တွၼ်ႈသီႇ
လႆႈႁၼ်သႆၢၶမ်းလႄႈယိင်းၵေႃႉၼၼ်ႉၼင်ႈယူႇႁိမ်းၵၼ်ၸိူင်ႉၼၼ်ၵေႃႈ ၼႂ်းၸႂ်ၼႆႉပေႉမႃးတိပ်ႇတၼ်ဝႆႉယူႇၸိူင်ႉၼၼ် သီၼႃႈမၼ်းၵေႃႈဢမ်ႇလီ ၶဝ်ႈမိူဝ်းၵႂႃႇၼႂ်းႁိူၼ်းယဝ်ႉ။
“လုင်းႁဵင်ႁဝ်းႁွင်ႉၶႃႈ မီးလွင်ႈလူဝ်ႇၸိူင်ႉႁိုဝ်ဢမ်ႇႁူႉ”
“မႃးၼင်ႈၵွၼ်ႇလႄႈ”
ၼုမ်ႇႁွမ်ၵႂႃႇၼင်ႈၸွမ်းၶဝ်သေယဝ်ႉ လုင်းႁဵင်လၢတ်ႈၼႄလွင်ႈတၢင်းတီႈမၼ်း
“ၼႆႉမေႃသွၼ်တေမႃးသွၼ်ပၼ်လုၵ်ႈဢွၼ်ႇတီႈဝၢၼ်ႈႁဝ်းဢိူဝ်ႈ ႁႂ်ႈမိူဝ်းယူႇၸွမ်းမႂ်းလႆႈယူႇယူဝ်ႉ ၵူၼ်းၼုမ်ႇၵူၼ်းသၢဝ်ၵေႃႈဢမ်ႇမီးၽႂ်ယဝ်ႉၵိုတ်းမႂ်းၵူၺ်းယဝ်ႉၼႃႇ တေလႆႈပဵၼ်ၵေႃႉၵၼ်တင်းမေႃသွၼ်”
“တင်းသွင်ၵေႃႉၶႃႈႁႃႉ”
“ႁိုဝ်ၸႂ်ႈၼႄႇ ၶူးလူင်ၶဝ်မႃးသူင်ႇမေႃသွၼ်ၵူၺ်းဢိူဝ်ႈၼႆႉ မေႃသွၼ်ယိင်းၵူၺ်းဢိူဝ်ႈ”
“ဢေႃႈ..”
“ပေႃးၼၼ်ၶႃႈတေၽၢၵ်ႇမေႃသွၼ်ႁဝ်းဝႆႉပၼ်သူယဝ်ႉၶႃႈၼႃႈ” သႆၢၶမ်းလၢတ်ႈၸူးၼုမ်ႇႁွမ်။
ၶဝ်ၵေႃႈၸူဝ်းၵႂႃႇႁိူၼ်းၼုမ်ႇႁွမ်ၶဝ်သေယဝ်ႉ
“ယွၼ်းဢုပ်ႇသူဢိတ်ႉၼိုင်ႈၶႃႈ”
ၼုမ်ႇႁွမ်ၵေႃႈဝႆႉဝႃႈပဵၼ်ၵၢၼ်သေ “မီးၸိူင်ႉႁိုဝ်ၶႃႈ”
“ၾူၼ်းသူလီၶိုၼ်းယဝ်ႉၶႃႈႁႃႉ”
“ဢေႃႈ..”
