တီႈၼႂ်းထိူၼ်ႇလူင်ၼၼ်ႉ သိုၵ်းတႆးၵေႃႈ ဢွၼ်ၵၼ်လတ်းထိူၼ်ႇလတ်းၶိူဝ်းလူင်ၵႂႃႇ တႃႇႁႃတီႈၸူႉတုမ်ႁႅင်းၵၼ် ဝၢၼ်ႈၼိုင်ႈဝဵင်းၼိုင်ႈ ၸႅၵ်ႇၽႄၵၼ်ၵႂႃႇၵေႃႉတီႈၵေႃႉတၢင်း၊ ပိုၼ်းႁၢၼ်ၵေႃႈ ဢွၼ်ဢဝ်ႁႅင်းၵူၼ်းမၼ်းသေ လတ်းၽႃႇလတ်းၶိူဝ်း ပွတ်းတူၵ်းၶူင်း တႃႇၶၢမ်ႈၶူင်းမိူဝ်းၵႂႃႇတၢင်းဢွၵ်ႇၶူင်းၼၼ်ႉယူႇယဝ်ႉ။
လတ်းၽၢၼ်ႇဝၢၼ်ႈၼိုင်ႈယဝ်ႉဝၢၼ်ႈၼိုင်ႈ မိူင်းၼိုင်ႈယဝ်ႉမိူင်းၼိုင်ႈ သဵၼ်ႈတၢင်းဢမ်ႇတၢႆတူဝ် မၢင်တီႈၵေႃႈႁူပ်ႉၽူႈၶဵၼ်၊ မၢင်တီႈၽူႈၶႅၼ်ႁႅင်းယႂ်ႇ ႁႅင်းၵူၼ်းဢေႇၼႆၵေႃႈ ဢွၼ်လုၵ်ႈၼွင်ႉမၼ်းငိူင်ႉဝႄႈပၢႆႈသေ သိုပ်ႇၶၢဝ်းတၢင်းၵႂႃႇတေႃႇသုတ်းဝၼ်းသုတ်းၶိုၼ်း ႁိုင်ပဵၼ်လၢႆလိူၼ်လၢႆဝၼ်းၵေႃႈ ပႆႇၶၢမ်ႈထိုင်ၽင်ႇၶူင်းလႆႈ။
တႃႇတေႃႉသူင်ႇတၢင်ႇၶူဝ်းၼႆၵေႃႈ ၸႂ်ႉမႃႉပဵၼ်ႁႅင်းတၢင်ႇသေသိုပ်ႇၶၢဝ်းတၢင်းၵႂႃႇယဝ်ႉ၊ မၢင်တီႈမၢင်တၢင်းၵေႃႈ ၵူၼ်းၸုမ်းလဵဝ်ၵၼ်ဢမ်ႇႁူႉၵၼ်သေ လႆႈႁူပ်ႉၺႃးၵၼ်ၶိုၼ်းၵေႃႈမီး။ ဢမ်ႇႁူႉဝႃႈ ၼႂ်းထိူၼ်ႇလူင်ၼၼ်ႉ လိူဝ်သေၽူႈၶဵၼ်ယဝ်ႉ သိုၵ်းတႆးၼႆၵေႃႈ ဢမ်ႇႁူႉမၼ်းၸႅၵ်ႇပဵၼ်ၵႂႃႇလၢႆၸုမ်းယဝ်ႉ ယိူင်းဢၢၼ်းမိူၼ်ၵၼ်လႄႈ ပဝ်ႉမၢႆမိူၼ်ၵၼ်ယူႇၼႆသေ သိုပ်ႇႁူမ်ႈႁႅင်းၵၼ် ဢွၼ်ၵၼ်လတ်းၽႃႇၵႂႃႇၸွမ်းၵၼ်ယဝ်ႉ။
ၶဝ်ႈၵႂႃႇၼႂ်းဝၢၼ်ႈယဵၼ်သီႇသီႇ မူမႃၵႃၵႆႇဢမ်ႇမီးသင် သဵင်ၼူၵ်ႉႁွင်ႉၵူၺ်းတင်းဢမ်ႇလႆႈငိၼ်း ၵူၺ်းငိၼ်းသဵင်ၵႃလမ် ႁွင်ႉမေႃး ၵႃ.. ၵႃ..ယူႇတိၵ်းတိၵ်း။
ၶဝ်ႈၼမ်ႉတၢင်းဢၼ်မီးၼႂ်းထူင်ၼႂ်းၸၢၼ်ႈၵေႃႈ ဢမ်ႇလိူဝ်သင်ယဝ်ႉလႄႈ သွၵ်ႈၵႂႃႇသွၵ်ႈမႃး ႁၼ်ၺႃးၶဝ်ႈၵၢပ်ႇလိပ်ႈဢွႆႇမူယူႇၼၼ်ႉၵူၺ်းၵေႃႈ ၼင်ႇႁၢင်ႈပဵၼ်ၶွင်လီၶွင်ဝၢၼ်လဵင်ႉတွင်ႉၵၼ်ပဵၼ်လၢႆမိုဝ်ႉလၢႆတႃႇယဝ်ႉဢိူဝ်ႈ။
ပိုၼ်းႁၢၼ်ၵေႃႈ ဢဝ်ၼႂ်းထူင်ၸၢၼ်ႈၼၼ်ႉ ၸႅၵ်ႇပၼ်လုၵ်ႈၼွင်ႉမၼ်းၵႂႃႇသေ သိုပ်ႇၶူၼ်ႉသွၵ်ႈတူၺ်းၼႂ်းႁိူၼ်းၸိူဝ်းဢၼ်တိုၵ်ႉၵိုတ်းယူႇၼၼ်ႉၵေႃႈ ႁိုဝ်မီးသင်ယဝ်ႉလႃႇ ၵိုတ်းလိူဝ်ႁွႆးၶၢပ်ႈလိူတ်ႈ သႅဝ်တူႇၼဝ်ႈဢၢႆၵူၼ်း မီးယူႇတၢင်းလႂ်ၵေႃႈဢမ်ႇႁူႉၼၼ်ႉသေ ၸွမ်းသွၵ်ႈႁႃတူၺ်းတၢင်းမႃးၼၼ်ႉၵေႃႈ လႆႈႁၼ်ၵူၼ်းထဝ်ႈၵူၼ်းၶၢဝ်ႉလုၵ်ႈဢွၼ်ႇ လူႉသဵင်ႈတၢႆၵွင်ၵၼ်ယူႇတီႈၼႂ်းႁိူၼ်းလင်ၼိုင်ႈၼၼ်ႉ မႅင်းမူၼ်းပေႃးတွမ် ၼွၼ်တဵၼ်ႈတူင်ႉယူႇၼႂ်းသိူဝ်ႈၶူဝ်း ႁၼ်ၶူင်းလုပ်ႇမၼ်းယူႇၼၼ်ႉယဝ်ႉ။
