“မိူဝ်ႈတႄႇၵေႃႈလီသူၼ်ၸႂ် ဝၢႆးမႃး” ယၵ်ႉတူၺ်းငိုၼ်းသႅင်ၵမ်ႉၼိုင်ႈသေ “ၶႂ်ႈပဵၼ်ၵေႃႉယူႇႁိမ်းၶၢင်ႈၶဝ်သေ လုမ်းလႃးတူၺ်းထိုင်ၶဝ် ၼင်ႇၽူႈယိင်းၵေႃႉဢၼ်ၶႃႈႁၵ်ႉၼၼ်ႉဢေႃႈ”
သီၼႃႈလႄႈၶေႃႈၵႂၢမ်း လၢတ်ႈဢွၵ်ႇမႃး ၼင်ႇဝႃႈလၢတ်ႈၼႄပေႃႈၸဝ်ႈယူႇၼၼ်ႉယဝ်ႉ။ သမ်ႉပေႃးဢဝ်ငိုၼ်းသႅင်လႆႈဝိၼ်ႇၼႃႈယၵ်ႉတူၺ်းမၼ်းယဝ်ႉမိုင်ၵႂႃႇသေ
“ၵွပ်ႈၼၼ် တေႃႇပေႃႈပေႃးတေလႆႈၶဝ်ႈပၢင်ၶႅၵ်ႇႁႃး ပေႃႈၵေႃႈၶဝ်ႈႁပ်ႉၵၢၼ်ၽႃႇတတ်းလႆႈယဝ်ႉၼႃ” ယိပ်းသွတ်ႇဢဝ်မိုဝ်းၸွမ်သႅင်ၼင်ႇပဵၼ်ၵူႈႁၵ်ႉၵၼ်ဝႆႉယူႇ။
ပေႃႈၶဝ်ယဵၼ်ၵႂႃႇတင်းႁိုင်ယဝ်ႉ ႁဵတ်းၵႅင်ႈဢမ်ႇသူၼ်သေလပ်းၵႂႃႇပႅတ်ႈ။
“လႆႈဝႃႈပၼ်ၵႂၢမ်းမၼ်ႈယဝ်ႉၼႃပေႃႈ”
သွင်ၶႃၵေႃႈၸူဝ်းၵၼ်ဢွၵ်ႇၵႂႃႇ၊
“ယိၼ်းၸူမ်းယဝ်ႉၶႃႈ ဢၼ်ၸွႆႈႁဝ်းဝႆႉ”
“ဝႆႉဝႃႈသူထုၵ်ႇၼီႈႁဝ်းလႄႈ ႁဝ်းတေဢဝ်ၶိုၼ်းဢိူဝ်ႈၼႃႈ”
“လႆႈဢေႃႈ တေဢဝ်ၵႃႈႁိုဝ်ၵေႃႈလၢတ်ႈမႃးလႆႈယူႇ”
“ပေႃးတၢၼ်ႇဝႃႈပဵၼ်လၢဝ်းပၢၼ်းၽူႈမၢၵ်ႈလူင်ဝႃႈ”
“ငိုၼ်းတႄႉႁဝ်းဢမ်ႇမီးၼင်ႇၵဝ်ႇၼႃး ၼမ်ႉၸႂ်ႁဝ်းတႄႉၼမ်ၽႅဝ်”
“ႁဝ်းၵႂႃႇၵွၼ်ႇယဝ်ႉ”
“ၵႂႃႇၵွၼ်ႇၶႃႈလႄႈ ၶႃႈတေၵႂႃႇႁႃမေႃယႃၵမ်ႉၼိုင်ႈၸင်ႇၸွမ်းၵႂႃႇ”
ငိုၼ်းသႅင် ၵႂႃႇၸူးမေႃယႃ ယူဝ်ဝႃႈတေလႆႈဢုပ်ႇလွင်ႈၽႃႇတတ်းပေႃႈ ၵူၺ်းၵႃႈ မိူၼ်ဝႃႈ ၵူႈလွင်ႈမၼ်းတူၵ်းလိုၼ်းၵႂႃႇယဝ်ႉ။ တေၸၢင်ႈႁဵတ်းႁိုဝ်ၵူမ်ႈၼႃႈပွႆႇၼမ်ႉတႃမၼ်းၸိုမ်းဝႆႉသေ ၼႃႈၶီမွင်လူင်ဝႆႉယူႇယဝ်ႉ။ မႃးႁွတ်ႈတီႈၵႃး တိုၵ်ႉလႆႈႁၼ်ၸွမ်သႅင်ယူႇလႄႈ မႄးၸဵတ်ႉၼမ်ႉတႃမၼ်းယဝ်ႉ သဵင်ၶီႈမုၵ်ႈယွႆႉၼၼ်ႉသုတ်ႇၶိုၼ်ႈၵမ်ႉၼိုင်ႈသေ
