မိူဝ်ႈမိူဝ်းႁွတ်ႈႁိူၼ်းၼၼ်ႉ ၾႆးပေႃးလပ်းသိင်ႇၽိတ်းၽိတ်း ႁွင်ႉယိင်းသႅင်ၵေႃႈဢမ်ႇယူႇ
“မၼ်းၵႂႃႇလႂ်ယဝ်ႉလႃႇၼႆႉ!”
မိူဝ်းပိုတ်ႇၾႆးသေ ႁၼ်တိူၵ်ႈယႃလၢင်ႉၸဵပ်းယိင်းသႅင်ၼၼ်ႉၵေႃႈ ၽုၺ်ႇမႃးယဝ်ႉ လင်လႅင်းမိူင်းၼၼ်ႉၵေႃႈမီးလိူတ်ႈၸိုမ်ႉယမ်းလႅင်ဢွၵ်ႇမႃးဝႆႉ ႁႂ်ႈလႅင်းမိူင်းထွတ်ႇသိူဝ်ႈယဝ်ႉ။ ၶမ်းႁွမ်လႆႈႁၼ် လိူတ်ႈလႅင်ၸိုမ်ႉယမ်းပေႃးတဵမ်ၽႅၼ်ႇႁေႃႇၸဵပ်းလႄႈ သမ်ႉပေႃးလပ်းတႃၵႂႃႇပႅတ်ႈၵမ်းၼိုင်ႈယဝ်ႉ။
“လၢတ်ႈဝႃႈသူၸဵပ်းၼႆမၼ်းတေတၢႆၵႂႃႇႁႃႉ” တင်းလၢတ်ႈလေႃးပႃးလွင်ႈၵူဝ်လွင်ႈမႆႈၸႂ်ၼၼ်ႉယဝ်ႉ။
“ႁဝ်းဢမ်ႇပဵၼ်သင်တေႉဢိူဝ်ႈ”
ၶမ်းႁွမ်ၵေႃႈၼႃႈတူႇႁူႇတႃ ၼင်ႇၵူၼ်းၸႂ်လမ်ၼၼ်ႉသေ ဢဝ်ဢွၵ်ႇၽႅၼ်ႇႁေႃႇၸဵပ်းၼၼ်ႉသေယဝ်ႉ ႁၼ်ႁွႆးမၢၵ်ႇၵွင်ႈလႄႈ ထူၺ်ႈၸႂ်လူင်ၵမ်ႉၼိုင်ႈယဝ်ႉ။
ဢဝ်ၼူၼ်းၵုၺ်ၸုပ်ႉၼမ်ႉလၢင်ႉၸဵပ်းၼၼ်ႉ ၸဵတ်ႉၸွမ်းႁိမ်းႁွမ်းႁွႆးၸဵပ်းလွႆးလွႆးယဝ်ႉ။ ၶမ်းႁွမ်တင်ႈၸႂ်ဝႆႉမိုဝ်းၼၵ်းၼၵ်းသႂ်ႇ လႅင်းမိူင်းၵၼ်ႈပၼ်ၼႃႈပေႃးၵမ်ႇပေႃးလႅင်ယဝ်ႉ။
“ၸဵပ်းယူႇႁႃႉ!..”
