ယင်ႇလိုၵ်ႉၵမ်ႉယၼ် တွၼ်ႈသၢဝ်းႁႃႈ

ဝၼ်းလိုဝ်ႈၼႆၵေႃႈ ပေႃႈၶဝ်ၵႂႃႇၽုၵ်ႇထူဝ်ႇလိၼ် ႁွင်ႉမၼ်းၵႂႃႇၸွမ်းယဝ်ႉ ပေႃးဝႃႈၸွမ်းပေႃႈၶဝ်ၼႆတႄႉႁၢင်ႈၵႆႉၼႃႇ။ ပေႃႈၶဝ်ၵေႃႉၶုတ်း မၼ်းၵေႃႈ မိုဝ်းၵမ်လဵၵ်ႉလဵၵ်ႉၼၼ်ႉ တွတ်ႈသႂ်ႇၼႂ်းလုၵ်းၼၼ်ႉၵႂႃႇၸွမ်းပေႃႈၶဝ်။ မၢင်ၵမ်းၵေႃႈသႂ်ႇၼမ် မၢင်ၵမ်းၵေႃႈသႂ်ႇဢေႇဢေႇ ပေႃးမၼ်းၼမ်ပေႃႈၶဝ်သမ်ႉဝႃႈ

“သႂ်ႇဢေႇဢိၼ်ႉလႄႈ သၢမ်မဵတ်ႉသီႇမဵတ်ႉၼႆႉၵူၺ်း”

မၼ်းၵေႃႈဢမ်ႇတူၺ်းမဵတ်ႉသေတွတ်ႈၵႂႃႇ ယူႇၸူဝ်ႈၼိုင်ႈပေႃႈၶဝ်ၵေႃႈဝႃႈႁင်းမၼ်းထႅင်ႈ “ဢေးလုၵ်ႈ ၵဝ်ဝႃႈႁႂ်ႈမႂ်းသႂ်ႇလီလီၼႆ”

“သႂ်ႇလီယူႇၼႃႇ”

ယူႇၵႂႃႇယူႇမႃး ဢဝ်ၵမ်ထူဝ်ႇလိၼ်ၼၼ်ႉ လွတ်ႈမိုဝ်းၵႂႃႇ သႂ်ႇပဵၼ်ယုပ်းလူင်ဝႆႉ ပေႃႈၶဝ်သမ်ႉပေႃးလႆႈတၵ်းဢွၵ်ႇယဝ်ႉဢိူဝ်ႈ။ ၽုၵ်ႇထူဝ်ႇလိၼ်ၼႆၵေႃႈ ၵုမ်ႇပဵၼ်သဵင်ၶႃပေႃႈလုၵ်ႈၽိတ်းၵၼ် တေႃႇပေႃးယဝ်ႉၵႂႃႇယဝ်ႉၼႃႇ။

သွင်ၵေႃႉပေႃႈလုၵ်ႈၽုၵ်ႇယဝ်ႉၵေႃႈ ဢွၼ်ၵၼ်လႄႇတူၺ်းၼႂ်းသူၼ်ၵူၺ်ႈၶဝ်ၼၼ်ႉ။

“ၼၼ်ႉၼၼ်ႉပေႃႈၵူၺ်ႈသုၵ်း”

“မီးလႂ်!..” တူၺ်းၵႂႃႇတၢင်းဢၼ်လုၵ်ႈယိင်းမၼ်းၸီႉၼၼ်ႉ “တေႉဢိူဝ်ႈ”

တႅပ်းမႃးလူင်းႁိူဝ်းယဝ်ႉၵေႃႈ ၼူၵ်ႉသမ်ႉပေႃးၸွၼ်ၵိၼ်ယူႇယဝ်ႉၼႃႇ။ ဢေးၼၢင်းၼၼ်ႉတႄႉ မွင်းဝႃႈႁၼ်မၼ်းသုၵ်းၼႆၵေႃႈ ၼႅတ်ႈမႃးၸၼ်ဢဝ်ၵႂႃႇၵိၼ်ၵမ်းလဵဝ်။

“ၼူၵ်ႉၵိၼ်ယဝ်ႉယူဝ်ႉၼၼ်ႉ”

