ႁၵ်ႉၸွမ်းလူမ်း တွၼ်ႈသိပ်းႁႃႈ

ဢဝ်ၵၢၼ်ဢဝ်ငၢၼ်းမၼ်းဝၢင်းဝႆႉပၼ်သေ မႄးၽိူၼ်မႄးၽဵဝ်ႈ ၼမ်ႉၼဵင်ႈၼမ်ႉမႆႈႁၢင်ႈႁႅၼ်း ပႂ်ႉႁပ်ႉတွၼ်ႈႁူဝ်ၼႃႈမၼ်းယူႇ။

“မႂ်ႇသုင်ၵၢင်ၼႂ်ၶႃႈ”

“မႃးၸဝ်ႉလီယူႇလူးမိူဝ်ႈၼႆႉ”

ၸွမ်သႅင်ၵေႃႈ မႃးထတ်းတူၺ်းဢၼ်ငိုၼ်းသႅင်ႁဵတ်းမႃးၸိူဝ်းၼၼ်ႉ သမ်ႉဝႃႈၶႂ်ႈၼႄးယူႇၵေႃႈ မၼ်းသမ်ႉႁဵတ်းလႆႈလီယူႇ ဢမ်ႇၸၢင်ႈၼႄးသင်ယဝ်ႉ ယၵ်ႉတူၺ်းငိုၼ်းသႅင်သေ ယုမ်ႉဢွၵ်ႇမႃးၼင်ႇပေႃးၸႂ်ဝႆႉယူႇ။ ယူႇၸူဝ်ႈၼိုင်ႈ ငိုၼ်းသႅင်ၵေႃႈ ဢဝ်တင်းၵေႃႇၾီႇ မႃးတမ်းပၼ်သေ မိူၼ်ဝႃႈတေပဵၼ်ၵေႃႇၾီႇတီႈသႅင်ႇဢၼ်မၼ်းသိုဝ်ႉၵိၼ်ယူႇတႃႇသေႇၼၼ်ႉယဝ်ႉ။

“ၸူမ်းယဝ်ႉ” မၼ်းၵေႃႈယိပ်းမႃးၵိၼ်သေ သိုပ်ႇႁဵတ်းၵၢၼ်မၼ်းၵႂႃႇ။

ဝၼ်းယဝ်ႉဝၼ်းပူၼ်ႉၵႂႃႇ ငိုၼ်းသႅင်ၵေႃႈႁဵတ်းၵၢၼ်မၼ်းသေ ႁပ်ႉၵၢၼ်ယဝ်ႉ သိုပ်ႇသူင်ႇပၼ်ႁူဝ်ၼႃႈမိူၼ်ၼင်ႇၵူႈပွၵ်ႈၵူၺ်း၊ ၼင်ႇဝႃႈတေလႆႈယူႇလီလီယဝ်ႉ ၸမ်လိုဝ်ႈမႃးၵေႃႈ

“ၽူႈမၢႆ..မိူၼ်ၼင်ႇဝႃႈႁွင်ႈမိုဝ်ႉတေမီးပၼ်ႁႃယဝ်ႉဢေႃႈ”

“ပၼ်ႁႃလွင်ႈသင်ၶႃႈ”

“ၽၵ်းတီႈၸဝ်ႈသူၼ်ဢၼ်ႁဝ်းသင်ႇသိုဝ်ႉမႃးၼၼ်ႉ မီးပၼ်ႁႃဝႆႉလႄႈ တိုၵ်ႉမႃးထိုင်ၵူၺ်းၼဝ်ႈမူတ်းဢေႃႈ” ဢဝ်ၶႅပ်းႁၢင်ႈမၼ်းၼႄယူႇ။

