ယၢမ်းၵၢင်ၶမ်ႈ ၶမ်ႈၼိုင်ႈ ၵိၼ်ၶဝ်ႈၵိၼ်သင်ယဝ်ႉသေ
“ၼၢႆးၼႆႉ ၶမ်ႈၼႆႉႁႃးၸႃႇလိင်ႇတေၵႂႃႇတီႈၵျွင်းဢိူဝ်ႈ ၸွင်ႇမီးႁင်ႁိုဝ်”
“ဢမ်ႇမီး ၵႂႃႇလႄႈ” ၼွၼ်းလဵင်ႉၼူမ်းလုၵ်ႈမၼ်းသေလၢတ်ႈယူႇ။
ၶမ်ႈၶိုၼ်းလပ်းသိင်ႇ ၽွင်းၶၢဝ်းၸမ်တေၼွၼ်းယူႇၼၼ်ႉ ၼၢင်းသိုဝ်ႉလူႇၶႃမႄႈလုၵ်ႈတႄႉၵေႃႈ ၼွၼ်းၼွၼ်းၶျႃးၶျႃးၵၼ်ယူႇၵူၺ်း၊ မွင်းပႂ်ႉဢူႈၶဝ်ၵေႃႈဢမ်ႇႁၼ်မႃး။
တီႈၶွၵ်ႈၼၼ်ႉ သဵင်ၵွင်ႈမေႃးလင်မႃးသေ ၵူၼ်းၼႂ်းဝၢၼ်ႈ ဢွၼ်ၵၼ်တိုၼ်ႇတူၵ်းၸႂ် ဢမ်ႇတၼ်းႁူႉ ၵူၼ်းယၢမ်းၵေႃႉၼိုင်ႈၵေႃႈ လူမ်ႉၼွၼ်းသိူဝ်ႇလိူတ်ႈယူႇယဝ်ႉၼႃႇ။ ၶွၵ်ႈၶင်ၼၼ်ႉၵေႃႈ ၵူၼ်းလွတ်ႈဢွၵ်ႇမူတ်းသေ ၶိင်းဢွင်ႇပၼၼ်ႉ ယိပ်းတင်းၵွင်ႈယဝ်ႉ ႁႃငႃသႂ်ႇၵူၼ်းယၢမ်းၶဝ် ၵေႃႉၼိုင်ႈယဝ်ႉၵေႃႈၼိုင်ႈ ၵူၺ်းၵႃႈဢမ်ႇယိုဝ်းသေပူၼ်ႉၵႂႃႇ။
မၼ်းၵေႃႈႁွင်ႉသေႃႇႁိုတ်းထၢမ်ပိူၼ်ႈ “ၶိင်းပိုၼ်းႁၢၼ်မီးလႂ်!!” တင်းယိုဝ်းၵွင်ႈလၼ်ႇၶိုၼ်ႈၽႃႉသေ ႁွင်ႉယူႇ “ပေႃးၵဝ်ႁၼ်ယိုဝ်းတၢႆပႅတ်ႈႁေမႂ်း” မိူဝ်ႈပဵၼ်ၸိူင်ႉၼၼ် ၵူၼ်းယၢမ်းၵေႃႈ ဢမ်ႇႁတ်းတူင်ႉသေၵေႃႉယဝ်ႉ။
ၸိူဝ်းပဵၼ်ႁူမ်ႇလူမ်ႈပႂ်ႉၼႂ်းဝၢၼ်ႈၼၼ်ႉ သမ်ႉပေႃးသုၵ်ႉသၵ်ႉလူင်ၵႂႃႇမူတ်း မိူဝ်ႈငိၼ်းဝႃႈ ၵူၼ်းၶွၵ်ႈလၵ်ႉပၢႆႈၼႆၵေႃႈ ဢွၼ်ၸတ်းႁႅင်းၵူၼ်းသေ ၸွမ်းႁႃၵူႈၸွၵ်ႉၵူႈၸဵင်ႇယဝ်ႉၼႃႇ။
“ပေႃးဢမ်ႇလႆႈတူဝ်လိပ်းမၼ်းၵေႃႈ ႁႂ်ႈလႆႈတူဝ်တၢႆမၼ်းလႄႈ” ၸဝ်ႈလၢဝ်မိူင်း သင်ႇလုၵ်ႈၼွင်ႉမၼ်း။