ၶဝ်ၵေႃႈ ၸွႆႈၵၼ်ၵဵပ်းၶၢပ်ႈၵူၼ်းတၢႆၸိူဝ်းၼၼ်ႉ ၽဝ်ၵႂႃႇသေ။ မၢင်တီႈၸွမ်းထိူၼ်ႇၸွမ်းၶၢမ်းႁႆႈၶၢမ်းသူၼ်ၼႆၵေႃႈ မီးၵူၼ်းတၢႆၶမ်ၸိူၵ်ႈဝႆႉယူႇၵေႃႈမီး၊ ၵူၼ်းတၢႆဢိင်မႆႉယူႇၵေႃႈမီး၊ မၢင်ၸိူဝ်းၵေႃႈတၢႆၵေႃႇတၢႆၵွင်ဝႆႉ ႁူမ်ႈလေႃးၶူဝ်းလေႃႉပေႃးမၢၵ်ႇပေႃးမိူဝ်လူင်ဝႆႉၵေႃႈမီး၊ မၢင်တီႈၵေႃႈ မီးလုၵ်းလိၼ်ၶူၺ်လိၼ်သေ ယဵပ်ႇတမ်းသႂ်ႇၺႃးပေႃးႁၼ်သိူဝ်ႈႁၼ်ၶူဝ်းယူႇၵေႃႈမီးယဝ်ႉ။
ၵူၼ်းမိူင်းႁဝ်းလႆႈတၢႆမွၵ်ႈႁိုဝ်ၼႆၼၼ်ႉ ပဵၼ်ႁႅင်းႁႂ်ႈသိုပ်ႇမုင်ႈၼႃႈၵႂႃႇ တႃႇသိုပ်ႇၶတ်းႁႅင်း ႁႂ်ႈပေႃးတွပ်ႇတၼ်းပၼ်လႆႈၶိုၼ်းၼၼ်ႉယဝ်ႉ။ လွင်ႈၸဵပ်းၸႂ်ဢၼ်လႆႈႁူပ်ႉႁၼ် လွင်ႈတုၵ်ႉယၢၵ်ႈဢၼ်လႆႈထူပ်းယူႇၼႆႉ ဢမ်ႇပေႉယွမ်းၵၢၼ်ႉမၼ်းသေသိုပ်ႇၵႂႃႇမုင်ႈၼႃႈ တႃႇဝႃႈတိုၵ်းယိုဝ်းၽူႈၶဵၼ်ဢၼ်ဝႃႈၼၼ်ႉတႄႉ တိုၼ်းဢမ်ႇၵၢၼ်ႉဢမ်ႇဢမ်ႇသုတ်ႈဢမ်ႇႁူၼ်သေဢိတ်းၼၼ်ႉယဝ်ႉ။
ၶဝ်ႈၼမ်ႉတၢင်းၵိၼ်ဢမ်ႇမီး ၸွမ်းၼမ်ႉႁွင်ႈၼမ်ႉၵေးၵေႃႈ ၶဝ်လႄႇပႂ်ႉယူႇၵူႈတီႈ တႃႇတေလႆႈၵိၼ်ၼမ်ႉဢွၼ်ႇဢိတ်ႉၼိုင်ႈၼႆၵေႃႈ မၢင်ပွၵ်ႈႁႃႇပေႃးႁႅင်ႈၼႆၶၢၼ်ၸႂ်ယူႇတေႉဢိူဝ်ႈ။
ၽဝၵေႃႉသိုၵ်းႁၢၼ်ဢၼ်ဝႃႈ ၵိၼ်ၼိူဝ်တွင် ဢဝ်ၵၢင်ႁၢဝ်ႁဵတ်းၽႃႈႁူမ်ႇ ဢဝ်ၼင်လိၼ်ႁဵတ်းၽႃႈသိူဝ်ႇ ဢၼ်ဝႃႈၼၼ်ႉပဵၼ်ၸိူင်ႉၼၼ်တေႉယဝ်ႉ။ လုၵ်ႈလၢဝ်ၶမ်ႈၶိုၼ်းႁိူဝ်ႈလႅင်းတၢၼ်ႇႁိုဝ်ၵေႃႈ တၢင်းႁိူဝ်ႉၼၼ်ႉဢမ်ႇတၼ်းတူၺ်းႁၼ်မၼ်းယဝ်ႉ။ လွင်ႈႁိူဝ်ႉမွႆႈဢၼ်ဝႃႈၼၼ်ႉ ပေႃးဝႃႈလႆႈၼွၼ်းလပ်းတႃၵႂႃႇၵူၺ်းၵေႃႈ လီၼႃႇယဝ်ႉဢိူဝ်ႈ။
ၵၢင်ၶိုၼ်းၵူၼ်းၼွၼ်းၵေႃႈၼွၼ်းယဝ်ႉ ၵူၼ်းပႂ်ႉယၢမ်းၼၼ်ႉၶႂ်ႈလပ်းယူႇသေတႃႉ ႁိုဝ်ပၼ်လပ်းတႃလူင်းလႆႈ၊ ယၢမ်းၶိင်ႇမိူင်းလႅင်းၼႆၵေႃႈ လႆႈဢွၼ်သိုပ်ႇဢွၵ်ႇၶၢဝ်းတၢင်းၵႂႃႇထႅင်ႈ။
