ယင်ႇလိုၵ်ႉၵမ်ႉယၼ် တွၼ်ႈသၢမ်သိပ်းသွင်

ဝၢႆးသေဢေးၼၢင်းယူႇၸၼ်ႉသုင်ယဝ်ႉ ၶဝ်ၵေႃႈဢမ်ႇလဵင်ႉမူယဝ်ႉလႄႈ တူမ်ႈလဝ်ႈႁဵတ်းႁႆႈႁဵတ်းသူၼ်ၶၢႆၽၵ်း လဵင်ႉၵၼ်ၵႂႃႇၵူၺ်းယဝ်ႉ။ မၢင်ပွၵ်ႈၵေႃႈ ႁႃယႃထိူၼ်ႇယႃၶိူဝ်းၸိူဝ်းၼႆႉၶၢႆယူႇ။ ၼၢင်းသိုဝ်ႉလူႇသမ်ႉ ပေႃးၶၢဝ်းႁိုဝ်ႉၼႆႉ ၵႆႉပဵၼ်ၵူၼ်ႉၵူၼ်ႉၶိုၼ်ႈၶိုၼ်ႈ ၵႆႉလႆႈသုမ်ႇဢီႈယႃယူႇတႃႇသေႇလႄႈ။ ၸဝ်ႈပိုၼ်းႁၢၼ်ၵေႃႉၵႂႃႇႁႃယႃသေ မၢင်ပွၵ်ႈၼႆၵေႃႈ ၸူဝ်းတင်းဢေးၼၢင်းၵႂႃႇၸွမ်းယူႇဢိူဝ်ႈ။

ဢေးၼၢင်းၼၼ်ႉၵေႃႈ ပေႃးဝႃႈတဝ်ႁူၺ်ႈတဝ်လွႆ လႄႇသူၼ်ၸိူဝ်းၼႆႉၼႆ မၼ်းႁၢင်ႈၵႆႉၼႃႇ။ မၢင်ပွၵ်ႈၵေႃႈ ၵႂႃႇလႄႇသူၼ်ႁင်းၵူၺ်းမၼ်း ၵႂႃႇႁႃသွၵ်ႈၽၵ်းသွၵ်ႈယိူဝ်ႈၸွမ်းႁႆႈၸိူဝ်းၼႆ။၊ ၼႂ်းထိူၼ်ႇလူင်ၼၼ်ႉ မၼ်းငိုပ်းတၼ်တၢၼ်ႇႁိုဝ်ၵေႃႈ ယင်းဢမ်ႇလီၵူဝ်တၢၼ်ႇၼႂ်းဝၢၼ်ႈ ဢၼ်မီးၵူၼ်းပေႃးတဵမ်ယူႇသဵင်ႈ သဵင်သူပ်းသဵင်ၵႂၢမ်းမေႃးတႂ်ႈမေႃးၼိူဝ် ပေႃးဢမ်ႇယဝ်ႉလႆႈၼၼ်ႉ။

ဢမ်ႇႁူႉပဵၼ်သင် ပေႃးဝႃႈႁႆႈၼႆၼၼ်ႉ ပေႉၶႂ်ႈၵႂႃႇႁဵတ်းၵႆ။ ပေႃးၽုၵ်ႇၵႂႃႇယဝ်ႉတီႈၵဝ်ႇဢမ်ႇလီၵေႃႈၶႂၢၵ်ႈထႅင်ႈ ၶႂၢၵ်ႈဢမ်ႇၸၢင်ႈယဝ်ႉၵေႃႈ ႁႃတီႈမႂ်ႇ။ မိူဝ်ႈဢၢင်ႈၶႂၢၵ်ႈတီႈသေ တေႁဵတ်းထႅင်ႈမႂ်ႇ သမ်ႉပေႃးၸမ်ၽုၵ်ႇယဝ်ႉၼၼ်ႉ ပိူၼ်ႈတေႁဵတ်းႁူင်းႁဵၼ်းၼႆသေ ဢဝ်ၵႃးမႃးထုၺ်ပႅတ်ႈလၢႆလၢႆ ၵႃႈမႃႇၵႃႈႁႅင်းၵူၺ်းၵေႃႈ ပေႃးဢမ်ႇလႆႈၶိုၼ်းသေဢိတ်းတေႉၼင်ႇဝႃႈ။ ထႆၵႂႃႇယဝ်ႉ တေဝႃႈႁဵတ်းႁိူၼ်းႁႃႉၵေႃႈဢမ်ႇႁဵတ်း ပၼ်ႁႂ်ႈႁူၵ်ႉပေႃးၶိုၼ်ႈ လိၼ်ပေႃးႁၢမ်းပဝ်ႇယူႇႁဵတ်းၼၼ်။ ၸဝ်ႈပိုၼ်းႁၢၼ်ၵေႃႈ ၸၢင်ႈတေဝႃႈႁိုဝ် ယွၼ်ႉမၼ်းပဵၼ်ၶေႃႈသင်ႇၵူၼ်းလူင်ယဝ်ႉလူး ၵႃႈလႆႈဝႃႈ “ၵေႃႈယဝ်ႉလႃႈ” ၼႆၵူၺ်းဢိူဝ်ႈ။

