“ယူႇလီယူႇႁႃႉ”
“ဢိုမ်ႈ သူလူး”
“ယူႇလီယူႇၼႃႈ ႁဝ်းၶႅၼ်းလီယဝ်ႉဝႃႈ”
“မီးၵေႃႉႁၵ်ႉယဝ်ႉႁႃႉ..ပႆႇမီး” သဵင်တဵတ်ႇယဵၼ်လူင်ၼၼ်ႉ ၼင်ႇဝႃႈမီးသေလွင်ႈလွင်ႈ ဢၼ်ႁွင်ႉမေႃးယူႇၼႂ်းၸႂ်ဝႆႉယဝ်ႉ။
“ပဵၼ်ႁိုဝ်ဝႆႉလႃႇႁဵတ်းၵၢၼ်ယူႇတီႈၵဝ်ႇၵူၺ်းႁႃႉ”
“ဢမ်ႇယဝ်ႉ..ႁဝ်းၶၢႆႉၵၢၼ်မိူဝ်းယူႇၸွမ်းပီႈၼၢင်းႁဝ်းယဝ်ႉဝႃႈ”
“ၼၼ်ႁႃႉ”
“သူလူး တိုၵ်ႉယူႇတီႈၵဝ်ႇယူႇၼႄႇ”
“ၸႂ်ႈယဝ်ႉဝႃႈ”
“တိုၵ်ႉၶီႈလႄႇမိူၼ်ၵဝ်ႇၵူၺ်းယူႇၼေႃႈ”
“ဢိုမ်ႈ”
“ပေႃးၼၼ်ႁဝ်းဢမ်ႇသေလၢႆယဝ်ႉ တီႈႁဝ်းပႅတ်ႈသူၵႂႃႇဝၼ်းၼၼ်ႉ”
“သူဢမ်ႇသူၼ်ၸႂ်ႁဝ်းသေဢိတ်းယဝ်ႉႁႃႉ ႁဝ်းတႄႉပႆႇလိုမ်းသူလႆႈၼႃ”
“ႁဝ်းၵေႃႈဢမ်ႇလိုမ်းသူလႆႈမိူၼ်ၵၼ် သူလၢတ်ႈသင် သူႁဵတ်းသင်ဝႆႉ ႁဝ်းတိုၵ်ႉတွင်းယူႇၵူၺ်းဢိူဝ်ႈ ႁဝ်းတေဢမ်ႇမီးဝၼ်းလိုမ်းလႆႈလေႃႇၼႃႈ”
ဝႆႉၼႃႈတႃဢွၼ်ႈဝွၼ်းသေ “ယႃႇၸႂ်ႁၢႆႉၼႃႇပူၼ်ႉတီႈလႄႈ ၶႂၢင်းပၼ်ႁဝ်းဢမ်ႇလႆႈႁႃႉ”
“သူဢမ်ႇလႆႈႁဵတ်းသင်ၽိတ်း ဢၼ်ၽိတ်းၼႆႉတီႈႁဝ်းၵူၺ်း သူၵေႃႈပၼ်တွၼ်ႈသွၼ်တင်းၼမ် သမ်ႉဝႃႈႁူၼ်ၶၢဝ်းယၢမ်းၶိုၼ်းၵေႃႈ ႁဝ်းလိူၵ်ႈမိူၼ်ၵဝ်ႇၵူၺ်း မၼ်းမီးၵႃႈၶၼ် တေဢဝ်ငိုၼ်းသိုဝ်ႉဢမ်ႇလႆႈတေႉဢိူဝ်ႈ”
ၼွင်ႉဢွမ်ယၵ်ႉတူၺ်းၼႃႈမၼ်းသေယဝ်ႉ “ၵႂႃႇလႆႈလီယူႇႁႃႉ ၸွမ်းၵေႃႉဢၼ်သူၸွမ်းဝၼ်းၼၼ်ႉ”
“ၵေႃႉလႂ် ဢမ်ႇမီးလူး”
