ၼၢင်းသိုဝ်ႉလူႇၵေႃႈ တၢင်းလုၵ်ႈမၼ်းထႅင်ႈၽၢႆႇၼိုင်ႈ ၵၢၼ်တီႈႁိူၼ်းထႅင်ႈၽၢႆႇၼိုင်ႈ၊ မီးဢၢႆႈလႅင်ၼႆၵေႃႈ ၸွႆႈလႆႈပၢႆတိၼ်ပၢႆမိုဝ်းၵူၺ်း ဢမ်ႇထိုင်တီႈလႆႈ ဢမ်ႇၶိုတ်းၸႂ်မၼ်းသေ မၢင်ပွၵ်ႈၵေႃႈ ဢဝ်လုၵ်ႈမၼ်းပွႆႇဝႆႉပၼ်ပိူၼ်ႈယဝ်ႉ ၵႂႃႇႁႃယူၵ်ႇ၊ ႁႃယိူဝ်ႇမူ ၽၵ်းမူ ၸွမ်းထိူၼ်ႇၸိူဝ်းၼႆႉႁင်းၵူၺ်း။ မီးလုၵ်ႈဝႆႉယူႇၵေႃႈ တၢၼ်ႇၼၵ်းၵေႃႈ ဢဝ်မဝ်မဝ်ၵူၺ်းလႄႈ ပေႃးမၼ်းၼၵ်းႁႅင်းၼႃႇ ၸင်ႇၸႂ်ႉဢၢႆႈလႅင်ႁဵတ်းပၼ် မၼ်းၼၼ်ႉသမ်ႉ ၸႂ်ႉၶေႃႈလႂ်လႆႈၶေႃႈၼၼ်ႉၵူၺ်း။
မၢင်ပွၵ်ႈလူဝ်ႇၵႂႃႇတဵၵ်းၼမ်ႉ ဢမ်ႇၸၢင်ႈဢဝ်လုၵ်ႈဢွၼ်ႇၵႂႃႇပၼ်ၽႂ်ၼႆၵေႃႈ ပႃးၵၼ်လူင်းၵႂႃႇတၢင်းတႃႈၼမ်ႉၼၼ်ႉသေ ဢမ်ႇၸၢင်ႈၸေးၵၼ်ယဝ်ႉလႄႈ ပႆၵႂႃႇၸွမ်းၵၼ်လွႆးလွႆးယဝ်ႉ။
လုၵ်ႈဢွၼ်ႇၼႆႉသမ်ႉ ပေႃးပိူၼ်ႈႁဵတ်းၵေႃႈ ၶဝ်ၵေႃႈၶႂ်ႈႁဵတ်းမိူၼ်ပိူၼ်ႈယဝ်ႉ တင်းပွတ်းမႆႉႁေ ၶူတ်ႇၼမ်ႉသူမ်ႈဢွၼ်ႇသွင်တဝ်ႈၼၼ်ႉ ႁွႆႈပၼ်ႁူဝ်မႃႇမၼ်းယဝ်ႉၵေႃႈ တွင်ႇတွတ်ႈတွင်ႇတွတ်ႈ မိူဝ်းၵႂႃႇတၢင်းၼႃႈမႄႈၶဝ်ၼၼ်ႉယူႇဢိူဝ်ႈ။
ပေႃးၵႂႃႇထိူင်းမႄႈၶဝ်သမ်ႉၶၢၼ်ႉပႂ်ႉယဝ်ႉလႄႈ ပူၼ်ႉၵႂႃႇသေ၊ ပေႃးၵႂႃႇဝႆးသမ်ႉဢမ်ႇၶိုတ်းပိူၼ်ႈ သမ်ႉႁႆႈႁေ၊ ပေႃးပိူၼ်ႈပႂ်ႉႁွင်ႉႁႂ်ႈၵႂႃႇသမ်ႉ ၵိုတ်း သဵင်ၶႃမႄႈလုၵ်ႈၽိတ်းၵၼ်ပေႃးပၼ်းလူင်ဝႆႉယဝ်ႉ။