သႆၢၶမ်းၼိမ်ယဵၼ်ၵႂႃႇသေ ယၵ်ႉတူၺ်းၼႃႈၼုမ်ႇႁွမ် ဢဝ်ၸဝ်ႈတူဝ်ပေႃးဢမ်ႇႁတ်းတေႃႇၼႃႈၸူး။
“ၸႂ်ထိုင်တေႉယဝ်ႉ”
ၼႃႈၼုမ်ႇႁွမ်ၼၼ်ႉတႄႉ လိူတ်ႇမႆႈမႃးဢမ်ႇႁူႉတူဝ်ယဝ်ႉ “ဢမ်ႇၸႂ်ႈဝႃႈၶႂ်ႈလၢတ်ႈတီႈၽႂ်ၵေႃႈလၢတ်ႈၸိူင်ႉၼႆၶႃႈၼႃႈ”
“တေႉဢေႃႈ..ၶႂ်ႈႁၼ်လႄႈလႆႈဢဝ်တိုဝ်ႉတၢင်းၼႆႉသေမႃးဢေႃႈၼႆႉ”
“ဢမ်ႇလၢတ်ႈသိုဝ်ႈတၢၼ်ႇၼႆၢႉၵေႃႈလႆႈ”
“ပေႃးဢမ်ႇလၢတ်ႈသိုဝ်ႈ ၸွင်ႇသူသမ်ႉတေႁူႉထိုင်မၼ်းလႆႈႁိုဝ်”
“ပေႃးၼၼ်တေယွၼ်းထၢမ်သိုဝ်ႈသိုဝ်ႈၶႃႈၼႃႈ မီးၼႃႈႁိူၼ်းယဝ်ႉၶႃႈႁႃႉ” ၼုမ်ႁွမ်ယၵ်ႉတူၺ်းၼႃႈမၼ်းသေထၢမ်။
သႆၢၶမ်းတူၺ်းၼႃႈၼုမ်ႇႁွမ်ၸႂ်ဢမ်ႇပေႃးၶႂ်ႈလီမႃးယဝ်ႉ”ပႆႇမီးၶႃႈ”
“တူၺ်းယဝ်ႉလႅပ်ႈပဵၼ်ပေႃႈလုၵ်ႈဢွၼ်ႇယဝ်ႉၼႃ”
“သင်တေႇၵေႃႈတေလႅပ်ႈမီးလုၵ်ႈယဝ်ႉမိူၼ်ၵၼ်”
“ဢမ်ႇမီးၵေႃႉႁၵ်ႉတႄႉဢမ်ႇပဵၼ်လႆႈယူဝ်ႉ”
“ဢမ်ႇမီးၶႃႈ ၼႃႈၵၢၼ်တႃငၢၼ်းသေ ဢမ်ႇတၼ်းဝႆႉၸူႉဝႆႉၸူဝ်းသင်”
“ဢေႃႈ..ပွင်ႇၸႂ်ယဝ်ႉၶႃႈ”
“ပွင်ႇၸႂ်ၸိူင်ႉႁိုဝ်..”
“ဢိုမ်ႈ..”
“ဢိုမ်ႈသင်..သူလူးမီးၵေႃႉႁၵ်ႉယဝ်ႉႁႃႉ”
“ပႆႇထူပ်းၵူၼ်းၵေႃႉဢၼ်တေမႃးပဵၼ်ၵေႃႉႁူမ်ႈၸၢတ်ႈပၢၼ်လႆႈ”
“ႁဝ်းယွၼ်းပဵၼ်ၵူၼ်းၵေႃႉၼၼ်ႉဢမ်ႇလႆႈႁႃႉ”
“တေပဵၼ်လႆႈယူႇႁႃႉ”
“ပေႃးသူပၼ်ၶႂၢင်ႉတႄႉပဵၼ်လႆႈဢေႃႈ”
“ႁဝ်းဢမ်ႇပၼ်ၶေႃႈတွပ်ႇလႆႈၶႃႈ”
“ဢမ်ႇပဵၼ်သင် ပေႃးဝႃႈသူပၼ်တိုဝ်ႉတၢင်းႁဝ်းယူႇ”
“ပွၵ်ႈမိူဝ်းလႆႈယဝ်ႉၶႃႈ”
“ႁဝ်းၸွင်ႇၵွႆႈမႃးထႅင်ႈၼႃႈ”
“မိူဝ်းလွႆးလွႆး..”
