ပေႃႈလႆႈမိူဝ်းယူႇႁိူၼ်းၶိုၼ်း ဢူၺ်းၵေႃႉဢူၺ်းသႄႈၵေႃႈ ဢွၼ်ၵၼ်မိူဝ်းလႄႇမိူဝ်းတူၺ်းမၼ်း ၵႂႃႇႁဵတ်းၵၢၼ်ၵေႃႈ ငိုၼ်းသႅင်တင်းဢမ်ႇလႆႈမႆႈၸႂ်တၢၼ်ႇၵူႈပွၵ်ႈယဝ်ႉ။
လုၵ်ႉတီႈႁိူၼ်းၵႂႃႇတီႈႁဵတ်းၵၢၼ်ၼႆၵေႃႈ လႆႈဝႃႈႁိုင်ယူႇမွၵ်ႈၸူဝ်ႈမူင်းၶိုင်ႈၼႆႉ၊ သမ်ႉဝႃႈၵႆတၢၼ်ႇႁိုဝ်ၵေႃႈ တွၼ်ႈတႃႇပေႃႈၼၼ်ႉ မၼ်းၵေႃႈယွမ်းႁဵတ်းၵူႈလွင်ႈယဝ်ႉ။
ဝၼ်းယဝ်ႉဝၼ်းၵႂႃႇႁဵတ်းၵၢၼ်မိူၼ်ၵဝ်ႇ ၵူၺ်းၵႃႈ တႃႇတေလၢတ်ႈၶိုၼ်းလွင်ႈႁဵတ်းၶႅၵ်ႇၼၼ်ႉ ဢဝ်ငိုၼ်းသႅင်ဢမ်ႇႁတ်းလၢတ်ႈဢွၵ်ႇသေ ၶမ်ဢိုတ်းၶမ်ဢၢတ်းယူႇၸိူင်ႉၼၼ်ၵူၺ်း။
ယၢမ်းၵၢင်ၶိုၼ်းလိုၵ်း ၼင်ႇဝႃႈလႆႈငိၼ်းသဵင်ႈပေႃႈၶဝ်လႄႈ မၼ်းၵေႃႈလုၵ်ႉတူၺ်းသေ လႆႈႁၼ်ၼင်ႈၵိၼ်ယႃသေ ၵၼ်ႈၸဵပ်းဝႆႉယူႇၸိူင်ႉၼၼ် ႁူဝ်ၸႂ်ၵေႃႈသမ်ႉပေႃးတိပ်ႇတၼ်မိပ်ႇၼမ်ႉတႃလႆဢွၵ်ႇမႃးယဝ်ႉၼႃႇ။
ႁိုတ်ႈ…ႁိုတ်ႈ…ႁိုတ်ႈ.. သဵင်ၾူၼ်းလင်မေႃးယူႇႁိမ်းႁူဝ်ၼွၼ်း ၵူၼ်းၼွၼ်းဢမ်ႇလပ်း ၸႂ်ဢမ်ႇၸပ်းတူဝ်သေ ယိပ်းႁပ်ႉမႃးဢမ်ႇတၼ်းၾၢင်ႉတူၺ်းဝႃႈပဵၼ်ၽႂ်
“ႁလူဝ်”
“ႁူဝ်ၼႃႈ..ၸွႆႈဢိတ်ႉၼိုင်ႈ”
မၼ်းၵေႃႈၽုၼ်ႇၽၢၼ်ႇလုၵ်ႉမႃးၵမ်းလဵဝ် “ပဵၼ်သင်လႃႇ!!” ထၢမ်ၼင်ႇတူၵ်းၸႂ်ဝႆႉယူႇ။
“ၸွႆႈႁဵတ်းၶႅၵ်ႇၸွမ်းၶႃႈၸွင်ႇလႆႈႁိုဝ်” လၢတ်ႈယဝ်ႉသဵင်ယဵၼ် ပႂ်ႉထွမ်ႇၶေႃႈတွပ်ႇသေ တၢၼ်ႇဝႃႈမၼ်းဝၢင်းၵႂႃႇပႅတ်ႈၼၼ်ႉယဝ်ႉ။