ဢေးၼၢင်းၶိုၼ်ႈၸၼ်ႉသိပ်းဢဵတ်းယဝ်ႉၼႆၵေႃႈ လႆႈၶၢႆႉတီႈယူႇ ၵႂႃႇၼွၼ်းတီႈႁူင်းသဝ်းသေ။ တႄႇၽၢတ်ႇယၢၼ်ပေႃႈမႄႈၵႂႃႇယဝ်ႉဢိူဝ်ႈ ၼိုင်ႈဝူင်ႈၼိုင်ႈပွၵ်ႈၸင်ႇမိူဝ်းၼွၼ်းႁိူၼ်းၼိုင်ႈၶိုၼ်း။

ပေႃးမၼ်းမိူဝ်းႁိူၼ်းၼႆၵေႃႈ မိူဝ်းႁဵတ်းၵိၼ်တၢင်းၵိၼ်မဵဝ်းၼၼ်ႉမဵဝ်းၼႆႉ၊ မိူဝ်းႁဵတ်းၽၵ်းႁႅင်ႈသေ မၢင်ပွၵ်ႈၵေႃႈဢဝ်ၵႂႃႇၶၢႆတီႈႁူင်းႁဵၼ်းၸိူဝ်းၼႆႉပႃး။ မႄႈၶဝ်ပေႃးဝႃႈႁင်းမၼ်း ပေႃးမႃးႁိူၼ်းၵေႃႈ ပေႉမီႇၵီးၶဝ်ႈၽၵ်းၼႃႇ။

မၢင်ပွၵ်ႈပေႃးလုၵ်ႈမၼ်းဢမ်ႇမိူဝ်းႁိူၼ်းၵေႃႈ သမ်ႉငႅဝ်ငႅဝ်ႁေ ပေႃးၶိုၼ်းမိူဝ်းသမ်ႉ

“ပၢတ်ႈပုၼ်ႉႁႅင်ႉဢမ်ႇမႃးလႃႇ”

“ပဵၼ်ၸဝ်ႈမိုဝ်ႉႁိုဝ်”

“တီႈႁူင်းႁဵၼ်းဢမ်ႇၶႂ်ႈလႆႈၽၵ်းသင်ၼႄႇ”

“ၶႂ်ႈလႆႈယူႇၵူၺ်းယူဝ်ႉၼၼ်ႉ မီးၽၵ်းႁင်လႃႇ”

“ထူဝ်ႇမႅင်းၸီးၸိူဝ်းၼႆႉဢိူဝ်ႈ”

ဢေးၼၢင်းၵေႃႈ သိုပ်ႇၾူင်းထၢမ်တူၺ်းၸဝ်ႈမိုဝ်ႉၶဝ်သေယဝ်ႉ လႆႈၶေႃႈတွပ်ႇယဝ်ႉၵေႃႈ “ဢဝ်ယူႇဝႃႇ” ၵၢင်ၼႂ်မႃး ဢွၼ်ၵၼ်လူင်းၵႂႃႇၵဵပ်းယဝ်ႉ။ ပေႃးဝၢႆးဝၼ်းၼႆ ၵူၼ်းယူႇၸွမ်းၸဝ်ႈပိုၼ်းႁၢၼ် ဢဝ်တင်းလူတ်ႉသေၵႂႃႇသူင်ႇၽၵ်းယဝ်ႉ ၵႂႃႇသူင်ႇပႃးဢေးၼၢင်းယူႇ။ တေဝႃႈႁိုဝ်ၵေႃႈ ဢေးၼၢင်းၼၼ်ႉသမ်ႉဢမ်ႇႁတ်းႁေႃႈလူတ်ႉမိူၼ်ၵၼ်ယဝ်ႉ။

