ႁိူၼ်းၵေႃႈၵဝ်ႇယွၵ်းၼႃႇယဝ်ႉလႄႈ ဢၢၼ်းဝႃႈတေႁဵတ်းႁိူၼ်းမႂ်ႇၼႆသေ သဝ်ႁိူၼ်းမၼ်းၼၼ်ႉ ၵႂႃႇႁႃလိူၵ်ႈမႆႉမၼ်းႁင်းၵူၺ်းယဝ်ႉ။ ပေႃးလႆႈမႆႉယဝ်ႉၵေႃႈတင်းလဵၵ်းလႃးႁေ ၽႃႉငႅၵ်ႈလူင်ႁေ ႁွင်ႉၵူၼ်းၵႂႃႇၸွမ်းၵေႃႉၼိုင်ႈ တင်းလိူဝ်ႈတင်းထၢၵ်ႇတေႃႇပေႃးလႆႈမႃး ၼိုင်ႈသဝ်ၼၼ်ႉၸႂ်ႉၶၢဝ်းယၢမ်းယူႇလၢႆဝၼ်း၊ တေႃႇသဝ်းမၼ်းပေႃးၸေးၵေႃႈ လႆႈၸႂ်ႉၶၢဝ်းယၢမ်းယူႇလၢႆလိူၼ်။
ၶၢဝ်းၾူၼ်သုတ်းၵႂႃႇ ၶၢဝ်းၵတ်းထိုင်မႃး ပီမႂ်ႇတႆးၼႆၵေႃႈႁွတ်ႈထိုင် သဵင်ၵွင်သဵင်မွင်းပၼ်းၼၼ်ႈဢူၼ် သဵင်ၵႂၢမ်းသဵင်ဢူတ်ႇဢူဝ်ပေႃးပၼ်းၸွင်ႇ ပဵၼ်ပွႆးၼႆၵေႃႈ ႁၢင်ႈပေႉၶိုၵ်ႉၶၵ်ႉတိုၼ်ႇတဵၼ်ႈၼႃႇဢမ်ႇႁူႉ၊ တွၼ်ႈတႃႇပီၼႆႉသမ်ႉ ပိူၼ်ႈႁွင်ႉမႄႈလမ်းဝူင်းၵဵင်းတုင်မႃးၵႃႈႁေ ၸဵမ်ၸဝ်ႈၸဵမ်ၶုၼ် ၸဵမ်လုၵ်ႈၼွင်ႉတပေးဢွၼ်ၵၼ် ၵႃႈပၼ်ႇလဵပ်ႈၸွမ်း မႄႈလမ်းဝူင်းၶဝ်ၵျေႃႇၵျေႃႇမူၼ်ႈမူၼ်ႈယူႇယဝ်ႉဢိူဝ်ႈ။
ၼၢင်းသိုဝ်ႉလူႇၵေႃႈ ႁွပ်ႇဢဝ်တင်းလုၵ်ႈမၼ်းၵေႃႉၼိုင်ႈ ၸုင်ဢဝ်ၵေႃႉၼိုင်ႈ ၵႂႃႇလႄႇတူၺ်းပွႆးၼႆယူႇ ၵူၺ်းၵႃႈ လိူၵ်ႈလိူၵ်ႈသမ်ႉႁၼ်သႂ်ႇၽူဝ်မၼ်း ၵႃႈမူၼ်ႈၸွမ်းမႄႈလမ်းဝူင်းယူႇလႄႈ ၸႂ်ၶႂ်ႈၸႃႉမႃးယဝ်ႉ။ ဢမ်ႇပႆႇတၼ်းတူင်ႉတီႈ သဵင်မူၵ်ႇတႅၵ်ႇပိူၼ်ႈလင်မေႃးမႃး တႃႇႁၢင်ႈႁႅၼ်းၸုတ်ႇတဵင်ႈၶိုၼ်းၼၼ်ႉ။
ဢေးၼၢင်းဢၼ်လႆႈငိၼ်းသဵင်မူၵ်ႇတႅၵ်ႇ ၵိုင်ႉၵၢင်ႉပွႆႇမိုဝ်းမႄႈၶဝ်သေ လႅၼ်ႈပၢႆႈၵႂႃႇၵႆၵႆဢမ်ႇႁတ်းယူႇၸမ်ယဝ်ႉ။ မႄႈၶဝ်သမ်ႉပေႃးလႆႈလမ်းၸွမ်း မၼ်းၼၼ်ႉၵေႃႈ တင်းႁွင်ႉတင်းႁႆႈတင်းပၢႆႈ ႁွင်ႉၵႂႃႇတီႈပွႆးၼႆတႄႉဢမ်ႇၵႂႃႇယဝ်ႉ ၽိူဝ်ႇဝႃႈႁွင်ႉမိူဝ်းႁိူၼ်းၸင်ႇတေတဵတ်ႇသေမိူဝ်းလီလီ။
—————————————–
“ၸၢမ်ၽွင်း..”