“ဢမ်ႇၵိၼ်” မၼ်းၵူဝ်ပေႃႈၶဝ်ဢမ်ႇပၼ်ၵိၼ်ႁွႆးသူပ်းၼူၵ်ႉလႄႈ ၶူပ်းပႅတ်ႈႁေ ငၢၼ်ႈၵိၼ်ၼင်ႇႁၢင်ႈဝၢၼ်ဝႆႉယူႇယဝ်ႉ။

သွင်ၵေႃႉပေႃႈလုၵ်ႈၵေႃႈလႆႈၵူၺ်ႈမိူဝ်းၵႂႃႇယဝ်ႉ။ မိူဝ်းတႅပ်းယူႇၼႂ်းၵၢင်ပၢင်ႇႁိူၼ်းၶဝ်ၼၼ်ႉသေ ၵွပ်းဢၼ်ႁၢင်ႈလီမၼ်းၼႆၵေႃႈ လိူၵ်ႈဢဝ်ဝႆႉတၢင်ႇၽြႃး ဢၼ်လိူဝ်မၼ်းၵေႃႈဢဝ်ႁွႆႈဝႆႉၼႃႈႁိူၼ်း ပေႃးၵွပ်းမၼ်းယႂ်ႇႁၢင်ႈလီၵေႃႈဝႆႉၶၢႆ တွၼ်ႈပၢႆမၼ်းၼၼ်ႉသမ်ႉ ဝႆႉၵိၼ်ႁေဝႆႉလဵင်ႉပိူၼ်ႈ။

ဢၢႆႈၸၢႆးဢွၼ်ႇၼၼ်ႉ ၽႃႇတတ်းယဝ်ႉၵေႃႈပႆႇယဝ်ႉ လႆႈပႂ်ႉတူၺ်းၽၢင်ႁၢင်ႈမၼ်းထႅင်ႈ။ ဢၢႆႈၸၢႆးဢွၼ်ႇၼၼ်ႉၵေႃႈ ၵူႈဝၼ်းၵူႈဝၼ်း လႆႈထႅမ်ၼမ်ႉၵိူဝ်ၵူၺ်း ၶဝ်ႈၵေႃႈဢမ်ႇလႆႈၵိၼ်၊ မႄႈၶဝ်ၼၼ်ႉၵေႃႈ ယူႇၸွမ်းမၼ်းသမ်ႉပေႃးဢမ်ႇၽၢတ်ႇယဝ်ႉ မေႃယႃၶဝ် ပေႃးလႆႈႁႂ်ႈမၼ်းၵႂႃႇၵိၼ်ၶဝ်ႈယူႇဢိူဝ်ႈ။

ပေႃးဝႃႈလူင်းႁူင်းယႃလႆႈယဝ်ႉၼႆၵေႃႈ ၵႂႃႇၸၢႆႇၵႃႈယႃသေ တႃႇၸၢႆႇၵႃႈယႃၼၼ်ႉ ၵႃႈၼႃႇတေႉဢိူဝ်ႈ။ ၶႂ်ႈၸၢႆႇပၼ်ယူႇၵေႃႈ ဢမ်ႇမီးငိုၼ်းသေဢိတ်းယဝ်ႉ ၵႃႈလႆႈလၢတ်ႈပိူၼ်ႈဝႃႈ

“ဢမ်ႇမီးငိုၼ်းၶႃႈ”

ပိူၼ်ႈၵေႃႈ ၸၢင်ႈတေႁဵတ်းႁိုဝ် “ၸၢႆႇဝႆႉၽွင်ႈႁေၸွင်ႇၵွႆႈမႃးၸၢႆႇထႅင်ႈၵေႃႈလႆႈ”

ငိုၼ်းဢၼ်မၼ်းပႃးၵႂႃႇၼၼ်ႉ ထူၵ်းဢွၵ်ႇမႃးယဝ်ႉ ပၼ်ၵႂႃႇၵိုတ်းဝႆႉဢၼ်လိူဝ် ၵႃႈတၢင်းတႃႇတေဢဝ်မိူဝ်းဢိတ်ႉၼိုင်ႈၵူၺ်းယဝ်ႉ။