ငိုၼ်းသႅင်ၵေႃႈၼႅတ်ႈၵပ်းသိုပ်ႇတူၺ်းတီႈၸဝ်ႈသူၼ် ၸဝ်ႈသူၼ်ၵေႃႈ မိူၼ်တေဢမ်ႇႁူႉၸွမ်းလွင်ႈသင်လႄႈ လႆႈသူင်ႇပၼ်ၼင်ႇၵူႈပွၵ်ႈၵူၺ်း၊ ဢမ်ႇႁူႉဝႃႈမၼ်းၼဝ်ႈလႆႈၸိူင်ႉႁိုဝ် ၸင်ႇလူင်းၵႂႃႇတူၺ်းတီႈႁွင်ႈမိုဝ်ႉ ဢၼ်မီးယူႇဝႆႉၼႂ်းႁူင်းလႅမ်းၼၼ်ႉယဝ်ႉ။

လႆႈႁူႉဝႃႈၵူၼ်းသူင်ႇၽၵ်းၼၼ်ႉ ဢမ်ႇၸႂ်ႈၵေႃႉဢၼ်ယၢမ်ႈမႃးသူင်ႇမိူၼ်ၵူႈပွၵ်ႈလႄႈ ထၢမ်တူၺ်းတီႈၸဝ်ႈသူၼ်ၵေႃႈ ၸဝ်ႈသူၼ်သမ်ႉဝႃႈလၢႆႈၵူၼ်းသူင်ႇယဝ်ႉမိူၼ်ၵၼ်ၼႆသေ ၵႃႈလႆႈႁႂ်ႈၸွမ်းႁႃၵူၼ်းသူင်ႇၽၵ်းၵေႃႉၼၼ်ႉယဝ်ႉ။

မိူၼ်ဝႃႈ ၵူၼ်းသူင်ႇၽၵ်းၵေႃႉၼၼ်ႉၵေႃႈ ၵပ်းသိုပ်ႇဢမ်ႇလႆႈလႄႈ ၵႃးတေႃႉသူင်ႇၽၵ်းၼၼ်ႉၵေႃႈ ဢမ်ႇလႆႈမိူဝ်းတီႈၸဝ်ႈသူၼ်မိူၼ်ၵၼ် သႂ်ႇၵႂႃႇသႂ်ႇမႃး ၸဝ်ႈသူၼ်ၵေႃႈၺႃးၸူၼ် ႁူင်းလႅမ်းၵေႃႈၺႃးလႅၼ်ယဝ်ႉသေ တွၼ်ႈတႃႇတေတေႃႉသူင်ႇၽၵ်းႁႂ်ႈပေႃးၶိုတ်းတၼ်းၼၼ်ႉ ဢမ်ႇၸႂ်ႈငၢႆႈငၢႆႈလႄႈ သမ်ႉမီးၵူၼ်းမႃးၸတ်းပွႆးထႅင်ႈၼႆသေ ပဵၼ်ယၢပ်ႇပဵၼ်ယဵၼ်းဝႆႉယူႇ။

မိူဝ်ႈလၢႆးငၢၼ်းၼႄၸွမ်သႅင်ယဝ်ႉၼႆၵေႃႈ ထိုင်တီႈပေႃးလႆႈႁွင်ႉၵၼ်ႁဵတ်းပၢင်ၵုမ် တႃႇႁႃၽၵ်းႁႂ်ႈပေႃးၶိုတ်းတၼ်းလႆႈလႄႈ တေလႆႈၵႂႃႇတူၺ်းတီႈသူၼ် ၸဝ်ႈသူၼ်ၼၼ်ႉၼႆယူႇ။ ၸွမ်သႅင်ၵေႃႉတေၵႂႃႇတူၺ်းၼႆသေ ၵႂႃႇႁင်းၵူၺ်းဢမ်ႇလႆႈလႄႈ လႆႈႁွင်ႉငိုၼ်းသႅင်ၵႂႃႇၸွမ်းယဝ်ႉ။

