ဢၢႆႈၸၢႆးၼၼ်ႉ ၵေႃႉယႂ်ႇပဵၼ်မၢဝ်ႇမႃးယဝ်ႉလူး မေႃႁူႉမေႃဢၢႆ မီးၸူႉမီးၸူဝ်းမႃးယဝ်ႉလႄႈ။ ယူႇတႂ်ႈငဝ်းဢူႈမႄႈၵႂႃႇၸိူင်ႉၼႆၵေႃႈ ဢမ်ႇပေႉတူဝ်ပေႉၵၢၼ်းလႆႈ မၼ်းၵေႃႈသမ်ႉၶႂ်ႈႁႃငိုၼ်းႁႃတွင်းႁေ ဢွၵ်ႇၸႂ်ၶႂ်ႈၵႂႃႇႁဵတ်းၵၢၼ်မိူင်းထႆးမႃးယဝ်ႉ။ ပေႃႈမႄႈမၼ်းၵေႃႈ ၵႃႈလႆႈပွႆႈၵႂႃႇယဝ်ႉ။
တီႈႁိူၼ်းဢၼ်ယၢမ်ႈမီးလုၵ်ႈဢွၼ်ႇ ၵႆႉပွင်ႉၵႆႉလႃႇယူႇတႃႇသေႇၼၼ်ႉၵေႃႈ ယဵၼ်ငဝ်ၵႂႃႇယဝ်ႉဢိူဝ်ႈ။ ပေႃးၵႂႃႇႁဵတ်းႁႆႈၼႆၵေႃႈ ၵူၼ်းပႂ်ႉႁိူၼ်းပေႃးဢမ်ႇမီး။ ၵႂႃႇလႂ်ၼႆၵေႃႈ ၵူၼ်းႁပ်ႉၵူၼ်းသူင်ႇဢမ်ႇမီး သမ်ႉပေႃးၶုၵ်းၸႂ်လႆႈ လုၵ်ႈၸၢႆးၶဝ်မႃးယဝ်ႉ။ ပေႃးဝႃႈၵႂႃႇႁႆႈၼႆ ဢွၼ်ၵၼ်ပႆလူင်ၵႂႃႇ ပေႃးမီးလူတ်ႉၼႆၵေႃႈ ယွၼ်းၵႂႃႇၸွမ်းပိူၼ်ႈသေ။ သင်ထိုင်ဝၼ်းသိၼ်ဝၼ်းၶိုၼ်ႈၵျွင်းၼႆၵေႃႈ သွင်ၵေႃႉပူႇဢွၵ်ႇ ဢွၼ်ၵၼ်ပႆလူင်မႃးၼႂ်းဝၢၼ်ႈ ဢမ်ႇမီးၵူၼ်းၸွႆႈ ႁဵတ်းယူႇႁင်းၵူၺ်း။ 2025 ပီၼႆႉၵေႃႈ ၶႂ်ႈႁိူဝ်ႉဝႆႉလႄႈ ဝူၼ်ႉဝႃႈ ပဵၼ်ပွၵ်ႈလိုၼ်းၵူၺ်းယဝ်ႉ ၼႆသေ ၸင်ႇၶၢႆၵႂႃႇပႅတ်ႈယူႇ။
ဢၢႆႈၸၢႆးဢွၼ်ႇ ၵႂႃႇႁဵတ်းၵၢၼ်မိူင်းထႆးၼႆၵေႃႈ တႃႇဝႃႈတေမီးငိုၼ်းသူင်ႇႁိူၼ်းၸိူင်ႉပိူၼ်ႈၼႆၼၼ်ႉတႄႉ ဢမ်ႇတေႃႇတေႃႇယဝ်ႉ။ တႃႇယူႇမိူင်းပိူၼ်ႈၼႆၵေႃႈ ၵႃႈဝတ်းၵႃႈဝႂ်။ ၵႂႃႇၵႂႃႇမႃးမႃးၵေႃႈယၢပ်ႇလႄႈ ၽွၼ်ႇလူတ်ႉထႅင်ႈသေ ၵႃႈၵိၼ်ၵႃႈယႅမ်ႉ၊ ၵႃႈႁွင်ႈ၊ ၵႃႈၼမ်ႉ၊ ၵႃႈၾႆးမၼ်းထႅင်ႈ တေႃႇလိူၼ်တေႃႇလိူၼ်ၼၼ်ႉ တင်းလႆႈပႅင်းၵိၼ်ယူႇ။ ပေႃႈမႄႈမၼ်းၵေႃႈ ပွႆႇႁႂ်ႈမၼ်းၵႂႃႇသၢင်ႈတူဝ်ၵူၺ်းၵေႃႈလႆႈယဝ်ႉ။
