တီႈႁူင်းႁဵၼ်းၼႆႉ ပေႃးၶိင်ႇဝၢႆးဝၼ်း သွင်မူင်းၶိုင်ႈၵႂႃႇယဝ်ႉ ၵႆႉမီးၶိင်ႇႁဵတ်းၵၢၼ်ၼႆလႄႈ ပိူၼ်ႈသမ်ႉၵႆႉႁႂ်ႈႁႃၽိုၼ်းၼႃႇ ဢေးၼၢင်းတႄႉ ပေႃးဝႃႈႁႃၽိုၼ်းၼႆ တင်းဢူၺ်းၵေႃႉမၼ်းသေ ဢွၼ်ၵၼ်ဢဝ်ၽႃႉတီႈႁိူၼ်းၵႂႃႇႁႃၽၼ်းၸွမ်းႁိမ်းႁိူၼ်းၼၼ်ႉ ၵမ်ႉၵေႃႈလႆႈမိူဝ်းၵႂႃႇၵေႃႉပွတ်းပွတ်း။ မၢင်ပွၵ်ႈၵေႃႈလူင်းၵႂႃႇၼႂ်းသူၼ်ၼၼ်ႉသေ ၵႂႃႇဢဝ်မႆႉသၢင်ႉထူဝ်ႇမႄႈၶဝ်ၶိုၼ်ႈမိူဝ်းၵေႃႈမၼ်းႁဵတ်း။
သမ်ႉဝႃႈဢူႈမၼ်းတေပဵၼ်သိုၵ်းသေတႃႉ တွၼ်ႈတႃႇဢေးၼၢင်းတႄႉ ဝႆႉဝႃႈပဵၼ်ပေႃႈႁႆႈမႄႈသူၼ်ၵူၺ်း၊ မၼ်းဢမ်ႇတွၼ်ႉသွၼ်ႇဝူၼ်ႉဝႃႈ မၼ်းတေပဵၼ်သိုၵ်းလႄႈ ၶႂ်ႈႁဵတ်းသိုၵ်းသေပွၵ်ႈ။ ပေႃးမၼ်းႁၼ်ပေႃႈၶဝ်ႁဵတ်းၵၢၼ် ဢမ်ႇပဵၼ်ယူႇပဵၼ်သဝ်းလီလီ၊ သုၼ်ႇလႆႈၵေႃႈဢမ်ႇမီးသင်၊ ၵၢၼ်ၸွႆႈၵၢၼ်ထႅမ်ၵၼ်ၵေႃႈဢမ်ႇမီး မၢင်ၵမ်း မၼ်းသမ်ႉပေႃးၶႂ်ႈႁႂ်ႈပေႃႈၶဝ်ယႃႇႁဵတ်းသိုၵ်းၼႆလူးၵွၼ်ႇ။ ဢၼ်ၵိၼ်ယူႇၵူႈဝၼ်းၼၼ်ႉ ၵွမ်ႉငိုၼ်းလိူၼ်ၵူၺ်းတင်းဢမ်ႇပေႃးၵိၼ်လူး။ ပေႃးဝႃႈလႆႈငိုၼ်းလိူဝ်မႃးတိူဝ်းမႃးထႅင်ႈၵေႃႈ ပဵၼ်ဢၼ်ၸူမ်းသိူဝ်းတႄႉတႄႉယဝ်ႉ။
