ယၢမ်းၵၢင်ၼႂ် တွင်ႉၾႃႉၸိုၼ်ႈသႂ် လူမ်းယဵၼ်ယဵၼ်လႅတ်ႇဢွၼ်ႇဢုၼ်ႇဢုၼ်ႇ ငိုၼ်းသႅင်ၵေႃႈဢဝ်တင်းထူင်သေယဝ်ႉ ၵႂႃႇႁူင်းႁဵၼ်းၼင်ႇႁၢင်ႈမီးတၢင်းသိူဝ်းၼႃႇ ထၢၼ်ႇဝႃႈမိူဝ်ႈဝႃးၼၼ်ႉဢမ်ႇၸႂ်ႈမၼ်းယဝ်ႉ။ မိူဝ်ႈယင်းတိုၵ်ႉသုတ်ႇလူမ်းၵတ်းလူမ်းယဵၼ်လူင်ၵႂႃႇ သႅင်ပိုၼ်းၵေႃႈၶီႇတင်းလႅင်ထိပ်ႇသေ ၶိုတ်းမၼ်းမႃးယူႇ။
“မိူဝ်ႈၼႆႉ ပေႉမီးတၢင်းသိူဝ်းၼႃႇလႃႇ” သဵင်ၼၼ်ႉမေႃးယူႇႁိမ်းၶၢင်ႈမၼ်းလႄႈ ၵိုင်ႉၵၢင်ႉဝၢႆႇႁၼ်ၺႃးသေ ဢဝ်တူၵ်းၸႂ်မႃးထႅင်ႈ ႁူဝ်ၸႂ်မၼ်းသမ်ႉပေႃးၵိုင်ႉၵၢင်ႉတွတ်ႇႁႅင်းမႃး ၼႃႈလႅင်ၸွမ်းပႃး ၼႅတ်ႈဢႅၼ်ႇလႅၼ်ႈၵႂႃႇဝႆးဝႃႈဝႆးယဝ်ႉယိုင်ၼႃႇ။
“လႅၼ်ႈထႅင်ႈယဝ်ႉ”
သႅင်ပိုၼ်းၵေႃႈ ၼႅတ်ႈပၼ်ႇလႅင်ထိပ်ႇမၼ်းလမ်းၸွမ်း ၼင်ႇပူၼ်ႉဢမ်ႇပူၼ်ႉၼၼ်ႉသေ “ပေႃးလႅၼ်ႈဝႆးၵေႃႈ လမ်းႁႂ်ႈၶိုတ်းလႄႈ”
ငိုၼ်းသႅင်ၵေႃႈ ႁွမ်ဢဵၼ်ႁွမ်ႁႅင်းမၼ်းသေလႅၼ်ႈၵႂႃႇယဝ်ႉ၊ ယိုင်ႈလႅၼ်ႈယိုင်ႈၵႂႃႇၸမ်သႅင်ပိုၼ်း ယိုင်ႈႁၼ်ၼႃႈၶဝ် သမ်ႉၶႅၼ်းႁၼ်ႁၢင်ႈမိူဝ်ႈဝႃးၼၼ်ႉမႃးလႄႈ ၶတ်းၸႂ်လႅၼ်ႈႁႂ်ႈပူၼ်ႉၼႃႈၶဝ် လႅၼ်ႈတေႉလႅၼ်ႈဝႃႈႁႃႇပေႃးႁႅင်ႈ ႁိူဝ်ႇပေႃးယမ်းတင်းတူဝ် သႅင်းပိုၼ်းၼၼ်ႉယင်းတိုၵ်ႉလမ်းၶိုတ်းယူႇတိၵ်းတိၵ်း ဢဝ်မၼ်းသမ်ႉပေႃးၵိုတ်းၵႂႃႇၶိုင်ႈတၢင်းၼၼ်ႉပႅတ်ႈႁေယဝ်ႉ မုင်ႈတူၺ်းၶဝ်ယၢၼ်ႁၢင်ႇၵႂႃႇတၢင်းၼႃႈၼၼ်ႉသေ ထူၺ်ႈၸႂ်ႁႃႇပေႃးႁႅင်ႈ ႁၼ်သႅင်ပိုၼ်းၵႂႃႇတၢင်းၼႃႈယဝ်ႉၵေႃႈ ယုၵ်ႉမိုဝ်းပၢႆးပၢႆၵႂႃႇၸွမ်းတၢင်းလင်ၵူၺ်း။
