ယင်ႇလိုၵ်ႉၵမ်ႉယၼ် တွၼ်ႈသၢဝ်းဢဵတ်း

ယၢမ်းၵၢင်ၶမ်ႈ လုၵ်ႈဢွၼ်ႇၵေႃႈၼွၼ်းယဝ်ႉသေ ၵူၼ်းလူင်ၵေႃႈဢုပ်ႇၵၼ် ယၢမ်းဢၼ်ၼွၼ်းဢမ်ႇလပ်း ၼင်ႇႁၢင်ႈဢူင်ႈတိၼ်ၼႆႉၵေႃႈ ၸဵပ်းသႅပ်းဝႆႉလႄႈ ဢဝ်တင်းၽွင်ပႅင်ႈၼၼ်ႉမႃးတႃးယူႇ။ ယွၼ်ႉပိူဝ်ႈ ၵႆႉလႆႈတိုဝ်းသွၵ်းတိၼ်တဝ်ၼမ်ႉယူႇတႃႇသေႇလႄႈ ၸင်ႇလႂ်ဝႃႈ တိၼ်သမ်ႉပေႃးပဵၼ်ၵႂႃႇတိၼ်ႁေႃယဝ်ႉ။

ပေႃးၶၢဝ်းႁိုဝ်ႉၶၢဝ်းၾူၼ်ၼႆ ၵႆႉၵႆႉတဝ်ၼမ်ႉၸိူဝ်းၼႆႉ ၸၢင်ႈတေပဵၼ်တိၼ်ႁေႃၵၼ်မႃးယဝ်ႉ။ ၵူၼ်းသိုၵ်းၵမ်ႈၼမ်ၵေႃႈ ၵႆႉၵႆႉပဵၼ်ၵၼ်ယူႇတႃႇသေႇလႄႈ ဢမ်ႇမီးယႃသင် သၢင်ႇတေႃႇၸိူင်ႉႁိုဝ်ၵေႃႈ ယႃၵႂႃႇၸိူင်ႉၼၼ် လႆႈယဵၼ်ႉၶၢမ်ႇတၢင်းၸဵပ်းသႅပ်ႇမၼ်းဝႆႉသေ ယူႇၸွမ်းမၼ်းၵႂႃႇၵူႈဝၼ်းဝၼ်း တေႃႇၶၢဝ်းႁိုဝ်ႉပေႃးပူၼ်ႉၵႂႃႇ မၼ်းၸင်ႇတေႁၢႆၵႂႃႇလႆႈယဝ်ႉ။

ၶမ်ႈၼႆႉ ပိူၼ်ႈၼႄၸလၢၼ်းတီႈႁူင်းႁေႃးၼၼ်ႉၼႆသေ ၵူၼ်းသိုၵ်းဢၼ်မႃးၼွၼ်းႁဵတ်းၶႅၵ်ႇၼၼ်ႉၵေႃႈ ၶႂ်ႈတူၺ်းၼႆလႄႈ ပႃးတင်းတင်ႇၼင်ႈသေၼင်ႈႁေတူၺ်းတေႉတူၺ်းဝႃႈ ဢမ်ႇတေႃႇတေႃႇတေလႆႈႁၼ်လူး ၶႅပ်းၶူၺ်ႇမၼ်းသမ်ႉၶႂ်ႈလၢႆးဝႆႉလႄႈ တူၺ်းတူၺ်းၶမ်ၶမ်ဝႆႉသေ ထိုင်ၶၢဝ်းပိူၼ်ႈတိုင်ႈၼူၵ်ႉဝိတ်ႇယဝ်ႉ ၸိူင်းပႆႇသုတ်းၼႆၵေႃႈ ပိူၼ်ႈသမ်ႉပေႃးႁႂ်ႈၶဝ်ပွၵ်ႈယဝ်ႉယိုင်။ ၶဝ်ပွၵ်ႈမိူဝ်း ၸဝ်ႈပိုၼ်းႁၢၼ်သဵင်ၶူၼ်ပေႃးဢွၵ်ႇယဝ်ႉဢိူဝ်ႈ။

