ပေႃးမွၵ်ႈႁူဝ်ၶမ်ႈၼႆႉ ပၢင်မၼ်းၵေႃႈတႄႇယဝ်ႉ ၵေႃႉၼိုင်ႈဢၢႆႈသႅင် လုၵ်ႉမိူင်းထႆးမႃး၊ ထႅင်ႈၵေႃႉၼိုင်ႈ ဢၢႆႈၼူတ်ႇ ႁဵတ်းၵၢၼ်ပဵၼ်မေႃသွၼ်ယူႇတီႈဝၢၼ်ႈ၊ ဝႅင်းပၢင်ၵိၼ်လဝ်ႈၵၼ်ယူႇ တႂ်ႈလၢင်ႈႁိူၼ်းဢၢႆႈသႅင်ၶဝ်ၼၼ်ႉယဝ်ႉ။
ဢၢႆႈၼူတ်ႇၶႃဢၢႆႈသႅင်တႄႉ တႄႇပၢင်ပႂ်ႉထႃႈယဝ်ႉဢိူဝ်ႈ
“မႂ်းၵႂႃႇမိူင်းထႆးၼႆႉ ႁဵတ်းၵၢၼ်ႁင်လႃႇထွမ်ႇဝႃႈ” ဢၢႆႈၼူတ်ႇႁိုဝ်ႈလဝ်ႈသေထၢမ်မၼ်း
“ႁဵတ်းၵၢၼ်ၵေႃႇသၢင်ႈဢိူဝ်ႈ”
“ပေႃးၼၼ် ႁဵတ်းႁိူၼ်းၸိူဝ်းၼႆႉၵူၺ်းၵေႃႈမေႃၼႃႇယဝ်ႉလေႃႇၼႆ”
“ပေႃးပိူၼ်ႈဢွၵ်ႇႁၢင်ႈမၼ်းပၼ်တႄႉမေႃယူႇၵူၺ်းၵွၼ်ႇဢိူဝ်ႈ”
“ၵဝ်ၶႂ်ႈႁဵတ်းႁိူၼ်းဢိူဝ်ႈၼႆႉ မွၵ်ႈသၢမ်ႁွင်ႈ ၼိုင်ႈႁွင်ႈႁႃႈသွၵ်ႇႁႃႈသွၵ်ႇၼႆၵႃႈ တေဢၢပ်ႈသဵင်ႈမွၵ်ႈႁိုဝ်လႃႇမႂ်းဝႃႈ”
“ၵဝ်ၵေႃႈဢမ်ႇႁူႉၵွၼ်ႇ ပိူၼ်ႈၸႂ်ႉၵဝ်ႁဵတ်းၸိူင်ႉႁိုဝ်ၵေႃႈၵဝ်ႁူႉဝႃႈလူဝ်ႇႁဵတ်းၸိူင်ႉၼၼ်ၵူၺ်းဢိူဝ်ႈ၊ ႁဝ်းတႄႉပဵၼ်ၵူၼ်းႁဵတ်းမၼ်းၵူၺ်းလႄႇ ဢမ်ႇလူဝ်ႇလႆႈသိုဝ်ႉသင်ယဝ်ႉလူႉ”
“ၵဝ်ၵၢၼ်ႉၸႂ်ယႂ်ႇယူႇဢိူဝ်ႈၼႆႉ ၵေႃႈယဝ်ႉလႄႈပေႃးၼၼ်”
ၵမ်းၼၼ်ႉဢၢႆႈႁၢၼ် ဢၼ်ႁဵတ်းသိုၵ်းသေ မႃးလႄႇႁိူၼ်းၼၼ်ႉ ႁွတ်ႈမႃးၸူးၶႃယဝ်ႉ။
“ၵူၼ်းၵႂႃႇမိူင်းထႆးၼႆႉ မီးငိုၼ်းၼႃႇယဝ်ႉယူဝ်ႉၼေႃ”
“ၸၢင်ႈၵႂႃႇဢဝ်ၵႃႈလႂ်မီး ႁဵတ်းႁဵတ်းၵိၼ်ၵိၼ် ၵုမ်ႇၵႂႃႇလိူၼ်လႂ်လိူၼ်ၼၼ်ႉၵူၺ်းဢိူဝ်ႈ”
“ပေႃးထၢၼ်ႈၼၼ်မႂ်းႁမ်ႉၵႂႃႇႁဵတ်းႁင်လႃႇ”
“ယူႇမိူင်းႁဝ်းဢမ်ႇလႆႈငိုၼ်းၼမ်လႄႇမႂ်းၵေႃႈ”