“ၸူမ်းယဝ်ႉ တီႈသူတိုၵ်ႉမိူၼ်ၵဝ်ႇယူႇၵူႈလွင်ႈ ဝူၼ်ႉဝႃႈပေႃးသူလႅၵ်ႈလၢႆႈ ၸႂ်ႁဝ်းၸၢင်ႈလႅၵ်ႈလၢႆႈမႃးယူႇ ႁဝ်းဝူၼ်ႉၼမ်ႁင်းၵူၺ်း”
“သူဝူၼ်ႉဝႃႈႁဝ်းဢမ်ႇယၢမ်ႈႁၵ်ႉသူႁႃႉ”
“ဢမ်ႇၼႃ သူတေႁၵ်ႉႁဝ်းယူႇလႄႈတိုၵ်ႉႁၵ်ႉႁဝ်းယူႇၵေႃႈပဵၼ်လႆႈ ၵူၺ်းၵႃႈ ႁဝ်းဢမ်ႇလႆႈၶၢတ်ႇယွၼ်ႉတၢင်းႁၵ်ႉ၊ ႁဝ်းၶၢတ်ႇယွၼ်ႉယွမ်းႁပ်ႉတၢင်းယၢမ်ႈသူဢမ်ႇလႆႈၵူၺ်း ႁၵ်ႉယူႇၵေႃႈတိုၼ်းတေၶၢတ်ႇယဝ်ႉ သူပဵၼ်ၵူၼ်းၵေႃႉဢၼ်ႁဝ်းဢမ်ႇလႆႈၸႂ်ဢၵျၢင်ႉတၢင်းယၢမ်ႈၸိူင်ႉၼင်ႇသူလႄႈ ႁဝ်းၸင်ႇလႆႈတတ်းၶၢတ်ႇၵႂႃႇ ပေႃးဝႃႈႁဝ်းႁူႉဝႃႈမၼ်းဢမ်ႇၸႂ်ႈယဝ်ႉ ႁဝ်းၵေႃႈဢမ်ႇသဵင်ႈၶၢဝ်းယၢမ်းၸွမ်းမၼ်းလႆႈလေႃႇၼႃႈ”
“လၢတ်ႈပေႃးတၢၼ်ႇသူလီယဝ်ႉ”
“ႁဝ်းၵေႃႈဢမ်ႇၸႂ်ႈၵူၼ်းလီသင် သူၵေႃႈဢမ်ႇၸႂ်ႈၵူၼ်းႁၢႆႉလူး လိူဝ်သေဝႃႈႁဝ်းဢမ်ႇၵျိူၵ်ႈၵူၺ်း”
“ႁဝ်းပဵၼ်ၵူၼ်းၸိူင်ႉႁိုဝ် တေလႆႈမူၼ်ႉမႄးၸိူင်ႉႁိုဝ်”
“သူၵေႃႈပဵၼ်တူဝ်သူယူႇယဝ်ႉ ႁဝ်းဢမ်ႇမေႃမႄးၽႂ် ယဝ်ႉၵေႃႈ သူဢမ်ႇၸႂ်ႈၵူၼ်းၵေႃႉဢၼ်လၢတ်ႈယဝ်ႉတေမူၼ်ႉမႄးလႆႈလေႃႇၼႃႈ”
“လၢတ်ႈမႃးတူၺ်းလႄႈ”
“သူၵေႃႈႁူႉတူဝ်ယူႇလူး ႁူႉဝႃႈဢၼ်လႂ်လီဢမ်ႇလီ ဢၼ်လႂ်ၽိတ်းဢမ်ႇၽိတ်း သူႁူႉၵူႈလွင်ႈယဝ်ႉ ၵူၺ်းၵႃႈသူလိူၵ်ႈႁဵတ်းဢၼ်ၶႂ်ႈႁဵတ်းၵူၺ်း”
ၼွင်ႉဢွမ်ယုမ်ႉဢိတ်ႉၼိုင်ႈသေ “သဵၼ်ႈတၢင်းၸၢတ်ႈပၢၼ်ႁဝ်းဢမ်ႇမိူၼ်ၵၼ်”
သမ်ႉပေႃးဢဝ်သႅင်လၢဝ်းပေႃးဢမ်ႇၸၢင်ႈတွပ်ႇသင်ၶိုၼ်းယဝ်ႉ
