2004
ၶၢဝ်းၶိင်ႇဢဝ်ၶဝ်ႈဢဝ်ၼမ်ႉယဝ်ႉၼႆၵေႃႈ မၢၵ်ႇပၵ်ႉမၢၵ်ႇတႅင်ၼႂ်းႁႆႈၸိူဝ်းၼၼ်ႉ မီးၼမ်ယူႇတၢၼ်ႇတၢၼ်ႇလႄႈ ႁႂ်ႈၵူၼ်းသိုၵ်းၶဝ် မႃးဢဝ်မိူဝ်းႁုင်ၵိၼ်ယဝ်ႉ။
ၶဝ်ႈတႄႉပေႃႉယဝ်ႉ ၵမ်းတေႃႉမၼ်းၼႆၵေႃႈ ဢဝ်မႃႇဢဝ်ႁႅင်းၵူၼ်းတဵင်ႇလွၼ်ႉလွၼ်ႉ။ ၸဝ်ႈပိုၼ်းႁၢၼ်ၵေႃႈ တင်းလုၵ်ႈၼွင်ႉမၼ်းႁေ ဢွၼ်ၵၼ်ၵႃႇတေႃႉၶဝ်ႈၼႆႉ ပဵၼ်ယူႇလၢႆဝၼ်းယဝ်ႉ။ ၼၢင်းသိုဝ်ႉလူႇၵေႃႈ ယူႇႁိူၼ်းသေပႂ်ႉတၢၵ်ႇၶဝ်ႈ တမ်ၶဝ်ႈႁဵတ်းၼၼ်ၵႂႃႇ။
ၸဝ်ႈပိုၼ်းႁၢၼ်ၵေႃႈ မေႃတိၼ်မေႃမိုဝ်းဝႆႉယူႇၽွင်ႈလႄႈ ၸင်ႇႁဵတ်းၶူၵ်ႉမွင်းသေ ဢွၼ်ၵၼ်တမ်ၼႂ်းၶူၵ်ႉမွင်းၵူၺ်းလႄႈ ပိူၼ်ႈၵေႃႈ ပေႃးလူဝ်ႇတမ်ၶဝ်ႈၼႆ ဢဝ်တင်းၶဝ်ႈၶဝ်သေ မႃးတမ်ယူႇ။
လုၵ်ႈဢွၼ်ႇၼႆႉၵေႃႈ ပေႃးႁၼ်ပိူၼ်ႈယဵပ်ႇၼႆ မႃးယဵပ်ႇၸွမ်းပိူၼ်ႈႁေ ယွပ်ႇယူဝ်ႉယူဝ်ႉ ႁၢင်ႈၵျေႃႇႁၢင်ႈသိူဝ်းလူင်ဝႆႉယဝ်ႉ။
ပေႃးမီးၵူၼ်းသိုဝ်ႉသၢၼ်မၼ်းၵေႃႈ ၶၢႆသၢၼ် ၵမ်ႈၼမ်တေႉ ဢဝ်မႃးႁဵတ်းၶဝ်ႈတမ်ငႃးႁေၶၢႆ။ ပေႃးဝႃႈႁဵတ်းၶဝ်ႈတမ်ငႃၼႆတႄႉ သဵင်ၶူၵ်ႉမၼ်းမေႃးယူႇ တူၵ်ႉတူၵ်ႉ ႁိူၼ်းႁွင်ႇႁိူၼ်းၸၢၼ်း သမ်ႉပေႃးမႃးငွၵ်ႈမႃးတူၺ်းယူႇယဝ်ႉဢိူဝ်ႈ။ ပေႃးႁဵတ်းဢေႇၵေႃႈ လဵင်ႉၵၼ်ပီႈပႃႈႁွင်ႇၼွင်ႉပႃႈၸၢၼ်းသေ ပေႃးႁဵတ်းၼမ်သမ်ႉ ၵၢင်ၼႂ်မႃး ၼၢင်းသိုဝ်ႉလူႇၼၼ်ႉ ၸေးတင်းလုၵ်ႈသေ ၵႂႃႇႁႃလႄႇၶၢႆႁိူၼ်းတႂ်ႈႁိူၼ်းၼိူဝ်ယူႇယဝ်ႉၼႃႇ။
