ယၢမ်းၶမ်ႈၶိုၼ်းလိူၼ်လႅင်းလႅင်း သၢႆလႅင်းလိူၼ်ၼၼ်ႉပိူင်းထွင်ႇပၼ်လုၵ်ႈလၢဝ်ပေႃးႁၢႆၵႂႃႇမူတ်း။ ငိုၼ်းသႅင်ၵေႃႈ ဢမ်ႇႁူႉတေႁဵတ်းႁိုဝ်ၼွၼ်းႁႂ်ႈလပ်းယဝ်ႉ ၽုၺ်ႇမၢၼ်ႇၽၵ်းတူႁူးလႅင်းမၼ်းသေ တဝ်ႉၵၢင်းမုင်ႈတူၺ်းလုၵ်ႈလိူၼ်လႅင်းယူႇၼၼ်ႉလႄႈ သမ်ႉဝႃႈသၢႆလႅင်းလိူၼ်ႁၢင်ႈလီၼႃႇသေတႃႉ ၼႂ်းသၢႆတႃၼၼ်ႉတႄႉ ႁၼ်သႅင်ပိုၼ်းၵူၺ်း ယိင်ႈဢမ်ႇၶႂ်ႈဝူၼ်ႉယိင်ႈဝူၼ်ႉႁၼ်မႃးတိၵ်းတိၵ်း၊ လူမ်းၵတ်းယဵၼ်လီၼႃႇသေလႄႈ သုတ်ႇလူမ်းၶဝ်ႈလိုၵ်ႉလိုၵ်ႉၵေႃႈ ႁၼ်ၼႃႈၶဝ် သုတ်ႇဢွၵ်ႇၵႂႃႇလွႆးလွႆးၵေႃႈ ႁၼ်ၶဝ်၊ မၢင်ၵမ်းမၢင်ၵမ်း ၼင်ႇႁၢင်ႈမိူၼ်ႁၼ်ၶဝ်မီးယူႇတၢင်းၼွၵ်ႈသေ ႁွင်ႉလၢတ်ႈတေႃႇမၼ်းမႃးယဝ်ႉ။ မၼ်းၵေႃႈ ၼႅတ်ႈဢိုတ်းၽၵ်းတူသေ ၵႂႃႇႁႃပပ်ႉၵႂၢမ်းဝႆႈၽြႃးမႃးလူယဝ်ႉ ၶမ်ႈၶိုၼ်းၼၼ်ႉ ၸင်ႇတေႁဵတ်းႁႂ်ႈမၼ်းၼွၼ်းလပ်းၵႂႃႇလႆႈ။
တီႈၼႂ်းသႅင်ႇ ငိုၼ်းသႅင်တိုၵ်ႉၶပ်ႉၶူဝ်းၶွင်ယူႇ ယၢမ်းၼၼ်ႉ သႅင်ပိုၼ်းၵေႃႈၶဝ်ႈမႃးၸူး ယိုၼ်းဢဝ်ၶူဝ်းၶွင်ဢၼ်မီးယူႇၽၢႆႇၼိူဝ်ႁူဝ်မၼ်းၼၼ်ႉလႄႈ ၶုၼ်ႇဝၢႆႇၼႃႈၸူး သၢႆတႃတုမ်ႉလေႃႇၺႃးၵၼ် ပၼ်ႁူဝ်ၸႂ်တွတ်ႇတဵၼ်ႈႁႅင်းမႃးထႅင်ႈ ၼႃႈသမ်ႉပေႃးလႅင်ဝၢၼ်းဝၢၼ်း သၢႆတႃၶဝ်ၵေႃႈတူၺ်းၶဝ်ႈၸူးၸမ် ၼႃႈၶဝ်ယုမ်ႉၸူးယဝ်ႉ ၵူမ်ႈလူင်းၸူး၊ ငိုၼ်းသႅင်သုတ်ႉပၢႆႈ သမ်ႉပေႃးၽႃႇၶူဝ်းၶွင်ႁူင်ႈႁူင်ႈတူၵ်းတူၵ်း သမ်ႉၶီႈလိုတ်းတိူၵ်ႈၶူဝ်းဢၼ်တမ်းၶႂင်တၢင်းယူႇၼၼ်ႉထႅင်ႈ သႅင်ပိုၼ်းၶုၼ်ႇႁပ်ႉဢဝ်ဢမ်ႇတၼ်းလႆႈ ငိုၼ်းသႅင်လူမ်ႉလူင်းၵႂႃႇ ဢႅဝ်ပေႃးၸဵပ်းလူင်မႃးၵမ်းလဵဝ်။ မိူဝ်ႈမိုၼ်းတႃမႃး ဢႃၵျွင်းဝႃႈပဵၼ်ၾၼ် ၵူၺ်းဢႅဝ်ၸဵပ်းၼၼ်ႉတႄႉၸဵပ်းတေႉယဝ်ႉ ၵွပ်ႈၼွၼ်းတူၵ်းၵူႇၵႂႃႇမီးယူႇၼိူဝ်ပိုၼ်ႉၼၼ်ႉယိုင်။
“ၵၢမ်ႇလီလႃႈ မၼ်းပဵၼ်ၾၼ်ၵူၺ်း ၵႆႉလႆႈႁၼ်ၶဝ်ယဝ်ႉ ဢဝ်မၼ်းၸပ်းတႃပႆႇပေႃး ၸွမ်းၶဝ်ႈမႃးယူႇၼႂ်းၾၼ်ထႅင်ႈ ဢၼ်ႁၼ်ၼႂ်းၾၼ်ၼၼ်ႉတႄႉယိုင်ႈၶႅၼ်းဢမ်ႇၶႂ်ႈလၢတ်ႈယဝ်ႉ”
လပ်းၵႂႃႇယဝ်ႉၵေႃႈၸႂ်ၸပ်း မိုၼ်းတႃမႃးၵေႃႈၸႂ်သုၵ်ႉ၊ ၽိူဝ်လိူဝ် မိူဝ်ႈၼႆႉသမ်ႉပဵၼ်ဝၼ်းလိုဝ်ႈ တေလႆႈၵႂႃႇႁဵတ်းၵၢၼ်တီႈသႅင်ႇထႅင်ႈႁေ ၵူဝ်လႆႈၺႃးၶဝ်ၼႃႇ ပဵၼ်ဢၼ်ၶီၸႂ်ဝႆႉထႃႈယူႇယဝ်ႉ။
ဝၼ်းလိုဝ်ႈၵူႈဝူင်ႈဝူင်ႈ မႄႈၵေႃႈတေႁႂ်ႈပေႃႈငိုၼ်းသႅင် ၸူဝ်းၵႂႃႇၼႂ်းဝဵင်းလူင်ၵူႈဝူင်ႈယဝ်ႉ၊ ၵွပ်ႈပဵၼ်ၵူၼ်းမီးငိုၼ်း ပဵၼ်ၵူၼ်းၵျိူၵ်ႈႁၢင်ႈၶိူင်ႈႁဵတ်းငၢမ်း ပဵၼ်ၵူၼ်းၵျိူၵ်ႈလႄႇၵျိူၵ်ႈလၢဝ်းလႄႈ ပေႃႈၵေႃႈၸွမ်းၸႂ်မႄႈတႄႉတႄႉ ၵွပ်ႈၵူဝ်ငိုၼ်းသႅင်ဢမ်ႇမီးမႄႈမိူၼ်ပိူၼ်ႈလႄႈ ႁဵတ်းပၼ်ၵူႈလွင်ႈႁႂ်ႈမၼ်းယူႇၼၼ်ႉၼႃႇ။ ငိုၼ်းသႅင်ၵေႃႈ ၵူဝ်မႄႈၽၢတ်ႇယၢၼ်ၵႂႃႇလႄႈ ယွမ်းႁဵတ်းၵူႈလွင်ႈပၼ်တွၼ်ႈတႃႇမႄႈယဝ်ႉ။
ငိုၼ်းသႅင်တႄႉၵေႃႈ သမ်ႉဝႃႈဢမ်ႇလႆႈၵႂႃႇတၢင်းလႂ် လႆႈပႂ်ႉသႅင်ႇယူႇၵူၺ်းၵေႃႈ ပေႃးဝႃႈမႄႈယင်းတိုၵ်ႉမီးယူႇၵူၺ်းၵေႃႈသိူဝ်းၸႂ်ယဝ်ႉ။
