ယၢမ်းၵၢင်ၼႂ်မိူင်းလႅင်းမႃးယဝ်ႉၵေႃႈ ၼၢင်းသိုဝ်ႉလူႇ လႄႈ ၵူၼ်းၼုမ်ႇၵူၼ်းသၢဝ်လၢႆလၢႆၵေႃႉ ဢွၼ်ၵၼ်ဢွၵ်ႇၶၢဝ်းတၢင်း မုင်ႈၼႃႈၵႂႃႇတၢင်းမိူင်းထႆးၼၼ်ႉယဝ်ႉ။
တီႈၶီႇၵႃးၵေႃႈၶီႇ တီႈလႆႈပႆၵေႃႈလႆႈလတ်းယွမ်ႇလတ်းယုမ်းလူင်ၵႂႃႇ ပေႃးႁူႉဝႃႈမီးၵူၼ်း၊ မီးၵႃးလတ်းၽၢၼ်ႇၼိူဝ်သဵၼ်ႈတၢင်းၼႆၵေႃႈ လႆႈလႅၼ်ႈလူင်းယွမ်ႇလူင်းယုမ်း ၼင်ၶုတ်ႇၼင်ၶၼ်ႇၸွမ်းတူၼ်ႈယိူဝ်ႈတူၼ်ႈၼၢမ် သိူဝ်ႈသိၵ်ႇၶူဝ်းၶၢတ်ႇၵႂႃႇယဝ်ႉ။
ယူႇၼႂ်းဝၢၼ်ႈၼႂ်းမိူင်းႁဝ်း ယၢမ်ႈႁဵတ်းၵၢၼ်ယၢပ်ႇၵၢၼ်သူၼ်ၵၢၼ်ႁႆႈယူႇတႃႇသေႇၵေႃႈ ဢၼ်လႆႈပႆၶၢဝ်းတၢင်းၵႆၵႆၸိူင်ႉၼႆၼႆႉ ဢမ်ႇတေႃႇတေႃႇတေႉယဝ်ႉ။ ယၢမ်းၸဝ်ႉတေႃႇၶမ်ႈ ၶဝ်ႈဝၼ်းတၢင်းၵိၼ်တၢင်းယႅမ်ႉဢၼ်ၸွမ်ႇထူင်မႃးၵေႃႈ ဢမ်ႇမီးႁင် တေႃႉတႄႉ မီးၶဝ်ႈဢၼ်ၼၢင်းဢူႉၶဝ်ႁႅၼ်းပၼ်မၼ်း ပႅင်းၵိၼ်မိူဝ်ႈဝႃးတၢင်းဝၼ်းၵေႃႈ ၵိုတ်းလိူဝ်မွၵ်ႈၵမ်မိုဝ်းၼႆႉၵူၺ်း မၼ်းၵေႃႈလွင်တွင်ႉမၼ်းသေ သိုပ်ႇၵႂႃႇၸွမ်းပိူၼ်ႈထႅင်ႈ ၵၢင်ဝၼ်းဢမ်ႇၵႃး ၵၢင်ၶိုၼ်းၵေႃႈလႆႈပႆယဝ်ႉ။
သိူဝ်ႈၶူဝ်းယွၵ်းၽူတ်ႇယူတ်ႇ ႁၢင်ႈၵူၼ်းဝၢၼ်ႈၼွၵ်ႈၼၼ်ႉ၊ ၼႃႉသၢင်ႇၶဝ်ၵေႃႈ ဢွၼ်ဢဝ်မၼ်းၵႂႃႇႁႃႁဵတ်းၵၢၼ်မႄႈဝၢၼ်ႈ တီႈႁိူၼ်းသထေးၶဝ်သေ ႁဵတ်းၵၢၼ်ဝၢၼ်ႈၵၢၼ်ႁိူၼ်း လဵင်ႉလုၵ်ႈလဵင်ႉလၢင်းပိူၼ်ႈၸိူဝ်းၼႆႉ။
မိူဝ်ႈယူႇတီႈဝၢၼ်ႈၵေႃႈ ၵွပ်ႈပိူဝ်ႈဢူႈမႄႈလူႉသဵင်ႈတဵမ်လဵၵ်ႉလႄႈ ပဵၼ်လုၵ်ႈၵေႃႉလိုၼ်းသေ ပီႈၼၢင်းတႄႉတေႇၼႃႈႁိူၼ်းယဝ်ႉ မၼ်းၵူၺ်းလႆႈယူႇၸွမ်းလုင်းၶဝ် လႆႈႁဵတ်းၵၢၼ်ၼႃႈႁိူၼ်းတႃယေးဢမ်ႇၵႃး ၵၢၼ်ဝၢၼ်ႈၵၢၼ်သူၼ်ၵေႃႈလႆႈႁဵတ်းတင်းမူတ်း။ လိူဝ်သေၼၼ်ႉ လႆႈလဵင်ႉလၢၼ်ပိူၼ်ႈပႃးထႅင်ႈ ယူႇၸွမ်းၶဝ် ၵၢၼ်လႆႈႁဵတ်းၵူႈမဵဝ်း ငိုၼ်းဢမ်ႇလႆႈ ၶူဝ်းၼုင်ႈတၢင်းမႂ်ၵူၺ်းၵေႃႈဢမ်ႇသိုဝ်ႉပၼ်ၼုင်ႈ လႆႈႁဵတ်းႁႃဢဝ်ႁင်းၵူၺ်း မၢင်ပွၵ်ႈၵေႃႈ သမ်ႉပၢႆယွၼ်းငိုၼ်းၵၼ်ထႅင်ႈၵွၼ်ႇ။
မႃးႁဵတ်းၵၢၼ်မိူင်းပိူၼ်ႈ ႁဵတ်းၵၢၼ်မႄႈဝၢၼ် ႁဵတ်းလုၵ်ႈလဵင်ႉပိူၼ်ႈၼႆၵေႃႈ ပေႃးမႃးဝူၼ်ႉတူၺ်းၽဝတၢင်းလင်ၼၼ်ႉ တႅၵ်ႈၶိုၼ်းတင်းဝႃႈငၢႆႈလိူဝ်သေဢမ်ႇၵႃး တင်းလႆႈငိုၼ်းထႅင်ႈၵွၼ်ႇ မၼ်းပဵၼ်ၵူၼ်းသိုဝ်ႈသိုဝ်ႈယူဝ်းယူဝ်းၵူၺ်းလႄႈ ပေႃႈလဵင်ႉမႄႈလဵင်ႉၵေႃႈတမ်းၸႂ် ၸႂ်ယႂ်ႇလႆႈယူႇယဝ်ႉ။
ၼၢင်းယိင်းသွင်ၵေႃႉ ၼင်ႈသုၵ်ႉၽၵ်းယူႇတီႈႁုင်မိုဝ်ႉၶဝ်ၼၼ်ႉဢုပ်ႇၵၼ်ယူႇ
“ဢီႇလူႇၵေႃႈ ပဵၼ်ႁိုဝ်ပဵၼ်ႁႃယဝ်ႉဢမ်ႇႁူႉမႂ်း မၼ်းၵႂႃႇပေႃးမီးလၢႆဝၼ်းယဝ်ႉၼႆႉ” ပီႈၼၢင်းလူင်ၼၢင်းသႃႇလၢတ်ႈတီႈၼွင်ႉတၢမ်းမၼ်း တၢင်းဢူႉ။
“ဢမ်ႇပဵၼ်သင်ၵဝ်ႇယူဝ်ႉ သၢင်ႇတိတေလၢတ်ႈမႃးၶိုၼ်းယူႇၵႃႈ”
