ဝၢႆးသေမိူဝ်းၸႂ်းႁိူၼ်းၵႂႃႇၵူၺ်း ထႅင်ႈပီၸမ်သွင်ပီၼႆႉၵေႃႈ ၵေႃႉပဵၼ်မႄႈ ၸဝ်ႈပိုၼ်းႁၢၼ်ၼၼ်ႉ လူႉၵႂႃႇသေ မၼ်းၵေႃႈ လႆႈၶိုၼ်းမိူဝ်းၵႂႃႇထႅင်ႈႁင်းၵူၺ်းယဝ်ႉ။ သမ်ႉပဵၼ်ၶၢဝ်းႁိုဝ်ႉသေ ၾူၼ်ၵေႃႈမႃး တၢင်းၵေႃႈယၢပ်ႇ ၶီႇလူတ်ႉၶိူင်ႈမိူဝ်းယူႇၵေႃႈ ၼင်ႇႁၢင်ႈပႆမိူဝ်း တင်းတေငၢႆႈလိူဝ်ယဝ်ႉၼႃႇ။
မိူဝ်းႁွတ်ႈထိုင်ႁိူၼ်းၼႆၵေႃႈ တၼ်းလႆႈမိူဝ်းသူင်ႇၶဝ်ႈႁဵဝ်ႈသေ ႁႅၼ်းသွမ်းႁႅၼ်းသင်ယဝ်ႉ ၸင်ႇတေပွၵ်ႈမႃးၶိုၼ်း။
ဝၢႆးသေၸဝ်ႈပိုၼ်းႁၢၼ်မိူဝ်းမႃးယဝ်ႉ ၸွမ်းလူၺ်ႈဢၢႆႈၸၢႆးဢွၼ်ႇၼၼ်ႉသမ်ႉ ႁဵၼ်းလိၵ်ႈဢမ်ႇပေႃးလႆႈသေ ယူႇႁူင်းႁဵၼ်းၵေႃႈၵုမ်ႇလႄႇၵူၺ်းၼႆလႄႈ ၼၢင်းသိုဝ်ႉလူႇၸင်ႇဢွၼ်ဢဝ်မိူဝ်းဝႆႉတီႈၵျွင်းမူၺ်ႇတေႃႇ ၼင်ႇႁိုဝ် မၼ်းပေႃးတေလႆႈႁူႉ လႆႈမေႃလိၵ်ႈလၢႆးမႃးထႅင်ႈလိူဝ်ၵဝ်ႇၼႆ။
တီႈႁိူၼ်းၼၼ်ႉၵေႃႈ ၵိုတ်းၶဝ် 3 ၵေႃႉ ပေႃႈမႄႈလုၵ်ႈၵူၺ်းယဝ်ႉလႄႈ ၽူႈမၢႆၼႆၵေႃႈယူႇထႅင်ႈႁိူၼ်းဢွၼ်ႇႁင်းၵူၺ်းမၼ်း။ ၸူဝ်ႈယူႇၵႆပိူၼ်ႈၼႆႉ ၵူၼ်းသိုၵ်းၼႆၵေႃႈ ဢမ်ႇပေႃးၵႆႉမႃးလႄႇမႃးဝႄႉယဝ်ႉ ဢမ်ႇပေႃးတေႃႇတၢင်းယဝ်ႉၼႃႇ။ မၢင်ပွၵ်ႈမၢင်လႂ်ၵေႃႈ ဢွၼ်ၵၼ်မႃးလႄႇမႃးႁႃၵိၼ်ၶဝ်ႈၵိၼ်လဝ်ႈၵၼ်ယူႇ။
သမ်ႉဝႃႈယူႇၵႆပိူၼ်ႈၼႆသေတႃႉၵေႃႈ ႁၢင်ႇႁၢင်ႇၵႆၵူၼ်းၵေႃႈ ယင်းမီးသူၼ်မီးတီႈပိူၼ်ႈယူႇ ယူႇၽွင်ႈၼင်ႇၵွၼ်ႇ။