“ပႆႇမိူဝ်းၵွၼ်ႇၶႃႈႁႃႉ”
“သေႃးၵႃးမီးတီႈသူ ႁဝ်းတေႁဵတ်းႁိုဝ်ၸၢင်ႈမိူဝ်း”
“ဢေႃႈ..ၼၼ်ၶႃႈႁႃႉ”
ၼႆသေ ဢၢင်ႈတေၸူၵ်းၼႂ်းထူင်မၼ်း ၵူၺ်းၵႃႈထူင်မၼ်းသမ်ႉ လိုမ်းဝႆႉၼႂ်းႁူင်းယႃ လႅပ်ႈတေပဵၼ်ၼႂ်းႁွင်ႈပေႃႈၶဝ်ၼၼ်ႉယဝ်ႉ။
“ႁဝ်းလိုမ်းထူင်ႁဝ်း ဝႆႉတၢင်းၼႂ်း”
မိူဝ်ႈတိုၵ်ႉဢၢင်ႈတေလႅၼ်ႈၶဝ်ႈၵႂႃႇဢဝ်ယူႇၼၼ်ႉ မီးမိုဝ်းၶႅင်ၶႅင်ဢၼ်ၼိုင်ႈၸၼ်ဝႆႉသေ
“ပႂ်ႉဝႆႉတီႈၼႆႈလႄႈ သူၵႂႃႇမိူဝ်ႈလႂ်တေမႃးထိုင်ၶိုၼ်း”
ၸွမ်သႅင်ၶဝ်ႈၵႂႃႇတီႈၼႂ်းႁွင်ႈပေႃႈငိုၼ်းသႅင်ၼၼ်ႉ လႆႈႁၼ်ပေႃႈၶဝ်ၼင်ႈဢိင်ဝႆႉယူႇလႄႈ
“ယူဝ်ဝႃႈဢေးလုၵ်ႈ”
“မၼ်းလိုမ်းထူင်ဝႆႉဢေႃႈ”
“ၸၢႆးမႃးၵေႃႈလီယဝ်ႉ ၼင်ႈသေၵွၼ်ႇလႄႈ”
ၸွမ်သႅင်ၼင်ႈယဝ်ႉပေႃႈငိုၼ်းသႅင်ၶဝ်ယၵ်ႉတူၺ်းမၼ်းလီလီသေ
“ၸၢႆး.. ငိုၼ်းသႅင် သမ်ႉဝႃႈမၼ်းၵေႃႉယႂ်ႇပဵၼ်ၵူၼ်းလူင်ယဝ်ႉသေတႃႉ မၼ်းယင်းတိုၵ်ႉမိူၼ်လုၵ်ႈဢွၼ်ႇဢမ်ႇႁူႉသင် ယင်းတိုၵ်ႉၶီႈႁႆႈယူႇဢိူဝ်ႈ ပေႃးဝႃႈလုင်းဢမ်ႇမီးယဝ်ႉ ၸၢႆးၸွႆႈယူႇႁိမ်းၶၢင်ႈပဵၼ်ၵေႃႉမၼ်းတၢင်လုင်းၵႂႃႇၸွင်ႇလႆႈႁိုဝ်”
ၸွမ်သႅင် လႆႈႁၼ်သၢႆတႃလုင်းတူၺ်း ႁၼ်လွင်ႈဢွၼ်ႈဝွၼ်းၼမ်ႉတႃယိင်ႈႁူၺ်ႇဝႆႉ ၼင်ႇဝႃႈတၢင်းမုင်ႈမွင်းၼၼ်ႉၵိုတ်းမၼ်းၵူၺ်းယဝ်ႉၼႆ သဵင်တဵတ်ႇယဵၼ်ၸွမ်သႅင်ၼၼ်ႉ သမ်ႉပေႃးဢဝ်ၼႂ်းႁွင်ႈယဵၼ်သိပ်းဝႆႉယဝ်ႉ။
