ႁိုင်ၵႂႃႇပဵၼ်လိူၼ်လႄႈ ယူႇယူႇ ၸၢမ်ၽွင်း လၢတ်ႈတေႃႇမႃး။
“သူ..”
ၼႆၶေႃႈလဵဝ်ၵူၺ်းၵေႃႈ ငဝ်းလိူၼ်ၼၼ်ႉတႄႉ ၸႂ်ပေႃးၵီႈၼႃႈယဝ်ႉဢိူဝ်ႈ။
“မီးၸိူင်ႉႁိုဝ်ၶႃႈ ႁဝ်းယူဝ်ဝႃႈ သူတေဢမ်ႇဢၢၼ်းတွပ်ႇႁဝ်းယဝ်ႉ”
“ဢွၵ်ႇတၢင်းသေၵၢၼ်သုၵ်ႉၼႃႇဢိူဝ်ႈ”
“ယူဝ်ဝႃႈ သူဢမ်ႇၶႂ်ႈလၢတ်ႈတေႃႇႁဝ်းယဝ်ႉၼႆၼႃး”
“ၼၼ်ႉၵေႃႈပႃး”
“ၸႂ်ႁၢႆႉ ႁၢႆၵႂႃႇႁေလႃႈပေႃးၼၼ်”
“တေႉႁႃႉ”
ငဝ်းလိူၼ်ယဵၼ်ၵႂႃႇဢိတ်ႉၼိုင်ႈသေ “ပေႃးတေလၢတ်ႈပေႉတၢၼ်ႇၼၼ်ႉၵေႃႈ ၸၢင်ႈတေမႃးၶိုၼ်းႁဵတ်းသင်”
“မႃးပၼ်ၶေႃႈတွပ်ႇ ဢၼ်သူထၢမ်မိူဝ်ႈၼၼ်ႉ ႁႂ်ႈမၼ်းယဝ်ႉယဝ်ႉသေ ဢမ်ႇၶႂ်ႈႁႂ်ႈမၼ်းၶင်ႉဝႆႉယူႇၸိူင်ႉၼၼ်”
“လၢတ်ႈမႃးလႄႈ ႁဝ်းပႂ်ႉယူႇ”
“လႆႈယူႇတေႉႁႃႉ ဢမ်ႇၸႂ်ႈဝႃႈတေလႆႈယဵၼ်ႉသေထွမ်ႇၸိူင်ႉၼၼ်ၼႃ”
“လႆႈငိၼ်းသဵင်သူၵူၺ်းၵေႃႈ လႆႈယဝ်ႉ”
“ႁဝ်းၵေႃႈ ၵိူတ်ႇမႃးၼႂ်းသိုၵ်း ပိုင်ႈဢိင်သိုၵ်းမႃးၸဵမ်လဵၵ်ႉ တေႃႇပေႃးၵေႃႉယႂ်ႇ။ ႁဝ်းယူႇၸွမ်းမၼ်းမႃး ပေႃႈမႄႈႁဝ်းလဵင်ႉယႂ်ႇသေတႃႉ ယွၼ်ႉမီးသိုၵ်းလႄႈ ႁဝ်းၵေႃႈလႆႈႁဵၼ်းပၺ်ႇၺႃႇ လႆႈသွၼ်လိၵ်ႈႁူႉၵႂၢမ်း။ မိူဝ်ႈၵူႈပွၵ်ႈတႄႉ ႁဝ်းၵေႃႈဝႃႈ ႁဝ်းဢမ်ႇၶႂ်ႈႁဵတ်းၼင်ႇၵွၼ်ႇဢိူဝ်ႈ ပေႃးမႃးဝူၼ်ႉတူၺ်းလီလီယဝ်ႉ ႁဝ်းယိၼ်းၸူမ်းမၼ်းဢိူဝ်ႈၼႃ ”
“ယွၼ်ႉသင်လႄႈ သူသမ်ႉဝူၼ်ႉၸိူင်ႉၼၼ်လႃႇ မၼ်းလႅၵ်ႈလၢႆႈမႃးၸိူင်ႉႁိုဝ်”
