တႃႇတေပူၵ်းသဝ်ႁိူၼ်းၼႆၵေႃႈ လိူၵ်ႈဝၼ်းလီမၼ်းသေႁဵတ်းၵႂႃႇ၊ ယွၼ်းႁႅင်းၵူၼ်းသိုၵ်းမႃးၸွႆႈၽွင်ႈၼႆၵေႃႈ ဢမ်ႇႁိုင်လႆႈႁိူၼ်းမႂ်ႇၵႂႃႇယဝ်ႉ။
တီႈၼႂ်းႁႆႈတူၼ်ႈၶဵဝ် ယိူဝ်ႈႁူၵ်ႉပဵၼ်ယုမ်းပဵၼ်ယွမ်ႇၸွမ်းတူၼ်ႈၶဝ်ႈ ၼၢင်းသိုဝ်ႉလူႇၼႆၵေႃႈ ၸေးဢဝ်တင်းဢၢႆႈၸၢႆးဢွၼ်ႇၵႂႃႇၼႂ်းႁႆႈသေ ၼင်ႇဝႃႈမၼ်းတေလပ်းသႂ်ႇလင်မႄႈမၼ်းယဝ်ႉလႄႈ ၼၢင်းသိုဝ်ႉလူႇ ၸင်ႇႁႂ်ႈၸဝ်ႈပိုၼ်းႁၢၼ်ဢဝ်သေ
“သူဢဝ်မၼ်းၵႂႃႇၼွၼ်းႁေလူး”
ၸဝ်ႈပိုၼ်းႁၢၼ်ၼၼ်ႉၵေႃႈ ဢဝ်ၽႃႈလႃၸေး သိူဝ်ႇသႂ်ႇတီႈလႅၼ်ႁႆႈ တႂ်ႈႁူမ်ႈမႆႉဢွၼ်ႇၼၼ်ႉယဝ်ႉ။
“ဢဝ်ၵႂႃႇဝႆႉၼႂ်းထဵင်ဢမ်ႇလီႁႃႉ ဝႆႉတီႈၼၼ်ႈၵူဝ်မႅင်းၶူပ်းဢိူဝ်ႈ”
“ဢမ်ႇပဵၼ်ႁင် ၵမ်ႉမၼ်းပေႃးတိုၼ်ႇယဝ်ႉ”
သွင်ၵေႃႉၽူဝ်မေးၵေႃႈ ဢုပ်ႇၵၼ်သေမၢႆႁႆႈလူင်ၵႂႃႇ ယူႇၸူဝ်ႈၼိုင်ႈ သဵင်ဢၢႆႈၸၢႆးဢွၼ်ႇၵေႃႈလင်မေႃးယူႇယဝ်ႉဢိူဝ်ႈ။ ပေႃႈၶဝ်ၵေႃႈၼႅတ်ႈမႃးဢဝ်မၼ်းသေ သမ်ႉဝႃႈဢဝ်ၸိူင်ႉႁိုဝ်ၵေႃႈ ဢမ်ႇတဵတ်ႇ မႄႈၶဝ်ဢဝ်ၵေႃႈဢမ်ႇတဵတ်ႇ မၼ်းၵေႃႈႁွင်ႉႁွင်ႉႁႆႈႁႆႈတေႃႇပေႃးႁိူဝ်ႉယဝ်ႉ လပ်းၵႂႃႇၶိုၼ်းယူႇ။
ဢၢႆႈၸၢႆးၼၼ်ႉၵေႃႈ ၼင်ႇဝႃႈၶႃမၼ်းတေၺႃးမႅင်းၶူပ်းယဝ်ႉႁိုဝ် ၵမ်းၵမ်းယၢႆးတိၵ်းတိၵ်းလႄႈ ဢဝ်မၼ်းၵႂ်ႈယႂ်ႇလူင်မႃးတိၵ်းတိၵ်းယဝ်ႉၼႃႇ။ ဢွၼ်ၵၼ်ဢဝ်ၵႂႃႇႁူင်းယႃႁေ မေႃယႃၶဝ်ၵေႃႈပၼ်ယႃမႃးတႃးယဝ်ႉၵေႃႈ ၼင်ႇႁၢင်ႈၶႅၼ်းမႃးယူႇ မၼ်းဢမ်ႇပေႃးၸႃႉယဝ်ႉ ၵူၺ်းၵႃႈ ၶႃမၼ်းၼၼ်ႉတႄႉ ဢမ်ႇပႆႇၶျေႃႉယွမ်းမႃး။
