ထိုင်ၶၢဝ်းယၢမ်းလိုဝ်ႈၵၢၼ်ယဝ်ႉၼႆၵေႃႈ တွၼ်ႈတႃႇငိုၼ်းသႅင်ၼၼ်ႉတႄႉ ပဵၼ်ၶၢဝ်းယၢမ်းဢၼ်မီးၵႃႈၶၼ်တႃႇမၼ်းတႄႉတႄႉ။ ၵူႈပွၵ်ႈတႄႉ ပေႃးၸမ်ထိုင်ၶၢဝ်းယၢမ်းၼႆ ႁိပ်ႈၼႅတ်ႈႁၢင်ႈႁႅၼ်းဝႆႉႁႂ်ႈယဝ်ႉယဝ်ႉ ပေႃးဝႃႈထိုင်ၶၢဝ်းယၢမ်းၼႆၵေႃႈ ၼႅတ်ႈဢွၵ်ႇမိူဝ်းၵမ်းလဵဝ်၊ မိူဝ်ႈၼႆႉသမ်ႉ ႁူဝ်ၼႃႈမႃးၸႂ်ႉၵၢၼ်မိူဝ်ႈၶၢဝ်းယၢမ်းၸမ်သဵင်ႈဢဝ်လီလီ တေထဵင်ၶိုၼ်းၵေႃႈ ၵၢင်ၼႂ်သမ်ႉမႃးလႃႈလႄႈ ဝႆႉဝႃႈသၢႆႈတႅၼ်းၵႂႃႇၶိုၼ်းသေ ႁဵတ်းသူင်ႇယဝ်ႉၵေႃႈ ပၼ်မၼ်းထတ်းယဝ်ႉ။
“ၶႃႈတေပွၵ်ႈမိူဝ်းၵွၼ်ႇယဝ်ႉၶႃႈ”
မၼ်းၵေႃႈဢမ်ႇတၵ်းသဵင် ၶႃႈၸင်ႇယွင်ႈယွင်ႈသေထွႆဢွၵ်ႇမႃး “ၽႂ်ပၼ်သူမိူဝ်း”
“မီးလွင်ႈႁင်ထႅင်ႈၶႃႈ”
“လၢႆးငၢၼ်းၸိူဝ်းၼႆႉ ႁုပ်ႈသေဢဝ်မႃးပၼ်ႁဝ်းလႄႈ”
“မိူဝ်ႈၽုၵ်ႈၸွင်ႇလႆႈၶႃႈ”
“သူမႃးတူၵ်းလိုၼ်းဢမ်ႇၸႂ်ႈႁႃႉ တေႁႂ်ႈႁၵ်းငိုၼ်းလိူၼ်ၼႄႇ”
“ၶႃႈမႃးတူၵ်းလိုၼ်း ႁႃႈမိၼိတ်ႉ ႁဵတ်းၵၢၼ်လိူဝ်ၵႂႃႇယဝ်ႉ သၢဝ်းမိၼိတ်ႉ ပေႃးၼၼ် သူၵေႃႈၶိုၼ်ႈပၼ်ငိုၼ်းလိူၼ်ႁဝ်းလႆႈယူႇၼႄႇ”
“ပေႃးဢမ်ႇၶႂ်ႈႁဵတ်းၵေႃႈဢွၵ်ႇၵႂႃႇလႄႈ ႁဝ်းဢမ်ႇလႆႈႁၢမ်ႈ”
ငိုၼ်းသႅင်ၵေႃႈ ဢမ်ႇၸၢင်ႈႁဵတ်းႁိုဝ် ယိပ်းဢဝ်လၢႆးငၢၼ်း ဢၼ်ၼႃပဵၼ်ၵွင်ၼၼ်ႉၵႂႃႇ တင်းဢဝ်တင်းပွင်ႉယူႇႁင်းမၼ်း
“ၸဵမ်ၸဝ်ႉၸဵမ်ၸဵဝ်းဢမ်ႇမေႃႁႃၸႂ်ႉ မႃးၸႂ်ႉဢဝ်ၶၢဝ်းပိူၼ်ႈလူဝ်ႇမိူဝ်း”
မၼ်းၵေႃႈႁွပ်ႇသႂ်ႇထူင်သေ ဢဝ်မိူဝ်းၵႂႃႇယဝ်ႉ၊ ၵူႈပွၵ်ႈတႄႉ ၵၢၼ်ၵေႃႈဝႆႉတီႈၵၢၼ် လွင်ႈတီႈႁိူၼ်းၵေႃႈဝႆႉတီႈႁိူၼ်းၵူၺ်း ဢမ်ႇဢဝ်မႃးလေႃးၵၼ် ၵူၺ်းၵႃႈ ပွၵ်ႈၼႆႉ ဢမ်ႇၸၢင်ႈႁဵတ်းႁိုဝ်လႄႈၵႃႈလႆႈဢဝ်မိူဝ်းပႃးယဝ်ႉ။
ၸွမ်သႅင်ၵေႃႈ ၵွပ်ႈပဵၼ်ဝၼ်းဢွၼ်တၢင်းသုတ်းၵူၺ်းလႄႈ ၵၢၼ်ၶႂ်ႈၼမ်ဝႆႉ မၼ်းသမ်ႉပဵၼ်ၵူၼ်းယွင်ႇၵၢၼ်ဝႆႉသေ ပေႃးဢမ်ႇၶမ်ႈလပ်းသိင်ႇၼႆ မၼ်းတေပႆႇလိုဝ်ႈၵၢၼ်သေမိူဝ်း။ ၵွပ်ႈလူဝ်ႇၸႂ်ႉလူဝ်ႇထၢမ်လႄႈ ၸင်ႇလႂ်ဝႃႈပႆႇၶႂ်ႈႁႂ်ႈၽူႈမၢႆမိူဝ်း ၵူၺ်းၵႃႈ မၼ်းၵေႃႈဢမ်ႇႁူႉဝႃႈ ငိုၼ်းသႅင်မိူဝ်းၵႂႃႇယဝ်ႉ။
ၼင်ႇႁၢင်ႈၶႂ်ႈတွင်ႉမႆႈယဝ်ႉလႄႈ ဢွၵ်ႇႁွင်ႈႁဵတ်းၵၢၼ်မႃး ယၵ်ႉတူၺ်းၵႂႃႇတီႈငိုၼ်းသႅင် ဢမ်ႇလႆႈႁၼ်ယဝ်ႉ
“ၽႂ်ၸႂ်ႉမိူဝ်းဢမ်ႇႁူႉ” ၼႅတ်ႈသိုပ်ႇၾူၼ်းၸူးၵမ်းလဵဝ် မႅၼ်ႈမိူဝ်ႈငိုၼ်းသႅင်တိုၵ်ႉၼင်ႈၵိၼ်ၶဝ်ႈၸွမ်းပေႃႈၶဝ်ယူႇ။
“ႁလူဝ်ၶႃႈ..”
