ႁၵ်ႉမၼ်းလႄႈပႆၸွမ်း ႁၵ်ႉၵၼ်လႄႈၸင်ႇပဵၼ်ၵေႃႉႁူမ်ႈၸၢတ်ႈပၢၼ် ႁဵတ်းၵၢၼ်ယၢပ်ႇႁၢပ်ႇၵၢၼ်မဝ် ၸွႆႈၵၼ်ပွင်ၵၼ်သၢင်ႈ ယၢင်ႈၸွမ်းၵၼ်ၵႂႃႇၼၼ်ႉ ၼၼ်ႉပဵၼ်ၼႃႈႁိူၼ်းဢၼ်ၶႃႈၶႂ်ႈပဵၼ်ယဝ်ႉ။
ၶႃႈလႄႈတင်းပီႈပိုၼ်းၶိူဝ်း တႄႇၼႃႈႁိူၼ်းႁူမ်ႈၵၼ် ယွၼ်ႉၶႃႈႁၵ်ႉမၼ်းလႄႈ မၼ်းၵေႃႈဝႃႈႁၵ်ႉၶႃႈ။ မၼ်းပဵၼ်သိုၵ်းသေ ႁႃးလႆႈႁူႉၸၵ်းၵၼ် မိူဝ်ႈမၼ်းမႃးတူင်ႉၼိုင်ယူႇႁိမ်းဝၢၼ်ႈႁဝ်း တႄႇၸႃႉလႆႈႁူပ်ႉၵၼ်တႄႉ ပဵၼ်တီႈတႃႈၼမ်ႉႁိမ်းဝၢၼ်ႈၼၼ်ႉယဝ်ႉ။
တီႈႁိူၼ်းၼမ်ႉၵႆႉၵႆႉဢမ်ႇလႆလႄႈ ႁဝ်းဢူၺ်းၵေႃႉၸူဝ်းၵၼ်ၵႂႃႇဢၢပ်ႇၼမ်ႉတီႈတႃႈမၼ်းသေ ပဵၼ်ၼမ်ႉႁွင်ႈ ဢမ်ႇၵႂၢင်ႈယႂ်ႇ ႁဝ်းၵေႃႈၼုင်ႈသုပ်းသႂ်ႇသိၼ်ႈတႃႉဢူၵ်းယဝ်ႉ သၵ်ႉၶူဝ်းသီၶႆးသေဢုပ်ႇၵၼ် ယၢမ်းၼၼ်သဵင်ဢူၼ်ၵူၼ်းသမ်ႉၽႅတ်ႈမႃး ၵႂႃႇတၢင်းၼိူဝ် တီႈၵူၼ်းၸၢႆးၶဝ်ဢၢပ်ႇ။
ပေႃးမိူင်းႁဝ်းၼႆ တႃႈၼမ်ႉၼႆႉ ၵူၼ်းၸၢႆးတေဢၢပ်ႇတၢင်းၼိူဝ် ၽူႈယိင်းသမ်ႉတေဢၢပ်ႇတၢင်းတႂ်ႈယဝ်ႉ။
မၢင်ၵေႃႉၵေႃႈဢမ်ႇၼုင်ႈသိူဝ်ႈ ပွႆႇပုမ်လူင်ၵႂႃႇ၊ မၢင်ၵေႃႉၵေႃႈၼုင်ႈသိူဝ်ႈၶႅၼ်ပွတ်း ႁတ်ႉတူဝ်ႁၼ်ၵၢမ်ႈၼိူဝ်ႉၼႃႈတွင်ႉၶႅၼ်မင်ႈသင်ႈဝႆႉ သမ်ႉပေႃးလႆႈဢဝ်သၢႆတႃလၵ်ႉၸၢႆႉတူၺ်းယူႇယဝ်ႉ။
“ဢေးဢွင်ႇၸဵတ်ႉၵႃႉမႂ်းၽွင်ႈဢႄႈ”
“ဢေးၼႆႉၵေႃႈ..လၢတ်ႈပေႉၼၼ်ႉဝႃႇ”