ပိူၼ်ႈႁဵတ်းသိုၵ်း မီးလူတ်ႉမီးၵႃး ဢဝ်သုၼ်ႇလႆႈၼႂ်းၸုမ်းႁဵတ်းပဵၼ်သုၼ်ႇတူဝ် ၵိၼ်လီၼုင်ႈလိူင်ႇ။ မႃးႁၼ်ပေႃႈၶဝ် ဢၼ်ႁဵတ်းၵၢၼ်ၵႂႃႇၸဝ်ႉမႃးၶမ်ႈ ၵၢၼ်ႁိူၼ်းၸဝ်ႈၵဝ်ႇၵေႃႈယဝ်ႉ ပေႃးပိူၼ်ႈၸႂ်ႉၼႆ ၵႃႈလႆႈဝႆႉသေၵႂႃႇယူႇဢိူဝ်ႈ။ ၵၢၼ်ပိူၼ်ႈၼၼ်ႉ ဢမ်ႇတွၼ်ႉပၼ်လုတ်ႈသေပွၵ်ႈ မၢင်ပွၵ်ႈဢမ်ႇလႆႈၵိၼ်ၶဝ်ႈသေ ႁူင်းၶဝ်ႈထႃႉၵွပ်ႈမၼ်းၵေႃႈမီး။ ဢၼ်လႆႈလုမ်းလႃးသေတူၺ်းထိုင်ယူႇၼၼ်ႉတႄႉ ပဵၼ်ၵူၼ်းၼႂ်းၼႃႈႁိူၼ်းၼၼ်ႉၵူၺ်း။ ၵူႈဝၼ်းၵူႈဝၼ်း မၼ်းႁၼ်ၸိူင်ႉၼၼ် ၵၢင်ၸႂ်ဢၼ်ဝႃႈ ၶႂ်ႈႁဵတ်းသိုၵ်းၼႆၼၼ်ႉ ဢမ်ႇမီးယဝ်ႉ။
ယွၼ်ႉပိူဝ်ႈၼၼ်လႄႈ ၽွင်းမၼ်းတိုၵ်ႉႁဵၼ်းယဝ်ႉၵႂႃႇၸၼ်ႉ 7 ၼၼ်ႉ ၸင်ႇသမ်ႉယွၼ်းပေႃႈမႄႈဢွၵ်ႇႁူင်းႁဵၼ်းၵႂႃႇသေ တေၵႂႃႇႁဵၼ်းယဵပ်ႉၶူဝ်း ၼႂ်းမိူင်းတႆးၼႆယဝ်ႉ။ ပေႃႈမႄႈၶဝ်ၵေႃႈ ႁၼ်ဝႃႈမၼ်းတေပဵၼ်ငဝ်ႈၶၢမ်ႇပိုၼ်ႉ လဵင်ႉသၢႆၸႂ်မၼ်းလႆႈၼႆသေ သူင်ႇမိူဝ်းၵႂႃႇယူႇ။
ၼၢင်းသိုဝ်ႉလူႇၶႃၼၼ်ႉၵေႃႈ ၼင်ႇၵႃႈဢၼ်ႁဵတ်းပၼ်လႆႈ ပေႃးဝႃႈမၼ်းတေလီတွၼ်ႈတႃႇလုၵ်ႈယူႇၼၼ်ႉ ၶဝ်ၵေႃႈၸွမ်းၸႂ်သေႁဵတ်းပၼ်ယဝ်ႉ။ မိူဝ်းယူႇဢမ်ႇႁိုင် ၸႂ်ထိုင်ႁူင်းႁဵၼ်းၼႆလႄႈ ၶိုၼ်းပွၵ်ႈၶိုၼ်း။
ပီၼၼ်ႉၵေႃႈပူၼ်ႉၵႂႃႇသေ တေႃႇပေႃးႁဵၼ်းၸၼ်ႉၵဝ်ႈသုတ်း သမ်ႉဝႃႈၶႂ်ႈၶၢႆႉႁူင်းႁဵၼ်း ၵႂႃႇယူႇမိူင်းထႆးၼႆလႄႈ ၸွမ်းဢူၺ်းၵေႃႉမၼ်းၵႂႃႇယဝ်ႉ။ ပေႃးဝႃႈမၼ်းယူႇၵေႃႈ တေႃႈတေလွတ်ႈပူၼ်ႉသေ ဢမ်ႇလႆႈႁဵတ်းသိုၵ်းယဝ်ႉ။