“ႁဝ်းၵေႃႈ ႁဵတ်းၵၢၼ်ၽၢႆႇၶၢဝ်ႇ တေႁူႉတေႁၼ်ၶၢဝ်ႇလၢႆလၢႆမဵဝ်းၼႃႇၼေႃႈ မိူဝ်ႈႁၼ် ၶၢဝ်ႇပၢင်တိုၵ်း ႁၼ်ၵူၼ်းမိူင်းလႆႈပၢႆႈသိုၵ်း၊ တီႈၼိုင်ႈယဝ်ႉတီႈၼိုင်ႈၼၼ်ႉ ႁဝ်းၶိုၼ်းမႃးတူၺ်း ၽဝႁဝ်း လႆႈဝႃႈၵၢမ်ႇလီယူႇဢိူဝ်ႈ ဢမ်ႇလႆႈပၢႆႈပၢင်တိုၵ်း၊ ဢမ်ႇလႆႈပၢႆႈၽူႈၶဵၼ်၊ တွၼ်ႈတႃႇႁဝ်း တီႈၼႂ်းၸုမ်းၼႆႉ ပဵၼ်တီႈဢၼ်မီးလွင်ႈႁူမ်ႇလူမ်ႈ လိူဝ်သေ တီႈဢၼ်ႁဝ်းယၢမ်ႈယူႇမႃးယဝ်ႉ”
ငဝ်းလိူၼ်ၵေႃႈ တင်ႈၸႂ်ထွမ်ႇတေႉထွမ်ႇဝႃႈယူႇ
“ႁဝ်းဢမ်ႇလႆႈၵူဝ်ဝႃႈ တေမီးၽႂ်မႃးႁဵတ်းႁင်ႁဝ်းယူႇႁိုဝ် ယွၼ်ႉပိူဝ်ႈ တီႈႁဝ်းယူႇၼၼ်ႉ မီးႁူမ်ႇလူမ်ႈပၼ်ႁဝ်းယူႇ၊ မၼ်းဢုၼ်ႇၸႂ်တေႉဢိူဝ်ႈ”
“သူယၢမ်ႈလၢတ်ႈဝႃႈ ဢမ်ႇၶႂ်ႈႁဵတ်းသိုၵ်းၼႆ ပဵၼ်ၵွပ်ႈသင်လႃႇ”
“ၼၼ်ႁႃႉ..ယွၼ်ႉပိူဝ်ႈၽဝႁဝ်း မၼ်းဢမ်ႇလႆႈလီသင်လႄႈ မၼ်းဢမ်ႇမီးသင်ၼၼ်ႉၼႃႇ၊ ပဵၼ်ၵူၼ်းသိုၵ်းၼၼ်ႉ မၼ်းဢမ်ႇလွတ်ႈလႅဝ်း ႁဝ်းႁၼ်ဢူႈႁဝ်းယဝ်ႉ ႁဝ်းဢိမ်ႇဢိူဝ်ႈ”
“ဢီႈသင်သေ ႁဵတ်းႁႂ်ႈသူလႅၵ်ႈလၢႆႈမႃးလႆႈတၢၼ်ႇၼၢႆႉ”
“ႁဝ်းၵေႃႈဢမ်ႇယၢမ်ႈဝူၼ်ႉဝႃႈ ႁဝ်းတေႁဵတ်းမႃးလႆႈထိုင်တၢၼ်ႇၼႆႉၼႃ၊ ယွၼ်ႉပိူဝ်ႈ ႁဝ်းယူႇၸွမ်းတူင်ႇဝူင်းၼႆႉမႃးလႄႈ မိူဝ်ႈဝႃႈ ဢမ်ႇၶႂ်ႈသိုပ်ႇၶိုၼ်ႈႁဵၼ်းယဝ်ႉ တေႉတေႉႁဝ်းသမ်ႉၶႂ်ႈႁဵတ်းသင်လႃႇ၊ ဢၼ်ႁဝ်းၶႂ်ႈႁဵတ်းၼၼ်ႉသမ်ႉ ၸၢင်ႈႁဵတ်းလႆႈယူႇႁႃႉ၊ ယိူင်းဢၢၼ်းႁဝ်းၼၼ်ႉ ပဵၼ်သင်တေႉတေႉလႃႇ ဢမ်ႇမီးသင်တေႉဢိူဝ်ႈ ၼႂ်းတူင်ႇဝူင်းဢၼ်ႁဝ်းႁၼ် ၵၢၼ်ဢၼ်မီးယူႇၼႆႉၵေႃႈ မၼ်းၵပ်ႉၵႅပ်ႈၼႃႇလူး။ ယွၼ်ႉပိူဝ်ႈ မီးပိူင်ဝႃႈ ႁႂ်ႈၸွႆႈၵၢၼ်ၶိုၼ်းၼႆၼၼ်ႉလႄႈ တၢင်းလိူၵ်ႈမၼ်းၵေႃႈ ႁဵတ်းမေႃသွၼ်၊ မေႃယႃ၊ ၽူႈမၢႆ ၼၼ်ႉၵူၺ်း ပေႃးႁဵတ်းမေႃသွၼ်ၼႆႉတေလႆႈငိုၼ်းလီလိူဝ်ပိူၼ်ႈယဝ်ႉ ၵူၺ်းၵႃႈႁဝ်းၵေႃႈဢမ်ႇၶႂ်ႈႁဵတ်း။ ၵမ်ႈၼမ်တႄႉ ပိူၼ်ႈတေႁဵတ်းၸိူဝ်းၼႆႉယဝ်ႉ တေပဵၼ်ယွၼ်ႉႁဝ်းသပ်းၽိတ်းပိူၼ်ႈဝႆႉႁိုဝ် ႁဝ်းၵေႃႈ လိူၵ်ႈမႃးတီႈၽၢႆႇၵၢၼ်ၶၢဝ်ႇၼႆႉ မၼ်းပဵၼ်တၢင်းလိူၵ်ႈ တီႈဢၼ်ႁဝ်းဝူၼ်ႉဝႃႈ မၼ်းလီလိူဝ်ပိူၼ်ႈယဝ်ႉ တွၼ်ႈတႃႇႁဝ်းယၢမ်းၼၼ်ႉ”
“မီးလွင်ႈတၢင်းၸိူင်ႉႁိုဝ်သေလႄႈ လႆႈလိူၵ်ႈလႃႇ”
“မိူဝ်ႈႁဝ်းတေသုတ်းၸၼ်ႉသုင် ႁဝ်းၵေႃႈလႆႈမႃးၽိုၵ်းၵၢၼ်သေ မၼ်းလႆႈႁဵတ်းလၢၵ်ႇလၢႆယူဝ်ႉ လီသူၼ်ၸႂ်ဝႆႉလႄႈ ႁဝ်းၵေႃႈၵျိူၵ်ႈ ထႆႇႁၢင်ႈထႆႇငဝ်းၸိူဝ်းၼႆႉၽွင်ႈႁေၵေႃႈ မႃးတၢင်းၼႆႉၼၼ်ႉၼႃႇ”
“ယူႇယဝ်ႉသမ်ႉပဵၼ်ၸိူင်ႉႁိုဝ်မႃးလႃႇ ၸွင်ႇမိူၼ်ၼင်ႇဢၼ်ဝူၼ်ႉဝႆႉၼၼ်ႉၼႄႇ”
“လၢတ်ႈလႆႈဝႃႈဢမ်ႇႁၢင်ႈႁၢႆႉၼင်ႇၵဝ်ႇၼႃ”
“ၸိူင်ႉႁိုဝ်လႃႇ”
“တေဝႃႈ ႁဝ်းဢမ်ႇလႆႈယူႇမိူၼ်ၼင်ႇသိုၵ်းၵေႃႈပဵၼ်လႆႈယူဝ်ႉ”
“ယွၼ်ႉသင်လႄႈဝႃႈၼၼ်”
“ဝၢႆးသေႁဵတ်းၵၢၼ်ဢမ်ႇႁိုင် ႁဝ်းၵေႃႈလႆႈၶၢႆႉၵၢၼ် ၵႂႃႇတီႈၼႂ်းဝဵင်းလူင်ၼၼ်ႉၼႃႇ ဢွၼ်တၢင်းသုတ်းၵေႃႈ ဢမ်ႇလႆႈၼုင်ႈၶူဝ်းသိုၵ်း၊ ႁဵတ်းၵၢၼ်ၵေႃႈလွတ်ႈလႅဝ်း။ ယဝ်ႉၵေႃႈ မီးတိုဝ်ႉတၢင်း လႆႈလဵပ်ႈႁဵၼ်း ဢၼ်ႁဝ်းၶႂ်ႈႁဵၼ်းထႅင်ႈ။ မိူၼ်လႆႈယူႇၼႂ်းတူင်ႇဝူင်းထႅင်ႈဢၼ်ၼိုင်ႈ ႁဵတ်းႁႂ်ႈႁဝ်းလိုမ်းတူဝ်ပဵၼ်ၵမ်းဢိူဝ်ႈ ဝႃႈႁဝ်းၼၼ်ႉပဵၼ်သိုၵ်း။ ၵူၺ်းၵႃႈ ႁဝ်းၵေႃႈလႆႈၸႂ်ယူႇၸိူင်ႉၼႆလႄႈ ဢမ်ႇဝူၼ်ႉဝႃႈၸဝ်ႈၵဝ်ႇၼၼ်ႉ ပဵၼ်သိုၵ်းၵႂႃႇယဝ်ႉ”
“ၸွင်ႇသူသမ်ႉၵျိူၵ်ႈမၼ်းယူႇႁိုဝ်”
“ၵျိူၵ်ႈသင်လႃႇ ၵၢၼ်ႁႃႉ လွင်ႈလႆႈယူႇၸိူင်ႉၼႆႁႃႉ”
“တင်းသွင်လွင်ႈ”