“ဢိူဝ်ႈ..ၵႂႃႇလႆႈလီၵေႃႈၸူမ်းယဝ်ႉမႂ်း သင်မၼ်းဢဝ်ၽူဝ်တေႇၼႃႈႁိူၼ်းႁေၵေႃႈ ဢမ်ႇလႆႈၵႂႃႇယဝ်ႉ ၵတ်ႉၵႃႈမၼ်းဢမ်ႇတေႇၼႃႈႁိူၼ်းလႃႈၼၼ်”
“ပီႈသၢင်ႇမႃးလၢတ်ႈၶႃႈဝႃႈ ပီႈသႃႇၸူဝ်းမၼ်းမိူဝ်းႁဵတ်းၵၢၼ်ၶိုၼ်းတီႈဝၢၼ်ႈၼႆႁႃႈ လၢတ်ႈတီႈပီႈၶူၺ်ယဝ်ႉၼႄႇ”
“လၢတ်ႈယဝ်ႉဢိူဝ်ႈ..မၼ်းတႄႉဢမ်ႇပေႃးၶႂ်ႈပၼ်ၵဝ်မိူဝ်းၼႄႇၼၼ်ႉ ၵဝ်ၵေႃႈဝႃႈယူႇဢိူဝ်ႈ မႃးယူႇၵိၼ်ၸိူင်ႉၼႆၵေႃႈ ၵၢၼ်ႁင်ၵေႃႈဢမ်ႇလႆႈႁဵတ်းၸိူင်ႉၼႆ လုၵ်ႈဢွၼ်ႇသမ်ႉပဵၼ်ၽုင်ဝႆႉၼႆႉ တေဢဝ်ႁင်လဵင်ႉၵၼ်ယဝ်ႉလႃႇ ပေႃးဢမ်ႇႁဵတ်းႁႆႈႁဵတ်းသူၼ်ၵေႃႈဢမ်ႇၸၢင်ႈႁႃႁဵတ်းႁင်ၵိၼ်ယဝ်ႉမႂ်း ၶဝ်ႈႁဝ်းဢၼ်ဢဝ်မႃးၵေႃႈ တေၵုမ်ႇၵႃႈႁိုဝ်ၵူၺ်းတင်းဢမ်ႇႁူႉယဝ်ႉၼႆႉ ၵဝ်ဝႃႈၵဝ်တေမိူဝ်းတူၺ်းပႃး ၶဝ်ႈပိူၵ်ႇႁဝ်းတီႈႁႆႈၼၼ်ႉၼႆဢိူဝ်ႈ”
“ပိူၼ်ႈသွၵ်ႈတဝ်ပေႉတၢၼ်ႇၼၼ်ႉပီႈတေႁဵတ်းႁိုဝ်မိူဝ်းလႃႇ ပေႃးၺႃးၶဝ်ၵေႃႈတၢႆၵူၺ်းဢိူဝ်ႈ”
“ပေႃးဢမ်ႇႁဵတ်းသင်ၵေႃႈလႆႈဢိုပ်းတၢႆၵူၺ်းဢမ်ႇၸႂ်ႈႁႃႉမႂ်းဝႃႈ ၼၢႆးသူၺ်ႇၶႃပူႇဢွၵ်ႇၵေႃႈတေမိူဝ်းၼႆဢိူဝ်ႈ ႁဝ်းမိူဝ်းၵၼ်ၼမ်ယူႇ သၢင်ႇသုၵေႃႈမိူဝ်းဢိူဝ်ႈ ပီႈၶူၺ်သူတႄႉၵဝ်ႁႂ်ႈမၼ်းပႂ်ႉလုၵ်ႈဢွၼ်ႇၼႆ”
“ၶႃႈတႄႉဢမ်ႇၶႂ်ႈႁႂ်ႈပီႈႁဝ်းမိူဝ်းသေဢိတ်း ပေႃးပဵၼ်ႁင်မႃးတေႁဵတ်းႁိုဝ်”