တႃႇတေလတ်းၽႃႇသဵၼ်ႈတၢင်းႁူၵ်ႉႁၢမ်းလူင်ၵႂႃႇတၢင်းၼႃႈတိၵ်းတိၵ်းၼၼ်ႉ ဢမ်ႇငၢႆႈတေႉဢိူဝ်ႈ၊ သမ်ႉဝႃႈမီးတၢင်းလီယူႇၵေႃႈ ႁိုဝ်တေႁတ်းတႆႇ၊ မၢင်တီႈဢမ်ႇတူၺ်းလီ ၺႃးမၢၵ်ႇၽႃႇသေ လႆႈလူႉတၢႆၵႂႃႇၵေႃႈမီး၊ မၢင်ၵေႃႉမၢတ်ႇၸဵပ်းလႆႈၸွႆႈၵၼ်ၵႂႃႇ ဢမ်ႇမီးတီႈယူတ်းယႃ ဢမ်ႇမီးယႃၵုမ်ႇထူၼ်ႈပဵင်းပေႃး ပေႃးၵၢမ်ႇလီၵေႃႈလွတ်ႈသေ ပဵၼ်ႁႅင်းၼႃႇၵေႃႈ သၢႆၸႂ်လႆႈၶၢတ်ႇသုတ်းၵႂႃႇၸွမ်းတၢင်းယဝ်ႉ ၵႃႈလႆႈပွႆႇဝၢင်းသေပႅတ်ႈၵႂႃႇယဝ်ႉဢိူဝ်ႈ။
ပိုၼ်းႁၢၼ်ၶဝ်ၵေႃႈ ဢွၵ်ႇၶၢဝ်းတၢင်းမႃး ၵွႆႈယူႇၵွႆႈႁၢင်ႇၵႆၵူၼ်း ႁၢင်ႇၵႆၸုမ်းတိၵ်းတိၵ်းယဝ်ႉ။ ၶဝ်ႈၼမ်ႉတၢင်းၵိၼ်ဢၼ်ပႃးမႃးၼၼ်ႉၵေႃႈ၊ မူတ်းသဵင်ႈၵႂႃႇယဝ်ႉၼႃႇ ၼႂ်းပႃႇၼႂ်းထိူၼ်ႇ ဝႂ်မႆႉဝႂ်တွၵ်ႇဢၼ်လႅပ်ႈၵိၼ်လႆႈၼႆၵေႃႈ ပိတ်းသႂ်ႇယၵ်းသႂ်ႇၼႂ်းထူင်၊ မၢၵ်ႇလိူဝ်ႇမၢၵ်ႇသၢၼ်ႈပေႃးဢမ်ႇၵိုတ်းဢမ်ႇၵႅၼ်ႇ ႁွတ်ႈသႂ်ႇႁွတ်ႈသႂ်ႇၼႂ်းထူင်ၸၢၼ်ႈၶဝ်ႈၶဝ်။ တွင်ႉမႆႈၶဝ်ႈဢမ်ႇမီးႁင်ၵိၼ်ၵေႃႈ ၊မၢၵ်ႇလိူဝ်ႇၸိူဝ်းၼၼ်ႉ တူဝ်သမ်ႉပေႃးၶဵဝ်မႃးယူႇဢိူဝ်ႈ၊ ႁႅင်းၵေႃႈယွမ်းမႃး ၵူၼ်းသိုၵ်းၼိုင်ႈၵေႃႉၼၼ်ႉ လိူဝ်သေၶူဝ်းယဝ်ႉ ၵွင်ႈၵၢင်ႇမၢၵ်ႇမိုဝ်ႉၸိုၼ်းယၢမ်းလႆႈပႃးသႂ်ႇၸပ်းတူဝ်ယူႇတႃႇသေႇလူး၊ တႃႇၵႂႃႇတၢင်းၼႃႈၼၼ်ႉဢမ်ႇမီးၵႆသေတႃႉၵေႃႈ ၵႃႈလႆႈဢွၼ်ၵၼ်ၵႂႃႇလွႆးလွႆးၵူၺ်းယဝ်ႉ။
ၵိၼ်မၢၵ်ႇမၼ်းမူတ်းယဝ်ႉၵေႃႈ သိုပ်ႇၵိၼ်ယွတ်ႈမၼ်းထႅင်ႈ၊ ႁူဝ်မၢၵ်ႇႁူဝ်မၼ်း မဵဝ်းလႂ်ၵိၼ်လႆႈၼႆၵေႃႈ ၵိၼ်ၵႂႃႇ ၵိၼ်ဢမ်ႇထုၵ်ႇဢမ်ႇမႅၼ်ႈႁေၵေႃႈတွင်ႉၵႂႃႇတွင်ႉႁေႈႁေၼၼ်ႉယိုင်။
“ၸွင်ႇႁဝ်းတေတၢႆႁိုဝ်ပီႈဢၢႆႈဝႃႈ”
“ဢၢႆႈၼွင်ႉဢိူဝ်ႉ ဢမ်ႇမီးႁဝ်းၵူၺ်းမႂ်း ပေႃးၸဝ်ႈႁူၺ်ႈၸဝ်ႈလွႆၶဝ် ဢီးလူႁဝ်းယူႇတေႉၵေႃႈ ဢမ်ႇပၼ်ႁဝ်းတၢႆလေႃႇမႂ်း”
“ၶႃႈတွင်ႉမႆႈၶဝ်ႈတေႉဢိူဝ်ႈပီႈဢၢႆႈ”
“ၽႂ်ၵေႃႈတွင်ႉမႆႈယဝ်ႉမႂ်း မၢၵ်ႇလိူဝ်ႇမႂ်းမူတ်းယဝ်ႉႁႃႉ ဢဝ်ႁင်းပီႈဢၢႆႈၵႂႃႇၽွင်ႈလႄႈ” ပိုၼ်းႁၢၼ်ၵေႃႈ ၵွပ်ႇဢဝ်မၢၵ်ႇလိူဝ်ႇၼႂ်းၸၢၼ်ႈၶဝ်ႈမၼ်း ဢၼ်ပႅင်းၵိၼ်ၼၼ်ႉ သႂ်ႇပၼ်လုၵ်ႈၼွင်ႉမၼ်းသေ သိုပ်ႇဢွၵ်ႇၶၢဝ်းတၢင်းၵႂႃႇထႅင်ႈလွႆးလွႆးယဝ်ႉ။