“မၼ်းၵေႃႈ ဢမ်ႇႁၢင်ႈႁၢႆႉၼႆၵူၺ်း ႁဝ်းဝႃႈႁဝ်းၵၢမ်ႇလီဢိူဝ်ႈၼႃ ႁဝ်းလႆႈထူပ်းၽူႈဢွၼ်ႁူဝ်လီ ႁဝ်းလႆႈႁူႉဝႃႈ ဢွင်ႈတီႈလီလီၸိူင်ႉၼႆၵေႃႈမီးယူႇလူး။ ၵူႈပွၵ်ႈ ႁဝ်းၵူၺ်းတူၺ်းႁၼ်ဢၼ်ဢမ်ႇလီမၼ်းၵူၺ်းလႄႈ ႁဵတ်းႁႂ်ႈႁဝ်း ပဵၼ်ၸႂ်ဝူၼ်ႉၽၢႆႇလွင်ႈဢမ်ႇလီမႃး။ မိူၼ်ႁဝ်းတေၵေႃႉယႂ်ႇၸွမ်းမၼ်းၵေႃႈဝႃႈယဝ်ႉ”
“ၸိူင်ႉႁိုဝ်”
“မိူဝ်ႈႁဝ်းတႄႇမႃး ၵၢၼ်သင်ၵေႃႈဢမ်ႇမေႃ လႆႈတႄႇၽိုၵ်းၵႂႃႇႁဵတ်းၵႂႃႇတိၵ်းတိၵ်း လူၺ်ႈတီႈ မီးၶူးသွၼ်ပဵၼ်ႁူဝ်ၼႃႈ ပီႈဢၢႆႈပီႈၼၢင်း ၵူၼ်းႁဵတ်းၵၢၼ်ႁူမ်ႈၵၼ် သေႁဵတ်းၵႂႃႇ ႁဵတ်းလိပ်းႁဵတ်းလႅင်ၵေႃႈဝႃႈယူႇၼႃ။ ႁဝ်းဢမ်ႇၵျိူၵ်ႈတႅမ်ႈၶၢဝ်ႇ ၵူၺ်းၵႃႈ ၶဝ်ႁႂ်ႈႁဝ်းတႅမ်ႈၶၢဝ်ႇ သမ်ႉဝႃႈဢမ်ႇၵျိူၵ်ႈသေတႃႉၵေႃႈ ၵႃႈလႆႈတႅမ်ႈဢိူဝ်ႈ မေႃဢမ်ႇမေႃၵေႃႈ လႆႈႁဵတ်းယဝ်ႉ။ မၢင်ပွၵ်ႈဝူၼ်ႉၼမ်ႁူဝ်ပေႃးၶိုၼ်ႈယိုၵ်ႈယိုၵ်ႈၼၼ်ႉယိုင်။ ၼိုင်ႈဝၼ်းဢမ်ႇပဵၼ် သွင်ဝၼ်းၶႅၼ်းမႃး သၢမ်ဝၼ်းတေႃႉတႄႉလႆႈ သီႇဝၼ်းၵေႃႈၽၢႆးၵႂႃႇ ႁႃႈဝၼ်းႁူၵ်းဝၼ်းၵေႃႈလိုၼ်ႈမႃးသေ လႆႈႁဵတ်းတေႃႇထိုင်မိူဝ်ႈလဵဝ်ၼႆႉၼႃႇ”
“သူလၢတ်ႈဝႃႈ သူသူၼ်ၸႂ်ၵၢၼ်ထႆႇႁၢင်ႈၸိူဝ်းၼႆႉဢမ်ႇၸႂ်ႈႁႃႉ”
“ဢိုမ်ႈ ယွၼ်ႉပိူဝ်ႈသူၼ်ၸႂ်သေလႄႈ မီးတိုဝ်ႉတၢင်းမီးၶၢဝ်းယၢမ်းၵေႃႈ လႆႈၽိုၵ်း လႆႈလဵပ်ႈႁဵၼ်းသေၵေႃႈ ႁဵတ်းၵႂႃႇ။ ႁၼ်ပိူၼ်ႈႁဵတ်း ၶႂ်ႈႁဵတ်းၵေႃႈႁဵတ်းတူၺ်း ၸၢမ်းတူၺ်းသေၵေႃႈ မေႃမႃးပဵၼ်မႃးယူႇၼင်ႇၵွၼ်ႇဢိူဝ်ႈ။ မၼ်းလီ တီႈမီးၶိူင်ႈၵမ်ႉၵႅမ်ပၼ်ႁဝ်း လႆႈၸႂ်ႉလႆႈၽိုၵ်းၼၼ်ႉၼႃႇ သႂ်ႇၵႂႃႇသႂ်ႇမႃးၵေႃႈ ပေႃးလူဝ်ႇထႆႇၶႅပ်းႁၢင်ႈၵေႃႈပႃးႁဝ်းယဝ်ႉ”
“ႁၼ်သူလႅပ်ႈတတ်းတေႃႇႁေဢမ်ႇၸႂ်ႈႁႃႉ”
