သင်ဝႃႈႁဝ်းပဵၼ်ၵူၼ်းလီ ၵူၼ်းဢမ်ႇလီၵေႃႈတေဢမ်ႇၶႂ်ႈၶဝ်ႈၸမ် ယွၼ်ႉဢုပ်ႇၵၼ်ဢမ်ႇႁူႉလွင်ႈ။
သင်ႁဝ်းပဵၼ်ၵူၼ်းဢမ်ႇလီ ၵူၼ်းလီၵေႃႈတေဢမ်ႇၶႂ်ႈယူႇၸမ် သင်ယူႇၸွမ်းၵူၼ်းဢမ်ႇလီ မၼ်းၵေႃႈတေၸၼ်ဢဝ်ၸၢတ်ႈပၢၼ်ၵႂႃႇၸူးတီႈတႅမ်ႇၵူၺ်း။
သင်ႁဝ်းပဵၼ်ၵူၼ်းၸိူင်ႉႁိုဝ်ၵေႃႈလႆႈ လီ ဢမ်ႇလီ ၸၢတ်ႈပၢၼ်ၵေႃႈ တေၸၼ်ဢဝ်ၵူၼ်းလီလႄႈၵူၼ်းဢမ်ႇလီၶဝ်ႈမႃး ပေႃးဝႃႈႁဝ်းၸၼ်ဢဝ်ႁႅင်းၽၢႆႇလႂ်ၼမ်ၵေႃႈ ၸၢတ်ႈပၢၼ်ႁဝ်းတေၸၼ်ဢဝ်ၵူၼ်းၸိူင်ႉၼၼ်ၶဝ်ႈမႃးၼမ်မွၵ်ႈၼၼ်ႉယဝ်ႉ။
ၵူၼ်းၵေႃႉဢၼ်ဝူၼ်ႉလီၼၼ်ႉ တေပဵၼ်ၵူၼ်းဢၼ်ယူႇငၢႆႈလူမ်ၸႂ် မီးလွင်ႈၵတ်းယဵၼ် ၸိုၼ်ႈတႃမိူဝ်ႈယူႇၸမ် ၵတ်းၸႂ်မိူဝ်ႈဢုပ်ႇၸူး။
ၵူၼ်းဢမ်ႇဝူၼ်ႉလီ ၸၢတ်ႈပၢၼ်မီးလွင်ႈမူဝ်းမွင် သုၵ်ႉသၵ်ႉ မႆႈမိူၼ်ၼင်ႇၾႆးၽဝ် မိူဝ်ႈယူႇၸမ် ႁပ်ႉႁူႉထိုင်လႆႈလွင်ႈဢမ်ႇလူမ်ၸႂ်တင်းတူဝ်လႄႈၸႂ်ၼၼ်ႉယဝ်ႉ။
လွင်ႈလီလီၼၼ်ႉ တိုၼ်းၸုင်ၸၼ်လွင်ႈလီလီၶဝ်ႈၸမ်၊ လွင်ႈဢမ်ႇလီၼၼ်ႉတိုၼ်းၸၼ်ႁႂ်ႈမီးလွင်ႈၽၢတ်ႇၽႄယဝ်ႉ။
ၵူၼ်းဢၼ်လွင်ႈယုမ်ႇယမ်ဢမ်ႇမိူၼ်ၵၼ် ယူႇၵၼ်လႆႈဢမ်ႇႁိုင်လေႃႇ ယွၼ်ႉၸဵင်ႇမုင်ႈႁၼ် တၢင်းဝူၼ်ႉႁဵတ်းဢမ်ႇၵႂႃႇလၢႆးလဵဝ်ၵၼ်လႆႈ။
ၵူၼ်းဢၼ်တၢင်းဝူၼ်ႉဢမ်ႇမိူၼ်ၵၼ် ယူႇႁူမ်ႈၵၼ်ႁိုင်ၵေႃႈ ဢုပ်ႇၵၼ်ဢမ်ႇႁူႉလွင်ႈယူႇယဝ်ႉ ယွၼ်ႉပၢႆးဝူၼ်ႉ လွင်ႈႁဵတ်းသၢင်ႈပႅၵ်ႇပိူင်ႈၵၼ်။
ၸၢမ်းထတ်းသၢင်တူၺ်းဝႃႈ ႁဝ်းပဵၼ်ၵူၼ်းၸိူင်ႉႁိုဝ် ႁႂ်ႈတူၺ်းတီႈၵူၼ်းႁိမ်းၸမ်ႁဝ်း ၶဝ်ယူႇလူမ်ၸႂ်ႁိုဝ် ယူႇယွၼ်ႉၶဝ်ယင်းမီးၽွၼ်းလီ ဢမ်ႇၼၼ် ယွၼ်ႉၸမ်ပဵၼ်တေလႆႈယူႇၵႂႃႇတၢင်းလႂ်ဢမ်ႇလႆႈ။
ထတ်းသၢင်တူၺ်းတူဝ်ၵဝ်ႇၽွင်ႈဝႃႈ ၵႂႃႇယူႇၸမ်ၽႂ်ၼႃႇၼၼ်ႉ ယွၼ်ႉႁဝ်းလူမ်ၸႂ်မိူဝ်ႈလႆႈယူႇၸမ်ႁႃႉ ယွၼ်ႉတတ်းၶဝ်ဢမ်ႇၶၢတ်ႇ ဢမ်ႇၼၼ် ႁႃတၢင်းဢွၵ်ႇၵႂႃႇတၢင်းလႂ်ဢမ်ႇလႆႈ။
ၸၢတ်ႈပၢၼ်ၼၼ်ႉတေလႆႈတူၺ်းလီလီယဝ်ႉ ႁဝ်းတေႁၼ်ဝႃႈ
မၢင်ၵေႃႉလီႁူႉၸၵ်းယူႇ ၵူၺ်းၵႃႈဢမ်ႇလီဝႆႉၸႂ်
မၢင်ၵေႃႉႁူႉၸၵ်းလႆႈ ၵူၺ်းၵႃႈၸမ်ၸႂ်ဢမ်ႇလႆႈ
မၢင်ၵေႃႉဢမ်ႇလီႁူႉၸၵ်းၵေႃႈ ထွႆႇႁၢင်ႇႁႂ်ႈလီလိူဝ်ပိူၼ်ႈ
ၵေႃႉဢၼ်ႁူႉၸၵ်းလႄႈဝႆႉၸႂ်လႆႈၼႆၵေႃႈ ႁႂ်ႈထိင်းသိမ်းဝႆႉ ယွၼ်ႉမၼ်းဢမ်ႇမီးၼမ်လေႃႇ ၵူၼ်းၵေႃႉဢၼ်ယူႇၸွမ်းၵၼ်လႆႈ ဢမ်ႇလႆႈဝူၼ်ႉႁၼ်ၽွၼ်းလီၶဝ်ႈမႃးၵဵဝ်ႇၶွင်ႈၸွမ်း။
ပိၼ်ႇ-ငဝ်မွင်မိုတ်းမူဝ်း
