2003
ၼႂ်းသႅင်ႇၼၢင်းသိုဝ်ႉလူႇ
“ပီႈလူဝ်းမီးယူႇႁႃႉ”
“မီးဢိူဝ်ႈ..”
“တၼ်းဢိုတ်းသႅင်ႇမိူဝ်ႈလႂ်ယဝ်ႉလႃႇၼႆႉ ဢမ်ႇၶၢႆယဝ်ႉၵႃႈတၢင်းၶၢႆ”
“ၸူဝ်ႈပိူၼ်ႈဢမ်ႇထုၵ်ႈငိုၼ်းလိူၼ်ၼႆႉ ၶၢႆဢမ်ႇၶၢႆၵေႃႈဢမ်ႇလႆႈၼမ်ႉမႅတ်ႈၼမ်ႉတွၼ်းႁင်ပႃႈႁွမ်ဝႃႈ”
“တေႉဢိူဝ်ႈၼႆ ႁၢင်ႈႁမ်ႉဢၢပ်ႈၶၢႆလဝ်ႈယူႇလႃႇ”
“ၶၢႆယူႇဢိူဝ်ႈၼၼ်ႉတႄႉ”
“ဢမ်ႇႁဵတ်းၸွမ်းၼၢႆးၸိင်ႇၶဝ်ယဝ်ႉႁႃႉ”
“ဢမ်ႇႁဵတ်းယဝ်ႉ ၶိင်းႁဝ်းမၼ်းၸူဝ်းပီႈသၢင်ႇၶၢႆႉတႃႈၼမ်ႉ ၵႂႃႇႁဵတ်းထႅင်ႈ တႃႈတၢင်းတူၵ်းၼႃႉၸိင်ႇၶဝ်ၼၼ်ႉယိုင်”
“တႃႈၽူဝ်ႇလဝ်ႈဢၼ်ၶဝ်ဝႃႈၼၼ်ႉႁႃႉ”
“ၸႂ်ႈယဝ်ႉဝႃႈ”
“ၼမ်ႉၶႅမ်ႉယူႇၼႄႇ”
“ၼမ်ႉၶႅမ်ႉဢိူဝ်ႈတၢင်းၼၼ်ႉတႄႉ မီးၼမ်ႉႁူးႁေၼေႈ ၶၢဝ်းႁႅင်ႈၼႆႉ ၵႂႃႇဢၢပ်ႇၼမ်ႉတၢင်းၼၼ်ႉလၢႆလၢႆယဝ်ႉႁဝ်း”
“ၸဝ်ႈႁၢၼ်လူးၵႂႃႇလႂ်ယဝ်ႉလႃႇ”
“တင်းဢၢႆႈလႅင်ႁေ ဢွၼ်ၵၼ်ၵႂႃႇပွမ်ႈမႆႉလၢၼ်းႁႆႈၶႃဝႃႇၼၼ်ႉ”
“ပီၼႆႉႁဵတ်းႁႆႈၶဝ်ႈႁေႁႃႉ”
“ႁဵတ်းဢိူဝ်ႈ ဢမ်ႇပိုတ်ႇသႅင်ႇပိုတ်ႇႁင်ယဝ်ႉၵေႃႈ ဢမ်ႇၸၢင်ႈႁႃငိုၼ်းႁႃတွင်းၸိူင်ႉႁိုဝ်ယဝ်ႉၼႃႇ ပေႃးဢမ်ႇလူဝ်ႇဢဝ်လုၵ်ႈဢွၼ်ႇတႄႉ ၵႂႃႇႁဵတ်းၸွမ်းၶဝ်ယဝ်ႉ”
“ႁမ်ႉဢမ်ႇၸေးလုၵ်ႈဢွၼ်ႇၵႂႃႇၸွမ်းႁေ”
