ယူႇမိူင်းပိူၼ်ႈ ဢမ်ႇမီးဝတ်း ၼင်ႇႁိုဝ်ပေႃးတေယူႇလွတ်ႈလႆႈ သဵင်ႈငိုၼ်းၼမ်တၢၼ်ႇႁိုဝ်ၵေႃႈ ဢမ်ႇပဵၼ်သင်။
ယူႇမိူင်းႁဝ်း ဢမ်ႇလႆႈသဵင်ႈၵႃႈဝတ်းၵႃႈဝႂ်သင် လႆႈထၢမ်းဢၼ်ပုၼ်ႉဢၼ်ၼႆႉ ၶွၼ်ႇၼၼ်ႉၶွၼ်ႇၼႆႉ။
ယူႇမိူင်းပိူၼ်ႈ ၶၢတ်ႈယူႇႁိူၼ်းပိူၼ်ႈ ဢမ်ႇမီးႁိူၼ်းပဵၼ်ၶွင်ႁဝ်း ၶႂ်ႈယူႇတီႈလီၵေႃႈ ၵႃႈတေလႆႈသဵင်ႈငိုၼ်းၼမ်။
ယူႇမိူင်းႁဝ်း မီးႁိူၼ်းႁင်းႁဝ်း ၶႂ်ႈႁဵတ်းၸိူင်ႉႁိုဝ်ႁဵတ်း ႁဵတ်းပွၵ်ႈလဵဝ်ယူႇလႆႈႁိုင်။
ယူႇမိူင်းပိူၼ်ႈ ႁဵတ်းသူၼ်ႁႆႈၼႃး ပဵၼ်ၶွင်ပိူၼ်ႈ လႆႈငိုၼ်းၸွမ်းလိူၼ်ၸွမ်းဝၼ်း ပေႃးၸႂ်ႉပေႃးၸၢႆႇ။
ယူႇမိူင်းႁဝ်း မီးတီႈသူၼ်တီႈၼႃးႁင်းႁဝ်း ႁဵတ်းႁႃလဵင်ႉတွင်ႉ ၵိၼ်ဢိမ်ႇ မီးၼမ်ပေႃးၶၢႆ ယူႇလႆႈတေႃႈၸူဝ်ႈလုၵ်ႈပၢၼ်လၢၼ်။
ယူႇမိူင်းပိူၼ်ႈ ၸွမ်းပၵ်းပိူင်မိူင်းပိူၼ်ႈ မီးလွင်ႈလူမ်ၸႂ်ပၼ်ႁဝ်းယူႇ ၵူၺ်းၵႃႈ မီးသုၼ်ႇႁဵတ်းသင်လႆႈ လိူဝ်သေၵၢၼ်ႁႃလဵင်ႉတွင်ႉ။
ယူႇမိူင်းႁဝ်း လွင်ႈယူႇငၢႆႈလူမ်ဢမ်ႇၶိုတ်းၵၢပ်ႈၼမ် မီးသုၼ်ႇႁဵတ်းလႆႈ ၸွမ်းလူၺ်ႈပဵၼ်ၵူၼ်းမိူင်းႁဝ်းၵေႃႉၼိုင်ႈ။
ယူႇမိူင်းပိူၼ်ႈ မီးၵၢၼ်ငၢၼ်းလႆႈငိုၼ်းလီ ၵႃႈႁွင်ႈ၊ ၵႃႈၼမ်ႉ၊ ၵႃႈၾႆး၊ ၵႃႈၵိၼ်ၵႃႈယူႇ ပေႃးယူႇၵႂႃႇလိူၼ်လႂ်လိူၼ်ၼၼ်ႉ။
ယူႇမိူင်းႁဝ်း ၵၢၼ်ငၢၼ်းႁင်ၵေႃႈႁဵတ်းလႆႈယဝ်ႉ သွၼ်ႇႁႂ်ႈၵႆႉ။
ၵူၼ်းမိူင်းႁဝ်း ၸွမ်းဝၢၼ်ႈၼွၵ်ႈၼႃးပၢင်ႇၵမ်ႈၽွင်ႈ ဢွၼ်ၵၼ်ႁႃႁဵတ်း ဢၼ်ႁၼ်ၼမ်ႉႁၼ်တူဝ်လႆႈၵမ်းလဵဝ်သေ၊ ၽႅၼ်ႇလိၼ်မိူင်း ႁိူၼ်းယေးသူၼ်ႁႆႈၼႃး ဢၼ်ႁဵတ်းယူႇပီယၢဝ်းၶၢဝ်းႁိုင်ၼၼ်ႉၵေႃႈ ပဵၼ်လွင်ႈၼၵ်းၸႂ် ဢၼ်တေလႆႈႁပ်ႉဢဝ်ပုၼ်ႈၽွၼ်းသေ ထၢမ်းဢၼ်ပုၼ်ႉဢၼ်ၼႆႉယူႇ ဢမ်ႇယဝ်ႉဢမ်ႇတူဝ်ႈ ႁဵတ်းၵၢၼ်ႁဝ်းၵေႃႈ မိူၼ်ၵၢၼ်ပိူၼ်ႈ။
သမ်ႉဝႃႈ မိူင်းႁဝ်းၼၼ်ႉ မိူင်းတႆးသေတႃႉၵေႃႈ မၢၼ်ႈယူႇၵေႃႈပဵၼ်ဝၢၼ်ႈမၢၼ်ႈႁိူၼ်းမၢၼ်ႈ၊ ၶႄႇမႃးသိုဝ်ႉၵေႃႈ ပဵၼ်ႁိူၼ်းၶႄႇတီႈလိၼ်ၶႄႇယဝ်ႉ။ ႁဝ်းမီးမိူင်းဢိူဝ်ႈ ၵူၺ်းၵႃႈ ႁိူၼ်းႁဝ်း ဝၢၼ်ႈႁဝ်းလူး သမ်ႉမီးလႂ်။
ယူႇမိူင်းပိူၼ်ႈၵေႃႈ ပိုင်ႈဢိင်ပိူၼ်ႈၵူၺ်း ပေႃးဝႃႈ “မိူဝ်းမိူင်းသူၶိုၼ်းလႄႈ” ၸွင်ႇႁဝ်းသမ်ႉတေမီးတီႈယူႇယဝ်ႉႁိုဝ်။
ၼပ်ႉယမ်ၼိူဝ်ၽူႈလူလိၵ်ႈႁဝ်းၶဝ်ယူႇဢေႃႈ
ၶူမ်ၽၢတ်ႇ
19/10/2026
