ၶႃႈယၢမ်ႈဝူၼ်ႉဝႃႈ ၵၢၼ်တႄႇၼႃႈႁိူၼ်းၼၼ်ႉ ပဵၼ်ၸၢတ်ႈပၢၼ်ဢၼ်ႁၢင်ႈလီ၊ ၵၢၼ်မီးတၢင်းႁၵ်ႉဢၼ်ႁွမ်ဝၢၼ်ၼၼ်ႉ ပဵၼ်လွင်ႈမူၼ်ႈသိူဝ်းၼႃႇယဝ်ႉ။
သင်လႆႈသႂ်ႇသိူဝ်ႈၶူဝ်းၸဝ်ႈသၢဝ် ထႆႇၶႅပ်းႁၢင်ႈၵူႈၵၼ်တင်း ၵူၼ်းၵေႃႉဢၼ်ႁဝ်းႁၵ်ႉ တေလႆႈၶႅပ်းႁၢင်ႈဢွၵ်ႇမႃးႁၢင်ႈလီတေႉၼေႃ။
လွင်ႈၼွၼ်းၾၼ်ယူႇၼၼ်ႉၵေႃႈပဵၼ်မႃး ပဵၼ်ဝၼ်းဢၼ်လီႁၢၼ်ႉၸႂ်တေႉယဝ်ႉ ၼႂ်းဝၼ်းပၢင်ၶႅၵ်ႇမူႇၵူၼ်းၵိုၼ်း ႁဝ်းၵေႃႈပဵၼ်ၽူႈယိင်းဢၼ်ႁၢင်ႈလီလိူဝ်ပိူၼ်ႈဝႆႉယူႇဢိူဝ်ႈ ဝၼ်းၼၼ်ႉ ဢမ်ႇလႆႈႁဵတ်းသင် လုၵ်ႉမႃးပိူၼ်ႈႁၢင်ႈၶိူင်ႈပၼ်ယဝ်ႉၵေႃႈ လႆၢႈၶူဝ်းယဝ်ႉ ၵၼ်ႇတေႃးပေႃႈမႄႈ ပေႃႈထဝ်ႈမႄႈၵႄႇ ၵိၼ်ၶဝ်ႈႁူမ်ႈမူႇသေယဝ်ႉ ယုမ်ႉၸုၵ်းပႂ်ႉပၼ်ပိူၼ်ႈထႆႇၶႅပ်းႁၢင်ႈၵိုၵ်း။
ဢူၺ်းၵေႃႉဢူၺ်းသႄႈ မႃးၶဝ်ႈႁူမ်ႈၵူၼ်းမူႇၼမ်ၵိုၼ်းၶွၼ်ႈ ယိၼ်းလီႁူမ်ၸူမ်းၸွမ်း သမ်ႉပေႃးဢမ်ႇတၼ်းလႆႈၼင်ႈလႆႈလိုဝ်ႈ ႁိူဝ်ႉယူႇၵေႃႈ လႆႈႁၼ်ၵူၼ်းမႃးၶဝ်ႈႁူမ်ႈပၢင်ပွႆး ပေႉၵႅၼ်ႇမီးတၢင်းသိူဝ်းၼႃႇဢမ်ႇႁူႉယဝ်ႉ။
လုၵ်ႉတီႈၵေႃႉႁၵ်ႉၵၼ်သေ လႆႈပဵၼ်ၵႂႃႇၽူဝ်မေးၵၼ်ယဝ်ႉ။ မၼ်းၵေႃႈ မေႃလုမ်းလႃးတူၺ်းထိုင်သႂ်ႇၸႂ်လႄႈ ၶႃႈၸင်ႇလႆႈတမ်းၸႂ်မၼ်းသေ တႄႇၼႃႈႁိူၼ်းၸွမ်းမၼ်းယဝ်ႉ။ ပေႃးၶႃႈၸႂ်ၸႃႉ ပေႃးၶႃႈၸႂ်လမ် မၼ်းၵေႃႈမေႃယွမ်းမေႃဝွၼ်း ႁဵတ်းႁႂ်ႈၶႃႈလႆႈႁၵ်ႉမၼ်းတႄႉတႄႉ။
ယူႇဢမ်ႇႁိုင် ၶႃႈၵေႃႈၸပ်းတွင်ႉပႃးတူဝ်မႃး လူမ်းၵေႃႈဢမ်ႇပေႃးလီမႃး ၵႆႉၸႃႉၵႆႉပွင်ႉၵႆႉထႃႉ မၼ်းၵေႃႈဢမ်ႇပေႃးသူႈယူႇၸွမ်းၶႃႈလႄႈ ၵႆႉၵႆႉလႄႇမႃး ၸပ်းဢူၺ်းၵေႃႉမႃး မၢင်ပွၵ်ႈၵေႃႈဢမ်ႇလိုၵ်းဢမ်ႇမိူဝ်းႁိူၼ်း ၶႃႈပေႃးၼွၼ်းလပ်းယဝ်ႉ မၼ်းၸင်ႇၵွႆႈမိူဝ်း၊ ၵၢင်ၼႂ်ၵေႃႈလုၵ်ႉၵႂႃႇႁဵတ်းၵၢၼ်မၼ်းသေ ဝၼ်းယဝ်ႉဝၼ်း သမ်ႉဝႃႈၶႃႈမီးၽူဝ်ယူႇၵေႃႈ ၶႃႈမိူၼ်လႆႈယူႇၵေႃႉလဵဝ်ယဝ်ႉ။
ယူႇယူႇဢူၺ်းၵေႃႉၶႃႈၵေႃႈ သူင်ႇၶႅပ်းႁၢင်ႈမၼ်းလႄႈတင်းသၢဝ်မႃးပၼ်ၶႃႈ၊ ၶႃႈပဵၼ်ဢၼ်ၸႂ်ဢမ်ႇလီတႄႉတႄႉ သမ်ႉဝႃႈလိုၵ်းၵေႃႈ ၶႃႈယင်းတိုၵ်ႉပႂ်ႉမၼ်းယူႇ။ မိူဝ်ႈမၼ်းၽုၺ်ႇၽၵ်းတူမႃးႁၼ်ၶႃႈယူႇၼၼ်ႉ ၼင်ႇႁၢင်ႈတူၵ်းၸႂ်ဝႆႉယဝ်ႉ။
“သူပႆႇၼွၼ်းႁႃႉ”
“ပေႉမႃးလိုၵ်းလႃႇ..”