“ဢမ်ႇတေႃႇတေႃႇ ၵၢၼ်ၸွမ်းႁိူၼ်းၸွမ်းယေးၵူၺ်း ႁဵတ်းပေႃးဢမ်ႇပေႉလႆႈယဝ်ႉ မွင်းဝႃႈမၼ်းၼွၼ်းၵူၺ်းဢိူဝ်ႈၼႆႉ လူဝ်ႇၽဵဝ်ႈလူဝ်ႇသိမ်း ၸွမ်းၵူၼ်ႈမၼ်းပေႃးဢမ်ႇယဝ်ႉလႆႈဝႃႈ”
“ဢေးၼၢင်းလူင်ပေႉဢုတ်ႉဝႃႈဢုတ်ႉၼေႃ”
“ၵိၼ်လူင်ပေႉတၢၼ်ႇၼၼ်ႉ ဢမ်ႇဢုတ်ႉတေၵႂႃႇတၢင်းလႂ် ဢေးၼုမ်ႇတႄႉပွႆႇႁူင်းႁဵၼ်းယဝ်ႉယူဝ်ႉ”
“ပွႆႇယဝ်ႉဝႃႈ လူဝ်ႇၵႂႃႇႁဵတ်းၵၢၼ်ယဝ်ႉလႄႇ ၶိင်းၵႃႇလိင်ႇၵေႃႈ ႁႂ်ႈမၼ်းႁဵတ်းႁႆႈၼႆဢိူဝ်ႈ မၼ်းသမ်ႉဝႃႈဢမ်ႇမီးတီႈမၼ်းၼႆ ၶႃႈဝႃႈမႃးထၢမ်တူၺ်းၸဝ်ႈႁဝ်းၼႆၵႃႈ ပေႃးမၼ်းၶႂ်ႈႁဵတ်းၵေႃႈ ႁႂ်ႈမၼ်းၵႂႃႇႁဵတ်းၸွမ်းၵၼ်တင်းၸဝ်ႈႁဝ်းၼၼ်ႉၼႃႇ”
“လႆႈဢိူဝ်ႈၸၢင်ႈပဵၼ်ႁင် ပေႃးမႃးၸွင်ႇၵွႆႈထၢမ်ပၼ်ၵႃႈ၊ တၢင်းမူးသိူဝ်းၶဝ်ပုၼ်ႉ ပိူၼ်ႈႁွင်ႉၵႂႃႇႁဵတ်းၵၢၼ်ယူႇႁိုဝ်လႃႇ”
“ၶႃႈဝႃႈဢၢင်ႈတေၵႂႃႇဢိူဝ်ႈ သမ်ႉဢမ်ႇမီးၵူၼ်းတူၺ်းလုၵ်ႈဢွၼ်ႇၵွၼ်ႇလႄႇ”
“မီးၵၢၼ်ႁင်လႃႇထွမ်ႇဝႃႈမိူဝ်ႈလဵဝ်”
“မိူဝ်ႈလဵဝ်တႄႉ ၵၢၼ်ႉၶဝ်ႈၵၢပ်ႇၼၼ်ႉယိုင်”
“လႆႈဝၼ်းၵႃႈႁိုဝ်လႃႇၶဝ်ပၼ်”
“ဝၼ်း 50 ဝၢတ်ႇ ၼၼ်ႉၼႃႇ” တီႈၼိူဝ်လွႆၼႆႉ ၸပ်းလိၼ်ထႆးဝႆႉလႄႈ ၸႂ်ႉၸၢႆႇၵၼ်ငိုၼ်းထႆးၵူၺ်း။
“ပေႃးသိုဝ်ႉပေႃးၸၢႆႇယူႇၵူၺ်းဢိူဝ်ႈၼႆ သၢမ်ဝၼ်းၵေႃႈ ပဵင်းၵူၼ်းသိုၵ်းၶဝ်ႁဵတ်းၵၢၼ်ပဵၼ်လိူၼ်ယဝ်ႉလႂ်”
“ၼၼ်ႉယဝ်ႉ တင်းလုၵ်ႈတင်းလၢင်းႁေ ႁဝ်းဢိုပ်းလႆႈယူႇၵေႃႈ ႁၼ်ၶဝ်ယွၼ်းၵိၼ် သမ်ႉဢမ်ႇတူၺ်းလႆႈၼင်ႇၵွၼ်ႇၼႆ”
