ႁႅင်းမိပ်ႇဢီးၵူၼ်းႁိမ်းႁွမ်းၼၼ်ႉ ၸၢင်ႈႁဵတ်းႁႂ်ႈႁဝ်းဢမ်ႇႁတ်းလၢတ်ႈသင်ယဝ်ႉ ၵူၺ်းၵႃႈ လွင်ႈသိုဝ်ႈယူဝ်းတေႃႇတူဝ်ၵဝ်ႇ ၸႂ်ၸဝ်ႈၵဝ်ႇၼၼ်ႉ တေႁဵတ်းႁႂ်ႈႁဝ်းသၢင်ႈႁွႆးၸဵပ်းၼႂ်းၸႂ်လႆႈဢေႇမႃးယူႇ။
ႁဝ်းမီးသုၼ်ႇတႃႇတေၸႂ်လမ်လႆႈယူႇယဝ်ႉ သမ်ႉဝႃႈၵဵပ်းဝႆႉၵေႃႈ မၼ်းဢမ်ႇပၼ်ၽွၼ်းလီသင်တီႈတူဝ်ႁဝ်းၶိုၼ်း။
ယူႇၸွမ်းၵူၼ်းၵေႃႉဢၼ်မေႃႁူႉၵႃႈၶၼ်ႁဝ်းၼၼ်ႉသေ ယူႇႁႂ်ႈႁၢင်ႇၵၼ်တင်းၵူၼ်းၵေႃႉဢၼ်ဢမ်ႇဝႆႉၵႃႈၶၼ်ႁဝ်းၼၼ်ႉလႄႈ။
ၵူၼ်းဢၼ်ၵျိူၵ်ႈထၢင်ႇလဵၵ်ႉတဵၵ်းတဵင်ပိူၼ်ႈၼၼ်ႉ ၶဝ်ၵေႃႈဢမ်ႇလႆႈမီးတၢင်းသိူဝ်းသေၵႃႈႁိုဝ်လေႃႇ မၢင်ပွၵ်ႈတုမ်ႉတွပ်ႇၸူးၶိုၼ်းၵေႃႈဢမ်ႇပဵၼ်သင်။
လွင်ႈဢၼ်ၶႂ်ႈလၢတ်ႈၼၼ်ႉလၢတ်ႈသိုဝ်ႈသိုဝ်ႈလႄႈ ဢမ်ႇလူဝ်ႇလၢတ်ႈဢဝ်တၢင်းၵျေႃႇမၼ်းလႄႈဢဝ်ၼမ်ႉၸႂ်ၵေႃႈလႆႈ။
သင်ဢမ်ႇပွင်ႇၸႂ်ဢၼ်ပိူၼ်ႈလၢတ်ႈၼႄ ႁႂ်ႈလၢတ်ႈၵႂႃႇသိုဝ်ႈသိုဝ်ႈဝႃႈ ဢမ်ႇပွင်ႇၸႂ်ၼႆၵေႃႈ ဢမ်ႇပဵၼ်သင်။
ၵႂၢမ်းမၢင်ၶေႃႈ ပၼ်ႁႂ်ႈမၼ်းယဝ်ႉၵႂႃႇသေ ဢမ်ႇလူဝ်ႇတုမ်ႉတွပ်ႇၶိုၼ်းၵေႃႈလႆႈ မၢင်လွင်ႈမၼ်းၵေႃႈဢမ်ႇလႆႈမီးသင်လီမႃး။
သင်မီးၵူၼ်းမႃးသမ်ႇမႅၼ်ၼႄ ႁဵတ်းႁႂ်ႈပိူၼ်ႈသူၼ်ၸႂ်ၼႆၵေႃႈ ႁဵတ်းၵႅင်ႈဢိူဝ်ႈဢေႃႈၸွမ်းၵႂႃႇၵူၺ်းၵေႃႈလႆႈ။
ၵူၼ်းဢၼ်ဢမ်ႇလီလဵၼ်ႈၵေႃႉလိူဝ်ပိူၼ်ႈၵေႃႈ ၵူၼ်းဢၼ်ၵျိူၵ်ႈတႅပ်းတတ်းၵႃႈၶၼ်ပိူၼ်ႈၼၼ်ႉယဝ်ႉ။
သင်မီးၵူၼ်းမႃးထၢင်ႇလဵၵ်ႉႁဝ်း တႅၼ်းတီႈတေၵူမ်ႈႁူဝ်သေယွမ်းႁပ်ႉၼၼ်ႉ ႁူပ်ႉတေႃႇၼႃႈၸူးမၼ်းၶိုၼ်းလႄႈ။
ၶေႃႈၵႂၢမ်းဝႃႈ “ဢမ်ႇ” လၢတ်ႈငၢႆႈငၢႆႈလႄႈ ႁဝ်းၸႂ်ႉလႆႈၵူႈဝၼ်းယဝ်ႉ။
မိူဝ်ႈမီးၶေႃႈၵႂၢမ်းဢမ်ႇလီ မႃးတႅပ်းတတ်းၵၼ်ၼၼ်ႉ ဝႆႉဝႃႈၶဝ်ႈႁူးပူဢွၵ်ႇႁူးပႃၵူၺ်းၵေႃႈလႆႈယဝ်ႉ။
လွင်ႈဢၼ်လီၵူဝ်လိူဝ်ၵႂၢမ်းလၢတ်ႈၼၼ်ႉ ပဵၼ်ၵူၼ်ဢၼ်လႆႈၸႂ်ႁဵတ်းလွင်ႈဢမ်ႇႁၢၼ်ႉၸႂ်ၼႄ လူၺ်ႈသဵင်လင်သဵင်ၶႅင်သဵင်ႁႅင်းၸိူဝ်းၼႆႉ။
ႁဝ်းဢမ်ႇၸၢင်ႈႁဵတ်းႁႂ်ႈၽႂ်မႃးပွင်ႇၸႂ်ႁဝ်းလႆႈ လွင်ႈဢၼ်ႁဝ်းႁဵတ်းလႆႈၵေႃႈ သႂ်ႇၸႂ်တူဝ်ၸဝ်ႈၵဝ်ႇၵူၺ်း။
ပိၼ်ႇ- ငဝ်မွင်မိုတ်းမူဝ်း