တၢင်းၵေႃႈၵႆ ၾူၼ်ၵေႃႈတူၵ်း သမ်ႉပၢႆလပ်းသိင်ႇထႅင်ႈႁေ တၢင်းၶဝ်ႈသူၼ်ၼၼ်ႉသမ်ႉပဵၼ်တၢင်းလိၼ်ၵူၺ်းလႄႈ ဢုင်ၵေႃႈဢုင်ဝႆႉ ၵႃးသမ်ႉပဵၼ်ၵႃးဢွၼ်ႇၵူၺ်း ငိုၼ်းသႅင်ၵေႃႉႁေႃႈ ၸွမ်သႅင်ၵေႃႉလႆႈလူင်းဢီးယူႇ။ ႁဵတ်းႁိုဝ်ၵေႃႈ မၼ်းၵႂႃႇဢမ်ႇလႆႈယဝ်ႉလႄႈ

“ၵိုတ်းတီႈၼႆႈသေ ပႆၵႂႃႇဢဝ်လႃႈ ဢမ်ႇၵႆယဝ်ႉ” ငိုၼ်းသႅင်ႁွင်ႉလၢတ်ႈမၼ်း။

“ၸိူင်ႉၼၼ်ၵေႃႈလီမိူၼ်ၵၼ်”

ဢဝ်တင်းၶူဝ်းလမ်ႇလွင်ႈၶႃၼၼ်ႉသေ ၵင်ႈၸွင်ႈလူင်ႇလဵဝ်ႁူမ်ႈၵၼ်ပႆလူင်ၵႂႃႇယူႇယဝ်ႉ။

“ဢမ်ႇႁူႉတေႁွင်ႉႁဝ်းမႃးၸွမ်းႁဵတ်းသင်”

“သူပဵၼ်ၽူႈမၢႆ ပေႃးဢမ်ႇႁႂ်ႈသူမႃး သမ်ႉတေႁႂ်ႈၽႂ်မႃးလႃႇ ၵႂႃႇႁဵတ်းတေႉလႄႈ တေဢမ်ႇထိုင်လႆႈယဝ်ႉၵုမ်ႇပွင်ႉၵူၺ်း”

ၾူၼ်တူၵ်းႁႅင်းလႄႈ လႅင်းၾူၼ်းၸွမ်းၸိူဝ်းၼၼ်ႉၵေႃႈဢမ်ႇလီ ပေႃးႁွတ်ႈတီႈသူၼ်တႄႉၵေႃႈ မီးလၵ်းမၼ်းဝႆႉ ၸၢင်ႈတေၵပ်းသိုပ်ႇလႆႈယူႇ၊ မၼ်းမႃးၸိူင်ႉၼႆ ဢမ်ႇတၼ်းလႆႈလၢတ်ႈတီႈမေႃယႃၶဝ်လႄႈ ပဵၼ်ဢၼ်မႆႈၸႂ်ဝႆႉယူႇယဝ်ႉ။

“ထႅင်ႈၵႆယူႇႁႃႉ ပႆမႃးပေႃးႁိုင်ယဝ်ႉ တမ်ႉဢမ်ႇထိုင်ႁေပွၵ်ႈ”

“ၵူႈပွၵ်ႈႁဝ်းယၢမ်ႈၶီႇၵႃးမႃးၵူၺ်း ဢမ်ႇပေႃးၵႆ ပႆတႄႉႁဝ်းၵေႃႈဢမ်ႇႁူႉဝႃႈမၼ်းႁိုင်ၵႃႈႁိုဝ်”

“ၶွင်သူဝႃႈမိူဝ်ႈၵႆႈမၼ်းဢမ်ႇၵႆၼႆ”

“ႁၼ်ၵၢင်ဝၼ်းမၼ်းဢမ်ႇၵႆတေႉလူး ႁဝ်းတေႁဵတ်းႁိုဝ်ႁူႉ”

“ဢမ်ႇၸႂ်ႈဝႃႈႁဝ်းမႃးၽိတ်းတၢင်းၵွၼ်ႇယူဝ်ႉ”