ၶဝ်ၵေႃႈ ဢွၼ်ၵၼ်ၸွမ်းသွၵ်ႈႁႃတၢင်းၶိုၼ်းယဝ်ႉ တီႈႁိူၼ်းၼၢင်းသိုဝ်ႉလူႇၼၼ်ႉၵေႃႈ မီးၵူၼ်းမႃးႁွင်ႉၸဝ်ႈပိုၼ်းႁၢၼ်ယူႇ ၵူၺ်းၵႃႈ ဢမ်ႇယူႇႁိူၼ်းလႄႈ ပိူၼ်ႈပေႃးလႆႈပႆၶႆႈၸွမ်းမၼ်း ထိုင်တီႈၵျွင်းမုၼ်ၸဝ်ႈၼၼ်ႉယဝ်ႉ။ ပၢၼ်မိူဝ်ႈၼၼ်ႉ ၵပ်းၸၢၵ်ႈဢမ်ႇလႆႈ ၶိုၵ်ႉၶၵ်ႉၼႃႇၵေႃႈလႅၼ်ႈဢဝ်ၵူၺ်း ဢမ်ႇမီးလူတ်ႉၵႂႃႇငၢႆႈမႃးလူမ်။
မႅၼ်ႈၽွင်းၸဝ်ႈပိုၼ်းႁၢၼ်ၶဝ် တင်းတိုၵ်ႉၼင်ႈတူၺ်းထီႇဝီႇယူႇတီႈၵျွင်းၼၼ်ႉသေ ဢုပ်ႇၶူဝ်ၸွမ်းယူႇၼၼ်ႉ သိုၵ်းႁၢၼ်ၵေႃႉၼိုင်ႈ ႁွတ်ႈမႃး
“ၸဝ်ႈႁၢၼ်..ၵူၼ်းၶွၵ်ႈလၵ်ႉပၢႆႈ”
မိူဝ်ႈငိၼ်းၼင်ႇၼၼ် မၼ်းၵေႃႈၼႅတ်ႈလႅၼ်ႈလူင်မႃးဝႆးဝႃႈဝႆးယဝ်ႉ။
ၵမ်ႈၼမ်ပေႃးၵူၼ်းပၢႆႈၼႆ တေပၢႆႈၶဝ်ႈၵႂႃႇၸွမ်းလႅၼ်လိၼ်ၵူၺ်းလႄႈ ၶဝ်ၵေႃႈႁူႉလီယူႇဝႃႈလႅပ်ႈၵႂႃႇလႆႈတၢင်းလႂ်၊ ယွၼ်ႉပိူဝ်ႈသူဝ်ႉၶဝ်တင်းဢမ်ႇလိတ်ႈလႆႈ ၵၢၵ်ႇသေႃးမၼ်းမီးယူႇတီႈၸဝ်ႈပိုၼ်းႁၢၼ် ဢမ်ႇၸၢင်ႈၽုၺ်ႇသေႃးလႆႈသေ ၵူၼ်းၶွၵ်ႈၼႆၵေႃႈပၢႆႈတၢင်းသူဝ်ႉၵႂႃႇယဝ်ႉ။
မၢင်ၵေႃႉၶိုၼ်းၺွပ်းလႆႈ မၢင်ၵေႃႉၵေႃႈပၢႆႈၵႂႃႇၵႆသေဢမ်ႇယွမ်းလႄႈ လႆႈယိုဝ်းသႂ်ႇၵေႃႈမီး ၶိင်းဢွင်ႇပၼၼ်ႉၵေႃႈ ပေႃးဝႃႈပိူၼ်ႈၺွပ်းလႆႈၵႂႃႇယဝ်ႉ မၼ်းဢမ်ႇလႅပ်ႈတေလွတ်ႈယဝ်ႉၼႆသေ ပဵၼ်ႁိုဝ်တၢႆၵေႃႈ ဢဝ်ၵွင်ႈဢၼ်မၼ်းလႆႈမႃးတီႈၵူၼ်းယၢမ်းၼၼ်ႉ ယိုဝ်းတုမ်ႉတွပ်ႇၵႂႃႇၶိုၼ်း။
ၶမ်ႈၼၼ်ႉတႄႉ သဵင်ႈၵွင်ႈပေႃးလင်ပၼ်းဢူၼ် တၢၼ်ႇဝႃႈပဵၼ်ပၢင်တိုၵ်းလူင်ၼၼ်ႉယဝ်ႉ။ ယူႇၸူဝ်ႈၼိုင်ႈသဵင်ၵွင်ႈၵေႃႈယဵၼ်ၵႂႃႇ ၵူၼ်းၼၼ်ႉၵေႃႈတၢႆၵႂႃႇယဝ်ႉ ၶမ်ႈၼၼ်ႉတင်းၶိုၼ်း ဢွၼ်ၵၼ်ၵဵပ်းၽဵဝ်ႈၽင်ၵႂႃႇ ၸွမ်းၸိူဝ်းၼႂ်းထိူၼ်ႇၼၼ်ႉၵမ်းလဵဝ်။
