ပေႃးႁူဝ်ၶမ်ႈႁူဝ်ၶမ်ႈႁူၵ်းမူင်းမႃးၼႆ ႁိူၼ်းၽႂ်ႁိူၼ်းမၼ်း ဢွၼ်ၵၼ်ပူၵ်းလၵ်းဢွၼ်ႇ ဢၼ်မီးယူႇတီႈရေႇတီႇယူဝ်ႇၼၼ်ႉသေ ႁႃလႅင်းမၼ်းယဝ်ႉ ပႂ်ႉထွမ်ႇၶၢဝ်ႇထွမ်ႇငၢဝ်း တီႈႁူင်းပွႆႇသဵင်ၶဝ်ပိုၼ်ၽႄႈဢွၵ်ႇၵႂႃႇၼၼ်ႉယဝ်ႉ။
ၶၢဝ်ႇဢၼ်ၵႆႉၵႆႉလႆႈငိၼ်းၵမ်ႈၼမ်ၵေႃႈ လွင်ႈသိုၵ်းမၢၼ်ႈပေႉၵိၼ်ၵူၼ်းမိူင်း ၺွပ်းၵိၼ်ဢဝ်လၢႆၶူဝ်းၶွင်ၵူၼ်းမိူင်းလႄႈ လွင်ႈပၢင်တိုၵ်းသိုၵ်းတႆးသိုၵ်းမၢၼ်ႈၸိူဝ်းၼႆႉယဝ်ႉ။
တီႈၼႂ်းၽိူၼ်မူႇၶဝ်ႈ ၼႂ်းႁိူၼ်းၼၼ်ႉ လိူဝ်သေၵူၼ်းလူင်ယဝ်ႉ မီးလုၵ်ႈဢွၼ်ႇၼၢႆးၸိင်ႇထႅင်ႈယူႇ၊ လုၵ်ႈဢွၼ်ႇၵိၼ်ၶဝ်ႈယဝ်ႉသေ ၵိုတ်းၵူၼ်းလူင်ၵူၺ်းလႄႈ
“ၶိူဝ်သွင်ၵေႃႉ ဢဝ်ၵၼ်ႁေဢမ်ႇလီႁိုဝ်” ၼၢႆးၸိင်ႇလၢတ်ႈၸူးၵႂႃႇ။
ၵမ်းၶဝ်ႈၸဝ်ႈပိုၼ်းႁၢၼ်သမ်ႉပေႃးၵႅၼ်ႉဢွၵ်ႇမႃး၊ ၼၢင်းသိုဝ်ႉလူႇၵေႃႈ ပေႃးဢမ်ႇပဵၼ်ၵဵဝ်ႉၶဝ်ႈလႆႈယဝ်ႉ။
“ဝႃႈႁိုဝ်လႃႇ ၸဝ်ႈ..” ၸဝ်ႈၸႃႇလိင်ႇယၵ်ႉတူၺ်းသေ
“ပေႃးၼၢင်းသိုဝ်ႉလူႇႁဝ်းၽွမ်ႉယူႇတေႉၵေႃႈ ၶႃႈတေႁႂ်ႈၵူၼ်းလူင်ၶဝ်မႃးထၢမ်လႆႈယူႇ”
“ဢီႇလူႇလူး..”
“ဢိုမ်ႈ..”
ၵမ်းၶဝ်ႈပႆႇတၼ်းဢိမ်ႇ ၸဝ်ႈပိုၼ်းႁၢၼ်ၵေႃႈၼႅတ်ႈမိူဝ်းလၢတ်ႈၵူၼ်းလူင်ၶဝ် မႃးထၢမ်ၶမ်ႈၼၼ်ႉၵမ်းလဵဝ်။ ၼၢႆးမူၼ်းၶဝ်ၽူဝ်မေး ဢၼ်ပဵၼ်ပီႈၼွင်ႉၽၢႆႇၼၢင်းသိုဝ်ႉလူႇၵေႃႈ ဢွၼ်ၵၼ်မႃးယဝ်ႉ။ ဢဝ်မွၵ်ႇယႃႈၶဝ်ႈတႅၵ်ႇသေ ထၢမ်ဢဝ်မိူဝ်းၵႂႃႇၶမ်ႈၼၼ်ႉၵမ်းလဵဝ်။
ပဵၼ်သိုၵ်းၼႆ တေဢဝ်ငိုၼ်းဢဝ်ၶမ်းတီႈလႂ်မႃးတွင်ႈမႃးထၢမ်လႃႇ ငိုၼ်းႁွမ်ငိုၼ်းၵဵပ်းဢွၼ်ႇဢိတ်းၼိုင်ႈၼၼ်ႉ ဢဝ်မႃးတၢင်ႇၽိူၼ်သေ လႆႈမေးမိူဝ်းၵႂႃႇႁေယဝ်ႉ။