“ႁဝ်းမိူဝ်းၵူၼ်းၼမ်ယူႇဢမ်ႇပဵၼ်ႁင်လေႃႇ ပေႃးဢမ်ႇၸၢင်ႈၵေႃႈ ႁဝ်းၶိုၼ်းမႃးၶိုၼ်းၵႃႈ မိူဝ်းဢဝ်ၶဝ်ႈၵူၺ်းၼင်”
ၵူၼ်းလၢႆလၢႆၵေႃႉ လတ်းထိူၼ်ႇလတ်းယုမ်းလူင်မိူဝ်းယဝ်ႉ ၸွမ်းတၢင်းတႄႉဢမ်ႇႁတ်းတႆႇဢမ်ႇႁတ်းပႆ ပေႃးဝႃႈငိၼ်းသဵင်သင်မႃးၵေႃႈ ဢွၼ်ၵၼ်ပႅပ်ႉပႅပ်ႉမူပ်ႇမူပ်ႇၵၼ်ၵႂႃႇယဝ်ႉ။
သမ်ႉဝႃႈဢမ်ႇလႆႈသွၼ်ၵၢၼ်သိုၵ်းသေတႃႉၵေႃႈ တႃႇဢဝ်တူဝ်လွတ်ႈၼၼ်ႉ မီးဝႆႉႁင်းၽႂ်ႁင်းမၼ်းယူႇယဝ်ႉၼႃႇ။
မုင်ႈၵႂႃႇႁၼ်ၼႂ်းဝၢၼ်ႈတီႈထင်သဝ်းႁိူၼ်းၶဝ်ၼၼ်ႉ သမ်ႉပေႃးယဵၼ်သီႇသီႇ ၵူဝ်ၼႃႇလႄႈဢမ်ႇႁတ်းၶဝ်ႈမိူဝ်းၼႂ်းဝၢၼ်ႈသေ ဢွၼ်ၵၼ်ၵႂႃႇတၢင်းထဵင်ႁႆႈၶဝ် ဢၼ်ဝႆႉၶဝ်ႈပိူၵ်ႇ ပေႃႉယဝ်ႉပႆႇတၼ်းလႆႈဢဝ်မိူဝ်း သမ်ႉလႆႈပၢႆႈပႅတ်ႈၼၼ်ႉယဝ်ႉ။
ပုမ်ႇၶဝ်ႈဢၼ်ပႆႇပေႃႉၸိူဝ်းၼၼ်ႉတႄႉ ၾႆးၽဝ်ပဵၼ်ၽဝ်ႇသဵင်ႈမူတ်းယဝ်ႉ။
ယူႇၵႆၵႆသေလွမ်ငွႆးတူၺ်း
“ၸွင်ႇဢၢပ်ႈမီးၵူၼ်းယူႇႁႃႉၼၼ်ႉမႃႈ” ၼၢႆးသူၺ်ႇယူႇၵႆၵႆသေယၵ်ႉတူၺ်း။
“ဢမ်ႇမီးယူဝ်ႉ ၵႂႃႇႁႃးၵႂႃႇတူၺ်းသၢင်ႇသု” ၼၢင်းသႃႇလၢတ်ႈၸူးသၢင်ႇသု
“ပေႃးႁၼ်ၵူၼ်းၵေႃႈၼႅတ်ႈမႃးၶိုၼ်းဢိူဝ်ႈၼႃႈယႃႇပေၵႂႃႇ” ၼၢႆးသူၺ်ႇလၢတ်ႈၸွမ်းၼင်ႇမႆႈၸႂ်တေႉတေႉၼၼ်ႉယဝ်ႉ။
“ဢိူဝ်ႈ..ႁႃးတေမႃးၵူၺ်း”
ၼၢင်းသႃႇလႄႈသၢင်ႇသုၵေႃႈၸူဝ်းၵၼ်ၵႂႃႇယဝ်ႉ။
သွင်ၶႃငွႆးငွႆးသေၵႂႃႇ ယူႇၸူဝ်ႈၼိုင်ႈ မီးၵူၼ်းဢဝ်ၵွင်ႈငႃၵွင်ႇၵေႃႈၶႃသေ သွင်ၶႃၼၼ်ႉၵေႃႈ ၶုပ်ႉၶဝ်ႇယုၵ်ႉမိုဝ်းၼင်ႇၵူၼ်းယွမ်းသုမ်းၵမ်းလဵဝ်။ ၶဝ်ၵေႃႈဢမ်ႇထၢမ်သင်သေ တိၺွပ်းမတ်ႉလၢၵ်ႈထိုတ်ႉလၢၵ်ႈထူၵႂႃႇၼႂ်းၵၢင်သူၼ်ၼၼ်ႉယိုင်။
“ၼၢႆးသူၺ်ႇ ၼၼ်ႉဢမ်ႇၸႂ်ႈၸုမ်းသိုၵ်းၶဝ်ႁိုဝ်လႃႇ”
“ၸႂ်ႈယူႇႁႃႉလုင်းလႃႉ မီးလႂ်ဢႃႈ” ငွၵ်ႈၶေႃးတူၺ်းၵႂႃႇတၢင်းထဵင်ၼၼ်ႉ
လႆႈႁၼ်ၵူၼ်းႁူၵ်းၸဵတ်းၵေႃႉ လၢၵ်ႈၸၼ်ဢဝ်ၼၢင်းသႃႇလႄႈတင်းသၢင်ႇသု ၼၼ်ႉၵႂႃႇယဝ်ႉ။
“တေႁဵတ်းႁိုဝ်လႃႇႁဝ်း” ၼၢႆးသူၺ်ႇၵေႃႈၵိုင်ႉၵၢင်ႉမီးလူမ်းႁူဝ်ၸႂ်ႁူဝ်ၶေႃးမႃး “ၵႂႃႇလႄႈႁဝ်းၵႂႃႇၸွႆႈၶဝ်”
“ပေႃးၵႂႃႇၵေႃႈႁဝ်းတၢႆၵၼ်မူတ်းယဝ်ႉဢိူဝ်ႈလေႃႇ”
“ၶႃသွင်ၵေႃႉလူး..ပေႃးၶႃတၢႆလူးတေႁဵတ်းႁိုဝ်”
“လွႆးလွႆးဢိတ်ႉၼိုင်ႈလႄႈ ၵမ်ႉၶဝ်တေငိၼ်းသဵင်ႁဝ်းယဝ်ႉ”
ယူႇယူႇလႆႈလွမ်ငွၵ်ႈတူၺ်းၵႂႃႇၸိူင်ႉၼၼ်ၵူၺ်း၊ သဵင်ႁွင်ႉသႅၼ်ႇယူႇၼၼ်ႉၵေႃႈ ငိၼ်းယူႇၼႂ်းႁူဢိူဝ်ႈ လႆႈလွမ်ယၵ်ႉတူၺ်းသေဢဝ်ၼမ်ႉတႃတူၵ်းယွတ်ႇၵူၺ်း၊ ယူႇၸူဝ်ႈၼိုင်ႈ သဵင်ၵွင်ႈလင် တုမ်ႉတိူဝ်ႉသၢၼ်ႈၸီႈမႃးၼႂ်းႁူဝ်ၸႂ်ၼႆႉယူႇၵေႃႈ ဢမ်ႇၸၢင်ႈႁဵတ်းႁိုဝ် ၶႂ်ႈႁွင်ႉသႅၼ်ႇႁႆႈယူႇၼႆၵေႃႈ လႆႈဢဝ်ၼမ်ႉတႃၼၼ်ႉၼွင်းဢိူၵ်ႇၼႃႈၵႂႃႇၽႂ်မၼ်းၵူၺ်း။
