သွင်ၵေႃႉၸုၵ်းတေႃႇၼႃႈၵၼ် ယၵ်ႉတူၺ်းယူႇတင်းႁိုင် ထိုင်တီႈၽႂ်ပေႃးဢမ်ႇၸၢင်ႈတၵ်ႉၽႂ်လႆႈယဝ်ႉၼႃႇ။
“ၼွင်ႉ!..”
“ၶူး..”
လႆႈႁွင်ႉထူပ်းၵၼ်ၵႂႃႇတီႈသႅင်ႇၼမ်ႉဝၢၼ်တီႈၼိုင်ႈ ဢမ်ႇႁူႉတေတႄႇလၢတ်ႈဢုပ်ႇၵၼ်ၵႂႃႇတီႈလႂ် ၼိမ်ယဵၼ်ဝႆႉယူႇၽႂ်မၼ်း
“ယူႇလီယူႇၼေႃႈ”
“ဢေႃႈ”
ငိုၼ်းသႅင်ၵေႃႈ သမ်ႉဝႃႈမီးလွင်ႈၶမ်ၸႂ်တင်းၼမ် မီးၶေႃႈထၢမ်တင်းၼမ်ၶမ်ၸႂ်ဝႆႉယူႇၼႆၵေႃႈ မိူဝ်ႈလႆႈႁူပ်ႉတေႃႇၼႃႈၶဝ်ၼၼ်ႉ ဢမ်ႇမီးသင်တႃႇတေလၢတ်ႈသေမဵဝ်းယဝ်ႉ ယဵၼ်ၵႂႃႇၸိူင်ႉၼၼ်ၵူၺ်း။
“ႁဵတ်းၵၢၼ်တီႈလႂ်လႃႇမိူဝ်ႈလဵဝ်”
“ၵၢၼ်တီႈႁူင်းလႅမ်းမိူဝ်ႈၵႆႈၼၼ်ႉၶႃႈ ၶူးၶႃႈလူး”
“ႁဝ်းတႄႉၵေႃႈ ႁဵတ်းၵၢၼ်လႄႇဝၢၼ်ႈတႂ်ႈမိူဝ်းၼိူဝ်ၼၼ်ႉယိုင်”
“လီတေႉၶႃႈယဝ်ႉ..သမ်ႉမီးတိုဝ်ႉတၢင်းမႃးႁွတ်ႈတၢင်းၼႆႉသေၶႃႈၼေႃ”
“တင်ႈၸႂ်မႃး…ယူႇယူႇၵေႃႈၸႂ်ထိုင်ၶိုၼ်း” ယၵ်ႉတူၺ်းငိုၼ်းသႅင်သေယဝ်ႉ “မီးၼႃႈႁိူၼ်းယဝ်ႉႁႃႉ”
ၸွမ်သႅင်သမ်ႉသိုပ်ႇၾူၼ်းမႃးလႄႈ မၼ်းၼႅတ်ႈႁပ်ႉယဝ်ႉ“ႁလူဝ်”
“မီးယူႇတီႈလႂ်”
“မီးယူႇတၢင်းၼွၵ်ႈၶႃႈ မိူဝ်ႈလဵဝ်ႁဝ်းထူပ်းဢူၺ်းၵေႃႉယူႇ”
“ဢေႃႈ..ႁဝ်းတေပႂ်ႉၼႃႈ”
“ၵမ်ႉၵေႃႈၵႂႃႇယဝ်ႉ”
