တွင်ႉၾႃႉၸိုၼ်ႈသႂ် သၢႆလူမ်းထူဝ်းထွင်း ၽွင်းမိူဝ်ႈၶမ်းႁွမ်တေပွၵ်ႈမိူဝ်းၶိုၼ်းၼၼ်ႉ ၸင်ႇၸူဝ်းဢဝ်တင်းၼေႃႇမိူင်းသေ ဝႄႉတီႈလၢၼ်ႉမႄးလူတ်ႉၸၢႆးၶမ်းၼၼ်ႉယူႇ ၸၢႆးၶမ်းၵေႃႈ မိူဝ်ႈႁၼ်ၶမ်းႁွမ်မႃး ၼႅတ်ႈမႃးတူင်ႉတၵ်ႉၸူးၵမ်းလဵဝ်။
“မႃးဝႄႉႁဝ်းသေၶႃႈလႃႇၼႆႉ ၶဝ်ႈၵႂႃႇၼင်ႈတၢင်းၼႂ်းၵွၼ်ႇလႄႈ”
ၼေႃႇမိူင်းတႄႉၵေႃႈ ၵႂႃႇလဵၼ်ႈၵေႃႉၵၼ်တင်းလုၵ်ႈၸၢႆးၶမ်းၶဝ်ၼၼ်ႉယူႇ။
“ၸႂ်ထိုင်ၵူၼ်းၵေႃႉၼိုင်ႈလႄႈလႆႈမႃးဝႄႉၵူၺ်း…” လႆႈၼင်ႈသေဢုပ်ႇၵၼ်ၵႂႃႇ။
“သူယူႇလီယူႇၶႃႈႁႃႉ…တူၺ်းမိူၼ်ဢမ်ႇပေႃးလီတေႉၼၼ်ႉၶႃႈယဝ်ႉ…”
“ၼၼ်ႉၶႃႈယဝ်ႉ…မၢင်ပွၵ်ႈမႃးၵေႃႈၶႂ်ႈယုမ်ႉယူႇ…ၵူၺ်းၵႃႈမိူဝ်ႈဝူၼ်ႉထိုင်ၶဝ်…တေႁဵတ်းႁိုဝ်ယုမ်ႉဢွၵ်ႇမႃးလႆႈ…”
“ၶႂ်ႈႁႆႈၵေႃႈ…ႁႆႈဢွၵ်ႇမႃးၶႃႈလႄႈ…”
“ၼမ်ႉတႃ…မၼ်းဢမ်ႇလႆႈၸွႆႈပူၵ်းၶဝ်ႁႂ်ႈပွၵ်ႈမႃးၶိုၼ်းလူး…ႁဝ်းၵိုတ်းယူႇၽၢႆႇလင်ႁဝ်းလူဝ်ႇၵႅၼ်ႇၶႅင်လႄႈ…သိုပ်ႇၵႂႃႇတၢင်းၼႃႈ…ႁဝ်းတေဢမ်ႇႁႆႈယဝ်ႉ…” ယူႇယူႇၵေႃႈၼမ်ႉတႃမၼ်းယွႆႉယွတ်ႇတူၵ်းလူင်း ၼိူဝ်ၵႅမ်ႈမၼ်းၼၼ်ႉႁင်းၵူၺ်းယဝ်ႉ သဵင်ႁႆႈၵေႃႈလင်မေႃးမႃးတေႃႇၼႃႈၸၢႆးၶမ်းၼၼ်ႉသေ
“ႁဝ်းဢမ်ႇမီးတိုဝ်ႉတၢင်းယဝ်ႉၸွင်ႇၸႂ်ႈႁိုဝ်…ႁဝ်းဢမ်ႇမီးတိုဝ်ႉတၢင်းတႃႇတေလႆႈထူပ်းၶဝ်ထႅင်ႈယဝ်ႉၸွင်ႇၸႂ်ႈ…ၶဝ်ၽၢတ်ႇယၢၼ်ၵႂႃႇၸိူင်ႉၼႆ…မိူၼ်ႁူဝ်ၸႂ်ႁဝ်းတေတႅၵ်ႇယဝ်ႉ…ႁဝ်းယဵၼ်ႉၵၼ်ႈဝႆႉ…ဢမ်ႇႁႂ်ႈလႆႈႁွင်ႉႁႆႈ…ၶတ်းၸႂ်ႁဵတ်းၵၢၼ်ႁႂ်ႈလိုမ်းၶဝ်ၵႂႃႇ…ၶတ်းၸႂ်ဢမ်ႇဝူၼ်ႉထိုင်…ယိုင်ႈႁဵတ်းႁႂ်ႈၶုၵ်းၸႂ်လႆႈမႃး…ႁဝ်းၸႂ်ထိုင်ၶဝ်တေႉၼၼ်ႉယဝ်ႉ…ႁဝ်းၶႂ်ႈထူပ်းၶဝ်သေပွၵ်ႈၼိုင်ႈ…ႁႂ်ႈလႆႈလၢတ်ႈၶေႃႈၵႂၢမ်းဢၼ်ၶႂ်ႈလၢတ်ႈ…သင်ဢမ်ႇသင်…ၶဝ်လႆႈႁပ်ႉႁူႉၸူဝ်ႈပႆႇတၢႆယင်းလီ…”
ၶမ်းႁွမ်ၵေႃႈၼင်ႈႁွင်ႉႁႆႈယူႇတင်းႁိုင် ထိုင်တီႈၵၢင်ဝၼ်းသမ်ႉပေႃးတေၶမ်ႈပႅတ်ႈယဝ်ႉ။ ၸၢႆးၶမ်းၵေႃႈ မိူဝ်ႈႁၼ်ၶမ်းႁွမ်ပဵၼ်ၸိူင်ႉၼၼ်
“ၸွင်ႇတေလႆႈမိူဝ်းသူင်ႇယူႇၶႃႈႁႃႉ…”
“ဢမ်ႇပဵၼ်သင်ၶႃႈ…မိူဝ်းလႆႈယူႇ…”
“ၼေႃႇမိူင်းမႃးလႄႈလုၵ်ႈႁဝ်းမိူဝ်း!!” ၼေႃႇမိူင်းပႆႇမႃး မၼ်းၶပ်းၸၢၵ်ႈလူတ်ႉပႂ်ႉထႃႈသေ မီးသဵင်ဢၼ်ၼိုင်ႈ
“မိူဝ်းၸွမ်းၸွင်ႇလႆႈႁိုဝ်…” သဵင်ၼၼ်ႉမိူၼ်ပဵၼ်သဵင်လႅင်းမိူင်းၼႆၵေႃႈ ၼႅတ်ႈဝၢႆႇယၵ်ႉၸူးတူၺ်းၵမ်းလဵဝ် ႁဵတ်းႁႂ်ႈၶမ်းႁွမ်တူၵ်းၸႂ်ၵႂႃႇလႄႈ ပွႆႇမိုဝ်းယဝ်ႉ တိၼ်ၵေႃႈဢမ်ႇထိင်းလႆႈယဝ်ႉသေ လူတ်ႉၵေႃႈလူမ်ႉလူင်းၵႂႃႇ တင်းၵူၼ်းတင်းလူတ်ႉလူမ်ႉၸွမ်းၵၼ်ယူႇ။
မိုၼ်းတႃမႃးႁၼ်လႅင်းမိူင်း ၸုၵ်းယိုၼ်းမိုဝ်းမိူၼ်တေႁပ်ႉမၼ်းယူႇၼၼ်ႉ
“လူတ်ႉလူမ်ႉတဵင်ႁေတၢႆၵႂႃႇယဝ်ႉႁႃႉၼႆႉ”
လႅင်းမိူင်းၼၼ်ႉၵေႃႈ ယုၵ်ႉလူတ်ႉၼၼ်ႉၶိုၼ်ႈမႃးသေယဝ်ႉ ၸင်ႇယိုၼ်းဢဝ်မိုဝ်းၶမ်းႁွမ် မိူဝ်ႈၶမ်းႁွမ်ယိပ်းဢဝ်ၼၼ်ႉၵေႃႈ
“သူမႃးႁပ်ႉႁဝ်းႁႃႉ..”
ၶမ်းႁွမ်ၶုၼ်ႇၸၼ်မိုဝ်းၼၼ်ႉလုၵ်ႉမႃးသေ ႁူႉဝႃႈတူဝ်ၵဝ်ႇဢမ်ႇပႆႇတၢႆၼႆလႄႈ ဢမ်ႇတင်ႈၸႂ်တူၺ်းၼႃႈၵူၼ်းၵေႃႉၼၼ်ႉယဝ်ႉ ဝူၼ်ႉဝႃႈတႃလၢႆးၵူၺ်းၼႆသေ
“ၸူမ်းၼမ်ၼမ်ၶႃႈ”
မိူဝ်ႈၵႂႃႇဢဝ်လူတ်ႉမၼ်းၶိုၼ်းၼၼ်ႉ
“ႁဝ်းယွၼ်းမိူဝ်းၸွမ်းၸွင်ႇလႆႈႁိုဝ်”
ၶမ်းႁွမ်ဝိၼ်ႇယၵ်ႉတူၺ်းလီလီ သီႁူသီတႃတူၺ်းၵေႃႈ တင်းတိုၵ်ႉပဵၼ်လႅင်းမိူင်းယူႇလႄႈ ပဵၼ်ၽီႁႃႉပဵၼ်ၵူၼ်းပေႃးဢမ်ႇၶႂ်ႈယုမ်ႇတူဝ်ယဝ်ႉ။
“ပီႈၸၢႆးၶမ်း!!” ဝိၼ်ႇၼႃႈႁွင်ႉသေႃႇၶဝ်ႈမိူဝ်းၼႂ်းႁိူၼ်းၼၼ်ႉယူႇ ၸၢႆးၶမ်းဢမ်ႇတၵ်းသဵင်။
ၶမ်းႁွမ်ၵေႃႈ ၶူၼ်တုမ်ႇၼိူဝ်ႉၵီႈမႃးယဝ်ႉ ယၵ်ႉတူၺ်းၼႃႈၵူၼ်းၵေႃႉၼၼ်ႉလီလီသေ “ပဵၼ်ၽီၵေႃႈယဝ်ႉလႃႈ ႁဝ်းၵေႃႈယင်းၶႂ်ႈႁႂ်ႈပဵၼ်သူယူႇဢိူဝ်ႈ ဢမ်ႇပဵၼ်သင် ႁဝ်းတေယွမ်းႁပ်ႉသေ ပွႆႇႁႂ်ႈသူၵႂႃႇႁွတ်ႈတီႈလီ တေႁဵတ်းၵၢၼ်လီၵုသူဝ်ႇပၼ်သူၵႂႃႇၵူၺ်းၼႃႈ”
“သူတေပၼ်ႁႂ်ႈႁဝ်းၵႂႃႇတေႉႁႃႉ”
“ဢိုမ်ႈ..”
“ႁဝ်းဢမ်ႇၶႂ်ႈၵႂႃႇ ပေႃးၵႂႃႇၵေႃႈတေႁႂ်ႈသူၵႂႃႇၸွမ်းၼၼ်ႉယဝ်ႈ…”
“ႁဝ်းၵႂႃႇၸွမ်းသူဢမ်ႇလႆႈ ႁဝ်းယင်းတိုၵ်ႉမီးၼေႃႇမိူင်းယူႇ ပေႃးႁဝ်းၵႂႃႇၸွမ်းသူ ၶဝ်တေႁဵတ်းႁိုဝ်ယူႇယဝ်ႉလႃႇ”
“သူယၢမ်ႈႁၼ်ၽီလၢတ်ႈတေႃႇၵူၼ်းလႆႈသေႁႃႉ!!..”
“ဢိုမ်ႈ..ႁၼ်ၵူႈဝၼ်းယဝ်ႉ ၸဵမ်မိူဝ်ႈဝၼ်းဢၼ်ႁူႉဝႃႈသူဢမ်ႇပွၵ်ႈမႃးယဝ်ႉ ယူႇတီႈလႂ်ၵေႃႈႁၼ်သူၵူႈတီႈယဝ်ႉ”
လႅင်းမိူင်းၶုၼ်ႇလႅၼ်ႈမႃးၵွတ်ႇသႂ်ႇၶမ်းႁွမ်သေ
“ႁဝ်းၸႂ်ထိုင်သူတေႉယဝ်ႉ”
ၶမ်းႁွမ်ၵေႃႈ ဢဝ်မိုဝ်းဢွၼ်ႇမၼ်း သွတ်ႇၶဝ်ႈတႂ်ႈၶႅၼ်လႅင်းမိူင်းယဝ်ႉ “ႁဝ်းၵေႃႈမိူၼ်ၵၼ်”
“ယင်းတိုၵ်ႉဝူၼ်ႉဝႃႈႁဝ်းပဵၼ်ၽီယူႇႁႃႉ” သဵင်လၢတ်ႈမေႃးယူႇႁိမ်းႁူ
“ဢိုမ်ႈ!”
လႅင်းမိူင်းယိပ်းဢဝ်ၼႃႈၶမ်းႁွမ်ယဝ်ႉ ၸုပ်းသႂ်ႇသီႇသူပ်းၶွင်ႇၶွင်ႇၼၼ်ႉၵမ်းၼိုင်ႈ
“ၵမ်းၼႆႉလူး ယင်းတိုၵ်ႉပဵၼ်ၽီယူႇႁႃႉ”
“ဢိုမ်ႈ!..ႁၢႆၵႂႃႇသေလႄႈၸူဝ်ႈႁဝ်းယင်းတိုၵ်ႉယဵၼ်ႉၸႂ်လႆႈယူႇၼႆႉ”
သိုပ်ႇလူတွၼ်ႈတေမႃးၶႃႈ