“ဢိုမ်ႈ သူၼ်ၸႂ်မၼ်းၼင်ႇၵဝ်ႇယဝ်ႈ”
“ႁဝ်းဝႃႈ ၵူၼ်းၸိူင်ႉၼင်ႇသူၼႆႉ ၶႂ်ႈႁႂ်ႈမၼ်းမီးၼမ်ၼမ်ယဝ်ႉဝႃႈ”
“ႁိူဝ်ႉၼႃႇ မေႃဢၼ်လႂ်ဢမ်ႇပဵၼ်ဢၼ်လႂ်ၸိူင်ႉၼၼ် မိူၼ်ပိူၼ်ႈဝႃႈ ၵူၼ်းပဵတ်းၼၼ်ႉၼႃႇ”
“ႁိူဝ်ႉယူႇၼႃ ၵူၺ်းၵႃႈ ႁဝ်းၵေႃႈယုၵ်ႉယွင်ႈၼမ်ႉၸႂ်သူတေႉဢိူဝ်ႈ သူၵေႃႈပဵၼ်ၵူၼ်းလေႃးၽဝႆႉယူႇၵဝ်ၼႆႉ”
“လေႃးၽသင်လႃႇ ၽၢၼ်လိူဝ်ႁဝ်းၼႆႉတေမီးၽႂ်ထႅင်ႈ”
“လေႃးၽပိင်ႇၺႃႇဢိူဝ်ႈ မေႃဢဝ်တိုဝ်ႉတၢင်း ႁဵတ်းၵူႈဢၼ်လဵပ်ႈႁဵၼ်းၵူႈလွင်ႈ သမ်ႉဝႃႈဢမ်ႇမေႃၵေႃႈ ၽိုၵ်းႁႂ်ႈမၼ်းပဵၼ် ၵူၼ်းၸိူင်ႉၼင်ႇသူၼႆႉ ယူႇတီႈလႂ်ၵေႃႈ ႁဵတ်းၵၢၼ်သင်ၵေႃႈလႆႈယဝ်ႉ”
“ဢိူဝ်ႈ ပေႃးမႃးဝူၼ်ႉတူၺ်းယဝ်ႉ ႁဵတ်းၶႃႈပိူၼ်ႈၼႆႉ ႁဝ်းဢမ်ႇၶႂ်ႈႁဵတ်းၼႃ ယႃႇႁႂ်ႈပဵၼ်ၵၢၼ် ဢၼ်ႁႂ်ႈႁဝ်း လႆႈၵႂႃႇၵူမ်ႈၵွမ်းယွမ်းပိူၼ်ႈၵေႃႈလႆႈယဝ်ႉဝႃႈ ပေႃးပဵၼ်ၼၼ်ႉတႄႉ ႁဝ်းပၢႆႈၵမ်းလဵဝ်”
“ဢေႃႈၶႃႈ ၸဝ်ႈႁဝ်း”
“ပိူၼ်ႈယွင်ႈႁဝ်းၵေႃႈဢမ်ႇၵျိူၵ်ႈၵူၺ်ႉ”
“သမ်ႉတေလႆႈဝႃႈႁိုဝ်လႃႇ ၵေႃႉႁၵ်ႉၼႆႁႃႉတေႃႈ”
“လိူဝ်ၼႃႇယဝ်ႉၼႃႈ”
“လိူဝ်ဢၼ်လႂ်ၼၼ်ႉ မၢၼ်ႇမၢၼ်ႇၵူၺ်း”
“ၶၢၼ်ႉလၢတ်ႈတေႃႇသူယဝ်ႉ”
“ပေႃးဢမ်ႇလၢတ်ႈတေႃႇႁဝ်း သမ်ႉမီးၵူၼ်းလၢတ်ႈတေႃႇယူႇႁႃႉ”
“ဢမ်ႇမီး”
“ၼၼ်ႉၵူၺ်း..လၢတ်ႈတေႃႇတိၵ်းတိၵ်းလႄႈ ႁဝ်းဢမ်ႇၵဵပ်းၵႃႈၵဵပ်းၶွၼ်ႇမၼ်းၼႃ”
“သူလၵ်ႉၵဵပ်းမၼ်းယူႇလႃႈ”
“ၸၢင်ႈၵဵပ်းႁင်”
“လၵ်ႉဢဝ်ၸႂ်ႁဝ်းၵႂႃႇတိၵ်းတိၵ်းႁိုဝ်”
သမ်ႉပေႃးဢဝ်ငဝ်းလိူၼ် ယုမ်ႉဢၢႆဢၢႆဢွၵ်ႇမႃး ပေႃးဢဝ်မၼ်းဢမ်ႇၸၢင်ႈလၢတ်ႈသင်လႆႈယဝ်ႉ။
“ၼၼ်ႁႃႉ”
“ဢိုမ်ႈ..”