“ဢိုမ်ႈ…”
ၶမ်းႁွမ်ၸင်ႇတေမဝ်မိုဝ်းမၼ်းလူင်း ၸဵတ်ႉပၼ်မၼ်းလွႆးလွႆးသေ ဢဝ်ၽႅၼ်ႇသတီးမႃးႁေႃႇပူၵ်ႉပၼ်ၵႂႃႇယဝ်ႉ။ သဵင်တီႈၼၼ်ႈၵေႃႈသမ်ႉပေႃးယဵၼ်သီႇသီႇလူင်ဝႆႉ လႅင်းမိူင်းၵေႃႈဢမ်ႇႁတ်းတၵ်းသဵင်သင်ထႅင်ႈ၊ ၶမ်းႁွမ်ဢၼ်ႁွႆးၸဵပ်းလႅင်းမိူင်းၼင်ႇၼၼ်ၵေႃႈ သမ်ႉပေႃးဢမ်ႇႁတ်းလၢတ်ႈထၢမ်သင်။
သဵင်တဵတ်ႇယဵၼ်ၼႂ်းႁိူၼ်းၼၼ်ႉ ယူႇတၢင်းၼွၵ်ႈတူၺ်းဢမ်ႇလႅပ်ႈမီးၵူၼ်းယူႇလူးၵွၼ်ႇယဝ်ႉ။
ယၢမ်းၵၢင်ၼႂ်ၾႃႉပၢင်ႇမိူင်းလႅင်း ၶမ်းႁွမ်တိုၼ်ႇမႃးယဝ်ႉၵေႃႈ ဢမ်ႇလႆႈႁၼ်ၽႂ်လႄႈ ၼႂ်းႁိူၼ်းသမ်ႉပေႃးယဵၼ်သီႇသီႇလူင်ဝႆႉ။
တီႈၼိူဝ်တပ်ႉ ၸၢႆးလၢဝ်လုၵ်ႉမႃးႁဵတ်းၶဝ်ႈၽၵ်းသေ လိူၵ်ႈလိူၵ်ႈသမ်ႉႁၼ်မႅၼ်ႈၺႃးသွၵ်းတိၼ်လႅင်းမိူင်း ထွတ်ႇယူႇၼႃႈသုမ်ႉၸဝ်ႈမၼ်းယူႇၼၼ်ႉ ၵႂႃႇငွၵ်ႈတူၺ်းၸမ်ၸမ်ယဝ်ႉ ဢဝ်မၼ်းတူၵ်းၸႂ်မႃးၵမ်းလဵဝ်။
“ၽဵတ်ႇလွၵ်ႇ!!”
လႅင်းမိူင်းၶုၼ်ႇၽႅတ်းတိုၼ်ႇမႃး “ၽဵတ်ႇတီႈလႂ်!!”
“ႁူဝ်ၼႃႈႁႃႉတေႃႈ”
“ၵူၼ်းၶႂ်ႈၼွၼ်းယူႇ မႃးႁွင်ႉႁဵတ်းႁင်တဵမ်ၸဝ်ႉတဵမ်ၸဵဝ်း”
“ႁူဝ်ၼႃႈမႃးယဝ်ႉ!!” ၸၢႆးလၢဝ်ၼႅတ်ႈႁွင်ႉသႅၼ်ႇ
ၶဝ်ၵေႃႈဢွၼ်ၵၼ်လုၵ်ႉမႃးတူၺ်းယူႇ။
လႃႈယူႇတၢၼ်ႇတၢၼ်ႇ လႅင်းမိူင်းၵေႃႈ လူင်းတပ်ႉမႃးသေ ၶဝ်ႈမိူဝ်းၼႂ်းဝၢင်းႁိူၼ်းၶမ်းႁွမ်ၶႃၼၼ်ႉလႄႈ ႁူပ်ႉႁၼ်ယိင်းသႅင်မီးယူႇၼႂ်းႁိူၼ်းၼၼ်ႉ။
“ဢေႃႈ!..မေႃယႃမီးယူႇႁႃႉ..မိူဝ်ႈဝႃးႁဝ်းမႃးဢမ်ႇလႆႈႁၼ်လႃႇ”
“ၶႃႈၵႂႃႇတၢင်းဝၢၼ်ႈတၢင်းဢွၵ်ႇပုၼ်ႉ…မၼ်းလိုၵ်းၼႃႇယဝ်ႉလႄႈၶဝ်ဢမ်ႇပၼ်ၶႃႈမႃးႁေႁႂ်ႈၶႃႈႁဵတ်းၶႅၵ်ႇၶဝ်ႁေၼႆဝႃႇ”
“ၼၼ်ႁႃႉ..”