တီႈသိင်ႇၶူၵ်ႉမွၵ်း မိူဝ်ႈၽွင်းၸဝ်ႈပိုၼ်းႁၢၼ်တမ်ၶဝ်ႈယူႇလႄႈ ၼၢင်းသိုဝ်ႉလူႇၽတ်းၶဝ်ႈလူင်းၼႂ်းထူင်ၵေႃႇၸၢၼ်ႈသိၵ်ႇဝႆႉၼၼ်ႉ
“ႁဝ်းလဵင်ႉမူၼႄႇၶိင်းၼႆႉ ႁမ်းၵေႃႈမီး ပင်းၵႃႇၵေႃႈမီး လူဝ်ႇသိုဝ်ႉဢႃးႁၢၼ်မၼ်းၵူၺ်းယဝ်ႉၼႃႇ”
“ပေႃးလဵင်ႉႁမ်ႉတေလႆႈႁႃယူၵ်ႇႁႃသင်မၼ်းထႅင်ႈၼင်ႇၵွၼ်ႇ”
“ပေႃးႁဝ်းလဵင်ႉၵေႃႈ ယူဝ်ၸၢင်ႈလႆႈၵိၼ်လိူင်ႇမႃးဢိတ်ႉၼိုင်ႈၼႆၵႃႈ”
“ပေႃးၶႂ်ႈလဵင်ႉၵေႃႈ လူဝ်ႇႁဵတ်းၶွၵ်ႈမၼ်းၼၼ်ႉယိုင်ၼႃႇ မႆႉမၼ်းၵေႃႈလူဝ်ႇႁႃထႅင်ႈဢိူဝ်ႈၼၼ်ႉ”
“မႆႉပႅၼ်ႈႁွႆးႁိူၼ်းၵဝ်ႇၼႃႉႁဝ်းၼၼ်ႉ လႅပ်ႈမီးယူႇ”
ပီၼႆႉၵေႃႈ သွင်ၶႃၸူဝ်းၵၼ်လဵင်ႉမူထႅင်ႈယဝ်ႉ။
လဵင်ႉမူၼႆၼၼ်ႉၵေႃႈ ဢမ်ႇၸႂ်ႈငၢႆႈငၢႆႈ ၵႃႈဢႃးႁၢၼ်ယိူဝ်ႇမဵတ်ႉမၼ်းၼႆၵေႃႈဢမ်ႇတေႃႇတေႃႇလႄႈ လိူဝ်သေၼၼ်ႉ ၼမ်ႉၶဝ်ႈၼမ်ႉၽၵ်းၼႆၵေႃႈ လႄႇႁႃတုင်းႁိူၼ်းႁွင်ႇႁိူၼ်းၸၢၼ်းယဝ်ႉ။ လႆႈႁႃယိူဝ်ႇ တူၼ်ႈၵူၺ်ႈၶိူဝ်းမၼ်းၸိူဝ်းၼႆႉ မႃးဢွႆႇမႃးလဵင်ႉ။
တီႈၼိူဝ်လွႆၼႆႉၵေႃႈ ဢမ်ႇပေႃးမီးၵၢၼ်သင်တေႉတေႉလႄႈ ၵူၼ်းဢွၼ်ၵၼ်လဵင်ႉမူၼႆႉ ၶႂ်ႈဝႃႈၼမ်ယူႇတၢၼ်ႇတၢၼ်ႇ ယူၵ်ႇၵူၺ်ႈၼႆၵေႃႈ သမ်ႉပေႃးၶႂ်ႈမူၺ်ႉပဵၼ်ႁူၺ်ႈပဵၼ်ႁူၺ်ႈ ပေႃးလႆႈလၢတ်ႈၵၼ်ဝႃႈ ႁူဝ်ၼမ်ႉႁၢမ်ႈယႃႉ ၼႆယဝ်ႉ။