မိူင်းပေႃးၸမ်လႅင်းယဝ်ႉ ၸဝ်ႈပိုၼ်းႁၢၼ်ၵေႃႈ လႆႈထုၵ်ႇတိၺွပ်းၶင်ၶွၵ်ႈတႂ်ႈလိၼ် ဢၼ်မၼ်းႁၼ်ယူႇတႃႇသေႇလႄႈ မီးလုၵ်ႈၼွင်ႉမၼ်း ပဵၼ်ၵူၼ်းၵုမ်းဝႆႉယဝ်ႉ။
ယၢမ်းၼႂ်ၼၢင်းသိုဝ်ႉလူႇဢမ်ႇလႆႈႁၼ် ၸဝ်ႈၽူဝ်မၼ်းမႃးလႄႈ လႆႈငိၼ်းလုၵ်ႈၼွင်ႉ ဢၼ်ယူႇတီႈႁိူၼ်းၼၼ်ႉလၢတ်ႈၸူး။
“ပီႈလူဝ်း ၸဝ်ႈႁဝ်းပိူၼ်ႈၺွပ်းၵႂႃႇတူၵ်းၶွၵ်ႈယဝ်ႉ”
မိူဝ်ႈလႆႈငိၼ်းၼင်ႇၼၼ် ႁႅင်းသမ်ႉပေႃးဢမ်ႇမီးသေဢိတ်းယဝ်ႉဢိူဝ်ႈ ၼင်ႈယေႃႈလူင်လူင်းၵႂႃႇၵမ်းလဵဝ်ယဝ်ႉၼႃႇ။
ၼႂ်းႁွင်ႈလပ်းသိင်ႇတၼ် ၼင်ႈယူႇတီႈၵႅပ်ႈၵႅပ်ႈသေ တီႈၵိၼ်ၵေႃႈၼႂ်းၼၼ်ႉ၊ တီႈၼွၼ်းၵေႃႈၼႂ်းၼၼ်ႉ ၵၢင်ဝၼ်းဢမ်ႇႁူႉ မိူင်းလႅင်းဢမ်ႇႁၼ် လုၵ်ႈတင်းမေး တေပဵၼ်ၸိူင်ႉႁိုဝ်ယူႇၼၼ်ႉၵေႃႈ ဢမ်ႇႁူႉဢမ်ႇငိၼ်းသင်။ ၵိၼ်ဢမ်ႇဝၢၼ် ၼွၼ်းဢမ်ႇလပ်း ၼင်ႈဢိင်ၽႃၼင်ႇၵူၼ်းသဵင်ႈၸႂ်ဝႆႉယူႇဢိူဝ်ႈ။
ၵူၼ်းႁဵတ်းၵၢၼ် ဢဝ်ၶဝ်ႈၽၵ်းမႃးသူင်ႇသေ
“ဢၢႆႈၼွင်ႉ..မိူဝ်ႈၼႆႉဝၼ်းထီႉၵႃႈႁိုဝ်ယဝ်ႉလႃႇ”
“ဝၼ်းထီႉသၢဝ်းယဝ်ႉဢေႃႈ”
“ၸွင်ႇလႆႈမိူဝ်းလၢတ်ႈမေးႁဝ်းႁိုဝ်”
“ႁူႉယဝ်ႉၶႃႈ”
သဵင်လုၵ်ႈဢွၼ်ႇလင်မေႃးပၼ်း ဢမ်ႇႁူႉသင်ၼၼ်ႉ မႃးတိပ်ႇၽၢင်ႈၸႂ်မႄႈမၼ်းယူႇဢိူဝ်ႈ၊ မႆႈၸႂ်မႆႈၶေႃးၵိၼ်ဢမ်ႇဝၢၼ်ၼွၼ်းဢမ်ႇလပ်းလႆႈၵွပ်ႈမၼ်းယဝ်ႉ၊ လုၵ်ႈၵေႃႈႁွင်ႉႁွင်ႉႁႆႈႁႆႈ ၶႂ်ႈၵိၼ်ၼူမ်းယူႇၵေႃႈ ၼူမ်းသမ်ႉဢမ်ႇမီးၼမ်ႉၼၼ်ႉယိုင်ၼႃႇ။
