ယၢမ်းၵၢင်ၼႂ်တွင်ႉၾႃႉၸိုၼ်ႈပၢင်ႇသႂ် လူမ်းထွင်းဝႂ်မႆႉတူင်ႉၶွၼ်းၼိုင် ႁဵတ်းႁႂ်ႈႁူဝ်ၸႂ်ပေႃးၸိုၼ်ႈပၢင်ႇ ၸၢႆးၶမ်းလႄႈယိင်းလၢဝ်ၵေႃႈ ပႆမႃးႁူင်းႁဵၼ်းၸွမ်းၵၼ်ယူႇ။ သွင်ၶႃပဵၼ်ၵေႃႉႁၵ်ႉၵၼ် ဢၼ်မေႃဢဝ်ၸႂ်သႂ်ႇ လုမ်းလႃးတူၺ်းထိုင်ၵၼ် လၢတ်ႈၵႂၢမ်းလီၶၢၼ်ၵႂၢမ်းဝၢၼ်ၸူးၵၼ်ၵူႈမိူဝ်ႈ ပဵၼ်ၵူႈဢၼ်ဢူၺ်းၵေႃႉၶဝ်လီၶွႆၼႃႇ ၊ ၸၢႆးၶမ်းၵေႃႈ ပေႃးမီးၶၢဝ်းယၢမ်းတေယူႇၸွမ်းၵေႃႉႁၵ်ႉမၼ်းတႃႇသေႇ ဢမ်ႇပေႃးၵႆႉယူႇၸွမ်းဢူၺ်းၵေႃႉမၼ်းၵႃႈႁိုဝ်။
မီးဝၼ်းၼိုင်ႈၵေႃႉႁၵ်ႉမၼ်းဢမ်ႇမႃးႁူင်းႁဵၼ်း မၼ်းၵေႃႈဢမ်ႇပေႃးမေႃယူႇမေႃသဝ်းၵႃႈႁိုဝ် တေၵႂႃႇလၢတ်ႈတေႃႇၽႂ် ဢုပ်ႇတေႃႇၽႂ်ၵေႃႈ သမ်ႉပေႃးလဵၼ်ႈၵဵမ်းၵၼ်ဝႆႉယူႇၵူႈၵေႃႉ။ ၸင်ႇၵႂႃႇငွၵ်ႈတူၺ်း ဢူၺ်းၵေႃႉမၼ်း ဢၼ်လဵၼ်ႈၵဵမ်းယူႇၼၼ်ႉလႄႈ ထၢမ်ၸူး။
“လီၵျေႃႇယူႇႁႃႉ”
“ပေႃးၶႂ်ႈႁူႉၵေႃႈ! လဵၼ်ႈတူၺ်းလႄႈ ပေႃးဢမ်ႇလဵၼ်ႈႁိုဝ်တေႁူႉ”
မၼ်းၵေႃႈ ၸင်ႇၸၢမ်းလဵၼ်ႈတူၺ်းသေယဝ်ႉ မိူဝ်ႈတႄႇတႄႉ ဢမ်ႇပႆႇမေႃသေ ၸႂ်ႉဢူၺ်းၵေႃႉမၼ်းသွၼ်လဵၼ်ႈယူႇ။ ယိုင်ႈလဵၼ်ႈယိုင်ႈၶႂ်ႈလဵၼ်ႈမႃး ပေႃးမေႃလဵၼ်ႈမႃးၵေႃႈ ယိုင်ႈၶႅၼ်းၶႂ်ႈလဵၼ်ႈတိၵ်းတိၵ်း။ ၽၢတ်ႇၽူင်းဢိတ်ႉၼိုင်ႈၵူၺ်းၵေႃႈဢမ်ႇလႆႈ ပေႃးမီးၶၢဝ်းယၢမ်းဢိတ်းဢွၼ်ႇၵူၺ်းၵေႃႈ ၵူဝ်ဢမ်ႇတၼ်းလႆႈလဵၼ်ႈယဝ်ႉ တႄႇဢဝ်ၼၼ်ႉမႃး လွင်ႈၵပ်းသိုပ်ႇတင်းၵေႃႉႁၵ်ႉမၼ်းၵေႃႈ ႁၢႆၵႂႃႇလွႆးလွႆးယဝ်ႉ။