“ၵွပ်ႈသင်လႄႈဢမ်ႇမီးၸူႉလႃႇ”
“ႁဝ်းဢၢၼ်းမီးၵေႃႉႁူမ်ႈၸၢတ်ႈပၢၼ်ၵူၺ်း သင်တေမႃးပဵၼ်ၵေႃႉႁၵ်ႉမွၵ်ႈၼၼ်ႉၵူၺ်းတႄႉ ဢွၵ်ႇၵႂႃႇလႃႈ၊ သူၵေႃႈသွၼ်ႁႂ်ႈႁဝ်းမေႃလိူၵ်ႈမႃးလႄႈ ႁႂ်ႈမေႃတူၺ်းၵူၼ်းမႃးဢိူဝ်ႈ ၸူမ်းယဝ်ႉၼႃႈ ၸၢႆး”
ဢွမ်ယုမ်ႉၸူးၼင်ႇပူတ်းပွႆႇၵူႈလွင်ႈယဝ်ႉသေ ႁၢင်ႇယၢၼ်ဢွၵ်ႇၵႂႃႇယဝ်ႉ။
သၢႆတႃၸၢႆးသႅင်လၢဝ်းယၵ်ႉတူၺ်းဢွမ်ၵႂႃႇၼင်ႇသေလၢႆၶႂ်ႈၶိုင်ၶိုၼ်းၸၼ်ဝႆႉယူႇၵေႃႈ ဢမ်ႇတၼ်းၶိုတ်းယဝ်ႉဢိူဝ်ႈ။ ၵူႈလွင်ႈၸိူဝ်းပူၼ်ႉမႃး ဢၼ်လႆႈႁၵ်ႉႁွမ်ပႅင်းၵၼ်ၼၼ်ႉ ဢမ်ႇလၢတ်ႈဢမ်ႇၼႄး ႁူႉယူႇၵေႃႈဢမ်ႇပွင်ႉဢမ်ႇဝႃႈသင် တီႈတေႉၶဝ်ၵေႃႈၵဵပ်းဝႆႉၼႂ်းၸႂ်ၼႆႉၵူၺ်းလူး။
ဢမ်ႇၸႂ်ႈဝႃႈဢမ်ႇသူၼ်ၸႂ် ဢမ်ႇၸႂ်ႈဝႃႈဢမ်ႇလႆႈႁၵ်ႉ ၶႂ်ႈၶဝ်ႈၸမ်ယူႇဢိူဝ်ႈ ၵူၺ်းၵႃႈၵူဝ်မေးလူင်ႁူႉၼၼ်ႉၼႃႇၼႃ။
ၶဝ်ၽၢတ်ႇၵႂႃႇယဝ်ႉၵေႃႈတေၸၢင်ႈႁဵတ်းႁိုဝ် သေလၢႆယူႇၵေႃႈဢမ်ႇၸၢင်ႈဢဝ်ၶိုၼ်းယဝ်ႉၼႃႇ တိူဝ်ႉၸႂ်မႃးၵေႃႈ ဢဝ်လဝ်ႈယႃၸႂ်သေ ႁႃၵေႃႉႁႃသေႈသေ ဢုပ်ႇထႅင်ႈၵေႃႉမႂ်ႇ ၵဝ်းထႅင်ႈၵေႃႉသွင် ပေႃးပိူၼ်ႈၵွင်လင်ပႅတ်ႈၵေႃႈ ပၼ်ႇတူင်ႇယူႇၸိူင်ႉၼၼ်တိၵ်းတိၵ်းၵူၺ်းယဝ်ႉ ၸၢတ်ႈပၢၼ်ၸၢႆးသႅင်လၢဝ်းၶဝ်ၼႆႉတႄႉ။