ၼၢင်းသိုဝ်ႉလူႇၵေႃႈ တင်းလုၵ်ႈၼႂ်းတွင်ႉၵေႃႉၼိုင်ႈသေ ၸေးဢဝ်တင်း လုၵ်ႈယိင်းဢွၼ်ႇမၼ်းထႅင်ႈၵေႃႉၼိုင်ႈ မိူဝ်းၵႂႃႇတၢင်းႁိူၼ်းပီႈၼွင်ႉ ၵူၼ်းႁူႉၸၵ်းမၼ်း။
“ၼႃႉၶူၺ်ၸွင်ႇလႆႈၵႂႃႇၸႂ်းဢူႈဢေးလုၵ်ႈၶဝ်ယူႇႁႃႉ”
“ပိူၼ်ႈဢမ်ႇပၼ်ၵႂႃႇၸႂ်းဢိူဝ်ႈ တၢင်းၽိတ်းမၼ်းယႂ်ႇၼႃႇ ၶေးဢမ်ႇၶေးတေၺႃးတၢမ်ႇတၢႆတင်းဢမ်ႇႁူႉ” ၸဝ်ႈၸႃႇလိင်ႇဝႃႈႁင်းမၼ်း။
ယိုင်ႈၶႅၼ်းတိူဝ်းထႅင်ႈႁႅင်း ႁူဝ်ၸႂ်တိပ်ႇၽၢင်ႈလူင်မႃး တေႉတေႉဝႃႈဝႃႈယူႇယဝ်ႉ။
“ၶိင်းၼႆႉၵေႃႈ ၸႂ်ႈဢမ်ႇၸႂ်ႈတင်းဢမ်ႇႁူႉလီလီႁေ မႃးလၢတ်ႈယူႇၼႆႉ မၼ်းတင်းဢမ်ႇလႆႈႁဵတ်းႁင်ၽိတ်းမေႃးၵေႃႈ ၽႂ်ဢမ်ႇဢဝ်မၼ်းတၢႆၼင်ႇၵွၼ်ႇယူဝ်ႉ တေႃႈၼင်ႇၸဝ်ႈသေႃး ယိုဝ်းလုၵ်ႈၼွင်ႉမၼ်း ပိူၼ်ႈတင်းဢမ်ႇဢဝ်မၼ်းတၢႆၵွၼ်ႇ မၼ်းၵေႃႈၵူၼ်းလူင်ၼင်ႇၵဝ်ႇလူး ပိူၼ်ႈဢမ်ႇပေႉႁဵတ်းပေႃးတၢၼ်ႇၼၼ်ႉယူဝ်ႉ၊ မၼ်းတင်းဢမ်ႇၽိတ်းသင် သင်မၼ်းဢမ်ႇၵႂႃႇမီးတီႈၵျွင်း ၶေးတူဝ်မၼ်းပေႃးတၢႆယဝ်ႉတင်းဢမ်ႇႁူႉၵွၼ်ႇၼၼ်ႉ ၵူၼ်းၽွၵ်ႈၶွၵ်ႈလူင်ဢႃႈ မဵဝ်းမၼ်းၶႂ်ႈၽွၵ်ႈၵေႃႈမၼ်းတိုၼ်းၽွၵ်ႈယူႇယဝ်ႉလေႃႇ ဢမ်ႇၸႂ်ႈၸဝ်ႈပိုၼ်းႁၢၼ်ၵုမ်းၵေႃႈ တၢင်ႇၵေႃႉၵုမ်း မၼ်းတိုၼ်းၽွၵ်ႈယူႇယဝ်ႉဢိူဝ်ႈ” ၼၢႆးၸိင်ႇၵေႃႈဢုပ်ႇလၢတ်ႈၸွမ်းၵႂႃႇ။
“ၸႂ်ႈတေႉၵွၼ်ႇဢိူဝ်ႈ လွင်ႈၼႆႉမၼ်းၵႂႃႇလၢတ်ႈၼႂ်းပၢင်ၵုမ်ယူႇလူးၼၼ်ႉ လွင်ႈၶွၵ်ႈၶင်ၼၼ်ႉမၼ်းဢမ်ႇမၼ်ႈၵႅၼ်ႇ၊ ၵူၼ်းယၢမ်းၵေႃႈဢမ်ႇၵုမ်ႇ လူဝ်ႇႁႅင်းၵူၼ်းထႅင်ႈယူႇၼႆ ပိူၼ်ႈၵေႃႈဢမ်ႇတၵ်းသဵင်လူး ပႆႇၸမ်ပဵၼ်ၼႆၵူၺ်းၼႃႇဝႃႈႁင်းမၼ်း ပေႃးပဵၼ်မႃးသမ်ႉ မႃးဢဝ်ၵၼ်တူၵ်းၶွၵ်ႈၼႆႉမေႃးၵေႃႈ ၵဝ်ပေႉမႃးဢိမ်ႇဝႆႉၵွၼ်ႇဢိူဝ်ႈမၢင်ၵမ်းၵေႃႈ”