ငိုၼ်းသႅင်ဝၢင်းၾူၼ်းသေ သၢႆတႃသႅင်ပိုၼ်းၸွမ်းယၵ်ႉတူၺ်း “ၽႂ်လႃႇ”
“ႁူဝ်ၼႃႈၶႃႈ”
“ၼၼ်ႁႃႉ မီးၵၢၼ်ၼႅတ်ႈၼႃႇယဝ်ႉယူဝ်ႉပေႃးၼၼ်”
“ဢမ်ႇၼႅတ်ႈတၢၼ်ႇၼၢၼ်ႉၼင်ႇၵဝ်ႇၶႃႈ ဢုပ်ႇၵၼ်လႆႈထႅင်ႈယူႇ”
“ဢိူဝ်ႈ..လုင်းႁဝ်းလူးယူႇလီယူႇၼႄႇ”
ငိုၼ်းသႅင်ယဵၼ်ၵႂႃႇဢိတ်ႉၼိုင်ႈယဝ်ႉ ၶိုၼ်းတွပ်ႇ “တိုၵ်ႉသဵင်ႈၵႂႃႇဢမ်ႇႁိုင်သင်ၼႆႉၵူၺ်း”
“ၸႂ်ဢမ်ႇလီၸွမ်းတႄႉယဝ်ႉ”
ငိုၼ်းသႅင်ယုမ်ႉႁႅင်ႈႁႅင်ႈသေ “ၶူးမီးတၢင်းလူဝ်ႇၵႂႃႇထႅင်ႈၶႃႈယူဝ်ႉ”
“ႁဝ်းဝႃႈတေမႃးႁႃသူသေ ႁႂ်ႈသူၸူဝ်းလႄႇၼႆဢိူဝ်ႈၼႆႉ”
“လႆႈယူႇၶႃႈလူး ဝၼ်းလႂ်ၶႃႈ”
“မိူဝ်ႈၽုၵ်ႈၵေႃႈလႆႈယူႇၼႃႇ ပေႃးသူတၼ်းတႄႉ”
“လႆႈဢေႃႈ ဢမ်ႇတၼ်းၵေႃႈတေႁႃၶၢဝ်းယၢမ်းႁႂ်ႈတၼ်းၶႃႈၵႃႈ”
ဢဝ်တီႈၵပ်းသိုပ်ႇၵၼ်ဝႆႉသေ ပွၵ်ႈမိူဝ်းၵႂႃႇၶိုၼ်းတၢင်းၵဝ်ႇယဝ်ႉသေ
“ၶူးလိုဝ်ႈတီႈၼႆႈႁႃႉ”
“ၸႂ်ႈယဝ်ႉ”
“ၸွင်ႇၵွႆႈထူပ်းၵၼ်ၶႃႈပေႃးၼႆ”
ၽႄၵၼ်ၵႂႃႇတၢင်းၽႂ်တၢင်းမၼ်း၊ ငိုၼ်းသႅင်ၵေႃႈ ၵႂႃႇၸူးၸွမ်သႅင်ယဝ်ႉ
“ၶႂ်ႈမိူဝ်းၼႃႇယဝ်ႉႁႃႉ”
ၸွမ်သႅင်ႁၼ်ၵူၼ်းၵေႃႉဢၼ်ၶဝ်ႈမႃးၸွမ်းငိုၼ်းသႅင်ၼၼ်ႉလႄႈ “ပဵၼ်ၽႂ်လႃႇ”
ငိုၼ်းသႅင်ယၵ်ႉတူၺ်းၼႃႈၸွမ်သႅင်သေယဝ်ႉ “ၵူၼ်းၵေႃႉၼၼ်ႉ..”