ယၢမ်းၵၢင်ၼႂ်မိူင်းပႆႇလႅင်း ၾႃႉပႆႇပၢင်ႇတိုၵ်ႉလပ်းသိင်ႇယူႇၽိုတ်းၽိုတ်းၼၼ်ႉ ၸဝ်ႈပိုၼ်းႁၢၼ်ၵေႃႈ ပႃးဢဝ်ပုင်းလဝ်ႈသေယဝ်ႉ လူင်းၵႂႃႇတၢင်းၽူဝ်ႇလဝ်ႈမၼ်းၼၼ်ႉယဝ်ႉၼႃႇ။

မိူင်းလႅင်းမႃးၵေႃႈ ၼၢင်းသိုဝ်ႉလူႇလုၵ်ႉႁုင်ၶဝ်ႈႁဵတ်းၽၵ်းသေ လဵင်ႉၶဝ်ႈလုၵ်ႈမၼ်းယဝ်ႉၵေႃႈ ၵႂႃႇဢွႆႇမူ ႁႂ်ႈဢေးၼၢင်းဢွၼ်ႇ လဵၼ်ႈၵေႃႉၼွင်ႉမၼ်းယူႇၼႂ်းႁိူၼ်းၼၼ်ႉယဝ်ႉ။ ပေႃးၶႃပီႈၼွင်ႉယူႇၸွမ်းၵၼ်ၼႆတႄႉ ယူႇယူႇၵေႃႈ သဵင်ႁႆႈမၼ်းဢွၵ်ႇမႃးယဝ်ႉ ၵေႃႉႁႆႈၼၼ်ႉတႄႉပဵၼ်ပီႈၼၢင်းမၼ်းဢိူဝ်ႈ ပေႃးပီႈၼၢင်းမၼ်းႁႆႈ ၼွင်ႉမၼ်းၵေႃႈႁႆႈၸွမ်းသေ မႄႈၶဝ်ၵေႃႈမႃးလႃႇပီႈၼၢင်းမၼ်းႁေၼႆ ယိုင်ႈလႃႇယိုင်ႈၶႅၼ်းသႅၼ်ႇႁွင်ႉႁႆႈထႅင်ႈ။

“ၶိူဝ်ၶႆႈၺႃးၶွၼ်ႉႁႃႉ” သဵင်ႁႆႈၸင်ႇတေတဵတ်ႇၵႂႃႇ။

ၼၢင်းသိုဝ်ႉလူႇၵေႃႈ မႃးဢဝ်ဢၢႆႈၸၢႆးဢွၼ်ႇၸေးသႂ်ႇလင်သေယဝ်ႉ ဢေးၼၢင်းဢွၼ်ႇၼၼ်ႉၵေႃႈ

“မႄႈလုၵ်ႈၵႂႃႇလေႇၼႃႈ”

“မႂ်းၵႂႃႇလႄႇလႂ်”

“ၵႂႃႇႁိူၼ်းပီႈၵွၼ်ၶဝ်”

“မိူဝ်ႈၼႆႉလဵၼ်ႈၵေႃႉၼွင်ႉမႂ်းလႄႈ ၵဝ်တေၵႂႃႇၸွႆႈပေႃႈသူ”

“ၶၢၼ်ႉ!”

“ပႂ်ႉႁိူၼ်းလႄႈပေႃးၼၼ်”

ၼႃႈမၼ်းၵေႃႈသမ်ႉပေႃးဢမ်ႇယုမ်ႉသေဢိတ်းယဝ်ႉ လႅၼ်ႈလူင်ၵႂႃႇတၢင်းလင်ႁိူၼ်းၼၼ်ႉသေ ၵဵပ်းဢဝ်မၢၵ်ႇႁိၼ်ၸွမ်းႁိူၼ်းၼၼ်ႉ မႃးၶၼ်ႇၽႃလဵၼ်ႈပေႃးလဵၼ်းပေႃလၢႆးလူင်ၵႂႃႇမူတ်းယဝ်ႉ။