“ႁဝ်းဢမ်ႇတၼ်းႁူႉၵွၼ်ႇၼႆႉ ဝႃႈသူတၼ်းဢဝ်ၸႂ်ၸွမ်းၼဵပ်းမႃးပႃးၼႆ”
ၸၢမ်ၽွင်းၼၼ်ႉတႄႉ ယုမ်ႉယုမ်ႉယူႇၵူၺ်း။
“တူၵ်းၶိုင်ႈယဝ်ႉႁႃႉ သူလၵ်ႉပၼ်ၸႂ်ႁဝ်းၼၼ်ႉ”
“ၸမ်မူတ်းယဝ်ႉ”
“ၼေႈသူ ယႃႇလၢတ်ႈဢဝ်ႁႂ်ႈၸႂ်ၶူမ်း ႁႂ်ႈလူမ်းမၼ်းပေႇၵူၺ်းလႄႈၼႃႈ”
“တေႉဢိူဝ်ႈ”
“ႁဝ်းဢမ်ႇႁူႉတေႁဵတ်းႁိုဝ်လၢတ်ႈယဝ်ႉဝႃႈ”
“ၵဝ်းပိူၼ်ႈၼႆႉၶႅၼ်ႇၼႃႇဢမ်ႇၸႂ်ႈႁိုဝ်လႃႇ”
“ၵဝ်းတႄႉၸႂ်ႈၵႃႈ ႁဝ်းဢမ်ႇၶႂ်ႈၵဝ်းယဝ်ႉလူး ၶႂ်ႈဢဝ်တေႉယဝ်ႉၼႃႇတေႁဵတ်းႁိုဝ်”
“ပေႃးပေႉၸႂ်ၸွမ်းၸၢတ်ႈပၢၼ်ႁဝ်းယူႇၵေႃႈ ၸၢင်ႈပဵၼ်သင်”
“တေႉႁႃႉ”
“ယူႇတီႈသူဝူၼ်ႉၵူၺ်းၼၼ်ႉတႄႉ”
“ပွၵ်ႈၼႃႈ မိူဝ်းလႄႇႁိူၼ်း တေလႆႈႁွင်ႉလုင်းႁဝ်းဝႃႈ ပေႃႈယဝ်ႉၼႆ”
“တေဢၢၼ်းပႂ်ႉႁႂ်ႈမိူဝ်းလႄႇၵွၼ်ႇႁႃႉ ယူဝ်ဝႃႈတေမႃးထၢမ်ၵမ်းလဵဝ်ၼႃး”
ငဝ်းလိူၼ်ၵိုင်ႉၵၢင်ႉမိုင်ၸွမ်းၵႂၢမ်းၶေႃႈၼၼ်ႉယဝ်ႉ ၶိုၼ်းဝူၼ်ႉၵႂႃႇၸွမ်းထႅင်ႈ တင်းႁိုင်။
“ဝူၼ်ႉယၢပ်ႇပဵၼ်တၢၼ်ႇၼၼ်ႉတႄႉ ဝႆႉဝႃႈႁဝ်းယဝ်ႉလဵၼ်ႈၵူၺ်းလႄႈ”
“ဢမ်ႇလႆႈ ႁဝ်းတိုၵ်ႉၵဵပ်းၶေႃႈၵႂၢမ်းၼႆႉသိမ်းဝႆႉၶႅမ်ႉၶႅမ်ႉယူႇ သူလၢတ်ႈတေႉၸွင်ႇၸႂ်ႈ”
“ဢိုမ်ႈ”
“တေႉႁႃႉ”
“တေႁႂ်ႈလႅၵ်ႈလၢႆႈၸႂ် မိူဝ်ႈလဵဝ်ၵေႃႈလႆႈယူႇၼႃႇ”
“ဢမ်ႇ လၢတ်ႈယဝ်ႉပိူၼ်ႈဢမ်ႇၶိုၼ် သူႁဵတ်းႁႂ်ႈႁဝ်းၼွၼ်းဢမ်ႇလပ်းတေႉဢိူဝ်ႈၶိုၼ်းၼႆႉ”
“ပဵၼ်သင်”
“ႁဵတ်းႁႂ်ႈႁဝ်းဝူၼ်ႉႁၼ် ၼႃႈလုၵ်ႈၼႃႈလၢၼ် တေယူႇၸွမ်းၵၼ်ၵႂႃႇတေႃႈၸူဝ်ႈၼၼ်ႉယဝ်ႈ”
“ဝူၼ်ႉဝႆႉလႄႈ ႁဝ်းတႄႉတေၼွၼ်းၵွၼ်ႇယဝ်ႉ”
“ဢေႃႈၶႃႈ ၾၼ်လီၼႃႈ”
ၸၢမ်ၽွင်းပေႃးတဵၵ်းဝၢင်းၵႂႃႇပႅတ်ႈမၼ်းယဝ်ႉ။
ယၢမ်းၵၢင်ၼႂ် ၽွင်းၵႆႇၶၼ်ယူႇၼၼ်ႉ ၸၢမ်ၽွင်းၵေႃႈ လႆႈႁၼ်ဢူႈၶဝ် လုၵ်ႉမႃးႁုင်ၶဝ်ႈမိုဝ်ႉၽၵ်းယူႇၼႂ်းသွင်ႇၾႆးၼၼ်ႉလႄႈ မၼ်းလုၵ်ႉၸွမ်းယဝ်ႉ။ သွင်ၵေႃႉပေႃႈလုၵ်ႈႁဵတ်းၸွႆႈၵၼ်ယူႇတိတိတေႃႉတေႃႉ။
“ဢူႈ..ၸူမ်းယဝ်ႉၼႃႈ”
“ၸူမ်းသင်လႃႇ”
“ႁဵတ်းႁႂ်ႈယိင်းလႆႈႁူႉဝႃႈ ယိင်းထုၵ်ႇလီႁဵတ်းၵၢၼ်ၸိူင်ႉႁိုဝ်”
“ၸိူင်ႉႁိုဝ်..”