မိူဝ်ႈႁိူဝ်ႉႁၢႆယဝ်ႉၵေႃႈ ၸင်ႇတေပႆၵႂႃႇလွႆးလွႆးႁင်းမၼ်း မိူဝ်ႈထိုင်တၢင်းၶဝ်ႈႁူင်းႁဵၼ်းၼၼ်ႉ ႁၼ်သႅင်ပိုၼ်း ၸုၵ်းဢုပ်ႇလုၵ်ႈႁဵၼ်းၶဝ်ယူႇလႄႈ ႁၼ်ယဝ်ႉၵေႃႈၼႅတ်ႈလႅၼ်ႈၵႂႃႇဝႆးဝႃႈဝႆး။ ႁွတ်ႈထိုင်ၼႂ်းႁွင်ႈႁဵၼ်း ၶိူဝ်းႁွမ် ဢဝ်တင်းၸေႈၸဵတ်ႉယိုၼ်ႈပၼ်မၼ်းသေယဝ်ႉလၢတ်ႈၸူး
“မိူဝ်ႈၼႆႉမႃးၸဝ်ႉယူႇ တိုၵ်ႉလႅၼ်ႈမႃးယူႇလႃႇ”
“မႂ်းဢမ်ႇမီးပပ်ႉၸိူင်းထႅင်ႈယဝ်ႉႁႃႉ”
“ပပ်ႉဢၼ်မႂ်းလူၼၼ်ႉ တၼ်းသုတ်းယဝ်ႉၵႃႈ”
“ဢိူဝ်ႈ..သုတ်းမိူဝ်ႈဝႃးယဝ်ႉ”
“ၵဝ်ၵေႃႈဢမ်ႇႁူႉတေႁႃပပ်ႉသင်ပၼ်မႂ်းယဝ်ႉ ပပ်ႉတီႈႁိူၼ်းၼၼ်ႉ ၵိုတ်းပပ်ႉၵႂၢမ်းဝႆႈၽြႃးမႄႈႁဝ်းၵူၺ်းယဝ်ႉယူဝ်ႉ ဢၼ်ၵဝ်ဢမ်ႇပႆႇလႆႈဢဝ်မႃးပၼ်မႂ်းၼၼ်ႉ”
“ဢႃ..ပပ်ႉသင်ၵေႃႈလႆႈယဝ်ႉဝႃႈ ပေႃးလူယဝ်ႉႁႂ်ႈပေႃးလိုမ်းတူဝ်လိုမ်းၶိင်း လိုမ်းမိူဝ်ႈဝႃးမိူဝ်ႈသိုၼ်းၵႂႃႇၼၼ်ႉယဝ်ႈ..”
“ၼၼ်ႉတႄႉၵဝ်ဢမ်ႇဢဝ်မႃးပၼ်မႂ်းလႆႈၵဝ်ႇမေႃႉ ၵမ်ႉမႄႈႁဝ်းလႃႇႁူဝ်ၵဝ်ႁေယဝ်ႉဢိူဝ်ႈ.. ႁိူၼ်းသူဢမ်ႇမီးႁႃႉ”
“ႁၢင်ႈလႅပ်ႈမီးယူႇ ၵဝ်ၸင်ႇမိူဝ်းႁႃတူၺ်း”
“မႂ်းၼႆႉတႄႉလိူဝ်ၸႂ်တေႉဢိူဝ်ႈ ၵဝ်ပေႃးဢမ်ႇႁူႉတေႁႃပပ်ႉၸိူင်ႉႁိုဝ်မႃးပၼ်မႂ်းယဝ်ႉယိုင် ၶွင်ႁူင်းႁဵၼ်းႁဝ်းသမ်ႉ ဢမ်ႇမီးႁွင်ႈလူလိၵ်ႈလႄႇၼေႃႈ ပပ်ႉလိၵ်ႈတႆးၵေႃႈ သမ်ႉဢမ်ႇပေႃးလိူင်ႇမိူၼ်တၢင်ႇမဵဝ်းလူးၼႆ မႂ်းၼႆႉသမ်ႉဢမ်ႇမိူၼ်ၽႂ် ပေႃးဢမ်ႇၸႂ်ႈလိၵ်ႈတႆး သမ်ႉဝႃႈဢမ်ႇၶႂ်ႈလူၼႆလႄႇမေႃႉ..”