ယူႇၸူဝ်ႈၼိုင်ႈ ဢေးထူၺ်းၵေႃႈမႃးလႄႇမၼ်းႁေ ဢွၼ်ၵၼ်လဵၼ်ႈမေႃႈၵိၵ်းၵွၵ်းၵၼ်ယူႇတၢင်းၶၢင်ႈႁိူၼ်း။ ၵၢၼ်ႈမၼ်းၸိူဝ်းၼႆႉ ဢဝ်မႃးႁၵ်းႁၵ်းႁေႁဵတ်းသၢႆၶေႃး ႁွႆႈပၼ်ၶေႃးၶဝ် သမ်ႉပေႃးၶဵဝ်ဝႆႉႁင်းၽႂ်ႁင်းမၼ်း။ ၵၢၼ်ႈမၼ်းၼိဝ်ႉၼႆၵေႃႈ ဢဝ်မႃးႁဵတ်းၵူၼ်းသေ ပိတ်းဢဝ်ဝႂ်မႆႉၸိူဝ်းၼၼ်ႉႁဵတ်းငိုၼ်း ၵွၵ်းၼမ်ႉၶူတ်ႇၼမ်ႉပဝ်ႇၼၼ်ႉၵေႃႈ ဢဝ်မႃးၼွၵ်းလိၼ် ပေႃးၵူဝ်ႈပေႃးဢိူၵ်ႇယူႇသဵင်ႈ။ မွၵ်ႇမၢၵ်ႇယိူဝ်ႈယႃႈၸိူဝ်းၼႆႉပေႃးဢမ်ႇၵိုတ်းလႆႈ သမ်ႉပေႃးပဵၼ်သဵင်ၶဝ်ယူႇသဵင်ႈယဝ်ႉၼႃႇ။

ၼၢင်းသိုဝ်ႉလူႇၵေႃႈၸေးတင်းဢၢႆႈၸၢႆးဢွၼ်ႇၼၼ်ႉသေ လူင်းၵႂႃႇၸူးၸဝ်ႈပိုၼ်းႁၢၼ်ယဝ်ႉ၊ ပေႃးဝႃႈၶႃလူင်းၵႂႃႇယဝ်ႉၵေႃႈ ၸဝ်ႈပိုၼ်းႁၢၼ်ၸင်ႇတဵင်ႇတင်းပုင်းလဝ်ႈၶိုၼ်ႈမႃးဝႆႉ။ ငိၼ်းသဵင်လုၵ်ႈဢွၼ်ႇပၼ်းယူႇႁိမ်းႁိူၼ်းၼၼ်ႉ မႃးငွၵ်ႈတူၺ်းႁေ

“သူႁဵတ်းႁင်ၼၼ်ႉလုၵ်ႈဢွၼ်ႇ”

ဢေးၼၢင်းဢွၼ်ႇၵေႃႈ ဢမ်ႇသူၼ်ၸႂ်သင် သိုပ်ႇၶၢႆတၢင်းၶၢႆမၼ်းယူႇၵူၺ်း။ ပေႃႈၶဝ်ၸဝ်ႈပိုၼ်းႁၢၼ်ၼၼ်ႉၵေႃႈ ၵႂႃႇပႅတ်ႈယဝ်ႉ။

ၸဝ်ႈပိုၼ်းႁၢၼ်ၵေႃႈ တင်းႁုင်တင်းမွင်ႁဵတ်းၵႂႃႇၸွမ်းၵၼ် ၵၢင်ဝၼ်းသမ်ႉပေႃးလပ်းသိင်ႇၸင်ႇတေပွၵ်ႈမိူဝ်းႁိူၼ်း။ ၼၢင်းသိုဝ်ႉလူႇၼၼ်ႉၵေႃႈ ၵွပ်ႈလုၵ်ႈမၼ်းတိုၵ်ႉမီးယူႇတီႈႁိူၼ်းလႄႈ ဢၢပ်ႇၼမ်ႉဢၢပ်ႇသင်ယဝ်ႉသေ ၸေးတင်းလုၵ်ႈယဝ်ႉ ၽၢႆႇၼိုင်ႈႁၢပ်ႇၶူဝ်း ထႅင်ႈၽၢႆႇၼိုင်ႈသမ်ႉသႂ်ႇၼမ်ႉဝႆႉယဝ်ႉႁၢပ်ႇမိူဝ်းၵႂႃႇ။ ယွၼ်ႉပိူဝ်ႈယိပ်းၼမ်ႉၾူၼ်ဢမ်ႇလႆႈလႄႈ သၵ်ႉၶူဝ်းလွႆးၶူဝ်းၼႆၵေႃႈ လႆႈၵႂႃႇသၵ်ႉတီႈတႃႈၼမ်ႉလၢႆလၢႆယဝ်ႉ။