“ၼၼ်ႉယဝ်ႈ”
“ပေႃးလူဝ်ႇၵူၼ်းၽုၵ်ႇၶဝ်ႈၵေႃႈႁွင်ႉႁဝ်းလႄႈဢိူဝ်ႈ”
“ဢိူဝ်ႈဢိူဝ်ႈ ၵႃႈလႆႈႁွင်ႉယူႇၵူၺ်းယူဝ်ႉ ပေႃးမၼ်းႁဵတ်းႁင်းၵူၺ်းတႄႉ ၵမ်ႉၵၢၼ်မၼ်းႁေဢမ်ႇတၼ်းယဝ်ႉလႆႈလေႃႇ”
“ပီႈလူဝ်းၶဝ်ၸွင်ႇမီး ၼမ်ႉမၼ်းၽွင်ႈႁႃႉၼႆႉ”
“မီးတႄႉမီးယူႇဢိူဝ်ႈ”
“ၶႂ်ႈယွၼ်းၵူႈႁေဢိတ်ႉၼိုင်ႈၵူၺ်းယဝ်ႉ”
ၼၢင်းသိုဝ်ႉလူႇၼၼ်ႉၵေႃႈ ဢဝ်တင်းၶူတ်ႇလီးၽူဝ်းၼၼ်ႉၸိူၼ်းၼမ်ႉပႅတ်ႈသေယဝ်ႉ ဢဝ်ၼမ်ႉမၼ်းသႂ်ႇပၼ်ၵႂႃႇယဝ်ႉပၼ်ၵႂႃႇ။
“ႁဝ်းပၼ်ၵူၺ်း”
“ဢမ်ႇပဵၼ်ႁင်ပီႈလူဝ်းဢိူဝ်ႈ ၶႃႈတေမႃးတႅၼ်းၶိုၼ်းယူႇၵႃႈ”
“ဢမ်ႇပဵၼ်ႁင် ပွၵ်ႈၼႆႉတႄႉဢဝ်မိူဝ်းၵိၼ်လႃႈ”
“ၸူမ်းတေႉၸူမ်းဝႃႈယဝ်ႉဝႃႈပီႈလူဝ်းဢိူဝ်ႉ ၵူႈဝၼ်းၼႆႉပေႃးဝႃႈလႆႈၵိၼ်ၶဝ်ႈၸၢၼ်ၵိူဝ်ဢွႆၼမ်ႉမၼ်းၼႆၵူၺ်းၵေႃႈ လုၵ်ႈဢွၼ်ႇၶဝ် ၸူမ်းၵိၼ်ၼႃႇယဝ်ႉဝႃႈ ၵတ်ႉၵႃႈတီႈႁူင်းႁဵၼ်းပိူၼ်ႈတင်းလဵင်ႉၽၵ်းလႃႈ သၢၵ်ႈသႃႇႁဝ်းဢူႈမႄႈဢိတ်ႉၼိုင်ႈ”
“ပီႈလူဝ်းၵိၼ်လႆႈယူႇယူဝ်ႉပီၵူၺ်ႈ ၶိင်းႁဝ်းၵႂႃႇလႄႇထိူၼ်ႇႁေလႆႈမႃးၼမ်ၽႅဝ်”
“ၵိၼ်ယူႇၵူၺ်း ၼႂ်ၼႆႉၵေႃႈတိုၵ်ႉၸင်ႇႁႃၵိၼ်ယဝ်ႉၵူၺ်းဢိူဝ်ႈၼၼ်ႉ ဢူႈၶဝ်ၵႂႃႇၵဵပ်းမႃးၼႂ်းသူၼ်ၼၼ်ႉယိုင်”
“ၸဝ်ႈႁဝ်းၼႆႉၵႆႉတေႉၼေႃ သူၼ်ၵေႃႈႁဵတ်း လဝ်ႈၵေႃႈႁုင် သမ်ႉဝႃႈတေၵႂႃႇႁဵတ်းႁႆႈထႅင်ႈ”