“ႁဵတ်းၵႂႃႇၸိူင်ႉၼႆႁေ ယူႇၸွမ်းဢူႈႁဝ်းၶဝ်ၵႂႃႇၸိူင်ႉၼႆတိၵ်းတိၵ်းၼၼ်ႉၼႃႇ”
“ၸိုင်ဝႃႈဢမ်ႇၶႂ်ႈႁဵတ်းယဝ်ႉၼႆဢမ်ႇၸႂ်ႈႁႃႉ”
“သင်လိူၵ်ႈလႆႈတႄႉ တေလိူၵ်ႈၸၢတ်ႈၵိူတ်ႇၵူၺ်းယဝ်ႉ၊ ယိၼ်းၸူမ်း ဢၼ်လႆႈမႃးၵိူတ်ႇပဵၼ်လုၵ်ႈဢူႈတင်းမႄႈလႄႈ တေယူႇၵႂႃႇၸွမ်းဢူႈတင်းမႄႈ ၸိူင်ႉၼႆၵူၺ်းယဝ်ႉဝႃႈ”
သမ်ႉဝႃႈဢမ်ႇလႆႈလၢတ်ႈဢွၵ်ႇမႃးသိုဝ်ႈသိုဝ်ႈၵေႃႈ ၼႂ်းၸႂ်လိုၵ်ႉလိုၵ်ႉၸၢမ်ၽွင်းၼၼ်ႉတႄႉ မီးၶေႃႈတွပ်ႇဝႆႉယူႇ။
“မႂ်းၵႂႃႇႁဵတ်းသင်မႃးလႃႇ ၵိၼ်ၽိတ်းမႃးၼႄႇတေႃႈ”
“ယိင်းလႆႈလူယဝ်ႉ ၽဝဢူႈႁဝ်း ယွၼ်ႉသင်လႄႈမႃးႁဵတ်းသိုၵ်းယူႇဝၼ်းၼႆႉ”
“ၵဝ်တမ်ႉဢမ်ႇႁၼ်လႃႇ”
“ဢူႈႁဝ်းၵေႃႈတမ်ႉဢမ်ႇမေႃလူၼင်ႇၵွၼ်ႇဝႃႈ”
“ႁႂ်ႈမႄႈသူလူၼႄဢိူဝ်ႈ”
“ယိင်းၸွင်ႇၵွႆႈႁႂ်ႈမၼ်းမႃးလူၼႄဢူႈႁဝ်း”
“ၶိူဝ်တေဢဝ်ၵၼ်ယဝ်ႉၵႃႈ”
“လႆႈယူႇႁိုဝ်လႃႇ”
“ဢဝ်မႂ်းဝႃႈၵူၺ်းဢိူဝ်ႈ မႂ်းတေလႆႈယူႇၸွမ်းမၼ်းလူး ၸွင်ႇၶႅၼ်းၵဝ်ယူႇၸွမ်းၵေႃႈဢမ်ႇၸႂ်ႈ”
“ပေႃးယိင်းႁဵတ်းၵၢၼ်ၼႆႉတိၵ်းတိၵ်းသေ ဢမ်ႇၸၢင်ႈလဵင်ႉဢူႈႁဝ်းၶဝ်လႆႈလူးတေႁဵတ်းႁိုဝ်လႃႇ”
“ၸၢင်ႈပဵၼ်သင် ႁဝ်းၵေႃႈလဵင်ႉၶိူဝ်မႃးၸိူင်ႉၼႆၵူၺ်းလူး လိူဝ်သေလဵင်ႉၶိူဝ်ယႂ်ႇမႃးယဝ်ႉ ႁဝ်းၵေႃႈဢမ်ႇႁဵတ်းသင်ပၼ်ၶိူဝ်လႆႈ ၵေႃႉယႂ်ႇမႃး ပေႉတူဝ်လဵင်ႉၸဝ်ႈၵဝ်ႇလႆႈၵူၺ်းၵေႃႈ လႆႈယဝ်ႉ”
“ပီၼႆႉ ၸွင်ႇႁိူဝ်ႉႁိုဝ်”
“ႁိူဝ်ႉဢိူဝ်ႈ ၵူၺ်းသမ်ႉဢမ်ႇၶႂ်ႈယူႇလၢႆၼင်ႇၵဝ်ႇ”
“ယိင်းတေမႃးယူႇၸွမ်းဢူႈႁဝ်းၶဝ်ၼႃႈပေႃးၼၼ်”
“မၼ်းၼၼ်ႉလူး”
“မၼ်းၵေႃႈၵႂႃႇၵႂႃႇမႃးမႃးဢဝ်ၵူၺ်းၵေႃႈလႆႈယူႇၼႃႇ ဢမ်ႇပဵၼ်သင်လႃႇ မၼ်းပွင်ႇၸႂ်ယူႇ”