“သမ်ႉဝႃႈ ၵႂႃႇမိူင်းထႆးၵေႃႈ ၵုမ်ႇလိူၼ်လႂ်လိူၼ်ၼၼ်ႉၵူၺ်းၼႆ”
“မၼ်းၶႅၼ်းလိူဝ်မိူင်းႁဝ်းၵွၼ်ႇဢိူဝ်ႈမေႃႉ”
“မိူင်းႁဝ်းတင်းမီးလိူဝ်မိူင်းထႆးၵွၼ်ႇဢိူဝ်ႈမႂ်းႁူႉ”
“မီးႁင် ၵဝ်ဢမ်ႇႁၼ်မီးႁင်မႃးလႃႈ ၵွႆႈယူႇၵွႆႈၽၢၼ်ၵႂႃႇတိၵ်းတိၵ်းၵူၺ်းဢိူဝ်ႈၵဝ်ႁူႉ ႁဵတ်းႁႆႈႁဵတ်းသူၼ်ၵေႃႈ ဢမ်ႇၵႃႉၶၢႆသင်လႆႈတေႉတေႉ”
“ၵဝ်တႄႉဝႃႈမၼ်းမီးၼမ်လိူဝ်မိူင်းထႆးၵွၼ်ႇ မိူင်းႁဝ်းၼႆႉ မီးႁေႈ၊ မီးၶမ်း၊ မီးသႅင်၊ မီးပႃႇမႆႉ ဢၼ်မီးၵႃႈမီးၶၼ်မၼ်းလၢႆလၢႆ”
“ၶွင်မၼ်းဢမ်ႇၸႂ်ႈၶွင်ႁဝ်းလႄႇ ၵူၼ်းမိူင်းႁဝ်းတႄႉ မီးၵႃႈၶႂ်ႈမီးၵူၺ်းဢိူဝ်ႈ ၸွင်ႇၶႅၼ်းၸႂ်ႈတႃႇႁဝ်းၵေႃႈဢမ်ႇၸႂ်ႈ တႃႇၵူၼ်းမီးငိုၼ်းၶဝ်ၵူၺ်းလူင်၊ တႃႇၵူၼ်းမီးဢႃႇၼႃႇၶဝ်ၵူၺ်းလူး”
“ၶွင်ႁဝ်းတမ်ႉဢမ်ႇမေႃထိင်းသိမ်းမၼ်းဝႆႉလူး ပၢႆႈပႅတ်ႈတိၵ်းတိၵ်းလႄႇ”
“ၵႃႈလႆႈပၢႆႈယူႇၵူၺ်းဢိူဝ်ႈ သူပ်းႁဝ်း တွင်ႉႁဝ်း ႁဝ်းလႆႈႁႃလဵင်ႉႁင်းၵူၺ်း ၵူၺ်းလူး လိူဝ်သေၼၼ်ႉသမ်ႉ သိုၵ်းသူၵေႃႈလႆႈလဵင်ႉပႃးထႅင်ႈႁေ ၵွပ်ႈတွင်ႉႁိူၼ်းႁဝ်းၼၼ်ႉ ႁဝ်းယူႇလႆႈယူႇၵူၺ်း ပႃးသိုၵ်းသူၼၼ်ႉယဝ်ႉ ၽႂ်ၵေႃႈၼႃႇၸႂ်ယူႇလေႃႇ၊ ထၢၼ်ႈဝႃႈၼၼ် မီးၶူဝ်းၶွင်ၵႃႈၶၼ်ယႂ်ႇပေႉတၢၼ်ႇၼၼ်ႉ ႁႅင်ႉသိုၵ်းသူသမ်ႉ ဢမ်ႇဢဝ်ၸိူဝ်းၼၼ်ႉမႃးလဵင်ႉၵၼ်လႃႇ တေမႃးႁႃယွၼ်းၵိၼ်ၵူၼ်းမိူင်းႁဵတ်းႁင်”