တႃႇတေတေႃႉယူၵ်ႇၵူၺ်ႈၼႆၵေႃႈ လုၵ်ႉၵူၼ်ႈႁူၺ်ႈၼၼ်ႉ ဢဝ်မႃႇဢဝ်ႁႅင်းသေမႅၵ်ႇၶိုၼ်ႈလွႆယဝ်ႉ။ ၸဝ်ႈပိုၼ်းႁၢၼ်ၵေႃႈ ႁဵတ်းသူၼ်ၵူၺ်ႈဝႆႉသေ ပေႃးတၢၼ်ႇတၢၼ်ႇမၼ်းၵေႃႈ ၵႂႃႇဢဝ်ၼႂ်းသူၼ်။ ပေႃးဝႃႈလဵင်ႉယူၵ်ႇၵူၺ်ႈၶဵဝ် မၼ်းၽၢတ်ႇၼႃႇလႄႈ ၵမ်ႈၼမ်ႁိူၼ်းၶဝ်တႄႉ တေလဵင်ႉယူၵ်ႇၵူၺ်ႈထိူၼ်ႇၵူၺ်ႈလႅင် မူၵေႃႈၵိၼ်ဝၢၼ်။
လဵင်ႉမူၼိုင်ႈပွၵ်ႈၼႆႉ ပေႃးဝႃႈႁၼ်ၶဝ်တူဝ်ယႂ်ႇမႃးယဝ်ႉ ဢုတ်ႉမႃးပီးမႃးၵေႃႈၸူမ်းဢိူဝ်ႈ၊ တႃႇတေၶၢႆၼႆၵေႃႈ သမ်ႉပေႃးၶႂ်ႈဢီးလူၶဝ်မႃးယဝ်ႉ။
လိူဝ်သေလဵင်ႉမူယဝ်ႉသမ်ႉ လဵင်ႉပႃးၵႆႇထႅင်ႈ ႁဵတ်းလႆႈၵႃႈႁိုဝ်ၵေႃႈ ႁဵတ်းၵႂႃႇ၊ လဵင်ႉၵႆႇၼႆႉသမ်ႉ ၵႆႉမီးႁုင်ႉမီးႁဵၼ်ၼမ်ၼႃႇလႄႈ ၵႆႇၼႆႉၵႆႉႁၢႆၼႃႇ။ မၢင်ပွၵ်ႈသမ်ႉမီးၵႃႇလမႃးထႅင်ႈ ၵႆႇၵေႃႈငဝ်ၸုၼ်းၵုၼ်းႁေ တၢႆပႅတ်ႈတင်းၼမ်ၵေႃႈမီး။
တီႈႁိူၼ်းလဵင်ႉၵႆႇဝႆႉလႄႈ ဢမ်ႇၸၢင်ႈၽုၵ်ႇၽၵ်းၽုၵ်ႇယိူဝ်ႈသင်လႆႈတေႉတေႉ ပေႃးၽုၵ်ႇၼႆ လႆႈလွမ်ႉႁူဝ်ႉတေႉတေႉဝႃႈဝႃႈယဝ်ႉ။ သမ်ႉဝႃႈႁိူၼ်းႁဝ်းဢမ်ႇလဵင်ႉၵေႃႈ ႁိူၼ်းပိူၼ်ႈသမ်ႉလဵင်ႉယူႇ ၵႆႇပိူၼ်ႈၵေႃႈမႃးၶေႇသူၼ်ႁဝ်းယူႇၼင်ႇၵွၼ်ႇ။