ႁိုင်ယူႇၸူဝ်ႈၼိုင်ႈ “ပေႃႈပဵၼ်ၸိူင်ႉႁိုဝ်လႃႇမိူဝ်ႈလဵဝ်”
ငိုၼ်းသႅင်ၵေႃႈႁႆႈဢွၵ်ႇမႃး သမ်ႉပေႃးဢမ်ႇၸၢင်ႈတွပ်ႇသင်လႆႈ ၸွမ်သႅင် ႁပ်ႉထွမ်ႇသဵင်ႁႆႈၼၼ်ႉ ပေႃးဢမ်ႇၼွၼ်းလႆႈယူႇ။
ၵၢင်ၼႂ်ၵေႃႈ ၶိုၼ်းၵႂႃႇႁဵတ်းၵၢၼ်မိူၼ်ၵဝ်ႇ၊ ၼင်ႇဝႃႈဢမ်ႇလႆႈပဵၼ်သင်ၶမ်ႈဝႃးၼၼ်ႉယဝ်ႉ။ ထိုင်ၼင်ႇၶၢဝ်းလူင်းၵၢၼ်ယဝ်ႉၼႆၵေႃႈ မိူဝ်ႈငိုၼ်းသႅင်ၸမ်တေမိူဝ်းၼၼ်ႉ
“သူ..ၵႂႃႇၸွမ်းႁဝ်းတီႈၼိုင်ႈလႄႈ”
“ႁိုင်ယူႇၶႃႈႁႃႉ”
“ၵမ်ႉၼိုင်ႈၵူၺ်း..”
မၼ်းၵေႃႈၸွမ်းၵႂႃႇလူၺ်ႈဢမ်ႇလႆႈလၢတ်ႈသင်ထႅင်ႈ။
ယူႇၸူဝ်ႈၼိုင်ႈ ႁွတ်ႈထိုင်ၵႂႃႇတီႈသႅင်ႇတႅၵ်ႈၶူဝ်းၼၼ်ႉသေ မီးသိူဝ်ႈၶူဝ်းပၢင်ၶႅၵ်ႇၽႅၼ်ဝႆႉလႄႈ ငိုၼ်းသႅင်ၵေႃႈၸွမ်းလင်ၸွမ်သႅင်ၶဝ်ႈၵႂႃႇ။
“မႃးတူၺ်းသိူဝ်ႈၶူဝ်းဢၼ်လႆႈလၢတ်ႈဝႆႉၼၼ်ႉဢေႃႈ”
ၵူၼ်းပႂ်ႉသႅင်ႇၵေႃႈ ႁွင်ႉၵႂႃႇလိူၵ်ႈသိူဝ်ႈၶူဝ်းဢၼ်မီးယူႇၼႂ်းသႅင်ႇၼၼ်ႉ ႁႂ်ႈငိုၼ်းသႅင်လိူၵ်ႈယူႇ၊ ၸွမ်သႅင်ၵေႃႈလိူၵ်ႈဝႆႉတႃႇမၼ်းယဝ်ႉသေ ပႂ်ႉငိုၼ်းသႅင်ဝႆႉယဝ်ႉ။ ၵွပ်ႈပိူဝ်ႈဢမ်ႇလႆႈတႅၵ်ႈတူဝ်သေ ၵိုင်ႉၵၢင်ႉမႃးလိူၵ်ႈလႄႈ ဢၼ်ထုၵ်ႇမၼ်းသမ်ႉဢမ်ႇပေႃးမီးသေ လိူၵ်ႈၵႂႃႇဢၼ်လႆႈၸႂ်ၸုမ်ႇၼိုင်ႈယဝ်ႉ ပႂ်ႉပိူၼ်ႈမႄးပၼ်သေ
“တေႁႂ်ႈႁဝ်းမႃးလိူၵ်ႈႁဵတ်းသင်လႃႇ ႁဝ်းဢမ်ႇလူဝ်ႇပဵၼ်တၢၼ်ႇၼႆႉၵေႃႈလႆႈ”
“ဢဝ်လႄႈၼႃႈ သင်ဢမ်ႇသင်ၼႂ်းၸူဝ်ႈပၢၼ်ၼိုင်ႈပွၵ်ႈ ဝႆႉဝႃႈတွၼ်ႈတႃႇပေႃႈသေၵေႃႈလႆႈ”