ပေႃးဝႃႈၶၢဝ်းႁိုဝ်ႉၾႃႉငိုပ်း ၾူၼ်ဢမ်ႇႁိူတ်ႇၼႆ သိူဝ်ႈၶူဝ်းၵေႃႈ လႆႈယၢင်ႈႁၢင်းၾႆးဢဝ်။ မၢင်ပွၵ်ႈဢမ်ႇမေႃယၢင်ႈၵေႃႈ ႁမ်ႉပွင်ႇထႅင်ႈႁေၼၼ်ႉၼႃႇ။

ၸဝ်ႈပိုၼ်းႁၢၼ်ၵေႃႈ ႁုင်လဝ်ႈမိူဝ်ႈၼႆႉ ၼင်ႇမိူဝ်ႈၽုၵ်ႈၼႆၵေႃႈၵႂႃႇၶိုၼ်းယဝ်ႉ။

တီႈၼႂ်းပွၵ်ႉၼႂ်းဝၢၼ်ႈၼႆၵေႃႈ မေးသိုၵ်းၸိူဝ်းၼႆႉၵေႃႈၼမ် ၼၢင်းယိင်းဢၼ်ဢမ်ႇႁူႉလိၵ်ႈႁူႉလၢႆးၼႆၵေႃႈၼမ်လႄႈ ၵူၼ်းလူင်ၶဝ် ၸင်ႇတေၸတ်းႁဵတ်းပၢင်သွၼ်လိၵ်ႈတႆး ၼႆလႄႈ ၼၢင်းသိုဝ်ႉလူႇၼႆၵေႃႈ လႆႈၵႂႃႇၶိုၼ်ႈၸွမ်းပိူၼ်ႈဝႆႉယဝ်ႉ။ ယွၼ်ႉပိူဝ်ႈဢမ်ႇမီးၵူၼ်းလဵင်ႉလုၵ်ႈၼႆလႄႈ လႆႈၶၢတ်ႇၵႂႃႇႁိုင်ယဝ်ႉ။ လင်လင်မႃးၼႆႉ ဢမ်ႇပေႃးမီးၵူၼ်းလႄႈ ပိူၼ်ႈသမ်ႉပေႃးလႆႈတဵၵ်းတဵင်ႁႂ်ႈၵႂႃႇ ဢမ်ႇၵႂႃႇဢမ်ႇလႆႈၼႆသေ မၼ်းၵေႃႈ ၸေးတင်းလုၵ်ႈမၼ်းၵႂႃႇႁဵၼ်းၸွမ်းႁေယဝ်ႉဢိူဝ်ႈ။

ၶမ်ႈၼိုင်ႈ ဢေးၼၢင်းဢွၼ်ႇၵေႃႈၶႂ်ႈၼွၼ်းသေလႄႈ ၼၢင်းသိုဝ်ႉလူႇသမ်ႉလူဝ်ႇၵႂႃႇႁဵၼ်းလိၵ်ႈႁေ ဢၢႆႈၸၢႆးဢွၼ်ႇသမ်ႉၸႃႉထႅင်ႈ ၵႂႃႇၵေႃႈလူဝ်ႇၵႂႃႇ ၶဝ်ႈၵေႃႈတွင်ႉမႆႈ ၸပ်းတဵၼ်းပၼ်မၼ်းယူႇတီႈပေးၽႃၼၼ်ႉယဝ်ႉၵေႃႈ