ၵူၼ်းႁဝ်းၼႆႉ ပိူၼ်ႈဝႃႈ ပေႃးၵႆႉတိုၼ်းဢမ်ႇဢိုပ်းၼႆ ၸႂ်ႈယူႇတေႉ ၼင်ႇႁိုဝ်တေဢမ်ႇလႆႈသိုဝ်ႉၽၵ်းၼႆၵေႃႈ ၽုၵ်ႇၽၵ်းႁဵတ်းသူၼ်သေ တၢၼ်ႇတၢၼ်ႇဢမ်ႇပေႃးလႆႈသိုဝ်ႉၽၵ်းၶဵဝ် ယူႇၵႂႃႇၵိၼ်ၵႂႃႇၵူႈဝၼ်းဝၼ်း။ မၢင်ပွၵ်ႈႁဵတ်းသူၼ်ၼႆၵေႃႈ ပိူၼ်ႈသမ်ႉမႃးလၵ်ႉမႃးၸၵ်ႉဢဝ်ၵႂႃႇၵေႃႈမီးယူႇ။
ၸဝ်ႈပိုၼ်းႁၢၼ်ၵေႃႈ သမ်ႉဝႃႈမီးၵူၼ်းယူႇၸွမ်းသေတႃႉ ပေႃးဝႃႈဢမ်ႇဢွၼ်ႁဵတ်းဢွၼ်သၢင်ႈႁေ ႁႂ်ႈၶဝ်ႁဵတ်းႁင်းၵူၺ်းၵေႃႈဢမ်ႇပဵၼ် ၸႂ်ႉသင်ၵေႃႈႁဵတ်းလႆႈမွၵ်ႈၼၼ်ႉၵူၺ်း ပေႃးၸႂ်ႉလုၵ်ႈၼွင်ႉမၼ်းၵေႃႈ တူဝ်မၼ်းၵေႃႉၵႂႃႇဢွၼ်ႁဵတ်းၸွမ်းယဝ်ႉ။
ၶမ်ႈၼိုင်ႈၾူၼ်ယွႆးယွႆး ၼၢင်းသိုဝ်ႉလူႇၵေႃႈ ၸေးတင်းလုၵ်ႈမၼ်းသေ ၵႂႃႇၶၢႆၽၵ်းယဝ်ႉပွၵ်ႈမႃးတီႈႁိူၼ်း လႆႈႁၼ် ၽူႈယိင်းဢမ်ႇထဝ်ႈဢမ်ႇၼုမ်ႇဝႆႉၵေႃႉၼိုင်ႈ လုၵ်ႈဢွၼ်ႇမွၵ်ႈဢသၢၵ်ႈသိပ်းၶူပ်ႇၼႆႉ မီးယူႇၼႂ်းႁိူၼ်းသေ ႁၼ်ၵွတ်ႇၵၼ်တင်းၸဝ်ႈပိုၼ်းႁၢၼ် ၼင်ႇၸူမ်းၸူမ်းသိူဝ်းသိူဝ်းဝႆႉယဝ်ႉၼႃႇ။
ၼၢင်းသိုဝ်ႉလူႇႁၼ်ၼင်ႇၼၼ်ၵေႃႈ သႃႉသွင်းမၼ်းၼၼ်ႉ တၼ်းလုတ်ႈတူၵ်းမိုဝ်းၵႂႃႇမိူဝ်ႈလႂ်ၵေႃႈဢမ်ႇႁူႉယဝ်ႉ။
သဵင်ႁႆႈၽွင်းသႅင်လင်မေႃးမႃးလႄႈ ၶဝ်ဢွၼ်ၵၼ်ယၵ်ႉတူၺ်းၸူးသေ
“ၼၼ်ႉပဵၼ်ၽႂ်” ၽူႈယိင်းၵေႃႉၼၼ်ႉထၢမ်
“ပဵၼ်မေးႁဝ်း ဢၼ်ႁဝ်းဢဝ်ထႅင်ႈဢိူဝ်ႈ”
“ၼၼ်ႉသမ်ႉပဵၼ်လုၵ်ႈသူဢိူဝ်ႈၼေႃႈ” ပႃးလူၺ်ႈသၢႆတႃ ဢၼ်ဢမ်ႇႁၢၼ်ႉၸႂ်ဝႆႉသေ ပႆလူင်ဢွၵ်ႇႁိူၼ်းၵႂႃႇပႅတ်ႈယဝ်ႉၼႃႇ။ ၸဝ်ႈပိုၼ်းႁၢၼ်ၵေႃႈ ၼႅတ်ႈလမ်းၵႂႃႇၸွမ်းၵမ်းလဵဝ်ဢိူဝ်ႈ လုၵ်ႈဢွၼ်ႇၵေႃႉၼၼ်ႉတႄႉၵေႃႈ ၼင်ႈယဵၼ်ယဵၼ်သေ လဵၼ်ႈယူႇႁင်းၵူၺ်းမၼ်း။