ပေႃးလၢတ်ႈၶေႃႈၵႂၢမ်းဝႃႈတွၼ်ႈတႃႇပေႃႈၼႆ မၼ်းၵေႃႈယွမ်းႁဵတ်းယဝ်ႉ၊ ဢမ်ႇတၼ်းႁူႉၵၢင်ဝၼ်းသမ်ႉပေႃးၶမ်ႈမႃးယဝ်ႉလႄႈ ၸွမ်သႅင်ၵေႃႈ ႁေႃႈၵႃးမိူဝ်းၵႂႃႇတၢင်းႁိူၼ်းငိုၼ်းသႅင် ၼင်ႇဝႃႈႁူႉသဵၼ်ႈတၢင်းလီၼႃႇၼၼ်ႉယဝ်ႉ။ ငိုၼ်းသႅင်ၼင်ႈမႃးၸွမ်း သမ်ႉပေႃးဢမ်ႇတၼ်းၾၢင်ႉမႅၼ်ႈဝႃႈ မၼ်းမႃးၵႆၼႃႇယဝ်ႉ။
“သူတေၵႂႃႇလႂ်လႃႇၼႆႉ လူတ်ႉႁဝ်းမီးယူႇတီႈၵၢၼ်”
“မိူဝ်ႈၽုၵ်ႈၵွႆႈမႃးဢဝ်ၵေႃႈလႆႈ မၼ်းဢမ်ႇႁၢႆလေႃႇၼႃႈ ၶမ်ႈၼႃႇယဝ်ႉ ႁႂ်ႈႁဝ်းမိူဝ်းသူင်ႇလႄႈ”
“သူသမ်ႉတေႁႂ်ႈႁဝ်းပႆလိၼ်ၵႂႃႇဢဝ်ၵႃႈ”
“တေႉၼေႃ..တေႁႂ်ႈႁဝ်းႁူၼ်ၶိုၼ်းၼႄႇ သူၵေႃႈတေဢမ်ႇႁွတ်ႈႁိူၼ်းလႆႈယဝ်ႉၶမ်ႈၼႆႉ”
“မိူဝ်းလႄႈ ပေႃးဢမ်ႇၵႂႃႇႁဵတ်းၵၢၼ်ၵေႃႈပဵၼ်သူၵူၺ်း”
“တိုၵ်ႉႁူႉၵူၺ်းၵႃႈ ဝႃႈႁဝ်းပဵၼ်ႁူဝ်ၼႃႈသူၼႆႉ”
“ႁဝ်းဢမ်ႇဢဝ်လေႃးၵၼ်လေႃႇၼႃႈ လွင်ႈသုၼ်ႇတူဝ်လႄႈလွင်ႈၵၢၼ်”
“ႁဝ်းႁူႉ သူၵေႃႈႁွင်ႉႁဝ်းဝႃႈၵေႃႉႁၵ်ႉလႆႈယူႇယူဝ်ႉပေႃးၼၼ်”
ငိုၼ်းသႅင်ယၵ်ႉတူၺ်းၼႃႈမၼ်းၼင်ႇဝႃႈဢမ်ႇၶႂ်ႈယုမ်ႇ ၶေႃႈၵႂၢမ်းဢၼ်မၼ်းလၢတ်ႈဢွၵ်ႇမႃးၼၼ်ႉ သၢႆတႃလႄႈၵႂၢမ်းလၢတ်ႈမၼ်း ပေႉမႃးႁဵတ်းႁႂ်ႈမီးလွင်ႈထၢင်ႇမႃးယဝ်ႉ “သူၵျိူၵ်ႈႁဝ်းတေႉတႄႉဢမ်ႇၸႂ်ႈၵွၼ်ႇယူဝ်ႉ”
“ၼႂ်းသၢႆတႃသူႁၼ်မိူၼ်ၼၼ်ဝႆႉႁႃႉ”
“ဢိုမ်ႈ”
“သူလူးလႃႇ ၸွင်ႇလႆႈၸႂ်ႁဝ်းၽွင်ႈယူႇၼႄႇပေႃးၼၼ်”
“ဢမ်ႇ..”
