တူၵ်ႈ! တူၵ်ႈ! တူၵ်ႈ…
လင်ႁိူၼ်းတီႈၵႆၵူၼ်း သဵင်ၽၼ်းမႆႉမေႃးယူႇ ၵူၼ်းထဝ်ႈၶၢဝ်ႉၵေႃႉၼိုင်ႈ ၽၼ်းယဝ်ႉသွင်သၢမ်ၵမ်းသေ ၼင်ႈလိုဝ်ႈႁိူဝ်ႉယဝ်ႉလႄႈ
“ပေႃႈ…”
လုၵ်ႈယိင်းသၢဝ်မၼ်းဢၼ်တိုၵ်ႉဢွၵ်ႇတၢင်းၵႂႃႇႁဵတ်းၵၢၼ်တီႈၵႆၼၼ်ႉၵေႃႈ ႁွတ်ႈမႃးတီႈႁိူၼ်းသေ
“မႃးယဝ်ႉႁႃႉ!..”
ၼႅတ်ႈလုၵ်ႉၵႂႃႇယိပ်းၸွႆႈၶူဝ်းလုၵ်ႈယိင်းမၼ်း ႁိူဝ်ႉတၼ်းႁၢႆၵႂႃႇမိူဝ်ႈလႂ်ဢမ်ႇႁူႉယဝ်ႉ။
“မႄႈႁဝ်းလူး”
“ၵႂႃႇမီးၼႂ်းသူၼ်ၼၼ်ႉၼေႈ”
“လုၵ်ႈမႃးၸွမ်းၽႂ်”
“ၵူၼ်းတီႈႁဵတ်းၵၢၼ်ၵူၺ်းဢေႃႈ”
“ၵိၼ်မႃးယဝ်ႉၼႄႇၶဝ်ႈ”
“ပႆႇ..ၶမ်ႈၼႆႉၵိၼ်မူၵထၼေႃႈ လုၵ်ႈသိုဝ်ႉမႃးၼိူဝ်ႉယဝ်ႉၼႆႉ”
“ၵႂႃႇၵဵပ်းၽၵ်းႁေလၢတ်ႈမႄႈသူမႃးလႄႈ ပေႃႈတေသွႆးၼိူဝ်ႉဝႆႉပေႃးၼႆ”
လုၵ်ႈယိင်းၼၢင်းၸၢမ်ၽွင်းၵေႃႈ လႅၼ်ႈလူင်ၵႂႃႇၼႂ်းသူၼ်ၶဝ်ၼၼ်ႉၵမ်းလဵဝ်ယဝ်ႉ၊ ၼႂ်းသူၼ်ၶဝ်ၼၼ်ႉသမ်ႉလႆႈလူင်းၵႂႃႇၼႂ်းႁူၺ်ႈ တီႈဢမ်ႇၵႆႁိူၼ်းသေၵႃႈႁိုဝ်ၼၼ်ႉလႄႈ ၵႂႃႇႁၼ်မႄႈၶဝ်တိုၵ်ႉသွမ်ႈၽၵ်းယူႇသေ
“မႄႈ!..”
မႄႈၶဝ်ယၵ်ႉတူၺ်းမၼ်းယဝ်ႉ။
“မႃးမိူဝ်ႈလႂ်လႃႇ”
“မႃးမိူဝ်ႈလဵဝ်..ၶမ်ႈၼႆႉႁဝ်းၵိၼ်မူၵထ လုၵ်ႈမႃးၵဵပ်းၽၵ်းၼႆႉ မီးၽၵ်းႁင်..”