ယၢၼ်ဢွမ်ၵႂႃႇႁိုင်ယူႇတၢၼ်ႇတၢၼ်ႇ ဢမ်ႇၽၢၼ်ႇဢမ်ႇၵၢင်း ၸၢႆးၵေႃႈဢဝ်လုၵ်ႈမႄႈပိူၼ်ႈမၢၼ်းသေ ဝွၼ်းႁႂ်ႈၽူႈယိင်းၵေႃႉၼၼ်ႉယႃႉလုၵ်ႈၼႆယူႇ၊ ယိင်းၼၼ်ႉၵွပ်ႈႁၵ်ႉမၼ်းၼႃႇလႄႈ ယုမ်ႇၵႂႃႇသေ လႆႈယႃႉလုၵ်ႈၵႂႃႇတေႉယဝ်ႉ။ ၵူၺ်းၵႃႈ မၼ်းဢမ်ႇႁူႉဝႃႈ ၽူႈယိင်းၼိုင်ႈၵေႃႉဢၼ်လႆႈတူၵ်းသုမ်းလုၵ်ႈဢွၼ်ႇၵႂႃႇၼႆႉ မၼ်းလႆႈတုၵ်ႉမွၵ်ႈၵႃႈႁိုဝ်ၼႆ ၸဵမ်ပၢႆးတူဝ်ပၢႆးၸႂ်ယဝ်ႉ။
ၵေႃႉပဵၼ်ၽူႈၸၢႆးၼၼ်ႉ လၢတ်ႈငၢႆႈဢိူဝ်ႈမၼ်းဢမ်ႇၸႂ်ႈတူဝ်ၶဝ်လူး ၵူၺ်းၵႃႈ ၽူႈယိင်းၼၼ်ႉ တင်းတူဝ်တင်းၸႂ် မၼ်းလႆႈၶၢမ်ႇယဝ်ႉ။
ဝၢႆးသေၼၼ်ႉၵေႃႈ ၸၢႆးသႅင်လၢဝ်းပႅတ်ႈၽူႈယိင်းၵေႃႉၼၼ်ႉၵႂႃႇထႅင်ႈသေ သၢင်ႉလၢဝ်းတၢင်းမဝ်းမိင်းယူႇၼၼ်ႉၵူၺ်းလႄႈ ဢမ်ႇမီးၸၢတ်ႈပၢၼ်ၵိုမ်းမၼ်ႈလႆႈ ဢမ်ႇမီးသင်တႃႇပူၵ်းပွင်ၽဝၸဝ်ႈၵဝ်ႇႁႂ်ႈၶိုၼ်ႈယႂ်ႇလႆႈလႄႈ မေးလူင်မၼ်းၵေႃႈ ၵူတ်ႉၽူဝ်ၵႂႃႇပႅတ်ႈသေယဝ်ႉ လႆႈသုမ်းၵႂႃႇၵူႈၸိူဝ်ႉၵူႈလွင်ႈသေ လွင်ႈဢၼ်မၼ်းလႆႈႁဵတ်းမႃးၸိူဝ်းၼၼ်ႉၵေႃႈ ၶုၵ်းၶူၼ်ႉတူၺ်းယဝ်ႉ ၵူၺ်းႁူႉဝႃႈဢသၢၵ်ႈယႂ်ႇမႃးယဝ်ႉၵေႃႈ ပႆႇႁႃႁွမ်တွမ်ၸူႉတုမ်သင်လႆႈလူး။
ဢူၺ်းၵေႃႉဢူၺ်းသႄႈ မီးၼႃႈႁိူၼ်းတႃယေး မီးၼႃႈၵၢၼ်တႃငၢၼ်းလဵင်ႉလူၼႃႈႁိူၼ်းလႆႈ၊ ဢမ်ႇမီးတီႈပိုင်ႈဢိင်ဢုၼ်ႇၸႂ်လႆႈယဝ်ႉ ၵူၺ်းၵႃႈၸဝ်ႈၵဝ်ႇသမ်ႉဢသၢၵ်ႈယႂ်ႇၵႄႇမႃး တေႁဵတ်းၵၢၼ်သင်ၵေႃႈဢမ်ႇႁူႉ၊ ႁႃႁဵတ်းလုၵ်ႈလဵင်ႉလုၵ်ႈၸၢင်ႈပိူၼ်ႈၵေႃႈ ၵႄႇသေလၢႆယဝ်ႉလူး ၸူးဢဝ်မွၵ်ႈၼႆႉတႄႉ ဢမ်ႇပႄႉၵေႃႈၵႃႈလႆႈႁဵတ်းၵႂႃႇတူၺ်း မိူၼ်တိုၵ်ႉလႆႈတႄႇမႂ်ႇၼၼ်ႉယူႇ။