“ဢိုမ်ႈ..ဢူၺ်းၵေႃႉၸူဝ်းၵႂႃႇလႄႇထႅင်ႈ”
“မိူဝ်ႈၼႆႉၵႂႃႇႁူင်းယႃမႃး..မေႃယႃလၢတ်ႈဝႃႈလုၵ်ႈႁဝ်းပဵၼ်ၽူႈယိင်း”
“လီယူႇလူး..သူၵေႃႈတေလႆႈမီးၵေႃႉ”
“သူၸွင်ႇလႆႈၼွၵ်ႈၸႂ်ႁဝ်းႁိုဝ်”
သီၼႃႈမၼ်းလႆၢႈၵႂႃႇ သဵင်မၼ်းၵေႃႈသုင်မႃး
“ႁဝ်းတေႁဵတ်းၸိူင်ႉၼၼ်ႁဵတ်းသင်လႃႇ ၸွင်ႇပိူၼ်ႈဢမ်ႇႁူႉၵေႃႈဢမ်ႇၸႂ်ႈဝႃႈႁဝ်းမီးမေးယဝ်ႉ”
“ႁဝ်းယွၼ်းတူၺ်းၾူၼ်းသူၸွင်ႇလႆႈႁိုဝ်”
“သူတေတူၺ်းႁဵတ်းသင် မၼ်းဢမ်ႇမီးသင်လေႃႇ”
“ပေႃးဢမ်ႇမီးၵေႃႈ ပၼ်ႁဝ်းတူၺ်းလႄႈ”
“မၼ်းဢမ်ႇမီးသင်တေႉဢိူဝ်ႈ မိူဝ်ႈၽုၵ်ႈၵွႆႈတူၺ်းလႄႈ ႁဝ်းၶႂ်ႈၼွၼ်းယဝ်ႉ”
ၶဝ်ႈမိူဝ်းၵႂႃႇၼႂ်းတီႈၼွၼ်းသေ ၼွၼ်းၵႂႃႇယဝ်ႉ။ ဢမ်ႇဝူၼ်ႉဝႃႈ ဝႆၢးသေတႄႇၼႃႈႁိူၼ်းယဝ်ႉ ၶႃႈတေလႆႈမႃးၼွၼ်းၶၢမ်ႇဢႆၢလဝ်ႈယူႇၵူႈၶိုၼ်းၸိူင်ႉၼႆ၊ ၶႃႈၵေႃႈဢမ်ႇႁူႉမိူၼ်ၵၼ်ဝႃႈ ပေႃးတေႇၼႃႈႁိူၼ်းယဝ်ႉတေလႆႈထူပ်းလွင်ႈသင်၊ ၵူၺ်းႁူႉဝႃႈ ၶႂ်ႈတေႇၼႃႈႁိူၼ်းသေ ၶႂ်ႈယူႇၸွမ်းၵၼ်မွၵ်ႈၼၼ်ႉၵူၺ်း။ ၵူႈလွင်ႈၸိူဝ်းပူၼ်ႉမႃးၵေႃႈ မီးဢူႈမႄႈႁဵတ်းပၼ် ၵူၺ်းၵႃႈမိူဝ်ႈလဵဝ် ႁႃးယူႇၵူၺ်းယဝ်ႉလႄႈ ပဵၼ်ႁိုဝ်မီးႁိုဝ် ဢူႈမႄႈၵေႃႈဢမ်ႇလႆႈႁူႉၸွမ်းယဝ်ႉ။
ႁိူဝ်ႉတေႉယဝ်ႉသင်ပဵၼ်လႆႈၶႂ်ႈႁူၼ်လင်ၶိုၼ်းယူႇဢိူဝ်ႈ ၵူၺ်းၵႃႈ မၼ်းတူၵ်းလိုၼ်းၵႂႃႇတင်းၼမ်၊ ၸဵမ်မိူဝ်ႈဢွၵ်ႇႁူင်းႁဵၼ်း ၶႃႈၵေႃႈဢမ်ႇႁႃၵၢၼ် ၵူၺ်းႁႃၽူဝ်ဢွၼ်တၢင်းလႄႈ ပႂ်ႉၵိၼ်မၼ်းၽႆၢႇလဵဝ်ၵူၺ်း ၵၢၼ်ၵေႃႈၶႃႈဢမ်ႇမီး၊ ၵၢၼ်ဢၼ်ၶႃႈႁဵတ်းၵေႃႈ ၵၢၼ်ၸွမ်းႁိူၼ်းၸွမ်းယေးၵူၺ်းၼႃႇ ဢမ်ႇမီးတၢင်းလႆႈငိုၼ်းသင်၊ တေႁဵတ်းၵၢၼ်ၵေႃႈ ၶႃႈဢမ်ႇႁူႉဝႃႈတေႁဵတ်းၵၢၼ်သင်လႆႈ မိူဝ်ႈလဵဝ်ၼႆႉႁူႉၵႃႈလႆႈပႂ်ႉဝၼ်းလုၵ်ႈၵိူတ်ႇၵူၺ်းယဝ်ႉ။