“မီးၸိူဝ်းၼၼ်ႉၵေးၼႃႇ”
ၸၢမ်ၽွင်းၵဵပ်းၽၵ်းယဝ်ႉသေ “မႄႈယႃႇၼၢၼ်းမႃးၼ”
“ဢိူဝ်ႈ” မႄးသိုပ်ႇသွမ်ႈၽၵ်းမၼ်းၵႂႃႇထႅင်ႈယဝ်ႉ။
ယၢမ်းၵၢင်ၶမ်ႈ မႄႈၵေႃႈမႃးႁွတ်ႈထိုင်ႁိူၼ်းသေ သွင်ၵေႃႉပေႃႈလုၵ်ႈတႄႉၼင်ႈၵိၼ်ယူႇယဝ်ႉၼႃႇ မႄႈတႄႉၵႂႃႇဢၢပ်ႇၼမ်ႉသေ ၵိၼ်ပေႃးတေဢိမ်ႇယဝ်ႉၸွင်ႇၵွႆႈႁွတ်ႈမႃး။
“ၺႃးဢၢႆႈၸၢႆးယူႇႁႃႉ”
“လၢတ်ႈမၼ်းယဝ်ႉ လုၵ်ႈမႃးႁိူၼ်းၼႆ”
ဢမ်ႇလၢတ်ႈသင်သေ သိုပ်ႇၵိၼ်ၵၼ်ၵႂႃႇ တေႃႇထိုင်ၸမ်ပေႃးယဝ်ႉ။
“ဢူၺ်းၵေႃႉထၢမ်လုၵ်ႈဝႃႈ ႁဵတ်းႁင်လႄႈလုၵ်ႈမႃးႁဵတ်းသိုၵ်းၼႆဝႃႇ လုၵ်ႈၵေႃႈလၢတ်ႈမၼ်းဝႃႈ ယွၼ်ႉဢူႈႁဝ်းပဵၼ်သိုၵ်းၼႆႁေယဝ်ႉဢိူဝ်ႈ”
“မၼ်းသမ်ႉဝႃႈႁိုဝ်လႃႇၵမ်းၼၼ်ႉ”
“မၼ်းၵေႃႈထၢမ်ဝႃႈ ဢူႈသူႁေမႄႈသူႁဵတ်းႁိုဝ်မႃးၺႃးၵၼ်လႃႇ လုၵ်ႈၵေႃႈဝႃႈႁႂ်ႈမၼ်းမႃးထၢမ်ဢဝ်ၵူၺ်းၼႆ”
“မၼ်းႁမ်ႉတေၶႂ်ႈႁူႉႁဵတ်းႁင်လႃႇ”
“မၼ်းပဵၼ်ၵူၼ်းတႅမ်ႈလိၵ်ႈဢေႃႈ ပေႃးပေႃႈႁဝ်းၶဝ်တၼ်းမၼ်းတေမႃးထၢမ်ၼႆ လႆႈယူႇႁႃႉ”
“မႃးလႄႈၶႂ်ႈမႃးၵေႃႈၸၢင်ႈပဵၼ်ႁင်”
“ၵဝ်ဢမ်ႇမေႃလၢတ်ႈၵဝ်”
“မႄႈႁဝ်းၵေႃႈလၢတ်ႈၸွမ်းၼင်ႇဢၼ်မၼ်းထၢမ်ၼၼ်ႉၵူၺ်းၼႃႇ မၼ်းဝႃႈမၼ်းၶႂ်ႈဢဝ်လွင်ႈမႄႈႁဝ်းၶဝ်မႃးႁဵတ်းၸိူင်းၼႆဝႃႇ”
“မၼ်းပဵၼ်ၽႂ်လူင်လႃႇၼၼ်ႉ ၽူႈယိင်းႁႃႉၽူႈၸၢႆး”
“ပေႃးမႃးၵေႃႈတေႁူႉၵူၺ်းဢေႃႈ”
“ပေႃးပဵၼ်ၽူႈၸၢႆးတႄႉႁႂ်ႈမၼ်းမႃးထၢမ်လႃႈ” ပေႃႈၶဝ်ယၵ်ႉတူၺ်းၶိတ်ႈတူၺ်းပၢႆႇဝႆႉယူႇ။