ဢွမ်တႄႉၵေႃႈ တႄႇၼႃႈႁိူၼ်းသေ မီးလုၵ်ႈသွင်ၵေႃႉယဝ်ႉ ၽူဝ်မၼ်းၵေႃႈ ၼင်ႇႁၢင်ႈၵိုင်ႇလႅပ်ႈၵၼ်တေႉၼင်ႇၵဝ်ႇ၊ တႃႇၼႃႈႁိူၼ်းၶႃၵေႃႈ ႁူမ်ႈၵၼ်ႁဵတ်းႁႃပွင်ၵႂႃႇၸွမ်းၵၼ် ထိုင်မိူဝ်ႈလဵဝ် ပဵၼ်ၵၢၼ်ပဵၼ်ငၢၼ်းမႃးတႄႉတႄႉယဝ်ႉ။
လႆႈႁူပ်ႉၵၼ်ၶိုၼ်းထႅင်ႈ ဢသၢၵ်ႈ သႅင်လၢဝ်း ပူၼ်ႉသၢမ်သိပ်းၵႂႃႇၸမ်ၸမ်သီႇသိပ်းယဝ်ႉၼႃႇ။
“ယူႇလီယူႇႁႃႉ”
“ဢိုမ်ႈ သူလူး”
“လီယူႇ..မီးၼႃႈႁိူၼ်းယူႇႁႃႉၼႆႉ” ဢွမ်ထၢမ်
“ပေႃးဢမ်ႇမီးသူတေမႃးဢဝ်ႁႃႉ”
“တိုၵ်ႉမိူၼ်ၵဝ်ႇၵူၺ်းလူးပေႃးၼႆ”
“မိူၼ်ၵဝ်ႇၸိူင်ႉႁိုဝ်လႃႇ ပႆႇလိုမ်းႁဝ်းလႆႈၵႃႈထၢင်ႇ”
“လၢတ်ႈယဝ်ႉဝႃႈဢမ်ႇမီးဝၼ်းလိုမ်း”
“သူလႅၵ်ႈလၢႆႈမႃးၼမ်တေႉလူး”
“ႁဝ်းဢမ်ႇယူႇတီႈၵဝ်ႇလူး”
“ၸႂ်ႈဢိူဝ်ႈၼေႃႈ ၸိူင်ႉၼင်ႇႁဝ်းၼႆႉ လိူဝ်သေဢသၢၵ်ႈယႂ်ႇယဝ်ႉ သင်ၵေႃႈဢမ်ႇမီးၸိူင်ႉၼႆ ဢမ်ႇႁတ်းဢဝ်ၽႂ်မႃးယူႇၸွမ်းလႆႈလေႃႇ”
“ပေႃးဢမ်ႇႁဵတ်းသင် မၼ်းၵေႃႈဢမ်ႇမီးသင်မႃးလေႃႇၼႃႈ ယွၼ်ႉတၢင်းဝူၼ်ႉသူဢမ်ႇလႅၵ်ႈလၢႆႈလႄႈ ၸင်ႇလႆႈပဵၼ်ၼႆသေ ႁႃသၢင်လၢဝ်ႉၵႂႃႇဝၼ်းလႂ်ဝၼ်းၼၼ်ႉၵူၺ်းၵေႃႈႁူႉပဵၼ်ၼႆယူႇၵူၺ်းဢိူဝ်ႈလေႃႇ”
“ႁဝ်းသမ်ႉတေလႆႈႁဵတ်းႁိုဝ်လႃႇ…ပေႃးဢမ်ႇမီးသင်ယႃၸႂ်ၵေႃႈ ၵႃႈလႆႈႁႃတၢင်းသိူဝ်းၸိူင်ႉၼႆၵူၺ်းဢိူဝ်ႈ”
“ၸႂ်ႈဢိူဝ်ႈ သူၵေႃႈယင်းတိုၵ်ႉၼုမ်ႇယူႇလူး ယင်းတိုၵ်ႉလီလူလီတူၺ်းယူႇၼေႃႈ ပၢႆးယူႇလီၵေႃႈတိုၵ်ႉၶႅမ်ႉယူႇလႄႇၼႆ ဢမ်ႇလူဝ်ႇဝူၼ်ႉၼမ်သေယူႇၵႂႃႇၸိူင်ႉၼႆၵေႃႈလီယူႇၼႃ”
