ငိုၼ်းသႅင်ဢၼ်ယူႇၸွမ်းသႅင်ပိုၼ်းတင်းဝၼ်းယဝ်ႉ ဢမ်ႇလႆႈႁၼ်ၸွမ်သႅင်ၵပ်းသိုပ်ႇမႃးၼႆၵေႃႈ သၢႆတႃမၼ်း ၵမ်းၵမ်းယၵ်ႉတူၺ်းၾူၼ်းယူႇတိၵ်းတိၵ်းယဝ်ႉ။
“ဝၼ်းမိူဝ်ႈၼႆႉလႆႈလႄႇၸွမ်းၵၼ် ၵျေႃႇတေႉယဝ်ႉၼေႃ”
ငိုၼ်းသႅင်ယုမ်ႉဢိတ်ႉၼိုင်ႈယဝ်ႉ “ၼၼ်ႉယဝ်ႉၶႃႈ”
“ႁၼ်တူၺ်းၾူၼ်းယူႇၸဵမ်ၵႆႈ မီးသင်လႃႇ မီးၵူၼ်းမွင်းယူႇႁႃႉ”
“ဢမ်ႇလႅပ်ႈမီးၽႂ်မွင်းၶႃႈ”
“ၼၼ်ႁႃႉ..”
“ဝၼ်းၼၼ်ႉတၼ်းလႆႈထၢမ် ၵူၺ်းၵႃႈ ပႆႇႁူႉၶေႃႈတွပ်ႇလႄႈ ၶႂ်ႈထၢမ်သူထႅင်ႈ”
“ထၢမ်မႃးၶႃႈလႄႈ”
“သူမီးၼႃႈႁိူၼ်းယဝ်ႉႁႃႉ”
သမ်ႉပေႃးဢဝ်ငိုၼ်းသႅင်မိုင်ၵႂႃႇယဝ်ႉ ပႆႇတွပ်ႇသင်ၶိုၼ်းသေ ယၵ်ႉတူၺ်းၵူၼ်းၵေႃႉဢၼ်မီးယူႇၽၢႆႇၼႃႈၼၼ်ႉလႄႈ “ၶူးၶႃႈလူး..”
“ပႆႇမီးၼႃ..”
“ၶႃႈၵေႃႈၶႂ်ႈတွပ်ႇၸိူင်ႉၼႆယူႇ ၵူၺ်းၵႃႈၶႃႈၵေႃႈလႅၼ်ၶူးဢမ်ႇလႆႈမိူၼ်ၵၼ်”
“ၶႂ်ႈဝႃႈမီးယဝ်ႉ”
“မီးယဝ်ႉၶႃႈ”
တၢင်းယုမ်ႉဢၼ်လေႃးပႃးသၢႆတႃမွင်မွင်ယူႇၼၼ်ႉၵေႃႈ “ၸူမ်းၸွမ်းယဝ်ႉၼႃႈ”
ငိုၼ်းသႅင်တႄႉၵေႃႈယုမ်ႉတွပ်ႇၸူးၶိုၼ်းၵူၺ်း။
မိူဝ်ႈဢၼ်ငိုၼ်းသႅင်ပွၵ်ႈမိူဝ်းထိုင်ႁိူၼ်းၼၼ်ႉ လႆႈႁၼ်ၸွမ်သႅင်ၼင်ႈယူႇတီႈသူဝ်ႇၽႃႇၼၼ်ႉသေ တူၺ်းထီႇဝီႇယူႇ “ပႆႇၼွၼ်းၵွၼ်ႇႁႃႉ” သမ်ႉဝႃႈငိုၼ်းသႅင်လၢတ်ႈတေႃႇၵေႃႈ ႁဵတ်းၵႅင်ႈဢမ်ႇငိၼ်းသေ။
မိူဝ်ႈငိုၼ်းသႅင်တေၶဝ်ႈႁွင်ႈၵႂႃႇၼၼ်ႉ