လုၵ်ႈၵူၼ်းယႂ်ႇၵူၼ်းလူင်ၵမ်ႈၼမ် ၶဝ်ၵေႃႈတေဢမ်ႇၵႆႉပွႆႇၶိုၼ်ႈႁဵၼ်းၼိူဝ်လွႆလႄႈ တေသူင်ႇၵႂႃႇႁဵၼ်းတီႈမိူင်းထႆးသေ လုၵ်ႈဢွၼ်ႇဢၼ်ၵႂႃႇယူႇမိူင်းထႆးၼႆၵေႃႈ မီးသုၼ်ႇလႆႈဝတ်းဝႂ်ထႆးယဝ်ႉ ဢမ်ႇမီးၽႂ်ႁွင်ႉမႃးႁႂ်ႈၸွႆႈၵၢၼ်ၶိုၼ်း။
ၼႂ်းပီၼႆႉသမ်ႉ ပဵၼ်ပီဢၼ်ပိူၼ်ႈမႃးထႆတၢင်းလႄႈ သဵၼ်ႈတၢင်ဢၼ်ပိူၼ်ႈၽွၵ်ႈၼၼ်ႉ လတ်းၽၢၼ်ႇႁူဝ်ၼမ်ႉၶဝ်သေ ယႃႉလႅဝ်ၼမ်ႉၶဝ် ပေႃးဢမ်ႇၸၢင်ႈၸႂ်ႉၸၢင်ႈၵိၼ်လႆႈယဝ်ႉ။ တေႁုင်လဝ်ႈၼႆၵေႃႈ လႆႈတဵၵ်းလႆႈႁၢပ်ႇ တၢင်းသမ်ႉမႃးယၢပ်ႇထႅင်ႈ ၼၢင်းသိုဝ်ႉလူႇၼၼ်ႉ သမ်ႉပေႃးႁႆႈဢွၵ်ႇမႃးယူႇယဝ်ႉဢိူဝ်ႈ။
ပေႃးဝႃႈၼမ်ႉၵွႆၼႆၵေႃႈ ၸဝ်ႈပိုၼ်းႁၢၼ်ၼၼ်ႉတႄႉ ႁႃထႅင်ႈတီႈမႂ်ႇသေ ပိူၼ်ႈၸွႆႈလွတ်ႇၼမ်ႉထႅင်ႉၼမ်ႉသေတႃႉ တႃႇၼမ်ႉတေထိုင်ႁိူၼ်းၼၼ်ႉတႄႉ လႆႈတေႃႇဢဝ်ႁင်းၵူၺ်း။
ဢေးၼၢင်းဢၼ်ၶၢႆႉလူင်းၵႂႃႇယူႇၼႂ်းမိူင်းထႆးၼၼ်ႉတႄႉ ပဵၼ်ဢၼ်ယူႇယၢပ်ႇဢမ်ႇၵျေႃႇဢမ်ႇမိုတ်ႈဝႆႉယဝ်ႉ။ လိူဝ်သေၼၼ်ႉ ငိုၼ်းၵေႃႈသမ်ႉသဵင်ႈၼမ် ၵႃႈယူႇၵႃႈၵိၼ်၊ ၵႃႈၶူဝ်းၵႃႈလဵင်း တႃႇၵႂႃႇတႃႇမႃးၼႆၵေႃႈ ဢမ်ႇငၢႆႈငၢႆႈ။ ပေႃးဝႃႈမၼ်းႁၼ်ငိုၼ်းသဵင်ႈၼမ်ၵေႃႈ မိူၼ်ပၼ်တၢင်းယၢပ်ႇတီႈႁိူၼ်းၵေႃႈလူဝ်လူဝ်။
