ႁိူၼ်းဢၼ်ဝႃႈၼၼ်ႉ တွၼ်ႈတႃႇ ၸဝ်ႈပိုၼ်းႁၢၼ်လႄႈ ၼၢင်းသိုဝ်ႉလူႇၼႆၵေႃႈ တိုၵ်ႉၸင်ႇႁႃမီးမႃးမိူဝ်ႈယူႇတီႈၼိူဝ်လွႆၼႆႉၵူၺ်းလႄႈ ပဵၼ်တီႈၸုၵ်းမၼ်ႈယင်ႇႁၢၵ်ႈမၼ်းဝႆႉယဝ်ႉသေ ၵႂႃႇတၢင်းလႂ်ယူႇတၢင်းလႂ်ၵေႃႈ ဢမ်ႇမိူၼ်ၼင်ႇတီႈႁိူၼ်းၼႆႉလႆႈတေႉဢိူဝ်ႈ။
ၸဝ်ႈပိုၼ်းႁၢၼ်ၵေႃႈ မိူဝ်ႈၵေႃႉလဵၵ်ႉ ယူႇၸွမ်းပေႃႈၸွမ်းမႄႈ။ ၵေႃႉယႂ်ႇမႃးယဝ်ႉ ႁဵတ်းသိုၵ်းၵႂႃႇတၢင်းၼိုင်ႈမိူဝ်းတၢင်းၼိုင်ႈသေ ဢမ်ႇလႆႈယူႇသဝ်းလီလီ။ ၽိူဝ်ႇဢဝ်မေးမႃးၵေႃႈ လႆႈၶိုၼ်ႈၶူၺ်ပိူၼ်ႈ လႆႈယူႇႁူမ်ႈႁိူၼ်းဝႅင်းလဵဝ်ၵၼ်တင်းပိူၼ်ႈ။ ဢွၵ်ႇယူႇႁိူၼ်းၵူၺ်းၵေႃႈ ဢမ်ႇပူၼ်ႉသေ သွင်ပီသၢမ်ပီၼႆႉ သမ်ႉပေႃးလႆႈၽၢတ်ႇယၢၼ်ၵႂႃႇယဝ်ႉၼႃႇ။
ၼၢင်းသိုဝ်ႉလူႇၼႆၵေႃႈ ၸဵမ်မိူဝ်ႈလဵၵ်ႉ ဝၢႆးသေပေႃႈမႄႈလူႉသဵင်ႈပႅတ်ႈ။ လႆႈမိူဝ်းယူႇၸွမ်းပိူၼ်ႈ၊ ႁဵတ်းၵၢၼ်ပၼ်ပိူၼ်ႈ တေႃႇပေႃးၵေႃႉယႂ်ႇလႄႈ ၵႂႃႇမိူင်းထႆးႁဵတ်းလုၵ်ႈလဵင်ႉလုၵ်ႈၸၢင်ႈပိူၼ်ႈ တေႃႇပေႃးမႃးၺႃးၵၼ်တင်း ၸဝ်ႈပိုၼ်းႁၢၼ်ၼႆႉသေ မီးႁိူၼ်းမီးယေး လဵင်ႉလုၵ်ႈလဵင်ႉလၢင်းၵၼ်ၵႂႃႇ ပူၵ်းသၢင်ႉလၵ်းၵၼ်ဝႆႉယူႇတီႈၼိူဝ်လွႆၼၼ်ႉ ထိုင်တီႈဢမ်ႇႁူႉဝႃႈ တေလႆႈသိုပ်ႇၵႂႃႇတၢင်းလႂ်ထႅင်ႈယဝ်ႉဢိူဝ်ႈ။
လိူၼ်ယဝ်ႉလိူၼ် ၸဝ်ႈမိုဝ်ႉၶဝ်ၵေႃႈပၼ်ႇပုတ်ႈၵၼ်ၵႂႃႇ ၼၢင်းသိုဝ်ႉလူႇတႄႉဢမ်ႇလႆႈၵႂႃႇယဝ်ႉ။ လုၵ်ႈမၼ်းၵေႃႈ လႆႈၵႂႃႇႁူင်းႁဵၼ်းႁင်းၵူၺ်းယဝ်ႉ။ ဢေးၼၢင်းဢွၼ်ႇၼၼ်ႉတႄႉ ပေႃးၵႂႃႇႁူင်းႁဵၼ်းၼႆ မႄႈၶဝ်ႁႂ်ႈၼွင်ႉမၼ်းၵႂႃႇၸွမ်းသေ လႆႈၵႂႃႇသူင်ႇၼွင်ႉမၼ်းတီႈႁူင်းႁဵၼ်းၽၢၵ်ႇ ဢၼ်ယူႇၵႆၵၼ်တင်းႁူင်းႁဵၼ်းမၼ်း ယူႇဢိတ်ႉၼိုင်ႈၼၼ်ႉသေယဝ်ႉ ၸင်ႇတေသိုပ်ႇၵႂႃႇႁူင်းႁဵၼ်းတီႈမၼ်းယူႇ။ မၢင်ပွၵ်ႈၵေႃႈၶၢၼ်ႉၼႃႇ ၵူၺ်းၵႃႈ သမ်ႉဝႃႈၶၢၼ်ႉတၢၼ်ႇႁိုဝ်ၵေႃႈ မၼ်းၵေႃႈယင်းတိုၵ်ႉသူင်ႇယူႇၵူႈဝၼ်း။
ဢၢႆႈၸၢႆးဢွၼ်ႇၼၼ်ႉၵေႃႈ ပေႃးၶၢဝ်းႁိုဝ်ႉၼႆ တိၼ်မၼ်းၼႆႉ ပဵၼ်ၶူမ်းယူႇသေႇသေႇယဝ်ႉ၊ ပေႃးပဵၼ်ၶူမ်းၵႂႃႇႁူင်းယႃသေ တၢၼ်ႇႁၢႆယဝ်ႉသမ်ႉ လႄႇႁႃတဝ်ၼမ်ႉၸွမ်းတၢင်းၸိူဝ်းၼၼ်ႉ ဢမ်ႇႁၢႆလႆႈႁေပွၵ်ႈ။ မၢင်ပွၵ်ႈသမ်ႉပေႃးဢွၵ်ႇၼွင် ၸဵပ်းမႃးၵေႃႈႁႆႈတၢင်းၶိုၼ်းတၢင်းၶိုၼ်းဢိူဝ်ႈ။ ၵေႃႉပဵၼ်ပေႃႈမႄႈတႄႉ ပေႃးဝႃႈႁၼ်လုၵ်ႈၸဵပ်းၼႆ ၼႂ်းၸႂ်ၼႆႉၸဵပ်းၵႅၼ်းမႃးၵမ်းလဵဝ်။ သင်ဝႃႈလၢတ်ႈလုၵ်ႈႁေလုၵ်ႈသမ်ႉဢမ်ႇထွမ်ႇၼႆ ၸႂ်ၵေႃႈလမ်မႃးယဝ်ႉ။
ၵၢၼ်လဵင်ႉလုၵ်ႈၼႆႉ ၶႂ်ႈႁိူဝ်ႉလိူဝ်သေ ဢၼ်ႁဵတ်းၵၢၼ်ၸိူဝ်ႉၸၢတ်ႈၸိူဝ်ႉၶိူဝ်းၼၼ်ႉၵွၼ်ႇၼႃႇ။
———————————————-
“ငဝ်းလိူၼ် တၢင်ႇၵၢင်ဝၼ်းဢဝ်ဢမ်ႇလႆႈႁႃႉၸိူင်းသူၼႆႉ”
“ႁဵတ်းႁင်လႄႈ”
“ႁဝ်းတေလပ်းယဝ်ႉ”
“လီယူႇၼႃႇ ပေႃးတၢင်ႇၵၢင်ဝၼ်းၶႂ်ႈလပ်းၵေႃႈသူတင်းတေဢမ်ႇၸၢင်ႈလပ်းႁိုဝ်”
“ဢၼေႃ တႃႉဝူၼ်ႉလႆႈၵွၼ်ႇဢိူဝ်ႈၼေႃႈ”
“ၼၼ်ယဝ်ႉ မၼ်းလီၶၢၼ်ႉတၢၼ်ႇၼၼ်ႉႁႃႉ”
“ဢိုမ်ႈ”
“တေလႆႈႁဵတ်းႁိုဝ်လႃႇ တေလႆႈသႂ်ႇလေႃးတၢင်းႁၵ်ႉရူဝ်းမႅၼ်းတိၵ်ႇၸိူင်ႉၼၼ်ပႃးၵႃႈ”
“ဢမ်ႇၶႂ်ႈဝႃႈၸိူင်ႉၼၼ်ၼင်ႇၵွၼ်ႇ မၼ်းဢမ်ႇမီးသင်တိုၼ်ႇတဵၼ်ႈသေၵႃႈႁိုဝ်ဢိူဝ်ႈ”