မႃးႁူင်းႁဵၼ်းၵေႃႈ ဢမ်ႇယူႇၸွမ်းၵေႃႉႁၵ်ႉမၼ်းယဝ်ႉ ၵုမ်ႉမိုင်ႉယူႇၸွမ်းဢူၺ်းၵေႃႉမၼ်းသေ ဢုပ်ႇၵၼ်လွင်ႈၵဵမ်းၵူၺ်း သမ်ႉပေႃးဢမ်ႇတၼ်းတူၺ်းၼႃႈၵေႃႉႁၵ်ႉမၼ်းၼၼ်ႉလူးၵွၼ်ႇ။ မၢင်ပွၵ်ႈၵေႃႉႁၵ်ႉမၼ်း မႃးတၵ်ႉမႃးဢုပ်ႇၼႆၵေႃႈ ယုမ်ႉၸူးသေတွပ်ႇဝႃႈ
“လဵၼ်ႈၵဵမ်းၵမ်ႉၼိုင်ႈၼႃႈ”
ပႂ်ႉသမ်ႉပေႃးႁိုင်ၼႃႇယဝ်ႉၵေႃႈ ပႆႇယဝ်ႉႁေပွၵ်ႈ သမ်ႉပၢႆမႄးလၢတ်ႈထႅင်ႈ
“ပေႃးၶၢၼ်ႉပႂ်ႉၵေႃႈ လဵၼ်ႈၸွမ်းၵၼ်လႄႈ လီၵျေႃႇဢိူဝ်ႈ”
ၵေႃႉႁၵ်ႉမၼ်းၼၼ်ႉၵေႃႈ ႁိုဝ်ၸၢင်ႈလၢတ်ႈသင်လႆႈထႅင်ႈယဝ်ႉ လၢတ်ႈတေႃႇၸိူင်ႉႁိုဝ်ၵေႃႈ မိူၼ်ပဵၼ်ၵူၼ်းႁူၼူၵ်ႇၵူၺ်းၼႆသေ ၵႂႃႇပႅတ်ႈမၼ်းယူႇယဝ်ႉ။
မၼ်းပၼ်ၶၢဝ်းယၢမ်းလဵၼ်ႈၵဵမ်းၼမ်လိူဝ်သေ ပၼ်ၶၢဝ်းယၢမ်းၵေႃႉႁၵ်ႉမၼ်းၼၼ်ႉထႅင်ႈလူးၵွၼ်ႇ။ ႁိုင်ႁိုင်မႃး မၼ်းၸပ်းၸွမ်းၵဵမ်းမၼ်းၼၼ်ႉႁႅင်းၼႃႇယဝ်ႉ ထိုင်တီႈ သမ်ႉပေႃးဢမ်ႇသူၼ်ၸႂ်သင် လိူဝ်သေၵဵမ်း။
ၵႂႃႇႁူင်းႁဵၼ်းၵေႃႈ ပိူၼ်ႈသွၼ်သင်ၼႆ ဢမ်ႇၶဝ်ႈၸႂ် ပွၵ်ႈမိူဝ်းႁိူၼ်းၵေႃႈ ၵၢၼ်သင်ဢမ်ႇပဵၼ်ႁဵတ်း ပေႃႈမႄႈလႃႇၵေႃႈဢမ်ႇသူၼ်ၸႂ် မၢင်ပွၵ်ႈၶဝ်ႈသမ်ႉပေႃးလိုမ်းၵိၼ်ၵေႃႈမီး၊ ပေႃးလူဝ်ႇငိုၼ်းသမ်ႉယွၼ်းတိၵ်းတိၵ်း ၵႃႈဢမ်ႇလႆႈဢမ်ႇၸူး ပေႃးဢမ်ႇပၼ်သမ်ႉၸႂ်လမ် ပေႃႈမႄႈၵေႃႈ ဢမ်ႇၸၢင်ႈႁဵတ်းႁိုဝ် ၵႃႈလႆႈပၼ်မၼ်းၵႂႃႇယူႇ။ ၵူၼ်းႁိူၼ်းမၼ်းၵေႃႈ ႁၢမ်ႈသင်မၼ်းဢမ်ႇလႆႈမိူၼ်ၵၼ် ၼၼ်ႉယဝ်ႉ။
ယိင်းလၢဝ်ၵေႃႉႁၵ်ႉၸၢႆးၶမ်းၼၼ်ႉ သမ်ႉဝႃႈႁၵ်ႉမၼ်းယူႇလႄႈ ၶႂ်ႈလႆႈလွင်ႈသႂ်ႇၸႂ်သူၼ်ၸႂ်တီႈၸၢႆးၶမ်းၽွင်ႈၼႆၵေႃႈ မိူၼ်တေဢမ်ႇပဵၼ်ၵႂႃႇလႆႈယဝ်ႉ လွမ်လွမ်သဵင်ႈၸႂ်တေႃႇမၼ်းယူႇပဵၼ်ၵမ်း ၼင်ႇႁိုဝ်ၸၢႆးၶမ်းပေႃးတေလႅၵ်ႈလၢႆႈၸႂ်ၼၼ်ႉၵေႃႈ ၶတ်းၸႂ်မႃးယူႇတႃႇသေႇ။ မၢင်ပွၵ်ႈ ႁၼ်ၵၼ်ပေႃးတေၽႃႇၺႃးၵၼ်ယဝ်ႉ ၸၢႆးၶမ်းယင်းဢမ်ႇတၼ်းဝၢႆႇတူၺ်းလူးၵွၼ်ႇ။ မိူဝ်ႈၵိၼ်ၶဝ်ႈယူႇၵေႃႈ ၼင်ႈႁိမ်းၵၼ်သေတႃႉ ၵႂၢမ်းၶေႃႈၼိုင်ႈၵူၺ်း ၸၢႆးၶမ်းယင်းဢမ်ႇတၼ်းလၢတ်ႈၸူး။
ထိုင်မႃးထႅင်ႈဝၼ်းၼိုင်ႈ မိူဝ်ႈၸၢႆးၶမ်းၼင်ႈလဵၼ်ႈၵဵမ်းယူႇၼၼ်ႉ ယိင်းလၢဝ်ၵေႃႈ မႃးယူႇႁိမ်းမၼ်းသေ
“ၸၢႆး..ႁဝ်းမီးလွင်ႈၶႂ်ႈလၢတ်ႈ”
“ၵမ်ႉလႄႈ! ႁဝ်းတိုၵ်ႉလဵၼ်ႈၵဵမ်းယူႇ”
“ႁဝ်းၽႄတၢင်းၵၼ်လႃႈ!!..”
ယိင်းလၢဝ်လၢတ်ႈယဝ်ႉၵေႃႈ ၽၢတ်ႇယၢၼ်ဢွၵ်ႇႁၢင်ႇမၼ်းၵႂႃႇၵမ်းလဵဝ်ယူႇ။ ဝၢႆးသေလဵၼ်ႈၵဵမ်းယဝ်ႉ ၸၢႆးၶမ်းၵေႃႈ ဝၢႆႇတူၺ်းႁႃၵေႃႉႁၵ်ႉမၼ်း ဢၼ်ယူႇႁိမ်းၸမ်မၼ်းတႃႇသေႇၼၼ်ႉ ဢမ်ႇႁၼ်ယဝ်ႉသေ
“ႁိူဝ်ႇ! ၵႂႃႇလႂ်ယဝ်ႉလႃႇ!”