ပဵၼ်ၼၼ်ယူႇၵူႈဝၼ်းဝၼ်းသေ ယူႇၵႂႃႇၸိူင်ႉၼၼ်ၵူႈဝၼ်းဝၼ်းလႄႈ ၶၢဝ်းယၢမ်းၵေႃႈပူၼ်ႉၵႂႃႇလွႆးလွႆး ႁိုင်ယူႇ 45 ဝၼ်းၼႆႉ ပိူၼ်ႈၵေႃႈ ဢဝ်ၸဝ်ႈပိုၼ်းႁၢၼ်ဢွၵ်ႇမႃးၶိုၼ်းသေ ပွႆႇပၼ်မၼ်းဢွၵ်ႇမႃးၶိုၼ်းယဝ်ႉ။ တူဝ်ၼိူဝ်ႉၼင်သမ်ႉပေႃးၽိူၵ်ႇဢိူၼ်းတိူၼ်း တၢၼ်ႇဝႃႈတေတၢႆၵႂႃႇပႅတ်ႈၼၼ်ႉယဝ်ႉ။
ပွၵ်ႈၼႆႉပဵၼ်တၢင်းၽိတ်းယႂ်ႇဝႆႉလႄႈ မၼ်းလႆႈထုၵ်ႇပူတ်းၸၼ်ႉၵႂႃႇ ၸၼ်ႉၼိုင်ႈ ၶိုၼ်းပဵၼ်ၶုၼ်သိုၵ်းလူင်ယဝ်ႉ။
ယွၼ်ႉပိူဝ်ႈလွင်ႈတၢင်းဢၼ်ၼႆႉသေ ႁဵတ်းႁႂ်ႈမၼ်းဢမ်ႇၶႂ်ႈသိုပ်ႇၵုမ်းၶွၵ်ႈၶင်ၵႂႃႇထႅင်ႈယဝ်ႉလႄႈ ယွၼ်းၶၢႆႉၼႃႈတီႈပုၼ်ႈၽွၼ်းၵႂႃႇထႅင်ႈယူႇ။
−−−−−−−−−−−−−−−−−−−−−−−−−−−−−−−−−−
“ၼေႈငဝ်းလိူၼ် ၸိူင်းသူၼႆႉ သူၼၢၼ်းတၢင်ႇၼႃႇ ႁဝ်းပေႃးလိုမ်းႁူဝ်လိုမ်းႁၢင်မၼ်းၵႂႃႇမူတ်းယဝ်ႉဢိူဝ်ႈၼႆႉ”
“ႁဝ်းၵေႃႈလိုမ်းယဝ်ႉဝႃႈ”
“တႅမ်ႈၵႂႃႇတိၵ်းတိၵ်း ဢမ်ႇတူၺ်းၶိုၼ်းတၢင်းၼႃႈမၼ်းယူဝ်ႉ”
“ႁိုဝ်တၼ်းတူၺ်းၼႄႇတင်းတႅမ်ႈတင်းတၢင်ႇၵႂႃႇတိၵ်းတိၵ်းဢိူဝ်ႈၼႆႉ မၼ်းတေသုတ်းၵႂႃႇၸိူင်ႉႁိုဝ် ႁဝ်းတင်းဢမ်ႇႁူႉၵွၼ်ႇ”
“ဢဝ်လူမ်းၵူၼ်းတႅမ်ႈမၼ်းဝႃႈၵူၺ်းပေႃးၼၼ်”
“ၼၼ်ယဝ်ႈ…ပေႃးဢမ်ႇမီးႁႅင်းၸႂ် ပေႃးဢမ်ႇလႆႈႁၼ်ၼႃႈသူၵေႃႈ ၼၢၼ်းလႆႈလူဢိတ်ႉၼိုင်ႈၼၼ်ႉၼႃႇဢေႉ”
“ယႃႇမႃးႁႃလၢတ်ႈယူႇလႃႈ”
“ပေႃးပိူၼ်ႈလၢတ်ႈတေႉသမ်ႉဝႃႈၼႆႁေ ဢမ်ႇယုမ်ႇႁဝ်းၵႃႈ”
“ယုမ်ႇဝႃႈယုမ်ႇယဝ်ႈ”
“ၼၼ်ႉတူၺ်းလေႃႇ”
“တေႉဢေႃႈ”
“ယႃႇပေၶတ်းတိၵ်းတိၵ်းလူး”
“ၶတ်းတီႈလႂ်”
