တူၺ်းတီႈႁႅင်းၸုင်ၸၼ် ဢမ်ႇၸႂ်ႈၶေႃႈၵႂၢမ်းလၢတ်ႈ ၵူၼ်းၵေႃႉဢၼ်ဝႃႈၸႂ်ႈယဝ်ႉ တေၸႂ်ၼိမ် ဢမ်ႇၸႂ်ႈၸႂ်သုၵ်ႉ ႁႂ်ႈတူၺ်းဝႃႈၶဝ်ထႅမ်ႁႅင်းပၼ်ၸၢတ်ႈပၢၼ်သူႁႃႉ ၸုပ်ႇဢဝ်ႁႅင်းသူၵႂႃႇ သင်ယူႇၸွမ်းယဝ်ႉၸႂ်ၼိမ် ၶႂ်ႈဝႃႈပဵၼ်ၵူၼ်းၵေႃႉဢၼ်ၸႂ်ႈယဝ်ႉ။
မိူဝ်ႈမီးပၼ်ႁႃၼၼ်ႉ ၵႄႈၶႆၵႂႃႇၼင်ႇၵူၼ်းလူင် သင်ၶဝ်ပၢႆႈသေဢမ်ႇဢဝ်ပုၼ်ႈၽွၼ်း ပွင်ႇဝႃႈၼၼ်ႉမၼ်းပၼ်ၾၢင်ႉယဝ်ႉ ယႃႇတူၺ်းမိူဝ်ႈၵျေႃႇသိူဝ်းၵူၺ်း ႁႂ်ႈတူၺ်းမိူဝ်ႈမီးတၢင်းယၢပ်ႇၼၼ်ႉလႄႈ။
တၢင်းႁၵ်ႉတေလူႉလႅဝ်ၵႂႃႇ ယွၼ်ႉသွင်ၵေႃႉမီးပဝ်ႉမၢႆလွင်ႈႁဵတ်းသၢင်ႈၶတ်းၵၼ် ၵႂႃႇၽိတ်းတၢင်းယူႇတႃႇသေႇၼၼ်ႉယဝ်ႉ။
ၵူၼ်းၵေႃႉဢၼ်ဝႃႈၸႂ်ႈယဝ်ႉၼၼ်ႉ ဢမ်ႇႁဵတ်းႁႂ်ႈသူၶႂ်ႈပဵၼ်ၵူၼ်းလမ်ႇလွင်ႈတႃႇၶဝ် ၵူၺ်းၵႃႈတေႁဵတ်းလွင်ႈလဵၵ်ႉလဵၵ်ႉၼွႆႉၼွႆႉႁႂ်ႈႁူႉဝႃႈၶဝ်သႂ်ႇၸႂ်ယူႇ။
ထတ်းသၢင်ၸွမ်းၶၢဝ်းယၢမ်း ဢမ်ႇႁိပ်ႈယွၼ်ႉတိုၵ်ႉႁၵ်ႉမႂ်ႇမႂ်ႇ ပၼ်ၶၢဝ်းယၢမ်း 3-6 လိူၼ် တႃႇတူၺ်းၸႂ်ၵၼ် ႁၵ်ႉတႄႉဢမ်ႇၸႂ်ႈလွင်ႈဢၼ်လူဝ်ႇႁိပ်ႈ ၵူၺ်းၵႃႈ မၼ်းပဵၼ်လွင်ႈဢၼ်ၼပ်ႉသၢင်ႈလီယဝ်ႉ။
တူၺ်းလွင်ႈႁဵတ်းသၢင်ႈဢၼ်ၶဝ်ႁဵတ်းပၼ်ၵူၼ်းႁိမ်းႁွမ်း ၶဝ်ႁဵတ်းတေႃႇပိူၼ်ႈၸိူင်ႉႁိုဝ် ၶဝ်တေႁဵတ်းတေႃႇသူၸိူင်ႉၼၼ်မိူဝ်းၼႃႈ သင်ပဵၼ်ၵူၼ်းဢၼ်ႁဵတ်းလီတေႃႇသူယူႇ ၵူၺ်းႁၢႆႉတေႃႇပိူၼ်ႈၼႆ ဝၼ်းၼိုင်ႈသူၵေႃႈတေထူပ်းၸိူင်ႉၼၼ်တီႈၶဝ်ယူႇ။
ထွမ်ႇသဵင်တူဝ်ၵဝ်ႇၼမ်လိူဝ်သေထွမ်ႇသဵင်ပိူၼ်ႈ ၼႂ်းၸႂ်သူၼၼ်ႉမၼ်းမႅၼ်ႈယမ်လိူဝ်သေၶေႃႈၼႄႉၼမ်းပိူၼ်ႈ သင်လိုၵ်ႉလိုၵ်ႉယဝ်ႉသူဢမ်ႇၵတ်းၸႂ်ၸွမ်းၵေႃႈ ယႃႇႁွင်ႉမၼ်းဝႃႈတၢင်းႁၵ်ႉလႄႈၼႃႈ။
ယႃႇၵႂင်ၸွမ်း မွၵ်ႇၼႃႈၸူဝ်ႈၶၢဝ်း ယွၼ်ႉ လဝ်း၊ ႁၢင်ႈလီ၊ မၢၵ်ႈမီး မၼ်းၵေႃႈပဵၼ်ၶွင်ထႅမ်ၵူၺ်း မွၵ်ႇၼႃႈတေႉတေႉၼၼ်ႉ ပဵၼ် လွင်ႈလူမ်ၸႂ် လွင်ႈႁူမ်ႇလူမ်ႈတၢင်းၸႂ်ၼၼ်ႉယဝ်ႉ။
တူၺ်းဝႃႈၶဝ်ဢွၼ်သူၶိုၼ်ႈယႂ်ႇႁႃႉ ၸုင်ၸၼ်ႁႂ်ႈလူင်းၵႂႃႇ ၵေႃႉၵူႈလီၼၼ်ႉတေဢွၼ်ၵၼ်ႁႂ်ႈၶႅၼ်ႇၶိုၼ်ႈ ဢမ်ႇၸႂ်ႈႁႂ်ႈၵေႃႉၼိုင်ႈလဵၵ်ႉလူင်းသေ ၵေႃႉၼိုင်ႈသမ်ႉပဵၼ်ယႂ်ႇဝႆႉယူႇ။
ၸႂ်ႉပိူင်ဢၼ်ႁၵ်ႉတူဝ်ၵဝ်ႇသေယဝ်ႉ ၸင်ႇလိူၵ်ႈလႄႈ သင်တူဝ်ၵဝ်ႇယင်းပႆႇတဵမ် တေလိူၵ်ႈၶဝ်ႁႂ်ႈမၼ်းငၢၵ်ႈထႅင်ႈၵူၺ်း သင်သူတဵမ်ယဝ်ႉ တေလိူၵ်ႈၵူၼ်းမႃးထႅမ်ထႅင်ႈ ဢမ်ႇၸႂ်ႈမႃး မႄး။
ပိၼ်ႇ – ငဝ်မွင်မိုတ်းမူဝ်း