ဝၼ်းၶမ်ႈလပ်းသိင်ႇယဝ်ႉလႄႈ လႆႈငိၼ်းသဵင်ၸုမ်းသိုၵ်းၶဝ်ၼၼ်ႉ လတ်းၽၢၼ်ႇမႃးတၢင်းၶဝ်ယူႇၼၼ်ႉၼႆၵေႃႈ ၼႅတ်ႈပႅပ်ႉဝႆႉသမ်ႉပေႃးဢမ်ႇႁတ်းထူၺ်ႈၸႂ်ယဝ်ႉၼႃႇ။
တီႈၼႂ်းဝဵင်း လုၵ်ႈယိင်းၼၢင်းသႃႇသွင်ၵေႃႉၼၼ်ႉၵေႃႈ လဵၼ်ႈၸွမ်းလုၵ်ႈဢွၼ်ႇၸိူဝ်းၼၼ်ႉယဝ်ႉ ၵၢင်ၶမ်ႈမႃးယဝ်ႉ ဢွၼ်ၵၼ်ၶဝ်ႈႁိူၼ်းမိူဝ်းသေ ဢမ်ႇလႆႈႁၼ်မႄႈၶဝ် ဢၼ်ၵႆႉႁုင်မိုဝ်ႉၵႅင်ၼင်ႇၵူႈဝၼ်းၼၼ်ႉယဝ်ႉလႄႈ ၶဝ်ႈၵေႃႈတွင်ႉမႆႈယဝ်ႉ ဢူႈၶဝ်သမ်ႉၵႂႃႇတၢင်းလႂ်ဢမ်ႇႁူႉ။
“ဢီႇၼႃႉ မႄႈႁဝ်းၵႂႃႇလႂ်ယဝ်ႉ”
“မႄႈသူမိူဝ်းတီႈဝၢၼ်ႈဢိူဝ်ႈ..ၵမ်ႉၵေႃႈမႃးယဝ်ႉ”
ၼၢင်းဢူႉၼၼ်ႉၵေႃႈ တၵ်းၶဝ်ႈၵွၼ်ႉပၼ်ၶႃပီႈၼွင်ႉၵိၼ်ၵႂႃႇသေ ယၵ်ႉတူၺ်းလုၵ်ႈဢွၼ်ႇၼင်ႇႁၢင်ႈပႃးလွင်ႈမွင်မွင်ဝႆႉယူႇ။
“ဢီႇသႃႇၶဝ်ပႆႇမႃးၶိုၼ်းႁႃႉဢီႇဢူႉ”
“ပႆႇမႃးၶႃႈၼႃႉၶမ်း”
“ၸႂ်ၵဝ်ဢမ်ႇပေႃးလီၼႆႉမႂ်း ၵူဝ်ၶဝ်မိူဝ်းပဵၼ်သင်ဢိူဝ်ႈမႂ်းဝႃႈ”
“ၶႃႈၵေႃႈဝႃႈၼၼ်ယဝ်ႉ ၸႂ်ၸႃႉၸႂ်ဢမ်ႇၵျေႃႇသေတၢင်းဝၼ်းယဝ်ႉၼႆႉ”
ၼၢႆးသူၺ်ႇၶဝ်ၼၼ်ႉၵေႃႈ ဝၢႆးသေႁၼ်ၸုမ်းသိုၵ်းၶဝ်ဢွၵ်ႇၵႂႃႇယဝ်ႉ ၸင်ႇၶိုၼ်းၸွမ်းသွၵ်ႈတီႈသုမ်ႉထဵင်ၶဝ်ၼၼ်ႉလႄႈ ၵူၼ်းၵေႃႈဢမ်ႇႁၼ်ယဝ်ႉ၊ လပ်းသိင်ႇၼႃႇ ၾႆးၵေႃႈဢမ်ႇႁတ်းတႆႈ ၸင်ႇၶိုၼ်းဢွၼ်ၵၼ်ပွၵ်ႈမိူဝ်းၵႂႃႇယဝ်ႉ။
