ယူႇၼႂ်းဝၢၼ်ႈၵေႃႈ လႆႈႁဵတ်းၵၢၼ်ၼႃႈဝၢၼ်ႈ ၼၢင်းသိုဝ်ႉလူႇၼၼ်ႉၵေႃႈ သမ်ႉမီးဝႆႉၼႂ်းမူႇၸုမ်းၼၢင်းယိင်းလႄႈ တီႈႁူင်းႁဵၼ်းၼၼ်ႉၵေႃႈ မူႇၸုမ်းၼၢင်းယိင်းၶဝ် ပွၵ်ႉၼိုင်ႈလႄႈပွၵ်ႉၼိုင်ႈ လႆႈပၼ်ႇပုတ်ႈၵၼ်သေၵႂႃႇႁဵတ်းယဝ်ႉ။ ၼၢင်းသိုဝ်ႉလူႇၼၼ်ႉၵေႃႈ ဝၢႆးသေလုၵ်ႈမၼ်းၶႅၼ်းလီယဝ်ႉလႄႈ ပွႆႇယူႇႁူင်းႁဵၼ်းလႆႈယဝ်ႉ လႆႈၵႂႃႇႁဵတ်းၸွမ်းပိူၼ်ႈယူႇ။
ယၢမ်းၵၢင်ၼႂ်ၸဵမ်ၸဝ်ႉမိူင်းပႆႇလႅင်းၵေႃႈ ႁႅၼ်းၶူဝ်းႁႅၼ်းလဵင်းပၼ်လုၵ်ႈမၼ်းသေ ဢွၼ်ၵၼ်ၵႂႃႇယဝ်ႉဢိူဝ်ႈ၊ လုၵ်ႈဢွၼ်ႇပႆႇၶႂ်ႈလုၵ်ႉၵေႃႈပူၵ်းလုၵ်ႉယဝ်ႉ။ ပေႃးဝႃႈထိုင်ၶိင်ႇထိုင်ၶၢဝ်း လူဝ်ႇၵႂႃႇသူင်ႇၼွင်ႉမၼ်း ဢၢႆႈၸၢႆးဢွၼ်ႇၼၼ်ႉၼႆၵေႃႈ
“ဢေးလုၵ်ႈ မႂ်းၵႂႃႇသူင်ႇၼွင်ႉမႂ်းႁူင်းႁဵၼ်းၽၢၵ်ႇႁေလူး”
ဢေးၼၢင်းဢွၼ်ႇၼၼ်ႉၵေႃႈ လႆႈၵႂႃႇသူင်ႇယဝ်ႉ။
ပေႃးဝႃႈလူင်းႁူင်းႁဵၼ်းယဝ်ႉ ၼၢင်းသိုဝ်ႉလူႇသမ်ႉမိူဝ်းႁိူၼ်းဢွၼ်တၢင်းလႄႈ ဢေးၼၢင်းဢွၼ်ႇၵေႃႈ လႆႈၵႂႃႇႁပ်ႉၼွင်ႉမၼ်းႁေ သွင်ၵေႃႉပီႈၼွင်ႉဢွၼ်ၵၼ်မိူဝ်းၵႂႃႇယဝ်ႉ။ မၢင်ပွၵ်ႈၵေႃႈၽိတ်းၵၼ်လူင်မိူဝ်းဢိူဝ်ႈ။
ၸဝ်ႈပိုၼ်းႁၢၼ်ၵေႃႈ ၵႂႃႇမွၵ်ႈသိပ်းဝၼ်းၸမ်ၸမ်ၼႆႉ ၸင်ႇတေလႆႈပွၵ်ႈမႃးၶိုၼ်း၊ ဢမ်ႇယူႇလီႁေၵႂႃႇၼႆၵေႃႈ ၵူၼ်းလုမ်းလႃးၵေႃႈဢမ်ႇမီး ၵူၺ်းမီးမေႃယႃၼၼ်ႉသေ ၵူၼ်းၵႂႃႇသူႇၵႂႃႇၸႂ်းၼႆၵေႃႈ တေႃႉတႄႉမီး ၵူၼ်းမီးပုၼ်ႈၽွၼ်းဢၼ်လူဝ်ႇလႆႈၵႂႃႇၸတ်းၵၢၼ်ပၼ် လွင်ႈၵၢၼ်ယူႇၵၢၼ်ငိုၼ်းၼႆႉၵူၺ်း။