ပဵၼ်ၽွင်းလုၵ်ႈဢွၼ်ႇ တႄႇၸႃႉႁႃမေႃပႆမႃးၵူၺ်းလႄႈ မိူဝ်ႈၶႃမၼ်းၸဵပ်း ယူႇဢမ်ႇလီယဝ်ႉၼႆၵေႃႈ ပႆဢမ်ႇလႆႈ ၵႂႃႇတၢင်းလႂ်ၵေႃႈ လႆႈၸေးၵႂႃႇတိၵ်းတိၵ်းၵူၺ်း။ တူဝ်မၼ်းသမ်ႉပီး ဢုတ်ႉၵေႃႈဢုတ်ႉၼႃႇ ပေႃးပိူၼ်ႈႁၼ်မၼ်းၼႆၵေႃႈ ၶႂ်ႈယၵ်းၶႂ်ႈၼူတ်ႈၼႃႇၽႅဝ်။
ပွၵ်ႈၼိုင်ႈ ၼၢင်းသိုဝ်ႉလူႇၵႂႃႇၶၢႆၽၵ်းၼႆသေ မၼ်းသမ်ႉလပ်းယဝ်ႉလႄႈ တေႃႇတၢင်းႁိူၼ်းၼၢႆးမူၼ်းၶဝ်ႁေ ဢဝ်ၽၢၵ်ႇဝႆႉတီႈႁိူၼ်းၼၢႆးမူၼ်းၶဝ်ယဝ်ႉ သိုဝ်ႉမၢၵ်ႇၸွၵ်းဝႆႉပၼ်မၼ်း။
ၽိူဝ်ႇမၼ်းလုၵ်ႉမႃး ဢမ်ႇႁၼ်မႄႈၶဝ်ယဝ်ႉလႄႈ ႁႆႈယဝ်ႉဢိူဝ်ႈ။ ပေႃးဝႃႈမၼ်းႁႆႈၼႆၵေႃႈ ဢဝ်မၢၵ်ႇၸွၵ်းဢၼ်မႄႈၶဝ်သိုဝ်ႉဝႆႉၼၼ်ႉ တမ်းပၼ်ၵူၺ်း မၼ်းၵေႃႈၼင်ႈႁေယိပ်းဢဝ်မႃးၵွၵ်းၵိၼ်ယူႇ။ ယူႇၸူဝ်ႈၼိုင်ႈ ၼၢႆးမူၼ်းၶဝ်ဢမ်ႇတၼ်းႁၼ် ဢၢႆႈၸိင်ႇမႃးႁၼ်မၼ်းသေ
“ဢၢႆႈၸၢႆးမႂ်းၵိၼ်မူတ်းႁႃႉၼႆႉ”
သဵင်မၼ်းၵေႃႈၶူဝ်ဢွၵ်ႇမႃးယဝ်ႉ
“မႄႈမႃးတူၺ်းလူး”
ၼၢႆးမူၼ်းၵေႃႈယူဝ်ဝႃႈတေပဵၼ်ႁင်လူင်လၢင်ၼႅတ်ႈမႃးတူၺ်း “ဢီႈႁင်ဢႃႈ”
“မႄႈၶဝ်သိုဝ်ႉပၼ်မၢၵ်ႇၸွၵ်းမၼ်းၼိုင်ႈလူဝ်း ၵိၼ်မူတ်းယဝ်ႉၼေႈတူၺ်း”
“ဢလူဝ်ႉ! ဢၢႆႈၼႆႉတႄႉ”
ၽိူဝ်ႇမႄႈၶဝ်ပွၵ်ႈမႃးၵေႃႈ ၼင်ႈလဵၼ်ႈၵေႃႉဢၢႆႈၸိင်ႇယူႇယဝ်ႉၼႃႇ
“ၸွင်ႇမၼ်းႁႆႈႁိုဝ်”
“ႁႆႈယူႇၵမ်ႉ ၽိူဝ်ႇဢဝ်မၢၵ်ႇၸွၵ်းလဵင်ႉမၼ်းၵေႃႈ တဵတ်ႇယဝ်ႉၼႃႇ” ၸီႉၼႄထူင်ပိူၵ်ႇမၼ်းၼၼ်ႉသေ “ၵိၼ်မူတ်းယဝ်ႉဝႃႈ”
“တေႉႁႃႉၼၼ် ဢၢႆႈၼႆႉတႄႉၼေႃ”