ၶဝ်ႈပိူၵ်ႇၼႂ်းထဵင်ၼၼ်ႉၵေႃႈဢမ်ႇမီးသင်လိူဝ်သေမဵဝ်း။ မိူဝ်ႈမိူဝ်းၵႂႃႇၸွမ်းတၢင်းၼၼ်ႉ လႆႈငိၼ်းသဵင်ၵွင်ႈတၢင်းၼႃႈၶဝ်ၼၼ်ႉထႅင်ႈ၊ ၶမ်ႈၼၼ်ႉတႄႉ သမ်ႉပေႃးဢမ်ႇၶႂ်ႈႁတ်းပွၵ်ႈၶိုၼ်းယဝ်ႉ။
ၼႂ်းၶမ်ႈၶိုၼ်းလပ်းသိင်ႇလူင်ၼၼ်ႉ လုၵ်ႈယိင်းဢွၼ်ႇ ဢၼ်ၵႆႉယၢမ်ႈၼွၼ်းယူႇႁိမ်းမႄႈၵူႈၶိုၼ်းၼၼ်ႉၵေႃႈ ဢမ်ႇႁူႉမႄႈႁၢႆၵႂႃႇတၢင်းလႂ်ယဝ်ႉ ဢမ်ႇႁူႉဝႃႈပဵၼ်သင် ၵိၼ်ဢိမ်ႇၼွၼ်းလပ်းၵႂႃႇႁင်းၽႂ်ႁင်းမၼ်း၊ ၽူဝ်ၽႂ်မေးမၼ်းပႆႇပွၵ်ႈမႃးၼႆၵေႃႈ ဢွၼ်ၵၼ်မႆႈၸႂ်မႆႈၶေႃး ၼွၼ်းပေႃးဢမ်ႇလပ်းလႆႈႁင်းၽႂ်မၼ်းယူႇ။
ပႂ်ႉယူႇတေႃႇထိုင်မိူင်းပေႃးလႅင်းယဝ်ႉၵေႃႈ ဢမ်ႇလႆႈငိၼ်းသဵင်တိၼ်ၶဝ် ၼႂ်းၸႂ်မၢင်ၵေႃႉတႄႉ ဝူၼ်ႉယူႇဝႃႈ ၶဝ်တေတၢႆၵႂႃႇယဝ်ႉႁိုဝ်ၼႆယူႇဢိူဝ်ႈ၊ မၢင်ၵေႃႉၵေႃႈ လွမ်လွမ်လၵ်ႉႁႆႈမႃးယူႇယဝ်ႉ။
“မႄႈႁဝ်းမႃးယဝ်ႉ”
လုၵ်ႈဢွၼ်ႇသွင်ၵေႃႉ ႁၼ်ၼၢႆးသူၺ်ႇၶဝ်မႃးယဝ်ႉလႄႈ ဢမ်ႇႁူႉဝႃႈ ဢမ်ႇပႃးမႄႈၶဝ်မႃးၸွမ်း။ ၶဝ်ၵေႃႈဢွၼ်ၵၼ်လႅၼ်ႈဢွၵ်ႇမႃးတူၺ်း မိူဝ်ႈၸုမ်းၶဝ်ပႆမႃးၸမ်ၸမ်ၼၼ်ႉၵေႃႈ
“ဢေးပီႈ တမ်ႉဢမ်ႇႁၼ်မႄႈႁဝ်းလႃႇ”
“မႄႈႁဝ်းမႃးတၢင်းလင်ယူဝ်ႉ”
“ၼၢႆးသူၺ်ႇၶဝ်မႃးယဝ်ႉဢိူဝ်ႈသူၸိူဝ်းၼႆႉ” ပႃႈသႅင်ၼႅတ်ႈႁွင်ႉၶဝ်မႃး။