မိူဝ်ႈၼႆႉ လႆႈႁဵၼ်းလိၵ်ႈဢင်းၵိတ်ႉယၢမ်းၵၢင်ၼႂ်လႄႈ ၽွင်းၶူးၶဝ်ႈႁွင်ႈႁဵၼ်းမႃးၼၼ်ႉ ဢမ်ႇၸႂ်ႈၶူးသွၼ်ၽႃႇသႃႇဢင်းၵိတ်ႉယဝ်ႉ ၵူၺ်းပဵၼ်သႅင်ပိုၼ်းမႃးတႅၼ်း သမ်ႉပေႃးဢဝ်ၼႃႈယုမ်ႉငိုၼ်းသႅင်ပေႃးတူႇမႃးၵမ်းလဵဝ်။ ယိင်ႈၶတ်းၸႂ်ပၢႆႈယိင်ႈလႆႈၺႃး ဢဝ်မၼ်းသမ်ႉပေႃးဢမ်ႇႁတ်းတူၺ်းၼႃႈသႅင်ပိုၼ်းသေၵူမ်ႈယူႇၵူၺ်း၊ လိူၵ်ႈလိူၵ်ႈ သႅင်ပိုၼ်းသမ်ႉမႃးၸုၵ်းႁိမ်းမၼ်းယဝ်ႉ မိူၼ်မၼ်းဢမ်ႇပေႃးမီးသမ်ႇမထိၵႃႈႁိုဝ်လႄႈ သႅင်ပိုၼ်းဢဝ်မိုဝ်းတူပ်းပၼ်ၽိူၼ်မၼ်းလင်ဝႃႈလင် ဢဝ်ငိုၼ်းသႅင်တူၵ်းၸႂ်ဝၢႆႇတူၺ်းၸူး သၢႆတႃမၼ်းလႆႈတုမ်ႉလေႃႇသႅင်ပိုၼ်း မိုင်လူင်ၵႂႃႇၵႅပ်ႉၼိုင်ႈ ႁူဝ်ၸႂ်မၼ်းၵေႃႈၵိုင်ႉၵၢင်ႉတွတ်ႇတဵၼ်ႈႁႅင်းမႃးၵမ်းလဵဝ်
“ဢေးၼွင်ႉ! ၸွင်ႇၸႂ်ႈ” ၸႂ်ႈသင်မၼ်းတမ်ႉဢမ်ႇႁူႉလႃႈ
“ဢေႃႈ” တွပ်ႇၵႂႃႇလူမ်းလူမ်းလႅင်ႉလႅင်ႉႁဵတ်းၼၼ်
မိူဝ်ႈၼႆႉတင်းဝၼ်း ယွၼ်ႉသဵင်တူပ်းၽိူၼ် ႁူဝ်ၸႂ်ဢၼ်တွတ်ႇတဵၼ်ႈႁႅင်းဢမ်ႇႁူႉလွင်ႈႁူႉတၢင်း ဢဝ်မၼ်းသုၵ်ႉၸႂ်ဝူၼ်ႉၸွမ်းယူႇတၢင်းဝၼ်းယဝ်ႉ။ “ၵဝ်ပဵၼ်ႁင်ၼႆႉ ႁဵတ်းႁင်ၸႂ်ပေႉသၼ်ႇလႃႇ သၼ်ႇယူႇတိၵ်းတိၵ်း ပဵၼ်တၢင်းပဵၼ်ႁူဝ်ၸႂ်ႁႃႉတေႃႈ” ၼင်ႈမိူၼ်ႇမိုင် ၵမ်းၵမ်းတူပ်းဢူၵ်းမၼ်းယူႇတိၵ်းတိၵ်းယဝ်ႉ။