ဢေးၼၢင်းၼၼ်ႉၵေႃႈ သမ်ႉဝႃႈတိုၵ်ႉပဵၼ်လုၵ်ႈဢွၼ်ႇယူႇသေတႃႉ ပေႃးပေႃႈမႄႈဢမ်ႇယူႇႁိူၼ်းၼႆ လႆႈႁိုဝ်ႈလဝ်ႈၶၢႆလဝ်ႈယူႇတႃႇသေႇ။ တေဝႃႈၵိၼ်လဝ်ႈၼႆတႄႉၵေႃႈ ဢမ်ႇတွၼ်ႉၵိၼ်ၼင်ႇၵဝ်ႇ လိူဝ်သေပေႃးၶဵဝ်ႈမႅင်းၸဵပ်းၵေႃႈ ၺႃးၼမ်ႉႁၵ်းမၼ်းယူႇမၢင်ပွၵ်ႈ။
ၸူဝ်ႈလုၵ်ႈဢွၼ်ႇၵေႃႉယႂ်ႇမႃးၼႆႉၵေႃႈ ၵႂႃႇႁဵတ်းၵၢၼ်ၼႆၵႂႃႇၸဝ်ႉမႃးၶမ်ႈလႆႈယဝ်ႉ၊ ၵၢင်ၼႂ်ၵေႃႈ လုၵ်ႈဢွၼ်ႇလုၵ်ႉႁုင်ၶဝ်ႈႁေ ၵၢင်ၶမ်ႈမႃးၵေႃႈ ႁုင်ၶဝ်ႈဝႆႉပၼ်ႁေ။ မၢင်ပွၵ်ႈၵေႃႈၸႂ်ႉလွႆးၶူဝ်းသၵ်ႉၶူဝ်းၸိူဝ်းၼႆႉလႆႈယဝ်ႉ။ ပေႃးဝၼ်းလိုဝ်ႈၵေႃႈ ႁႂ်ႈၸွႆႈၸွၼ်ႉသူၼ်ၸွၼ်ႉႁိူၼ်းၸိူဝ်းၼႆႉ ၶဝ်ၼၼ်ႉတႄႉဢမ်ႇတွၼ်ႉသူႈယူႇႁိူၼ်းသေၵႃႈႁိုဝ်။
ဢေးၼၢင်းဢွၼ်ႇၼႆၵေႃႈ ၵေႃႉယႂ်ႇတၢၼ်ႇပေႉတူဝ်ပေႉၵၢၼ်ပေႉငၢၼ်းမႃးသေ ပေႃးဝႃႈၵႂႃႇႁူင်းႁဵၼ်းၼႆၵေႃႈ လုၵ်ႉၸဵမ်ၸဝ်ႉႁုင်ၶဝ်ႈႁုင်ၽၵ်း ၵိၼ်ၶဝ်ႈၵိၼ်သင်ယဝ်ႉၵေႃႈ ၶိုၼ်ႈလွႆလူင်ၵႂႃႇယဝ်ႉ။
တၢင်းၵႂႃႇႁူင်းႁဵၼ်းၶဝ်ၼၼ်ႉသမ်ႉ လတ်းၽၢၼ်ႇတၢင်းႁွင်ႈၽၢႆႈႁူင်းႁဵၼ်းလႄႈ တီႈၸမ်ၸမ်တၢင်းႁူင်းႁဵၼ်းၼၼ်ႉတႄႉ မီးဢၢႆၶီႈဢၢႆယဵဝ်ႈယူႇတႃႇသေႇယဝ်ႉ။ လိူဝ်သေဢၢႆမၼ်းယဝ်ႉဢမ်ႇၵႃး ၼႂ်းၵၢင်တၢင်းၵေႃႈၵႆႉၵႆႉၺႃးၵွင်ၶီႈယူႇ၊ ထၢင်ၽၢႆႈၼႆၵေႃႈ မီးယူႇ ၵွပ်ႈသင်လႄႈ လႆႈၸႂ်ၶီႈၸွမ်းတၢင်းပိူၼ်ႈပႆၵႂႃႇမႃးၵေႃႈဢမ်ႇႁူႉယဝ်ႉဝႃႈ။ တၢင်းသဵၼ်ႈၼၼ်ႉ ပေႃးလႆႈၵႂႃႇၵႂႃႇမႃးမႃးၼႆ သမ်ႉပေႃးလႆႈၵၼ်ႈထူၺ်ႈၸႂ်ယူႇတႃႇသေႇယဝ်ႉ။