မၢင်ၵမ်းၵေႃႈလွမ်မွင်းယူႇဢိူဝ်ႈဝႃႈ သင်ၺႃးဝူဝ်းသေတူဝ်ၼိုင်ႈၵေႃႈ တေႁႅမ်သေလဵင်ႉၵၼ်ယဝ်ႉ ၵူၺ်းၵႃႈ ၼႂ်းထိူၼ်ႇပႃႇလူင်ၼၼ်ႉ သမ်ႉဢမ်ႇမီးတူဝ်ထိူၼ်ႇတူဝ်ၶိူဝ်းသင်သေမဵဝ်းတေႉယဝ်ႉ။
ဢွၼ်ၵၼ်ဢိုပ်းၶဝ်ႈမႃးၶၢဝ်းတၢင်း 11 ဝၼ်းယဝ်ႉဢိူဝ်ႈ ၸင်ႇသမ်ႉမီး ၵူၼ်းၼႂ်းၸုမ်းၶဝ်မႃးၶိုတ်းလႄႈ ပဵၼ်ဢၼ်ၸူမ်းတႄႉတႄႉယဝ်ႉ။
ၸုမ်းပိုၼ်းႁၢၼ်ၶဝ်ၼၼ်ႉ ဢမ်ႇလႆႈပႃးမႃႉမႃးလႄႈ ၸင်ႇလႂ်ဝႃႈၶဝ်ႈၼမ်ႉတၢင်းၵိၼ်ၶဝ်ဢမ်ႇၵုမ်ႇ။
သမ်ႉဝႃႈၸုမ်းလဵဝ်ၵၼ်သေတႃႉၵေႃႈ တႃႇဢဝ်တူဝ်လွတ်ႈၽႂ်မၼ်းၼၼ်ႉမႅပ်ႇပႅင်းၵၼ်ဝႆႉယူႇ၊ တူၺ်းၸုမ်းၶဝ်ၼၼ်ႉတႄႉ ဢမ်ႇလႅပ်ႈလႆႈဢိုပ်းၶဝ်ႈၵၼ်လႄႈ ႁၼ်မီးႁႅင်းၵၼ်ၵူႈၵေႃႉယဝ်ႉ။
ထိုင်ၶၢဝ်းၵိၼ်ၶဝ်ႈၼႆၵေႃႈ လႆႈႁၼ်ၶဝ်ႈတူမ်ႈႁူင်လႅဝ်ၼႂ်းမေႃႈႁင်းၵေႃးၶဝ်ၼၼ်ႉၵူၺ်း သမ်ႉပေႃးတွင်ႉမႆႈၼႃႇယဝ်ႉဢိူဝ်ႈ၊ ၶဝ်ႈၼၼ်ႉတႄႉ ပဵၼ်တီႈၸဝ်ႈမႃႉၶဝ်ၼၼ်ႉယဝ်ႉ လႆႈၵိၼ်ၶဝ်ပွၵ်ႈဢွၼ်တၢင်းသုတ်းၵေႃႈ ၸူမ်းတေႉၸူမ်းဝႃႈယဝ်ႉ၊ မိူဝ်ႈတိုၵ်ႉၵိၼ်ၶဝ်ႈယူႇၼၼ်ႉ တႃလိူပ်ႇႁၼ်ၵူၼ်းလူင်ၵေႃႉၼိုင်ႈ သိူင်ႇသိူင်ႇသိမ်းသိမ်းၵိၼ်ၼိူဝ်ႉယူႇတီႈယူႇမၼ်းၼၼ်ႉ ဢမ်ႇပၼ်လုၵ်ႈၼွင်ႉၵိၼ်ၸွမ်းလႄႈ ပိုၼ်းႁၢၼ်ဢၼ်ၸၼ်ႉႁၢင်ႈၶႂ်ႈပဵင်းပဵင်းၵၼ်ၼၼ်ႉၵေႃႈ ၵႂႃႇလဵပ်ႈႁိမ်းၸမ်သေ ႁၼ်ၼိူဝ်ႉယွင်းတမ်းဝႆႉယူႇၼၼ်ႉ မၼ်းၵေႃႈၵႂႃႇလဵပ်ႈၸမ်သေ
“ၸွင်ႇမီးႁင်ၵိၼ်ၶႃႈႁႃႉၸဝ်ႈႁဝ်း”
“ၸၢင်ႈတေမီးႁင်း သူၵိၼ်ႁင်ၵေႃႈၵဝ်ၵိၼ်ၼၼ်ႉၵူၺ်းဢိူဝ်ႈ”
ပိုၼ်းႁၢၼ်ၵေႃႈၶိုၼ်းမႃးၵုမ်ၵၼ်တင်းၸဝ်ႈမႃႉၼၼ်ႉသေ
“မႃးၸွမ်းၵၼ်ယူႇႁႃႉ”
“ဢမ်ႇၶႃႈမႃးႁူပ်ႉၶဝ်ပွတ်းတၢင်းၼၼ်ႉၵူၺ်း”
“တေၵႂႃႇၸွမ်းၶဝ်ၶိုၼ်းယူႇႁႃႉ တၢင်းမႃႉလႄႈတၢင်းၵူၼ်းသမ်ႉဢမ်ႇၸၢင်ႈၵႂႃႇသဵၼ်ႈလဵဝ်ၵၼ်လႆႈၶႃႈလႄႇ ပေႃးထိုင်တၢင်းၽႄၵေႃႈ ၵႃႈတေလႆႈၽၢတ်ႇၵၼ်ယူႇၶႃႈဢေႃႈ”
“ႁႃးတေၵႂႃႇၸွမ်းၵႃႈ”
“လီဢေႃႈပေႃးၼၼ်တႄႉ”
ၸုမ်းပိုၼ်းႁၢၼ်ၶဝ်ၵေႃႈ ၸွမ်းၵႂႃႇတင်းၸဝ်ႈမႃႉၼၼ်ႉသေ ၵႂႃႇဢမ်ႇႁိုင်ၺႃးဝူဝ်းတူဝ်ၼိုင်ႈၼႆၵေႃႈ ႁႅမ်လဵင်ႉၵၼ်ယဝ်ႉ ႁဵတ်းၽၵ်းၶဝ်တႃႇဢွၵ်ႇၶၢဝ်းတၢင်းၵႂႃႇထႅင်ႈ။