ၼၢင်းသိုဝ်ႉလူႇၼၼ်ႉတႄႉ သမ်ႉပေႃးဢူၼ်ႈပေႃးဢွၼ်ႇၵႂႃႇမူတ်း ၼမ်ႉတႃၵေႃႈ ၶႂ်ႈယိင်ႈႁူၺ်ႇမႃးယဝ်ႉ၊ ၸင်ႇဢဝ်လုၵ်ႈဢွၼ်ႇမၼ်း ၼင်ႈတၵ်းသေ လဵင်ႉၼူမ်းယဝ်ႉ ထၢမ်ဢွၼ်ႇယိင်းၵေႃႉၼၼ်ႉၵႂႃႇ
“သူလႄႈတင်း ပေႃႈဢေးလုၵ်ႈၶဝ်ပဵၼ်ႁင်ၵၼ်လႃႇ”
“ပဵၼ်ပေႃႈၶႃႈဢေႃႈ”
မိူဝ်ႈလႆႈငိၼ်းၼင်ႇၼၼ်ၵေႃႈ ၵူမ်ႈၼႃႈသေ ဝၢႆႇပႅတ်ႈယဝ်ႉ။ လုၵ်ႈယိင်းဢွၼ်ႇၼၼ်ႉတႄႉႁိုဝ်ႁူႉႁင် ႁူႉဝႃႈလူဝ်ႇၵိၼ်ၵူၺ်းယဝ်ႉ ၵႅမ်ႈတူင်ႉယုပ်းတႃၽႅပ်ႉယုပ်းၽႅပ်ႉယုပ်းသေ ၼမ်ႉတႃဢွၼ်ႇမႄႈၶဝ်ၼၼ်ႉ တူၵ်းယွတ်ႇသႂ်ႇၼႃႈမၼ်းယူႇၵေႃႈ တင်းဢမ်ႇႁူႉ။
လဵင်ႉၼူမ်းယဝ်ႉၵေႃႈ ဢဝ်လုၵ်ႈမၼ်းမိူဝ်းၵႂႃႇ တၢင်းႁိူၼ်းၼၢႆးမူၼ်းၶဝ်ၼၼ်ႉယဝ်ႉၼႃႇ၊ မိူဝ်ႈတေမႃးတီႈႁိူၼ်းတႄႉ တွင်ႉမႆႈၶဝ်ႈတေဢၢၼ်းမႃးၵိၼ်ၶဝ်ႈယဝ်ႉ။ ၵူၺ်းၵႃႈ လူမ်းတွင်ႉမႆႈၶဝ်ႈမၼ်းၼၼ်ႉၵေႃႈႁၢႆမူတ်း။
ၸဝ်ႈပိုၼ်းႁၢၼ်ၵေႃႈ လမ်းၵႂႃႇၸွမ်းမေးလူင်မၼ်း ၼၢင်းၶမ်းသွႆႈသေ
“ၼေႈသူ ထွမ်ႇႁဝ်းလၢတ်ႈၵွၼ်ႇလႄႈ”
“ႁဝ်းၵၢၼ်ႉမႃးႁႃသူဢိူဝ်ႈၼႆႉ ၵူၺ်းၵႃႈ သူသမ်ႉမႃးဢဝ်မေးပႅတ်ႈႁဝ်းႁေၼႆႉၼႃႇ”
“ႁဝ်းငိၼ်းပိူၼ်ႈဝႃႈ သူဢဝ်ၽူဝ်ႁေ ၵႂႃႇမိူင်းထႆးယဝ်ႉၼႆလူး”