လုၵ်ႈယိင်းၶဝ်ၼၼ်ႉသမ်ႉ ႁဵတ်းၵၢၼ်ၵူၼ်းတင်းၼမ်ႁေ ၵုမ်ႇမိုင်ႉႁဵတ်းၵၢၼ်ပိူၼ်ႈၵူၺ်း ၵၢၼ်တႃႇႁႃငိုၼ်းဢၼ်ဝႃႈၼၼ်ႉၵေႃႈ ဢမ်ႇသူၼ်ၸႂ်သင် ၶၢဝ်းယၢမ်းတႃႇလိုဝ်ႈယူႇၵူၺ်းၵေႃႈ ဢမ်ႇၶႂ်ႈမီးယဝ်ႉ။ တေဝႃႈငိုၼ်းလိူၼ် တေႃႉတႄႉပေႃးယႃသႆႈၵူၺ်းၼႃႇ။ ၼၼ်ႉတႄႉ ႁိုင်ႁိုင်ၼၢၼ်းၼၢၼ်းၵေႃႈ မိူဝ်းလႄႇမိူဝ်းၸႂ်းႁိူၼ်းယူႇ။
သွင်ၵေႃႉပူႇဢွၵ်ႇ ၽၢၼ်ႇလူမ်းၽၢၼ်ႇၼၢဝ် ၽၢၼ်ႇတုၵ်ႉၸွမ်းၵၼ်မႃး တေႃႇလုၵ်ႈပေႃးၵေႃႉယႂ်ႇ သၢင်ႈတူဝ်ၵႂႃႇ ႁင်းၽႂ်ႁင်းမၼ်း။ ႁိူၼ်းဢၼ်သၢင်ႈမႃးႁူမ်ႈၵၼ်ၼၼ်ႉၵေႃႈ ယင်းတိုၵ်ႉပဵၼ်ႁိူၼ်းလင်လဵဝ် ဢၼ်မီးသွင်ၶႃၼၼ်ႉၵူၺ်းလႄႈ ဢမ်ႇၸၢင်ႈၵႂႃႇတၢင်းလႂ်လႆႈထႅင်ႈယဝ်ႉ။
ဝၢႆးသေဢေးၼၢင်းၵႂႃႇႁဵတ်းၵၢၼ်လႆႈမွၵ်ႈ သၢမ်ပီၼႆႉၵေႃႈ ၸဝ်ႈပိုၼ်းႁၢၼ်ၵေႃႈ ႁိူဝ်ႉမႃးထဝ်ႈမႃးယဝ်ႉသေ ဢမ်ႇၸၢင်ႈၵႂႃႇတပ်ႉယဝ်ႉလႄႈ ၶၢႆႉမႃးႁဵတ်းၵၢၼ်တီႈၼႂ်းဝၢၼ်ႈၶိုၼ်း။ သမ်ႉပဵၼ်ၵူၼ်းၵႆႉလူႇၵႆႉတၢၼ်းလႄႈ ပိူၼ်ႈၵေႃႈ ဢဝ်မၼ်းယူႇ ၼႂ်းၽၢႆႇၵိၼ်လူႇလူႉတၢႆ။ပေႃးမီးပၢင်လူႇပၢင်တၢၼ်းၵေႃႈ လႆႈၵႂႃႇတႃႇသေႇ။ မၢင်ပွၵ်ႈဢမ်ႇလိူဝ်လႆႈ ပူႇၵျွင်းၵေႃႈလႆႈႁဵတ်းပႃး သမ်ႉဝႃႈဢမ်ႇမေႃလိၵ်ႈၵေႃႈ မေႃႁေႃးၵႂၢမ်းဝႆႈၽြႃး ယင်းတွင်းယူႇလႄႈ။ ပေႃးမီးၵူၼ်းလူႉၵူၼ်းတၢႆၼႆၵေႃႈ လႆႈၵႂႃႇတႃႇသေႇ လႅပ်ႈဝႃႈတေလႆႈလိုဝ်ႈၼႃႇ ပေႃးဢမ်ႇႁူႉဢမ်ႇၵႂႃႇ ပိူၼ်ႈသမ်ႉပေႃးၶႆႈထိုင်ႁိူၼ်းယဝ်ႉ။
ပီ 2026 ၼႆႉတႄႉ သွင်ၵေႃႉပူႇဢွၵ်ႇယူႇႁိူၼ်းသေ ႁဵတ်းႁႆႈယူႇတီႈႁိူၼ်း ႁဵတ်းသူၼ်ဢၼ်ယၢမ်ႈၽုၵ်ႇယၢမ်ႈသွမ်ႈ တၢၼ်ႇပေႉလႆႈၵူၺ်းလႄႈ ယူႇၵႂႃႇမိူၼ်ၼင်ႇၼႃႈႁိူၼ်း ၵူၼ်းဝၢၼ်ႈၵူၼ်းသူၼ်ၵႂႃႇၸိူင်ႉၼၼ်ၵူၺ်း။
ၵၢင်ဝၼ်းၸမ်ၸၢႆႉၸိူၼ်း
“မႃးလႄႈၼၢႆးၼႆႉဢိူၺ်ႉ..”
