ႉ။

ယၢမ်းၵၢင်ၼႂ်မႃး မီးၵႃးမႃးၵိုတ်းၼႃႈႁိူၼ်းသေ ၼၢင်းသိုဝ်ႉလူႇၵေႃႈဢဝ်ၶူဝ်းၽူဝ်မၼ်းသႂ်ႇၵႃးယဝ်ႉ ၸဝ်ႈပိုၼ်းႁၢၼ်ၵေႃႈၶိုၼ်ႈၵႃးၵႂႃႇ၊ ဢေးၼၢင်းဢွၼ်ႇလႆႈႁၼ်ၼင်ႇၼၼ်ၵေႃႈ

“ပေႃႈႁဝ်းၵႂႃႇလႂ်လႃႇမႄႈ”

“လူင်းဝဵင်း”

“ၵႂႃႇႁဵတ်းႁင်လႃႇ”

“ဢမ်ႇယူႇလီ”

“ပေႃႈႁဝ်းပဵၼ်ႁင်”

“တွင်ႉၸဵပ်း”

“လုၵ်ႈၶႂ်ႈၵႂႃႇၸွမ်း”

“မႂ်းတေၵႂႃႇႁဵတ်းႁင်”

“ၶႂ်ႈၵႂႃႇ လုၵ်ႈၶႂ်ႈၵႂႃႇ” ၸႃႉမႃးသေ ႁွင်ႉႁွင်ႉႁႆႈႁႆႈၸွမ်းပေႃႈမၼ်းယူႇယဝ်ႉ။

ၸဝ်ႈပိုၼ်းႁၢၼ်ၵေႃႈ ၶၢၼ်ၸႂ်ၶၢၼ်ၶေႃး ၼင်ႇဝႃႈတေဢမ်ႇလွတ်ႈယဝ်ႉဢိူဝ်ႈ ႁွတ်ႈထိုင်ၵႂႃႇႁူင်းယႃဢွၼ်ႇၼႆၵေႃႈ မေႃယႃဢမ်ႇပေႉသေ ၼႅတ်ႈသူင်ႇၵႂႃႇတီႈႁူင်းယႃလူင်ယဝ်ႉ လႆႈၶဝ်ႈႁွင်ႈၽႃႇတတ်းၵမ်းလဵဝ်။ မိူဝ်ႈၼၼ်ႉ သင်ဝႃႈဢမ်ႇၵႂႃႇၶိုတ်းတၼ်းလႆႈတႄႉ မေႃယႃၶဝ်ပေႃးဝႃႈႁင်းမၼ်းတေတၢႆယဝ်ႉၼႆ ၵွၼ်ႇလူး။

ယင်ႇလိုၵ်ႉၵမ်ႉယၼ် တွၼ်ႈသၢဝ်းပႅတ်ႇ

ႁိူၼ်းဢၼ်ဝႃႈၼၼ်ႉ တွၼ်ႈတႃႇ ၸဝ်ႈပိုၼ်းႁၢၼ်လႄႈ ၼၢင်းသိုဝ်ႉလူႇၼႆၵေႃႈ တိုၵ်ႉၸင်ႇႁႃမီးမႃးမိူဝ်ႈယူႇတီႈၼိူဝ်လွႆၼႆႉၵူၺ်းလႄႈ ပဵၼ်တီႈၸုၵ်းမၼ်ႈယင်ႇႁၢၵ်ႈမၼ်းဝႆႉယဝ်ႉသေ ၵႂႃႇတၢင်းလႂ်ယူႇတၢင်းလႂ်ၵေႃႈ ဢမ်ႇမိူၼ်ၼင်ႇတီႈႁိူၼ်းၼႆႉလႆႈတေႉဢိူဝ်ႈ။ ၸဝ်ႈပိုၼ်းႁၢၼ်ၵေႃႈ မိူဝ်ႈၵေႃႉလဵၵ်ႉ...

ယင်ႇလိုၵ်ႉၵမ်ႉယၼ် တွၼ်ႈသၢဝ်းၸဵတ်း

ယူႇၼႂ်းဝၢၼ်ႈၵေႃႈ လႆႈႁဵတ်းၵၢၼ်ၼႃႈဝၢၼ်ႈ ၼၢင်းသိုဝ်ႉလူႇၼၼ်ႉၵေႃႈ သမ်ႉမီးဝႆႉၼႂ်းမူႇၸုမ်းၼၢင်းယိင်းလႄႈ တီႈႁူင်းႁဵၼ်းၼၼ်ႉၵေႃႈ မူႇၸုမ်းၼၢင်းယိင်းၶဝ် ပွၵ်ႉၼိုင်ႈလႄႈပွၵ်ႉၼိုင်ႈ လႆႈပၼ်ႇပုတ်ႈၵၼ်သေၵႂႃႇႁဵတ်းယဝ်ႉ။ ၼၢင်းသိုဝ်ႉလူႇၼၼ်ႉၵေႃႈ...

ယင်ႇလိုၵ်ႉၵမ်ႉယၼ် တွၼ်ႈသၢဝ်းႁႃႈ

ဝၼ်းလိုဝ်ႈၼႆၵေႃႈ ပေႃႈၶဝ်ၵႂႃႇၽုၵ်ႇထူဝ်ႇလိၼ် ႁွင်ႉမၼ်းၵႂႃႇၸွမ်းယဝ်ႉ ပေႃးဝႃႈၸွမ်းပေႃႈၶဝ်ၼႆတႄႉႁၢင်ႈၵႆႉၼႃႇ။ ပေႃႈၶဝ်ၵေႃႉၶုတ်း မၼ်းၵေႃႈ မိုဝ်းၵမ်လဵၵ်ႉလဵၵ်ႉၼၼ်ႉ တွတ်ႈသႂ်ႇၼႂ်းလုၵ်းၼၼ်ႉၵႂႃႇၸွမ်းပေႃႈၶဝ်။ မၢင်ၵမ်းၵေႃႈသႂ်ႇၼမ်...