ဢၢႆႈၼူတ်ႇၵေႃႈ မႄးလၢတ်ႈၸိမ်ၸွမ်းထႅင်ႈ “ႁဝ်းၵူၼ်းမိူင်းတႄႉ ၸၢင်ႈဢဝ်ႁင်ၵႅတ်ႇၶႄ ပိူၼ်ႈဢဝ်ၵွင်ႈမႃးငႃၵေႃႈ ၵႃႈလႆႈလႅၼ်ႈပၢႆႈၵူၺ်းဢိူဝ်ႈ ၽႂ်ၵေႃႈၵူဝ်တၢႆယူႇလႄႇ သိုၵ်းၸိူင်ႉသူၼႆႉၵူၺ်းဢိူဝ်ႈ တၢၼ်ႇလီၵႅတ်ႇၶႄဢမ်ႇၸႂ်ႈႁႃႉ ပိူၼ်ႈၵူၺ်းမႃးဢဝ်ၵႂႃႇ တင်းလွႆတင်းလွႆ ၵူၼ်းမိူင်းသမ်ႉလႆႈၵေႃႈဢမ်ႇလႆႈသင်သေ ၶၢမ်ႇၶီႈသူမ်ႈမၼ်းယူႇတိၵ်းတိၵ်း ၼမ်ႉလိၼ်ႁိၼ်ၽႃလူႉၵွႆ သူၼ်ႁႆႈၼႃးလႆႈလူႉၵွႆသုမ်းယွၼ်ႉမၼ်း ၶၢဝ်းႁိုဝ်ႉၶၢဝ်းၾူၼ်မႃးၵေႃႈၼမ်ႉထူမ်ႈထႅင်ႈႁေ မိူဝ်ႈလႂ်ၵူၼ်းမိူင်းၼႆႉတေလႆႈယူႇသႃႇလႃႇ မီးသိုၵ်းယွၼ်ႉသင် ၵႅတ်ႇၶႄၽႅၼ်ႇလိၼ်ဝၢၼ်ႈမိူင်းတေႉယူႇႁႃႉ၊ ပၼ်လွင်ႈႁူမ်ႇလူမ်ႈၵူၼ်းမိူင်းလႆႈတေႉယူႇႁႃႉ”
“ႁႅင်းသိုၵ်းၼႆၵေႃႈ ပေႃးဢမ်ႇမီးၵူၼ်းမိူင်း ၸၢင်ႈတေၵႂႃႇဢဝ်တီႈလႂ်မႃးႁဵတ်းသိုၵ်း ၵူၼ်းၼုမ်ႇၵူၼ်းၵမ်ဢမ်ႇၶႂ်ႈႁဵတ်းသိုၵ်းၵေႃႈ သမ်ႉပၢႆႈတိၵ်းတိၵ်းလူး”
“ၽႂ်တေႁဵတ်းၶႂ်ႈႁဵတ်း ၵႂႃႇႁဵတ်းလုၵ်ႈၼွင်ႉပိူၼ်ႈ ပၼ်ပိူၼ်ႈၸႂ်ႉလဵၼ်ႈလၢႆလၢႆၵူၺ်း ၵႂႃႇႁဵတ်းၵၢၼ်မိူင်းထႆး ႁဵတ်းၶႃႈပိူၼ်ႈၵေႃႈတင်းလႆႈငိုၼ်းယူႇလႃႈ ႁဵတ်းၶႃႈၵူၼ်းလူင်သူ မီးႁင်”
“ၵဝ်ႁၼ် ပိူၼ်ႈၸႂ်ႉၵႂႃႇတၢင်းလႂ်ၵေႃႈၵႃႈလႆႈၵႂႃႇၵူၺ်းႁိုဝ်လႃႇ ၸႂ်ႉယူႇလႂ်ၵေႃႈယူႇ တေမႃးလႄႇမႃးၸႂ်းႁိူၼ်းၵူၺ်း တင်းလႆႈယွၼ်းၶႂၢင်ႉဢမ်ႇၸႂ်ႈႁိုဝ်”
“ပေႃးဢမ်ႇမီးသိုၵ်း တေဢဝ်သင်ထိင်းဝၢၼ်ႈထိင်းမိူင်းယဝ်ႉလႃႇ ပေႃးဢမ်ႇမီးသိုၵ်း ၶေး ႁိူၼ်းသူ ဝၢၼ်ႈသူ မိူင်းသူ ယူႇၼႆႉ ပိူၼ်ႈပေႃးဢဝ်ၵႂႃႇမူတ်းယဝ်ႉဢိူဝ်ႈ”