ၵွႆႈဝၼ်းႁိုင်တူဝ်ၶႃႈၵေႃႈပီးယႂ်ႇမႃးၵႆႈမႃး ၵႂႃႇလႂ်ၵေႃႈပႆယၢပ်ႇတူင်ႉယၢပ်ႇ၊ ၼွၼ်းယၢပ်ႇလုၵ်ႉယၢပ်ႇ၊ တေႁဵတ်းသင်ၵေႃႈပေႃးဢမ်ႇမိူၼ်ၸႂ်လႆႈသေမဵဝ်း၊ မီးၽူဝ်ၵေႃႈဢမ်ႇၸွႆႈသင်လႆႈ မၢင်ၵမ်းၵေႃႈလၵ်ႉႁႆႈမႃးယူႇဢိူဝ်ႈ။
မၢင်ပွၵ်ႈမၢင်ၵမ်း တွင်ႉၸဵပ်းမႃးပေႃးတၢၼ်ႇတေတႆၢယဝ်ႉ၊ မၼ်းတေၵိူတ်ႇယဝ်ႉႁိုဝ် ၵူၺ်းၵႃႈမၼ်းၵေႃႈဢမ်ႇၵိူတ်ႇ ၸဵပ်းမႃးယူႇလႆၢပွၵ်ႈၵေႃႈဢမ်ႇၵိူတ်ႇ။
သမ်ႉဝႃႈႁဝ်းတေႇၼႃႈႁိူၼ်းယဝ်ႉသေတႃႉ ဢူႈမႄႈၼၼ်ႉတႄႉယင်းတိုၵ်ႉပဵၼ်ဢူႈမႄႈႁဝ်းယူႇၵူၺ်း၊ မိူဝ်ႈတွင်ႉၵႄႇယႂ်ႇမႃးယဝ်ႉ မႄႈၵေႃႈမႆႈၸႂ်သေ မႃးယူႇပဵၼ်ၵေႃႉယဝ်ႉ။
ဝၼ်းၶႃႈၵိူတ်ႇလုၵ်ႈၼၼ်ႉ ၵပ်းသိုပ်ႇမၼ်းၵေႃႈဢမ်ႇလႆႈ၊ ဢမ်ႇႁူႉမီးယူႇတီႈလႂ် မီးဢူႈတင်းမႄႈၵူၺ်း ဢၼ်မႆႈၸႂ်သေ ပႂ်ႉဝႆႉယူႇ။ ဝူၼ်ႉၶိုၼ်းမိူဝ်ႈလႂ်ၵေႃႈ လီၸႂ်လဵၵ်ႉတေႉဢိူဝ်ႈ လုၵ်ႈမၼ်းပဵၼ်ၵေႃႉ ၵွပ်ႈသင်လႄႈမၼ်းႁဵတ်းလႆႈၸိူင်ႉၼႆ။
ဝႆၢးသေၵိူတ်ႇယဝ်ႉ မၼ်းၸင်ႇတေမႃးတူၺ်းတီႈႁူင်းယႃ၊ မီးမႄႈႁဝ်းယူႇၼႆလႄႈ မၼ်းၵေႃႈၵႂႃႇႁဵတ်းၵၢၼ်သေယဝ်ႉ။
ၸဵမ်မိူဝ်ႈယူႇၼႂ်းလိူၼ် မႄႈၵေႃႉပဵၼ်ၵူၼ်းလုမ်းလႃးလုၵ်ႈၶႃႈလႄႈတင်းၶႃႈယဝ်ႉ၊ မၼ်းၼၼ်ႉတႄႉၵေႃႈ ႁွပ်ႇလုၵ်ႈမၼ်းၵူၺ်းတင်းဢမ်ႇမေႃ၊ တေဝႃႈဢမ်ႇႁၵ်ႉသမ်ႉလႅပ်ႈႁၵ်ႉယူႇ ၵူၺ်းၵႃႈ ၵူႈဝၼ်းၵူႈဝၼ်းၼၼ်ႉ ၼင်ႇဝႃႈဢဝ်ၵၢၼ်ပဵၼ်ယႂ်ႇသေ လွင်ႈၼႃႈႁိူၼ်းတင်းသဵင်ႈၵေႃႈ ၶႃႈလႆႈႁဵတ်းမူတ်းယဝ်ႉ။
မီးလုၵ်ႈၵိူတ်ႇလုၵ်ႈဝႃႈမၼ်းယၢပ်ႇယဝ်ႉ လဵင်ႉလုၵ်ႈယိင်ႈၶႅၼ်းယၢပ်ႇလိူဝ်ၼၼ်ႉထႅင်ႈလႆၢပုၼ်ႈ၊ ပေႃးလုၵ်ႈၸႃႉလုၵ်ႈႁႆႈမႃးၵေႃႈ