ၸဝ်ႈပိုၼ်းႁၢၼ်ၵေႃႈ မၢင်ပွၵ်ႈႁွင်ႉၵူၼ်းမႃးယူႇၸွမ်းႁေ ပေႃးယူႇယဝ်ႉၵိၼ်လဝ်ႈၼႃႇၼႆၵေႃႈ သူင်ႇၶိုၼ်ႈမိူဝ်းၶိုၼ်းႁေ ဢဝ်တၢင်ႇၵေႃႉမႃးထႅင်ႈၵေႃႈ ႁၢင်ႈဢမ်ႇပၢႆႈပိူင်ႈသင် ပၼ်ႇတူင်ႇယူႇၸိူင်ႉၼၼ်ၵူၺ်း ၶွင်သမ်ႉပဵၼ်ၵူၼ်းႁုင်လဝ်ႈၼၼ်ႉၼႃႇ။ ပေႃးဢမ်ႇမီးၵူၼ်းသမ်ႉ ဢမ်ႇမီးၵူၼ်းတေႃႉသူင်ႇၼၼ်ႉလႄႈ ယၢပ်ႇၸႂ်ယူႇၵေႃႈ ၵႃႈလႆႈဢဝ်ဝႆႉယဝ်ႉ။

ၸၼ်ႉသိပ်းဢဵတ်းယဝ်ႉ ၸၼ်ႉသိပ်းသွင်ယဝ်ႉသေ ၵႂႃႇၽိုၵ်းၵၢၼ်ယူႇဝႆႉတီႈ ၽၢႆႇၵၢၼ်သိုဝ်ႇၼႆလႄႈ ၼင်ႇဝႃႈမီးလွင်ႈသူၼ်ၸႂ်မၼ်းမႃး တႄႇၸဵမ်ၵၢၼ်ယိပ်းၵွင်ႈထႆႇ ၵၢၼ်တတ်းတေႃႇၸိူဝ်းၼႆႉ ႁဵတ်းႁႂ်ႈၸႂ်မၼ်း လႆႈတိုၼ်ႇတဵၼ်ႈမႃးၼိူဝ်ၵၢၼ်ငၢၼ်းတီႈၼႆႈဝႆႉယဝ်ႉ။

ၸဝ်ႈပိုၼ်းႁၢၼ်ၶႃၽူဝ်မေးၵေႃႈ လဵင်ႉလုၵ်ႈမႃးလႆႈဢႃႇယုဢသၢၵ်ႈ 19 ပီယဝ်ႉလႄႈ ထိုင်ၶၢဝ်းယၢမ်းတေပၼ်ႁႂ်ႈၶဝ်ၸႂ်ႉၸၢတ်ႈပၢၼ်ၶဝ်ယဝ်ႉ။

ဢေးၼၢင်းၵေႃႈ ႁၼ်ဝႃႈ ပေႃးသိုပ်ႇၶိုၼ်ႈႁဵၼ်းထႅင်ႈ ပေႃႈမႄႈမၼ်းၵေႃႈတေလႆႈႁႃလဵင်ႉမၼ်းထႅင်ႈလႄႈ မၼ်းၵေႃႈတေပႆႇပေႉတူဝ်သေ တိုၵ်ႉတေလႆႈယွၼ်းငိုၼ်းဢူႈမႄႈၵႂႃႇထႅင်ႈၵူၺ်း။ သင်ၸိူဝ်ႉဝႃႈမၼ်းဢွၵ်ႇၵႂႃႇယဝ်ႉ ဢမ်ႇလဵင်ႉၶဝ်လႆႈၵေႃႈ သူပ်းတွင်ႉၸဝ်ႈၵဝ်ႇၼၼ်ႉ ပေႉလႆႈယူႇၼႆသေ ၸင်ႇတႅပ်းတတ်းတႃႇဢွၵ်ႇႁူင်းႁဵၼ်းၵႂႃႇယဝ်ႉ။