“ပဵၼ်ၼၼ်ၵေႃႈႁႂ်ႈမၼ်းပဵၼ်ယဝ်ႉလေႃႇ ၵွပ်ႈမီးသိုၵ်းမီးသိူဝ်လႄႈ ၵမ်းၵမ်းတိုၵ်းၵၼ်ႁေ ဢဝ်ဝၢၼ်ႈႁၢမ်းမိူင်းႁၢမ်းယူႇႁဵတ်းၼၼ်တိၵ်းတိၵ်းၵူၺ်း ၸိူင်ႉၼၼ်ပိူၼ်ႈႁွင်ႉဝႃႈထိင်းဝၢၼ်ႈထိင်းမိူင်းယူႇၵႃႈ”
“ၵႂႃႇယူႇမိူင်းပိူၼ်ႈတႄႉ မီးသုၼ်ႇလႆႈၵူႈမဵဝ်းမိူၼ်ယူႇမိူင်းႁဝ်းဝႆႉယူႇၼေႃႈ၊ ႁဵတ်းၵၢၼ်ႁိူဝ်ႇလႆၶႆးယွႆႉမႃးႁေ ပေႃးလူဝ်ႇၵႃႈဝတ်းၵႃႈဝႂ်မႃးၵေႃႈပၼ်ႁေ ၵႃႈႁွင်ႈၵေႃႈပၼ်ႁေ တီႈယူႇၵေႃႈၵိၼ်းၵိၼ်းၵႅပ်ႈၵႅပ်ႈ၊ ၶႂ်ႈၵိၼ်ဢမ်ႇလႆႈၵိၼ်လီလီ ၶႂ်ႈၼွၼ်းဢမ်ႇလႆႈၼွၼ်းလီလီ ပိူၼ်ႈဝႃႈႁိုဝ်ၵေႃႈလႆႈဝႃႈၼၼ်ၵူၺ်း၊ ဢမ်ႇပိူင်ႈႁင်ၵၼ်တင်းယူႇမိူင်းႁဝ်းၼင်ႇၵွၼ်ႇ လႆႈငိုၼ်းၵေႃႈ ငိုၼ်းၵူၺ်း ၵူႈလွင်ႈပဵၼ်ၶွင်ပိူၼ်ႈမူတ်းမူတ်းယဝ်ႉ ယူႇမိူင်းႁဝ်းတင်းမီးႁိူၼ်းမီးယေး မီးသူၼ်မီးၼႃးပဵၼ်ႁင်းႁဝ်းယူႇ တႃႉႁဵတ်းၶႃႈပိူၼ်ႈ တႃႉႁဵတ်းၵၢၼ်ပၼ်တႃႇမိူင်းႁဝ်းလႃႈ”
ဢၢႆႈၼူတ်ႇၵေႃႈ ၸွမ်းလူၺ်ႈလွင်ႈၶႂ်ႈႁူႉၶႂ်ႈႁၼ်ၼၼ်ႉသေ “ၵူၼ်းသိုၵ်းၼႆႉဢမ်ႇမိူၼ်ၵၼ်ႁႃႉမႂ်းဝႃႈ မၢင်ၵေႃႉၼႆႉမီးဝႃႈမီး ပေႃးလႄႇႁႃဢဝ်ငိုၼ်းၸႅၵ်ႇပိူၼ်ႈယူႇ မၢင်ၸိူဝ်းသမ်ႉ ပေႃးလႄႇလႆႈႁႃယွၼ်းၵိၼ်ပိူၼ်ႈယူႇလႃႇ ပိူၼ်ႈဢမ်ႇမႅင်ႇဢမ်ႇလဵင်ႉၵၼ်ႁႃႉၵဝ်ဝႃႈ”
“ၵူၼ်းသိုၵ်းၵေႃႈမိူၼ်ၵူၼ်းမိူင်းၵူၺ်းၼင်ႇၵွၼ်ႇဢိူဝ်ႈ ၽႂ်မေႃႁဵတ်းမေႃႁႃၵေႃႈမၼ်းလႆႈၸိူင်ႉၼၼ်ၵူၺ်းဢိူဝ်ႈ”
“ၵူၼ်းမိူင်းၼႆႉတင်းၶႅၼ်းယူႇ ၵူၼ်းသိုၵ်းသမ်ႉ ပေႃးႁဵတ်းၵၢၼ်ပၼ်ၶဝ် ၸွင်ႇလႆႈလၢႆးဝၼ်းႁိုဝ်လႃႇ”