“သူဢဝ်လႄႈ တွင်ႉမႆႈၼူမ်းယူဝ်ႉ”
ၵၢင်ၶိုၼ်းပေႃးလုၵ်ႈႁႆႈမႃးၵေႃႈ “ႁဝ်းၶႂ်ႈၼွၼ်းၼႃႇယဝ်ႉဝႃႈ ႁဵတ်းၸိူင်ႉႁိုဝ်ၵေႃႈလႆႈယဝ်ႉ ယႃႇပေႁႂ်ႈမၼ်းႁႆႈလူး”
“ႁဝ်းၵေႃႈတေႁဵတ်းႁိုဝ်ႁူႉလႃႇ”
ပေႃးမၼ်းၶႂ်ႈၼွၼ်းၵေႃႈၼွၼ်းလပ်းပႅတ်ႈသေယဝ်ႉ။
မၢင်ပွၵ်ႈၵႂႃႇလႄႇမႃး မႃးလိုၵ်းႁေၵေႃႈ မႃးဢဝ်လုၵ်ႈမၼ်းႁႆႈထႅင်ႈ။
လဵင်ႉလုၵ်ႈၼႆႉၵေႃႈ ဢမ်ႇၸႂ်ႈဝႃႈငႆၢႈငႆၢႈမိူၼ်ၵၼ် ၵူႈလွင်ႈၵေႃႈပဵၼ်ငိုၼ်းယူႇသဵင်ႈယဝ်ႉ ၵေႃႉလဵဝ်ႁႃ တွင်ႉသၢမ်တွင်ႉ လုၵ်ႈဢွၼ်ႇၼၼ်ႇၶႅၼ်းၼႃႇလိူဝ်ၵူၼ်းလူင်ယဝ်ႉ ဢမ်ႇမီးဢမ်ႇပဵၼ် ဢမ်ႇလူဝ်ႇ ပႂ်ႉၵမ်ႉဢမ်ႇလႆႈ၊ လႆႈတိၼ်းတွၼ်းတိၼ်းတွၼ်းသေလဵင်ႉၵၼ်ၵႂႃႇ။
ဢမ်ႇႁိုင်မၼ်းၵေႃႈလႆႈယွၼ်းၵႂႃႇႁႃငိုၼ်း ႁဵတ်းၵၢၼ်တၢင်ႇတီႈဢၼ်လႆႈငိုၼ်းၼမ်လိူဝ်သေၼႆႉၼႆလႄႈ သမ်ႉဝႃႈၶႂ်ႈႁၢမ်ႈမၼ်းယူႇသေတႃႉၵေႃႈ ႁဝ်းၵေႃႈသမ်ႉၵိၼ်းၼႃႇတေႉယဝ်ႉ၊ လုၵ်ႈလၢင်းထႅင်ႈၽႆၢႇၼိုင်ႈ ယိင်ႈၶဝ်ၵေႃႉယႂ်ႇမႃး ယိုင်ႈၶႅၼ်းလူဝ်ႇၼမ်မႃး ၵွပ်ႈၼၼ်လႄႈ မၼ်းၵေႃႈလႆႈၽၢတ်ႇယၢၼ်ႁဝ်းၵႂႃႇ။
ငိုၼ်းဢၼ်ဝႃႈၼၼ်ႉတႃႇၼႃႈႁိူၼ်းၼႆႉမၼ်းလမ်ႇလွင်ႈၼႃႇတေႉယဝ်ႉ။ ပေႃးဢမ်ႇမီးငိုၼ်းၼႆႉ ၶႂ်ႈလႆႈၵေႃႈဢမ်ႇလႆႈ၊ ၶႂ်ႈၵိၼ်ၵေႃႈဢမ်ႇလႆႈၵိၼ်၊ မၢင်ပွၵ်ႈပဵၼ်ၼီႈပဵၼ်ၶွတ်ႇ၊ ၵႂႃႇႁႃၽႂ်ၵေႃႈဢမ်ႇဝႆႉၼႃႈလီ မၼ်းလီၸႂ်လဵၵ်ႉတေႉဢိူဝ်ႈ။
ဝႆၢးသေမၼ်းၵႂႃႇယဝ်ႉ ၶႃႈၵေႃႈဢမ်ႇပႆႇပေႉတူဝ်လႆႈလႄႈ မိူဝ်းယူႇၸွမ်းမႄႈႁဝ်းၶဝ်ၵူၺ်း၊ ယႃႇဝႃႈတေၸွႆႈဢူႈမႄႈလႆႈ ၶႃႈၵေႃႈမႃးပၼ်လွင်ႈယၢပ်ႇၽိုတ်ႇဢူႈမႄႈထႅင်ႈ။