ၶႃဢွၼ်ႇမၼ်းၼၼ်ႉၵေႃႈ ၼင်ႇႁၢင်ႈဢမ်ႇႁၢႆလႆႈႁေပွၵ်ႈ။ ပေႃးၸဵပ်းႁႅင်းၼႃႇၵေႃႈ ၸႃႉၸႃႉႁႆႈႁႆႈ ပေႃႈမႄႈမၼ်း ဢမ်ႇပဵၼ်ယူႇပဵၼ်သဝ်းလႆႈယဝ်ႉ။ မိူဝ်ႈႁၼ်လုၵ်ႈၸဝ်ႈၵဝ်ႇၸဵပ်းၼႆ ၼႂ်းဢူၵ်းႁူဝ်ၸႂ်ပေႃႈတင်းမႄႈၼၼ်ႉၵေႃႈ ၸဵပ်းၵႅၼ်းၼႃႇလိူဝ်သေလုၵ်ႈယဝ်ႉ။
“ပူၼ်ႉမႃးပဵၼ်လၢႆလိူၼ်ယဝ်ႉ ဢမ်ႇႁၢႆႁေပွၵ်ႈၼႆႉသူဝႃႈ”
“ၸဵမ်မိူဝ်ႈဢဝ်ၵႂႃႇတီႈႁႆႈဝၼ်းၼၼ်ႉႁေ ၺႃးႁင်ၶူပ်းမၼ်းဢမ်ႇႁူႉလႄႇ လၢတ်ႈယူႇယဝ်ႉဝႃႈ ယႃႇဢဝ်ဝႆႉတီႈၼၼ်ႈၼႆ”
“ႁဝ်းၵေႃႈဢမ်ႇထၢင်ႇမၼ်းတေဢမ်ႇပဵၼ်ၼၼ်ၼင်ႇၵွၼ်ႇလူး”
လိူဝ်သေပဵၼ်ၵႂ်ႈယဝ်ႉ မၼ်းသမ်ႉပဵၼ်ပႃးၶူမ်းထႅင်ႈလႄႈ ၸွမ်းတိၼ်ၸွမ်းၶႃမၼ်းၼၼ်ႉၵေႃႈ သမ်ႉပေႃးလႅင်ဝၢၼ်းဝၢၼ်း ပၼ်ယႃယူႇသေတႃႉၵေႃႈၶႅၼ်းႁၢႆပဵၼ်ပွၵ်ႈၵူၺ်း။ တီႈႁူင်းယႃၵေႃႈ ဢမ်ႇႁူႉတေႁဵတ်းႁိုဝ်ယႃယဝ်ႉ လူဝ်ႇလႆႈဢဝ်ၵႂႃႇယႃတီႈၼႂ်းဝဵင်းၵူၺ်း။
တေၵႂႃႇဝဵင်းၼႆၵေႃႈ ငိုၼ်းၵဵပ်းငိုၼ်းႁွမ်ၶဝ်ၼၼ်ႉ လႆႈၶွၵ်းၶွၵ်းၶေႇၶေႇသေ ပၼ်ၵၼ် ၵႂႃႇၸႂ်ႉၵႂႃႇၸၢႆႇယဝ်ႉ။ ၼၢင်းသိုဝ်ႉလူႇၵေႃႈ ဢွၼ်ဢဝ်ဢၢႆႈၸၢႆးဢွၼ်ႇ လူင်းၵႂႃႇၼႂ်းဝဵင်းယဝ်ႉ။ ၶႃဢၢႆႈၸၢႆးဢွၼ်ႇၼၼ်ႉ မေႃယႃၶဝ်ဝႃႈ မၼ်းမီးၼွင်ၼႂ်းမၼ်းၼႆသေ တေလႆႈၽႃႇဢွၵ်ႇပႅတ်ႈယူႇယဝ်ႉ။
လုၵ်ႈဢွၼ်ႇတိုၵ်ႉႁႃတႄႇၸႃႉႁူႉၵႂၢမ်း ႁူႉၸၵ်းၶူင်းၵၢင်လူင်ၼႆႉၵူၺ်း သမ်ႉမႃးလႆႈၶၢမ်ႇတၢမ်ႇတၢင်းၸဵပ်းသႅပ်ႇလူင်ၼႆႉ ၵေႃႉပဵၼ်မႄႈၵေႃႈ တေၸၢင်ႈႁဵတ်းႁိုဝ် ၶႂ်ႈၸဵပ်းတၢင်တႅၼ်းယူႇသေတႃႉၵေႃႈ ပဵၼ်လႆႈယူႇႁိမ်းၸမ်ၵူၺ်း။