တေႃႇသုတ်းတၢင်း သမ်ႉဝႃႈလႆႈၵိၼ်ၶဝ်ႈႁုင်လႅဝ် ဢမ်ႇၵိၼ်ဢိမ်ႇၵိၼ်တဵမ် လွင်တွင်ႉယူႇဢိတ်ႉၼိုင်ႈပေႃးပေႉႁႅင်းၵႂႃႇၵူၺ်းၵေႃႈ ဢမ်ႇဢိုပ်းၶဝ်ႈၵေႃႈလႆႈယဝ်ႉၼႆသေ ဢွၼ်ၵၼ်ႁွတ်ႈထိုင်ၵႂႃႇၽင်ႇၶူင်းယဝ်ႉ။
ၽွင်းၶၢဝ်းႁိုဝ်ႉၶၢဝ်းၾူၼ် ၼမ်ႉၼွင်းဢူၼ် တႃႇၶၢမ်ႈၽင်ႇပူၼ်ႉၵႂႃႇ တေႁဵတ်းႁိုဝ်လႃႇ ဢမ်ႇမီးႁိူဝ်းလတ်းၶၢမ်ႈ ၵႃႈလႆႈဢဝ်မႃႇဢဝ်ႁႅင်းသေယင်ႇတိၼ်လူၺ်းၶၢမ်ႈၵႂႃႇၵူၺ်းဢိူဝ်ႈ။
မိူဝ်ႈၽွင်းဢွၼ်လတ်းၶၢမ်ႈၽင်ႇၵႂႃႇၼၼ်ႉ ၸၢႆးသွင် လုၵ်ႈၼွင်ႉပိုၼ်းႁၢၼ်ၼၼ်ႉၵေႃႈ လွင်ႈလူင်းၵႂႃႇၸွမ်းၼႂ်းၵႄႈၼမ်ႉၶူင်းၼၼ်ႉသေ မိူဝ်ႈမၼ်းဢၢင်ႈတေၸူမ်ယူႇၼၼ်ႉ ပိုၼ်းႁၢၼ်ၼႅတ်ႈၶဝ်ႈၵႂႃႇၸၼ်ဢဝ်မၼ်းၶီႇၶိုၼ်ႈၵွင်းလင်သေယဝ်ႉ သွင်ၵေႃႉလွင်ႈလူင်းၵႂႃႇၼႂ်းၵင်ၽွင်းလူင်ၼမ်ႉၶူင်းၼၼ်ႉယဝ်ႉၼႃႇ။
ၵူၼ်းၵႂႃႇတၢင်းၼႃႈ ယူႇၽင်ႇသေႁွင်ႉၸွမ်းႁႃႇပေႃးႁႅင်ႈလႅၼ်ႈလမ်းၸွမ်းၽင်ႇၵႂႃႇၵေႃႈ ဢမ်ႇႁၼ်တူဝ်ၵူၼ်းသေဢိတ်းယဝ်ႉ။
“ၽီၼမ်ႉၶူင်းဢူၺ် ပေႃးဝႃႈၵဝ်ဢမ်ႇယႃႇလွတ်ႈလႆႈတေတၢႆယဝ်ႉၼႆၵေႃႈ ပွႆႇၵဝ်တၢႆၵႂႃႇသေလႃႈ သင်ဝႃႈၵဝ်တေလွတ်ႈလႆႈယူႇၵေႃႈ ပၼ်ႁႂ်ႈၵဝ်မီးသၢႆၸႂ်သေၵမ်း”
တူဝ်ၵူၼ်းသဵၼ်ဝူင်ပုင်ႈလူင်ၵႂႃႇတၢင်းၽင်ႇႁၢတ်ႇသၢႆးၼၼ်ႉယဝ်ႉ ၵူၼ်းသွင်ၵေႃႉလွတ်ႈသၢႆၸႂ်ၵႂႃႇ ၼင်ႇၽီၸွႆႈဝႆႉယူႇဢိူဝ်ႈ။
——————————————————
“ၼႄႈ..ငဝ်းလိူၼ်”
“ဝႃႈႁိုဝ်ၶႃႈ ၸၢမ်ၽွင်း”
“ႁဝ်းလူယဝ်ႉဝႃႈ ၸိူင်းသူၼၼ်ႉ”
“လူယဝ်ႉႁႃႉ ပဵၼ်ၸိူင်ႉႁိုဝ်လႃႇ”
“ၸဵမ်မိူဝ်ႈႁဝ်းသုတ်းႁဵၼ်းႁေ ဢွၵ်ႇမႃးႁၢပ်ႇၵၢၼ် ႁဝ်းဢမ်ႇပွင်ႇၸႂ်ဝႃႈ ယွၼ်ႉသင်လႄႈႁဝ်းတေလႆႈမႃးႁဵတ်းၵၢၼ်ယူႇၸိူင်ႉၼႆ ႁဝ်းဢမ်ႇမီးတၢင်းလိူၵ်ႈထႅင်ႈတၢင်ႇမဵဝ်းယဝ်ႉႁႃႉ လိူဝ်သေႁဵတ်းသိုၵ်းၸိူင်ႉၼႆၼႆႉ၊ ႁဝ်းၶႂ်ႈပဵၼ်ၵူၼ်းမိူင်းသေႁဵတ်းၵၢၼ် ဢမ်ႇၶႂ်ႈယူႇတႂ်ႈဢႃႇၼႃႇ ဢမ်ႇၶႂ်ႈႁဵတ်းၸွမ်းၵႂၢမ်းသင်ႇၽႂ် ၶႂ်ႈယူႇလွတ်ႈလွတ်ႈလႅဝ်းလႅဝ်းၵူၺ်း ၼႆဢိူဝ်ႈ”
“မိူဝ်ႈလဵဝ်လူး..တိုၵ်ႉဝူၼ်ႉၸိူင်ႉၼၼ်ယူႇၼႄႇ”
“ပေႃးမႃးႁဵတ်းၵၢၼ်ၼႆၵေႃႈ ဝူၼ်ႉယူႇမၢင်ပွၵ်ႈ ပိူၼ်ႈႁဵတ်းၵၢၼ်ႁေႁဝ်းႁဵတ်းၵၢၼ်ၼႆႉ ပေႉမႃးဢမ်ႇမိူၼ်ၵၼ်ၼေႃ”
“မၼ်းသမ်ႉမိူၼ်ႁိုဝ်ဝႆႉလႃႇ..”
