ၶိူဝ်းႁွမ် တူၺ်းၸွမ်းလင်သႅင်ပိုၼ်းၵႂႃႇ သေယဝ်ႉလၢတ်ႈၸူးငိုၼ်းသႅင်
“ဢေးငိုၼ်း မႂ်းၶီႇလႅင်ထိပ်ႇမႃးၸွမ်းၶူး ၸႂ်ဢမ်ႇသၼ်ႇၽွင်ႈႁႃႉ”
သမ်ႉပေႃးဢဝ်ငိုၼ်းသႅင်ၼႃႈလႅင်မႃးထႅင်ႈ လၢတ်ႈသဵင်သုင်ၵႂႃႇဝႃႈ “ဢမ်ႇ..”
ၶိူဝ်းႁွမ်ၵေႃႈမႄးလၢတ်ႈထႅင်ႈ “ဢမ်ႇၸၢင်ႈဝႃႈၼႃ ယူႇၸမ်ၶဝ် ၵႆႉႁၼ်ၶဝ် ၵႆႉမႃးႁူင်းႁဵၼ်းၸွမ်းၵၼ် ၵႆႉၶီႇလႅင်ထိပ်ႇၸွမ်းၵၼ်မႃးၼႃႇ ၵမ်ႉမႃးႁၵ်ႉမႅၼ်ႈၶဝ်တေႁဵတ်းႁိုဝ်”
“ၵဝ်ဝႃႈမႂ်းလူၸိူင်းၼမ်ၼႃႇပူၼ်ႉတီႈယဝ်ႉ ၶဝ်ပဵၼ်ၶူး ႁဝ်းပဵၼ်လုၵ်ႈႁဵၼ်းဢိူဝ်ႈ ဝူၼ်ႉၽွင်ႈလႄႈ”
“တၢင်းႁၵ်ႉမၼ်းဢမ်ႇမီးၸၼ်ႉထၢၼ်ႈလေႃႇၼႃႈ ၶေးၶေးမႂ်းၵေႃႈတေမီးၸႂ်ယူႇလႄႈ ၸင်ႇလႆႈၸွမ်းၵူၼ်ႈလႅင်ထိပ်ႇၶဝ်မႃးၼႆႉ”
“ပေႃးဢမ်ႇမီးၸႂ် ၵဝ်ၵေႃႈဢမ်ႇယူႇလႆႈယဝ်ႉလေႃႇမႂ်းၵေႃႈ”
“ၵူၼ်းဢမ်ႇမီးႁူဝ်ၸႂ်တၢင်းႁၵ်ႉၸိူင်ႉၼင်ႇမႂ်းၼႆႉ လူၸိူင်းတၢင်းႁၵ်ႉပဵၼ်လၢႆႁူဝ်ၵေႃႈ ဢမ်ႇပွင်ႇၸႂ်လႆႈလေႃႇ ၸင်ႇဝႃႈဢမ်ႇမီးၸူႉလႆႈႁေပွၵ်ႈၼၼ်ႉယဝ်ႉ”
“မီးၸူႉၼႆႉမၼ်းမိူၼ်ႁိုဝ်ဝႆႉလႃႇ လၢတ်ႈၼႄၽွင်ႈလူႉဢေႉ”
“ပိူၼ်ႈႁႂ်ႈမႂ်းမီးမႂ်းသမ်ႉဢမ်ႇမီး မီးတူၺ်းလႄႈၶႂ်ႈႁူႉၵေႃႈ ၸိူင်ႉၼႆတူဝ်ထူပ်းၸင်ႇႁူႉဢိူဝ်ႈ”
“မီးၸူႉလႄႈတၢင်းႁၵ်ႉၼႆႉ ၸွင်ႇမၼ်းမိူၼ်ၵၼ်ႁိုဝ်”
“ပေႃးဢမ်ႇႁၵ်ႉၵၼ် ၽႂ်သမ်ႉတေပဵၼ်ၸူႉၵၼ်လႃႇ လႃႈလီႈလၢတ်ႈ”