ဢဝ်သဵင်ၸွမ်သႅင်ယဵၼ်ၼိမ်ၵႂႃႇသေ “ႁဝ်းဝူၼ်ႉဝႃႈမိူဝ်ႈလႂ်မိူဝ်ႈတႄႇၼႃႈႁိူၼ်းယဝ်ႉ ႁဵတ်းႁႂ်ႈမၼ်းလီလိူဝ်ပိူၼ်ႈ ၸိူင်ႉႁိုဝ်ၵေႃႈႁဝ်းပၢႆႈၵၢၼ်တေႇၼႃႈႁိူၼ်းယူႇယဝ်ႉ တေႇၸွမ်းၵူၼ်းဢၼ်ဢမ်ႇႁၵ်ႉႁဝ်းၵေႃႈ ဢမ်ႇလႆႈလူႉသုမ်းပၢၼ်မၢဝ်ႇႁဝ်းၵႂႃႇၼင်ႇၵွၼ်ႇ”
“ႁၵ်ႉပၢၼ်မၢဝ်ႇသူပေႉတၢၼ်ႇၼၢၼ်ႉၵႃႈ”
မိုင်ယၵ်ႉတူၺ်းငိုၼ်းသႅင် လူၺ်ႈသၢႆတႃမွင်မွင်ဢိတ်ႉၼိုင်ႈယဝ်ႉ “ဢိုမ်ႈ”
“ၵွပ်ႈၼၼ် ႁဝ်းဝႃႈၵၼ်ႇတေႃးပေႃႈမႄႈၵူၺ်းၵေႃႈလႆႈယဝ်ႉ ဢမ်ႇလူဝ်ႇႁဵတ်းယႂ်ႇၼႃႇၵေႃႈလႆႈ”
“ၼၼ်ႁႃႉ..”
“ၸိူင်ႉႁိုဝ်ၵေႃႈဢမ်ႇလႆႈဢဝ်ၵၼ်တေႉယူႇယဝ်ႉ”
သမ်ႉပေႃးဢဝ်ၸွမ်သႅင်ၶုၼ်ႇၵိုတ်းၵႃးၵႂႃႇၵမ်းၼိုင်ႈယူႇ။
“ၵူၺ်းၵႃႈ ႁဝ်းၵေႃႈဢမ်ႇၶႂ်ႈႁဵတ်းမိူၼ်တၢင်းလဵၼ်ႈမိူၼ်ၵၼ် သူၵေႃႈႁၢင်ႈႁႅၼ်းတူဝ်ဝႆႉၵူၺ်းလႄႈၼႃႈ”
“ဢမ်ႇမီးသင်ဢၼ်ႁဝ်းၵူဝ်တၢၼ်ႇ ၵူဝ်ပေႃႈႁဝ်းၽၢတ်ႇၵႂႃႇၼၼ်ႉယဝ်ႉ ပိူၼ်ႈဝႃႈယိင်ႈၵူဝ်ယိင်ႈၺႃးၼႆ မၼ်းၵႃႈတေလႆႈယွမ်းႁပ်ႉၸွင်ႇၸႂ်ႈႁိုဝ်”
ယူႇၸူဝ်ႈၼိုင်ႈ ၵႃးၶႃၵေႃႈႁွတ်ႈထိုင်ၵႂႃႇတီႈၼႃႈႁိူၼ်းၼၼ်ႉသေ ဢွၼ်ၵၼ်ၶဝ်ႈမိူဝ်းၵႂႃႇၼႂ်းႁိူၼ်း တီႈမီးၾႆးလႅင်းႁိူဝ်ႈဝႆႉယူႇၼႂ်းႁိူၼ်းၼၼ်ႉလႄႈ။
သိုပ်ႇလူထႅင်ႈတွၼ်ႈတေမႃးၶႃႈ
