တီႈၼႂ်းႁွင်ႈပၢင်ၵုမ် သဵင်ၾူၼ်းငိုၼ်းသႅင်မေႃးမႃးလႄႈ ၸွမ်သႅင်ႁပ်ႉယဝ်ႉ ၼႅတ်ႈၵိုတ်းပၢင်ၵုမ်သေ ဢွၵ်ႇႁွင်ႈပၢင်ၵုမ်ၵႂႃႇဝႆးဝႆးယဝ်ႉၼႃႇ။
ၵူၼ်းၼႂ်းဝၢၼ်ႈၵေႃႈဢွၼ်ၵၼ်မႃးၸွႆႈမႃးထႅမ်ၵၼ် မိူဝ်ႈဝႃးတိုၵ်ႉပဵၼ်ပၢင်ၶႅၵ်ႇယူႇၵေႃႈ မိူဝ်ႈၼႆႉတႄႉ ပဵၼ်ပၢင်မႃႇသႃႇၵႂႃႇယဝ်ႉ။ ငိုၼ်းသႅင်တႄႉဢမ်ႇႁူႉတေႁဵတ်းသင်ယဝ်ႉ ၼင်ႈသေႁႆႈယူႇၸိူင်ႉၼၼ်ၵူၺ်း။ ၸွမ်သႅင်ၵေႃႉၸတ်းၵၢၼ်ပၼ်ၵႂႃႇမူတ်း ၼင်ႇဝႃႈမၼ်းယၢမ်ႈထူပ်းမႃးၼၼ်ႉယူႇ။ ၵူၼ်းတီႈႁဵတ်းၵၢၼ် ဢၼ်မိုတ်ႈမိုတ်ႈၵေႃႈ ဢွၼ်ၵၼ်မႃးၸွႆႈမႃးထႅမ်ၵၼ်ၵႂႃႇ။
ၶိူဝ်းႁွမ်ၼၼ်ႉတႄႉၵေႃႈ ၵုမ်ႇလုမ်းလႃးငိုၼ်းသႅင်ယူႇၵူၺ်း ဢမ်ႇပဵၼ်ၵႂႃႇႁဵတ်းႁင်လႆႈယဝ်ႉ။ ငိုၼ်းသႅင်ၵေႃႈ ပေႃးတိုၼ်ႇမႃးယဝ်ႉ ႁႆႈ ႁႆႈယဝ်ႉ ၵိၼ်လဝ်ႈ ၵိၼ်လဝ်ႈယဝ်ႉၼွၼ်း ပၼ်ႇတူင်ႇယူႇႁဵတ်းၼၼ်၊ တေႃႇမႃႇသႃႇပေႃးယဝ်ႉ မၼ်းၵေႃႈဢမ်ႇႁူႉတူဝ်၊ ဝၢႆးသေမႃႇသႃႇယဝ်ႉၵႂႃႇ တီႈႁိူၼ်းယိင်ႈၶႅၼ်းငဝ် ဢမ်ႇမီးၽႂ်သေဢိတ်းယဝ်ႉလႄႈ ၵိုတ်းၸွမ်သႅင်လႄႈတင်းငိုၼ်းသႅင်ၵူၺ်းယဝ်ႉၼႃႇ။
ၸွမ်သႅင်လႆႈႁၼ်ႁၢင်ႈၽၢင်ငိုၼ်းသႅင်ပဵၼ်ၸိူင်ႉၼၼ်ၵေႃႈ သမ်ႉပေႃးဢမ်ႇယၵ်ႉတူၺ်းလႆႈသေဢိတ်းယဝ်ႉ၊ ဢမ်ႇထၢင်ႇမၼ်းတေပဵၼ်ၸိူင်ႉၼႆလႆႈ။ မိူၼ်ပေႃႈတေႁူႉဝႃႈ သင်ဢမ်ႇမီးပေႃႈယဝ်ႉ မၼ်းတေပဵၼ်ၸိူင်ႉၼႆလႄႈ ၸင်ႇလႆႈလၢတ်ႈ ၸွမ်သႅင်ႁႂ်ႈတူၺ်းထိုင်လုမ်းလႃးမၼ်းဝၢႆးပေႃႈၽၢတ်ႇၵႂႃႇယဝ်ႉၼၼ်ႉယူႇ။