“မႃးႁႃၶမ်းႁွမ်ႁႃႉ…ၵႂႃႇမီးတီႈႁူင်းႁဵၼ်းပုၼ်ႉယဝ်ႈ”
“ႁဝ်းမီးလွင်ႈတေဢုပ်ႇသူဢိတ်ႉၼိုင်ႈဢိူဝ်ႈ”
“မီးလွင်ႈသင်ၶႃႈ…”
“သူၸွင်ႇသူၼ်ၸႂ်ၶႂ်ႈသိုပ်ႇၶိုၼ်ႈႁဵၼ်းမေႃယႃထႅင်ႈယူႇႁိုဝ်…”
“သူၼ်ၸႂ်ဢေႃႈ…ၵူၺ်းၵႃႈထႅင်ႈသၢမ်ပီႊၵူၺ်း…ၶႃႈပေႃးတေပေႃးသိုၵ်းယဝ်ႉ…”
“ဢမ်ႇၸႂ်ႈဝႃႈပဵၼ်မေႃယႃတႃႇသိုၵ်းၵူၺ်းလူး…သင်သူမီးၼမ်ႉၵတ်ႉ…ၵတ်ႉၶႅၼ်ႇ…သမ်ႉဝႃႈတေပဵၼ်သိုၵ်းႁိုဝ်…ပဵၼ်ၵူၼ်းမိူင်းႁိုဝ်…သူၵေႃႈတိုၼ်းပဵၼ်မေႃယႃယူႇလူး…သမ်ႉဝႃႈဢမ်ႇယူႇသေၸွႆႈသိုၵ်းၼႆသေတႃႉ…ပဵၼ်ၵူၼ်းမိူင်းယဝ်ႉယူတ်းယႃၵူၼ်းမိူင်းၵေႃႈ…မိူၼ်တၢင်းၸွႆႈၸိူဝ်ႉၸၢတ်ႈမိူၼ်ၵၼ်ၼၼ်ႉယဝ်ႉ…မိူဝ်ႈမီးၼမ်ႉၵတ်ႉတိူဝ်းမႃးၼၼ်ႉ…ႁဝ်းၵေႃႈၸၢင်ႈၸွႆႈၵူၼ်းလႆႈၼမ်မႃးဢမ်ႇၸႂ်ႈႁိုဝ်…သင်သူႁဵတ်းၵၢၼ်ပၼ်ပုၼ်ႈၵူၼ်းတင်းၼမ်…ၸွႆႈထႅမ်ၵူၼ်းတင်းၼမ်ယူႇၼႆ…ႁဝ်းဢမ်ႇသေလၢႆယဝ်ႉ…”
“ၶႃႈၶႂ်ႈယွၼ်းၶၢဝ်းယၢမ်းဝူၼ်ႉတူၺ်းဢိတ်းၼိုင်ႈဢေႃႈ…”
“လႆႈယူႇ…ၵူၺ်းၵႃႈလူဝ်ႇၼႅတ်ႈဢိတ်းၼိုင်ႈဢိူဝ်ႈ…ႁဝ်းတေလႆႈတၢင်ႇၵႂႃႇၸွမ်းၵမ်းလဵဝ်…”
ယိင်းသႅင်ၵေႃႈဝူၼ်ႉၵႂႃႇၵမ်းၼိုင်ႈယဝ်ႉ။
“ဝူၼ်ႉတူၺ်းလီလီလႄႈ…တိုဝ်ႉတၢင်းၸိူင်ႉၼႆ…ဢမ်ႇမီးထႅင်ႈလၢႆပွၵ်ႈလူး…ႁဝ်းလႆႈၵႂႃႇႁဵၼ်းႁူႉထႅင်ႈ…ၵမ်ႉထႅမ်ပၼ်ၼမ်ႉၵတ်ႉႁဝ်းထႅင်ႈ…ႁဝ်းယူႇၸိူင်ႉၼႆၵေႃႈ…ၼမ်ႉၵတ်ႉႁဝ်းၵေႃႈတေမီးလႆႈၵႃႈၼႆႉၵူၺ်း…မိူဝ်ႈမီးတိုဝ်ႉတၢင်းၼၼ်ႉ…ႁဵၼ်းၵႂႃႇၼမ်ၼမ်လႄႈ…”
“ဢေႃႈ…ၶႃႈတႅပ်းတတ်းလႆႈယဝ်ႉ…ၶႃႈတေသိုပ်ႇႁဵၼ်းထႅင်ႈ…”
“လီယဝ်ႉ…ပေႃးၼၼ်ႁႅၼ်းၶူဝ်းဝႆႉလႄႈ…တေမႃးႁပ်ႉမိူဝ်ႈလႂ်ၼၼ်ႉ…တေလၢတ်ႈၶိုၼ်းထႅင်ႈၼႃႈ…”
ယၢမ်းၼၼ်ႉ ၸၢႆးၶမ်းၵေႃႈမႃးသူင်ႇ ၼေႃႇမိူင်းတီႈၼႃႈႁိူၼ်းသေ လႅင်းမိူင်းၵေႃႈ ပွၵ်ႈမိူဝ်းၵႂႃႇၸွမ်းၸၢႆးၶမ်းယူႇယဝ်ႉ။
သိုပ်ႇလူထႅင်ႈတွၼ်ႈတေမႃးၶႃႈ