“ႁဝ်းပႅတ်ႈၵၼ်လႃႈ”
လႆႈငိၼ်းၼင်ႇၼၼ် ႁူဝ်ၸႂ်ၼႆႉတၢၼ်ႇဝႃႈထုၵ်ႇမိတ်ႈၸူၵ်ႉတႅင်းယဝ်ႉ ၸၼ်ဢဝ်တူဝ်မၼ်းမႃးမီးယူႇတၢင်းၼႃႈၸွမ်သႅင်ၸဵမ်မိူဝ်ႈလႂ်ဢမ်ႇႁူႉ။
“သူဝႃႈႁင်ၵေႃ”
“ႁဝ်းပႅတ်ႈၵၼ်ႁေလႃႈ ၵူၼ်းၵေႃႉဢၼ်သူမွင်းပႂ်ႉၼၼ်ႉၵေႃႈမႃးယဝ်ႉလူး”
“သူႁၼ်ႁဝ်းပဵၼ်ၵူၼ်းၸိူင်ႉႁိုဝ်လႃႇ”
“ၵေႃႈသူႁၵ်ႉမၼ်းဢမ်ႇၸႂ်ႈႁိုဝ် ယဝ်ႉၵေႃႈသူဢမ်ႇလႆႈႁၵ်ႉႁဝ်းလူး သူသမ်ႉတေယူႇၸွမ်းႁဝ်းၵႂႃႇပွင်ႇလွင်ႈသင်လႃႇ”
“သူလၢတ်ႈၵူၺ်းလူးဝႃႈတေယူႇၸွမ်းႁဝ်းၵႂႃႇတေႃႇၸူဝ်ႈၼႆ သူၼႆႉပဵၼ်ၵူၼ်းဢမ်ႇယုမ်ႇလႆႈတေႉဢိူဝ်ႈ”
“သမ်ႉဝႃႈတူဝ်သူယူႇၵေႃႈ ၸႂ်သူဢမ်ႇယူႇမၼ်းသမ်ႉပွင်ႇလွင်ႈသင်လႃႇ”
“ႁဝ်းၶႂ်ႈယူႇဢမ်ႇလႆႈႁႃႉ” ငိုၼ်းသႅင်ၶိုၼ်ႈသဵင်မႃးယဝ်ႉ ၼမ်ႉတႃၵေႃႈၸိုမ်းမႃး ၸွမ်းၼင်ႇလွင်ႈၶမ်ၸႂ်ဢၼ်ယဵၼ်ႉၵၼ်ႈမႃးယူႇတၢင်းဝၼ်းၼၼ်ႉ “ၶႂ်ႈႁႂ်ႈသူမႆႈၸႂ် ၶႂ်ႈႁႂ်ႈသူထၢမ်ဝႃႈတေမႃးမိူဝ်ႈလႂ် ၶႂ်ႈႁႂ်ႈသူၶႅၼ်ဢိူဝ်ႈဝႃႈၵႂႃႇၸွမ်းၽႂ် ၵူၺ်းၵႃႈ သူၵေႃႈဢမ်ႇလၢတ်ႈတေႃႇမႃးသေၶေႃႈသေၵမ်း မိူဝ်ႈယူႇတေႃႇၼႃႈၶဝ် ႁဝ်းၵူၺ်းၵုမ်ႇဝူၼ်ႉထိုင်သူ သူပဵၼ်ၸိူင်ႉႁိုဝ်ၽွင်ႈ ၵႂႃႇႁဵတ်းၵၢၼ်လႆႈယူႇႁႃႉ ၸွင်ႇၵိၼ်ၶဝ်ႈဢၼ်ႁဝ်းႁဵတ်းၼၼ်ႉယူႇႁိုဝ် ႁဝ်းယူႇၸွမ်းၶဝ်ၵူၺ်းၵႃႈဢမ်ႇမိူၼ်ယူႇၸွမ်းသူ မႃးထိုင်ႁိူၼ်း သူၵေႃႈလိုပ်ႈႁဝ်းထႅင်ႈ တေႁႂ်ႈႁဝ်းၵႂႃႇယူႇတီႈလႂ်လႃႇ ၵႂႃႇယူႇၸွမ်းၶဝ်ၼႄႇ”
