ၼႂ်းထိူၼ်ႇၼႂ်းႁူၺ်ႈၼႂ်းလွႆလူင်ၼၼ်ႉ တူဝ်ထိူၼ်ႇတူဝ်ၶိူဝ်းၵေႃႈၼမ် ၽၵ်းၼႂ်းထိူၼ်ႇၼႂ်းၶိူဝ်းၵေႃႈလိူင်ႇ၊ ပီၵူၺ်ႈယူၵ်ႇၵူၺ်ႈၽၵ်းၵုတ်ႇၽၵ်းၼၢမ် တူၼ်ႈဝွၼ်ၵေႃႈလိူင်ႇၼႃႇ၊ မႆႉၶၢမ်မႆႉၵွၵ်ႇမႆႉၶမ်ႉ ပေႃးယူႇႁိမ်းၸမ်တီႈယူႇၶဝ်ၼႆတႄႉ ၼင်မၼ်းလွၵ်ႈ ဢမ်ႇၶႂ်ႈမုၼ်းဢွၵ်ႇၶိုတ်းၵၼ်လႆႈယဝ်ႉ။ လႆႈၸွၼ်ႈတူဝ်ဢွၼ်ႇသွင်တူဝ်ၵေႃႈ ၸွၼ်ႈလွင်း ၼိူဝ်ႉမီးၵူၼ်ႈမေႃႈ သႂ်ႇၼမ်ႉၼမ်ၼမ်သေႁုင်တူမ်ႈလဵင်ႉၵၼ်ယဝ်ႉ။
မိူဝ်ႈၽွင်းၸဝ်ႈပိုၼ်းႁၢၼ်ဢမ်ႇယူႇႁိူၼ်းၼၼ်ႉ ၼၢင်းသိုဝ်ႉလူႇၵေႃႈ ပဵၼ်သုၵ်ႉပဵၼ်သၵ်ႉဝႆႉယူႇႁင်းမၼ်း၊ လုၵ်ႈၸၢႆးမၼ်းသမ်ႉၶူမ်း ႁွင်ႉႁွင်ႉႁႆႈႁႆႈတၢင်းၶိုၼ်း၊ တူဝ်မၼ်းသမ်ႉၶဵဝ်ႈမႅင်းၸဵပ်း၊ ဢေးၼၢင်းဢွၼ်ႇၵေႃႈ ၶဵဝ်ႈမႅင်းၸဵပ်း သွင်ၵေႃႉပီႈၼွင်ႉၼွၼ်းၶၢင်းၵၼ်ယူႇတၢင်းၶိုၼ်း မၼ်းၵေႃႈတင်းသဵင်ႁႆႈလုၵ်ႈဢွၼ်ႇႁေ ၶဵဝ်ႈၸဵပ်းႁေ ၸႂ်သုၵ်ႉၸႂ်ၸႃႉ သမ်ႉပေႃးၶႂ်ႈႁႆႈဢွၵ်ႇမႃးယဝ်ႉ။
ဝၢႆးသေၵွမ်ႇဢၢႆႈၸၢႆးဢွၼ်ႇလပ်းၵႂႃႇယဝ်ႉ ၸင်ႇၵႂႃႇဢဝ်ၼမ်ႉလဝ်ႈႁၵ်းၼၼ်ႉ ၸုပ်ႉၼူၼ်းၵုၺ်သေ သႂ်ႇၶဝ်ႈၵႂႃႇၼႂ်းၶဵဝ်ႈၼၼ်ႉ ပၼ်လုၵ်ႈမၼ်းၼွၼ်း မၼ်းၵေႃႈသႂ်ႇၼႂ်းၶဵဝ်ႈမၼ်းၵႂႃႇမိူၼ်ၵၼ်။ ယူႇၸူဝ်ႈၼိုင်ႈယဵၼ်ၵႂႃႇ ၵမ်ႉၵူၺ်းၵေႃႈ ၸဵပ်းမႃးထႅင်ႈသေ ပိူၼ်ႈဝႃႈ ပေႃးၶဵဝ်ႈမႅင်းၸဵပ်း ႁႂ်ႈဢဝ်ၶီႈၵႆႇသႂ်ႇၼႆလႄႈ သွင်ၵေႃႉမႄႈလုၵ်ႈၵေႃႈ ၵႂႃႇတီႈၵွၼ်းၵႆႇၼွၼ်းၼၼ်ႉသေ ဢဝ်ၶီႈၵႆႇမႃးသႂ်ႇ မဵၼ်ဝႃႈမဵၼ်မဵၼ်ယဝ်ႉ ၼွၼ်းပေႃးဢမ်ႇလႆႈထႅင်ႈ သမ်ႉပေႃးတိူၵ်ႈယဝ်ႉဢိူဝ်ႈ။ ဢေးၼၢင်းဢွၼ်ႇၵေႃႈ မိူၼ်တေႁိူဝ်ႉမႃးယဝ်ႉသေ လပ်းၵႂႃႇယဝ်ႉ။ ပဵၼ်ၶဵဝ်ႈမႅင်းၸဵပ်းၼႆႉ ႁိူၵ်ႇပေႃးၵႆႈပဵၼ်သၢမ်သီႇဝၼ်းယဝ်ႉၼႃႇ ပေႃးပဵၼ်ၼိုင်ႈပွၵ်ႈၵေႃႈ တၢင်းၶိုၼ်းတၢင်းၶိုၼ်း ဢမ်ႇၼွၼ်းလပ်းလႆႈၵွပ်ႈမၼ်းတေႉဢိူဝ်ႈ။
သမ်ႉပဵၼ်ၽွင်းၶၢဝ်းဢၢႆႈၸၢႆး တေလႆႈသမ်းဝၵ်းသိၼ်းယႃႁႄႉၵင်ႈၼႆၵေႃႈ ၶဝ်သၢမ်ၵေႃႉမႄႈလုၵ်ႈ ဢွၼ်ၵၼ်ပႆလူင်ၵႂႃႇႁူင်းယႃပုၼ်ႉယဝ်ႉ။ ပေႃးဝႃႈၸင်ႈၼမ်ႉၼၵ်းၼႆ သင်ၼမ်ႉၼၵ်းလုၵ်ႈဢွၼ်ႇဢမ်ႇထိုင် ပိူၼ်ႈတေၵႆႉပၼ်ၶႆႇၵႆႇၸိူဝ်းၼႆႉ၊ ဢၢႆႈၸၢႆးဢွၼ်ႇလႄႈဢေးၼၢင်းဢွၼ်ႇတႄႉ ၶႃဢုတ်ႉလီၼႃႇလႄႈ ၵႂႃႇၸင်ႈမိူဝ်ႈလႂ် ဢမ်ႇတွၼ်ႉလႆႈၶႆႇၵႆႇႁေပွၵ်ႈ။
ဢေးၼၢင်းဢွၼ်ႇ ဢၼ်ႁၼ်ပိူၼ်ႈလႆႈၶႆႇၵႆႇၼႆၵေႃႈ သမ်ႉၶွႆမႃးႁေ
“မႄႈ ႁႅင်ႉႁဝ်းဢမ်ႇလႆႈၶႆႇၵႆႇလႃႇ”
“ၼွင်ႉလုၵ်ႈၼမ်ႉၼၵ်းမၼ်းၼမ်ယဝ်ႉ ပေႃးၼမ်ႉၼၵ်းၼမ်ပိူၼ်ႈဢမ်ႇပၼ်ယဝ်ႉ”
“လုၵ်ႈၶႂ်ႈလႆႈၶႆႇၵႆႇ”
ၶႂ်ႈၸႃႉတေႃႇမႄႈၶဝ်သေ ႁွင်ႉႁွင်ႉႁႆႈႁႆႈယူႇယဝ်ႉ။ ပိူၼ်ႈၵေႃႈ ဢဝ်ၽွင်ၼမ်ႉၵိူဝ် တတ်ႉသႃးၼၼ်ႉ ပၼ်မၼ်းသေ ၵၢပ်ႈလူင်မိူဝ်းၵႂႃႇၸွမ်းတၢင်းယဝ်ႉ။
“လိူဝ်ၸႂ်ၼႃႇတေႉ”
တီႈတပ်ႉမႂ်ႇၶဝ်ၼၼ်ႉၵေႃႈ လုင်းလူႇ မႃးလႄႇတီႈသုမ်ႉၸဝ်ႈပိုၼ်းႁၢၼ်ႁေ
“ၸဝ်ႈႁဝ်းတေမိူဝ်းႁိူၼ်းဢမ်ႇၸႂ်ႈႁႃႉပၢတ်ႈၼႆႉ”
“ၸႂ်ႈဢိူဝ်ႈ လုင်းလူႇၵုမ်းၶဝ်ဝႆႉလႆႈယူႇႁိုဝ်လႃႇ”
“လႆႈယူႇၶႃႈ” ဢဝ်တင်းၼိူဝ်ႉယွင်းႁႅင်ႈၶႃႇၼၼ်ႉ သႂ်ႇတွင်ဝႆႉသေ “ၼႆႉဢဝ်မိူဝ်းလဵင်ႉပီႈလူဝ်းၶဝ်လႄႈ ၶဝ်ၵိၼ်ယူႇႁိုဝ်လႃႇၼိူဝ်ႉၵႂၢင်”
“ပီႈလူဝ်းသူလႄႈဢၢႆႈၸၢႆးတႄႉဢမ်ႇၵိၼ်လႆႈ မီးဢေးၼၢင်းၵူၺ်းဢိူဝ်ႈၵိၼ်”