“ပေႃႈၼႆႉၵေႃႈ…ႁႂ်ႈမၼ်းမႃးထၢမ်လွင်ႈပေႃႈႁဝ်းၶဝ်ၵူၺ်းဢိူဝ်ႈ”
“ပိူၼ်ႈမႃႇၶႂ်ႈႁူႉလွင်ႈႁႃးလေႃႇ ၶႂ်ႈႁူႉလွင်ႈမႂ်းၵူၺ်းဢိူဝ်ႈၼၼ်ႉ”
“ဢမ်ႇၸႂ်ႈလေႃႇ..မၼ်းပဵၼ်ၵူၼ်းတႅမ်ႈလိၵ်ႈတေႉဢေႃႈ ယိင်းတင်းၵႆႉၵႆႉလူယူႇ”
“ပေႃးၵျိူၵ်ႈယူႇၵေႃႈ ႁႂ်ႈမၼ်းမႃးထၢမ်လႄႈ”
“ပေႃႈၼႆႉၵေႃႈ ဢမ်ႇၸႂ်ႈၸိူင်ႉၼၼ် လိုၵ်းယဝ်ႉမိူဝ်းၼွၼ်းလႃႈယိင်းတေသိမ်းၵူၺ်းၸိူဝ်းၼႆႉ”
“ႁွင်ႉမႃးလႄႈ ၵဝ်ၵေႃႈၶႂ်ႈႁူႉၸၵ်းၵွၼ်ႇ”
“ဢမ်ႇႁွင်ႉမႃးယဝ်ႉ..”
ႁႂ်ႈပေႃႈမႄႈၶဝ်ၶိုၼ်ႈမိူဝ်းၼွၼ်းသေယဝ်ႉ၊ တီႈႁိူၼ်းယူႇႁၢင်ႇၵူၼ်းဝႆႉလႄႈ လႅင်းၾူၼ်းၵေႃႈဢမ်ႇထိုင်။ ၵၢင်ၼႂ်မႃးၵေႃႈ ၸၢမ်ၽွင်းမိူဝ်းလၢတ်ႈဢူၺ်းၵေႃႉမၼ်း ဢၼ်မႃးၸွမ်းၵၼ်ၼၼ်ႉ မႃးႁူပ်ႉၵၼ်တင်း ဢူႈမႄႈၶဝ်ၼၼ်ႉယဝ်ႉ။ တူင်ႉတၵ်ႉသိုပ်ႇမိုတ်ႈၵၼ်ၵႂႃႇ
“ၸိုဝ်ႈဝႃႈႁိုဝ်လႃႇ”
“ငဝ်းလိူၼ်ၶႃႈဢေႃႈ..”
“ႁဵတ်းၵၢၼ်သင်လႃႇ”
“ၵၢၼ်တူင်ႇဝူင်းၼႂ်းတႆးႁဝ်းၼႆႉၵူၺ်းၶႃႈ”
“လီဢိူဝ်ႈၵျႃႉဢိူဝ်ႈၼႆႉ ႁမ်ႉႁဵတ်းႁိုဝ်ႁူႉၸၵ်းတင်းဢေးလုၵ်ႈႁဝ်းလႃႇ”
“ၵႆႉၵႆႉၺႃးၵၼ်ၸွမ်းပွႆးၸွမ်းပၢင်သွၼ်ၸိူဝ်းၼႆႉဢေႃႈ”
“ၶွင်ၶဝ်ပဵၼ်ၸုမ်းၶၢဝ်ႇလႄႇၼႆ”
“ၼၼ်ႉယဝ်ႉၶႃႈ”
“မၼ်းဝႃႈ..ၸၢႆးတေမႃးထၢမ်ၼႆၼႃႇ လၢတ်ႈပိူၼ်ႈယဝ်ႉၼႄႇ”
“ၼၼ်ၶႃႈႁႃႉ ပေႃးလႆႈတႄႉတေမႃးထၢမ်တေႉဢေႃႈၼႆႉ”