မိူဝ်ႈၼႆႉတႄႉငိုၼ်းသႅင်လုၵ်ႉလႃႈၵႂႃႇယဝ်ႉလႄႈ ပေႃႈတင်းမႄႈသမ်ႉပေႃးဢွၵ်ႇႁိူၼ်းၵႂႃႇၸဵမ်လႂ်ဢမ်ႇတၼ်းႁူႉယဝ်ႉ၊ ၼႂ်းသွင်ႇၾႆးၵေႃႈ မီးၶဝ်ႈၽၵ်းဢၼ်ပေႃႈၶဝ်ႁုင်မိုဝ်ႉဝႆႉၼၼ်ႉ မၼ်းၵိၼ်ယဝ်ႉၵေႃႈ ၵႂႃႇပိုတ်ႇလၢၼ်ႉယူႇ။
ပေႃးဢမ်ႇမီးၵူၼ်းၼႆ မၼ်းတေၵႆႉပိုတ်ႇထီႇဝီႇသေ တူၺ်းၸိူင်းပိၼ်ႇသဵင်တႆးသၢမ်ပီႈၼွင်ႉၶဝ်ၼၼ်ႉယဝ်ႉ။
“ဢေးၼွင်ႉ!..ဢေးၼွင်ႉ!!” ႁွင်ႉယူႇလၢႆၵမ်း ဢမ်ႇငိၼ်း သႅင်ပိုၼ်းတူပ်းမိုဝ်းယဝ်ႉ မၼ်းၸင်ႇၾၢင်ႉသတိတူၺ်းႁၼ်ၵူၼ်းတၢင်းၼႃႈမၼ်းၼၼ်ႉသေ။
“ဢေႃႈ”
သႅင်ပိုၼ်းငွၵ်ႈႁူဝ်တူၺ်းၸွမ်းယဝ်ႉ “လီတူၺ်းပေႃးပဵၼ်တၢၼ်ႇၼၼ်ႉႁႃႉ”
ၼႃႈသွင်ၶႃၸမ်ၵၼ်ၼႃႇလႄႈ ငိုၼ်းသႅင်ပေႃးဢမ်ႇႁတ်းတူင်ႉတူဝ်မၼ်းလႆႈ သဵင်ႁူဝ်ၸႂ်မၼ်းၼၼ်ႉတႄႉလင်ႁႅင်း တၢၼ်ႇဝႃႈတေၵျွၵ်းဢွၵ်ႇမႃးယဝ်ႉၼႃႇ။ သႅင်ပိုၼ်း သုတ်ႉဢွၵ်ႇမႃးယဝ်ႉ
“ဢမ်ႇၼပ်ႉၵႃႈမၼ်းယဝ်ႉႁႃႉ!..”
“ဢေႃ..ဢေႃႈ ဢေႃႈ” ယိပ်းၵႂင်ၵႂင်ၵႃးၵႃး သမ်ႉပေႃးဢမ်ႇႁူႉတေႁဵတ်းဢၼ်လႂ်ပဵၼ်ဢၼ်လႂ်ယဝ်ႉယိုင် ယိပ်းဝၢင်းယိပ်းဝၢင်း ၸႂ်ဢမ်ႇၼိမ်သမ်ႇမထိဢမ်ႇမၼ်ႈ ၼပ်ႉၽိတ်းၼပ်ႉၽူၼ်။
သႅင်ပိုၼ်းၵေႃႈ ယုမ်ႉယုမ်ႉသေၸၢႆႇၵႃႈမၼ်းဢွၵ်ႇသႅင်ႇယဝ်ႉ။ ဝၢႆးသႅင်ပိုၼ်းဢွၵ်ႇသႅင်ႇၵႂႃႇ မၼ်းၸင်ႇမႃးႁၼ် ဢၼ်ၼပ်ႉငိုၼ်းမၼ်းၼၼ်ႉၶိုၼ်း ႁူႉဝႃႈပွင်းပၼ်ၶူးၵႂႃႇပဵၼ်သွင်ၵမ်းၼၼ်ႉလၢႆဢၼ်။ ၼႅတ်ႈလႅၼ်ႈဢွၵ်ႇၵႂႃႇ