“လႆႈဢေႃႈ”
သွင်ၶႃၶီႇၵႃးမိူဝ်းၵႂႃႇၸွမ်းတၢင်း သဵင်တဵတ်ႇယဵၼ်ဢမ်ႇငိၼ်းသဵင်သင်သေဢိတ်း ၸွမ်သႅင်မိူဝ်းသူင်ႇငိုၼ်းသႅင်ယဝ်ႉသေ မိူဝ်ႈၵိုတ်းၵႃးတေဢၢင်ႈလူင်းၼၼ်ႉ ငိုၼ်းသႅင်ယၵ်ႉတူၺ်းၸွမ်သႅင်
“သူႁဵတ်းၶႅၵ်ႇၸွမ်းႁဝ်းၸွင်ႇလႆႈႁိုဝ်” ဢမ်ႇလႆႈႁၼ်ၸွမ်သႅင်တုမ်ႉတွပ်ႇၶိုၼ်းလႄႈ “ၵေႃႈယဝ်ႉလႄႈ ႁဝ်းလၢတ်ႈႁင်ၵေႃႈဢမ်ႇႁူႉယဝ်ႉ” လူင်းလူတ်ႉၵႂႃႇယဝ်ႉ။
ၸွမ်သႅင်ၵေႃႈႁေႃႈၵႃးမၼ်းပူၼ်ႉၵႂႃႇယဝ်ႉ ငိုၼ်းသႅင်ၽုၺ်ႇၽၵ်းတူႁိူၼ်းသေ ၵႃးမၼ်းႁူၼ်မႃးၶိုၼ်း “လႆႈဢိူဝ်ႈ” ၼႆသေ ႁေႃႈဢွၵ်ႇၵႂႃႇပႅတ်ႈ ဢဝ်ငိုၼ်းသႅင်မိုင်ၸိူဝ်ႈတူၺ်းလင်ၵႃးမၼ်းတေႃႇပူၼ်ႉသၢႆတႃယဝ်ႉ။
မိူဝ်ႈႁူႉဝႃႈၶၢဝ်းယၢမ်းပေႃႈဢမ်ႇၵိုတ်းၼမ်ယဝ်ႉၼႆလႄႈ မၼ်းၵေႃႈဢွၼ်ဢဝ်ပေႃႈမိူဝ်းယူႇတီႈႁိူၼ်းၶိုၼ်းသေ ပေႃႈၵေႃႈဝႃႈၶႂ်ႈၶိုၼ်းပွၵ်ႈႁိူၼ်းၵဝ်ႇၶဝ်ၼႆလႄႈ သွင်ၶႃၵေႃႈ ဢွၼ်ၵၼ်ပွၵ်ႈမိူဝ်းၵႂႃႇၶိုၼ်းယဝ်ႉ။
ၵူႈလွင်ႈဢၼ်ၽၢၼ်ႇပူၼ်ႉမႃး ၼပ်ႉႁူဝ်ပီမၼ်းၵေႃႈ ဢွင်ႈတီႈဢၼ်ယၢမ်ႈႁူပ်ႉယၢမ်ႈႁၼ်ၸိူဝ်းၼၼ်ႉ ယင်းတိုၵ်ႉမီးယူႇၼႂ်းမၢႆတွင်း ဢမ်ႇၸၢင်ႈႁၢႆလႆႈ ၵူၺ်းၵႃႈႁႂ်ႈၵူႈလွင်ႈပဵၼ်ၼင်ႇပူၼ်ႉမႃးၵေႃႈ ဢမ်ႇပဵၼ်လႆႈယဝ်ႉမိူၼ်ၵၼ်၊ ၵူႈလွင်ႈမၼ်းလႅၵ်ႈလၢႆႈၵႂႃႇ ၸႂ်ဢၼ်ယၢမ်ႈတိတ်းဢွႆႇႁွႆႈယူႇဝၼ်းၼၼ်ႉၵေႃႈ ဢမ်ႇလႆႈမီးၼင်ႇၵူႈပွၵ်ႈယဝ်ႉ၊ ၵိုတ်းဝႆႉဝႃႈ ၸႂ်ထိုင်ၶိုၼ်းၼႆၵူၺ်း။
သိုပ်ႇလူထႅင်ႈတွၼ်ႈတေမႃးၶႃႈ