“ႁဝ်းတေႁဵတ်းႁိုဝ်ဢဝ်လႃႇ ပေႃးထၢၼ်ႈဝႃႈႁဝ်းဢဝ် ႁဝ်းတေမႃးႁႃသူႁဵတ်းသင်”
“ႁဝ်းဢမ်ႇႁူႉႁေ မၼ်းၵေႃႈပဵၼ်ၵႂႃႇယဝ်ႉလူး ႁဝ်းလႄႈတင်းၼၢင်းသိုဝ်ႉလူႇၼၼ်ႉၵေႃႈ မီးလုၵ်ႈႁူမ်ႈၵၼ်ယဝ်ႉၼႃႇ ၸၢင်ႈတေႁဵတ်းႁိုဝ်”
“ႁဝ်းလႄႈတင်းသူၵေႃႈ မီးလုၵ်ႈႁူမ်ႈၵၼ်ယဝ်ႉဢမ်ႇၸႂ်ႈႁိုဝ်လႃႇ”
“ဢိူဝ်ႈ ၸႂ်ႈဢိူဝ်ႈ”
“သူတေဢဝ်မၼ်းႁႃႉတေဢဝ်ႁဝ်း ပေႃးဢဝ်ႁဝ်းၵေႃႈပႅတ်ႈမၼ်းလႄႈ ပေႃးဢဝ်မၼ်းၵေႃႈ ႁႃးလူဝ်ႇပႅတ်ႈၵၼ်ၵူၺ်းဢိူဝ်ႈ”
“ႁဝ်းၵေႃႈယူႇၸွမ်းၵၼ်မႃး ႁူမ်ႈတုၵ်ႉႁူမ်ႈသိူဝ်းၸွမ်းၵၼ်မႃး တေဝႃႈပႅတ်ႈႁႃႉၼႆၵေႃႈ ႁဝ်းဢမ်ႇၶႂ်ႈပႅတ်ႈၵႂႃႇၸိူင်ႉၼႆ ယူႇၵႂႃႇတူၺ်းသေၵွၼ်ႇလႄႈ တင်းၽၢႆႇပုၼ်ႉၵေႃႈ ၵႃႈတေလႆႈဢုပ်ႇၵၼ်တူၺ်းယူႇဢိူဝ်ႈ”
ၸူဝ်းဢဝ်မေးလူင်မၼ်း ပွၵ်ႈမိူဝ်းႁိူၼ်းၵႂႃႇယဝ်ႉ၊ ၸဝ်ႈပိုၼ်းႁၢၼ်ၼၼ်ႉၵေႃႈ ႁုင်ၶဝ်ႈႁဵတ်းၽၵ်းသေ ၸူဝ်းၵၼ်ၵိၼ်ၶဝ်ႈၵုမ်းၵၼ်သၢမ်ၵေႃႉၵႂႃႇ။ တႃႇၶဝ်ႈတႃႇၼၼ်ႉ ပဵၼ်တႃႇဢၼ်ယၢၼ်ၽၢတ်ႇမႃးႁိုင်ယဝ်ႉလႄႈ လႆႈၵိၼ်ၶဝ်ႈႁူမ်ႈမူႇၵၼ်ၸိူင်ႉၼၼ် ငိၼ်းၶုၵ်းၸႂ်လႆႈၶိုၼ်း ဝၼ်းသိုၼ်းၵဝ်ႇၵဝ်ႇၼၼ်ႉမႃးယဝ်ႉဢိူဝ်ႈ။ ၶဝ်ၵေႃႈ တင်းၵိၼ်တင်းဢုပ်ႇလၢတ်ႈၶိုၼ်း လွင်ႈဢၼ်ၽၢၼ်ႇပူၼ်ႉမႃး ဢၼ်လႆႈထူပ်းလႆႈႁူပ်ႉမႃး ၽွင်းမိူဝ်ႈဢမ်ႇလႆႈယူႇၸွမ်းၵၼ်ၸိူဝ်းၼၼ်ႉယဝ်ႉ။
