ၵေႃႉမီးယိူင်းဢၢၼ်းၼၼ်ႉ ၸၢတ်ႈပၢၼ်မၼ်းႁိုဝ်ငၢႆႈ
မၢင်ပွၵ်ႈၵေႃႈမိူၼ်မီးလူမ်းလႅင်ႉလူင်ၽတ်ႉထွင်းၶဝ်ႈမႃးယူႇဢိူဝ်ႈ သမ်ႉဝႃႈၸုၵ်းယူႇၵေႃႈလူမ်ႉလူင်းလႆႈယဝ်ႉ။
ၵူၺ်းၵႃႈ လွင်ႈတုၵ်ႉၶယၢပ်ႇၽိုတ်းတၢင်းလၢႆၼၼ်ႉ ပၼ်တွၼ်ႈသွၼ်ယဝ်ႉ။
ယိူင်းဢၢၼ်း ဢၼ်မီးယူႇၼၼ်ႉၵေႃႈ ၼႄပၼ်သဵၼ်ႈတၢင်းႁႂ်ႈႁဝ်းသိုပ်ႇယၢင်ႈၵႂႃႇတၢင်းၼႃႈထႅင်ႈ။
ၸွင်ႇယၢမ်ႈပဵၼ်ႁိုဝ်ဝႃႈ တူဝ်ၵဝ်ႇၼၼ်ႉဢမ်ႇၵတ်ႉၶႅၼ်ႇ၊ ဢမ်ႇႁဵတ်းလႆႈ၊ ယိူင်းဢၢၼ်းၼၼ်ႉမၼ်းႁၢင်ႇၵႆႁဝ်းၼႃႇ လွင်ႈၸိူင်ႉၼႆ မၼ်းၸၢင်ႈဝူၼ်ႉယူႇ။
ၵူၺ်းၵႃႈဢၼ်လမ်ႇလွင်ႈၼႆႉ ယႃႇပၼ်ႁႂ်ႈလွင်ႈၸိူဝ်းၼႆႉ မႃးၵိုတ်းလိုဝ်ႈႁဝ်း ၸၢမ်းႁူၼ်လင်ၶၢဝ်းယၢမ်း ဢၼ်ႁဝ်းတႄႇမီးယိူင်းဢၢၼ်းမႃးၼၼ်ႉလႄႈ မိူဝ်ႈၼၼ်ႉ ႁဝ်းမီးတၢင်းသိူဝ်းလႄႈႁဝ်းမီးဢဵၼ်ႁႅင်းတၢၼ်ႇႁိုဝ်ၼႆ၊ ၵဵပ်းဢဝ်လွင်ႈဢၼ်ႁဝ်းလႆႈႁူပ်ႉႁၼ်မိူဝ်ႈၼၼ်ႉ မႃးပဵၼ်ႁႅင်းတႃႇႁဝ်းသိုပ်ႇၵႂႃႇထႅင်ႈ။
မိူဝ်ႈလူမ်ႉၵေႃႈလူမ်ႉလႆႈယူႇ ၵူၺ်းၵႃႈလုၵ်ႉၶိုၼ်းႁႂ်ႈလႆႈလႄႈ ဢမ်ႇမီးၽႂ်ဢမ်ႇယၢမ်ႈႁဵတ်းၽိတ်း ဢၼ်လူမ်ႉယူႇၼၼ်ႉ မၼ်းပဵၼ်သုၼ်ႇၼိုင်ႈၶွင်ၸၢတ်ႈပၢၼ်ၵူၺ်း။ ဢၼ်လမ်ႇလွင်ႈၵေႃႈႁဵၼ်းႁူႉတီႈမၼ်းၼၼ်ႉသေ ၼႅတ်ႈလုၵ်ႉၶိုၼ်ႈမႃးမႂ်ႇ ႁႂ်ႈဝႆးလိူဝ်သေၵဝ်ႇလႄႈ။
ယုမ်ႇယမ်တူဝ်ၵဝ်ႇ ႁဝ်းၵူႈၵေႃႉမီးၼမ်ႉၵတ်ႉၼႂ်းတူဝ်ဝႆႉယူႇ ယႃႇဢဝ်တူဝ်ၵဝ်ႇၵႂႃႇတႅၵ်ႈၼိူင်းတင်းၽႂ် သႂ်ႇၸႂ်တူဝ်ၵဝ်ႇသေ ၽိူမ်ႉထႅမ်ပၼ်ၼမ်ႉၵတ်ႉတူဝ်ၵဝ်ႇၵႂႃႇၵူႈဝၼ်းဝၼ်းလႄႈ ယုမ်ႇဝႃႈႁဝ်းၼၼ်ႉႁဵတ်းလႆႈယူႇ ႁဝ်းတေၵႂႃႇထိုင်ယိူင်းမၢႆၼၼ်ႉယူႇၵူၺ်း။
မိူဝ်ႈမီးယိူင်းဢၢၼ်းယဝ်ႉၵေႃႈ လူင်းမိုဝ်းႁဵတ်းလႄႈ ယိူင်းမၢႆဢၼ်ႁၢင်ႈလီၼၼ်ႉ မၼ်းတေပဵၼ်မႃးလႆႈၵေႃႈ မိူဝ်ႈႁဝ်းတႄႇလူင်းမိုဝ်းႁဵတ်း ယႃႇၵူဝ်တေတႄႇမႂ်ႇၶိုၼ်း လွင်ႈလဵၵ်ႉလဵၵ်ႉဢွၼ်ႇၼၼ်ႉၵူၺ်းၵေႃႈ တေဢွၼ်ၵႂႃႇၸူးယိူင်းမၢႆဢၼ်ႁဝ်းၶႂ်ႈပဵၼ်ၼၼ်ႉၼႆယူႇ။
တွင်းဝႆႉဝႃႈ ဢမ်ႇမီးႁဝ်းၵေႃႉလဵဝ်ၵူၺ်း ၽႂ်ၵေႃႈမီးသဵၼ်ႈတၢင်းလႄႈလွင်ႈၶဵင်ႇတႃႉႁင်းၽႂ်ႁင်းမၼ်း ၵွပ်ႈၼၼ် ယႃႇၵိုတ်းယူႇတီႈၵဝ်ႇၵူၺ်းသေ ပွႆႇပႅတ်ႈတၢင်းယိူင်းဢၢၼ်း ဢၼ်လမ်ႇလွင်ႈလိူဝ်ပိူၼ်ႈၵေႃႈ ယႃႇၽွမ်ႈယွမ်းသုမ်းၼၼ်ႉယဝ်ႉ။
ပိၼ်ႇ-ငဝ်မွင်မိုတ်းမူဝ်း