ပေႃးဝႃႈလူင်းႁူင်းႁဵၼ်းယဝ်ႉၼႆ ႁွတ်ႈႁိူၼ်းမႃးဢွၼ်တၢင်းသုတ်း ၽုၺ်ႇတူၺ်းၼႂ်းသုမ်ႇၽၵ်းယဝ်ႉ မီးၶဝ်ႈမီးၽၵ်းၵေႃႈၵိၼ်ၶဝ်ႈႁေၵမ်ႉ။ တူၺ်းတီႈၶဵင်ႇၼမ်ႉ ဢမ်ႇမီးၼမ်ႉဝႆႉၼႆၵေႃႈ တင်းႁၢပ်ႇတင်းၵၢၼ်းသေ ၵႂႃႇတဵၵ်းၼမ်ႉတဵင်ႇၶိုၼ်ႈလွႆလွႆးလွႆးယဝ်ႉ။ သမ်ႉဝႃႈၸမ်ၼမ်ႉယူႇသေတႃႉၵေႃႈ ၼမ်ႉယင်းဢမ်ႇပႆႇထိုင်ႁိူၼ်း လႆႈတဵၵ်းယူႇတိၵ်းတိၵ်း။
ပေႃးႁဵတ်းၵၢၼ်တီႈႁိူၼ်းယဝ်ႉ လူင်းၵႂႃႇတၢင်းတႃႈၼမ်ႉ ဢၼ်မီးၶွၵ်ႈမူၼၼ်ႉသေ ၵႂႃႇဢွႆမူယဝ်ႉ သွႆးယူၵ်ႇၵူၺ်ႈတူမ်ႈယိူဝ်ႇမူယဝ်ႉ ၸွင်ႇၵွႆႈဢၢပ်ႇၼမ်ႉသၵ်ႉၶူဝ်း သူၼ်းၾႆးၶိုၼ်ႈမိူဝ်း။ ပေႃးဝႃႈမၼ်းမိူဝ်းယဝ်ႉၵေႃႈ ပေႃႈမႄႈၶဝ်ႁွတ်ႈမႃး သိုပ်ႇသူၼ်းၾႆးယဝ်ႉ။ မၢင်ပွၵ်ႈဢမ်ႇမီးယူၵ်ႇၵူၺ်ႈၼႆၵေႃႈ မၼ်းၵေႃႉၵႂႃႇႁႃတၢင်းႁူဝ်ၼမ်ႉၶဝ်ၼၼ်ႉ မႅၵ်ႇလူင်ၵႂႃႇတၢင်းၶွၵ်ႈမူၶဝ်ၼၼ်ႉယူႇ။
မၼ်းဢၢပ်ႇၼမ်ႉသေၶိုၼ်ႈမိူဝ်း
“ဢေးလုၵ်ႈ ပေႃးမိူဝ်းၵေႃႈ လိူၵ်ႈဝႆႉၽၵ်းၵၢတ်ႇႁေ ၶူဝ်ႈၶႆႇၵႆႇဝႆႉလႄႈၼႃႉ”
“ဢေႃႈ”
မၼ်းၵေႃႈလိူၵ်ႈၽၵ်းယူႇႁင်းမၼ်း။
ဝၢႆးသေၶဝ်ၶၢႆႉမႃးယူႇလႆႈမွၵ်ႈသွင်ပီပၢႆပၢႆၼႆႉ ၸင်ႇသမ်ႉမီးၼၢႆးၶိၼ်ႇၶဝ်မႃးႁဵတ်းႁိူၼ်းယူႇၸွမ်းၵၼ်ယဝ်ႉ။ ဝၢႆးသေၼၼ်ႉထႅင်ႈ သွင်ပီ လုင်းၽေႃးၵၶဝ်ၵေႃႈမႃးယူႇၸွမ်းထႅင်ႈ။ ပွၵ်ႉၶဝ်ၵေႃႈမီးႁိူၼ်းယူႇ 3 လင်ၼႆႉ။