“ၸူးဢဝ်ငိုၼ်းလိူၼ်ၼၼ်ႉၵူၺ်းဢိူဝ်ႈ”
“ႁူဝ်ၼႃႈမၼ်းၵူၺ်းလေႃႇမီးပေႃးၼၼ်”
“ၵဝ်ႁၼ်ဢၼ်ၵႆႉၵႂႃႇႁႃလႄႇၸွမ်းႁၢၼ်ႉမူၼ်ႈသိူဝ်း ၵႂႃႇပၼ်မႄႈယႃႈမႄႈယိင်းယူႇၸိူဝ်းၼၼ်ႉ ၵမ်ႈၼမ်ပဵၼ်ၵူၼ်းသိုၵ်းၵူၺ်းၵူၺ်း ပေႃးဝႃႈလွင်ႈႁူင်းႁဵၼ်းၼႆတႄႉ ဢမ်ႇမႃးလွမ်မႃးတူၺ်းသေဢိတ်း ၵႂႃႇယွၼ်းတၢင်းၸွႆႈထႅမ်ၶဝ် ၶဝ်တင်းပၢႆဝႃႈဢမ်ႇမီးငိုၼ်းၼႆႁိုဝ် ႁၼ်တႂ်ႈၼႃႈတႂ်ႈတႃဢိူဝ်ႈၼႆႉမႂ်း”
“ၵၢၼ်ၵူၼ်းတၢင်းၼမ်ႁႃႉ ၵၢၼ်ၵူၼ်းလူင်သူၵူၺ်းႁႃႉ ၸင်ႇလႂ်ဝႃႈဢမ်ႇမီးၽႂ်ၶႂ်ႈႁဵတ်းသိုၵ်းၼႆႉ မိူၼ်ၼႆဢိူဝ်ႈ”
“ပေႃးဝႃႈ သိုၵ်းဢမ်ႇလီဢမ်ႇလီ ၵူၼ်းလီလီသမ်ႉဢမ်ႇၶႂ်ႈႁဵတ်းသိုၵ်းၼင်ႇၵွၼ်ႇ ၵူၼ်းမီးပၺ်ႇၺႃႇတၢင်းႁူႉယႂ်ႇၸိူဝ်းၼႆႉသမ်ႉဢမ်ႇၶႂ်ႈႁဵတ်းလူႉ ပေႃးၼူၵ်ႇၼူၵ်ႇတိုဝ်တိုဝ် ၸင်ႇႁႂ်ႈမႃးႁဵတ်းသိုၵ်း သမ်ႉမႃးဝႃႈသိုၵ်းဢမ်ႇလီ ပေႃးဝႃႈမီးၵူၼ်းၵတ်ႉၵူၼ်းၶႅၼ်ႇမႃးႁဵတ်းၼႆ မၼ်းတိုၼ်းၵျႃႉယူႇယဝ်ႉလေႃႇ ၼႆႉၶွင် ပေႃးဝႃႈမီးတၢင်းႁူႉမီးၼမ်ႉၵတ်ႉမႃးၵေႃႈ ထၢင်ႇယႂ်ႇထၢင်ႇၶိုၵ်ႉလူင်ႁေ ႁဵတ်းၵၢၼ်ၵေႃႈဢမ်ႇမေႃၶဝ်ႈပိူၼ်ႈႁေ မၼ်းတေႁဵတ်းႁိုဝ်ၶိုၼ်ႈယႂ်ႇလႆႈမႂ်းဝႃႈ ပေႃးဢမ်ႇမီးၵူၼ်းၼူၵ်ႇတိုဝ်ယူႇၸိူင်ႉၼၼ် ဢမ်ႇမီးသိုၵ်းလႆႈယဝ်ႉဝႃႈ ၵမ်ႈၽွင်ႈၼႆႉ သိုၵ်းမႄးလႄႈပဵၼ်ၵူၼ်းလီမႃးၵူၺ်းဢိူဝ်ႈ”
ၽႂ်ၵေႃႈဝႃႈၽႂ်ထုၵ်ႇ ၽႂ်ၵေႃႈဝႃႈၽႂ်မႅၼ်ႈယဝ်ႉ ဢုပ်ႇၵၼ်လဝ်ႈပေႃးမူတ်း ၵႂၢမ်းတင်းပႆႇသဵင်ႈလႆႈၵွၼ်ႇယဝ်ႈ ၵူၼ်းမဝ်းလဝ်ႈၶဝ်ၼႆႉတႄႉ။
ၶူမ်ၽၢတ်ႇ
12/9/2026