“ဢေးလုၵ်ႈ! မၼ်းဝႃႈမၼ်းတေမႃးထၢမ်ဝႃႇ”
ႁွင်ႉလၢတ်ႈၸူးၸၢမ်ၽွင်းၼႂ်းသွင်ႇၾႆးၼၼ်ႉယူႇ။
“ထၢမ်လႄႈၶႂ်ႈထၢမ်ၵေႃႈ ႁွင်ႉလၢတ်ႈဢွၵ်ႇမႃးၼႂ်းၼၼ်ႉၶိုၼ်း”
ၸၢမ်ၽွင်းဢဝ်ၼမ်ႉလႄႈမၢၵ်ႇမႆႉမႃးတမ်းပၼ်ယဝ်ႉၵေႃႈ
“ဢမ်ႇၸႂ်ႈတေမႃးထၢမ်ပေႃႈႁဝ်းႁိုဝ်လႃႇ ၶႂ်ႈထၢမ်သင်ၵေႃႈထၢမ်လႃႈၼၼ်ႉ”
“ပေႃႈႁဝ်းဝႃႈ သူႁႂ်ႈမႃးထၢမ်ၼႆ”
“ဢိူဝ်ႈ..ၵေႃႈထၢမ်လႄႈ”
ၶႃသွင်ၵေႃႉယုမ်ႉယူႇ ၸၢမ်ၽွင်းတႄႉႁၢင်ႈဢမ်ႇပေႃးႁူႉၸွမ်းသေၵႃႈႁိုဝ်လႄႈ ၶိုၼ်းၶဝ်ႈၵႂႃႇၼႂ်းသွင်ႇၾႆးၼၼ်ႉယဝ်ႉ။
ငဝ်းလိူၼ်လႄႈတင်း ပေႃႈၸၢမ်ၽွင်းၶဝ်ဢုပ်ႇၵၼ်ယူႇတင်းႁိုင် ထိုင်ၶိင်ႇၵိၼ်ၶဝ်ႈဝၼ်းယဝ်ႉၼႆၵေႃႈ မႄႈႁွတ်ႈမႃးသေယဝ်ႉ ၵိၼ်ၶဝ်ႈၵုမ်းၵၼ်သေ ငဝ်းလိူၼ်ၵေႃႈ သိုပ်ႇဢုပ်ႇတင်းမႄႈထႅင်ႈလႄႈ လႆႈၶေႃႈမုၼ်းယူႇတၢၼ်ႇတၢၼ်ႇသေ ၼင်ႈဢုပ်ႇၵၼ်ဢမ်ႇတၼ်းႁူႉ ၵမ်ႉၵူၺ်းဝၼ်းပေႃးၶမ်ႈမႃးယဝ်ႉၼႃႇ။
“ပေႃးၶၢၼ်ႉမိူဝ်းၵေႃႈ ႁဵတ်းၶႅၵ်ႇႁဝ်းတီႈၼႆႈသေယဝ်ႉဢိူဝ်ႈၼႃႇ”
“ၶႃႈတင်းဢမ်ႇလႆႈဢဝ်ၶူဝ်းသင်မႃးဢေႃႈၼႆႉ”
“ၸၢင်ႈပဵၼ်သင် ၶူဝ်းဢၢႆႈၸၢႆးႁဝ်းမီးယူႇလူး”
“မိူဝ်ႈၽုၵ်ႈသမ်ႉလူဝ်ႇၵႂႃႇထႅင်ႈဢေႃႈ”
“ၼၼ်ႁႃႉ..မိူဝ်းလွႆးလွႆးလႄႈပေႃးၼႆ”
“ဢေႃႈၶႃႈ”
“ၵႆႉၵႆႉမႃးလႄႇလႄႈၼ”
“ပေႃးမႃးဢမ်ႇမီးတီႈလိုဝ်ႈၵေႃႈ မႃးလိုဝ်ႈတီႈၼႆႈလႆႈယူႇတႃႇသေႇၼႃႈ”
“ဢေႃႈဢေႃႈ”