ၸွမ်သႅင်ၼၼ်ႉၵေႃႈ သမ်ႉပေႃးဢမ်ႇၶႂ်ႈမီးႁႅင်းယဵပ်ႇယၢင်ႈၵႂႃႇၵမ်းလဵဝ် ၼင်ႇႁၢင်ႈပေႃးလပ်းသိင်ႇလူင်ၵႂႃႇမူတ်း။ ဢဝ်သဵင်ယဵၼ်ၵႂႃႇတေႃႇသုတ်းတၢင်းယဝ်ႉၼႃႇ။ မိူဝ်းထိုင်ႁိူၼ်းၵေႃႈ ငိုၼ်းသႅင်ႁဵတ်းၶဝ်ႈႁဵတ်းၽၵ်းယဝ်ႉ ၼင်ႈၵိၼ်ၶဝ်ႈၵုမ်းၵၼ်ၵႂႃႇၵေႃႈ ဢမ်ႇလၢတ်ႈတေႃႇၵၼ် မိူဝ်ႈၵိၼ်ၶဝ်ႈယဝ်ႉတိုၵ်ႉၽဵဝ်ႈသိမ်းယူႇၼၼ်ႉ။
“သူ..မိူဝ်ႈၽုၵ်ႈႁဝ်းတေယွၼ်းၶႂၢင်ႉဝႆႉဝၼ်းၼိုင်ႈၼႃႈ ႁဝ်းလၢတ်ႈဝႆႉတီႈၼွင်ႉၽွင်းယဝ်ႉၵွၼ်ႇ”
“ဢိုမ်ႈ..” လၢတ်ႈယဝ်ႉၵေႃႈၶဝ်ႈႁွင်ႈမၼ်းၵႂႃႇသေ သဵင်ပိၵ်ႉၽၵ်းတူမၼ်းၵေႃႈလင်ဝႃႈလင်ယဝ်ႉၼႃႇ။
တီႈႁိူၼ်းၸွမ်သႅင်ၼႆႉသမ်ႉ မီးယူႇသၢမ်ႁွင်ႈၼႆႉယဝ်ႉ ငိုၼ်းသႅင်ယူႇႁွင်ႈၼိုင်ႈ ၸွမ်သႅင်ယူႇႁွင်ႈၼိုင်ႈ ႁွင်ႈၼိုင်ႈသမ်ႉတီႈႁဵတ်းၵၢၼ်ၸွမ်သႅင်ယဝ်ႉ။
ၵၢင်ၼႂ် ငိုၼ်းသႅင်ဢွၵ်ႇႁိူၼ်းၵႂႃႇၸဵမ်ၸဝ်ႉယဝ်ႉ၊ ၸွမ်သႅင်လုၵ်ႉမႃးၵေႃႈ လႆႈႁၼ်ၼႂ်းသုမ်ႇၽၵ်းၼၼ်ႉသေ တႅမ်ႈလိၵ်ႈဝႆႉဢိတ်ႉၼိုင်ႈ “မိူဝ်ႈၼႆႉႁဝ်းႁိပ်ႈလႄႈ တၼ်းလႆႈႁဵတ်းၼႆႉၵူၺ်း” သႂ်ႇႁၢင်ႈႁူဝ်ၸႂ်လဵၵ်ႉလဵၵ်ႉဢွၼ်ႇတၢင်းတႂ်ႈၸႄႈၼၼ်ႉ ၵူၼ်းလူလိၵ်ႈမၼ်းတႄႉၵေႃႈ တၼ်းယၵ်ႉတူၺ်းတူဝ်လိၵ်ႈၼၼ်ႉသေ ယိပ်းၵမ်သႂ်ႇၼႂ်းၵူၺ်ယုၵ်းယၵ်းပႅတ်ႈယဝ်ႉ ပိုတ်ႇသုမ်ႇၼၼ်ႉ ႁၼ်ဝႆႉၶဝ်ႈမုၼ်းသႅၼ်းဝိတ်ႉၵူၺ်းလႄႈ မၼ်းၵေႃႈယိပ်းၵိၼ်သေ ဢွၵ်ႇႁိူၼ်းၵႂႃႇ ၼင်ႇၸႂ်ပိတ်းၸႂ်ပွတ်းဝႆႉယဝ်ႉ။