ၵိၼ်ၶဝ်ႈၵိၼ်သင်ယဝ်ႉၵေႃႈ ၶိုၼ်ႈႁိူၼ်း တူၺ်းလိၵ်ႈတူၺ်းလၢႆး 9 မူင်းၵေႃႈ ၼွၼ်းၵႂႃႇယဝ်ႉ။ ပေႃး 5 မူင်းၶိုင်ႈၼႆႉၵေႃႈ ပေႃးလူဝ်ႇလႆႈလုၵ်ႉ ႁုင်ၶဝ်ႈႁဵတ်းၽၵ်း 7 မူင်း သမ်ႉပေႃးလူဝ်ႇၵႂႃႇယဝ်ႉဢိူဝ်ႈ။
ၶၢဝ်းၾူၼ်ၼႆႉ လိၼ်ၵႆႉၵႆႉၵူၼ်ႇယူႇတႃႇသေႇ တၢင်းသမ်ႉမီးသဵၼ်ႈလဵဝ်သေဢမ်ႇၵႃး သမ်ႉၵႅပ်ႈပႃးလႄႈ ၵႃႈလႆႈတဝ်လိၼ်လုၺ်းၵူမ်ႇသေ ၶၢမ်ႈၵႂႃႇတိၵ်းတိၵ်းၵူၺ်း။ ပေႃးဝႃႈၵမ်းပွၵ်ႈမၼ်းသမ်ႉ လႆႈလူင်းလွႆဢဝ်လႄႈ တၢင်းသမ်ႉမိုၼ်ႈ တဝ်းၵေႃႈၼမ် မၢင်ပွၵ်ႈၵေႃႈ ပလၢတ်ႈလူမ်ႉယူႇ။
တီႈႁိူၼ်းၼၼ်ႉ လႆႈႁၼ်မၢၵ်ႇၾႆးမီးယူႇၼိူဝ်ၽိူၼ်ၼၼ်ႉလႄႈ
“မၢၵ်ႇၾႆးသုၵ်းယဝ်ႉၵႃႈပေႃႈ”
“သုၵ်းယဝ်ႉ!!”
“ပေႃႈႁဝ်းဢဝ်မႃးၼၢႆႉၵူၺ်းႁႃႉ”
“ၼၢႆႉၵူၺ်းဢိူဝ်ႈ ၸိမ်းတူၺ်းၵူၺ်းၼင် ဢမ်ႇလႆႈၶိုၼ်ႈတူၼ်ႈမၼ်းလႄႇ”
“ၵႂႃႇႁဝ်းၵႂႃႇဢဝ် လုၵ်ႈတေဢဝ်ၵႂႃႇႁူင်းႁဵၼ်းမိူဝ်ႈၽုၵ်ႈ”
“ဢဝ်ထူင်ဢႄႈ”
ပေႃႈၶဝ် ၸဝ်ႈပိုၼ်းႁၢၼ်ၼၼ်ႉၵေႃႈ ပႃးၽႃႉၽၵ်းဢႅဝ်သေ ပႆလူင်ၵႂႃႇတၢင်းၼႃႈ လုၵ်ႈယိင်းမၼ်းၼၼ်ႉယဝ်ႉၼႃႇ။ ဢေးၼၢင်းၼၼ်ႉၵေႃႈ ဢဝ်တင်းထူင်ပိူဝ်ႉသိုၵ်းလူင်ပေႃႈၶဝ်ႈၼၼ်ပႃးၵႂႃႇယူႇ။
တၢင်းၵႂႃႇဢဝ်မၢၵ်ႇၾႆးၼၼ်ႉသမ်ႉ လႆႈၶဝ်ႈယုမ်းၶဝ်ႈယွမ်ႇလူင်ၵႂႃႇလႄႈ ဢမ်ႇမီးတၢင်းဝႆႉ ၵၢၼ်းၵိၼ်းတၢဝ်းတိဝ်းၸၼ်ၵၢၼ်ႈမႆႉၵၢၼ်ႈတွၵ်ႇလူင်ၵႂႃႇၵူၺ်း။ သမ်ႉပဵၼ်တီႈမိုၵ်းတီႈယမ်းသေ မိုၼ်ႈၵေႃႈမိုၼ်ႈ တႅၵ်ႉၵေႃႈၵွပ်ႈယူႇဢိူဝ်ႈ။ ဢေးၼၢင်းၼၼ်ႉၵေႃႈ ပေႃးဝႃႈႁၼ်တႅၵ်ႉၵၢၼ်းမႃးၸွမ်းၵူၼ်မၼ်းၼႆ ယိပ်းႁေယဝ်ႉ ၵဵၼ်ၵဵၼ်ဢဝ်ဝိုတ်ႉပႅတ်ႈၵႂႃႇ။