လိူဝ်သေၼၼ်ႉ ၵႂၢမ်းပိူၼ်ႈၽႃႇသႃႇပိူၼ်ႈ မၼ်းပိူင်ႈၵၼ်ႁႅင်းၼႃႇလႄႈ ၵၢၼ်ႁဵၼ်းဢၼ်မၼ်းလႆႈႁဵၼ်းသွၼ်မႃးၼၼ်ႉဢမ်ႇမိူၼ်ၵၼ်သေဢိတ်း၊ ၵႂၢမ်းလၢတ်ႈပိူၼ်ႈၽႃႇသႃႇလိၵ်ႈလၢႆးပိူၼ်ႈၵေႃႈ မၼ်းဢမ်ႇပေႉဢမ်ႇႁူႉဢမ်ႇမေႃသင် တေဝႃႈၶိုၼ်းတႄႇမႂ်ႇၵေႃႈ ဢမ်ႇလမ်းၶိုတ်းပိူၼ်ႈ၊ ပိူၼ်ႈႁႂ်ႈႁဵတ်းသင်ၵေႃႈ ၵႃႈလႆႈၸွမ်းၵႂႃႇ ဢမ်ႇႁူႉႁူဝ်ႁူႉႁၢင်သင်သေလွင်ႈ မၼ်းဢမ်ႇၸႂ်ႈတီႈ ဢမ်ႇၸႂ်ႈတူဝ်ၸဝ်ႈၵဝ်ႇတေႉတေႉလႄႈ လႆႈယဵၼ်ႉယူႇၸိူင်ႉၼၼ် မၼ်းၵပ်ႉၵိၼ်းၸႂ်ဝႆႉၼႃႇသေ ၼႂ်းၸႂ်ၼႆႉဢမ်ႇၵျေႃႇဢမ်ႇသိူဝ်းသေဢိတ်းယဝ်ႉ သမ်ႉမႃးဢမ်ႇယူႇလီထႅင်ႈ။
ၼၢင်းသိုဝ်ႉလူႇၵေႃႈ ပေႃးဝႃႈလုၵ်ႈမၼ်းၼၼ်ႉ ဢမ်ႇယူႇလီၼႆ ၼႅတ်ႈၵႂႃႇယူႇလုမ်းလႃး တူၺ်းထိုင်ၵမ်းလဵဝ်ယဝ်ႉဢိူဝ်ႈ။ ဢေးၼၢင်းၵေႃႈ ဢမ်ႇယူႇလီသေ ဢမ်ႇလႆႈၵႂႃႇႁူင်းႁဵၼ်းပဵၼ်ယူႇ ဝူင်ႈၼိုင်ႈယဝ်ႉလႄႈ ဝၢႆးသေၵႂႃႇၶိုၼ်းၵေႃႈ ယွၼ်းဢွၵ်ႇႁူင်းႁဵၼ်းသေ ပွၵ်ႈမိူဝ်းၵႂႃႇၸွမ်းမႄႈၶဝ်ယဝ်ႉ ၵႂႃႇယူႇၶိုၼ်းႁူင်းႁဵၼ်းၵဝ်ႇမၼ်း။
သမ်ႉဝႃႈလႆႈပွၵ်ႈမိူဝ်းယူႇတီႈဢွင်ႈၵဝ်ႇ သမ်ႉဝႃႈလႆႈပႆၵၢၼ်းၶိုၼ်ႈလွႆ လုၺ်းၵူမ်ႇလုၺ်းဢုင်ၵႂႃႇႁူင်းႁဵၼ်းၵူႈဝၼ်းဝၼ်းၵေႃႈ ဢမ်ႇႁၼ်ဝႃႈမၼ်းတုၵ်ႉၶတီႈလႂ်။ ႁူႉဝႃႈ ဢွၵ်ႇႁူင်းႁဵၼ်းယဝ်ႉ တေလႆႈႁဵတ်းသိုၵ်းၼႆၵေႃႈ မၼ်းတင်းဢမ်ႇၵူဝ်လႃႈ။ ပေႃးဝႃႈလႆႈယူႇၶိုၼ်းဢွင်ႈၵဝ်ႇ လႆႈယူႇၸွမ်းဢူၺ်းၵေႃႉ လႆႁဵၼ်းၽႃႇသႃႇ ဢၼ်ပွင်ႇၸႂ်ငၢႆႈလႄႈ ပဵၼ်ၵၢၼ်ႁဵၼ်းဢၼ်မၼ်းဢမ်ႇယၢမ်ႈႁဵၼ်းႁေပွၵ်ႈ မိူၼ်ဝႃႈမၼ်းတေတႅပ်းတတ်းထုၵ်ႇယဝ်ႉ ဢၼ်မၼ်းလႆႈၶိုၼ်းပွၵ်ႈမႃးၼႆႉ။