“ႁဝ်းၵေႃႈပေႃးဢမ်ႇႁူႉတေဢဝ်သင်မႃးတႅမ်ႈသႂ်ႇယဝ်ႉၼႆႉ ဢၼ်ထၢမ်မႃးၵေႃႈၶႂ်ႈသဵင်ႈယဝ်ႉၼႃႇ လူဝ်ႇဢဝ်တီႈသူၵူၺ်းဢိူဝ်ႈ”
“လူဝ်ႇဢဝ်ႁင်ထႅင်ႈ”
“ဢဝ်သူမႃးႁဵတ်းလုၵ်ႈပႂ်ႉမႄႈႁဝ်းၼႆဢႄႈ”
“ယႃႇမႃးလၢတ်ႈၸိူင်ႉၼႆယူႇ”
“ၶႂ်ႈလၢတ်ႈယဝ်ႉ..ႁဝ်းယင်းပႆႇႁၼ်ၶေႃႈတွပ်ႇမၼ်းၵွၼ်ႇဝႃႈ ၵွပ်ႈသင်လႄႈသူမႃးႁဵတ်းသိုၵ်းၼႆ”
“မၢင်ၽဝ်ႇ မၼ်းၵေႃႈတေဢမ်ႇမီးၶေႃႈတွပ်ႇဝႆႉယူႇယဝ်ႉၵေႃႈပဵၼ်လႆႈ”
“ဢမ်ႇပဵၼ်လႆႈၼႃႁဝ်းဝႃႈတႄႉ မၼ်းတိုၼ်းမီးဢၼ်တိုတ်ႉဢၼ်ၸၼ်ဝႆႉယူႇယဝ်ႉဝႃႈ”
“ၵေႃႈမီးယူႇ ဢူႈတင်းမႄႈႁဝ်းၼၼ်ႉၼႃႇ”
“ယွၼ်ႉသင်လႃႇ”
“ႁဝ်းဢမ်ႇမီးတၢင်းလိူၵ်ႈ”
“လိူၵ်ႈလႆႈယူႇလူး ႁဝ်းႁၼ်ၵူၼ်းပၢႆႈၵႂႃႇတင်းၼမ် သူဢမ်ႇၶႂ်ႈပၢႆႈၼႄႇ”
“ဢမ်ႇႁူႉၼႃ ႁဝ်းၵိူတ်ႇမႃးဢမ်ႇၸႂ်ႈတႃႇပၢႆႈယူဝ်ႉလႂ်”
“ဢမ်ႇဝႃႈယူဝ်ႉ ပၢႆႈၵႂၢမ်းႁဝ်းပေႉတၢၼ်ႇၼၼ်ႉ”
“ပေႃးဝႃႈသိုဝ်ႈသိုဝ်ႈၵေႃႈ ယွၼ်ႉပိူဝ်ႈၶေႃႈၵႂၢမ်းဝႃႈ “ႁိူၼ်း” ၼႆၼၼ်ႉၵူၺ်း”
“မိူၼ်ႁဝ်းတေလႆႈၶေႃႈတွပ်ႇယဝ်ႉ မွၵ်ႈၼႆႉၵေႃႈ ပဵင်းပေႃးတႃႇတေသိုပ်ႇယူႇၵႂႃႇလႆႈယိုၼ်းယၢဝ်းယဝ်ႉဝႃႈ ယွၼ်းႁႂ်ႈသူလႆႈၶိုၼ်ႈထိုင်ၸိၵ်းၸွမ်သေၵမ်း”
“ႁဝ်းဢမ်ႇသူးတွင်းႁႂ်ႈထိုင်ၸိၵ်းၸွမ် သင်ဝႃႈၸွမ်ႁိူၼ်းႁဝ်းဢမ်ႇႁူဝ်ႈၵူၺ်းၵေႃႈ လႆႈယဝ်ႉဝႃႈ”
“ႁဝ်းတေၵေႃႉမိူဝ်းၵုပ်းပၼ်ၵႃႈ”
“ဢမ်ႇၸႂ်ႈဝႃႈ ၵူဝ်တီႈသုင်ႁႃႉ”
“ႁဝ်းၵူဝ်ၾူၼ်ႁူဝ်သႂ်ႇသူ လိူဝ်သေတၢင်းသုင်ၵႂႃႇယဝ်ႉ”
“ယႃႇမႃးႁႃလၢတ်ႈလူမ်းယူႇလႃႈ လိၼ်ႉဢမ်ႇမီးလုပ်ႇၶႂ်ႈဢုပ်ႇသင်ၵေႃႈဢုပ်ႇၸိူင်ႉၼၼ်”