ၸၢမ်ၽွင်းၵေႃႈ ပႆဢွၵ်ႇႁိူၼ်းမိူဝ်းသူင်ႇငဝ်းလိူၼ်ၵႂႃႇသေ
“လႆႈၸွမ်းၼင်ႇဢၼ်သူၶႂ်ႈလႆႈၼၼ်ႉယူႇၼႄႇ”
“ၶႅမ်ႉယူႇၼႃ ၵူၺ်းၵႃႈ ယင်းတိုၵ်ႉလူဝ်ႇထႅင်ႈ တီႈသူ”
“ၸိုင်ဝႃႈဢဝ်ၸၢတ်ႈပၢၼ်ပေႃႈမႄႈႁဝ်းၵူၺ်းၼႆ”
“ၸႂ်ႈယဝ်ႉ သူၵေႃႈပဵၼ်လုၵ်ႈၶဝ်ယူႇလူး သူဢၼ်ယူႇၼႂ်းတူင်ႇဝူင်းဢၼ်ၼႆႉသမ်ႉပဵၼ်ၸိူင်ႉႁိုဝ်သေ ႁဵတ်းၸိူင်ႉႁိုဝ်မႃးႁွတ်ႈထိုင်တီႈၼႆႈၼႆဢိူဝ်ႈ”
“ပၼ်ႁဝ်းဝူၼ်ႉတူၺ်းၵွၼ်ႇလႄႈ ၸွင်ႇၵွႆႈတႅမ်ႈသေပၼ်ၼ”
“ဢူဝ်ႇၶေႇ”
တၢင်းႁိူၼ်းၸၢမ်ၽွင်းၶဝ်ၼၼ်ႉသမ်ႉ မီးယူႇၵူၼ်ႈႁူၺ်ႈပုၼ်ႉလႄႈ ပေႃးတေမိူဝ်းၼႂ်းဝၢၼ်ႈၼႆၵေႃႈ လႆႈၶိုၼ်ႈလွႆသေမိူဝ်းယဝ်ႉ၊ သွင်ၶႃဢုပ်ႇၵၼ်မႃးၸွမ်းတၢင်း သမ်ႉပေႃးတူၵ်းၵႂႃႇၶိုင်ႈတၢင်းယဝ်ႉ။
“မိူဝ်းသူင်ႇႁဝ်းတေႉတေႉႁႃႉၼႆႉ”
“သူႁတ်းမိူဝ်းယူႇၼႄႇၵေႃႉလဵဝ်”
“ႁတ်းၵႃႈ သူသမ်ႉႁတ်းမႃးၶိုၼ်းႁင်းၵူၺ်းယူႇၼႄႇ”
“မိူဝ်ႈဢွၼ်တၢင်းႁဝ်းၵႂႃႇၵႂႃႇမႃးမႃးႁင်းၵူၺ်းသေႇသေႇယဝ်ႉဝႃႈ လပ်းသိင်ႇၵေႃႈယၢမ်ႈမႃးၵူၺ်းယဝ်ႉ”
“သူပေႉႁတ်းလႃႇ”
“ဢမ်ႇၸႂ်ႈႁတ်းလေႃႇ ဢမ်ႇလိူဝ်လႆႈၵူၺ်းဢိူဝ်ႈမၢင်ပွၵ်ႈမႃး”
“ပေႃႈသူဝႃႈႁႂ်ႈႁဝ်းမႃးထၢမ်သူၼႆလႆႈယူႇၼႄႇ”
သဵင်ၸၢမ်ၽွင်းယဵၼ်ၵႂႃႇသေ
“သူၵေႃႈႁၼ်ယဝ်ႉလူး..ၽဝႁဝ်းပဵၼ်ၸိူင်ႉႁိုဝ်ၼႆ”
“ႁၼ်လႄႈႁူႉၸၵ်းလီထိုင်တီႈ ၶႂ်ႈမႃးပဵၼ်ၵူၼ်းႁိူၼ်းလဵဝ်ၵၼ်ယဝ်ႉ”
“ပၼ်ႁဝ်းဝူၼ်ႉတူၺ်းၵွၼ်ႇလႄႈ”
