တီႈႁူင်းႁဵၼ်းၼႆၵေႃႈ မီးႁူင်းသဝ်းတွၼ်ႈတႃႇလုၵ်ႈဢွၼ်ႇ ၸိူဝ်းဢမ်ႇလႆႈယူႇၸွမ်းပေႃႈမႄႈ လႄႈ လုၵ်ႈဢွၼ်ႇ ဢၼ်ပေႃႈမႄႈဢမ်ႇပေႉလဵင်ႉလႆႈၼၼ်ႉၵေႃႈမီးယဝ်ႉ။ မၢင်ၸိူဝ်းၵေႃႈ ပေႃႈမႄႈလူႉသဵင်ႈၵႂႃႇပႅတ်ႈ မိူဝ်ႈပၢၼ်တႅပ်းသီႇတႅပ်းၼၼ်ႉသေ မႃးၸွမ်းသိုၵ်းလႄႈ တေဢဝ်ႁဵတ်းသိုၵ်းၵေႃႈဢသၢၵ်ႈတိုၵ်ႉလဵၵ်ႉၼႃႇၼႆသေ ယူႇဝႆႉတီႈႁူင်းသဝ်း မီးဝႆႉလုၵ်ႈႁဵၼ်းတင်းၼမ်ယူႇယဝ်ႉ။
ႁူင်းသဝ်းယိင်းၵေႃႈမီးႁင်းမၼ်း ႁူင်းသဝ်းၸၢႆးၵေႃႈမီးႁင်းမၼ်းၵူၺ်း။ ၸၢႆးၼုမ်ႇၼၼ်ႉသမ်ႉဝႃႈ 8 ၶူပ်ႇၵူၺ်းသေတႃႉ မၼ်းၵေႃႈပေႉတူဝ်ယူႇၽွင်ႈယဝ်ႉ ၼၢင်းသိုဝ်ႉလူႇၵေႃႈ ဢဝ်မႃးပွႆႇယူႇတီႈႁူင်းသဝ်းၼႆႉယဝ်ႉ။ ၼွင်ႉမၼ်းၼၢင်းၶမ်းမၢႆၼၼ်ႉတႄႉ တိုၵ်ႉၵေႃႉလဵၵ်ႉဝႆႉယူႇၼႆလႄႈ ယူႇၸွမ်းၼၢင်းသိုဝ်ႉလူႇၶဝ်တီႈႁိူၼ်းဝႆႉယဝ်ႉ ပေႃးပေႉတူဝ်လီလီယဝ်ႉၸင်ႇတေဢဝ်မႃးပွႆႇၼႆယူႇ။
−−−−−−−−−−−−−−−−−−−−−−−−−−−−−−−−−−−−−−−−−−
“ၼႄႈၸၢမ်ၽွင်း လႆႈလူယဝ်ႉၼႄႇၸိူင်းႁဝ်းတၢင်ႇယဝ်ႉဢိူဝ်ႈ တွၼ်ႈသိုပ်ႇမၼ်း”
“လူသုတ်းယဝ်ႉဝႃႈ”
“ပဵၼ်ႁိုဝ်ၽွင်ႈ”
“ၺႃတေလပ်းပႅတ်ႈယဝ်ႉဝႃႈ”
“သမ်ႉဝႃႈပိူၼ်ႈလပ်းလႆႈယူႇသေတႃႉ သူတႄႉဢမ်ႇပၼ်လပ်းလႆႈ”
“ပဵၼ်ႁင်လႄႈ”
“ပေႃးသူလပ်း ႁဝ်းသမ်ႉတေႁဵတ်းႁိုဝ်မီးႁႅင်းသိုပ်ႇထႅင်ႈယဝ်ႉလႃႇ ၵူၼ်းပၼ်ႁႅင်းႁဝ်းၼႆႉမီးသူၵူၺ်းဢိူဝ်ႈ”
“ႁဝ်းၵေႃႈၺႃးသူတဵၵ်းတဵင်ႁႂ်ႈမႃးပၼ်ႁႅင်းၵူၺ်းလူး”
“သူၸႂ်ႁၢႆႉ..ၸႂ်ႁၢႆႉၵေႃႈတိုၵ်ႉလီႁၵ်ႉယူႇ”
“တေလႆႈလူထႅင်ႈတွၼ်ႈသိုပ်ႇမၼ်းယူႇႁႃႉ”
“ဢမ်ႇသိုပ်ႇယဝ်ႉယူဝ်ႉ..ၶွင်သူဝႃႈၶႂ်ႈလပ်းၼႆ”
“သူဝႃႈ..လွင်ႈၽၢတ်ႇပေႃႈၽၢတ်ႇမႄႈၵႂႃႇၸဵမ်မိူဝ်ႈလဵၵ်ႉလဵၵ်ႉၼႆႉ မၼ်းပဵၼ်သၽႃႇဝၵူၼ်းမိူင်းႁဝ်းၵူၺ်းႁႃႉ”
“ဢမ်ႇႁူႉၼႃ ႁဝ်းၵေႃႈယၢမ်ႈႁဵတ်းၸဝ်ႈသၢင်ႇသေ ၵႂႃႇယူႇၵျွင်းမိူင်းမၢၼ်ႈၸဵမ်မိူဝ်ႈၵေႃႉလဵၵ်ႉယဝ်ႉ မွၵ်ႈပႅတ်ႇၵဝ်ႈၶူပ်ႇၼႆႉ”
“ဢမ်ႇၸႂ်ထိုင်ႁိူၼ်းၵွၼ်ႇႁႃႉ..”
“မၢင်ပွၵ်ႈၵေႃႈၸႂ်ထိုင်ယူႇ ၵူၺ်းၵႃႈ ဢမ်ႇမီးႁဝ်းၵူၺ်း မီးၸဝ်ႈသၢင်ႇတင်းၼမ်ယဝ်ႉယူႇၸွမ်းၵၼ် မၢင်ၵေႃႉတင်းလဵၵ်ႉလိူဝ်ႁဝ်း မွၵ်ႈႁူၵ်းၶူပ်ႇၼႆႉၵူၺ်းၵေႃႈမီးဢိူဝ်ႈ”
“ပေႃႈမႄႈပေႉပွႆႇၵႂႃႇလႆႈၼေႃ”
“ၶဝ်ၵေႃႈၶႂ်ႈႁႂ်ႈႁဝ်းလႆႈႁဵၼ်းလိၵ်ႈၸဵမ်လဵၵ်ႉၼၼ်ႉၼႃႇ ယဝ်ႉၵေႃႈယူႇၵျွင်း ဢမ်ႇလႆႈသဵင်ႈၵႃႈသွၼ်လိၵ်ႈၵေႃႈပႃးယူႇဢိူဝ်ႈ။ ၼႃႈႁိူၼ်းႁဝ်းၵေႃႈၵိၼ်းယူႇ ႁဝ်းမီးပီႈၼွင်ႉႁူၵ်းၵေႃႉ ႁဝ်းပဵၼ်ၼွင်ႉၵေႃႉထီႉသၢမ် လႆႈယူႇၵျွင်းသေမေႃလိၵ်ႈဢိူဝ်ႈ၊ ပီႈဢၢႆႈႁဝ်းၵေႃႈ ပေႃးပေႉတူဝ်ၼႆလႆႈၸွႆႈပေႃႈမႄႈႁဵတ်းၵၢၼ်ယဝ်ႉၼႃႇ ပီႈၼၢင်းႁဝ်းၵေႃႈၵုမ်ႇလႆႈဢဝ်ၼွင်ႉၵူၺ်း၊ ၸဵမ်မိူဝ်ႈႁဝ်းတွင်းၵႂၢမ်း မီးမၼ်းၵူၺ်းၼႃႇလဵင်ႉႁဝ်းတင်းၼွင်ႉႁဝ်း ဢူႈမႄႈႁဝ်းတႄႉၵေႃႈၵႂႃႇႁဵတ်းၵၢၼ်ၵူၺ်း”