ဢမ်ႇပေႃးသူၼ်ၸႂ်ၵႃႈႁိုဝ်သေ ၶဝ်ႈၵဵမ်းၶိုၼ်းယူႇ မိူဝ်ႈၶဝ်ႈၵဵမ်းပႆႇႁိုင်သမ်ႉသုမ်းၵဵမ်းႁေယဝ်ႉ ၸင်ႇၵိုင်ႉၵၢင်ႉၶုၵ်းၸႂ်လႆႈ ၶေႃႈၵႂၢမ်းဢၼ်ယိင်းလၢဝ်လၢတ်ႈမိူဝ်ႈၵႆႈၼၼ်ႉမႃး မိူၼ်တေဢမ်ႇပေႃးၵႃႈႁိုဝ်သေ လၢတ်ႈယူႇႁင်းၵူၺ်း။
“ႁဝ်းၽႄတၢင်းၵၼ်လႃႈၼႆႁႃႉ! ၵေႃႈယဝ်ႉလႄႈ ဢမ်ႇမီးမၼ်းၵေႃႈ ၵဝ်မီးၵဵမ်းယူႇလူး”
ဝၢႆးသေၽႄတၢင်းၵၼ်တင်းၵေႃႉႁၵ်ႉမၼ်းယဝ်ႉ ၵႂႃႇႁူင်းႁဵၼ်းၵေႃႈ လႆႈၵႂႃႇၵေႃႉလဵဝ်၊ မိူဝ်းႁိူၼ်းၵေႃႈလႆႈမိူဝ်းၵေႃႉလဵဝ်၊ ၼႂ်းၸႂ်ၼၼ်ႉၵေႃႈ ၼင်ႇႁၢင်ႈသမ်ႉပေႃးငဝ်လူင်မႃးၵမ်းလဵဝ် ဢမ်ႇမီးၵေႃႉထူဝ်းတၢင်းပၼ် ဢွၼ်ၵႂႃႇၸွမ်းတၢင်းဢၼ်လွတ်ႈၽေးယဝ်ႉ၊ ၼင်ႈၵိၼ်ၶဝ်ႈၵေႃႉလဵဝ်ၵေႃႈ မိူၼ်ဢမ်ႇယၢမ်ႈလႄႈ သမ်ႉပေႃးပဝ်ႇႁူင်ႁူင်ဝႆႉယူႇ။ မိူဝ်ႈလဵၼ်ႈၵဵမ်းယူႇၼၼ်ႉၵေႃႈ ၼင်ႇႁၢင်ႈလွင်ႈၵျေႃႇမၼ်းသမ်ႉပေႃးႁၢႆလၢႆလူင်ၵႂႃႇယဝ်ႉ။
ယၢမ်းမိူဝ်ႈမိူဝ်းတီႈႁိူၼ်းၵေႃႈ ပေႃႈမႄႈသမ်ႉဢမ်ႇလၢတ်ႈတေႃႇထႅင်ႈႁေ မိူၼ်ၸၢတ်ႈပၢၼ်မၼ်းၼၼ်ႉမီးယူႇၼႂ်းၵဵမ်းၵူၺ်းယဝ်ႉ။ ၵူၼ်းႁိမ်းႁွမ်းၸမ်တူဝ်မၼ်းၵေႃႈ သမ်ႉပေႃးႁၢႆၵႂႃႇပႅတ်ႈမူတ်းယဝ်ႉလႄႈ ယူႇႁိမ်းၵၼ်ၵေႃႈ ၼင်ႇပဵၼ်ၵူၼ်းဢမ်ႇႁူႉၸၵ်းၵၼ်ၵႂႃႇယူႇ။
မီးပွၵ်ႈၼိုင်ႈ မၼ်းဢမ်ႇယူႇလီ ၼၢဝ်ႁႅင်းၼႃႇယဝ်ႉ ၵူၺ်းၵႃႈ ၸႂ်တႄႉတိုၵ်ႉတိတ်းၵဵမ်းယူႇ ၸင်ႇဢဝ်ၾူင်းဢွၵ်ႇမႃးလဵၼ်ႈ ထိုင်တီႈႁဵတ်းႁႂ်ႈ တႃသမ်ႉပေႃးလၢႆးမႃးလႄႈ ႁူဝ်ၵေႃႈၶႆႈမႃးသေ ၼိူဝ်ႉၵေႃႈမႆႈမႃး ပေႃႈမႄႈမၼ်းသမ်ႉပေႃးလႆႈဢဝ်ၵႂႃႇႁူင်းယႃယူႇယဝ်ႉ။ ၼႂ်းၶၢဝ်းတၢင်းယူႇႁူင်းယႃလၢႆဝၼ်းဝၼ်း တေႃႇပေႃးၶႅၼ်းၼၼ်ႉ မီးမႄႈၶဝ်ၸွႆႈလုမ်းလႃးတူၺ်းထိုင်မၼ်း လႄႈ ၽွင်းၼၼ်ႉ ယင်းဢမ်ႇလႆႈလဵၼ်ႈၵဵမ်းလူးၵွၼ်ႇ မၼ်းၵေႃႈၸင်ႇတေဝူၼ်ႉလႆႈဝႃႈ-