ပေႃးဝႃႈသွင်ၶႃဢဝ်ၵၼ်မႃးယဝ်ႉၼႆၵေႃႈ ပိူၼ်ႈၵေႃႈႁဵတ်းပၼ်ႁိူၼ်းသုမ်ႉၶႃးၶႃလင်ၼိုင်ႈယဝ်ႉ။ ၵဝ်ၸွႆႈမႂ်းၸွႆႈၵၼ် မႅၵ်ႇမႆႉတႅပ်းၶႃးမႃးယဝ်ႉၵေႃႈ ၵူၼ်းၼမ်ၵူၼ်းလၢႆ မၢင်ၵေႃႉပူၵ်းသဝ်ႁဵတ်းၵွၼ် မၢင်ၵေႃႉၽႆးၶႃး၊ မၢင်ၵေႃႉသၢၼ်ၽႃ ဝၼ်းၼိုင်ႈသွင်ဝၼ်းၵေႃႈယဝ်ႉၵႂႃႇ။
ၶႃးဢၼ်မုင်းၼၼ်ႉတႄႉ ဢမ်ႇၸႂ်ႈၶႃးသႂ် ပဵၼ်ၶႃးၵေႃႉ ဢဝ်တွင်ၵေႃႉသေမႃးသၢၼ်ႁဵတ်းယဝ်ႉ။ ၸွမ်းထိူၼ်ႇၸွမ်းလွႆ တွင်ၵေႃႉလိူင်ႇၼႃႇလႄႈ ၽၼ်းပွမ်ႈႁေတူၼ်ႈၼိုင်ႈၵူၺ်းၵေႃႈ လႆႈႁိူၼ်းၼိုင်ႈလင်ယဝ်ႉၼႃႇ။
တႃႇၼႃႇႁိူၼ်းသွင်ၶႃ ပေႃးတေမီးငိုၼ်းၶဝ်ႈၼႆၵေႃႈ ႁဵတ်းႁႃၸွႆႈၵၼ်ၵႂႃႇ လုၵ်ႉတီႈၵူၼ်းလွတ်ႈလႅဝ်း ဢမ်ႇမီးႁိူၼ်းမီးယေး ပိုင်ႈဢိင်ယူႇသဝ်းၸွမ်းပိူၼ်ႈၵူၺ်းၼၼ်ႉ ယၢမ်းလဵဝ်ၵေႃႈ လႆႈတေႇၼႃႈႁိူၼ်းမီးၽူဝ်သေ ၼၢင်းသိုဝ်ႉလူႇၼႆၵေႃႈ မႃးႁဵတ်းၵႃႉႁဵတ်းၶၢႆတၢင်းၶၢႆဢွၼ်ႇမၼ်းတီႈႁိူၼ်းၶဝ်ၼၼ်ႉယဝ်ႉ။
ႁဵတ်းတၢင်းၶၢႆတေႃႇၵူၼ်းသိုၵ်းၼႆၼၼ်ႉ လႆႈၶၢႆယူႇဢိူဝ်ႈ ၵူၺ်းၵႃႈ ဢၼ်လႆႈငိုၼ်းၼၼ်ႉမီးၵမ်ႈဢေႇၵူၺ်း၊ ႁႂ်ႈဝႃႈလႆႈဢလၢင်းၼႆၵေႃႈ တွၼ်းႁေဝႃႈႁဵတ်းၵိၼ်ႁႃၵိၼ်ၵႂႃႇၵူၺ်း။ ၵမ်ႈၽွင်ႈဢမ်ႇမီးငိုၼ်းၵေႃႈ ၶႂ်ႈၵိၼ်ၵေႃႈ ၸိုၵ်းၵိၼ်ဢဝ်ၵိၼ်ႁဵတ်းၼၼ်တိၵ်းတိၵ်း။ ႁိုင်မႃးၵူၼ်းထုၵ်ႇၼီႈၼမ်မႃးသေ ပေႃးၼီႈၼမ်ယဝ်ႉ မၢင်ၸိူဝ်းဢမ်ႇတၼ်းလႆႈတႅၼ်းသေပၢႆႈပႅတ်ႈၼႆၵေႃႈ မီးတင်းၼမ်ယူႇ။
ဝၢႆးသေတႄႇၼႃႈႁိူၼ်းၸွမ်းၵၼ်ဢမ်ႇႁိုင် လွင်ႈဢၼ်ပၼ်တၢင်းမႆႈလူင်ၼၼ်ႉ မႃးထိုင်ၼႂ်းၸႂ်ၼႆႉယဝ်ႉၼႃႇ။
“သူ..ပီႈဢၢႆႈႁဝ်းလူႉယဝ်ႉဢိူဝ်ႈ”
သဵင်ယဵၼ်ထွမ်ႇသဵင်ဢိုတ်ႇႁႆႈၼၼ်ႉယဝ်ႉသေ
“ၸွင်ႇတေမိူဝ်းယူႇႁႃႉ..ပေႃးသူၶႂ်ႈမိူဝ်းၵေႃႈမိူဝ်းလႄႈၼႃႈ”
“ႁဝ်းဝႃႈႁဝ်းတေမိူဝ်းတူၺ်း တၢင်းပုၼ်ႉၵေႃႈႁမ်ႉမီးလုၵ်ႈဢွၼ်ႇမၼ်းသွင်ၵေႃႉဢိူဝ်ႈၼၼ်ႉ မႄႈၶဝ်သမ်ႉတေၼႃႈႁိူၼ်းပႅတ်ႈႁေ ပေႃးၶႃၶႂ်ႈမႃး တေဢဝ်မႃးယူႇၸွမ်းတီႈၼႆႈၼႆဢိူဝ်ႈ သူတေဝႃႈႁိုဝ်”
“လႆႈဢိူဝ်ႈ ဢဝ်သူဝႃႈၵူၺ်း”
ၶမ်ႈၶိုၼ်းလပ်းသိင်ႇယူႇၼၼ်ႉ သမ်ႉဝႃႈတေမိူဝ်းႁိူၼ်းသေတႃႉ ၶၢဝ်းတၢင်းတႃႇတေမိူဝ်းၼၼ်ႉၵေႃႈ ဢမ်ႇၸႂ်ႈငၢႆႈလႄႈ တေႁဵတ်းႁိုဝ်ၵေႃႈဢမ်ႇႁူႉယဝ်ႉ။
ထိုင်ၼင်ႇၵၢင်ၼႂ်မႃး ၼၢင်းသိုဝ်ႉလူႇၵေႃႈ ဢဝ်တင်းၶမ်းဢၼ်မၼ်းၵဵပ်းႁွမ်ဝႆႉ ၸဵမ်မိူဝ်ႈယူႇမိူင်းထႆးၼၼ်ႉ ၵႂႃႇၶၢႆပၼ်ပႃႈၶမ်းၶဝ်သေယဝ်ႉ ဢမ်ႇမီးဢၼ်ၸင်ႈမၼ်းလႄႈ ဢဝ်သၢႆတႃတူၺ်းသေ ဢၼ်ယၢမ်ႈသိုဝ်ႉယၢမ်ႈၶၢႆၼၼ်ႉ မႃးၼပ်ႉသွၼ်ႇပၼ်ၵၼ်ၵႂႃႇၸိူင်ႉၼၼ်ၵူၺ်း။
လႆႈငိုၼ်းမႃးယဝ်ႉ ၼင်ႇၵၢင်ၼႂ်ၵေႃႈ တင်းၶူဝ်းတင်းလဵင်းသေ ဢွၵ်ႇမိူဝ်းၵႂႃႇၸွမ်းၵႃးၵႂႃႇလွႆးလွႆးယဝ်ႉ။
ၶၢဝ်းတၢင်းမိူဝ်ႈပၢၼ်ၼၼ်ႉ ပဵၼ်တၢင်းလိၼ်ၵူၺ်းလႄႈ တၢင်းလုၵ်းတၢင်းသွင်ႉ မၢင်တီႈၵႃးဢမ်ႇထိုင် မၢင်တီႈလႆႈပႆၵေႃႈပႆၵႂႃႇယဝ်ႉ။ ဢမ်ႇထၢင်ႇဢမ်ႇႁူႉသင်သေ ၼႂ်းတွင်ႉၼၼ်ႉၵေႃႈ မီးလုၵ်ႈဢွၼ်ႇယူႇဝႆႉယဝ်ႉၼႃႇ။
ၶၢဝ်းတၢင်းမိူဝ်းၵႂႃႇၼၼ်ႉမဝ်းပၼ်ၵႃးၼႆႉၶၢၼ်ၸႂ်ယူႇၵေႃႈ ၵႃႈပႆႇထိုင်ပဝ်ႉမၢႆၼၼ်ႉ ႁူႉၵႃႈတေလႆႈ သိုပ်ႇလတ်းၶၢမ်ႈၵႂႃႇ ႁႂ်ႈပေႃးထိုင်တီႈယူႇဢိူဝ်ႈ။
ပွၵ်ႈႁွတ်ႈထိုင်ၶိုၼ်း ဝၢၼ်ႈၵိူတ်ႇမိူင်းလင် ႁိူၼ်းသဝ်းတီႈယၢမ်ႈယူႇ ပဵၼ်ႁူၵ်ႉပဵၼ်ႁၢမ်းလူင်ၵႂႃႇမူတ်း မီးတူၼ်ႈမၢၵ်ႇမူင်ႈမၢၵ်ႇလၢင်း ႁဵတ်းသၢၵ်ႈသေႇဝႆႉၵူၺ်းဝႃႈ ၼၼ်ႉမၼ်းယၢမ်ႈပဵၼ်ဝၢၼ်ႈၵူၼ်းယူႇၼႆ။ ပီႈၼွင်ႉဢၼ်ယၢမ်ႈႁူပ်ႉယၢမ်ႈႁၼ်ၼႆၵေႃႈ လူႉသဵင်ႈတၢႆၽၢတ်ႇၵၼ်ၵႂႃႇလၢႆၵေႃႉလၢႆၵူၼ်းယဝ်ႉ။ ဝၢၼ်ႈမူၼ်းၵူၼ်းၵိုၼ်းယၢမ်းၼၼ်ႉ ႁၢင်ႇႁၢႆၵႂႃႇ ၵိုတ်းႁိူၼ်းဢမ်ႇႁူႉလၢႆလင်ၵူၺ်းယဝ်ႉ။