ၵၢင်ၶမ်ႈလပ်းသိင်ႇၸွမ်ႉႁွမ်ႉ ၼၢင်းသိုဝ်ႉလူႇၵေႃႈ ယွၵ်းယွၵ်းလူင်ႁွတ်ႈႁိူၼ်းမႃး ပႃးတင်းသႃႉၽၵ်းၵၢတ်ႇသေ ၸဝ်ႈပိုၼ်းႁၢၼ်ၵေႃႈ ဢဝ်မႃးလိူၵ်ႈသႂ်ႇဝၢၼ်ႇယဝ်ႉ ၼၢင်းသိုဝ်ႉလူႇၼၼ်ႉတႄႉ ၵႂႃႇဢၢပ်ႇၼမ်ႉသေ၊ တေႃႇပေႃးတူဝ်ႈတၼ်းယဝ်ႉၵေႃႈ ၸဝ်ႈပိုၼ်းႁၢၼ်ပေႃးႁုင်ၽၵ်းသုၵ်းသေ ၵိၼ်ၶဝ်ႈၵုမ်းၵၼ်ယဝ်ႉၵေႃႈ ၽဵဝ်ႈသိမ်းယဝ်ႉသေ ပိၵ်ႉၾႆးၶဝ်ႈၼွၼ်းၵႂႃႇ။ ဝႆႉၵိုတ်းသဵင်မႅင်းႁွင်ႉၸွမ်းလူမ်းယူႇၼႂ်းၶမ်ႈၶိုၼ်းလပ်းသိင်ႇၼၼ်ႉၵူၺ်းယဝ်ႉ။
————————————————–
“ၸၢမ်ၽွင်း..”
“ဝႃႈႁိုဝ်”
“သူဢမ်ႇၶႂ်ႈမိူဝ်းယူႇၸွမ်းပေႃႈတင်းမႄႈတီႈႁိူၼ်းႁႃႉ”
“ၶႂ်ႈမိူဝ်းဢိူဝ်ႈ…”
“ဢမ်ႇမိူဝ်းလႆႈႁႃႉ”
“လႆႈဢိူဝ်ႈ..ၵူၺ်းၵႃႈ ၵူဝ်ဝႃႈတေမိူဝ်းပၼ်ႁႂ်ႈၶဝ်လဵင်ႉထႅင်ႈၵူၺ်းၼၼ်ႉၼႃႇ”
“သင်ဢမ်ႇသင် လႆႈယူႇၸွမ်းလုၵ်ႈၼႆၵေႃႈဢုၼ်ႇၸႂ်ဢိတ်ႉၼိုင်ႈဢိူဝ်ႈ”
“ၵွမ်ႉၵၢၼ်ႁဝ်းႁဵတ်းယူႇၼႆႉ တႃႇလဵင်ႉတွင်ႉႁဝ်းၵူၺ်း တင်းဢမ်ႇပေႃးယဝ်ႉ သင်မိူဝ်းယူႇတၢင်းပုၼ်ႉ ႁဝ်းၵေႃႈဢမ်ႇႁူႉတေႁဵတ်းႁင်လႆႈတေႉဢိူဝ်ႈ တေႃႈၼင်ႇမိူဝ်းလႄႇၵူၺ်း ငိုၼ်းႁဝ်းပေႃးဢမ်ႇမီးတေႉလူင်”
“သူယူႇတၢင်းၼႆႉႁေတၢင်းပုၼ်ႉၵေႃႈပဵင်းၵၼ်ၵူၺ်းလူး”
“တၢင်းၼႆႉ ႁဝ်းယင်းၸၢင်ႈႁႃတၢင်းၼွၵ်ႈမၼ်းယူႇဢိတ်းဢွတ်း ယူႇတၢင်းပုၼ်ႉဢမ်ႇႁူႉတေႁဵတ်းႁင်တေႉဢိူဝ်ႈ”
“ယဝ်ႉသူတေယူႇၵႂႃႇၸိူင်ႉၼႆတိၵ်းတိၵ်းၵူၺ်းႁႃႉ”