“ဢမ်ႇမီးၵဵမ်းတႄႉယူႇလႆႈယူႇလူး ပေႃးဢမ်ႇမီးမႄႈႁဝ်းတႄႉ ၵဝ်တေႁဵတ်းႁိုဝ်ယူႇၵေႃႈဢမ်ႇႁူႉယဝ်ႉ”
တေႇဢဝ်ၼၼ်ႉမႃး မၼ်းၵေႃႈၶိုၼ်းၶတ်းၸႂ် ၵပ်းသိုပ်ႇဢုပ်ႇၸူးၵူၼ်းၼႂ်းႁိူၼ်းမၼ်းလႄႈ ဝၢႆးသေယူႇလီယဝ်ႉၵေႃႈ ၵႂႃႇၶိုၼ်ႈႁူင်းႁဵၼ်းၶိုၼ်းသေ လႆႈႁူပ်ႉၵေႃႉႁၵ်ႉမၼ်း ယိင်းလၢဝ်သေတႃႉ ယိင်းလၢဝ်ၼၼ်ႉၵေႃႈဢမ်ႇလႆႈသူၼ်ၸႂ်မၼ်းသေဢိတ်းၼၼ်ႉယဝ်ႉ။ မၼ်းၵေႃႈၶတ်းၸႂ်ႁႂ်ႈလီၵၼ်ၶိုၼ်းၼႆယူႇ ၶတ်းၸႂ်ၶဝ်ႈႁႃ လမ်းၸွမ်းႁႂ်ႈပေႃးလႆႈယူႇၸွမ်းယိင်းလၢဝ် ဢမ်ႇဝႃႈမၼ်းတေလၢတ်ႈသင်ၵေႃႈ ၼင်ႇဝႃႈယိင်းလၢဝ်ၼၼ်ႉတႄႉ ဢမ်ႇလႆႈထွမ်ႇမၼ်းလၢတ်ႈသေဢိတ်း။ မိူဝ်ႈဢၼ်မၼ်းလႅၼ်ႈလမ်း ဢွၼ်ႈဝွၼ်းယိင်းလၢဝ်ယူႇၼၼ်ႉ
“လၢဝ်! ႁဝ်းမႃးလီၵၼ်ၶိုၼ်းလႃႈ”
ယိင်းလၢဝ်ဢၼ်ယိပ်းၾူင်းသေ ဢမ်ႇတူၺ်းၼႃႈမၼ်းၼၼ်ႉၵေႃႈ ၶိုၼ်းလၢတ်ႈၸူးၶိုၼ်းၵႂႃႇ
“ၸူမ်းယဝ်ႉၼႃႈ! သူသွၼ်ႁႂ်ႈႁဝ်းမေႃလဵၼ်ႈၵဵမ်း”
သမ်ႉပေႃးဢဝ်မၼ်းၵိုတ်းၵႂႃႇသေ တူၺ်းၸွမ်းလင်ယိင်းလၢဝ် ဢၼ်ႁၢင်ႇမၼ်းၵႂႃႇပႅတ်ႈလွႆးလွႆးၼၼ်ႉ ယူႇယဝ်ႉ။
ဢမ်ႇမီးၽႂ်ၸွမ်းၸႂ်ႁဝ်းလႆႈတႃႇသေႇ ယူႇၸွမ်းႁဝ်းလႆႈၵူႈမိူဝ်ႈ ႁႂ်ႈမိူၼ်ၼင်ႇၵၢင်ၸႂ်ႁဝ်းၼၼ်ႉဢမ်ႇလႆႈ ၵူႈလွင်ႈမေႃလႅၵ်ႈလၢႆႈလႆႈယူႇယဝ်ႉ။
မိူဝ်ႈမီးၼၼ်ႉတေဢမ်ႇႁၼ်ၵႃႈၶၼ်မၼ်း ၵူၺ်းၵႃႈ မိူဝ်ႈမၼ်းၽၢတ်ႇႁဝ်းၵႂႃႇယဝ်ႉၼၼ်ႉ သမ်ႉဝႃႈသေလၢႆတၢၼ်ႇႁိုဝ်ၵေႃႈ မၼ်းဢမ်ႇၸၢင်ႈမႃးႁႃႁဝ်းၶိုၼ်းလႆႈ။
သုတ်းယဝ်ႉ
ပၢႆၵမ်−ငဝ်မွင်မိုတ်းမူဝ်း
တႅမ်ႈမိူဝ်ႈ − 2019
ၼပ်ႉယမ်ထိုင်ၽူႈလူလိၵ်ႈႁဝ်းၶဝ်ၵူႈၵေႃႉယူႇဢေႃႈ။