“ၶူး! ၵမ်ႉၶႃႈ.. မႃးၶိုၼ်းၵွၼ်ႇ!” မိူၼ်သႅင်ပိုၼ်းဢမ်ႇလႆႈငိၼ်းလႄႈ ဢမ်ႇဝၢႆႇတူၺ်းယဝ်ႉဢမ်ႇၵိုတ်းပၼ်မၼ်း မၼ်းၵေႃႈဢႅၼ်ႇလႅၼ်ႈၶၢမ်ႈတၢင်းၵႂႃႇၺႃတေၺႃးၵႃးၽႃႇယဝ်ႉ သင်ႁေႃႈဝႆးတႄႉ မိူဝ်ႈငိၼ်းသဵင်ၵႃးၵိုင်ႉၵၢင်ႉၵိုတ်း သႅင်ပိုၼ်းၼႅတ်ႈဝၢႆႇလင်မႃးတူၺ်း။
“ၼွင်ႉၸွင်ႇပဵၼ်သင်ႁိုဝ်!” သဵင်ဢၼ်ပႃးတင်းလွင်ႈမႆႈၸႂ်လႄႈလွင်ႈတူၵ်းၸႂ်
ၸဝ်ႈလူတ်ႉၵေႃႈဢွၵ်ႇမႃးထၢမ်ယူႇ ဢမ်ႇပဵၼ်သင်ယဝ်ႉၼႆၵေႃႈ ပူၼ်ႉၵႂႃႇသေယဝ်ႉ၊ သီၼႃႈငိုၼ်းသႅင်ၼၼ်ႉတႄႉၵေႃႈ ႁၼ်ဢမ်ႇပေႃးလီဝႆႉလႄႈ သႅင်ပိုၼ်းလႆႈၸွမ်းသူင်ႇမၼ်းၵႂႃႇတီႈသႅင်ႇၶိုၼ်း။
သွင်ၵေႃႉၵေႃႈၵႂႃႇၼင်ႈယူႇၼႂ်းသႅင်ႇၼၼ်ႉသေ ၼိမ်ယဵၼ်ယူႇၵႅပ်ႉၼိုင်ႈ ငိုၼ်းသႅင်မိူၼ်တေလီမႃးယဝ်ႉလႄႈ “ၶႃႈၼပ်ႉ..ပၼ်ၶူးၽိတ်းၵႂႃႇမိူဝ်ႈၵႆႈ..”
“ၸိူင်ႉၼၼ်ၵႃႈ လႂ်ဝႃႈၸွမ်းႁွင်ႉပေႃးဢမ်ႇတူၺ်းလူတ်ႉတူၺ်းၵႃးၼၼ်ႉ”
ငိုၼ်းသႅင်ငွၵ်းႁူဝ်ၼႄၵႂႃႇ တင်းသီၼႃႈဢမ်ႇၵီႈလႆႈလႄႈ တင်းတူဝ်တင်းၸႂ် သမ်ႉပေႃးသၼ်ႇတိၼ်းတိၼ်း တေလၢတ်ႈၵႂၢမ်းဢွၵ်ႇသူပ်းၵူၺ်း ပေႃးၶႂ်ႈယၢပ်ႇယူႇယဝ်ႉယိုင်။ ငိုၼ်းသႅင်ၵေႃႈ ဝူၼ်ႉဝႃႈၼပ်ႉမႅၼ်ႈယဝ်ႉၼႆသေ မႄးၸၢႆႇပၼ်ငိုၼ်းဢၼ်မၼ်းဢဝ်လိူဝ်ဝႆႉၼၼ်ႉၶိုၼ်းယဝ်ႉ။
ဝၢႆးသႅင်ပိုၼ်းဢွၵ်ႇၵႂႃႇ ငိုၼ်းသႅင်ၵေႃႈ ဢဝ်မၼ်းသမ်ႉပေႃးငဝ်တူၵ်ႇသူၵ်ႇဝႆႉသေ လွင်ႈဢၼ်မၼ်းလႆႈႁူပ်ႉလႆႈထူပ်းယူႇၼႆႉၵေႃႈ မၼ်းၵပ်ႉၵိၼ်းၶမ်ၸႂ် မိူၼ်ၶႂ်ႈလၢတ်ႈၼႄၽႂ်သေၵေႃႉၵေႃႉလႄႈ ဢမ်ႇႁူႉတေလၢတ်ႈၼႄၽႂ် ၶမ်ၸႂ်ဝႆႉယူႇၸိူင်ႉၼၼ်ယဝ်ႉ။