ဢူၺ်းၵေႃႉမၼ်းဢၼ်ဢွၵ်ႇၵႂႃႇၼၼ်ႉတႄႉ ဢွၼ်ၵၼ်ႁဵတ်းၶူးသွၼ်ယူႇလၢႆၵေႃႉ၊ မီးမၼ်းၵူၺ်း ဢၼ်ဢမ်ႇၵႂႃႇၸွမ်းပိူၼ်ႈလႄႈ ဢွၵ်ႇၵႂႃႇယူႇတီႈ ၽၢႆႇၵၢၼ်သိုဝ်ႇၼၼ်ႉၵမ်းသိုဝ်ႈယဝ်ႉ။ ယွၼ်ႉပိူဝ်ႈယၢမ်ႈၽိုၵ်းၵၢၼ်မႃးယဝ်ႉလႄႈ ပႃးၸႂ်ဝႆႉၽွင်ႈယူႇသေ ၵၢၼ်ငၢၼ်းၽွၼ်းၵၢၼ်မၼ်းၵေႃႈၸဵဝ်းၶိုၼ်း ၸဵဝ်းပေႉတူဝ်မႃးလႆႈယဝ်ႉ။ မၼ်းၵေႃႈလႆႈပဵၼ်ၵႂႃႇၽူႈသိုဝ်ႇၶၢဝ်ႇ ပိၼ်ႇထႆးပဵၼ်တႆးလႄႈ ပိၼ်ႇပိုၼ်ႉႁူႉပၢႆးႁၼ်ၸိူဝ်းၼႆႉ ထိုင်တီႈမၼ်းပေႃးၸပ်းယၢမ်ႈၵၢၼ်ပိၼ်ႇၽႃႇသႃႇၵႂႃႇလူၺ်ႈဢမ်ႇႁူႉတူဝ်ယဝ်ႉ။ ငိုၼ်းလိူၼ်ၼႆတႄႉၵေႃႈ ငိုၼ်းလိူၼ်သိုၵ်းႁၢၼ် တင်းဢမ်ႇတဵမ်ႁဵင်ယဝ်ႉ ၵႃႈၽၵ်းထႅင်ႈဢိတ်ႉၼိုင်ႈ လႆႈယူႇမွၵ်ႈႁဵင်ၼႆႉတေႃႇလိူၼ်။

ဝၢႆးသေလုၵ်ႈမၼ်းႁဵၼ်းယဝ်ႉၵႂႃႇၼႆၵေႃႈ ၵၢၼ်ႁုင်လဝ်ႈၶဝ်ၼၼ်ႉ လိုဝ်ႈပႅတ်ႈယဝ်ႉ။ ႁဵတ်းႁႆႈႁဵတ်းသူၼ်ၵႂႃႇၵူၺ်း။ ဢမ်ႇႁိုင် ဢေးၼၢင်းၵေႃႈ လႆႈၶၢႆႉၼႃႈၵၢၼ်ၵႂႃႇယူႇၼႂ်းမိူင်းၼႆလႄႈ ၽၢတ်ႇယၢၼ်ႁိူၼ်းၵႂႃႇယူႇတီႈၵႆပေႃႈၵႆမႄႈ သမ်ႉဝႃႈၸႂ်ႁၢႆယူႇသေတႃႉၵေႃႈ ၽဝမၼ်းၵႃႈလႆႈပွႆႇၵႂႃႇယဝ်ႉ။ လုၵ်ႈၸဝ်ႈၵဝ်ႇ ပေႃးဢမ်ႇယုမ်ႇယမ် ပေႃးဢမ်ႇႁူႉၸၵ်း တေဢမ်ႇတမ်းၸႂ်လႆႈၼင်ႇၵဝ်ႇ ယွၼ်ႉပိူဝ်ႈပဵၼ်ၵူၼ်းလဵင်ႉလူမႃးလႄႈ ႁူႉဝႃႈၶဝ်ပဵၼ်ၵူၼ်းၸိူင်ႉႁိုဝ် မႆႈၸႂ်ယူႇၵေႃႈ လၵ်ႉမႆႈၸႂ်ၵူၺ်း။

ဝၢႆးသေဢေးၼၢင်းၵႂႃႇယဝ်ႉ ဢၢႆႈၸၢႆးၼၼ်ႉသမ်ႉ ဢမ်ႇၶႂ်ႈယူႇတီႈၵျွင်းသေ သမ်ႉၵေႃႉယႂ်ႇမႃးယဝ်ႉလႄႈ ၸင်ႇဢဝ်မႃးယူႇၶိုၼ်းတီႈႁိူၼ်း မႃးၸွႆႈၵၢၼ်တီႈႁိူၼ်းယဝ်ႉ။ မီးၵူၼ်းၸွႆႈၵူၼ်းထႅမ်ယူႇ ၵူၼ်းၼႆႉပေႃးထဝ်ႈမႃးၵေႃႈ ၼင်ႇႁၢင်ႈတၢင်းၵႆႉၼႆႉတိူဝ်းမႃးႁိုဝ်ဢမ်ႇႁူႉ ၸူဝ်းၵၼ်ၵႂႃႇႁဵတ်းႁႆႈထႅင်ႈ တီႈၵႆဝႃႈၵႆၼၼ်ႉယဝ်ႉ။