“မီးၸိူင်ႉႁိုဝ်..”
“ၼွၼ်းယဝ်ႉၼႄႇ”
“ၸမ်လပ်းယဝ်ႉ”
“ၶႂ်ႈႁူႉတေႉယဝ်ႉ”
“ၶႂ်ႈႁူႉႁင်”
“သူႁဵတ်းသိုၵ်းၼႆႉသူဢမ်ႇလႆႈယိုဝ်းၵွင်ႇၼႄႇ”
“လႆႈယိုဝ်းၽႅဝ်လေႃႇ ပေႃးဢမ်ႇယိုဝ်းၽႂ်ႁိုဝ်ပၼ်ပူၼ်ႉမႃးလႆႈဢႃႈ”
“သူၵူဝ်မူၵ်ႇတႅၵ်ႇဢမ်ႇၸႂ်ႈႁႃႉ”
“ၸႂ်ႈဢိူဝ်ႈ”
“သူဢမ်ႇယၢမ်ႈႁၼ်ပိူၼ်ႈႁပ်ႉၸဵင်ႁေပွၵ်ႈယဝ်ႉယူဝ်ႉပေႃးၼၼ်”
“ႁိုဝ်တေယၢမ်ႈႁၼ်ၼႄႇ ပေႃးထိုင်ၶၢဝ်းၼၼ်ႉၵေႃႈ ႁဝ်းပေႃးၶႂ်ႈၼွၼ်းၼႃႇယဝ်ႉ”
“ၵေႃႉယႂ်ႇယဝ်ႉတိုၵ်ႉၵူဝ်ယူႇႁႃႉ”
“ပေႃးဝႃႈၼၼ်ၵေႃႈ ႁဝ်းၶုၵ်းၸႂ်လႆႈမႃးယဝ်ႉ”
“ၶုၵ်းၸႂ်လႆႈႁင်လႃႇ”
“မၢႆတွင်းတင်းမူၵ်ႇတႅၵ်ႇၼႆႉဢိူဝ်ႈ”
“မိူဝ်ႈႁဝ်းၵေႃႉလဵၵ်ႉၼၼ်ႉ ပေႃးၶိင်ႇပိူၼ်ႈဢွၵ်ႇဝႃႇ ပိူၼ်ႈတေဢွၼ်ၵၼ်ၸုတ်ႇမူၵ်ႇတႅၵ်ႇ ႁူႉယူႇႁိုဝ်လႃႇၵူၼ်းၼႆႉ ယိုင်ႈၵူဝ်ပိူၼ်ႈယိုင်ႈၶႅၼ်းၶႂ်ႈယွၵ်ႇၼႆ။ ၼွင်ႉႁဝ်းၼၼ်ႉသမ်ႉၵျိူၵ်ႈၼႃႇ ၵႂႃႇသိုဝ်ႉႁေ မႃးၸုတ်ႇတင်းဢူၺ်းၵေႃႉမၼ်း သဵင်ပေႃးပၼ်းလင်ယူႇသဵင်ႈ ပေႃးပဵၼ်မူၵ်ႇတႅၵ်ႇမၢၵ်ႇပေႃႇလုင်းၼၼ်ႉ ၶႅၼ်းလင်ဝႃႈလင်ယဝ်ႉဝႃႈ သဵင်လူင်မၼ်းၼၼ်ႉတႄႉ ၾၼ်ပေႃးၶႂ်ႈပၢႆႈ ႁဝ်းပေႃးဢမ်ႇႁတ်းဢွၵ်ႇႁိူၼ်းၼၼ်ႉၼႃႇ။ ပီလႂ်တႄႉႁဝ်းဢမ်ႇတွင်းယဝ်ႉ ၶဝ်သမ်ႉမႃးၸုတ်ႇၼႃႈႁိူၼ်းႁဝ်းႁေ ပေႃႈႁဝ်းၵေႃႈလႃႇသၵ်ႉပၼ်ၶဝ်ဢိူဝ်ႈ ၶဝ်သမ်ႉပေႃးဢမ်ႇႁတ်းမႃးၸုတ်ႇထႅင်ႈယဝ်ႉ ဝၢႆးသေပီၼၼ်ႉ မွၵ်ႈသွင်ပီၼႆႉ ပိူၼ်ႈၵေႃႈႁၢမ်ႈၸုတ်ႇမူၵ်ႇတႅၵ်ႇၽွင်းဢွၵ်ႇဝႃႇႁေ ၵူၼ်းၶၢႆမၼ်းၵေႃႈ ပိူၼ်ႈႁၢမ်ႈၶၢႆမူၵ်ႇတႅၵ်ႇမၢၵ်ႇပေႃႇလုင်းၼၼ်ႉလႄႈ ႁဝ်းတႄႉၸူမ်းတေႉၸူမ်းဝႃႈယဝ်ႉဢိူဝ်ႈ”
“ပိူၼ်ႈႁၢမ်ႈႁဵတ်းသင်လႃႇ”
“ႁဝ်းၵေႃႈဢမ်ႇႁူႉၼႃ ၵူၺ်းၵႃႈ ၸုတ်ႇမူၵ်ႇတႅၵ်ႇမိူဝ်ႈလႂ် ၵႆႉတႅၵ်ႇသႂ်ႇၵၼ်ၼႃႇႁေ မၢတ်ႇၸဵပ်းၸိူဝ်းၼႆႉ မၢင်ၵေႃႉမိုဝ်းပေႃးပုတ်းၵွပ်ႈမၼ်းဢိူဝ်ႈ ပေႃးၸုတ်ႇသမ်ႉဢမ်ႇၸုတ်ႇလီလီၼၼ်ႉၼႃႇ”
“ၵိုင်ႇတၢင်းလီႁၢမ်ႈယူႇၵူၺ်းတေႉၼင်ႇၵွၼ်ႇၼႆ”
“ဝၢႆးႁေၼၼ်ႉၵေႃႈ ႁဝ်းၵေႃႈ ဢမ်ႇပေႃးၵႆႉလႆႈငိၼ်းယဝ်ႉလႄႈ ဢမ်ႇယုမ်ႇၸႂ်ႈဝႃႈတိုၵ်ႉၵူဝ်ယူႇ”
“သဵင်ၵွင်ႈလူးၸွင်ႇလႆႈငိၼ်းၵွၼ်ႇၼႄႇ”
“ၵႆႉလႆႈငိၼ်းယူႇ ပေႃးပိူၼ်ႈၶိုၼ်ႈၸဝ်ႈမိူင်း”
“ဢမ်ႇၵူဝ်ႇၵွၼ်ႇႁႃႉ”
“ပေႃးႁူႉဝႃႈပိူၼ်ႈတေယိုဝ်းယဝ်ႉၼႆၵေႃႈ လပ်းႁူလပ်းတႃႁေဢိုတ်းႁူဝႆႉထႃႈယဝ်ႉၼၼ်ႉၼႃႇ”
“သင်ယူႇၸမ်တႄႉတေၵႂႃႇၸၼ်လႅၼ်ႈပၢႆႈၵမ်းလဵဝ်ယဝ်ႉဝႃႈ”
“မဵဝ်းဢမ်ႇပဵၼ်လႆႈၼႆႉမေႃလၢတ်ႈၼႃႇၼေႃ”
“ဢမ်ႇပဵၼ်လႆႈတေႉႁႃႉဢေႉ”
“ဢမ်ႇပဵၼ်လႆႈတေႉဢိူဝ်ႈ”
“မိူဝ်ႈလႂ်လႃႇၸင်ႇတေပဵၼ်လႆႈ”
“မိူဝ်ႈလႂ်ၵေႃႈတိုၼ်းတေဢမ်ႇပဵၼ်လႆႈ”
“ႁူဝ်ၸႂ်သူၼႆႉ ဢဝ်သင်ႁဵတ်းဝႆႉၼေႃ လဵၵ်းတင်းၸၢင်ႈႁဵတ်းႁႂ်ႈပွင်ႇလႆႈယူႇ ႁူဝ်ၸႂ်သူၼႆႉ တေႁဵတ်းႁိုဝ်ႁႂ်ႈမၼ်းပိုတ်ႇလႆႈလႃႇ”