“ဢမ်ႇၸႂ်ႈဝႃႈ ပဵၼ်ၸူႉၵၼ် ႁႂ်ႈပိူၼ်ႈႁၼ်ဝႃႈ ႁဝ်းမီးၵူႈၸိူင်ႉၼင်ႇပိူၼ်ႈယူႇ ၵူၼ်းၵေႃႉၼၼ်ႉမၼ်းပဵၼ်ၸူႉႁဝ်းယဝ်ႉ ၵူၺ်းၵႃႈ မိူဝ်ႈယူႇၸွမ်းၵၼ်တႄႉ သမ်ႉၵႆႉၵႆႉၽိတ်းၵၼ်ၸိူင်ႉၼၼ် သူဝူၼ်ႉဝႃႈၸွင်ႇၸႂ်ႈၸူႉၵၼ်ႁႃႉ”
သမ်ႉပေႃးဢဝ်ၶိူဝ်းႁွမ်ယဵၼ်မိုင်တူၺ်းငိုၼ်းသႅင်ၵႂႃႇၵူၺ်း
ဝၢႆးလူင်းႁူင်းႁဵၼ်းၼၼ်ႉ ငိုၼ်းသႅင်ၵေႃႈ ပႆမိူဝ်းၵႂႃႇလွႆးလွႆးၼင်ႇၵူႈဝၼ်း သႅင်ပိုၼ်းပႃးတင်းလႅင်ထိပ်ႇထူဝ်းမိူဝ်းၸွမ်းလွႆးလွႆးလႄႈ သဵင်လူမ်းထွင်း သဵင်လူတ်ႉသဵင်ၵႃးၼၼ်ႉ ဢူၼ်ပၼ်းလင်ယူႇၵေႃႈ ငိုၼ်းသႅင်တႄႉ ၼင်ႇႁၢင်ႈဢမ်ႇလႆႈငိၼ်း လိူဝ်သေသဵင်မၢၵ်ႇလေႃႉလႅင်ထိပ်ႇဢၼ်ပၼ်ႇမိူဝ်းၸွမ်းမၼ်းၼၼ်ႉ။ ဢမ်ႇဝၢႆႇတူၺ်းၵေႃႈ ႁူႉယူႇယဝ်ႉပဵၼ်ၽႂ်။
တီႈၼႂ်းၶမ်ႈၶိုၼ်းသဵင်တဵတ်ႇၼွၼ်း ငိုၼ်းသႅင်ၵေႃႈ ၶမ်ၸႂ်ၸွမ်းသဵင်ႁူဝ်ၸႂ်မၼ်းၼၼ်ႉ ဢမ်ႇႁၢႆလႆႈ ၸင်ႇလႆႈဢဝ်တင်းပပ်ႉၸိူင်း ဢၼ်ၶိူဝ်းႁွမ်ႁႃမႃးပၼ်မၼ်းမိူဝ်ႈၼႆႉၼၼ်ႉယူႇ။
“ႁူဝ်ၸႂ်ႁဝ်း သၼ်ႇၶွၼ်းဝႆႁႅင်း မိူဝ်ႈလႆႈႁူပ်ႉႁၼ်ၶဝ် တၢင်းယုမ်ႉၶဝ်ၼၼ်ႉ ၸိုမ်းလိုၵ်ႉမႃးထိုင်ၼႂ်းႁူဝ်ၸႂ် သမ်ႉပေႃးလိုမ်းမၼ်းဢမ်ႇလႆႈၼၼ်ႉယဝ်ႉ၊ သဵင်ႁူဝ်ၸႂ်ဢၼ်တွတ်ႇတဵၼ်ႈႁႅင်းၼၼ်ႉ ၶႂ်ႈႁၢမ်ႈမၼ်းယႃႇႁႂ်ႈလင်မေႃး မိူဝ်ႈႁၼ်ၶဝ် ၶႆႈလႅၼ်ႈပၢႆႈတေႉယဝ်ႉ ၵူၺ်းၵႃႈ တေယၢင်ႈသုတ်ႉႁူၼ်ၵႂႃႇသမ်ႉ မိူၼ်ယၢင်ႈၸူးၶဝ်ၵႂႃႇၵူၺ်း မိူဝ်ႈယူႇတေႃႇၼႃႈၶဝ်ၼၼ်ႉ မိူၼ်ၵူၼ်းထုၵ်ႇမတ်ႉဝႆႉဢမ်ႇႁူႉတူဝ် လပ်းတႃၵႂႃႇၵႅပ်ႉၼိုင်ႈ တူဝ်ႁဝ်းၵေႃႈ သမ်ႉပေႃးယူႇၼႂ်းဢွင်ႈဢူၵ်းၶဝ်ယဝ်ႉလႄႈ မိုဝ်းၶဝ်ၶွၼ်ၼိုင်ႈၼၼ်ႉ သွတ်ႇၵွင်ႉဢဝ်တူဝ်ႁဝ်း ၶဝ်ႈၸပ်းသႂ်ႇတူဝ်ၶဝ် ထႅင်ႈၶွၼ်ၼိုင်ႈၼၼ်ႉ ယိပ်းသႂ်ႇငဝ်ႈၶေႃး သွင်ၼႃႈၸမ်ၵၼ် သီႇသူပ်းသွင်ဢၼ်တဵင်သႂ်ႇတိူဝ်ႉၸပ်းၵၼ် ထုၵ်ႇၸုပ်ႇဢဝ်ၼိူဝ်ႉဢဝ်လိူတ်ႈၵႂႃႇ ဢမ်ႇတၼ်းႁူႉ…”
လိၵ်ႈဢၼ်လူယူႇၼၼ်ႉ လႆႈႁၼ်ႁၢင်ႈမၼ်းပႃးၸွမ်းယဝ်ႉ ၵူၺ်းသမ်ႉ ႁၼ်ႁၢင်ႈသႅင်ပိုၼ်းမႃးလႄႈ ႁဵတ်းႁႂ်ႈမၼ်းသမ်ႉပေႃးလႆႈၵိုတ်းလူၵႂႃႇၼၼ်ႉယိုင်၊ ဢမ်ႇသိုပ်ႇလူလႆႈယဝ်ႉလႄႈ ၼွၼ်းဢဝ်မိုဝ်းတၢင်ႇၼႃႈၽၢၵ်ႇသေ ဝူၼ်ႉယူႇမဵဝ်းၼိုင်ႈယဝ်ႉမဵဝ်းၼိုင်ႈ ဝူၼ်ႉၸိူင်ႉႁိုဝ်ၵေႃႈ ႁၼ်ႁၢင်ႈသႅင်ပိုၼ်းၼၼ်ႉယူႇတိၵ်းတိၵ်းၵူၺ်းၼႃႇ။
ယၢမ်းၵၢင်ၼႂ်မိူင်းမူဝ်း သၢႆလႅင်းဝွႆးဝွႆး ငိုၼ်းသႅင်ၼွၼ်းဢမ်ႇလပ်းတင်းၶိုၼ်း သမ်ႉလႆႈတိုၼ်ႇၸဝ်ႉလုၵ်ႉမႃးၸွႆႈပေႃႈၶဝ်တီႈလၢၼ်ႉၼၼ်ႉလႄႈ ယၢမ်းၼၼ်ႉ ၵိုင်ႉၵၢင်ႉႁၼ်ၼူသေ တူၵ်းၸႂ် ႁွင်ႉဢွၵ်ႇမႃးဢမ်ႇတၼ်းႁူႉတူဝ်။ ၼူၼၼ်ႉၵေႃႈ လႅၼ်ႈပၢႆႈၵႂႃႇယဝ်ႉ၊ မိူဝ်ႈၼၼ်ႉ ၸင်ႇတေၾၢင်ႉမႅၼ်ႈသဵင်ႁူဝ်ၸႂ်မၼ်းမႃး မၼ်းဢမ်ႇလႆႈတွတ်ႇတဵၼ်ႈထိပ်ႇၽၢင်ႈ တိုၵ်ႉ တိုၵ်ႉ တၢၵ်ႉတၢၵ်ႉ ၼင်ႇမိူဝ်ႈပူၼ်ႉယဝ်ႉ ၼႆၵေႃႈ ၸူမ်းဝႃႈၸူမ်းယဝ်ႉ။