ထိုင်ၶၢဝ်းပွၵ်ႈယဝ်ႉၵေႃႈ တင်းဝူၼ်ႉတင်းပႆမိူဝ်းၵႂႃႇလွႆးလွႆး ဢမ်ႇလႆႈလူလိၵ်ႈၵေႃႈ တၢင်းဝူၼ်ႉမၼ်းၼၼ်ႉဢမ်ႇၸပ်းတူဝ်သေဢိတ်းယဝ်ႉ။
“တူၺ်းတၢင်းၽွင်ႈလႄႈ..ၵမ်ႉတေၶီႈလိုတ်းၶႃတူဝ်ၵဝ်ႇယဝ်ႈ”
ငိၼ်းသဵင်ဢၼ်မေႃးမႃး ဝၢႆႇတူၺ်းယဝ်ႉတူၵ်းၸႂ် ဢဝ်ႁူဝ်ၸႂ်မၼ်းၵီႈတွတ်ႇမႃးႁႅင်းလိူဝ်ၵဝ်ႇထႅင်ႈ။
“ႁဵတ်းႁႂ်ႈတူၵ်းၸႂ်ထႅင်ႈယဝ်ႉ!”
“ပဵၼ်သင်လႄႈၶူးတေလႆႈမႃးမိူဝ်ႈၶႃႈဢမ်ႇႁူႉတူဝ်ယူႇတႃႇသေႇ!..” ဢမ်ႇမီးႁႅင်းလႅၼ်ႈပၢႆႈယဝ်ႉ လိူဝ်သေတုမ်ႉတွပ်ႇၶိုၼ်း
“တၢင်ႇပွၵ်ႈမႃး တေမႃးယူႇၽၢႆႇၼႃႈႁေလၢတ်ႈတေႃႇၼႃႈပေႃးၼၼ်”
“မိူဝ်းလွႆးလွႆးၶႃႈ” ဢူၵ်းမၼ်းၵပ်ႉတိပ်ႇၵႅၼ်းထိုင်တီႈပေႃးထူၺ်ႈၸႂ်ယၢပ်ႇမႃးၵမ်းလဵဝ်ယဝ်ႉ။
ငိုၼ်းသႅင်ယၵ်ႉတူၺ်းၸွမ်းလႅင်ထိပ်ႇသႅင်ပိုၼ်းၼၼ်ႉၵႂႃႇလွႆးလွႆးယဝ်ႉ သဵင်ႁူဝ်ၸႂ်မၼ်းၼၼ်ႉၵေႃႈ ႁၢႆလၢႆၵႂႃႇၸွမ်းလင်သႅင်ပိုၼ်းၼၼ်ႉယူႇ။ သမ်ႉဝႃႈၵူၼ်းပူၼ်ႉၵႂႃႇယဝ်ႉၵေႃႈ လွင်ႈတၢင်းပဵၼ်မၼ်းၼၼ်ႉ ၵႃႈဢမ်ႇပႆႇၸႅင်ႈလႅင်း ႁူႉတိုၼ်းတေလႆႈသိုပ်ႇႁႃၶေႃႈတွပ်ႇႁႂ်ႈပေႃးၸႅင်ႈလႅင်း။ သိုပ်ႇဝူၼ်ႉလူင်မိူဝ်းၸွမ်းတၢင်း လွင်ႈဢၼ်ႁဵတ်းႁႂ်ႈႁူဝ်ၸႂ်မၼ်း တွတ်ႇဢမ်ႇမၢၼ်ႇ ပဵၼ်ပဵၼ်ႁၢႆႁၢႆယူႇတၢင်းဝၼ်းၸိူင်ႉၼၼ်ၼၼ်ႉ ဝူၼ်ႉၵႂႃႇၵူႈမဵဝ်းၵေႃႈ ၼင်ႇႁၢင်ႈပႆႇလႅပ်ႈၸႂ်ႈၶေႃႈတွပ်ႇ။