ၼႂ်းၸူဝ်ႈၸၢတ်ႈပၢၼ်မၼ်း ယိူင်းဢၢၼ်းမၼ်းၼၼ်ႉ ႁဵတ်းတွၼ်ႈတႃႇပေႃႈၼႆတႃႇသေႇ မိူဝ်ႈဢမ်ႇမီးပေႃႈယဝ်ႉၼၼ်ႉ ၵူႈလွင်ႈၵေႃႈလႆႈလူႉလႅဝ်ၵႂႃႇမူတ်း ဢမ်ႇမီးႁႅင်း ဢမ်ႇမီးသင်တႃႇတေၸၼ်ဢဝ်ၸၢတ်ႈပၢၼ်ယူႇၵႂႃႇထႅင်ႈ မၼ်းသုတ်းသဵင်ႈယဝ်ႉ ဢမ်ႇမီးသင်ယဝ်ႉ။ မီးၸၢတ်ႈပၢၼ်ၵႂႃႇၵေႃႈ ဢမ်ႇမီးတီႈပွင်ႇသင်ယဝ်ႉ။
“လုၵ်ႉမႃးၵိၼ်ၶဝ်ႈၵွၼ်ႇလႄႈသူ”
ၸွမ်သႅင်ၽုၺ်ႇႁွင်ႈသေ ႁၼ်မၼ်းၼွၼ်းယူႇၸိူင်ႉၼၼ် ဢမ်ႇလႆႈငိၼ်းသဵင်တွပ်ႇၸူးၶိုၼ်း။
ၸူဝ်ႈၼိုင်ႈ “ႁဝ်းၵႂႃႇႁဵတ်းၵၢၼ်ၵွၼ်ႇယဝ်ႉၼႃႈ” မၼ်းၵေႃႈဢမ်ႇတွပ်ႇသင်ၶိုၼ်း။
ယွၼ်ႉမီးငိုၼ်းသႅင်ယူႇလႄႈ ၸွမ်သႅင်ၵႂႃႇႁဵတ်းၵၢၼ်ၼႆၵေႃႈ ၵႃႈလႆႈပွၵ်ႈမႃးတူၺ်းငိုၼ်းသႅင်တီႈႁိူၼ်းယဝ်ႉ။ မႃးထိုင်ႁိူၼ်းၶိုၼ်း ၶဝ်ႈၽၵ်းဢၼ်ႁဵတ်းဝႆႉၵၢင်ၼႂ်ၼၼ်ႉၵေႃႈ ယင်းတိုၵ်ႉမိူၼ်ၵဝ်ႇယူႇလႄႈ မၼ်းၵေႃႈၶဝ်ႈၵႂႃႇၼႂ်းႁွင်ႈ တိုၵ်ႉႁၼ်ငိုၼ်းသႅင်ၼွၼ်းဝႆႉယူႇ၊ ဢမ်ႇပေႃးမၼ်ႈၸႂ်လႆႈယဝ်ႉ ဢဝ်မိုဝ်းမၼ်းတိုဝ်ႉသႂ်ႇတီႈၶူႈၼင်ယဝ်ႉ တိုၵ်ႉထူၺ်ႈၸႂ်ယူႇလႄႈ ၸၼ်ၶႅၼ်ငိုၼ်းသႅင်လုၵ်ႉမႃးယူႇ။
“တေပၼ်ႁႂ်ႈသူယူႇတီႈၼႆႈဢမ်ႇလႆႈယဝ်ႉ”
ႁွပ်ႇဢုမ်ႈဢဝ်ငိုၼ်းသႅင် သႂ်ႇၼႂ်းၵႃးယဝ်ႉ၊ ၵဵပ်းၶူဝ်းၵဵပ်းလဵင်းသေ ဢွၼ်ပွၵ်ႈမိူဝ်းတီႈယူႇမၼ်းၵႂႃႇ။
သမ်ႉဝႃႈၶၢႆႉတီႈယဝ်ႉၼႆၵေႃႈ ဢမ်ႇႁၼ်ဝႃႈမၼ်းတေလီမႃး ၵူႈဝၼ်းဝၼ်းၵုမ်ႇၼွၼ်းယူႇၸိူင်ႉၼၼ်တိၵ်းတိၵ်းၵူၺ်း။ သမ်ႉပေႃးဢဝ်ၸွမ်သႅင်သဵင်ႈၸႂ်ၵႂႃႇယူႇ ဢမ်ႇႁူႉတေလႆႈႁဵတ်းၸိူင်ႉႁိုဝ်တီႈမၼ်းယဝ်ႉ။