“ပေႃးဢမ်ႇႁဵတ်းၵေႃႈဢမ်ႇလႆႈၵိၼ်လႄႇပႃႈႁွမ်ဝႃႈ ႁဝ်းဢမ်ႇဢမ်ႇၸၢင်ႈႁဵတ်းၵၢၼ်တၢင်းလီတၢင်းငၢမ်းလူႉ”
“ပီႈလူဝ်းၵေႃႈယူႇႁိူၼ်းႁေၶၢႆလဝ်ႈၵူၺ်း တင်းလႆႈၵိၼ်ၼႃႇယဝ်ႉဝႃႈ” ယၵ်ႉတူၺ်းၸွမ်းႁိူၼ်းၼၼ်ႉသေ “တူၺ်းလူးၸွမ်းႁိူၼ်းၸွမ်းယေးၵေႃႈ သမ်ႉပေႃးလိူမ်ႈယၢတ်ႈယၢတ်ႈ”
“တေႉဢိူဝ်ႈၼၼ်ႉ ဢဝ်ဢွႆႈမိူဝ်းလဵင်ႉလုၵ်ႈဢွၼ်ႇလႄႈ ၼႂ်းသူၼ်ၼၼ်ႉပိူဝ်ႇလိူဝ်ႉ”
“ပေႃးၼၼ် ၶႃႈၵႂႃႇတႅပ်းလႂ်”
“ၵႂႃႇဢဝ်လႄႈ ၽႃႉမီးၼႂ်းသွင်ႇၾႆးၼၼ်ႉ”
ဝၢႆးသေၼၢႆးႁွမ်ပွၵ်ႈမိူဝ်းၵႂႃႇ ၼၢင်းသိုဝ်ႉလူႇၵေႃႈ ၵွမ်ႇလုၵ်ႈမၼ်းၼွၼ်းသေယဝ်ႉ ၵႂႃႇၸွၼ်ႉသူၼ်ယူႇတၢင်းလင်ႁိူၼ်းၼၼ်ႉယဝ်ႉၼႃႇ။
ႁူဝ်ၶမ်ႈမႃးၵေႃႈ ၸေးတင်းလုၵ်ႈဢွၼ်ႇမၼ်းသေ တင်းၶူဝ်းတင်းလဵင်းႁၢပ်ႇလူင်ၵႂႃႇတၢင်းတႃႈၼမ်ႉၼၼ်ႉယဝ်ႉၼႃႇ၊ ၶွၼ်ၼိုင်ႈပုင်းၶူဝ်း ၶွၼ်ၼိုင်ႈပုင်းၼမ်ႉ ႁၢပ်ႇဢမ်ႇၶိုင်ႈဢမ်ႇၵၢင်ဝႆႉႁေ တၢင်းလင်သမ်ႉပဵၼ်လုၵ်ႈဢွၼ်ႇ တွၵ်ႈလွႆၶိုၼ်ႈမိူဝ်းၵႂႃႇလွႆးလွႆးယဝ်ႉ။
ဝၼ်းၼိုင်ႈ ၸဝ်ႈပိုၼ်းႁၢၼ်ၵေႃႈမႃးႁႃႁုင်မိုဝ်ႉႁဵတ်းၽၵ်းၼႂ်းသွင်ႇၾႆးၼၼ်ႉယဝ်ႉ
“သူၵႂႃႇပၢင်ၵုမ်မႃး ပိူၼ်ႈဝႃႈႁိုဝ်လႃႇ”
“ငိုၼ်းလိူၼ်ႁဝ်းတေဢမ်ႇလႆႈထုၵ်ႈထႅင်ႈႁိုင်ယူႇ”
“ၵူၼ်းသိုၵ်းၸိူဝ်းၼၼ်ႉလူး တေႁဵတ်းႁိုဝ်ယဝ်ႉလႃႇ”