ယၢမ်းၵၢင်ၶမ်ႈ ၶၢဝ်းၼွၼ်းယဵၼ် တေၼွၼ်းယူႇၵေႃႈ ၼွၼ်းဢမ်ႇလပ်း ၸၵ်ႉဢဝ်တင်းပပ်ႉလိၵ်ႈမၼ်းသေယဝ်ႉ မႃးမၢႆတူၺ်းလွင်ႈတၢင်း ဢၼ်မၼ်းထူပ်းၼၼ်ႉသေ ထတ်းသၢင်တူၺ်းယူႇ။
“ဢၼ်ႁဵတ်းႁႂ်ႈၸႂ်သုၵ်ႉသၵ်ႉၼႆႉ တေပဵၼ်ယွၼ်ႉၸႂ်သၼ်ႇႁိုဝ်ၼေႃ ပဵၼ်သင်လႄႈၸႂ်သမ်ႉတေသၼ်ႇ ဢမ်ႇၼၼ်ၵေႃႈတူၵ်းၸႂ်လႄႈသၼ်ႇ ပေႃးမႃးဝူၼ်ႉတူၺ်းယဝ်ႉ တူၵ်းၸႂ်သေလႄႈပဵၼ်မႃးလၢႆလၢႆလူး ဝူၼ်ႉတူၺ်းၶိုၼ်းဢၼ်ၶမ်ႈဝႃး ၸိူဝ်းပူၼ်ႉမႃးၼၼ်ႉၵေႃႈ ပဵၼ်ယွၼ်ႉတူၵ်းၸႂ်လၢႆလၢႆယဝ်ႉ ၶႂ်ႈဝႃႈ ႁဝ်းၵေႃႈပဵၼ်ၸိူင်ႉၼႆမႃးႁိုင်ယဝ်ႉ ဢမ်ႇတၼ်းၾၢင်ႉမႅၼ်ႈၵူၺ်း မၼ်းပဵၼ်သၽႃႇဝၵူၺ်းႁိုဝ် ဢမ်ႇၼၼ်ၵေႃႈ ၽိတ်းသၽႃႇဝ ပဵၼ်တၢင်းပဵၼ်ႁူဝ်ၸႂ်ဢၼ်ဝႃႈၼၼ်ႉႁႃႉတေႃႈ”
ပိၵ်ႉပပ်ႉယဝ်ႉ ဢၢင်ႈတေၼွၼ်းသေမွတ်ႇၾႆးၵႂႃႇ ၵိုင်ႉၵၢင်ႉဝူၼ်ႉႁၼ်ၺႃးႁၢင်ႈဢၼ်ၶမ်ႈဝႃးၼၼ်ႉလႄႈ ဢဝ်ႁူဝ်ၸႂ်မၼ်းတွတ်ႇၵီႈမႃးထႅင်ႈယဝ်ႉ မၼ်းၵေႃႈမႄးၽုၺ်ႇၾႆးသေ တႅမ်ႈသႂ်ႇၼႂ်းပပ်ႉၼၼ်ႉထႅင်ႈ “ဢမ်ႇၼၼ်ၵေႃႈ တူၵ်းၸႂ်ၵူဝ်ဢၼ်ၶမ်ႈဝႃးၼၼ်ႉလႄႈ ႁဵတ်းႁႂ်ႈၸႂ်သၼ်ႇ ၸႂ်ႈယဝ်ႉ လႅပ်ႈပဵၼ်ယွၼ်ႉၵူဝ်လႄႈ ၸႂ်သၼ်ႇယဝ်ႉ”
သိုပ်ႇလူထႅင်ႈတွၼ်ႈတေမႃးၶႃႈ