မိူဝ်ႈတေဢွၵ်ႇသႅင်ႇမိူဝ်းတီႈႁိူၼ်းၼၼ်ႉ ၸင်ႇသမ်ႉႁူပ်ႉၺႃးသႅင်ပိုၼ်းၼႃႈၽၵ်းတူလႄႈ ဢဝ်မၼ်းသမ်ႉပေႃးလႅၼ်ႈပၢႆႈဢွၵ်ႇၵႂႃႇဝႆးဝႃႈဝႆးယဝ်ႉ။ ယၢမ်းၼၼ်ႉ သဵင်ႁူဝ်ၸႂ်မၼ်းၵေႃႈလင်တွတ်ႇမႃး မိူၼ်ၵူႈပွၵ်ႈၶိုၼ်းယဝ်ႉ။ မိူဝ်ႈပဵၼ်ၼၼ် ႁဵတ်းႁႂ်ႈမၼ်းသမ်ႉပေႃးၶမ်ၸႂ်မႃးထႅင်ႈ ၸင်ႇတေၶုၵ်းၸႂ်လႆႈ ၸိူင်းဢၼ်မၼ်းလူၶမ်ႈဝႃးၼၼ်ႉဝႃႈ “ႁူဝ်ၸႂ်ႁဝ်းသၼ်ႇၶွၼ်းဝႆႁႅင်း မိူဝ်ႈလႆႈႁူပ်ႉႁၼ်ၶဝ်..” လၢတ်ႈႁင်းၵူၺ်းမၼ်းမႃး “ဢမ်ႇၼၼ်ၵေႃႈ ပဵၼ်ယွၼ်ႉၶဝ်လႄႈသၼ်ႇႁႃႉတေႃႈ၊ မိူဝ်ႈလႂ်လႆႈႁူပ်ႉၶဝ် ႁဵတ်းႁႂ်ႈႁဝ်းၶႂ်ႈပၢႆႈတိၵ်းတိၵ်းၼၼ်ႉယဝ်ႉ” ၼင်ႇႁိုဝ်တေယုမ်ႇၸႂ်လႆႈၼၼ်ႉၵေႃႈ မိူဝ်ႈၵႂႃႇႁူင်းႁဵၼ်းၼၼ်ႉ ၵႂႃႇလွႆးလွႆး ၼင်ႇဝႃႈပႂ်ႉႁူပ်ႉၶဝ်ယူႇၼၼ်ႉယဝ်ႉ။ လိူၵ်ႈလိူၵ်ႈ ဝၼ်းၼၼ်ႉသမ်ႉဢမ်ႇမႃး။
မိူဝ်ႈတေၶဝ်ႈႁွင်ႈႁဵၼ်းၼၼ်ႉ လိူၵ်ႈလိူၵ်ႈသမ်ႉႁၼ်သႅင်ပိုၼ်း ႁွပ်ႇတင်းပပ်ႉလိၵ်ႈမႃးတၢင်းၼႃႈမၼ်းၼၼ်ႉလႄႈ မၼ်းၵေႃႈ တင်ႈၸႂ်တင်ႈၶေႃးသေယၵ်ႉတူၺ်းလီလီယဝ်ႉ၊ ၼႃႈလုပ်ႇသဵမ်ႈသဵမ်ႈ ၶူၼ်တႃၼႃလမ်ၵွမ်းငွမ်း ၶူႈၼင်ၵူင်းပဵၼ်သၼ်ပဵင်းၵွင်း မွႆတႃလမ်ယၢဝ်း သီႇသူပ်းၶွင်ႇသွင်ႁွင် ပေႃးယုမ်ႉၼိုင်ႈၵမ်း ၼင်ႇဝႃႈမီးသင်မႃးၽႃႇလေႃႇသႂ်ႇႁူဝ်ၸႂ်ၼၼ်ႉ သၼ်ႇၶွၼ်းၼိုင်ၵႂႃႇ တူဝ်သမ်ႉပေႃးဢမ်ႇတူင်ႉလႆႈ ၵုမ်ႇမိူၼ်ႇမိုင်တူၺ်းၶဝ်ယူႇၵူၺ်း၊ ယိုင်ႈတူၺ်းယိုင်ႈလဝ်း တူၺ်းသမ်ႉပေႃးငိူဝ်ႈၵႂႃႇတေႉလူင်။