မီးယူႇၶမ်ႈၼိုင်ႈ ၸွမ်သႅင်ပွၵ်ႈႁိူၼ်းမႃးလိုၵ်းဝႆႉလႄႈ တူၺ်းငိုၼ်းသႅင်ဢမ်ႇႁၼ်ယဝ်ႉသေ ဢဝ်မၼ်းတူၵ်းၸႂ်မႆႈၸႂ်ၵႂႃႇႁႅင်းတႄႉတႄႉ ၼႅတ်ႈဢွၵ်ႇၸွမ်းႁႃထၢမ်ၵူၼ်းႁိမ်းႁွမ်းၸိူဝ်းၼၼ်ႉယူႇ။
“ႁၼ်မၼ်းၵႂႃႇတၢင်းၶူဝ်ပုၼ်ႉ”
မိူဝ်ႈငိၼ်းၼင်ႇၼၼ် ၼႂ်းၸႂ်ၵိုင်ႉၵၢင်ႉသၼ်ႇဝႆ တၢင်းဝႆးမၼ်းၼၼ်ႉသမ်ႉပေႃးၶႂ်ႈဝႆးၵႂႃႇလူတ်ႉလႅၼ်ႈၵွၼ်ႇယဝ်ႉၼႃႇ။ မုင်ႈႁၼ်ငိုၼ်းသႅင်ပႆလူင်ၵႂႃႇပေႃးဢမ်ႇၵိုတ်း ပႆလူင်ၵႂႃႇၼႂ်းၵၢင်တၢင်းလူင် သမ်ႉပေႃးဢမ်ႇၵူဝ်လူတ်ႉၵူဝ်ၵႃးသေဢိတ်း ပႆလွႆးလွႆးတၢၼ်ႇၵူၼ်းဢမ်ႇမီးဢဵၼ်မီးႁႅင်းသင်ၼၼ်ႉယဝ်ႉ၊ ၶႅပ်းတိၼ်ၵေႃႈဢမ်ႇသႂ်ႇ။ သဵင်ႁွၼ်းၵႃးလင် ၾႆးၵႃးမႅပ်ႈႁိူဝ်ႈယူႇၵေႃႈ ၼင်ႇဢမ်ႇလႆႈငိၼ်းသဵင်မၼ်းသေဢိတ်းယဝ်ႉ။
ၸွမ်သႅင်ၼႅတ်ႈလႅၼ်ႈၸၼ်ဢဝ်မၼ်းဢွၵ်ႇၼွၵ်ႈတၢင်း သမ်ႉပေႃးလူမ်ႉထူလူင်ၵႂႃႇၸွမ်းၵၼ်ယဝ်ႉၼႃႇ။
“ပေႃႈသူႁႂ်ႈသိုပ်ႇယူႇဢိူဝ်ႈ ဢမ်ႇၸႂ်ႈႁႂ်ႈသူမႃးပဵၼ်ၸိူင်ႉၼႆ”
“ႁဝ်းၸႂ်ထိုင်ပေႃႈ” ႁႆႈဢွၵ်ႇမႃးတီႈၼၼ်ႈႁေယဝ်ႉ ၸွမ်သႅင်ၵေႃႈ ၵွတ်ႇဢဝ်မၼ်းဝႆႉသေ လုပ်ႈလင်မၼ်းလွႆးလွႆးယဝ်ႉ ထွမ်ႇသဵင်ႁႆႈမၼ်းၵႂႃႇ တေႃႇမၼ်းပေႃးယဵၼ်။
ၸွမ်သႅင်ဢၢင်ႈလုၵ်ႉ ဢမ်ႇလုၵ်ႉလႆႈယဝ်ႉလႄႈ ဢဝ်ၶႃမၼ်းၸဵပ်းၵႂႃႇသေ ငိုၼ်းသႅင်လႆႈၽႃၽိူဝ်းမၼ်းမိူဝ်းၵႂႃႇ။
“ပေႃးတေမႃးၸဵပ်းၸိူင်ႉၼႆ ဢမ်ႇလူဝ်ႇၸွႆႈႁဝ်းၵေႃႈလႆႈ”
“သူထုၵ်ႇၼီႈႁဝ်းဝႆႉယူႇ ပႆႇလႆႈသၢႆႈတႅၼ်းၼၼ်ႉၼႃႇ”
“မွၵ်ႈႁိုဝ်ၸွင်ႇတေသၢႆႈတႅၼ်းလႆႈ”
“မီးသၢႆၸႂ်ယူႇၵႂႃႇလႄႈ သင်ဢမ်ႇသင်သူမီးႁဝ်းယူႇၼႃႈ”
“မိူဝ်ႈလဵဝ် ဢမ်ႇမီးပေႃႈယဝ်ႉ ႁဝ်းလႄႈသူၵေႃႈ ဢမ်ႇၸႂ်ႈၽူဝ်မေးၵၼ်ယဝ်ႉၼႃ”
“ပေႃးႁဝ်းပႆႇပႅတ်ႈ သူၵေႃႈတိုၵ်ႉပဵၼ်မေးႁဝ်းယူႇဢိူဝ်ႈ ႁဝ်းလႆႈပၼ်ၵႂၢမ်းမၼ်ႈတီႈပေႃႈယဝ်ႉဝႃႈ တေလုမ်းလႃးသူၵႂႃႇတေႃႇၸူဝ်ႈၼႆ”
“ပေႃႈဢမ်ႇယူႇယဝ်ႉ ဢမ်ႇၸွမ်းၵေႃႈလႆႈၼႃ”
“ႁဝ်းႁဵတ်းမႃးတင်းမူတ်း သူတူၺ်းဢမ်ႇဢွၵ်ႇႁႃႉ”
“သင်လႃႇ ဢမ်ႇၸႂ်ႈဝႃႈႁဵတ်းၵႅင်ႈၵူၺ်းႁိုဝ် ၸဵမ်မိူဝ်ႈတႄႇမၼ်းသူတင်းဢမ်ႇၶႂ်ႈၽွမ်ႉၵွၼ်ႇလူး”
“တေမီးၽႂ်လႃႇ ယွမ်းႁဵတ်းပၢင်ၶႅၵ်ႇပဵၼ်ဝႃႈလဵၼ်ႈလဵၼ်ႈၵူၺ်း မၼ်းငၢႆႈၼႃႇၵေႃႈဢမ်ႇၸႂ်ႈ”
“ၵေႃႈသူၶႂ်ႈႁဵတ်းႁင်းၵူၺ်း”
“ပေႃးပဵၼ်လွင်ႈၵၢၼ်တႄႉလႅတ်းၼႃႇ ပေႃးပဵၼ်လွင်ႈၸိူင်ႉၼႆမႃးသမ်ႉ တေႁႂ်ႈလၢတ်ႈၸိူင်ႉႁိုဝ်လီ” ယၵ်ႉတူၺ်းငိုၼ်းသႅင်ယဝ်ႉယုမ်ႉယူႇၸုတ်းၵုတ်း။
“ႁဝ်းဝႃႈတႄႉၵႂႃႇႁူင်းယႃလႃႈ”
ၸူဝ်းၵၼ်ၵႂႃႇတီႈႁူင်းယႃသေယဝ်ႉ ၸွမ်သႅင်ၵေႃႈထတ်းၸႅတ်ႈတူၺ်းသေ လုပ်ႇၸတ်ႉၵႂႃႇလႄႈ သမ်ႉပေႃးလႆႈၵွပ်ႈၶႃဝႆႉသေ ဢမ်ႇၸၢင်ႈၵႂႃႇလႆႈပႆလႆႈလီလီယဝ်ႉၵေႃႈ မီးငိုၼ်းသႅင်ၸွႆႈလုမ်းလႃးယူႇၸိူင်ႉၼႆ သမ်ႉပေႃးဢမ်ႇၶႂ်ႈႁႂ်ႈၶႃမၼ်းႁၢႆၵႂႃႇယဝ်ႉၼႃႇ။
ယွၼ်ႉလွင်ႈၼႆႉသေ ႁဵတ်းႁႂ်ႈငိုၼ်းသႅင်လီမႃးတႄႉတႄႉ ၵႂႃႇႁဵတ်းၵၢၼ်လႆႈၶိုၼ်းယဝ်ႉ၊ ဢမ်ႇသၢင်ႇထုၵ်ႇ မိူဝ်ႈၵႂႃႇတူၺ်းၵၢၼ်တီႈႁူင်းလႅမ်းၶဝ်ၼၼ်ႉ လိူၵ်ႈလိူၵ်ႈ သမ်ႉႁူပ်ႉသႂ်ႇမႅၼ်ႈၺႃးၵူၼ်းႁူႉၸၵ်း ဢၼ်ႁွင်ႉဝႃႈ သႅင်ပိုၼ်းၼႆၼၼ်ႉယူႇ။
သိုပ်ႇလူထႅင်ႈတွၼ်ႈတေမႃးၶႃႈ
