မုင်ႈၵႂႃႇတၢင်းၼႃႈ ႁၼ်ၾႆးႁိူဝ်ႈဝႆႉယူႇလႄႈ “ပုၼ်ႉ ႁၼ်ယဝ်ႉ”
သွင်ၶႃၵေႃႈၸူမ်းသိူဝ်းသေႁွတ်ႈၵႂႃႇ ဢမ်ႇလႆႈႁၼ်ၽႂ်ယဝ်ႉ ၸင်ႇဢွၼ်ၵၼ်ၵႂႃႇႁွင်ႉ
“လုင်းပိူင်း!!..”
လုင်းပိူင်းဢွၵ်ႇမႃးႁပ်ႉတွၼ်ႈၶႃသေ ႁၼ်သိူဝ်ႈၶူဝ်းၶႃသမ်ႉပေႃးယမ်းၵႂႃႇမူတ်း
“တေမႃးၵေႃႈဢမ်ႇလၢတ်ႈၵၼ်ၶႃႈလႃႇ တေလႆႈႁႂ်ႈလုၵ်ႈဢွၼ်ႇၶဝ်ၵႂႃႇပႂ်ႉႁပ်ႉ”
မေးလုင်းပိူင်းၼၼ်ႉၵေႃႈ ဢွၵ်ႇမႃးယဝ်ႉ “ဢွၼ်ၵၼ်ႁိူဝ်ႉမႃး တေတွင်ႉမႆႈၵၼ်ယဝ်ႉၶႃႈယူဝ်ႉ”
ဢမ်ႇလၢတ်ႈၵေႃႈ ယၵ်ႉတူၺ်းသီၼႃႈၵူၼ်းၵူၺ်းႁၼ်ၸႅင်ႈၼႃႇယဝ်ႉ။
“လိုဝ်ႈႁိူဝ်ႉၵၼ်သေၵွၼ်ႇလႄႈ ပႃႈမိူဝ်းဢဝ်သိူဝ်ႈၶူဝ်းမႃးပၼ်”
ၶဝ်ႈမိူဝ်းၵႂႃႇၼႂ်းႁိူၼ်းသေ ယူႇၸူဝ်ႈၼိုင်ႈၵေႃႈ ဢဝ်တင်းသိူဝ်ႈၶူဝ်းလႄႈ ၽႃႈၸဵတ်ႉတူဝ်မႃးပၼ်ယူႇ။
“ဢွၼ်ၵၼ်ၵႂႃႇဢၢပ်ႇၼမ်ႉသေ ၵွႆႈမႃးၵိၼ်ၶဝ်ႈလႄႈၼႃႈ ပႃႈတေႁႅၼ်းဝႆႉပၼ်”
သွင်ၶႃၵေႃႈ ဢွၼ်ၵၼ်ၵႂႃႇတၢင်းႁွင်ႈဢၢပ်ႇၼမ်ႉၼၼ်ႉယဝ်ႉ၊ ႁွင်ႈဢၢပ်ႇၼမ်ႉၼၼ်ႉသမ်ႉမီးႁွင်ႈလဵဝ်ၵူၺ်းလႄႈ ယၵ်ႉတူၺ်းၼႃႈၵၼ်သေ ႁိမ်ၵၼ်ၶဝ်ႈယူႇ။
“ပၼ်ႁဝ်းၶဝ်ႈဢွၼ်တၢင်းလႄႈ ၶူဝ်းႁဝ်းၵူမ်ႇမူတ်းယဝ်ႉၼႆႉ ၶႂ်ႈဢၢပ်ႇၼမ်ႉၼႃႇယဝ်ႉ”
“ပၼ်ႁဝ်းၶဝ်ႈၵွၼ်ႇလႄႈ ႁဝ်းပဵၼ်ၽူႈယိင်း သူတေလႆႈယွမ်းပၼ်ႁဝ်းဢိူဝ်ႈ”
“ႁဝ်းပဵၼ်ႁူဝ်ၼႃႈသူဢိူဝ်ႈ”
“ၼႆႉဢမ်ႇၸႂ်ႈၶၢဝ်းယၢမ်းႁဵတ်းၵၢၼ်ႁဝ်းယဝ်ႉ”
ၸွမ်သႅင်ၵေႃႈ ၽိုတ်ႉဢီးၶဝ်ႈၵႂႃႇၼႂ်းႁွင်ႈၼမ်ႉ သမ်ႉပေႃးဢဝ်မၼ်းၵႂႃႇလေႃႇၽၵ်းတူတၢင်းၶဝ်ႈၼၼ်ႉယူႇ၊ တူဝ်မၼ်းသုင်ဝႆႉလႄႈ လႆႈၵူမ်ႈဝႆႉယဝ်ႉ၊ ထွတ်ႇၶူဝ်းယဝ်ႉတေဢၢပ်ႇၼမ်ႉ သမ်ႉပဵၼ်ထႅင်ႉၼမ်ႉတုင်းဢဝ် ၼႂ်းထႅင်ႉၼၼ်ႉသမ်ႉၼမ်ႉမီးဢေႇဝႆႉသေ ဢၼ်ပိုတ်ႇမၼ်းပဵၼ်ၵွၵ်ႉဝႆႉလႄႈ မၼ်းၵေႃႈၵိုင်ႉၵၢင်ႉပိုတ်ႇယဝ်ႉၼမ်ႉသမ်ႉၶႂ်ႈႁႅင်းဝႆႉ ၼႅတ်ႈပိၵ်ႉၶိုၼ်းသေ ဢဝ်လွတ်ႇမၼ်းလုတ်ႈဢွၵ်ႇမႃးယဝ်ႉ ၼမ်ႉၽူင်ႉမႃးၼမ်ဝႃႈၼမ် တေသႂ်ႇၶိုၼ်းၵေႃႈ ဢမ်ႇမေႃယဝ်ႉ သဵင်ႁွင်ႉပေႃးပၼ်းၼႂ်းႁွင်ႈၼမ်ႉယူႇႁင်းၵူၺ်း။
“ပဵၼ်ႁင်!!”
“ၼမ်ႉလုတ်ႈ!!”
“သႂ်ႇၶိုၼ်းလႄႈ..”
“သႂ်ႇဢမ်ႇလႆႈ!!”
“ပွႆႇဝႆႉႁဵတ်းၼၼ်လႄႈ ၵမ်ႉႁဝ်းတေၶဝ်ႈၵႂႃႇသႂ်ႇ”
“ယမ်းမူတ်းယဝ်ႉၼႂ်းႁွင်ႈၼႆႉ မႃးမႄးႁေၵွၼ်ႇလႄႈ”
“တေႁဵတ်းႁိုဝ်မႄးလႃႇ သူမီးယူႇၼႂ်းၼၼ်ႉ”
မၼ်းၼႅတ်ႈဝဵၼ်းၽႃႈၸဵတ်ႉသေ ပိုတ်ႇၽၵ်းတူပၼ်ငိုၼ်းသႅင်ၵမ်းလဵဝ်ယဝ်ႉ။ ငိုၼ်းသႅင်ၵေႃႈ မႄးပိုတ်ႇၵွၵ်ႉၼမ်ႉၼၼ်ႉသေယဝ်ႉသုပ်းသႂ်ႇသေ ပိုၵ်ႉပၼ်ၵႂႃႇလွႆးလွႆး။
“မွၵ်ႈၼႆႉၵူၺ်းၵေႃႈဢမ်ႇမေႃ ၵူၼ်းႁင်ပေႉသုၵ်ႉသၵ်ႉဢဝ်”
ႁူႇၼႃႈႁူႇတႃမၼ်းသေဢွၵ်ႇၵႂႃႇ ၼႂ်းၼၼ်ႉသမ်ႉမိုၼ်ႈလႄႈ ပလၢတ်ႈၼႅတ်ႈႁၢဝ်ႉဢဝ်ၶႅၼ်ၸွမ်သႅင်ၵႂႃႇ ၸွမ်သႅင်ၵေႃႈၼႅတ်ႈၸၼ်ဢဝ်ၶေႃးသိူဝ်ႈမၼ်း သမ်ႉပေႃးႁတ်ႉၶေႃးသိူဝ်ႈမၼ်းဝႆႉသေ။
“ပွႆႇႁဝ်းလႄႈ” ၸွမ်သႅင်ပွႆႇၵႂႃႇ တူဝ်မၼ်းလူမ်ႉလူင်း မိုဝ်းမၼ်းတၼ်းၸၼ်သင်ၵေႃႈၸၼ်ယဝ်ႉ သမ်ႉဢမ်ႇတူၺ်းလီ ၸၼ်ၺႃးၽႃႈၸဵတ်ႉၸွမ်သႅင် လွၼ်ႈလူင်ၵႂႃႇ။ ဢၢႆႉ!!!! သဵင်ႁွင်ႉမၼ်းလင်ၼႂ်းႁွင်ႈ လပ်းႁူလပ်းတႃသေ ထူဢွၵ်ႇမႃးယူႇ။
ဢၢပ်ႇၼမ်ႉဢၢပ်ႇသင်ယဝ်ႉ မႃးၼင်ႈၵိၼ်ၶဝ်ႈႁူမ်ႈမူႇၵၼ်ယူႇၵေႃႈ ဢမ်ႇယၵ်ႉတူၺ်းၼႃႈၵၼ်လႆႈယဝ်ႉၼႃႇ။ မႄႈပႃႈၵေႃႈထၢမ်
“ၼႆႉပဵၼ်ၽူဝ်ၼၢင်းႁႃႉ ဢမ်ႇယၢမ်ႈႁၼ်ႁွင်ႉမႃးသေပွၵ်ႈ”
သမ်ႉပေႃးၵႅၼ်ႉၶဝ်ႈၵႂႃႇယဝ်ႉ “ၶႃႈလိုမ်းတေႉဢေႃႈ ပဵၼ်ႁူဝ်ၼႃႈတိုၵ်ႉၸင်ႇႁႃမႃး ၵူၺ်းၶႃႈ ၶဝ်ၸိုဝ်ႈဝႃႈၸွမ်သႅင်ၼႆဢေႃႈ”