ပီၼႆႉ မၼ်းၵေႃႈတႄႇလႆႈၶိုၼ်ႈၸၼ်ႉသုင်သေ ႁဵၼ်းဝႆႉၸၼ်ႉ 10 ပဵၼ်ပီဢၼ် ၵၢၼ်ႁဵၼ်းၵၢၼ်သွၼ်မၼ်းလႆႈတႄႇလႅၵ်ႈလၢႆႈၵႂႃႇ၊ ဢၼ်ယၢမ်ႈလႆႈဢၢၼ်ႇၼင်ႈထွမ်ႇယူႇၵူႈဝၼ်းၼၼ်ႉ ပဵၼ်ၵႂႃႇ ၵၢၼ်ႁဵၼ်း ဢၼ်လႆႈၼပ်ႉသွၼ်ႇ ဝူၼ်ႉသၢင်ႈၵႂႃႇယဝ်ႉ။ ၵူႈပွၵ်ႈယၢမ်ႈဢဝ်မၵ်ႉလိၵ်ႈပဵၼ်ယႂ်ႇ ၵူၺ်းၵႃႈ လႅၵ်ႈလၢႆႈပဵၼ်ၵၢၼ်တူင်ႉၼိုင်ႁဵတ်းသၢင်ႈ ပဵၼ်ပိူင်လူင်ယဝ်ႉ။ လုၵ်ႉတီႈယၢမ်ႈဢၢၼ်ႇဢူမ်သူပ်းသေတွပ်ႇလိၵ်ႈ မႃးလႅၵ်ႈလၢႆႈပဵၼ်ၵၢၼ်ဝူၼ်ႉသွၼ်ႇ လွင်ႈမေႃဢဝ်တွၼ်ႈသွၼ်ႁဵၼ်းႁူႉၼၼ်ႉ ပဵၼ်ၶေႃႈတွပ်ႇယဝ်ႉ။
လိူဝ်သေႁဵၼ်းလိၵ်ႈယဝ်ႉ ယင်းမီးလွင်ႈတူင်ႉၼိုင်တင်းၼမ် ဢမ်ႇဝႃႈၵၢၼ်ႁဵတ်းတၢင်းၵိၼ်၊ ၵၢၼ်ၽုၵ်ႇသွမ်ႈ ၵၢၼ်ႁႃလဵင်ႉတွင်ႉ၊ ပိုၼ်ႉႁူႉတူဝ်ထူပ်း ၵူၼ်းဢၼ်မီးၸၼ်ႉမီးတၢင်းႁူႉၸိူဝ်းၼႆႉၵေႃႈ လႆႈႁူႉလႆႈငိၼ်းမႃး။ ပဵၼ်ၵူၼ်းၵူဝ်လႆႈလၢတ်ႈၵႂၢမ်းတေႃႇၼႃႈၵူၼ်းၼမ်ၼႆၵေႃႈ လႆႈၽိုၵ်းလႆႈလၢတ်ႈယဝ်ႉ။
လႆႈၸုၼ်ႉပႅတ်ႈလွင်ႈတင်းၵူဝ်ၸိူဝ်းၼၼ်ႉ တင်းၼမ်သေ သွၼ်ပၼ်ႁႂ်ႈမီးလွင်ႈယုမ်ႇယမ်တူဝ်ၵဝ်ႇမႃးယူႇ။ မိူၼ်ဝႃႈ တေတႄႇသွၼ်ႁႂ်ႈမၼ်းပဵၼ် ၵူၼ်းလူင်မႃးလွႆးလွႆးယဝ်ႉ။