“တၢင်းမီးသဵၼ်ႈလဵဝ်ၵူၺ်း ႁဝ်းတွင်းယူႇ”

“ၸႂ်ႈယူႇတေႉ”

ယင်ႇလိုၵ်ႉၵမ်ႉယၼ် တွၼ်ႈသၢမ်သိပ်းသီႇ

ႁိုင်ၵႂႃႇပဵၼ်လိူၼ်လႄႈ ယူႇယူႇ ၸၢမ်ၽွင်း လၢတ်ႈတေႃႇမႃး။ “သူ..” ၼႆၶေႃႈလဵဝ်ၵူၺ်းၵေႃႈ ငဝ်းလိူၼ်ၼၼ်ႉတႄႉ ၸႂ်ပေႃးၵီႈၼႃႈယဝ်ႉဢိူဝ်ႈ။ “မီးၸိူင်ႉႁိုဝ်ၶႃႈ ႁဝ်းယူဝ်ဝႃႈ သူတေဢမ်ႇဢၢၼ်းတွပ်ႇႁဝ်းယဝ်ႉ” “ဢွၵ်ႇတၢင်းသေၵၢၼ်သုၵ်ႉၼႃႇဢိူဝ်ႈ” “ယူဝ်ဝႃႈ သူဢမ်ႇၶႂ်ႈလၢတ်ႈတေႃႇႁဝ်းယဝ်ႉၼႆၼႃး” “ၼၼ်ႉၵေႃႈပႃး” “ၸႂ်ႁၢႆႉ...

ယင်ႇလိုၵ်ႉၵမ်ႉယၼ် တွၼ်ႈသၢမ်သိပ်းသၢမ်

ဢၢႆႈၸၢႆးၼၼ်ႉ ၵေႃႉယႂ်ႇပဵၼ်မၢဝ်ႇမႃးယဝ်ႉလူး မေႃႁူႉမေႃဢၢႆ မီးၸူႉမီးၸူဝ်းမႃးယဝ်ႉလႄႈ။ ယူႇတႂ်ႈငဝ်းဢူႈမႄႈၵႂႃႇၸိူင်ႉၼႆၵေႃႈ ဢမ်ႇပေႉတူဝ်ပေႉၵၢၼ်းလႆႈ မၼ်းၵေႃႈသမ်ႉၶႂ်ႈႁႃငိုၼ်းႁႃတွင်းႁေ ဢွၵ်ႇၸႂ်ၶႂ်ႈၵႂႃႇႁဵတ်းၵၢၼ်မိူင်းထႆးမႃးယဝ်ႉ။ ပေႃႈမႄႈမၼ်းၵေႃႈ...

ယင်ႇလိုၵ်ႉၵမ်ႉယၼ် တွၼ်ႈသၢမ်သိပ်းသွင်

ဝၢႆးသေဢေးၼၢင်းယူႇၸၼ်ႉသုင်ယဝ်ႉ ၶဝ်ၵေႃႈဢမ်ႇလဵင်ႉမူယဝ်ႉလႄႈ တူမ်ႈလဝ်ႈႁဵတ်းႁႆႈႁဵတ်းသူၼ်ၶၢႆၽၵ်း လဵင်ႉၵၼ်ၵႂႃႇၵူၺ်းယဝ်ႉ။ မၢင်ပွၵ်ႈၵေႃႈ ႁႃယႃထိူၼ်ႇယႃၶိူဝ်းၸိူဝ်းၼႆႉၶၢႆယူႇ။ ၼၢင်းသိုဝ်ႉလူႇသမ်ႉ ပေႃးၶၢဝ်းႁိုဝ်ႉၼႆႉ ၵႆႉပဵၼ်ၵူၼ်ႉၵူၼ်ႉၶိုၼ်ႈၶိုၼ်ႈ...