“ယႃႇပၼ်ႁႂ်ႈမွင်းႁိုင်လႄႈၼႃႈ”
“ၶႂ်ႈလႆႈၶေႃႈတွပ်ႇမိူဝ်ႈလဵဝ်ၵေႃႈလႆႈယူႇၼႃ”
“ဝူၼ်ႉလီလီလႄႈပေႃးၼၼ်ၵေႃႈ”
ငဝ်းလိူၼ်ႁူႉၸၵ်းၸၢမ်ၽွင်းလီလႄႈ ဢမ်ႇၸႂ်ႈဝႃႈပဵၼ်ပွၵ်ႈဢွၼ်တၢင်းသုတ်းၵူၺ်း ၵွပ်ႈပဵၼ်ၵေႃႉႁၵ်ႉဢမ်ႇလႆႈသေ ၸင်ႇလႆႈပဵၼ်ဢူၺ်းၵေႃႉၵၼ်ယူႇဝၼ်းၼႆႉၵူၺ်း။
“ႁဝ်းတေလႆႈလူတီႈလႂ်လႃႇၸိူင်းသူၼၼ်ႉ”
“ႁဵတ်းပပ်ႉႁေၶၢႆလီယူဝ်ႉၼေႃ”
“ၽႂ်မႃႇလူယဝ်ႉပပ်ႉၼႆႉ”
“ႁဵတ်းပပ်ႉပဵၼ်ၾၢႆႇPDFၸိူင်ႉၼၼ်ဢဝ်ဢႄႈ ၽႂ်ၶႂ်ႈလူၵေႃႈႁႂ်ႈမႃးသိုဝ်ႉဢဝ်”
“ယႃႇဝႃႈတေသိုဝ်ႉလႃႈ သူပၼ်ပိူၼ်ႈလူလၢႆလၢႆၵူၺ်းၵေႃႈ ၸွင်ႇတေမီးၵူၼ်းတူၺ်းမၼ်းၼႆၵွၼ်ႇဢိူဝ်ႈ”
“ၸႂ်ႈဢိူဝ်ႈၼေႃႈ လိူဝ်သေတူဝ်ႁဝ်းႁေ သူၵေႃႈသမ်ႉပၢႆပဵၼ်ႁဝ်းတဵၵ်းတဵင်ၵူၺ်းထႅင်ႈၵွၼ်ႇၼႆ”
“ၼၼ်ႉယဝ်ႈ”
“ပႂ်ႉၵႂႃႇတူၺ်းတီႈ “TN ၸိူင်းတႆး” လႄႈၼႃႈ တၢင်းၾဵတ်ႉပုၵ်ႉၵေႃႈမၼ်းတေသႂ်ႇလိင်ႉဝႆႉပၼ်ယူႇ၊ တၢင်းတိၵ်းတွၵ်ႇတႄႉ ပေႃးၸိူင်းယၢဝ်းမၼ်းတေဢမ်ႇၵႆႉတၢင်ႇပၼ်၊ ဢၼ်ယုမ်ႇၸႂ်လႆႈၵေႃႈ တၢင်းဝႅပ်ႉသၢႆႉ tainovel.com ၼၼ်ႉၼႃႇ၊ ပေႃးၶၢၼ်ႉလူႁေၶႂ်ႈထွမ်ႇသဵင်ၵေႃႈ မၼ်းတၢင်ႇပႃးယူႇဢိူဝ်ႈၼႂ်းယူႇထုပ်ႉၼၼ်ႉ”
“ပႂ်ႉထွမ်ႇသဵင်ဢဝ်ယူဝ်ႉပေႃးၼႆ”
“ဢမ်ႇႁူႉတေႃႇတေႃႇမၼ်းတေတၢင်ႇပၼ် တႃႉသူလူဢဝ်လႃႈ”
“သူတေတၢင်ႇဝၼ်းလႂ်လႃႇ…”
“ၸႂ်ယဵၼ်ယဵၼ်ၵႃႈ ႁဝ်းတင်းပႆႇလႆႈတႅမ်ႈ”