“ဢမ်ႇၸႂ်ႈတေႉႁိုဝ်လႃႇ” ႁဝ်းသွင်သၢမ်ၵေႃႉဢွၼ်ၵၼ်ဝႃႈႁင်းမၼ်း
“ၶႂ်ႈလဝ်းဝႆႉၵွၼ်ႇၼေႃ” ဢေးမူၺ်းလၢတ်ႈ
“ၶဝ်လုၵ်ႉလႂ်မႃးလႃႇ” ၶႃႈထၢမ်ၶဝ်
“ၸၢင်ႈလုၵ်ႉလႂ်မႃး ပဵၼ်ၵူၼ်းသိုၵ်းၵူၺ်းဢိူဝ်ႈ” ဢေးလၢဝ်လၢတ်ႈ
“သိုၵ်းမႂ်ႇႁႃႉတေႃႈ ဢမ်ႇယၢမ်ႈႁၼ်ႁေပွၵ်ႈလူး”
“ၶွင်ၵူၼ်းၵဝ်ႇၸိူဝ်းၼၼ်ႉ တမ်ႉဢမ်ႇမီးၵူၼ်းၼုမ်ႇၸိူင်ႉၼႆလႄႇဢိူဝ်ႈ” ဢေးလၢဝ်လၢတ်ႈ
“ၼုမ်ႇဢမ်ႇၼုမ်ႇၵေႃႈမႂ်းပေႃးဢဝ်ယဝ်ႉၵွၼ်ႇ” ဢေးဢွင်ႇလၢတ်ႈ
ၵူၼ်းသိုၵ်းဢၼ်ၽႅတ်ႈမႃးသီႇႁႃႈၵေႃႉၼၼ်ႉၵေႃႈ ဢုပ်ႇၵၼ်
“သၢဝ်ဝၢၼ်ႈၼႆႉၶႂ်ႈၶိုၵ်ႉဝႆႉၵဝ်ဝႃႈ”
“ၵဝ်တေၵဝ်းတေႉၼႆႉၵဝ် လဝ်းၼႃႇမေႃႉ”
“ၵဝ်တေၵဝ်းၵေႃႉသိၼ်ႈလႅင်ႈၼၼ်ႉၼႃႈ ယႃႇမႃးႁိမ်ၵဝ်ၵူၺ်ႉလၢတ်ႈဝႆႉ” သူၺ်ႇဢွင်ႇၼႅတ်ႈလၢတ်ႈ။
“ဢၢပ်ႇၼမ်ႉႁဵတ်းတေႉလႄႈ ၵမ်ႉပိူၼ်ႈတေမိူဝ်းပႅတ်ႈယဝ်ႉ” ပိုၼ်းၶိူဝ်းဝႃႈႁင်းမၼ်း။
မိူဝ်ႈႁဝ်းဢၢပ်ႇၼမ်ႉသေ ဢွၼ်ၵၼ်ပွၵ်ႈမိူဝ်းၵႂႃႇ လႆႈႁူပ်ႉၺႃးၶဝ်ပႂ်ႉဝႆႉယူႇႁိမ်းၶူဝ်သေ ဢမ်ႇထၢမ်ဢမ်ႇလၢတ်ႈသင် ၶဝ်ၵေႃႈၸပ်းၵူႈၵၼ်ၵႂႃႇႁင်းၽႂ်ႁင်းမၼ်း ပိုၼ်းၶိူဝ်းၵေႃႈပႆမႃးၸူးၶႃႈယဝ်ႉ။
မိူဝ်ႈလႆႈႁၼ်မၼ်း ၼႃႈသမ်ႉပေႃးလႅင်ဝၢၼ်းဝၢၼ်း ဢမ်ႇႁတ်းငွၵ်ႈၼႃႈယၵ်ႉတူၺ်းၸူး မၼ်းပႆသုတ်ႉမႃးၸမ် သဵင်လၢတ်ႈလွႆးလွႆးမေႃးယူႇပဵၼ်ၶေႃႈပဵၼ်ၵမ်း။