ၸွမ်သႅင်လႆႈငိၼ်းၼင်ႇၼၼ်ယဝ်ႉၵေႃႈ လုၵ်ႉၸုၵ်းၼိမ်မၼ်ႈၶဝ်ႈၵွတ်ႇဢဝ်တူဝ်ဢွၼ်ႇငိုၼ်းသႅင်ယဝ်ႉ ၸုပ်းသႂ်ႇသီႇသူပ်းမၢင်မၢင်ၼၼ်ႉသေ သဵင်ႁွင်ႉႁႆႈၼၼ်ႉၵေႃႈလႆႈၵိုတ်းလိုဝ်ႈၵႂႃႇတီႈၼၼ်ႈယဝ်ႉ။
သႅင်ပိုၼ်းတေဢွၵ်ႇၶၢဝ်းတၢင်းၵႂႃႇယဝ်ႉၼႆၵေႃႈ ငိုၼ်းသႅင်ၸွမ်းသူင်ႇယဝ်ႉ လႆႈႁၼ်ၵႃးမၼ်းလႅၼ်ႈဢွၵ်ႇၵႂႃႇလွႆးလွႆး ပႃးတၢင်းလွင်ႈလူမ်ၸႂ်ဢၼ်ဢမ်ႇယၢမ်ႈၵိူတ်ႇမႃးသေပွၵ်ႈၼၼ်ႉယူႇ။
သင်ထူပ်းႁၼ်ၶဝ်မိူဝ်ႈလၢႆပီႊပူၼ်ႉမႃးတႄႉ ၸႂ်မၼ်းယင်းတိုၵ်ႉတေၸွမ်းယူႇ ၵူၺ်းၵႃႈ ၶၢဝ်းယၢမ်းမိူဝ်ႈလဵဝ်ၼႆႉ ၶဝ်ၵေႃႈပဵၼ်ၵူၼ်းႁူႉၸၵ်းၵႂႃႇၵေႃႉၼိုင်ႈၵူၺ်းသေ ပဵၼ်လွင်ႈဝၼ်းလင်ၵႂႃႇယဝ်ႉလႄႈ ဢမ်ႇလႆႈလမ်ႇလွင်ႈသင်ယဝ်ႉ။
“ၵူႈလွင်ႈၸိူဝ်းပူၼ်ႉမႃး ယိၼ်းၸူမ်းယဝ်ႉၼႃႈ”
ဝိၼ်ႇဝၢႆႇယၵ်ႉတူၺ်းၵႂႃႇၵူၼ်းဢၼ်ၸုၵ်းယူႇၽၢႆႇလင်ၼၼ်ႉသေယဝ်ႉ
“မႃးမိူဝ်ႈလႂ်လႃႇ”
“မႃးမိူဝ်ႈသူပူၵ်းမိုဝ်းပၢႆးပၢႆမၼ်းယူႇၼၼ်ႉၼႃႇ”
ၸွမ်သႅင်ၵေႃႈ မႃးၸုၵ်းၸွမ်းသေယဝ်ႉ မိုဝ်းသွင်ၵေႃႉယိပ်းၵမ်ၵၼ်သမ်ႉပေႃးမၼ်ႈဝႆႉသေ မုင်ႈတူၺ်းလူတ်ႉလမ်းၼၼ်ႉၽၢတ်ႇဢွၵ်ႇၵႂႃႇလွႆးလွႆးယူႇယဝ်ႉ။