“ႁဝ်းၵေႃႈယူႇၼႂ်းတူင်ႇဝူင်းၼႆႉမႃးၸဵမ်မိူဝ်ႈလဵၵ်ႉလဵၵ်ႉလူး တေလႆႈဝႃႈႁိုဝ်လႃႇ သုၼ်ႇလႆႈသုၼ်ႇပဵၼ်ဢမ်ႇမိူၼ်ၵၼ် ႁဵတ်းၵၢၼ်မိူၼ်ၵၼ် ၼႃႈၵၢၼ်တႃငၢၼ်းမိူၼ်ၵၼ် ၵူၺ်းၵႃႈ သုၼ်ႇလႆႈႁဝ်းမၼ်းပိူင်ႈၵၼ်”
“သုၼ်ႇလႆႈဢၼ်သူဝႃႈၼၼ်ႉပဵၼ်ၸိူင်ႉႁိုဝ်ဝႆႉ”
“ၵေႃႈယဝ်ႉလႄႈ လွင်ႈၽဵင်ႇပဵင်းဢၼ်ဝႃႈၼၼ်ႉ ဢမ်ႇမီးလႆႈၵူႈတီႈ ၽႂ်မေႃႁဵတ်းမေႃႁႃၵေႃႈမၼ်းလႆႈၵူၺ်း ၸိူင်ႉၼၼ်ယဝ်ႉ”
“ၸွင်ႇႁိူဝ်ႉႁိုဝ်”
ငဝ်းလိူၼ်ၵေႃႈသိုပ်ႇၾူၼ်းၸူးၸၢမ်ၽွင်းသေယဝ်ႉ မိူဝ်ႈလႆႈယၵ်ႉႁၼ်ၼႃႈၵၼ်ယူႇၼၼ်ႉ ၼမ်ႉတႃၸၢမ်ၽွင်းသမ်ႉပေႃးလႆၸိုမ်းဝႆႉယူႇ။
“ၶႂ်ႈယူႇႁိမ်းၸမ်သူယူႇၵေႃႈ ၶွင်သူဢမ်ႇပၼ်ၶႂၢင်ႉလႄႇ”
“ယႃႇမႃးႁႃၵဝ်းယူႇၼႆႉ”
“ႁူဝ်ၸႂ်သူၼၼ်ႉတေဝႆႉပၼ်မၢဝ်ႇၵေႃႉလႂ်လႃႇဢေႉ”
“လႆႈလူယဝ်ႉလႅၵ်ႈလၢႆႈတၢင်းဝူၼ်ႉႁဝ်းမႃးယဝ်ႉ”
“လႅၵ်ႈလၢႆႈၸိူင်ႉႁိုဝ်ဝႆႉလႃႇ”
“ႁဝ်းငိၼ်းဢၢႆၶိုၼ်းတၢင်းဝူၼ်ႉႁဝ်းၼၼ်ႉဢိူဝ်ႈ ဢၢႆတူဝ်ၵဝ်ႇဢၼ်ဝႃႈႁဵတ်းၵၢၼ်ၼႆႉယူႇၼႆႉဢိူဝ်ႈ”
“ႁဵတ်းႁင်လႃႇ ပေႃးဢမ်ႇမီးၵူၼ်းၸိူင်ႉၼင်ႇသူၼႆႉ တေဢမ်ႇမီးၽႂ်ယဝ်ႉဝႃႈ”
“တႃႇတေလႆႈမႃးတပ်ႉသိုၵ်းဢၼ်ၼႆႉ ၶဝ်လႆႈၶတ်းၸႂ်မႃးမွၵ်ႈၵႃႈႁိုဝ် သင်ၸိူဝ်ႉဝႃႈဢမ်ႇမီးမၼ်းယဝ်ႉ ၼိူဝ်ႉလိူတ်ႈဢၼ်လႆႈလႅၵ်ႈမႃးၸိူဝ်းၼၼ်ႉ တေမီးတီႈပွင်ႇသင်ၼေႃ ႁဝ်းႁဵတ်းၵၢၼ်ယူႇဝၼ်းမိူဝ်ႈၼႆႉ ဢမ်ႇလႆႈၵူဝ်လႆႈမႆႈသင် ဢမ်ႇလႆႈပၢႆႈလႆႈၼီသင် ဢမ်ႇလႆႈၶီလႆႈမႆႈတၢၼ်ႇမိူဝ်ႈပၢၼ်ၼၼ်ႉ ႁဝ်းၵေႃႈသမ်ႉပေႃးၶႂ်ႈၵၢၼ်ႉယူႇယဝ်ႉ သင်ႁဝ်းမီးယူႇတီႈၼၼ်ႈ ႁဝ်းဢမ်ႇပဵၼ်ၵူၼ်းယဝ်ႉႁိုဝ်ဢမ်ႇႁူႉ”
“သူတင်းပႆႇၵိူတ်ႇ ပေႃးမီးယူႇတီႈၼၼ်ႈ မိူဝ်ႈလဵဝ်ၶေးသူပဵၼ်ၼၢင်းယိင်းႁတ်းႁၢၼ်ဝႆႉယူႇယဝ်ႉႁိုဝ်ဢမ်ႇႁူႉ”
“တၢႆယဝ်ႉၶိုၼ်းၵိူတ်ႇမႂ်ႇၵူၺ်းဢိူဝ်ႈ”