ၼၢင်းဢူႉၼၼ်ႉၵေႃႈ ၼႅတ်ႈမႃးတူၺ်းၸွမ်း ၵူၺ်းဢမ်ႇလႆႈႁၼ်ပီႈၼၢင်းၶဝ် ၼၢင်းသႃႇၼၼ်ႉသေ
“ဢမ်ႇႁၼ်ပီႈသႃႇလႃႇ”
“ဢီႇသႃႇၶႃဢၢႆႈသုလူးဢမ်ႇမႃးၸွမ်းႁႃႉ” ၼၢႆးမူၼ်းထၢမ်ၼၢႆးသူၺ်ႇၶဝ်။
ၼၢႆးသူၺ်ႇၶဝ်ၵေႃႈ မႃးၼင်ႈလိုဝ်ႈႁိူဝ်ႉၵိၼ်ၼမ်ႉသေယဝ်ႉ မႃးၶႆႈၼႄလွင်ႈဢၼ်ၶဝ်ထူပ်းမႃးၼၼ်ႉလႄႈ ၼၢင်းသႃႇၶႃပီႈသုၼၼ်ႉၵေႃႈ ဢမ်ႇႁူႉဝႃႈပဵၼ်ႁိုဝ်တၢႆယဝ်ႉ တူဝ်တၢႆၶႃၵေႃႈဢမ်ႇလႆႈႁၼ်ၺႃး ၵူၺ်းသမ်ႉမီးသဵင်ၵွင်ႈယူႇ ၶဝ်ၵေႃႈ ဝူၼ်ႉဝႃႈၼၢင်းသူၺ်ႇၶႃလႅပ်ႈတေတၢႆၵႂႃႇယဝ်ႉၼႆ။
ၵေႃႉပဵၼ်ၽူဝ်ၼၢင်းသူၺ်ႇလႄႈမေးၸၢႆးသုၼၼ်ႉတႄႉ ပဵၼ်ဢၼ်သုၵ်ႉၵိၼ်းၸႂ်ဝႆႉယူႇဢိူဝ်ႈ၊ ၼၢင်းဢူႉၵေႃႈတေႃႈၼင်ႇၼၼ် လုၵ်ႈၼၢင်းသႃႇၵေႃႈ ဢွၼ်ၵၼ်မႃးထၢမ်
“ၼၢႆးသူၺ်ႇ မႄႈႁဝ်းဢမ်ႇမႃးၸွမ်းလႃႇ” ၵေႃႉပီႈဢေးယိင်းထၢမ်
“မႄႈသူဢမ်ႇမႃးယဝ်ႉ ပေႃးပိူၼ်ႈမိူဝ်းၶိုၼ်း ႁဝ်းၸွင်ႇၵွႆႈမိူဝ်းၸွမ်းႁႃၼႃႉ”
“မႄႈႁဝ်းတေမႃးၶိုၼ်းမိူဝ်ႈလႂ်” ၵေႃႉၼွင်ႉဢေးလိုၼ်းထၢမ် တင်းသၢႆတႃမုင်ႈမွင်း ဢၼ်ၶႂ်ႈႁူပ်ႉႁၼ်မႄႈၶဝ်ၼႃႇတေႉၼၼ်ႉယဝ်ႉ။
ၼၢႆးသူၺ်ႇၼၼ်ႉၵေႃႈ သမ်ႉပေႃးဢမ်ႇႁူႉတေႁဵတ်းႁိုဝ်ယၵ်ႉ ယၵ်ႉတူၺ်းလၢၼ်ဢွၼ်ႇမၼ်းသွင်ၵေႃႉၼၼ်ႉသေ ပွႆႇၼမ်ႉတႃမၼ်းၸိုမ်းမႃး ၶေႃးၶူမ်ဢိုၼ်ၼမ်ႉလၢႆးၵူၺ်းပေႃးယၢပ်ႇယဝ်ႉဢိူဝ်ႈ။
သိုပ်ႇလူဢၢၼ်ႇထႅင်ႈတွၼ်ႈတေမႃးၶႃႈ