“ၶူးမႃးယဝ်ႉ တိုၵ်ႉမိူၼ်ႇတူၺ်းႁင်ယူႇၵေႃႈဢမ်ႇႁူႉ” ၶိူဝ်းႁွမ်ပေႃးလႆႈၸၼ်ၶႅၼ်မၼ်းၶဝ်ႈႁွင်ႈႁဵၼ်းယဝ်ႉ ၸင်ႇတေႁူႉတူဝ်။
မိူဝ်ႈၶူးသွၼ်လိၵ်ႈယူႇၼၼ်ႉၵေႃႈ မၼ်းၼၼ်ႉတႄႉ ၼႃႈသမ်ႉပေႃးလႅင်ဝၢၼ်းဝၢၼ်း ၶၢဝ်းသွၼ်လိၵ်ႈၼၼ်ႉတင်းၶိင်ႇ၊ ႁဵတ်းသင်လၢတ်ႈသင်ၵေႃႈသမ်ႉပေႃးၵႂင်ၵႂႃႇမူတ်း ပေႃးၶူးႁွင်ႉၼႆၵေႃႈ ဢမ်ႇႁတ်းယၵ်ႉတူၺ်းၼႃႈၶူးလႄႈ ပၢႆႈပႅတ်ႈၵမ်းလဵဝ်၊ ၵူၺ်းၵႃႈ မိူဝ်ႈပိူၼ်ႈဢမ်ႇႁၼ်သမ်ႉ ၵႆႉၵႆႉလၵ်ႉတူၺ်းယူႇ။
ၶိူဝ်းႁွမ်ၵေႃႈ ႁၼ်ငိုၼ်းသႅင်ပိူင်ႈပိူင်ႈဝႆႉလႄႈ
“မိူဝ်ႈၼႆႉမႂ်းပဵၼ်ႁင်လႃႇ!!”
“ၵဝ်ပေႉမႃးၶမ်ၸႂ်ဢမ်ႇႁူႉ”
“မွင်းလၢတ်ႈၼႆႉၸဵမ်လႂ်ၵဝ်ႇယဝ်ႈ မီးလွင်ႈသင်ၵေႃႈလၢတ်ႈမႃးလႄႈ”
“ၼႂ်းၸႂ်ၵဝ်ၼႆႉ ၼင်ႇဝႃႈမၼ်းပေႉမႃးၵပ်ႉၼႃႇၵေႃႈဢမ်ႇႁူႉယဝ်ႈ ထူၺ်ႈၸႂ်ယၢပ်ႇ မိူၼ်မီးသေလွင်ႈလွင်ႈ မႃးၵပ်ႉၶမ်ဝႆႉယူႇၼၼ်ႉဢိူဝ်ႈ”
“ဢိူဝ်ႈ ၶမ်ၸႂ်တေႉဢိူဝ်ႈၼၼ်ႉၼႆ” ၶိူဝ်းႁွမ်ၵေႃႈ ထူၺ်ႈၸႂ်လူင်မႃးၸွမ်းသေ “မၼ်းသမ်ႉႁဵတ်းႁိုဝ်ပဵၼ်လႃႇ”
“ၵဝ်ၵေႃႈဢမ်ႇႁူႉၵဝ်ႇ တိူင်းမၼ်းလႃႈ မၼ်းၵေႃႈတေႁၢႆယူႇၵူၺ်းယူဝ်ႉ”