“ယႃႇပေႉဝႃႈတၢၼ်ႇၼၼ်ႉလေႃႇ… တၢၼ်ႇဝႃႈသိုၵ်းၼႆႉၽႂ်ၶႂ်ႈႁဵတ်းၵေႃႈႁဵတ်းလႆႈလႃႈ ပေႃးၸႂ်ဢမ်ႇႁတ်းမၼ်းဢမ်ႇႁဵတ်းလႆႈလေႃႇ သူၸုၵ်းယူႇတီႈၼၼ်ႈၵူၺ်းၵေႃႈ ပဵၼ်လွင်ႈႁတ်းႁၢၼ်ဢၼ်ၼိုင်ႈယဝ်ႉ”
“ႁတ်းႁၢၼ်တီႈလႂ်… မွၵ်ႈၼုင်ႈၶူဝ်းသိုၵ်းသေလႄႈဝႃႈႁတ်းႁၢၼ်ၼႆၵူၺ်းတႄႉဢမ်ႇၸႂ်ႈၵွၼ်ႇယူဝ်ႉ”
“ၶူဝ်းသိုၵ်းၼၼ်ႉ ၽႂ်ၶႂ်ႈၼုင်ႈၵေႃႈၼုင်ႈလႆႈယဝ်ႉ ဢမ်ႇၸႂ်ႈသိုၵ်းၵေႃႈၼုင်ႈလႆႈယဝ်ႉ ၼမ်ႉၸႂ်သူဢၼ်ႁၢပ်ႇၵၢၼ်ယူႇၼၼ်ႉ ပေႃးဢမ်ႇၸႂ်ႈၵူၼ်းႁတ်းၸုၼ်ႉသုၼ်ႇတူဝ် ႁတ်းၸုၼ်ႉၵၢၼ်ၼႃႈႁိူၼ်းသေမႃး ယဵၼ်ႉၶၢမ်ႇယၢပ်ႇႁဵတ်းၵၢၼ်ယူႇၸိူင်ႉၼႆ တေမီးၽႂ်ႁဵတ်းလႆႈ၊ သမ်ႉဝႃႈပဵၼ်ပုၼ်ႈၽွၼ်းၵေႃႈယဝ်ႉ ဢမ်ႇလိူဝ်လႆႈၵေႃႈယႃႇ သူၵေႃႈဢမ်ႇပၢႆႈၵႂႃႇတၢင်းလႂ်သေ ဢမ်ႇလႆႈမၢၵ်ႈမီးသင်သေတႃႉ သူၵေႃႈယဵၼ်ႉၶၢမ်ႇၸွမ်းၽဝၼႆႉလႆႈ တေမီးဢဝ်လၢႆၵေႃႉၵူၺ်း ၵူၼ်းၸိူင်ႉၼင်ႇသူၼႆႉ၊ ႁဝ်းဝႃႈသူပဵၼ်ၵူၼ်းဢၼ်လီယုၵ်ႉယွင်ႈၵေႃႉၼိုင်ႈဢိူဝ်ႈ ဢၼ်သူၼုင်ႈသႂ်ႇၶူဝ်းသိုၵ်းယူႇၼၼ်ႉ မၼ်းဢမ်ႇလႆႈႁၢင်ႈလီၵူၺ်း မၼ်းမီးဢူမုၼ်ဝႆႉယူႇဢိူဝ်ႈ သမ်ႉဝႃႈသူယၵ်ႉတူၺ်းၼႂ်းမၢၼ်ႇၵေႃႈ သူတေဢမ်ႇႁၼ်လေႃႇ ၼႂ်းသၢႆတႃႁဝ်းၵူၺ်းတေႁၼ်”
“မီးသူၵူၺ်းဢိူဝ်ႈဝႃႈၼႆ”
“ဢမ်ႇယုမ်ႇႁဝ်းၵႃႈ ပေႃးဢမ်ႇယုမ်ႇႁဝ်းၵေႃႈ ၸိူင်းဢၼ်ႁဝ်းတႅမ်ႈၼၼ်ႉ သူၵေႃႈဢမ်ႇယုမ်ႇဝႃႈမၼ်းပဵၼ်တေႉၵူၺ်းဢိူဝ်ႈ”
“မဵဝ်းလႂ်မဵဝ်းၼၼ်ႉၵူၺ်း ၵူၼ်းၸိူင်ႉသူၼႆႉလွၵ်းလိင်ႉမၼ်းၼမ်တေႉဢိူဝ်ႈ ၵူၼ်းမိူင်းတႆးႁဝ်းၼၼ်ႉမၼ်းလႆႈထူပ်းၸိူင်ႉၼႆယူႇတေႉယဝ်ႉၼႆ”
“သမ်ႉဝႃႈပဵၼ်ၸိူင်းသေတႃႉၵႃႈ ႁဝ်းၶတ်းၸႂ်ႁႂ်ႈမၼ်းမိူၼ်ၼင်ႇလွင်ႈတေႉၼၼ်ႉယဝ်ႉ၊ လွင်ႈတေႉၼၼ်ႉမၼ်းၼႃႇလိူဝ်ၼႂ်းၸိူင်းၵွၼ်ႇဢိူဝ်ႈ ၸွင်ႇသူယၢမ်ႈငိၼ်းႁႃႉ လွင်ႈတၢတ်ႇၾႃႉႁူဝ်ႈၼႆၼၼ်ႉ”
“ဢၼ်သိုၵ်းမၢၼ်ႈႁႅမ်တၢႆၵူၼ်းမိူင်းၼမ်ၼမ်ၼၼ်ႉႁႃႉ”