“ႁိူၼ်းယူႇတၢင်းလႂ်ၶႃႈ”
“ယူႇတၢင်းၼႃႈၼႆႉၵူၺ်း”
“လင်လႂ် မီးပဵၼ်လႆၢလင်ဢမ်ႇၸႂ်ႈႁိုဝ်”
“ဢၼ်မီးတူၼ်ႈမၢၵ်ႇမူင်ႈၼၼ်ႉယဝ်ႉ”
သၢႆတႃမၼ်းယၵ်ႉတူၺ်းၼႃႈၶႃႈသေယဝ်ႉ “ႁဝ်းလီၵူဝ်တၢၼ်ႇၼၼ်ႉႁႃႉ”
ၶႃႈၶွၼ်းႁူဝ်ၼႄ
“ႁႅင်ႉလႄႈဢမ်ႇတူၺ်းၼႃႈႁဝ်းလႃႇ ႁၢင်ႈၸႃႉၼႃႇလႄႈပိူၼ်ႈဢမ်ႇၶႂ်ႈလၢတ်ႈတေႃႇႁႃႉတေႃႈ”
“ဢမ်ႇၸႂ်ႈၸိူင်ႉၼၼ်ၶႃႈ”
“သမ်ႉပဵၼ်ၸိူင်ႉႁိုဝ်လႃႇ”
မိူဝ်ႈယၵ်ႉႁၼ်သၢႆတႃမၼ်းယၵ်ႉၸူး ဢဝ်ၶႃႈပေႃးဢမ်ႇထိင်းၸႂ်လႆႈ သမ်ႉပေႃးလိူတ်ႇမႆႈၵႂႃႇမူတ်းယဝ်ႉ၊ တေလၢတ်ႈသင်ၵေႃႈဢမ်ႇႁူႉ ၵႂင်မူတ်းယဝ်ႉဝႃႈ။
“ၸိုဝ်ႈသင်ၶႃႈ”
“ၶမ်းၼူၼ်း”
“ၸိုဝ်ႈႁၢင်ႈလီတေႉယဝ်ႉ.. ၵူၼ်းၵေႃႈႁၢင်ႈလီ”
လၢတ်ႈဢဝ်ၶႃႈသမ်ႉပေႃးဢမ်ႇမေႃတွပ်ႇယဝ်ႉယိုင်။
“ၶမ်ႈၼႆႉၵႂႃႇလႂ်လႃႇ”
“ဢမ်ႇၵႂႃႇလႂ်ၶႃႈ”
“ပိူၼ်ႈဢမ်ႇပၼ်ၵႂႃႇၶႃႈယူဝ်ႉၼေႃႈ”
“ဢမ်ႇၸႂ်ႈၸိူင်ႉၼၼ်ၶႃႈ”
“သမ်ႉပဵၼ်ၸိူင်ႉႁိုဝ်လႃႇ မီးၸဝ်ႈမီးၽူဝ်ယဝ်ႉလႄႈၸင်ႇဝႃႈ ပိူၼ်ႈဢမ်ႇပၼ်ဢွၵ်ႇႁိူၼ်းယဝ်ႉၶႃႈၵႃႈ”
“ၸဝ်ႈၵေႃႈဢမ်ႇမီးၽူဝ်ၵေႃႈဢမ်ႇမီးၶႃႈ”
“ၵေႃႉႁၵ်ႉတႄႉမီးယူႇၶႃႈယဝ်ႉ”
“ပႆႇၶႃႈ”
ၼႃႈမၼ်းၵေႃႈယုမ်ႉၵီႈမႃးလိူဝ်ၵဝ်ႇယဝ်ႉ တေႁဵတ်းႁိုဝ် ၸဵဝ်းထိုင်ႁိူၼ်းၼႃႇလႄႈ ၵႂၢမ်းႁဝ်းသုတ်းၵႂႃႇ ၶႃႈၵေႃႈၶဝ်ႈဝၢင်းမိူဝ်း မၼ်းၵေႃႈပူၼ်ႉၵႂႃႇယဝ်ႉ။
