သီၼႃႈလႅင်းမိူင်းဢဝ်တေႉဢဝ်ဝႃႈမႃးသေ
“ၶမ်းႁွမ်!!..ႁဝ်းဢမ်ႇလႆႈယဝ်ႉသူလဵၼ်ႈၼႃ”
“ႁဝ်းၵေႃႈဢမ်ႇလႆႈယဝ်ႉမိူၼ်ၵၼ်..ဝူၼ်ႉဝႃႈလွင်ႈၶေႃးၶၢတ်ႇဝၢတ်ႇတၢႆၼႆႉပဵၼ်မဵဝ်းယဝ်ႉၵၼ်လဵၼ်ႈၵေႃႈဢမ်ႇၸႂ်ႈ”
“ယူႇၼႂ်းပၢင်တိုၵ်း…ႁဝ်းၵေႃႈဢမ်ႇႁူႉဝႃႈႁဝ်းတေတၢႆမိူဝ်ႈလႂ်…မိူဝ်ႈဢွၼ်တၢင်း…ႁဝ်းၵေႃႈဢမ်ႇၵူဝ်ဝႃႈတေတၢႆမိူဝ်ႈလႂ်…တၢႆမိူဝ်ႈလႂ်ၵေႃႈတၢႆမိူၼ်ၵၼ်ၵူၺ်း…တၢႆတွၼ်ႈတႃႇၸိူဝ်ႉၸၢတ်ႈ…ပုၼ်ႈတႃႇၸိူဝ်ႉၶိူဝ်း…ႁဝ်းၽွမ်ႉတႃႇတေလူႇၼိူဝ်ႉလိူတ်ႈလႆႈတႃႇသေႇၼၼ်ႉယဝ်ႉ…ၵူၺ်းၵႃႈ…မိူဝ်ႈႁူႉၸၵ်းသူ…ႁဵတ်းႁႂ်ႈႁဝ်းၶႂ်ႈမီးသၢႆၸႂ်ၶႂ်ႈသိုပ်ႇယူႇထႅင်ႈၼၼ်ႉယဝ်ႉ…ၸွင်ႇႁူႉႁိုဝ်…မိူဝ်ႈမၢၵ်ႇၵွင်ႈယိုဝ်းၶဝ်ႈမႃးထိုင်ၼႂ်းၼိူဝ်ႉႁဝ်းၼၼ်ႉ…မၼ်းၸဵပ်းမိူၼ်ႁဝ်းတေယဵၼ်ႉၸႂ်ဢမ်ႇလႆႈ…မိူၼ်ႁဝ်းတေတၢႆၵႂႃႇပႅတ်ႈယဝ်ႉ…”
ၶမ်းႁွမ်ၼိမ်ယဵၼ်သေထွမ်ႇယူႇ
“သူႁဵတ်းႁႂ်ႈႁဝ်းၶႂ်ႈမီးသၢႆၸႂ်ယူႇၵႂႃႇထႅင်ႈ…တွၼ်ႈတႃႇတေလႆႈမႃးတူၺ်းထိုင်…ၵႅတ်ႇၶႄပၼ်သူ…သမ်ႉဝႃႈႁဝ်းတေၸဵပ်းသႅပ်ႇ…တေယဵၼ်ႉၸႂ်ဢမ်ႇလႆႈ…ၶႂ်ႈတၢႆၼႃႇၼႆသေတႃႉၵေႃႈ…မိူဝ်ႈဝူၼ်ႉႁၼ်သူၼၼ်ႉ…ႁဵတ်းႁႂ်ႈႁူဝ်ၸႂ်ႁဝ်းတဵၼ်ႈတွတ်ႇမႃးၶိုၼ်းလႆႈၼၼ်ႉယဝ်ႉ…ႁဝ်းၵေႃႈဢမ်ႇႁူႉဝႃႈတေပဵၼ်ၸိူင်ႉၼႆ…ႁဝ်းၵေႃႈဢမ်ႇႁူႉဝႃႈသင်ႁဝ်းပွၵ်ႈမႃးၶိုၼ်း…တေႁဵတ်းႁႂ်ႈသူဢမ်ႇၵတ်းယဵၼ်ၸႂ်…”
“ၶမ်ႈယဝ်ႉ…ၸွင်ႇတေမိူဝ်းယူႇႁိုဝ်” ဢဝ်လႅင်းမိူင်းယုမ်ႉဢွၵ်ႇမႃးသေယဝ်ႉ။
“ဢိုမ်ႈ!”