ပေႃးဝႃႈပဵၼ်သိုၵ်းၼႆၵေႃႈ ဢမ်ႇယူႇလီၶိုၼ်ႈႁူင်းယႃၼႆၼၼ်ႉ ယူႇတီႈၼႂ်းၸုမ်း ဢွၵ်ႇပၼ်သဵင်ႈပၼ်မူတ်းယဝ်ႉ။ ၵႃႉၸႂ်ႉၸၢႆႇၼၼ်ႉ ဢမ်ႇလႆႈမႆႈၸႂ်သင်။
ၸဝ်ႈပိုၼ်းႁၢၼ်ၵႂႃႇယူတ်းယႃတူဝ်ၼႂ်းဝဵင်းၼႆသေတႃႉ တေႃႉတႄႉလႆႈငိုၼ်းၸပ်းတူဝ်မၼ်းၵႂႃႇႁဵင်ၼိုင်ႈၵူၺ်း၊ တေပွၵ်ႈႁိူၼ်းမိူဝ်း ၵေႃႈ ဢဝ်သိုဝ်ႉၶူဝ်းၸႂ်ႉၶူဝ်းတိုဝ်း တၢင်းၵိၼ်တၢင်းယႅမ်ႉတႃႇလုၵ်ႈဢွၼ်ႇမၼ်းၵေႃႈ သမ်ႉပေႃးတေမူတ်းယဝ်ႉဢိူဝ်ႈ။ ၽွင်းၼၼ်ႉသမ်ႉ ပဵၼ်ၽွင်းတိုၵ်ႉႁဵတ်းႁိူၼ်းယဝ်ႉၵူၺ်းလႄႈ ငိုၼ်းၵဵပ်းငိုၼ်းၸၢႆႇၵေႃႈ လႆႈတိၼ်းတွၼ်းသေယူႇၵႂႃႇယဝ်ႉ။ တႃႇလုၵ်ႈတႃႇလၢင်း ၵႃႈၶဝ်ႈမုၼ်းၶဝ်ၼႆၵေႃႈ လႆႈပၼ်ယူႇၵူႈဝၼ်းဝၼ်း။
ပေႃးဝႃႈၽႃႇတတ်းမႃးယဝ်ႉ ၵၢၼ်ၼၵ်းၵၢၼ်ၼႃၸိူဝ်းၼႆႉ ဢမ်ႇလႆႈႁဵတ်း လႆႈလိုဝ်ႈႁိူဝ်ႉဝႆႉၸူဝ်ႈၶၢဝ်းယဝ်ႉ။ သမ်ႉဝႃႈလိုဝ်ႈၼႆသေတႃႉၵေႃႈ ပေႃးလူဝ်ႇသင် ႁဵတ်းသင်ၼႆ သမ်ႉမႃးႁႃယူႇတႃႇသေႇ၊ ဢၼ်လႂ်ၵေႃႈ ၼင်ႇႁၢင်ႈႁူဝ်ၼႃႈမၼ်းဢမ်ႇပေႉၵၢၼ်ႁိုဝ် မႃးထၢမ်တီႈမၼ်းယူႇလၢႆလၢႆယဝ်ႉ။
ၵူၼ်းသိုၵ်းၶဝ် မႃးလႄႇႁိူၼ်းၵိၼ်လဝ်ႈမဝ်းယဝ်ႉ ၽိတ်းပေႃႉႁႅမ်တင်းမေးမၼ်းၼႆၵေႃႈ ၵၢင်ၶမ်ႈၵၢင်ၶိုၼ်းမႃးႁွင်ႉ “ၸဝ်ႈႁၢၼ်! ၸွင်ႇယူႇႁိုဝ်” မိူၼ်တေပဵၼ်ႁူမ်ႇလူမ်ႈၶဝ်မႃးႁွင်ႉ။ သမ်ႉဝႃႈၸၼ်ႉမၼ်းတေလူတ်းၵႂႃႇ မိူဝ်ႈမၼ်းတူၵ်းၶွၵ်ႈၼၼ်ႉယဝ်ႉၵေႃႈ ပိူၼ်ႈတႄႉယင်းတိုၵ်ႉႁွင်ႉၸပ်းသူပ်းၵႂႃႇဝႃႈ ၸဝ်ႈႁၢၼ်ယူႇတိၵ်းတိၵ်းၵူၺ်း။
“ႁဵတ်းႁင်လႃႇ!!”