“ၼၼ်ႉ ၸဝ်ႈသေႃး လုၵ်ႈပီႈလုၵ်ႈၼွင်ႉ ၵူၼ်းလူင်ၸၼ်ႉသုင်ၶဝ်ၼၼ်ႉ ယွင်ႇယႃႈႁေ ယိုဝ်းၵွင်ႈၵႃႈဝႃႈၵႃႈပဵၼ် ၵႂႃႇတိူဝ်ႉသႂ်ႇလုၵ်ႈၼွင်ႉ မၢတ်ႇၸဵပ်းထိုင်ႁူင်းယႃ တင်းဢမ်ႇမီးဢပႅတ်ႈသင်သေဢိတ်း ဝႃႈမၼ်းဢမ်ႇလႆႈတင်ႈၸႂ်ၼႆႁေၵေႃႈယဝ်ႉၵူၺ်းၼႃႇ။ ပေႃးထၢၼ်ႈဝႃႈ ၵူၼ်းၼိုင်ႈၵေႃႉၼႆႉ ဢမ်ႇမီးၵႃႈၶၼ်သင်တေႉမႂ်း သႂ်ႇၵႂႃႇသႂ်ႇမႃး ၵွၺ်းႁူႉဝႃႈၵၢၼ်ၸိူဝ်ႉၸၢတ်ႈၼႆႉ ပဵၼ်ၼႆဝႆႉလူင်ဢေႉ”
“ယႃႇပေႃးလၢတ်ႈလင်ၼႃႇလႄႈ ၵမ်ႉမႃးပိူၼ်ႈဢဝ်ႁႃး လူင်းၵႂႃႇယူႇတၢင်းတႂ်ႈၼၼ်ႉယဝ်ႉၼၢႆးၼႆႉဢိူဝ်ႉ”
“ဢိူဝ်ႈ ဢီႇလူႇၵေႃႈယႃႇႁႅင်ႉမႆႈၸႂ်ၼႃႇၵွၼ်ႇဢိူဝ်ႈ မၼ်းဢမ်ႇပဵၼ်သင်လေႃႇ တေလႆႈဢွၵ်ႇမႃးယူႇၵႃႈမႂ်းၵေႃႈ ၵိၼ်ၶဝ်ႈၵိၼ်ၼမ်ႉဢိတ်ႉၼိုင်ႈဢိူဝ်ႈမေႃႉ ဝူၼ်ႉတႃႇလုၵ်ႈမႂ်းၽွင်ႈဢိူဝ်ႈ”
“လဝ်ႈႁဝ်းဢၼ်လူဝ်ႇတင်ႈၵေႃႈ တိုၵ်ႉမီးယူႇယူဝ်ႉၼၼ်ႉၼႃႉၸိင်ႇ”
“ဢိူဝ်ႈ ၵဝ်ၸင်ႇႁႂ်ႈၼႃႉၶူၺ်သူတူၺ်းပၼ်”
“မႂ်းယႃႇမႆႈၸႂ် မၼ်းတႅမ်ႈဝႆႉယူႇဢိူဝ်ႈၼၼ်ႉတူၺ်း ပေႃးမၼ်းပႆႇဢွၵ်ႇမႃးၵေႃႈ ၵဝ်တင်ႈပၼ်မႂ်းၵႃႈ”
“မၼ်းတမ်ႉဢမ်ႇမေႃလိၵ်ႈ ႁဵတ်းႁိုဝ်တႅမ်ႈဝႆႉလႃႇၼၼ်ႉ” ၼၢႆးၸိင်ႇထၢမ်ၽူဝ်မၼ်း။
“မၼ်းတွင်း ၵ ၶ င မၼ်းၼၼ်ႉၼႃႇ တူဝ်ၼပ်ႉတႄႉၵေႃႈမၼ်းႁူႉယူႇၵွၼ်ႇဢိူဝ်ႈ၊ ၸွမ်းၽႃၽူဝ်ႇလဝ်ႈႁဝ်းၼၼ်ႉ ပေႃးပဵၼ်ထၢၼ်ႇမီႈယူႇသဵင်ႈယဝ်ႈ”