“ပီႈၼၢင်းၵေႃႈမိူၼ်မႄႈယဝ်ႉပေႃးၼႆ”
“ၸႂ်ႈယဝ်ႉဝႃႈ”
“ႁဝ်းၵေႃႈ ၸဵမ်မိူဝ်ႈႁဝ်းၵႂႃႇႁူင်းႁဵၼ်းလႆႈယဝ်ႉ ပေႃႈမႄႈၵေႃႈဢမ်ႇပေႃးသူႈယူႇႁိူၼ်း ၵႂႃႇႁဵတ်းၵၢၼ်တၢင်းဝၼ်းတၢင်းဝၼ်းယဝ်ႉ မၢင်ပွၵ်ႈပေႃးဢမ်ႇလပ်းသိင်ႇတင်းဢမ်ႇမႃးႁႃႁိူၼ်းၵွၼ်ႇဢိူဝ်ႈ” ယဵၼ်ၵႂႃႇၵႅပ်ႉၼိုင်ႈသေ “ၶႅၼ်းယူႇ ၶဝ်တင်းပၼ်ႁႂ်ႈႁဝ်းလႆႈၶိုၼ်ႈႁဵၼ်းတေႃႇပေႃးယဝ်ႉလႆႈ”
“ၼႃႈႁိူၼ်းလႂ်ႁိူၼ်းၼၼ်ႉႁူႉမီးပၼ်ႁႃယူႇၽႂ်မၼ်းယဝ်ႉ”
“ၵၢၼ်တေႇၼႃႈႁိူၼ်းၶဝ်ပေႉမႃးငၢႆႈၼေႃသူဝႃႈ”
“သူၶႂ်ႈတေႇတင်းႁဝ်းၸိူင်ႉၼၼ်ၵေႃႈလႆႈယူႇၼႃ”
“ယႃႇမႃးႁႃၶႂ်ႈၵဝ်းယူႇၼႆႉ”
“မၢင်ပွၵ်ႈတၢင်းႁၵ်ႉဢၼ်ဝႃႈၼၼ်ႉ ဢမ်ႇလူဝ်ႇလႆႈလၢတ်ႈဢွၵ်ႇမႃးတင်းသဵင်ႈတင်းမူတ်းၵေႃႈလႆႈလူး မၢင်ၽၢဝ်ႇမၼ်းဢမ်ႇလႆႈမီးတီႈသူပ်းၵူၺ်း မၼ်းမီးတီႈလွင်ႈႁဵတ်းသၢင်ႈၵူၺ်းၵေႃႈပဵၼ်လႆႈယူႇ မၢင်ပွၵ်ႈၼႆႉ သူပ်းဢမ်ႇမိူၼ်ၵၼ်တင်းၸႂ်ၵေႃႈယင်းမီးလူး”
“ႁဝ်းတႄႉသူပ်းလၢတ်ႈၵေႃႈၸႂ်ၸွမ်းယဝ်ႉ ပေႃးဝႃႈဢမ်ႇၵေႃႈဢမ်ႇၵူၺ်း”
“သူပေႉမႃးလီတေႃႇႁဝ်းလႃႇဢေႉ”
“ႁဝ်းလီတေႃႇၵူႈၵေႃႉယဝ်ႈ သူၼႃႈလိူမ်ႈသေပိူၼ်ႈၵူၺ်း”
“ၶႂ်ႈဝႃႈႁဝ်းပဵၼ်ၵူၼ်းဢမ်ႇမိူၼ်ပိူၼ်ႈဝႆႉဢိၼ်ႉၼေႃႈ”