တီႈပၢင်ၵိၼ်လဵင်ႉ လုၵ်ႈႁဵၼ်းၸၼ်ႉၸွမ်သုတ်းႁဵၼ်းယဝ်ႉၼၼ်ႉ ၵေႃႉႁၵ်ႉၶိူဝ်းႁွမ်လႄႈတင်းဢူၺ်းၵေႃႉ လႆႈမႃးၶဝ်ႈႁူမ်ႈၸွမ်းသေ တီႈၽိူၼ်မူႇၶဝ်ၼၼ်ႉၵေႃႈ မီးငိုၼ်းသႅင်ဢၼ်ၼင်ႈယဵၼ်သေယူႇၵေႃႉလဵဝ်ၵူၺ်းလႄႈ ဢူၺ်းၵေႃႉၵေႃႉႁၵ်ႉၶိူဝ်းႁွမ် ဢၼ်ပဵၼ်ၸွမ်သႅင်ၼၼ်ႉ မီးလွင်ႈလီၶဝ်ႈၸႂ်ၼိူဝ်ငိုၼ်းသႅင်မႃးလႄႈ လႆႈၶဝ်ႈၵႂႃႇတူင်ႉတၵ်ႉယူႇ။ ၵူၺ်းၵႃႈ ငိုၼ်းသႅင်ႁႃတၢင်းပၢႆႈပႅတ်ႈသေယဝ်ႉ ငဝ်းႁၢင်ႈငိုၼ်းသႅင်ၼၼ်ႉတႄႉ ယင်းတိုၵ်ႉၸပ်းတႃဝႆႉယူႇ ဢမ်ႇပႆႇၽၢတ်ႇလႆႈၼႂ်းသၢႆတႃမၼ်း။
မၼ်းမီးတၢင်းလိူၵ်ႈတင်းၼမ်တေႁဵတ်းၵၢၼ်လႆႈ ၵူၺ်းၵႃႈ ႁူႉဝႃႈၶိူဝ်းႁွမ်ၶဝ်ယူႇၼႂ်းဝဵင်းၼႆႉလႄႈ မၼ်းလိူၵ်ႈမႃးတီႈၼႆႈ တႃႇတေလႆႈႁူပ်ႉတင်းငိုၼ်းသႅင်ထႅင်ႈပွၵ်ႈၼိုင်ႈ ၵူၺ်းၵႃႈဢမ်ႇထၢင်ႇ တေလႆႈမႃးယူႇၸမ်ၵၼ်ပေႃးပဵၼ်တၢၼ်ႇၼႆႉ လႄႈ ဢမ်ႇထၢင်ႇဝႃႈ ၵူၼ်းၵေႃႉဢၼ်ပၢႆႈပႅတ်ႈမၼ်းဝၼ်းၼၼ်ႉ တေမႃးၸုၵ်းၶႅပ်ႇၶၢင်ႈၵၼ်ယူႇၸိူင်ႉၼႆ ပၢၼ်ဢွၼ်ၸုင်ၸူး ဢၼ်ဝႃႈႁိုဝ်ၼေႃ။
သုတ်းယဝ်ႉ
ၸိူင်းႁူဝ်ၼႆႉၵေႃႈ ၽူႈတႅမ်ႈလိၵ်ႈ တႅမ်ႈဝႆႉၸဵမ်မိူဝ်ႈပီ 2020 ၼၼ်ႉယဝ်ႉ ၸင်ႇလႆႈမႃးမႄးထတ်းၶိုၼ်း မိူဝ်ႈ 2024 ၵူၺ်းၵႃႈ လႆႈၵိုတ်းလိုဝ်ႈၵႂႃႇသေ ၸင်ႇၶိုၼ်းမႃးမႄး ၼႂ်းပီ 2026 ၼႆႉလႄႈ ၸင်ႇတေလႆႈပိုၼ်ၽႄႈဢွၵ်ႇမႃးၶႃႈယဝ်ႉ။
ပေႃးမီးတီႈၽိတ်းတီႈပိူင်ႈ တီႈဢမ်ႇထုၵ်ႇတီႈလီမူၼ်ႉမႄးၼႆၵေႃႈ ပၼ်တၢင်းႁၼ်ထိုင်လႆႈယူႇၶႃႈ။
ၼပ်ႉယမ်သေ
ပၢႆၵမ် − မွၵ်ႇႁူမ်ႈၾႃႉ