ဝၢႆးလူင်းႁူင်းႁဵၼ်း ငိုၼ်းသႅင်ၵေႃႈ ဢမ်ႇလႆႈႁၼ်သႅင်ပိုၼ်းၼႆ ၸႂ်ၼၼ်ႉသမ်ႉပေႃးႁၢႆမႃးပဵၼ်ၵမ်း၊ ပႆတၢင်းၵေႃႈ ၼင်ႇဝႃႈၵူဝ်ထိုင်ႁိူၼ်းလႄႈ ၼႂ်းၸႂ်ၼႆႉ ၼင်ႇႁၢင်ႈမွင်းၽႂ်သေၵေႃႉၵေႃႉဝႆႉယူႇ။ မိူဝ်ႈလႆႈငိၼ်းသဵင် လႅင်ထိပ်ႇလတ်းၽၢၼ်ႇမႃး ၸႂ်သမ်ႉပေႃးၶိုၼ်ႈ လႆႈဝိၼ်ႇဝၢႆႇတူၺ်းၸွမ်း သမ်ႉဢမ်ႇၸႂ်ႈ ႁဵတ်းႁႂ်ႈမၼ်းၸႂ်ဢမ်ႇသိူဝ်းလႆႈယဝ်ႉ။ မိူဝ်ႈတိုၵ်ႉမိူၼ်ႇမိုင်မိူဝ်းၵႂႃႇၼၼ်ႉ ၸင်ႇသမ်ႉငိၼ်းသဵင်
“မႃးၸဵမ်ၵႆႈ တိုၵ်ႉႁွတ်ႈၼႆႉၵူၺ်း”
သဵင်ဢၼ်ၵႆႉငိၼ်း လင်မေႃးမႃးႁိမ်းႁူ ၵွင်ႇၵေႃႈ ၼဵတ်းသၢၼ်ႈ ဝိၼ်ႇဝၢႆႇယၵ်ႉတူၺ်းတၢင်းလင် ႁၼ်သႅင်ပိုၼ်း သေယဝ်ႉၵေႃႈ၊ ထိင်းၸႂ်ဝႆႉဢမ်ႇလႆႈ ႁူဝ်ၸႂ်ၶုၼ်ႇၵီႈပိုဝ်းမႃး မၼ်းၵေႃႈၼႅတ်ႈဢႅၼ်ႇလႅၼ်ႈပၢႆႈၽႂ်းၽႂ်းယဝ်ႉၼႃႇ။
တီႈၼႂ်းၶမ်ႈၶိုၼ်းလပ်းသိင်ႇတၼ် သဵင်ပၼ်းၼၼ်ႈဢူၼ်ၼႂ်းႁိူၼ်းလင်မေႃး ၼွၼ်းပေႃးဢမ်ႇလပ်းလႆႈ၊ ထဵင်မေႃးၵၼ်ၸဵမ်မိူဝ်ႈၸဝ်ႉ သမ်ႉဝႃႈၶတ်းၸႂ်ႁၢမ်ႈတၢၼ်ႇႁိုဝ်ၵေႃႈ ႁၢမ်ႈဢမ်ႇလႆႈ။ ပွၵ်ႈၼႆႉ ပေႃႈမႄႈငိုၼ်းသႅင်လႆႈဝႃႈထဵင်ၵၼ်ႁၢဝ်ႈႁႅင်းလိူဝ်သေၵူႈပွၵ်ႈယူႇ။ မိူဝ်ႈႁၼ်ၼင်ႇၼၼ် ၼႂ်းၸႂ်ၵေႃႈဢမ်ႇလီမႃးလႆႈ ၼင်ႈဢိင်ၽၵ်းတူႁေထွမ်ႇသဵင်ၶဝ်ယူႇလႄႈ လၵ်ႉဢိုတ်ႇႁႆႈယူႇသိုတ်ႉသိုတ်ႉႁင်းမၼ်း ၼင်ႇတုၵ်ႉၸႂ်တေႉတေႉယဝ်ႉ။
သိုပ်ႇလူထႅင်ႈတွၼ်ႈတေမႃးၶႃႈ