လႅင်းမိူင်းယုမ်ႉယဝ်ႉ မႃးၼူဝ်းလူတ်ႉၶိူင်ႈသေ ၶမ်းႁွမ်ၵေႃႈၶီႇသွၼ်ႉလင်မိူဝ်းၵႂႃႇ မိုဝ်းဢွၼ်ႇသွင်ၶွၼ် သွတ်ႇၵွင်ႉဢဝ်ဢဝ်လႅင်းမိူင်းဝႆႉသေ ၼႃႈဢွၼ်ႇမၼ်းၵေႃႈသမ်ႉပေႃးထိၸပ်းလင်လႅင်းမိူင်းမိူဝ်းၵႂႃႇ ၼင်ႇလုၵ်ႈဢွၼ်ႇၵူဝ်တူၵ်းလူတ်ႉၼၼ်ႉယဝ်ႉ။
“ၵူဝ်ႁႃႉ!”
“ဢိုမ်ႈ..”
“မီးႁဝ်းယူႇၼႃႈ..ဢမ်ႇပဵၼ်သင်ၼႃ”
“ၸိုင်ဝႃႈပေႃးထူပ်းႁဝ်းၼႆ မီးလွင်ႈတေလၢတ်ႈၼႆဢမ်ႇႁိုဝ်လႃႇ”
“လႆႈငိၼ်းယူႇႁႃႉ..”
“ဢိုမ်ႈ..ငိၼ်းပႃးသဵင်ႁႆႈၵွၼ်ႇယဝ်ႉ”
“သူၵေႃႈတူၺ်းႁဝ်းႁႆႈသေယဝ်ႉဢိူဝ်ႈၼႆ သမ်ႉပၢႆမႃးလွၵ်ႇၵၼ်ထႅင်ႈသေ”
“ပေႃးသူပွႆႇႁဝ်းၵမ်ႉတူၵ်းလူတ်ႉဢိူဝ်ႈၼႃႈ..”
“လုၵ်ႈၼွင်ႉသူႁူႉယူႇႁႃႉ…ဝႃႈသူပွၵ်ႈမိူဝ်းၶိုၼ်းၼႆ…”
“တေဢမ်ႇပႆႇႁူႉ…ႁဝ်းယင်းဢမ်ႇပႆႇလႆႈလၢတ်ႈ…”
“လိူဝ်သေလႅၼ်ႁဝ်းယဝ်ႉ…လႅၼ်ပႃးလုၵ်ႈၼွင်ႉထႅင်ႈၵွၼ်ႇႁႃႉ…”
“ဢမ်ႇထိုင်တီႈဝႃႈလႅၼ်ၼင်ႇၵဝ်ႇသႄႈ…လိူဝ်သေဝႃႈႁဝ်းဢမ်ႇလႆႈလၢတ်ႈၵူၺ်း…ယဝ်ႉၵေႃႈ…ႁဝ်းယင်းဢမ်ႇပႆႇလႆႈထၢမ်ဝႃႈ…ၽႂ်ၵေႃႉလၢတ်ႈသူလႃႇဝႃႈႁဝ်းတၢႆၼႆ…”
“ယိင်းသႅင်ဢိူဝ်ႈ…လၢတ်ႈဝႃႈသူဢမ်ႇလႅပ်ႈလွတ်ႈယဝ်ႉၼႆလႄႈ…ပီႈၼွင်ႉသူႁပ်ႉတူဝ်မိူဝ်းၵႂႃႇယဝ်ႉၼႆႁိုဝ်…”
“ႁဝ်းၵေႃႈတိုၵ်ႉႁူႉမိူဝ်ႈႁဝ်းႁွတ်ႈမႃးတီႈၸၢႆးၶမ်းၵူၺ်းၼင်ႇၵဝ်ႇဝႃႈႁဝ်းတၢႆၼႆ…”
သဵင်ယဵၼ်ၵႂႃႇၵႅပ်ႉၼိုင်ႈယဝ်ႉ
“သင်ႁဝ်းတၢႆၵႂႃႇတေႉလူး……”
“မိူဝ်ႈလဵဝ်ႁဝ်းၵေႃႈတေႁွင်ႉႁႆႈသေမိူဝ်းႁွတ်ႈႁိူၼ်းၵႂႃႇယဝ်ႉ…ႁဝ်းၵေႃႈဢမ်ႇသိုပ်ႇမိုတ်ႈၵၼ်တၢင်းသိုၵ်းၼၼ်ႉယဝ်ႉ…”
“မၼ်းႁဵတ်းႁႂ်ႈသူဢမ်ႇၶႂ်ႈမိုတ်ႈထိုင်တၢၼ်ႇၼၼ်ႉႁႃႉ…”
“ဢိုမ်ႉ!…သင်ၸိူဝ်ႉဝႃႈပဵၼ်သိုၵ်းပေႃးဢမ်ႇၽၢတ်ႇလိပ်းၵေႃႈတေၽၢတ်ႇတၢႆၼႆ…မႄႈႁဝ်းလၢတ်ႈယူႇတႃႇသေႇၼၼ်ႉယဝ်ႉ…ၸဵမ်မိူဝ်ႈလႆႈႁူႉၸၵ်းသူ…ၶေႃႈၵႂၢမ်းဢၼ်မႄႈႁဝ်းလၢတ်ႈၼၼ်ႉၵေႃႈ…ႁဵတ်းႁႂ်ႈႁဝ်းပွင်ႇၸႂ်မႃးၼၼ်ႉယဝ်ႉ…”
“ဝၼ်းၼၼ်ႉ…မိူဝ်ႈယူႇတီႈၼိူဝ်လွႆ…ဝၼ်းဢၼ်ႁဝ်းတေဢွၵ်ႇၶၢဝ်းတၢင်းမႃး…ဢၼ်သူၵွင်လင်ပႅတ်ႈႁဝ်းၼၼ်ႉ…ယွၼ်ႉလွင်ႈၼႆႉႁႃႉ…”
“ဢိုမ်ႈ…မႄႈႁဝ်းၵေႃႈဢဝ်တူဝ်ထူပ်းသေလၢတ်ႈၼႄတႃႇသေႇၼၼ်ႉယဝ်ႉ…ပေႃႈႁဝ်းပဵၼ်သိုၵ်းလႄႈႁဵတ်းႁႂ်ႈမၼ်းဢမ်ႇၸၢင်ႈလုမ်းလႃးတူၺ်းထိုင်ႁဝ်းပီႈၼွင်ႉလႆႈ…ၵမ်းလိုၼ်းမႃးၵေႃႈ…ၽၢတ်ႇယၢၼ်ၵႂႃႇပႅတ်ႈ…ဢမ်ႇၸၢင်ႈပွၵ်ႈမႃးၶိုၼ်း…ႁဝ်းလႆႈႁၼ်မႄႈယဝ်ႉ…ႁဵတ်းႁႂ်ႈႁဝ်းဢမ်ႇႁတ်းၶဝ်ႈၸမ်သိုၵ်းၼၼ်ႉယဝ်ႉ…ၵူၺ်းၵႃႈ…မိူဝ်ႈလႆႈႁူႉၸၵ်းသူ…ႁဝ်းဝူၼ်ႉဝႃႈမၼ်းတေဢမ်ႇပဵၼ်မိူၼ်ပၢၼ်မိူဝ်ႈပူၼ်ႉ…ၵူၺ်းၵႃႈ…မိူဝ်ႈၶမ်ႈၼၼ်ႉသူၵေႃႈမႃးလၢတ်ႈဝႃႈ…တေၵႂႃႇယဝ်ႉၼႆ…မၼ်းၵေႃႈႁဵတ်းႁႂ်ႈႁဝ်းဝူၼ်ႉထိုင်ၶိုၼ်းၵႂၢမ်းမႄႈလၢတ်ႈ…ၵူႈလွင်ႈမၼ်းၵေႃႈမိူၼ်ၵဝ်ႇ…မၼ်းၵေႃႈဢမ်ႇလႆႈလႅၵ်ႈလၢႆႈသင်…ၼၼ်ႉမၼ်းႁဵတ်းႁႂ်ႈႁဝ်းဢမ်ႇၶႂ်ႈသိုပ်ႇလၢတ်ႈၸွမ်းသူထႅင်ႈၼၼ်ႉယဝ်ႉ…
သမ်ႉဝႃႈမိူဝ်ႈလဵဝ်…သူတေမီးယူႇၽၢႆႇၼႃႈႁဝ်းၼႆသေတႃႉ…ဝၼ်းၼိုင်ႈ…သူၵေႃႈတိုၼ်းတေၽၢတ်ႇယၢၼ်ႁဝ်းၵႂႃႇထႅင်ႈယူႇမိူၼ်ၵၼ်ၼၼ်ႉယဝ်ႉ…သင်သူဢမ်ႇပႆႇတၢႆ…မၼ်းၵေႃႈၸၢင်ႈႁဵတ်းႁႂ်ႈႁဝ်းမီးတိုဝ်ႉတၢင်းလႆႈထူပ်းၵၼ်ထႅင်ႈဢမ်ႇၸႂ်ႈႁိုဝ်…ၸဵမ်မိူဝ်ႈဝၼ်းၼၼ်ႉ…ဝၼ်းဢၼ်ႁဝ်းလႆႈထူပ်းသူၶိုၼ်းထႅင်ႈၼၼ်ႉ…မၼ်းႁဵတ်းႁႂ်ႈႁဝ်းၵူဝ်တေလႆႈထူပ်းသူထႅင်ႈၵမ်းၼိုင်ႈ…ၵူၺ်းၵႃႈ…ၶၢဝ်းယၢမ်းဢၼ်လႆႈမႃးယူႇတီႈၼႆႈၼႆႉ…မၼ်းႁဵတ်းႁႂ်ႈႁဝ်းလႆႈထူပ်းလွင်ႈသုၵ်ႉယုင်ႈလၢႆလၢႆလွင်ႈ…ထူပ်းပၼ်ႁႃတင်းၼမ်…ၵူႈပွၵ်ႈဢၼ်ႁဝ်းမီးပၼ်ႁႃၼၼ်ႉ…သူၵေႃႈမီးယူႇႁိမ်းႁဝ်းလႄႈၸွႆႈထႅမ်ႁဝ်းယူႇတႃႇသေႇ…ႁဵတ်းႁႂ်ႈႁဝ်းဝူၼ်ႉၶၢမ်ႈပူၼ်ႉလွင်ႈၸိူဝ်းၼၼ်ႉၵႂႃႇယဝ်ႉ…ဝၢႆးသေႁူႉဝႃႈသူဢမ်ႇယူႇယဝ်ႉ…မၼ်းႁဵတ်းႁႂ်ႈႁဝ်းႁူႉဝႃႈၵူႈလွင်ႈဢၼ်ႁဝ်းၵူဝ်မႃးတႃႇသေႇၼၼ်ႉ…ယင်းဢမ်ႇၵူဝ်တၢၼ်ႇသူတၢႆၽၢတ်ႇယၢၼ်ႁဝ်းၵႂႃႇလႄႈတေဢမ်ႇလႆႈထူပ်းသူထႅင်ႈၼၼ်ႉလႃႈ…”
ၶမ်းႁွမ်ၵေႃႈမႄးၽိုတ်ႉၵွတ်ႇလႅင်းမိူင်းထႅင်ႈသေ မိူၼ်တေၶုၵ်းၸႂ်လႆႈၼေႃႇမိူင်းမႃး
“ၸွင်ႇႁဝ်းဢမ်ႇလိုမ်းၼေႃႇမိူင်းႁိုဝ်လႃႇၼၼ်ႉ!!”
“မၼ်းဢမ်ႇၶႂ်ႈမိူဝ်းဝႃႇ..မိူဝ်ႈၽုၵ်ႈၸင်ႇႁႂ်ႈၸၢႆးၶမ်းမိူဝ်းသူင်ႇ”
ယူႇယူႇမိူၼ်သိူဝ်ႈလႅင်းမိူင်းယမ်းယမ်းဝႆႉ ပွႆႇမိုဝ်းမၼ်းမႃးယိပ်းတူၺ်းလင်လႅင်းမိူင်းယဝ်ႉ
“လိူတ်ႈသူဢွၵ်ႇၼမ်ၼႃႇ…ပဵၼ်သင်လႄႈဢမ်ႇလၢတ်ႈႁဝ်း…ႁဝ်းဢိင်မၼ်းမႃးၸဵမ်မိူဝ်ႈၵႆႈ…ၵိုတ်းလူတ်ႉလႄႈ”
“ၵိုတ်းႁဵတ်းသင်တေႁွတ်ႈယူႇယဝ်ႉ..”
“တေႁွတ်ႈတီႈလႂ်ၶိုင်ႈတၢင်းၵူၺ်း..”
လႅင်းမိူင်းၵေႃႈၵိုတ်းၵႂႃႇ
“လူင်းလႄႈႁဝ်းတေႁေႃႈ”
“ဢမ်ႇပဵၼ်သင်ႁဝ်းတေႁေႃႈၵူၺ်း…ပေႃးသူမိူဝ်းပဵၼ်လူမ်းတေႁဵတ်းႁိုဝ်”
“မီးသူယူႇႁဝ်းဢမ်ႇပဵၼ်သင်လေႃႇ…ပေႃးသူလိုမ်းတူဝ်ပႅတ်ႈႁဝ်းၼၼ်ႉဢိူဝ်ႈႁဝ်းတေပဵၼ်…ယႃႇႁႂ်ႈႁဝ်းပဵၼ်ၵူၼ်းႁၼ်သုၼ်ႇတူဝ်ၼႃႇလႄႈ”
“ဢဝ်တီႈသူၵတ်းယဵၼ်ၸႂ်လႄႈၼႃႈ”
ၶမ်းႁွမ်ၵေႃႈ ႁေႃႈလူတ်ႉမိူဝ်းၵႂႃႇလွႆးလွႆးယဝ်ႉ လႅင်းမိူင်းၼၼ်ႉၵေႃႈ ၵွတ်ႇဢဝ်ဢႅဝ်လဵၵ်ႉဢွၼ်ႇၶမ်းႁွမ်ၼၼ်ႉသေ ၵွၵ်းႁူဝ်တၢင်ႇမႃႇဝႆႉယူႇယဝ်ႉ။
သိုပ်ႇလူတွၼ်ႈတေမႃးၶႃႈ