“ႁိူဝ်ႇ ႁဵတ်းႁင်လႄႈဢမ်ႇၵိၼ်လႃႇ”
“မၼ်းၽိတ်း ဢွၵ်ႇၶူမ်းတိၵ်းတိၵ်းဢိူဝ်ႈ တင်းပီႈလူဝ်းသူတင်းဢၢႆႈၸၢႆး”
“ၼိူဝ်ႉၽၢၼ်းၵေႃႈမီးယူႇဢေႃႈ ၵမ်ႉမႃးၸင်ႇၵွႆႈဢဝ်မႃးပၼ် ၸဝ်ႈႁဝ်းတေမိူဝ်းလၢႆဝၼ်းလႃႇ”
“မိူဝ်းတင်ႈလဝ်ႈယဝ်ႉၵေႃႈမႃးၶိုၼ်းၵူၺ်းဢိူဝ်ႈ”
“ဢဝ်မႃးပႃးလႆႈယူႇၶႃႈယူဝ်ႉ ပေႃးၼၼ်”
“လႆႈလႆႈ ပေႃးၵိၼ်ႁေမဝ်း ဢမ်ႇပဵၼ်ၵၢၼ်ပဵၼ်ငၢၼ်းႁင်တႄႉ ၵဝ်ဢဝ်ၶွၼ်ႉသၵ်ႉဢိူဝ်ႈ”
“ပဵၼ်ဢေႃႈ ၸဝ်ႈႁဝ်းဢမ်ႇဢဝ်မႃးၶၢႆပႃးလႃႇ”
“ဢမ်ႇၶႂ်ႈၶၢႆမႂ်း ၵမ်ႉမႃးၵၢၼ်ဢမ်ႇယဝ်ႉ ပိူၼ်ႈမႃးၼေးၵဝ်ထႅင်ႈၵူၺ်းဢိူဝ်ႈ”
“မိူဝ်ႈၽုၵ်ႈၼႆႉၵေႃႈ လူဝ်ႇႁႂ်ႈလုၵ်ႈဢွၼ်ႇၶဝ်မိူဝ်းၸွမ်းၸဝ်ႈႁဝ်းယူႇယူဝ်ႉ ၶဝ်ႈသၢၼ်ႁဝ်းၵေႃႈၸမ်မူတ်းယဝ်ႉဢေႃႈၼႆႉ”
“မိူဝ်းလႄႈ ၸၢင်ႈပဵၼ်ႁင်”
ၽိူဝ်လိူဝ်ၵႆၵူၼ်း တၢင်းၵႂႃႇသမ်ႉပဵၼ်တၢင်းၵူၼ်းပႆၵူၺ်းလႄႈ လူတ်ႉဢမ်ႇထိုင် လူဝ်ႇသင်ၼႂ်းဝၢၼ်ႈ ဢဝ်ႁႅင်းၵူၼ်းတေႃႉတေႃႉတဵင်ႇတဵင်ႇလၢႆလၢႆ။
ယၢမ်းဝၢႆးဝၼ်း ၸဝ်ႈပိုၼ်းႁၢၼ်ၵေႃႈ တင်းလုၵ်ႈၼွင်ႉမၼ်း ႁႃႈႁူၵ်းၵေႃႉ ဢွၵ်ႇၶၢဝ်းတၢင်း လတ်းထိူၼ်ႇလတ်းၶိူဝ်းလူင်မႃးၸွမ်းၵၼ် ဢုပ်ႇလၢတ်ႈယဝ်ႉယွၵ်ႇယုမ်ႉၶူဝ် သဵင်ဢူၼ်ဢၢၼ်မေႃးပၼ်းလူင်မိူဝ်းယဝ်ႉ။ ၵွပ်ႈပဵၼ်ၶၢဝ်းႁိုဝ်ႉၶၢဝ်းၾူၼ်လႄႈ သဵၼ်ႈတၢင်းသမ်ႉ လႆႈလတ်းၼမ်ႉႁွင်ႈၼမ်ႉၵေးလူင်ၵႂႃႇတိၵ်းတိၵ်း ပဵၼ်လၢႆၵူတ်ႉလၢႆၵေးယူႇ။ မၢင်တီႈၵေႃႈၺႃးတႅၵ်ႉၸိူဝ်းၼႆႉဢိူဝ်ႈ ပေႃးႁၼ်မၢၵ်ႇမႆႉမၢၵ်ႇတွၵ်ႇၸွမ်းထိူၼ်ႇ မၢၵ်ႇၾႆးမၢၵ်ႇ လူႈလႃႈၸိူဝ်းၼႆႉၼႆၵေႃႈ ၵဵပ်းသႂ်ႇထူင်ပႂ်ႉမိူဝ်းလဵင်ႉလုၵ်ႈမၼ်းယဝ်ႉ။