“ပေႃးတေၼွၼ်းၵေႃႈမွတ်ႇၾႆးႁေၼႃႉ” လၢတ်ႈယဝ်ႉ ဢွၵ်ႇၵႂႃႇၵမ်းလဵဝ်။

ဢေးၼၢင်းဢွၼ်ႇၼၼ်ႉၵေႃႈ မီးယူႇတီႈႁိူၼ်းႁင်းၵူၺ်း လႄႈ လိူဝ်သေၼွၼ်းၸၢင်ႈတေႁဵတ်းသင်ယဝ်ႉ မၼ်းၵေႃႈလပ်းၵႂႃႇ ၸဵမ်မိူဝ်ႈၾႆးပႆႇတၼ်းမွတ်ႇၼၼ်ႉသေလႄႈ ၽိူဝ်ႇထိုင်မႄႈၶဝ်ပွၵ်ႈမႃးၶိုၼ်းၵေႃႈ ၾႆးလၢမ်းမႆႈယူႇတီႈပေးၽႃ လၢမ်းမႆႈပႃးၶူဝ်းယူႇယဝ်ႉဢိူဝ်ႈ။ ၼၢင်းသိုဝ်ႉလူႇႁၼ်ၾႆးမႆႈၸိူင်ႉၼၼ်ၵေႃႈ ၼႅတ်ႈဢဝ်တင်းၼမ်ႉမႃးႁူတ်းႁၢတ်ႇသႂ်ႇၵမ်းလဵဝ် ၵတ်ႉၵႃႈ ယင်းဢမ်ႇတၼ်းလၢမ်းမႆႈၼမ်လႃႈ။

“လၢတ်ႈယူႇႁႂ်ႈမွတ်ႇၾႆးယဝ်ႉၸင်ႇၼွၼ်းၼႆ” တင်းမႆႈၸႂ် တင်းပွင်ႉလုၵ်ႈမၼ်းၵႂႃႇမိူဝ်ႈလဵဝ်ၵၼ် ဢေးၼၢင်းဢွၼ်ႇၼၼ်ႉၵေႃႈ တိုၼ်ႇမႃး ႁၼ်ၾႆးလုၵ်ႉမႆႈၸိူင်ႉၼၼ် ႁူမ်ႈပႃးသဵင်လႃႇမႄႈၶဝ်ၼၼ်ႉသေ တင်းတူၵ်းၸႂ်တင်းၵူဝ်လေႃးၵၼ်ယဝ်ႉလႄႈ ႁွင်ႉႁႆႈဢွၵ်ႇမႃးယဝ်ႉ။ မိူဝ်ႈယၢမ်းဢၼ်မၼ်းၶႂ်ႈလႆႈဢွမ်ႈၵွတ်ႇဝႆႉယူႇၼၼ်ႉ ၵူၺ်းသမ်ႉလႆႈငိၼ်းၵႂၢမ်းဢၼ်ဝႃႈ

“မႂ်းတေႁႆႈႁဵတ်းႁင်တိၵ်းတိၵ်း တဵတ်ႇဢႄႈ မႂ်းၶႂ်ႈၺႃးၶွၼ်ႉႁႃႉ”

ပေႃးမၼ်းႁႆႈၵေႃႈ ၼွင်ႉမၼ်းၵေႃႈႁႆႈ ၼၢင်းသိုဝ်ႉလူႇၵေႃႈ ပွႆႇၶႃဝႆႉသေ ၸႂ်ၸႃႉသုၵ်ႉသၵ်ႉၸႂ်ၼႃႇ တင်းၶႄၾႆးၵႂႃႇ ၽဵဝ်ႈပႅတ်ႈဢၼ်မႆႈၸိူဝ်းၼၼ်ႉ သမ်ႉလိုၵ်းၼႃႇယဝ်ႉ ၶႃသွင်ၵေႃႉပီႈၼွင်ႉ ႁႆႈယဝ်ႉပေႃးတၼ်းလပ်းၵႂႃႇၵူၺ်းၶႃယဝ်ႉဢိူဝ်ႈၼႃႇ။ ၼႂ်းၶမ်ႈၶိုၼ်းလူင်ၼၼ်ႉ ပေႉၵႅၼ်ႇမႃးတၼ်ၸႂ်ၼႃႇၵေႃႈဢမ်ႇႁူႉ ၼၢင်းသိုဝ်ႉလူႇၼၼ်ႉၵေႃႈ လၵ်ႉပွႆႇၼမ်ႉတႃမၼ်းႁႆႈဢွၵ်ႇမႃးယဝ်ႉဢိူဝ်ႈ။