“ၼၼ်ႁႃႉ..ယူဝ်ဝႃႈပဵၼ်ၽူဝ်မေးၵၼ်ၼႆဢိူဝ်ႈ မႃးၸွမ်းၵၼ်ၸိူင်ႉၼႆ” ယၵ်ႉတူၺ်းၸွမ်သႅင်သေ “ၸၢႆး မီးၼႃႈႁိူၼ်းယဝ်ႉၼႄႇ”
ၵမ်းၶဝ်ႈပေႃးဢမ်ႇၶႂ်ႈဢိုၼ်လူင်းၶေႃးလႆႈယဝ်ႉ “ပႆႇၶႃႈ”
“လီယဝ်ႉလူး” ယုမ်ႉယုမ်ႉသေတူၺ်းၼႃႈၶႃယူႇ။
ၵိၼ်ၶဝ်ႈၵိၼ်သင်ယဝ်ႉၼႆၵေႃႈ ၼင်ႈတီႈတုပ်ႈႁိူၼ်းၼၼ်ႉသေ သိုပ်ႇၾူၼ်းဢုပ်ႇပေႃႈၶဝ်ယူႇ။
“ပေႃႈ..ပႆႇၼွၼ်းၵွၼ်ႇႁႃႉ”
“ႁိူဝ်ႉယူႇႁႃႉ”
“ဢမ်ႇၶႃႈ..မိူဝ်ႈလဵဝ်ယိင်းမႃးမီးတီႈသူၼ်လုင်းပိူင်းၶဝ် ဢမ်ႇၸၢင်ႈၵႂႃႇႁႃပေႃႈလႆႈယဝ်ႉ”
“ၾူၼ်ၸွင်ႇတူၵ်းႁိုဝ်တၢင်းပုၼ်ႉ”
“တူၵ်းႁႅင်းၼႃႇ”
ဢုပ်ႇၵၼ်တူင်ႉတၵ်ႉၵၼ်ယူႇတၢၼ်ႇတၢၼ်ႇ သင်ႇပေႃႈၶဝ်ၼွၼ်းသေ မၼ်းၸင်ႇတေၶဝ်ႈႁိူၼ်းမိူဝ်းယဝ်ႉ။ ပေႃႈၶဝ်ၵေႃႈ သမ်ႉဝႃႈလိုၵ်းယဝ်ႉသေတႃႉ ၵႃႈပႆႇႁူႉဝႃႈလုၵ်ႈယိင်းမၼ်းယူႇတီႈလႂ်ၼႆ ပႆႇၸၢင်ႈလပ်းတႃၼွၼ်းလူင်းလႆႈ။
ၶဝ်ႈမိူဝ်းၵႂႃႇပႆႇတၼ်းၶဝ်ႈတီႈၼွၼ်း
“ၼေႈသူ ႁွင်ႈၽၢႆႈယူႇတီႈလႂ်”
“တီႈဢၢပ်ႇၼမ်ႉမိူဝ်ႈၵႆႈၼၼ်ႉ”
သမ်ႉပေႃးဢဝ်ၸွမ်သႅင်ၼိမ်ယဵၼ်ၵႂႃႇၵမ်းလဵဝ် ငိုၼ်းသႅင်ၼွၼ်းၶူတ်းပေႃးဢမ်ႇႁတ်းတူင်ႉတူဝ်ယူႇ၊ ၵွပ်ႈပိူဝ်ႈဢမ်ႇမီးႁွင်ႈၼွၼ်းယဝ်ႉလႄႈ မႄႈပႃႈၵေႃႈသိူဝ်ႇပၼ်ၶႃၼွၼ်းယူႇတီႈၼႂ်းၵၢင်ႁိူၼ်းၵႂႃႇ။
သိုပ်ႇလူထႅင်ႈတွၼ်ႈတေမႃးၶႃႈ