ပေႃးဝႃႈပိူၼ်ႈသွၼ်ႁဵတ်းတၢင်းၵိၼ်ၼႆၵေႃႈ လုၵ်ႈႁဵၼ်းၶဝ်ဢွၼ်ၵၼ်ႁဵတ်းသေ မႃးၶၢႆတေႃႇၵၼ်ၶိုၼ်းယူႇ။ ဢေးၼၢင်းၼၼ်ႉတႄႉ ၵျိူၵ်ႈႁဵတ်းယူႇ ၵူၺ်းၵႃႈၶၢႆဢမ်ႇလႆႈ ၵိၼ်သမ်ႉဢမ်ႇသဵင်ႈ မၢင်ပွၵ်ႈသမ်ႉလႆႈပႅတ်ႈ။ ပွၵ်ႈၼိုင်ႈလႄႈပွၵ်ႈၼိုင်ႈၵေႃႈ ဢမ်ႇမိူၼ်။
ၵူၺ်းမီးၶဝ်ႈၵၢပ်ႇ၊ ထူဝ်ႇလိၼ်မႄႈၶဝ် ၼႂ်းသူၼ်ၼၼ်ႉၵူၺ်း ဢၼ်မၼ်းၵႆႉဢဝ်မႃးၶၢႆၼၼ်ႉတႄႉ၊ ပေႃးၵၢင်ၶမ်ႈမႃးၼႆၵေႃႈ တူမ်ႈဝႆႉယဝ်ႉ ၵၢင်ၼႂ်လုၵ်ႉႁုင်ၶဝ်ႈၼႆ ဢဝ်ၵႂႃႇၶၢႆယဝ်ႉဢိူဝ်ႈ။ ပေႃးလႆႈငိုၼ်းမႃးၵေႃႈ ဢမ်ႇပၼ်ၶိုၼ်းမႄႈၶဝ် ၵဵပ်းဝႆႉႁဵတ်းၵႃႈၶဝ်ႈမုၼ်းမၼ်း။
ပေႃးဝႃႈၶၢဝ်းမွၵ်ႇယူးၼႆ ပိူၼ်ႈတေမႃးႁပ်ႉသိုဝ်ႉသေ ပၢတ်ႇၶဝ်ႈပၢတ်ႇသင်ယဝ်ႉ ၶဝ်ၵေႃႈဢွၼ်ၵၼ်ႁႃတၢင်းႁိူၼ်း။ ၵၢင်ဝၼ်းႁႃ ၵၢင်ၶမ်ႈမႃးၵေႃႈၼင်ႈႁေလူၺ်ႇ။ ဢေးၼၢင်းၼၼ်ႉၵေႃႈ ပေႃးလူင်းႁူင်းႁဵၼ်းၼႆ မႃးပေႃႉဢၼ်မၼ်းႁႃမႃးၼၼ်ႉသေ ၶိုၼ်းၵႂႃႇႁႃထႅင်ႈ လႆႈယူႇဝၼ်းတုမ်းသွင်တုမ်း မၢင်ပွၵ်ႈၵေႃႈပေႃးမႃးလူၺ်ႇ လႆႈပဵၼ်လူဝ်းၸိူဝ်းၼႆႉၼင်ႇၵွၼ်ႇ။
မၼ်းၵေႃႈႁွမ်ငိုၼ်းၵဵပ်းငိုၼ်းသေ ၶႂ်ႈလႆႈၽူင်း ပေႃႈမႄႈၶဝ်ဢမ်ႇသိုဝ်ႉပၼ်ၼႆၵေႃႈ ဢဝ်ငိုၼ်းႁွမ်မၼ်း သိုဝ်ႉၵႂႃႇႁင်းၵူၺ်း။ ပေႃႈမႄႈၶဝ်တႄႉၵေႃႈ လိူဝ်သေၵႃႈၶဝ်ႈမုၼ်းယဝ်ႉ ဢမ်ႇပေႃးသူႈလႆႈသိုဝ်ႉပၼ်ႁင်တေႉတေႉ။