ဝႆၢးသေမၼ်းၵႂႃႇလႆႈ လိူၼ်သွင်လိူၼ်ယဝ်ႉၼႆၵေႃႈ မၼ်းလႆႈႁဵတ်းၵၢၼ်ႁဵတ်းငၢၼ်းယဝ်ႉ လႆႈသူင်ႇမႃးလဵင်ႉႁႃးမႄႈလုၵ်ႈယူႇၽွင်ႈ။
ႁိုင်ယူႇမွၵ်ႈပီၼႆႉ လႆႈႁၼ်ၶႅပ်းႁၢင်ႈမၼ်းလႄႈတင်းၽူႈယိင်းၵေႃႉၼိုင်ႈ ၵိုၵ်းၵၼ်လူင်းၾဵတ်ႉပုၵ်ႉယူႇလႄႈ ၼႂ်းဢူၵ်းၼႂ်းၸႂ်ၼႆႉ ၸဵပ်းၵႅၼ်းတၢၼ်ႇႁိုဝ်ၵေႃႈ ယဵၼ်ႉၵၼ်ႈတႃႇလုၵ်ႈၼႆသေ ပွႆႇမၼ်းပူၼ်ႉၵႂႃႇယဝ်ႉ။
ဝႆၢးသေၼၼ်ႉ မၼ်းၵေႃႈဢမ်ႇလႆႈၵပ်းသိုပ်ႇမႃးယဝ်ႉလႄႈ ငိုၼ်းၵေႃႈဢမ်ႇသိုပ်ႇသူင်ႇမႃးယဝ်ႉ၊ ၶႃႈၵေႃႈဢမ်ႇႁူႉတေႁဵတ်းႁိုဝ် မိူဝ်ႈပူၼ်ႉမႃးၶႃႈပိုင်ႈဢိင်မၼ်းၼမ်ပူၼ်ႉလႄႈ ႁဵတ်းႁႂ်ႈၶႃႈႁူႉတူဝ်ဝႃႈတေလႆႈပိုင်ႈဢိင်တူဝ်ၸဝ်ႈၵဝ်ႇယဝ်ႉ။
သမ်ႉဝႃႈၸိူင်ႉႁိုဝ်ၵေႃႈယဝ်ႉ ၶႃႈၵေႃႈတင်းမီးမႄႈၸွႆႈ လဵင်ႉလုၵ်ႈပၼ်ၶႃႈလႆႈယူႇလႄႈ ၼင်ႇၵႃႈႁဵတ်းလႆႈႁႃလႆႈ ၶႃႈၵေႃႈၵိၼ်ၸၢင်ႈႁဵတ်းသူၼ်ပိူၼ်ႈၸိူဝ်းၼႆႉ။ တၢင်းဝၼ်းတၢင်းဝၼ်းဢမ်ႇလႆႈလိုဝ်ႈ လႆႈငိုၼ်းမႃးၵေႃႈဢမ်ႇၸႂ်ႈဝႃႈၼမ်ၼႃႇ တေႃႉတႄႉပေႃးၵုမ်ႇၵႂႃႇဝၼ်းလႂ်ဝၼ်းၼၼ်ႉၵူၺ်း။
ပေႃးႁဝ်းၵႆႉမၼ်းဢမ်ႇဢိုပ်း မၼ်းၵေႃႈၸႂ်ႈယူႇ၊ ဝႆၢးၵိူတ်ႇလုၵ်ႈမႃးၼႆႉ တၢၼ်ႇတၢၼ်ႇယမ်းၾူၼ်ၵူၺ်းၵေႃႈဢမ်ႇၶႂ်ႈလႆႈယဝ်ႉလႄႈ ပေႃးၵႂႃႇၼိုင်ႈပွၵ်ႈၵေႃႈ ၵႆႉၵႆႉမႃးၼၢဝ်ပဵၼ်သီႇႁႃႈဝၼ်းၸိူဝ်းၼႆႉၼႃႇလႄႈ ဢမ်ႇလႆႈၵႂႃႇႁဵတ်းၵၢၼ်ထႅင်ႈ။
ၶၢဝ်းယၢမ်းမၼ်းႁိုင်ၼႃႇတႃႇပူၼ်ႉၵႂႃႇဝၼ်းလႂ်ဝၼ်းၼၼ်ႉၵေႃႈ ၵူၺ်းၵႃႈ ၶၢဝ်းတၢင်းသွင်ပီမၼ်းၽၢတ်ႇဢွၵ်ႇၵႂႃႇ လုၵ်ႈႁဝ်းၵေႃႈပေႃးၵေႃႉယႂ်ႇမေႃလၢတ်ႈမေႃၸႃမေႃၵႂႃႇမေႃပႆယဝ်ႉသေ တေယူႇၵႂႃႇၸိူင်ႉၼၼ်တိၵ်းတိၵ်းၵေႃႈဢမ်ႇလႆႈလႄႈ သမ်ႉပေႃးလူဝ်ႇၵႂႃႇၶိုၼ်ႈႁူင်းႁဵၼ်းၼႆထႅင်ႈယဝ်ႉ၊ ဢူႈမႄႈၵေႃႈသမ်ႉထဝ်ႈမႃးၵူႈမိုဝ်ႉၵူႈဝၼ်းယဝ်ႉ လိူဝ်သေလဵင်ႉလုၵ်ႈယဝ်ႉ ဢူႈမႄႈၵေႃႈႁဵတ်းၵၢၼ်ဢမ်ႇလႆႈမိူၼ်ၵူႈပွၵ်ႈယဝ်ႉလႄႈ ၶႃႈၵေႃႈလႆႈတႅပ်းတတ်း ဢွၵ်ႇၵႂႃႇႁႃငိုၼ်းယဝ်ႉ။
ၶႃႈၵေႃႈဢမ်ႇႁူႉတေလႆႈႁဵတ်းၸိူင်ႉႁိုဝ် လႆႈပွႆႇလုၵ်ႈယူႇဝႆႉၸွမ်းၼႆၢးၶဝ်သေ ၽၢတ်ႇဢွၵ်ႇမႃးယဝ်ႉ လႆႈဢွၵ်ႇမႃးၸွမ်းႁႃ ဢၼ်ဝႃႈငိုၼ်းၼႆၼၼ်ႉယဝ်ႉ။
မိူင်းၵူၼ်းလူင်ၼႆႉၵႂၢင်ႈတၢၼ်ႇႁိုဝ်ၵေႃႈ ၼင်ႇႁၢင်ႈမၼ်းပဵၼ်တူင်ႇမူၼ်းဝႆႉယူႇလႃႇ၊ ၶႃႈၵေႃႈလႆႈၶိုၼ်းႁူပ်ႉႁၼ်မၼ်း လႄႈတင်း ၽူႈယိင်းတၢင်ႇၵေႃႉ ဢၼ်တိုၵ်ႉပႃးတွင်ႉဝႆႉယူႇ၊ ၵူၺ်းၵႃႈမၼ်းပဵၼ်ၵူၼ်းၵေႃႉၸွႆႈလုမ်းလႃးပႃးထူင်ၶူဝ်းၵႂႃႇ ပႆလႄႇယူႇၼႂ်းႁၢင်ႈလၢၼ်ႉလူင်ၼၼ်ႉယဝ်ႉ။ မၼ်းၶေးတေဢမ်ႇလႅပ်ႈႁၼ်ၶႃႈ ၵူၺ်းၵႃႈၶႃႈလႆႈႁၼ်မၼ်းယူႇ။
ႁဵတ်းႁႂ်ႈဝူၼ်ႉႁၼ်မိူဝ်ႈၶႃႈပႃးတွင်ႉၼၼ်ႉ ဢမ်ႇပဵၼ်ၸိူင်ႉၼႆသေဢိတ်း၊ တၢင်းႁၵ်ႉၶႃႈလႄႈမၼ်းၼၼ်ႉ ပဵၼ်ၾၼ်ဢၼ်ဢမ်ႇၸၢင်ႈဢဝ်ၶိုၼ်းလႆႈၼၼ်ႉၵူၺ်း။
ၶႃႈပွႆႇၽႃႈလုၵ်ႈမႃးသေ မႃးႁဵတ်းၵၢၼ်ယူႇၸိူင်ႉၼႆ ၼႂ်းၸႂ်ၵေႃႈ ဢမ်ႇၵတ်းလႆႈ၊ ၶုၵ်းၸႂ်လႆႈလႄႈမႆႈၸႂ်ယူႇတႃႇသေႇဢိူဝ်ႈ၊ လႆႈသိုပ်ႇၾူၼ်းဢုပ်ႇယူႇၵေႃႈ ဢမ်ႇမိူၼ်ၼင်ႇလႆႈၼွၼ်းၵွတ်ႇပၼ်လွင်ႈဢုၼ်ႇၸႂ်။
ႁိုင်ႁိုင်ၼိုင်ႈပွၵ်ႈၸင်ႇလႆႈၵပ်းသိုပ်ႇတင်းႁိူၼ်း၊ မၢင်ပွၵ်ႈၵေႃႈလႆႈၵပ်းသိုပ်ႇၵႂႃႇတင်းမေႃသွၼ်ၶဝ် ဢၼ်ပဵၼ်ဢူၺ်းၵေႃႉၵၼ်ဝႆႉယူႇၼၼ်ႉသေ၊ ဝၼ်းၼိုင်ႈမေႃသွၼ်ၵေႃႈ ဢဝ်တင်းၶႅပ်းႁၢင်ႈဢၼ်ၼိုင်ႈသူင်ႇမႃးၼႄ၊ ၼၼ်ႉတႄႉပဵၼ်ၶႅပ်းႁၢင်ႈ ႁိူၼ်းလင်ၼိုင်ႈ ၽၵ်းတူသီႇၸဵင်ႇ လုၵ်ႈဢွၼ်ႇၸုၵ်းဝႆႉသေ မီးႁၢင်ႈဢူႈမႄႈယူႇႁၢင်ႇဢွၵ်ႇၵႂႃႇၼင်ႇဝႃႈၵႂႃႇပႅတ်ႈၼၼ်ႉယဝ်ႉ သီၶႅပ်းႁၢင်ႈၼၼ်ႉၵေႃႈမွင်မွင်ဝႆႉယူႇ။