“ထွမ်ႇယဝ်ႉမၼ်းမိူၼ်ႁိုဝ်ဝႆႉဢမ်ႇႁူႉယဝ်ႈ”
“မိူၼ်ၼၼ်ၵေးဢိူဝ်ႈလေႃႇ ၸၢင်ႈဢဝ်မႃးသႂ်ႇၸႂ်ႁဵတ်းသင်”
“သူလၢတ်ႈလႄႈဢမ်ႇသႂ်ႇၸႂ်ၼႆႉ ဢမ်ႇလႆႈလေႃႇၼႃႈ”
“ပေႃးပဵၼ်မိူဝ်ႈဢွၼ်တၢင်းတႄႉယုမ်ႇယဝ်ႉဝႃႈ”
ယၢမ်းၼၼ်ႉ ၽူဝ်ဢွမ်ၵေႃႈ တင်းၸုင်မိုဝ်းလုၵ်ႈမၼ်းၵေႃႉၼိုင်ႈသေႁွပ်ႇလုၵ်ႈမၼ်းထႅင်ႈၵေႃႉၼိုင်ႈ ယူႇၵႆၵႆသေပႆမႃးတၢင်းၶႃၼၼ်ႉ။
“ၽူဝ်ႁဝ်းမႃးၶႆႈယဝ်ႉ”
“မေႃလိူၵ်ႈၽူဝ်ဝႆႉၵွၼ်ႇလူးၼႆႉ”
“တူၺ်းတီႈလႂ်လႃႇ”
“တူၺ်းတီႈမၼ်းဢုမ်ႈလုၵ်ႈသူႁေမႃးၶႆႈသူၼၼ်ႉယဝ်ႉဝႃႈ”
“ယူဝ်ဝႃႈတူၺ်းတီႈတၢင်းလဝ်းမၼ်းၼႃး”
“ၼၼ်ႉတႄႉဢမ်ႇၶိုတ်းႁဝ်းလေႃႇ”
“ယွမ်းႁပ်ႉယူႇၵူၺ်း ယွမ်းႁပ်ႉထႅင်ႈဝႃႈ မီးတၢင်းလဝ်းမဵဝ်းလဵဝ်ၵူၺ်းတႄႉ ႁဝ်းၵေႃႈဢမ်ႇၶႂ်ႈလႆႈၵွၼ်ႇ”
“မေႃၼႃႇၼေႃ လၢတ်ႈႁႂ်ႈပိူၼ်ႈၸဵပ်းၼႆႉ”
ၽူဝ်ဢွမ်ယူႇဢမ်ႇၸမ်ဢမ်ႇၵႆသေႁွင်ႉ “ပႆႇမိူဝ်းႁႃႉမႄႈသူ” လုၵ်ႈမၼ်းလႅၼ်ႈလူင်မႃးၸူးယဝ်ႉ။
ဢွမ်ၵေႃႈႁွပ်ႇဢဝ်လုၵ်ႈၸၢႆးမၼ်းသေ သူင်ႇသင်ႇသႅင်လၢဝ်းၵႂႃႇ
“မိူဝ်းယဝ်ႉၼႃႈ”
“ဢိူဝ်ႈ..လွႆးလွႆး”
ယၵ်ႉတူၺ်းၵႂႃႇတၢင်းလင်ၶဝ်မႄႈလုၵ်ႈ သဵင်ၶူဝ်သဵင်ဢူၼ်ဢၢၼ်မေႃးပၼ်းယူႇၼင်ႇၼၼ် ႁၼ်ယဝ်ႉၵေႃႈ ဢဝ်ၼမ်ႉတႃၸိုမ်ႉယမ်းဝႆႉယူႇဢိူဝ်ႈ။
ပၢႆၵမ် – သႅၼ်ငဝ်း
10/08/2026