ၵွပ်ႈယူႇၸွမ်းႁူၺ်ႈၸွမ်းလွႆ ၸွမ်းထိူၼ်ႇၸွမ်းပႃႇလႄႈ ပေႃးဝႃႈလွင်ႈမူင်ႈလွင်ႈမႅင်း လွင်ႈတႅၵ်ႉလွင်ႈတၢၵ်ႈၸိူဝ်းၼႆႉတႄႉ မၼ်းဢမ်ႇၵူဝ်။ ပေႃးၺႃးငူးၼႆၵေႃႈ မႄးပၢႆဢဝ်ၶွၼ်ႉပေႃႉပၼ်ထႅင်ႈႁေၵွၼ်ႇႁိုဝ်။
ပေႃႈၶဝ်ၵေႃႈၵၢၼ်းၶိုၼ်ႈၵႂႃႇသေ လၢၼ်းၵိင်ႇမၼ်းတူၵ်းလူင်းယဝ်ႉ။
“ပၢႆႈဢႄႈပၢႆႈဢႄႈ” ယူႇၵမ်ႉၵေႃႈ တူၵ်းၶျလူင်းယဝ်ႉၼႃႇ။
ဢေးၼၢင်းၼၼ်ႉၵေႃႈ ၼႅတ်ႈၵႂႃႇပိတ်းဢဝ်ပိတ်းဢဝ်သႂ်ႇၼႂ်းထူင် ပေႃးဝႃႈလွင်ႈပိတ်းၼႆႉတႄႉ မၼ်းၵႆႉၼႃႇ။ ၵမ်ႉၵေႃႈ ပေႃႈၶဝ်လၢၼ်းတူၵ်းထႅင်ႈၵိင်ႇၼိုင်ႈသေ လူင်းမႃးပိတ်းၸွႆႈၵၼ်ၵႂႃႇ သမ်ႉပေႃးမူတ်းတေႉၼင်ႇဝႃႈ။ မိူဝ်ႈဢဝ်မၼ်းတႄႉၵျေႃႇၼႃႇ ၽိူဝ်ႇတေဢဝ်မိူဝ်းယဝ်ႉသမ်ႉ ဢမ်ႇၶႂ်ႈပေႉယဝ်ႉဢိူဝ်ႈ။
“ပေႃႈ ဢဝ်ၸွႆႈဢိၼ်ႉလူး”
ၸဝ်ႈပိုၼ်းႁၢၼ်ၼၼ်ႉၵေႃႈ ဢဝ်ၸွႆႈလုၵ်ႈမၼ်းယဝ်ႉသေ မိူဝ်ႈႁွတ်ႈထိုင်တီႈတၢင်းလီယဝ်ႉ။
“ဢဝ်မိူဝ်းဢႄႈၵမ်းၼႆႉ ၵဝ်တေဢဝ်ယူၵ်ႇၵူၺ်ႈမိူဝ်း”
ဢေးၼၢင်းၼၼ်ႉၵေႃႈ တဵင်ႇလေႃးၽလူင်မၼ်းမိူဝ်းၵႂႃႇယဝ်ႉ။
ပေႃးဝႃႈၵႂႃႇႁူင်းႁဵၼ်းၼႆၵေႃႈ တင်းထူင်ပိူဝ်ႉသေတင်းထူင်မၢၵ်ႇၾႆးၼၼ်ႉသေ မႅၵ်ႇလူင်ၶိုၼ်ႈလွႆၵႂႃႇ။ ပေႃးဝႃႈၶိင်ႇလိုဝ်ႈမႃးၼႆၵေႃႈ ဢွၼ်ၵၼ်ၵိၼ် ၵႃႈမီးၵႃႈဢမ်ႇပေႃး။