ယွၼ်ႉၵႂၢမ်းလၢတ်ႈၼၼ်ႉသေ ၸႂ်ပေႃးဢူၼ်ႈၸွမ်း ပဵၼ်ၽႆၢႇယွမ်းမႃးယူႇပဵၼ်ၵမ်းယဝ်ႉ။
ၵွပ်ႈပိူဝ်ႈပဵၼ်ႁိူၼ်းဢမ်ႇပေႃးၵႂၢင်ႈသေၵႃႈႁိုဝ်လႄႈ ႁွင်ႈၼွၼ်းၼုမ်ႇႁွမ်ၼၼ်ႉၵေႃႈ ပဵၼ်ႁွင်ႈပႅၼ်ယွၼ်ႇဢွၼ်ႇတီႈတုပ်ႈႁိူၼ်းၼၼ်ႉဢိတ်ႉၼိုင်ႈၵူၺ်း မၼ်းတႄႉၶူဝ်းဢမ်ႇၼမ်၊ ပေႃးယူႇသွင်ၵေႃႉတႄႉ ၶႂ်ႈၵႅပ်ႈဝႆႉယူႇ ၸင်ႇဝႆႉၶူဝ်းၼႂ်းႁွင်ႈၼွၼ်းသေ ဢွၼ်ၵၼ်ၼွၼ်းယူႇၼႂ်းၵၢင်ႁိူၼ်းၼၼ်ႉယဝ်ႉ။
“မေႃသွၼ်မိုတ်ႈၵၼ်တင်းမေႃသွၼ်သႆၢၶမ်းၼၼ်ႉယူႇႁႃႉ”
“မိုတ်ႈယူႇၶႃႈ..ၶႃႈၵေႃႈပဵၼ်လုၵ်ႈႁဵၼ်းမၼ်းၵူၺ်း”
“ဢေႃႈ..ၶဝ်လႅပ်ႈပဵၼ်ၵူၼ်းမေႃႁၵ်ႉလုၵ်ႈဢွၼ်ႇၼႃႇၼေႃ”
“ၸႂ်ႈယဝ်ႉၶႃႈ..ၶူးၶဝ်မေႃႁၵ်ႉလုၵ်ႈဢွၼ်ႇၼႃႇ”
“ၶဝ်ၵေႃႈတေမီးလုၵ်ႈယူႇၵႃႈၼႆ”
“ဢေႃႈ..လုၵ်ႈၶူးၶဝ်ၵေႃႈလီႁၵ်ႉၼႃႇၶႃႈ”
“မေးၶဝ်ၵေႃႈပဵၼ်မေႃသွၼ်ၵႃႈ”
“ၸႂ်ႈယဝ်ႉၶႃႈ”
ၼင်ႇဝႃႈသဵင်ၾႃႉၽႃႇၾႃႉလင်တႅၵ်ႇမေႃးယူႇၵိုင်ႈၵၢင်ႈၵိုင်ႈၵိင်ႈၵႂႃႇမူတ်း ႁူဝ်ၸႂ်သမ်ႉပေႃးတႅၵ်ႇၸတ်ႉလူဝ်လူဝ်ဝႆႉယဝ်ႉၼႃႇ။
သမ်ႉဝႃႈၾၢင်ႉတူဝ်ဝႆႉယဝ်ႉသေတႃႉၵေႃႈ ပေႃးမၼ်းၵိုင်ႉၵၢင်ႉၼႃႇသမ်ႉ ဢမ်ႇတၼ်းထိင်းၸႂ်လႆႈၵမ်းလဵဝ်ၼၼ်ႉယိုင်။
ၸင်ႇဝႃႈယိုင်ႈႁူႉၸၵ်းၼမ် ယိုင်ႈမုင်ႈမွင်းၼမ် ပေႃးဝႃႈဢမ်ႇပဵၼ်မႃးၼင်ႇတၢင်းမွင်း ပဵၼ်လွင်ႈတုၵ်ႉၸႂ်မႃးယဝ်ႉ။
မိူဝ်ႈၶဝ်လၢတ်ႈဝႃႈဢမ်ႇမီးမေး ၼႂ်းၸႂ်ၶေးမီးလွင်ႈမုင်ႈမွင်းယူႇ၊ ၵူၺ်းၵႃႈမၼ်းၵေႃႈလူႉသုမ်းၵႂႃႇယွၼ်ႉဢမ်ႇယုမ်ႇၸႂ်ၶဝ်သေထၢမ်ပိူၼ်ႈၼၼ်ႉယဝ်ႉ။
ၸင်ႇဝႃႈ ၵူၼ်းမေႃဢုပ်ႇမေႃၵဝ်း မေႃဢဝ်ၸႂ်ပေႃးမဝ်းလႆႈၼႆႉ မၼ်းၵေႃႈပဵၼ်ၵူၼ်းမေႃလႅၼ်လႆႈယဝ်ႉ။
သင်မၼ်းလဝ်း မၼ်းမေႃၵဝ်းၼႆ
သမ်ႉဝႃႈႁၵ်ႉၵေႃႈ ဢမ်ႇထိူၵ်ႈပဵၼ်ၵူႈၶၢင်း
ၸႂ်ဢမ်ႇသၢင်းလႆႈမႆႈ ယူႇဢမ်ႇလႆႈႁိုင်ယိုၼ်း
ႁၵ်ႉၵိုမ်းဢမ်ႇထိူၵ်ႈၶဝ် ယူႇၵႆၵႆၶဝ်ဝႆႉသေ
တေဢမ်ႇလႆႈၸဵပ်းမႆႈၸပ်းၸႂ်။
တႅမ်ႈ – သႅၼ်ငဝ်း
8-12/06/2026