“ၸဝ်ႈတူဝ်မၼ်းၵူၺ်းတင်းဢမ်ႇပိုတ်ႇလႆႈလူး တေႁဵတ်းႁိုဝ်”
“ၼမ်ႉတူၵ်းသႂ်ႇႁိၼ်ယင်းမေႃပဵၼ်လွၵ်းလႆႈယူႇ”
“ၵႂႃႇတႅမ်ႈၸိူင်းသူလႃႈ”
“ႁဝ်းတင်းၶႂ်ႈႁူႉထႅင်ႈယူႇ”
“ၶႂ်ႈႁူႉလွင်ႈသင်ထႅင်ႈ”
“သူႁဵတ်းႁိုဝ်ယိုဝ်းၵွင်ႈလႆႈလႃႇ ဢမ်ႇၵူဝ်သဵင်မၼ်းယဝ်ႉႁႃႉ”
“မိူဝ်ႈႁဝ်းလႆႈယိပ်းၵွင်ႈသေယိုဝ်းယဝ်ႉၼၼ်ႉ မိူဝ်ႈၼၼ်ႉယဝ်ႉ ႁဝ်းၸင်ႇတေႁူႉဝႃႈ မၼ်းဢမ်ႇလႆႈလီၵူဝ်သင်လူး ပဵၼ်ဝႃႈဝၼ်းၼၼ်ႉ ႁဝ်းဢမ်ႇၵူဝ်ၵွင်ႈလႄႈ ဢမ်ႇၵူဝ်သဵင်ၵွင်ႈၵႂႃႇယဝ်ႉ”
“ယိုဝ်းမႅၼ်ႈပဝ်ႉမၼ်းယူႇႁႃႉ”
“ၶဝ်ပၼ်ႁူၵ်းလုၵ်ႈ ၼင်ႈၸုၵ်းၼွၼ်း ၶဝ်ႈၸေႈမၼ်းတင်းႁူၵ်းလုၵ်ႈ ၶဝ်ႈပဝ်ႉမၼ်းသွင်လုၵ်ႈယူဝ်ႉၼၼ်ႉ ၵူၺ်းၵႃႈဢမ်ႇၸႂ်ႈပဝ်ႉၵၢင်ၵူၺ်းဢိူဝ်ႈ”
“ဢမ်ႇႁၢင်ႈႁၢႆႉၼင်ႇၵွၼ်ႇပေႃးၼၼ်”
“မိူဝ်ႈလဵဝ်တႄႉ ဢမ်ႇလႆႈယိပ်းတူၺ်း လိုမ်းလၢႆးၸႂ်ႉမၼ်းယဝ်ႉဢိူဝ်ႈ”
“ယူဝ်ၶေးမႅၼ်ႈလိူဝ်ၵဝ်ႇၵေႃႈပဵၼ်လႆႈ”
“ဢမ်ႇပဵၼ်လႆႈယူႇယဝ်ႉ ႁဝ်းဢမ်ႇဝူၼ်ႉဝႃႈတေလႆႈယိပ်းမၼ်းထႅင်ႈ”
“ႁဵတ်းႁင်လႄႈ”
“ႁဝ်းဢမ်ႇၶႂ်ႈယိပ်းမၼ်းၵူၺ်းဢိူဝ်ႈ ဢမ်ႇလႆႈယိပ်းၼၼ်ႉ လီလိူဝ်ပိူၼ်ႈဢမ်ႇၸႂ်ႈႁိုဝ်လႃႇ၊ ဢမ်ႇၸႂ်ႈဝႃႈႁဵတ်းသိုၵ်းယဝ်ႉ တေလႆႈမီးၵွင်ႈလႄႈ ၸင်ႇပဵၼ်သိုၵ်းလူး။ ပၢင်တိုၵ်းဢၼ်ဝႃႈၼၼ်ႉၵေႃႈ ဢမ်ႇၸႂ်ႈဝႃႈ မီးၵွင်ႈယဝ်ႉ ၸင်ႇပဵၼ်ပၢင်တိုၵ်းဢမ်ႇၸႂ်ႈႁိုဝ် ပိူၼ်ႈတိုၵ်းႁဝ်းၼႆႉ တိုၵ်းၵူႈလၢႆးယဝ်ႉ။ တိုၵ်းတၢင်းပၢႆးပၺ်ႇၺႃႇ၊ တိုၵ်းတၢင်းပၢႆးမၢၵ်ႈမီး၊ တိုၵ်းတၢင်းၵၢၼ်မိူင်း၊ တိုၵ်းတၢင်းပၢႆးတူဝ်ပၢႆးၸႂ် ၵွမ်ႉၵူၺ်းဢဝ်ၵွင်ႈတိုၵ်းၼၼ်ႉ တိုၵ်းမႃးႁိုင်လၢႆသိပ်းပီယဝ်ႉ သူၵေႃႈႁူႉယူႇဢမ်ႇၸႂ်ႈႁိုဝ်လႃႇ ႁူမ်ႈၵၼ်ႁေ ပေႃးဢမ်ႇထုၵ်ႇၵၼ်မႃးၵေႃႈ ၽိတ်းၵၼ်ယိုဝ်းၵၼ်ၶိုၼ်းႁေ ဢမ်ႇႁူႉပဵၼ်လၢႆပၢၼ်ယဝ်ႉ။ ၽူႈဢွၼ်ႁူဝ်သမ်ႉ မႃႇၼယႂ်ႇႁင်းၽႂ်ႁင်းမၼ်းထႅင်ႈၼႆ သူဝႃႈမၼ်းတေၵႂႃႇလႆႈၵႆၵႃႈႁိုဝ်လႃႇ”
“သူၼႆႉတႄႉပေႃးလႆႈလၢတ်ႈၵေႃႈၼေႃ သူပ်းသူၼႆႉႁၢႆႉလိူဝ်သေၵွင်ႈၵွၼ်ႇႁိုဝ်”
“ၼၼ်ႁႃႉ တေဝႆႉဝႃႈသူဢၢမ်းႁဝ်းႁေၼႃႈ”
“ဢၢမ်းတႃႇသေႇယဝ်ႉဝႃႈၵူၼ်းႁၢင်ႈလီၶဝ်”
“တေဝႃႈႁိုဝ်ၵေႃႈ ဢၢႆႈၸိူဝ်းဢၼ် ၵႆႉၸုတ်ႇမူၵ်ႇတႅၵ်ႇလွၵ်ႇႁဝ်း မိူဝ်ႈၵေႃႉလဵၵ်ႉၼၼ်ႉ ၽိူဝ်ႇၵေႃႉယႂ်ႇမႃးယဝ်ႉၵေႃႈ ယူဝ်ဝႃႈတေႁဵတ်းသိုၵ်း ဢမ်ႇမီးၽႂ်ႁေၵေႃႉယဝ်ႉဢေႉ”
“မၼ်းၵႆႉၸၢင်ႈပဵၼ်ၼႆၼေႈ မိူဝ်ႈၵေႃႉလဵၵ်ႉလဵၼ်ႈၵွင်ႈလဵၼ်ႈၵၢင်ႇ ယိုဝ်းၵၼ်တူင်ႉတူင်ႉတၢင်ႉတၢင်ႉ ၵေႃႉယႂ်ႇမႃး ၵႂႃႇႁဵတ်းၵၢၼ်ႁႃငိုၼ်းႁင်းၽႂ်ႁင်းမၼ်းယဝ်ႉ”
“ပႃးသူၵေႃႉၼိုင်ႈၸွင်ႇၸႂ်ႈႁိုဝ်လႃႇ”
“ဢမ်ႇထဵင်ၶႃႈ မႄႈၸဝ်ႈႁိူၼ်းၶဝ်”
“ၽႂ်ပဵၼ်မႄႈၸဝ်ႈႁိူၼ်းသူ”
“ၽႂ်ထၢမ်ၵေႃႈပဵၼ်မၼ်းယဝ်ႉ”
“ယႃႇၵဝ်း”
“ဢမ်ႇၵဝ်း ပေႃးလႆႈဢဝ်တေႉဢိူဝ်ႈ”
“ၶၢၼ်ႉလၢတ်ႈတေႃႇသူယဝ်ႉဝႃႈ”