“ၽႂ်ၸႂ်ႉသူမိူဝ်း”
“ႁဵတ်းယဝ်ႉတေသူင်ႇပၼ်တၢင်းဢီးမႄးလ်ၶႃႈ”
“ႁဝ်းလူဝ်ႇတၢင်းၽိုၼ်လိၵ်ႈ”
“မိူဝ်ႈၽုၵ်ႈၸွင်ႇၵွႆႈသူင်ႇပၼ်ၶႃႈ”
“ႁဝ်းလူဝ်ႇမိူဝ်ႈၼႆႉ”
“ဢေႃႈ ၵမ်ႉတေၵႂႃႇၶႃႈ”
“မီးလႂ်လႃႇမိူဝ်ႈလဵဝ်..”
“မီးႁူင်းယႃ” ၵူႈပွၵ်ႈလွင်ႈသုၼ်ႇတူဝ်မၼ်း ဢမ်ႇတွၼ်ႉလၢတ်ႈၼႄၵူၼ်းတီႈႁဵတ်းၵၢၼ် ၵူၺ်းၵႃႈပွၵ်ႈၼႆႉ ဢမ်ႇၸၢင်ႈႁဵတ်းႁိုဝ်ယဝ်ႉလႄႈ မိူၼ်ထုၵ်ႇတဵၵ်းတဵင်ႁႂ်ႈလၢတ်ႈယူႇ။
သဵင်မၼ်းယဵၼ်ၵႂႃႇၵႅပ်ႉၼိုင်ႈသေ ၸင်ႇၶိုၼ်းလၢတ်ႈၸူးငိုၼ်းသႅင် “ဢမ်ႇမႃးၵေႃႈလႆႈယဝ်ႉပေႃးၼၼ်” ဝၢင်းၵႂႃႇ ငိုၼ်းသႅင်တင်းဢမ်ႇတၼ်းလႆႈတွပ်ႇၶိုၼ်း။
“ၵူၼ်းဢီႈႁင် ၶႂ်ႈထူဝ်းၵေႃႈထူဝ်းၶႂ်ႈဝၢင်းၵေႃႈဝၢင်း”
“ၽႂ်လႃႇလုၵ်ႈ” ပေႃႈၶဝ်ႁၼ်မၼ်းပွင်ႉယူႇၸိူင်ႉၼၼ် ထၢမ်ၸူး။
“ႁူဝ်ၼႃႈတီႈႁဵတ်းၵၢၼ်ဢေႃႈ”
“မီးၵၢၼ်လွင်ႈယႂ်ႇႁႃႉ”
“ဢမ်ႇ… မၼ်းလၢတ်ႈဝႃႈ ဢမ်ႇပဵၼ်သင်ယဝ်ႉၼႆဝႃႇ”
“ၼၼ်ႁႃႉ..”
သမ်ႉဝႃႈယူႇတေႃႇၼႃႈပေႃႈ တေယုမ်ႉယၢႆႈဝႃႈမီးႁႅင်း ယူႇတေႃႇၼႃႈၵူၼ်းတင်းၼမ် တေလၢတ်ႈဝႃႈဢမ်ႇပဵၼ်သင် ၵူၺ်းၵႃႈၼႂ်းၸႂ်လိုၵ်ႉလိုၵ်ႉၼၼ်ႉ မၼ်းၸိုမ်ႉယမ်းၼမ်ႉတႃဝႆႉၽႂ်ဢမ်ႇႁၼ်လႆႈ။ ဝၼ်းမိူဝ်ႈၼႆႉၵေႃႈ မိူဝ်းႁွတ်ႈႁိူၼ်းယဝ်ႉ ၶႂ်ႈပွႆႇတူဝ်သေၼွၼ်းလပ်းယူႇၼႆၵေႃႈ ပႆႇၸၢင်ႈၼွၼ်းလႄႈ သိုပ်ႇႁဵတ်းၵၢၼ်ၵႂႃႇ တေႃႇပေႃးယဝ်ႉသေ ၼွၼ်းလပ်းပႆႇၸိုၼ်ႈ သမ်ႉပေႃးလူဝ်ႇလုၵ်ႉယဝ်ႉ ၼႅတ်ႈဢွၵ်ႇၵႂႃႇၵူဝ်တူၵ်းလိုၼ်းထႅင်ႈၼၼ်ႉယဝ်ႉ။
သိုပ်ႇလူထႅင်ႈတွၼ်ႈတေမႃးၶႃႈ