“ၶႃၸဵပ်းယူႇၼႆၵေႃႈ လိုမ်းၵၼ်ယဝ်ႉယူဝ်ႉ ၵႂႃႇလႄႈၶႂ်ႈၵႂႃႇလႂ်ၵေႃႈၵႂႃႇလႄႈ”
ထွတ်ႇဢွၵ်ႇဢၼ်ႁတ်ႉၶႃမၼ်းယဝ်ႉၵေႃႈ ႁေႃႈၵႃးဢွၵ်ႇၵႂႃႇတီႈႁဵတ်းၵၢၼ် တင်းလူမ်းဢမ်ႇလီသေ လၢတ်ႈပွတ်းလၢတ်ႈပိတ်းတေႃႇၵူၼ်းႁဵတ်းၵၢၼ်၊ ဢဝ်ၶဝ်သမ်ႉပေႃးဢမ်ႇတၼ်းတင်ႈတူဝ်လႆႈယဝ်ႉ။
ငိုၼ်းသႅင်လႄႈတင်းသႅင်ပိုၼ်းၵေႃႈ ၵႂႃႇလႄႇၸွမ်းၵၼ်ၼႂ်းတူင်ႇဝဵင်းၸိူဝ်းဢၼ်မီးၸိုဝ်ႈသဵင်ၸွမ်းၼၼ်ႉယဝ်ႉ၊ ထႆႇၶႅပ်းႁၢင်ႈတီႈၼိုင်ႈတၢင်းၼိုင်ႈသေ ၵႂႃႇလႄႇၸွမ်းသႅင်ႇၸွမ်းလၢၼ်ႉ ၵိၼ်ၶဝ်ႈၵုမ်းၵၼ်ၵႂႃႇ တင်းဝၼ်း ၶၢဝ်းယၢမ်းဢၼ်လႆႈယူႇၸွမ်းၵၼ်ၸိူင်ႉၼႆၼႆႉ သမ်ႉပေႃးဢဝ်လွင်ႈဝၼ်းလင်ၸိူဝ်းၼၼ်ႉၽိုၼ်ႉမႃးၶိုၼ်းယူႇ။
သမ်ႉဝႃႈၵူႈလွင်ႈမိူၼ်တေလီ ၵူႈလွင်ႈမၼ်းတေႁၢင်ႈလီသေတႃႉ တွၼ်ႈတႃႇငိုၼ်းသႅင်တႄႉ ဢမ်ႇမိူၼ်ၵဝ်ႇလႆႈယဝ်ႉ၊ ၼႂ်းၸႂ်ၼၼ်ႉ ၵုမ်ႇဝူၼ်ႉထိုင်ၵူၼ်းဢၼ်ယူႇတီႈႁိူၼ်း မၼ်းတေႁဵတ်းႁိုဝ်ၵႂႃႇႁဵတ်းၵၢၼ်ယူႇၼႆၼၼ်ႉၵူၺ်းယဝ်ႉၼႃႇ၊ လွင်ႈမႆႈၸႂ် ၼၼ်ႉၵေႃႈ ႁဵတ်းႁႂ်ႈၸႂ်မၼ်းပိဝ်ၵႂႃႇပဵၼ်ၵမ်းပဵၼ်ၵမ်းယူႇဢိူဝ်ႈ သမ်ႉဝႃႈလႆႈယူႇၸွမ်းၵူၼ်းၵေႃႉဢၼ်ႁဝ်းယၢမ်ႈၾၼ်ဝႆႉယူႇၼၼ်ႉၵေႃႈ ၼင်ႇႁၢင်ႈဢမ်ႇလႆႈမိူၼ်ၼင်ႇဢၼ်ဝူၼ်ႉဝႆႉၼၼ်ႉသေဢိတ်း။
ယၢမ်းႁူဝ်ၶမ်ႈ ၸူဝ်းၵၼ်ၵႂႃႇၼင်ႈၵိၼ်ၶဝ်ႈၶမ်ႈၵုမ်းၵၼ်ယဝ်ႉ ဢုပ်ႇၵၼ်ၵႂႃႇၵတ်းၵတ်းယဵၼ်ယဵၼ်ယူႇ။
သိုပ်ႇလူတွၼ်ႈတေမႃးၶႃႈ