ဝၼ်းၶိုၼ်ႈႁူင်းႁဵၼ်းၼႆၵေႃႈ ငိုၼ်းသႅင်လႅပ်ႈတူၵ်းလိုၼ်းထႅင်ႈယဝ်ႉလႄႈ မိူဝ်ႈတိုၵ်ႉလႅၼ်ႈလူင်ၵႂႃႇၼၼ်ႉ သႅင်ပိုၼ်းဢၼ်ယူႇတီႈၼႃႈႁိူၼ်းမၼ်း ၼႅတ်ႈႁေႃႈလႅင်ထိပ်ႇလမ်းၸွမ်း။
“ၶီႇလႅင်ထိပ်ႇၵႂႃႇၸွမ်းလႄႈ ၵမ်ႉတေဢမ်ႇတၼ်းၶိုတ်းယဝ်ႉ”
ငိၼ်းသဵင်ယဝ်ႉဢမ်ႇလႆႈတူၵ်းၸႂ်လႄႈ မၼ်းၵေႃႈၵိုတ်းသေတူၺ်းဢွမ်မွင်းတီႈၶႅၼ်မၼ်းၼၼ်ႉ သမ်ႉဝႃႈလႅၼ်ႈဝႆးၼႃႇၵေႃႈဢမ်ႇလႅပ်ႈၶိုတ်းလႆႈယဝ်ႉလႄႈ ၶီႇၵႂႃႇၸွမ်းယူႇ။ ၵွပ်ႈတၢင်းပဵင်းလႄႈသႅင်ပိုၼ်းၵေႃႈၵိုင်ႉၵၢင်ႉပတ်ႉႁႅင်းဝႆးမၼ်းယဝ်ႉ ငိုၼ်းသႅင်မိူၼ်တေတူၵ်းၵႂႃႇသေ ၶုၼ်ႇႁၢဝ်ႉၸၼ်ဢဝ်သိူဝ်ႈသႅင်ပိုၼ်းၵမ်းလဵဝ်။ ဢမ်ႇတၼ်းႁူႉ ႁွတ်ႈထိုင်တီႈႁူင်းႁဵၼ်း ဢူၺ်းၵေႃႉမၼ်းလႆႈႁၼ်လႄႈ
“ႁိူဝ်ႇ! ဢေးငိုၼ်း..”
“ဢီႈႁင်ဢႃႇ..”
“မႂ်းလႆႈၶီႇလႅင်ထိပ်ႇမႃးၸွမ်းၶူးႁေၼႃ ၵဝ်မိူဝ်းယူႇၸွမ်းမႂ်းလီယူႇယူဝ်ႉဝႃႈ ႁိူၼ်းၸမ်ၵၼ်ႁေ မႃးႁူင်းႁဵၼ်းၵေႃႈလႆႈမႃးၸွမ်းၵၼ်”
“မႂ်းပေႉပဵၼ်ႁင်တင်းၶူးသႅင်ပိုၼ်းလႃႇၵဝ်ဝႃႈ”
“ၶူးလဝ်းၼႃႇလႄႇမႂ်းၵေႃႈ တေႃႈၼင်ႇတူၺ်းတၢင်းလင်မၼ်းၵူၺ်း ပေႃးလဝ်းၼႃႇယဝ်ႉ ပေႃးမၼ်းဝၢႆႇၼႃႈမႃး ယိုင်ႈၶႅၼ်းလဝ်းထႅင်ႈ ပေႃးမၼ်းယုမ်ႉၼိုင်ႈၵမ်းၼႆ သမ်ႉပေႃးၶႂ်ႈမဝ်းလူင်ၵႂႃႇယဝ်ႉ”
ငိၼ်းၵူၺ်းပေႃးႁၼ်ၼႂ်းတႃမႃးယဝ်ႉ ၼႃႈငိုၼ်းသႅင်ၼၼ်ႉၵေႃႈ သမ်ႉပေႃးလႅင်လူင်မႃးၸွမ်း။
သိုပ်ႇလူဢၢၼ်ႇထႅင်ႈတွၼ်ႈၼႃႈၶႃႈ