တေလႆႈၽႃႇတတ်း ပိူၼ်ႈဢမ်ႇပၼ်ၵိၼ်ၶဝ်ႈၵိၼ်ၼမ်ႉၼႆၵေႃႈ “တွင်ႉမႆႈၼမ်ႉ” “တွင်ႉမႆႈၶဝ်ႈ” ႁွင်ႉႁႆႈထိုင်တီႈပေႃးဢီးလူးမၼ်းမႃးယူႇၵေႃႈ “တွင်ႉမႆႈၵေႃႈယဵၼ်ႉဢဝ်ဢိူဝ်ႈလုၵ်ႈ မႄႈၵေႃႈတင်းဢမ်ႇၵိၼ်”
ယွၼ်ႉပိူဝ်ႈပိူၼ်ႈဢမ်ႇပၼ်လုၵ်ႈမၼ်း ၵိၼ်ၶဝ်ႈၵိၼ်ၼမ်ႉၼႆၵေႃႈ တူဝ်ၼၢင်းသိုဝ်ႉလူႇၼၼ်ႉ ဢမ်ႇၶၢမ်ႇၵိၼ်ၶဝ်ႈၵိၼ်ၼမ်ႉၸွမ်းယဝ်ႉ၊ သမ်ႉဝႃႈႁႂ်ႈၵိၼ်ၼႆၵေႃႈ ဢမ်ႇတွင်ႉမႆႈမိူၼ်ၵၼ်။
တီႈႁိူၼ်းဢၼ်ၵိုတ်းသွင်ၵေႃႉပေႃႈလုၵ်ႈၼၼ်ႉၵူၺ်းၵေႃႈ
“ပေႃႈ မႄႈႁဝ်းၶႃဢၢႆႈၸၢႆးၵႂႃႇလႂ်”
“ၵႂႃႇႁူင်းယႃ”
“လုၵ်ႈၵေႃႈၶႂ်ႈၵႂႃႇ”
“ၵႂႃႇႁဵတ်းႁင် ၼွၼ်းဢႄႈမိူဝ်ႈၽုၵ်ႈလူဝ်ႇၵႂႃႇႁူင်းႁဵၼ်းယဝ်ႉ”
ဢေးၼၢင်းဢွၼ်ႇၼၼ်ႉၵေႃႈၼႅတ်ႈၼွၼ်းၵႂႃႇ ၵမ်ႉၵူၺ်းသဵင်ထူၺ်ႈၸႂ်မေႃးယူႇၽေႃႈၽေႃႈယဝ်ႉၼႃႇ။
ၸဝ်ႈပိုၼ်းႁၢၼ်ၼၼ်ႉတႄႉ ဢဝ်မိုဝ်းတၢင်ႇၼႃႈၽၢၵ်ႇသေ ဢမ်ႇႁူႉၶႃမႄႈလုၵ်ႈတေပဵၼ်ၸိူင်ႉႁိုဝ်ၼႆယူႇဢိူဝ်ႈ။
ပေႃးဢမ်ႇၵႂႃႇႁႂ်ႈပိူၼ်ႈၵပ်းသိုပ်ႇပၼ်ၵေႃႈ တႃႇတေလႆႈလၢတ်ႈတေႃႇၶဝ်မႄႈလုၵ်ႈၼၼ်ႉ ဢမ်ႇၸၢင်ႈႁဵတ်းႁိုဝ်ယဝ်ႉ၊ ၾူၼ်းဢၼ်ဝႃႈၼၼ်ႉၵေႃႈ တင်းပႆႇလိူင်ႇလႄႈ ၶဝ်ၵေႃႈတင်းဢမ်ႇမေႃၸႂ်ႉလူးၵွၼ်ႇ။
ၵၢင်ၼႂ်မႃးၵေႃႈ ၸဝ်ႈပိုၼ်းႁၢၼ်ၼၼ်ႉ ႁႅၼ်းထူင်ႁႅၼ်းၶူဝ်းပၼ်လုၵ်ႈမၼ်းႁေ ၶူၼ်ႁူဝ်ၵေႃႈဢမ်ႇမေႃဝီ ၸွၵ်းပၼ်ၵႂႃႇၵူၺ်းယဝ်ႉ။ ဢေးၼၢင်းဢွၼ်ႇၼၼ်ႉၵေႃႈ ပေႃးဝႃႈႁၼ်ပိူၼ်ႈၵႂႃႇယဝ်ႉၼႆ ၶႃဢွၼ်ႇပွတ်းပွတ်း လႅၼ်ႈလူင်ၵႂႃႇၸွမ်းပိူၼ်ႈယဝ်ႉဢိူဝ်ႈလေႃႇ။