“ၸႂ်ႈယဝ်ႉ…ၶဝ်ႁႅမ်တၢႆတီႈသၢႆးၶၢဝ်ၼၼ်ႉ 29 ၵေႃႉယဝ်ႉ ၶိုၼ်းၵႂႃႇႁႅမ်ထႅင်ႈတီႈတၢတ်ႇၾႃႉႁူဝ်ႈၼၼ်ႉထႅင်ႈ 28 ၵေႃႉ ပေႃးလွတ်ႈၵေႃႈလွတ်ႈ ဢမ်ႇလွတ်ႈၵေႃႈတၢႆၵူၺ်းဢိူဝ်ႈမိူဝ်ႈၼၼ်ႉ မၢင်ၸိူဝ်းၵေႃႈၺႃးၽဝ်တၢႆၵိုၵ်းႁိူၼ်းၵေႃႈမီးယဝ်ႉ၊ လွင်ႈၼၢင်းသႃႇလႄႈသၢင်ႇသုဢၼ်ႁၢႆၵႂႃႇၼၼ်ႉၵေႃႈ ဝၢႆးသေလႆႈပွၵ်ႈၶိုၼ်းယဝ်ႉ ၵူၼ်းဝၢၼ်ႈၶဝ်ဢွၼ်ၸွမ်းႁႃၶႆႈၶိုၼ်းယူႇ ၵူၺ်းၵႃႈဢမ်ႇလႆႈႁၼ် ဝၢႆးသေသွင်ပီမႃး ၼမ်ႉၼွင်းသေလႄႈ လႆႈႁၼ်လုပ်ႇၵွၵ်းႁူဝ်လႆလွင်ႈၸွမ်းၼမ်ႉႁေ ၶဝ်ၶိုၼ်းၵႂႃႇၶႆႈၶိုၼ်းၵေႃႈ ႁၼ်လုပ်ႇမၼ်းယူႇဢိူဝ်ႈ ၶေးတေပဵၼ်ၶဝ်သွင်ၵေႃႉၼၼ်ႉယူႇႁိုဝ် ၼႆထၢင်ႇၽႂ်ထၢင်ႇမၼ်းၵူၺ်း၊ မၼ်းဢမ်ႇၶိုတ်းၵၢပ်ႈလႄႈ ဢမ်ႇၸၢင်ႈယိုၼ်ယၼ်လႆႈၸိူင်ႉၼင်ႇပိူၼ်ႈ ဢမ်ႇႁူႉလႆႈဝႃႈၸႂ်ႈၶဝ်ယူႇႁိုဝ်ဢမ်ႇၸႂ်ႈ”
“ပိူၼ်ႈႁဵတ်းတေႃႇႁဝ်းပေႃးပဵၼ်တၢၼ်ႇၼႆႉ ၸဵပ်းၸႂ်ယူႇၵေႃႈလႆႈတၢင်းၸဵပ်းၸႂ်ၵူၺ်း ႁဝ်းသမ်ႉတေႁဵတ်းသင်လႆႈ လိူဝ်သေဝႃႈၵူဝ်လႆႈၶၢမ်ႇလႆႈၺႃးထႅင်ႈသေ ဢွၼ်ၵၼ်ပၢႆႈၵူၺ်းယဝ်ႉယူဝ်ႉၼေႃ”
“လၢတ်ႈၶိူဝ်းမိူင်းၸႂ်လူႉ လၢတ်ႈၶိူဝ်းၸူႉၵေႃႈ ပိူၼ်ႈဢမ်ႇႁၵ်ႉလႄႇၸၢင်ႈႁဵတ်းႁိုဝ်”
“တေလႆႈလူတွၼ်ႈသိုပ်ႇမၼ်းထႅင်ႈမိူဝ်ႈလႂ်ၶႃႈ ၽူႈတႅမ်ႈလိၵ်ႈႁဝ်း”
“မိူဝ်ႈသူတွပ်ႇႁၵ်ႉႁဝ်းၸင်ႇမိူဝ်ႈၼၼ်ႉယဝ်ႉ”
“ဢမ်ႇလူယဝ်ႉပေႃးၼၼ်”
“ၼၼ်ႉ..ႁဝ်းသမ်ႉတေဢဝ်ႁႅင်းၸႂ်တီႈလႂ်မႃးတႅမ်ႈယဝ်ႉၵမ်းၼႆႉ”
“သူမႃးဢုပ်ႇႁဝ်းယူႇၸိူင်ႉၼႆတိၵ်းတိၵ်း တေဢဝ်ၶၢဝ်းယၢမ်းတႅမ်ႈလႆႈယဝ်ႉလႃႇ”
“တိုၵ်ႉႁွမ်ႁႅင်းဝႆႉယူႇ လႆႈႁၼ်ၼႃႈသူလၢတ်ႈတေႃႇသူၵူၺ်းၵေႃႈမီးႁႅင်းယဝ်ႉဝႃႈ”
“ဝၢင်းယဝ်ႉ ၵူဝ်ဢမ်ႇတၼ်းလႆႈလူတွၼ်ႈသိုပ်ႇမၼ်းထႅင်ႈ” တဵၵ်းဝၢင်းၾူၼ်းၵႂႃႇယဝ်ႉ။
“ပေႃးဝႃႈဝၢင်းၼႆၵေႃႈ သမ်ႉပေႃးဢမ်ႇတၼ်းပၼ်ပိူၼ်ႈသင်ႇသေဢိတ်း”