မွၵ်ႈႁူဝ်ၶမ်ႈၼႆႉ ဢေးၼၢင်းဢၼ်လႅၼ်ႈတေႃႇမီလမ်း ၸွမ်းၵိဝ်ႇၵၢင်ဝၢၼ်ႈၶဝ် တင်းလုၵ်ႈဢွၼ်ႇတၢင်ႇၵေႃႉၸိူဝ်းၼၼ်ႉၵေႃႈ
“ပုၼ်ႉဢေးၼၢင်း ပေႃႈသူမႃးယဝ်ႉ”
ဢေးၼၢင်းဢွၼ်ႇ ဝၢႆႇႁၼ်ၺႃးၵူၼ်းသိုၵ်းၶဝ်ႈထႅဝ်လူင်မႃး ပႃးတၢင်းပေႃႈၶဝ်ၼၼ်ႉလႄႈ ၼႅတ်ႈလႅၼ်ႈလူင်မႃးတီႈႁိူၼ်းၵမ်းလဵဝ်
“မႄႈပေႃႈႁဝ်းမႃးယဝ်ႉ” ႁွင်ႉလၢတ်ႈမႄႈၶဝ်ယဝ်ႉၵေႃႈ ၼႅတ်ႈလႅၼ်ႈလူင်ၵႂႃႇၸူးပေႃႈၶဝ်ယူႇဢိူဝ်ႈ။
ပႆႇႁွတ်ႈႁိူၼ်း မိုဝ်းမၼ်းၼၼ်ႉတႄႉ တၢဝ်းသႂ်ႇၼႂ်းထူင်ပေႃႈၶဝ်ၼၼ်ႉသေ
“ဢီႈႁင်”
ထိုင်တီႈပေႃႈၶဝ်သမ်ႉပေႃးလႆႈ ၸူၵ်းဢွၵ်ႇမႃးၼႄမၼ်း “မၢၵ်ႇၾႆးဢိူဝ်ႈလုၵ်ႈ”
“ၶႂ်ႈၵိၼ်” ပေႃႈၶဝ်ယိပ်းဢဝ်မႃးသေ ၵွၵ်းပိူၵ်ႇပၼ်မၼ်းယဝ်ႉ မၼ်းၵေႃႈယိပ်းဢဝ်တင်းႁူၺ်ႇသေ ဢိုၼ်ၶဝ်ႈၶေႃးၵႂႃႇယဝ်ႉ။ ၵိၼ်ယဝ်ႉပႆႇပေႃး ယွၼ်းထႅင်ႈ ပေႃႈၶဝ်လဵင်ႉမၼ်းထႅင်ႈ ၸမ်သိပ်းၼႆႉယဝ်ႉ ၵိၼ်မူတ်းသေ မၢၵ်ႇၾႆးၼႆႉသမ်ႉ မၼ်းမီးထၢတ်ႈမႆႈၼႃႇလႄႈ ၵိၼ်ၼမ်ဢမ်ႇလႆႈ ပေႃႈၶဝ်သမ်ႉပေႃးလႆႈလၢတ်ႈမၼ်း “မူတ်းယဝ်ႉ”
“ဢမ်ႇမူတ်း” ၸၼ်ဢဝ်ထူင်ပေႃႈၶဝ်သေ ဢဝ်ၵွၵ်းႁူဝ်ဢွၼ်ႇမၼ်း ငွၵ်ႈတူၺ်းၼႂ်းထူင်ၼၼ်ႉယဝ်ႉ။
“ပႆႇမူတ်း ဢဝ်ထႅင်ႈ”
“ပေႃးယဝ်ႉ”
“ဢမ်ႇပေႃး”
“မၼ်းဢမ်ႇလီၵိၼ်ၼမ်”
“ၶႂ်ႈၵိၼ်” ထဵင်သႂ်ႇထဵင်သႂ်ႇ တၢင်းၵူၼ်းပႆႁိူဝ်ႉမႃးသေ
“ၵမ်ႉတေႁႅမ်ယဝ်ႉၼ” မၼ်းၸင်ႇတေယဵၼ်ၵႂႃႇ။
ၵူၼ်းသိုၵ်းၶဝ်ၵေႃႈ မိူဝ်းၶျႃႉၶူဝ်းၶဝ်တီႈႁိူၼ်းၸဝ်ႈပိုၼ်းႁၢၼ်ၶဝ်ၼၼ်ႉသေ ၶမ်ႈၼႆႉတႄႉ ဢွၼ်ၵၼ်လိုဝ်ႈႁဵတ်းၶႅၵ်ႇတီႈႁိူၼ်းသေၶိုၼ်းၼိုင်ႈယဝ်ႉ။