“ႁဝ်းၵျိူၵ်ႈသူဢၼ်သူမေႃၶတ်းၼႆႉယဝ်ႉဝႃႈ”
“ဢမ်ႇၶတ်းယဝ်ႉ”
“ၼၼ်ႉၼၼ်ႉ လီႁၵ်ႉထႅင်ႈယဝ်ႉ”
“သူတေဢၢၼ်းတႅမ်ႈႁႂ်ႈပေႃးၸေးပီမၼ်းႁႃႉ”
“ဢမ်ႇၸေးလႆႈ ဢိင်ၼိူဝ်လွင်ႈတၢင်းမၼ်းၽွင်ႈႁေ ဢိင်ၼိူဝ်ငဝ်းလၢႆးမၼ်းၽွင်ႈႁေ မၼ်းပဵၼ်ၸိူင်းၵူၺ်းလူးဢမ်ႇၸႂ်ႈပိုၼ်းတေႉတေႉလႄႇ လွင်ႈမၢင်လွင်ႈၶဝ်ၵေႃႈဢမ်ႇတွင်းတေႉတေႉဝႃႈပဵၼ်ပီလႂ် ဢၢင်ႈဢိင်ဢဝ်သၽႃႇဝႁိမ်းႁွမ်းၼၼ်ႉသေ ႁဝ်းၵေႃႈၵႃႈတေသႂ်ႇလေႃးလႄးၵၼ်ၵႂႃႇၸိူင်ႉၼၼ်ၵူၺ်း”
“သမ်ႉဝႃႈဢမ်ႇၸႂ်ႈပိုၼ်းသေတႃႉၵေႃႈ တွၼ်ႈတႃႇႁဝ်းတႄႉ မၼ်းမိူၼ်တင်းပဵၼ်ပိုၼ်းဢၼ်ၼိုင်ႈၼင်ႇၵွၼ်ႇဢိူဝ်ႈ ဢွင်ႈတီႈငဝ်းလၢႆး မၼ်းမိူၼ်တႄႉလႄႈ ယဝ်ႉၵေႃႈ ပဵၼ်လွင်ႈဢၼ်ႁဝ်းၵႆႉလႆႈငိၼ်း ဢူႈႁဝ်းၶႆႈၼႄယူႇတႃႇသေႇ”
“မၼ်းၵႃႈလႆႈမိူၼ်ယူႇလေႃႇ ႁဝ်းၵေႃႈဢဝ်လွင်ႈတေႉမႃးႁဵတ်းၵူၺ်းလူး”
“ၸိူင်းဢိင်ပိုၼ်းၼႆလူးၼေႃႈ”
“ဢိူဝ်ႈ ႁဝ်းဝႃႈၸိူင်းဢိင်ပိုၼ်းၼႆၵေႃႈ ႁႂ်ႈဝႃႈပဵၼ်လွင်ႈပိုၼ်းတေႉတေႉၼႆၵေႃႈသမ်ႉဢမ်ႇၸႂ်ႈၼင်ႇၵွၼ်ႇ”
“ၸႂ်ႈဢိူဝ်ႈ ပေႃးပဵၼ်လွင်ႈၵၢၼ်ဝၢၼ်ႈၵၢၼ်မိူင်းၸွင်ႇၵွႆႈပဵၼ်ပိုၼ်းၵေႃႈဢမ်ႇၸႂ်ႈ လွင်ႈသုၼ်ႇတူဝ်ၵူၼ်းၵေႃႉၼိုင်ႈၵေႃႈ ပဵၼ်ပိုၼ်းလႆႈယဝ်ႉဝႃႈ”
“ၼၼ်ႁႃႉ ၸူမ်းသူတေႉယဝ်ႉ ၶႂ်ႈၵိၼ်ႁင်လႃႇတေလဵင်ႉၵႃႈ”
“ၵိၼ်တႃႇသူႁႂ်ႈဢိမ်ႇၵူၺ်းလႃႈ”
“ဢမ်ႇမီးၵေႃႉၵိၼ် ၵိၼ်ဢမ်ႇဝၢၼ်ဢိူဝ်ႈ”
“ၵေႃႉငဝ်းၼၼ်ႉမီးယူႇလူး”
“ၸႂ်ႁၢႆႉ”