“ၸၢင်ႈတေႁဵတ်းႁိုဝ် ၵူၼ်းႁဵတ်းၵၢၼ်လုၵ်ႉၽိုၼ်ႉယဝ်ႉလူး ပေႃးထၢၼ်ႈဝႃႈၶႂ်ႈၵျေႃႇသေမႃး ဢမ်ႇမီးၵူၼ်းပၢႆႈယဝ်ႉ” ယၵ်ႉတူၺ်းဢၢႆႈလႅင်ၼၼ်ႉသေ “ဢၢႆႈလႅင် ပိူၼ်ႈဢမ်ႇထုၵ်ႈငိုၼ်းလိူၼ်ယဝ်ႉ ၸွင်ႇမႂ်းတေၶႂ်ႈပၢႆႈႁိုဝ် ပေႃးမႂ်းၶႂ်ႈၵႂႃႇၵေႃႈၵႂႃႇလႆႈယူႇၼႃႇ”
“ဢမ်ႇၶႂ်ႈၵႂႃႇၶႃႈ”
“ၵဝ်တႄႉဢမ်ႇလႆႈငိုၼ်းလိူၼ်ၵေႃႈ ႁဵတ်းႁႃၵႂႃႇဢိတ်းဢိတ်းဢွတ်းဢွတ်း ပေႃးၵိၼ်ယူႇၵူၺ်း မႂ်းယူႇၸွမ်းႁဝ်းၵေႃႈ ဢမ်ႇပၼ်မႂ်းဢိုပ်းၼင်ႇၵဝ်ႇ”
“ၶႃႈတေယူႇၸွမ်းပေႃႈႁဝ်းၵူၺ်းယဝ်ႉၶႃႈၵႃႈ”
ဢၢႆႈလႅင်တႄႉၵေႃႈ ပဵၼ်သိုၵ်းဢၼ်ပိူၼ်ႈၵဵပ်းမႃးသေ မႃးသွၼ်ၵၢၼ်ႁူင်းၽိုၵ်းသွၼ်ယဝ်ႉ ၸဝ်ႈပိုၼ်းႁၢၼ်ၵေႃႈ ဢဝ်မႃးႁဵတ်းၵူၼ်းယူႇၸွမ်းမၼ်းၵႂႃႇယဝ်ႉ။
“ဢမ်ႇလႆႈငိုၼ်းလိူၼ်ၵေႃႈ ပိူၼ်ႈတင်းလဵင်ႉၶဝ်ႈယူႇ မိူဝ်ႈႁဝ်းမႃးၸွမ်းတၢင်းၼႆႉမႂ်းႁူႉ ဢမ်ႇလႆႈၵိၼ်ၶဝ်ႈပဵၼ်သိပ်းဝၼ်းပၢႆၵွၼ်ႇဢိူဝ်ႈ။ ၵဝ်တႄႉဝူၼ်ႉဢိူဝ်ႈ ႁဝ်းမႃးႁဵတ်းသိုၵ်းလုၵ်ႉၽိုၼ်ႉယူႇၼႆႉ ယွၼ်ႉပိူၼ်ႈတဵၵ်းတဵင် ပေႉၵိၼ်ပီႈၼွင်ႉၸိူဝ်ႉၶိူဝ်းႁဝ်းမႃးၶိူဝ်းၶိူဝ်းယႂ်းယႂ်းလႄႈ ၸင်ႇလႆႈမႃးႁဵတ်းယဝ်ႉ ၵဝ်ၵေႃႉလဵဝ်ၵူၺ်းၵေႃႈဢမ်ႇပဵၼ် ယွၼ်ႉမီးၽူႈဢွၼ်ႁူဝ် ဢၼ်ၶႂ်ႈလုၵ်ႉၽိုၼ်ႉမႃးလႄႈ ၸင်ႇလႆႈမႃးႁူမ်ႈႁႅင်းၵၼ်ယူႇတီႈၼႆႈၼၼ်ႉၼႃႇ”