မိူဝ်ႈလႆႈႁၼ်ၶႅပ်းႁၢင်ႈဢၼ်ၼၼ်ႉ ၶႃႈယဵၼ်ႉဢမ်ႇလႆႈထိုင်တီႈႁွင်ႉႁႆႈဢွၵ်ႇမႃးယဝ်ႉ။
လုၵ်ႈဢွၼ်ႇၼၼ်ႉဢမ်ႇလႆႈႁူႉလွင်ႈသင် လုၵ်ႈဢွၼ်ႇၼၼ်ႉဢမ်ႇလႆႈၽိတ်းသင် ၵွပ်ႈသင်လႄႈၵိူတ်ႇမႃးလႆႈၶၢမ်ႇဢူႈမႄႈပွႆႇၽႃႈၵႂႃႇ၊ ဢမ်ႇလႆႈယူႇၸွမ်းဢမ်ႇလႆႈလွင်ႈဢုၼ်ႇၸႂ် ဢမ်ႇလႆႈႁပ်ႉတၢင်းႁၵ်ႉတီႈဢူႈမႄႈ ဢၼ်လုၵ်ႈဢွၼ်ႇၵေႃႉၼိုင်ႈတေလႆႈႁပ်ႉ။ မိူဝ်ႈၼၼ်ႉႁဵတ်းႁႂ်ႈၶႃႈၶႂ်ႈပွၵ်ႈမိူဝ်းႁႃလုၵ်ႈၶိုၼ်းတေႉယဝ်ႉ။
ၶႃႈႁဵတ်းၵၢၼ်ယူႇဝၼ်းမိူဝ်ႈၼႆႉၵေႃႈ တွၼ်ႈတႃႇလုၵ်ႈတေမီးယူႇမီးၵိၼ် ဢမ်ႇလႆႈၼႃႈလဵၵ်ႉၼႆသေတႃႉ၊ ၵူၺ်းၵႃႈလုၵ်ႈၵေႃႈပဵၼ်ၵူၼ်းၵေႃႉဢၼ်လႆႈၼႃႈလဵၵ်ႉယွၼ်ႉဢမ်ႇမီးဢူႈမႄႈမိူၼ်ပိူၼ်ႈၵႂႃႇယဝ်ႉ။
သမ်ႉဝႃႈငိုၼ်းလမ်ႇလွင်ႈၼႃႇသေတႃႉ မႄႈၼၼ်ႉၵေႃႈလမ်ႇလွင်ႈပုၼ်ႈတႃႇလုၵ်ႈမိူၼ်ၵၼ်လႄႈ ၶႃႈၵေႃႈလႆႈမႃးယူႇၸွမ်းလုၵ်ႈၶိုၼ်းယဝ်ႉ။
သမ်ႉဝႃႈဢမ်ႇမီးငိုၼ်းၼမ်ၵေႃႈ ႁဵတ်းလႆႈႁႃလႆႈပေႃးၵုမ်ႇၵႂႃႇဝၼ်းလႂ်ဝၼ်းၼၼ်ႉ၊ ဢမ်ႇလႆႈၵဵပ်းလႆႈႁွမ်ၵေႃႈဢမ်ႇလႆႈဢိုပ်းၼႃႇ၊ ပီပူၼ်ႉပီဝၼ်းပူၼ်ႉဝၼ်း ႁဝ်းၵေႃႈႁဵတ်းၵၢၼ်ႁႃလဵင်ႉၵၼ်ယူႇႁဵတ်းၼၼ်ပၼ်ႇပုတ်ႈၵၼ်ယူႇၸိူင်ႉၼၼ်ယဝ်ႉ။
တွၼ်ႈသွၼ်ၸၢတ်ႈပၢၼ်ၼႆႉ မီးၵႃႈၶၼ်ဢၼ်တေဢဝ်သင်မႃးတႅၵ်ႈၵေႃႈဢမ်ႇလႆႈ၊ ၵွပ်ႈၼၼ်လႄႈ ဢၼ်ၶႃႈလႆႈထူပ်းမႃးၼႆႉ တေပဵၼ်တွၼ်ႈသွၼ်ပၼ် ၽူႈလူလိၵ်ႈႁဝ်းၶဝ်လႆႈယူႇ။
ၵၢၼ်တႄႇၼႃႈႁိူၼ်းၼၼ်ႉ ဢမ်ႇၸႂ်ႈသႂ်ႇၶူဝ်းႁၢင်ႈလီသေထႆႇၶႅပ်းႁၢင်ႈၵႂႃႇၵေႃႈ မၼ်းတေယဝ်ႉယဝ်ႉ။