“ၶိင်းဢွင်ႇၶႃၼၢႆးမၢတ်ႈၽိတ်းၵၼ်ထူၼ်ႈယဝ်ႉဝႃႈ”
“သူဢမ်ႇၶႄၼႄႇ”
“ဢမ်ႇၸၢင်ႈၶႄၶႃႈၸဝ်ႈႁဝ်းႁူႉ မၼ်းပႃးတင်းၶွၼ်ႉမႃးငႃႁဝ်းပႃးႁေဢိူဝ်ႈ”
“မွၵ်ႈၼႆႉၵေႃႈသူၵူဝ် လၢတ်ႈယဝ်ႉၼႄႇၸဝ်ႈမွင်ႇ”
“လၢတ်ႈယဝ်ႉ မၼ်းဝႃႈႁႂ်ႈမႃးလၢတ်ႈၸဝ်ႈႁဝ်းၵႂႃႇတူၺ်းၼႆဝႃႇ”
ၸဝ်ႈပိုၼ်းႁၢၼ်ၵေႃႈ သမ်ႉဝႃႈႁွႆးၽႃႇၸဵပ်းမၼ်းဢမ်ႇပႆလႆႈဝႆးသေတႃႉ ယွပ်ႇယူပ်ႈယၢင်ႈႁၢင်ႇယၢင်ႈႁိင်ႇလူင်ၵႂႃႇယဝ်ႉဢိူဝ်ႈ။
“မီးလႂ်ၼႆႉၶိင်းဢွင်ႇၼႆႉ!!” သဵင်လင် ႁိုတ်းလူင်ၵႂႃႇၸူးၶိင်းဢွင်ႇၼႂ်းႁိူၼ်းၼၼ်ႉ။ ဢဝ်ၶိင်းဢွင်ႇသမ်ႉပေႃးငႄႈလူင်ၵႂႃႇ။
ပႃးတၢင်းၶွၼ်ႉလူင်သေယဝ်ႉ “မႂ်းတေပႅတ်ႈမႆႉမႂ်းၼႄႇဢမ်ႇပႅတ်ႈ!” ၶိင်းဢွင်ႇၼၼ်ႉသမ်ႉပေႃးလႆႈပႅတ်ႈပုတ်းမႆႉမၼ်းၵႂႃႇ ၸင်ႇၶိုၼ်းဝႃႈ “မတ်ႉပႅတ်ႈဢႄႈ”
“ၸဝ်ႈႁဝ်းတေႁဵတ်းႁိုဝ်ၶႃႈ”
“ဢိူဝ်ႈ!! သူပဵၼ်ႁူမ်ႇလူမ်ႈ သူသမ်ႉတေလႆႈႁဵတ်းႁိုဝ်လႃႇ”
“ၵူၼ်းၸဝ်ႈႁဝ်းလႄႇ”
“ဢဝ်သႂ်ႇၼႂ်းၶွၵ်ႈဢႄႈ မိူဝ်ႈလႂ်မိူဝ်ႈပၼ်ယူႇလီလီ ဢမ်ႇၶႂ်ႈယူႇလီလီယဝ်ႉၵေႃႈ”
ပေႃးဝႃႈၼၼ်ၵေႃႈ ၽူႈမၢႆမၼ်းႁဵတ်းၵၢၼ်သုၵ်ႉသၵ်ႉယူႇယဝ်ႉဢိူဝ်ႈၼႃႇ။
မၼ်းသမ်ႉဢမ်ႇမေႃလိၵ်ႈလႄႈ ပေႃးလူဝ်ႇလၢတ်ႈသင်ႁဵတ်းသင်ၼႆၵေႃႈ လၢတ်ႈသေႁႂ်ႈပိူၼ်ႈတႅမ်ႈၸွမ်း၊ ပေႃးတႅမ်ႈယဝ်ႉၵေႃႈ ၶိုၼ်းဢၢၼ်ႇၼႄမၼ်းၵႂႃႇ ပေႃးထုၵ်ႇမႅၼ်ႈယဝ်ႉ မၼ်းၵေႃႈလူင်းလၢႆးမိုဝ်းပၼ်ႁေ။ သမ်ႉဝႃႈဢမ်ႇမေႃလိၵ်ႈသေတႃႉ လၢႆးမိုဝ်းမၼ်းတႄႉၵေႃႈမေႃတႅမ်ႈယူႇလႄႈ ၸိုဝ်ႈမၼ်းၵေႃႈတႅမ်ႈလႆႈယူႇၵူၺ်းၼင်ႇၵဝ်ႇ။
ၼႂ်းၵႃႈၵူၼ်းမေႃလိၵ်ႈမေႃလၢႆးသေ မႃးယူႇၸွမ်းၵၼ်ၸဵမ်မိူဝ်ႈတႄႇတႄႇမႃးၼိူဝ်လွႆၼၼ်ႉ ဢွၼ်ၵၼ်ပၢႆႈၽၢတ်ႇယၢၼ်ၵႂႃႇႁဵတ်းၵၢၼ်ပႅတ်ႈၼမ်ယဝ်ႉ။ တေႃႈၼင်ႇ ၸဝ်ႈၸႃႇလိင်ႇ ဢၼ်ပဵၼ်သၢႆလူမ်းၼၼ်ႉၵေႃႈ တင်းမေးမၼ်းသေ ပၢႆႈၵႂႃႇမူတ်းယဝ်ႉ။
သမ်ႉဝႃႈမီးၵူၼ်းမႃးၸူဝ်းမၼ်းၵႂႃႇယူႇၵေႃႈ မၼ်းတႄႉ ၵႆႉၵႆႉလၢတ်ႈထိုင်ၶိုၼ်း မိူဝ်ႈဢၼ်ပိူၼ်ႈမႃးပေႉၵိၼ်ႁဝ်းၼၼ်ႉ လီၸဵပ်းၸႂ်ၼႃႇ။ တႃႉၵႂႃႇႁႃႁဵတ်းၵၢၼ်မိူင်းပိူၼ်ႈ ႁဵတ်းၶႃႈလိပ်းပိူၼ်ႈယူႇၼၼ်ႉ ႁဝ်းယူႇတီႈၼိူဝ်လွႆၼႆႉၵေႃႈ ဢမ်ႇလႆႈဝႃႈဢိုပ်းၼင်ႇၵဝ်ႇလူး။