“ဢမ်ႇႁူႉမိူၼ်ၵၼ် မိူဝ်ႈလဵဝ်ၼႆႉယူႇလႆႈၸိူင်ႉႁိုဝ်ၵေႃႈယူႇၵႂႃႇၸိူင်ႉၼၼ်ၵူၺ်းယဝ်ႉ”
“ၶၢဝ်းယၢမ်းသူမီးၼမ်ယူႇသေတႃႉ တႃႇၶဝ်တႄႉဢမ်ႇၵိုတ်းၼမ်ယဝ်ႉၼႃႈ”
ယူႇယူႇ သဵင်ႁႆႈၸၢမ်ၽွင်းၵေႃႈမေႃးဢွၵ်ႇမႃး လေႃးပႃးသဵင်လၢတ်ႈ “ႁဝ်းတေလႆႈႁဵတ်းႁိုဝ်ငဝ်းလိူၼ် ႁဝ်းဢမ်ႇႁူႉတေဢိူဝ်ႈ”
ငဝ်းလိူၼ်ၵေႃႈထွမ်ႇသဵင်ႁႆႈမၼ်းတေႃႇသုတ်းယဝ်ႉ။
“ႁဝ်းႁူႉဢိူဝ်ႈ..”
“ႁဵတ်းႁင်”
“ပေႃးဝႃႈသူၽွမ်ႉ ႁဝ်းၸွႆႈလႆႈယူႇၼႃ”
“ၸွႆႈသင်”
“ၸွႆႈသၢင်ႈၼႃႈႁိူၼ်းသူၼၼ်ႉၼႃႇ”
“ဝူၼ်ႉဝႃႈမၼ်းတေၸွႆႈသင်လႆႈ ယႃႇဢမ်ႇယႃႇမီးၵူၼ်းတေလႆႈလဵင်ႉၼမ်မႃးထႅင်ႈ တေႁဵတ်းႁိုဝ်”
“သူဢမ်ႇဢၢၼ်းဢဝ်ယဝ်ႉၼႄႇၸၢတ်ႈၼႆႉ တေယူႇၸိူင်ႉၼႆၵူၺ်းယဝ်ႉႁႃႉ”
“ၽဝႁဝ်းပဵၼ်ၸိူင်ႉၼႆယူႇ တေႁႂ်ႈဢဝ်ပိူၼ်ႈမႃးယၢပ်ႇၸွမ်းလႆႈၸိူင်ႉႁိုဝ်”
“ႁဝ်းၽွမ်ႉတႃႇတေယူႇႁိမ်းၶၢင်ႈသူလႆႈယူႇၼႃ ပေႃးဝႃႈသူလူဝ်ႇ”
“ၸိူင်းသူသုတ်းယဝ်ႉႁႃႉ”
“သုတ်းယဝ်ႉ”
“ႁဝ်းတင်းပႆႇလႆႈၶဝ်ႈလူဢိူဝ်ႈၼႆႉ”
“ၸူးၸႂ်တႄႉပႆႇၶႂ်ႈသုတ်း ၶႂ်ႈႁူႉလွင်ႈသူထႅင်ႈဢိူဝ်ႈ”
“လွင်ႈႁင်ထႅင်ႈ”
“ၶၢဝ်းတၢင်းသူလႆႈမႃးႁဵတ်းသိုၵ်းၼၼ်ႉဢိူဝ်ႈ ႁဵတ်းၸိူင်ႉႁိုဝ်၊ ၼႂ်းၵၢင်ၸႂ်သူသမ်ႉပဵၼ်ၸိူင်ႉႁိုဝ်”
“ႁဝ်းၸွင်ႇၵွႆႈလၢတ်ႈၼႄ”
ဝၼ်းယဝ်ႉဝၼ်းပူၼ်ႉၵႂႃႇ ငဝ်းလိူၼ်တၵ်ႉၸူးၸၢမ်ၽွင်း ဢမ်ႇလႆႈႁၼ်တုမ်ႉတွပ်ႇၶိုၼ်း မီးၵႂႃႇပဵၼ်ဝူင်ႈၵေႃႈ ဢမ်ႇမီးၶေႃႈၵႂၢမ်းသင်။