“ဢဝ်မႂ်းဝႃႈၵူၺ်း မႃးယူႇၸွမ်းၵေႃႈၸၢင်ႈပဵၼ်သင် ၶႅၼ်းလီဢိူဝ်ႈ”
ၸၢမ်ၽွင်းတူၺ်းႁၼ် ၶူၼ်ႁူဝ်မူၼ်ႇမူၼ်ႇၼင်တႃႁဵဝ်ႇယၢၼ်း ႁူၵေႃႈဢမ်ႇပေႃးၶႂ်ႈငိၼ်းလီၼၼ်ႉယဝ်ႉ။ မိုင်ၸိူဝ်ႈတူၺ်းႁေ လႆႈႁၼ်ဝႃႈ ဢူႈၶဝ်ၼၼ်ႉ ထဝ်ႈမႃးလိူဝ်ၵူႈပီတႄႉတႄႉလႄႈ သမ်ႉၵႆႉပဵၼ်ၶႆႈပဵၼ်ဢႆထႅင်ႈ ပၢႆးယူႇလီၵေႃႈဢမ်ႇပေႃးၶႅမ်ႉယဝ်ႉ။ သင်ဢမ်ႇသင် ဢမ်ႇၸၢင်ႈႁႃငိုၼ်းလဵင်ႉလႆႈၵေႃႈ ႁႂ်ႈလႆႈယူႇၸမ်သေ လုမ်းလႃးတူၺ်းထိုင်ၵၼ်ၵႂႃႇၵူၺ်းၵေႃႈ လႆႈယဝ်ႉ။
သမ်ႉဝႃႈ ဢမ်ႇၸႂ်ႈၼႃႈႁိူၼ်းဢၼ်မၢၵ်ႈမီး ဢမ်ႇၸႂ်ႈၽူႈမီးဢႃႇၼႃႇဢၢမ်းၼၢတ်ႈ ပဵၼ်သိုၵ်းသေတႃႉၵေႃႈ ၸၢတ်ႈပၢၼ်ၵၢၼ်ယူႇသဝ်းၼၼ်ႉတႄႉ ပဵၼ်ၽဝၵူၼ်းမိူင်းမိူၼ်ၵၼ်ၵူၺ်းလႄႈ ယူႇသဝ်းႁႃၵိၼ်လဵင်ႉတွင်ႉၵႂႃႇၵူႈဝၼ်းဝၼ်းၵူၺ်းသေ ပဵၼ်ၼႃႈႁိူၼ်းလင်ၼိုင်ႈ ဢၼ်ဢမ်ႇမီးသင်ၶိူင်ႇၶမ်ႉ ယူဝ်းယူဝ်းဢွၼ်ႇၵူၺ်းၵေႃႈ တွၼ်ႈတႃႇၽႂ်သေၵေႃႉၼိုင်ႈ ၼၼ်ႉတႄႉ ပဵၼ်လွင်ႈဢၼ်မီးၵႃႈၶၼ်တႄႉယဝ်ႉ။
လႆႈယၵ်ႉႁၼ်ၼႃႈၵၼ် လႆႈငိၼ်းသဵင်လၢတ်ႈဢုပ်ႇတေႃႇၵၼ်၊ လႆႈပွင်ႉလႆႈဝႃႈလႃႇႁင်းၵၼ်ၵူၺ်းၵေႃႈ ပၼ်လွင်ႈတိုၼ်ႇၸႂ်မႃးယူႇ။ တီႈမူႇၶဝ်ႈၽိူၼ်မူၼ်း လႆႈႁၼ်ဝၢၼ်ႇၶဝ်ႈၸႅၼ်ႇတမ်း ဢမ်ႇယွမ်းႁၢႆၵႂႃႇတၢင်းလႂ်ၵူၺ်းၵေႃႈ ပဵၼ်တၢင်းသိူဝ်းၸႂ် ဢၼ်လၢတ်ႈဢမ်ႇလႆႈယဝ်ႉ။
သုတ်းယဝ်ႉ။
ၸိူင်းႁူဝ်ၼႆႉတႄႉ ပဵၼ်ၸိူင်းဢိင်ဢဝ်မႃး တီႈ ၽဝၸၢတ်ႈပၢၼ် ၵူၼ်းၵေႃႉဢၼ်လႆႈလတ်းၶၢမ်ႈၽၢၼ်ႇပူၼ်ႉမႃး ၼႂ်းသဵၼ်ႈတၢင်းၵၢၼ်လုၵ်ႉၽိုၼ်ႉၼၼ်ႉယူႇယဝ်ႉ။
ၼပ်ႉယမ်ယႂ်ႇၼမ်ထိုင် ၽူႈလူလိၵ်ႈႁဝ်းၶဝ်တင်းသဵင်ႈယူႇဢေႃႈ
သႅၼ်ငဝ်း တႅမ်ႈ
တႄႇတႅမ်ႈ 31/8/2026
တႅမ်ႈယဝ်ႉ 10/11/2026