ဢေးၼၢင်းဢွၼ်ႇၵေႃႈ ၸဵမ်မိူဝ်ႈၼွင်ႉၸၢႆးမၼ်းၵိူတ်ႇမႃး မၼ်းဢမ်ႇပေႃးသူႈလႆႈၼွၼ်းၸွမ်းမႄႈၶဝ်ၵႃႈႁိုဝ်၊ ပေႃးပေႃႈၶဝ်မႃးၼွၼ်းႁိူၼ်းၼႆၵေႃႈ ၵႆႉၵႆႉၼွၼ်းၸွမ်းပေႃႈၶဝ်ၵူၺ်း၊ ၶႂ်ႈၼွၼ်းၵွတ်ႇမႄႈၼႆသေတႃႉၵေႃႈ ၼွင်ႉမၼ်းသမ်ႉၶႅၼ်သေဢမ်ႇပၼ်ၸမ် မၼ်းၵေႃႈၵႃႈလႆႈယွမ်းသေ ႁိုင်မႃးၵေႃႈဢမ်ႇၶႂ်ႈၼွၼ်းၸွမ်းယဝ်ႉလႄႈ ၼွၼ်းႁူမ်ႇၽႃႈၵႂႃႇႁင်းမၼ်းၵူၺ်းယဝ်ႉ။

ယင်ႇလိုၵ်ႉၵမ်ႉယၼ် တွၼ်ႈသၢဝ်းပႅတ်ႇ

ႁိူၼ်းဢၼ်ဝႃႈၼၼ်ႉ တွၼ်ႈတႃႇ ၸဝ်ႈပိုၼ်းႁၢၼ်လႄႈ ၼၢင်းသိုဝ်ႉလူႇၼႆၵေႃႈ တိုၵ်ႉၸင်ႇႁႃမီးမႃးမိူဝ်ႈယူႇတီႈၼိူဝ်လွႆၼႆႉၵူၺ်းလႄႈ ပဵၼ်တီႈၸုၵ်းမၼ်ႈယင်ႇႁၢၵ်ႈမၼ်းဝႆႉယဝ်ႉသေ ၵႂႃႇတၢင်းလႂ်ယူႇတၢင်းလႂ်ၵေႃႈ ဢမ်ႇမိူၼ်ၼင်ႇတီႈႁိူၼ်းၼႆႉလႆႈတေႉဢိူဝ်ႈ။ ၸဝ်ႈပိုၼ်းႁၢၼ်ၵေႃႈ မိူဝ်ႈၵေႃႉလဵၵ်ႉ...

ယင်ႇလိုၵ်ႉၵမ်ႉယၼ် တွၼ်ႈသၢဝ်းၸဵတ်း

ယူႇၼႂ်းဝၢၼ်ႈၵေႃႈ လႆႈႁဵတ်းၵၢၼ်ၼႃႈဝၢၼ်ႈ ၼၢင်းသိုဝ်ႉလူႇၼၼ်ႉၵေႃႈ သမ်ႉမီးဝႆႉၼႂ်းမူႇၸုမ်းၼၢင်းယိင်းလႄႈ တီႈႁူင်းႁဵၼ်းၼၼ်ႉၵေႃႈ မူႇၸုမ်းၼၢင်းယိင်းၶဝ် ပွၵ်ႉၼိုင်ႈလႄႈပွၵ်ႉၼိုင်ႈ လႆႈပၼ်ႇပုတ်ႈၵၼ်သေၵႂႃႇႁဵတ်းယဝ်ႉ။ ၼၢင်းသိုဝ်ႉလူႇၼၼ်ႉၵေႃႈ...

ယင်ႇလိုၵ်ႉၵမ်ႉယၼ် တွၼ်ႈသၢဝ်းႁူၵ်း

ဝၢႆးသေႁဵတ်းႁိူၼ်းယဝ်ႉၼႆၵေႃႈ ႁၼ်ဝႃႈတီႈယူႇတီႈသဝ်းမၼ်းၵႂၢင်ႈၼႆသေ ပိူၼ်ႈၵေႃႈၽိူမ်ႉၵူၼ်းမႃးလႄႈ ၸဝ်ႈမွင်ႇၵေႃႈ ႁႂ်ႈမႃးယူႇၸွမ်းတီႈႁိူၼ်းၸဝ်ႈပိုၼ်းႁၢၼ်ၵႂႃႇ မီးၽူႈမၢႆ 3 ၵေႃႉ၊ မေႃယႃထႅင်ႈ...