ၵွပ်ႈမီးဢၢႆႈၸၢႆးပႂ်ႉႁိူၼ်းယူႇလႄႈ ဢွၼ်ၵၼ်ၵႂႃႇယူႇၵိၼ်ၼွၼ်းၼႂ်းႁႆႈၼၼ်ႉသေ ဢၢႆႈၸၢႆးၵႂႃႇသူင်ႇၶဝ်ႈသူင်ႇၼမ်ႉပၼ်ၸိူင်ႉၼၼ်ၵူၺ်းယဝ်ႉ။ လီတီႈတၢင်းၶဝ်ၵႂႃႇႁဵတ်းၼၼ်ႉ တၢင်းလူတ်ႉၵႂႃႇထိုင်လႄႈ ၶီႇလူတ်ႉၵႂႃႇလႆႈ။ ၵူၺ်းၵႃႈ ပေႃးပဵၼ်ၶၢဝ်းႁိုဝ်ႉတႄႉတၢင်းၶႂ်ႈယၢပ်ႇဝႆႉယူႇ။ မၢင်ပွၵ်ႈၵေႃႈလူတ်ႉၵွႆမႃးယဝ်ႉ။

ယင်ႇလိုၵ်ႉၵမ်ႉယၼ် တွၼ်ႈသၢမ်သိပ်းသီႇ

ႁိုင်ၵႂႃႇပဵၼ်လိူၼ်လႄႈ ယူႇယူႇ ၸၢမ်ၽွင်း လၢတ်ႈတေႃႇမႃး။ “သူ..” ၼႆၶေႃႈလဵဝ်ၵူၺ်းၵေႃႈ ငဝ်းလိူၼ်ၼၼ်ႉတႄႉ ၸႂ်ပေႃးၵီႈၼႃႈယဝ်ႉဢိူဝ်ႈ။ “မီးၸိူင်ႉႁိုဝ်ၶႃႈ ႁဝ်းယူဝ်ဝႃႈ သူတေဢမ်ႇဢၢၼ်းတွပ်ႇႁဝ်းယဝ်ႉ” “ဢွၵ်ႇတၢင်းသေၵၢၼ်သုၵ်ႉၼႃႇဢိူဝ်ႈ” “ယူဝ်ဝႃႈ သူဢမ်ႇၶႂ်ႈလၢတ်ႈတေႃႇႁဝ်းယဝ်ႉၼႆၼႃး” “ၼၼ်ႉၵေႃႈပႃး” “ၸႂ်ႁၢႆႉ...

ယင်ႇလိုၵ်ႉၵမ်ႉယၼ် တွၼ်ႈသၢမ်သိပ်းသၢမ်

ဢၢႆႈၸၢႆးၼၼ်ႉ ၵေႃႉယႂ်ႇပဵၼ်မၢဝ်ႇမႃးယဝ်ႉလူး မေႃႁူႉမေႃဢၢႆ မီးၸူႉမီးၸူဝ်းမႃးယဝ်ႉလႄႈ။ ယူႇတႂ်ႈငဝ်းဢူႈမႄႈၵႂႃႇၸိူင်ႉၼႆၵေႃႈ ဢမ်ႇပေႉတူဝ်ပေႉၵၢၼ်းလႆႈ မၼ်းၵေႃႈသမ်ႉၶႂ်ႈႁႃငိုၼ်းႁႃတွင်းႁေ ဢွၵ်ႇၸႂ်ၶႂ်ႈၵႂႃႇႁဵတ်းၵၢၼ်မိူင်းထႆးမႃးယဝ်ႉ။ ပေႃႈမႄႈမၼ်းၵေႃႈ...

ယင်ႇလိုၵ်ႉၵမ်ႉယၼ် တွၼ်ႈသၢမ်သိပ်းဢဵတ်း

တီႈႁူင်းႁဵၼ်းၼႆႉ ပေႃးၶိင်ႇဝၢႆးဝၼ်း သွင်မူင်းၶိုင်ႈၵႂႃႇယဝ်ႉ ၵႆႉမီးၶိင်ႇႁဵတ်းၵၢၼ်ၼႆလႄႈ ပိူၼ်ႈသမ်ႉၵႆႉႁႂ်ႈႁႃၽိုၼ်းၼႃႇ ဢေးၼၢင်းတႄႉ ပေႃးဝႃႈႁႃၽိုၼ်းၼႆ တင်းဢူၺ်းၵေႃႉမၼ်းသေ ဢွၼ်ၵၼ်ဢဝ်ၽႃႉတီႈႁိူၼ်းၵႂႃႇႁႃၽၼ်းၸွမ်းႁိမ်းႁိူၼ်းၼၼ်ႉ...