တႃႇပဵၼ်ၵေႃႉႁၵ်ႉၵၼ်ၼၼ်ႉငႆၢႈၼႃႇ
ၶေႃႈၵႂၢမ်းဝႃႈႁၵ်ႉၼၼ်ႉလၢတ်ႈငႆၢႈၼႃႇ
တႃႇတေလိူၵ်ႈမႃးပဵၼ်ၵေႃႉႁူမ်ႈၸၢတ်ႈပၢၼ်တႄႉ လီလႆႈဝူၼ်ႉသွၼ်ႇၼပ်ႉသၢင်ႈလီလီယဝ်ႉ။
တႃႇသၢင်ႈၼႃႈႁိူၼ်းႁူမ်ႈၵၼ်ၼၼ်ႉ ဢမ်ႇၸႂ်ႈလွင်ႈၵူၼ်းၵေႃႉလဵဝ်ၵူၺ်း ပဵၼ်လွင်ႈၵူၼ်းသွင်ၵေႃႉယဝ်ႉ လီၸႃႉႁူမ်ႈၵၼ်သၢင်ႈ ယၢင်ႈပွင်ႁူမ်ႈၵၼ်ၵႂႃႇ သင်မိူၼ်ယူႇၵေႃႉလဵဝ် ၼၼ်ႉတေႁွင်ႉဝႃႈၼႃႈႁိူၼ်းလႆႈယူႇႁိုဝ်?။
သင်တေတႄႇၼႃႈႁိူၼ်းၼႆ တေလႆႈဝူၼ်ႉသွၼ်ႇလီလီ၊ ဢမ်ႇဝႃႈၵၢၼ်ယူႇႁူမ်ႈၵၼ် ဢၵျၢင်ႉတၢင်းယၢမ်ႈ၊ ၵၢၼ်ငိုၼ်း၊ လွင်ႈလဵင်ႉလုၵ်ႈ တေမီးထႅင်ႈလႆၢလႆၢလွင်ႈယူႇ။
သွင်ၵေႃႉၽူဝ်မေးၵူၺ်းတႄႉဢမ်ႇၸႂ်ႈလွင်ႈယၢပ်ႇ ၵူၺ်းၵႃႈမိူဝ်ႈလႂ်မီးလုၵ်ႈမႃးၼၼ်ႉ ၸၢတ်ႈပၢၼ်ၶဝ်ပဵၼ်ပုၼ်ႈၽွၼ်းႁဝ်းယဝ်ႉ။
သင်တေလဵင်ႉၵႂႃႇဢမ်ႇသူၼ်ၸႂ်သင်ၵေႃႈ မၼ်းလဵင်ႉလႆႈယူႇၵူၺ်း၊ ၵူၺ်းၵႃႈ ၼႂ်းဢူၵ်းၼႂ်းၸႂ်မႄႈၵေႃႉၼိုင်ႈၼၼ်ႉတႄႉ သမ်ႉဝႃႈဢမ်ႇတဵမ်ထူၼ်ႈၼင်ႇၵၢင်ၸႂ်လႆႈၵေႃႈ ၶႂ်ႈႁႂ်ႈမၼ်းလီတီႈသုတ်းယဝ်ႉ။
ႁဝ်းပဵၼ်ၽူႈယိင်းၵေႃႈ ႁႃလဵင်ႉတူဝ်ၸဝ်ႈၵဝ်ႇႁႂ်ႈလႆႈလႄႈ ဢမ်ႇပႂ်ႉႁႂ်ႈပိူၼ်ႈမႃးလဵင်ႉၵူၺ်း ဝၼ်းလႂ်ဢမ်ႇမီးၶဝ်ယဝ်ႉ ႁဝ်းၵေႃႈယင်းတိုၵ်ႉၸုၵ်းမၼ်ႈလႆႈယူႇၼၼ်ႉ ပဵၼ်ၵူၼ်းၵေႃႉဢၼ်ၵတ်ႉၶႅၼ်ႇၼႃႇယဝ်ႉ ပဵၼ်လွင်ႈဢၼ်ၶႃႈလႆႈတူၵ်းလိုၼ်းၵႂႃႇတႄႉတႄႉ။
ၵၢၼ်တႄႇၼႃႈႁိူၼ်းၼၼ်ႉ ဢမ်ႇၸႂ်ႈလွင်ႈႁၢင်ႈလီ ၵူၺ်းၵႃႈပဵၼ်ၵၢၼ်သၢင်ႈၸၢတ်ႈပၢၼ် သဵၼ်ႈတၢင်းႁဝ်းသွင်ႁူမ်ႈၵၼ်ပွင်ၵႂႃႇၼၼ်ႉယဝ်ႉ။
ၼပ်ႉယမ်ထိုင်ၽူႈလူလိၵ်ႈႁဝ်းၶဝ်ယူႇဢေႃႈ
တႅမ်ႈ – သႅၼ်ငဝ်း
16-17/6/2026