မိူဝ်ႈဢွၼ်ၵၼ်မႃးလိုဝ်ႈတီႈႁိူၼ်းၶႅၵ်ႇၼႆၵေႃႈ ႁူပ်ႉၺႃးၵူၼ်းလူင်သေလႄႈ ပၼ်ငိုၼ်းၸၢႆႇၶႃမႄႈလုၵ်ႈယဝ်ႉ မိူၼ်တေၸတ်းၵၼ်ပၼ်ပႃးလွင်ႈႁူင်းယႃၼၼ်ႉယူႇ။ လႆႈဝႃႈပဵၼ်ၼီႈၵုင်ႇမုၼ်ဝႆႉတႄႉတႄႉယဝ်ႉ။

ၼၢင်းသိုဝ်ႉလူႇၵေႃႈ ႁၼ်ဝႃႈဢၢႆႈၸၢႆးဢွၼ်ႇဢမ်ႇၸၢင်ႈပႆလႆႈလီလီၼႆသေ ၸင်ႇသိုဝ်ႉတင်းလေႃႉၽိုၵ်းပႆၼၼ်ႉမိူဝ်းယဝ်ႉ သမ်ႉတေမီးသဵင်ဢၼ်တဵၵ်းလဵၼ်ႈဢိတ်းဢိတ်းၼၼ်ႉယဝ်ႉ။

ဢေးၼၢင်းဢၼ်လဵၼ်ႈယူႇၼႂ်းႁိူၼ်း မေႃးၵူၵ်ႈၵၢၵ်ႈယူႇႁင်းမၼ်းၼၼ်ႉ ယူႇယူႇသဵင်မၼ်းယဵၼ်ၵႂႃႇသေ ၵမ်ႉၵေႃႈႁႆႈယဝ်ႉၼႃႇ။ ပေႃႈၶဝ်ဢၼ်ႁဵတ်းၽၵ်းယူႇၼႂ်းသွင်ႇၾႆးၼၼ်ႉၵေႃႈ

“မႂ်းပဵၼ်ႁင်လႃႇ”

“မိုဝ်းလုၵ်ႈလိူတ်ႈ”

ပေႃႈၶဝ်ၼႅတ်ႈမႃးတူၺ်းယဝ်ႉ ဢၵျွင်းဝႃႈ မၼ်းၵႂႃႇယႃႉဢဝ်မၢၼ်ႇၸမ်ႈမႄႈၶဝ် ဢၼ်ပိူၼ်ႈသႂ်ႇၶွပ်ႇဝႆႉၼၼ်ႉ ဢဝ်ၶွပ်ႇမၼ်းဢွၵ်ႇသေသမ်ႉဝၢတ်ႇမိုဝ်းမၼ်းလႄႈ လိူတ်ႈမၼ်းဢွၵ်ႇမႃးၼၼ်ႉၼႃႇ။

“မႂ်းၵႂႃႇယႃႉႁဵတ်းႁင်ႁင်းမႄႈသူၼၼ်ႉ”

ၵႂႃႇဢဝ်ၽႅၼ်ႇမႃးပူၵ်ႉယဝ်ႉမတ်ႉပၼ်မိုဝ်းမၼ်းသေ “သႂ်ႇပၼ်ၶိုၼ်းလႄႈ ပေႃးမႄႈသူမႃး မႃးလႃႇမႂ်းဢိူဝ်ႈၼၼ်ႉ”

မၼ်းၵေႃႈၶွၵ်းၶွၵ်းၶေႇၶေႇသႂ်ႇပၼ်ၶိုၼ်းယဝ်ႉ ယဵၼ်လူင်ၵႂႃႇတၢင်းလင်ႁိူၼ်းၼၼ်ႉ။ ယူႇၸူဝ်ႈၼိုင်ႈ ပေႃႈၶဝ်မႃးငွၵ်ႈတူၺ်းၼႂ်းႁိူၼ်းၵေႃႈ ဢမ်ႇတၼ်းႁၼ်ယဝ်ႉၼႃႇ။

“ၵႂႃႇလႂ်ၼႆႉဢေးၼႆႉၼႆႉ သဵင်ယဵၼ်ယဝ်ႉ”

ငိၼ်းသဵင်ၶုတ်ႇၶိတ်ႇၶုတ်ႇၶၢတ်ႇမေႃးယူႇတၢင်းလင်ႁိူၼ်းၼၼ်ႉ

“ဢလူဝ်ႈလူဝ်ႈ ႁဵတ်းႁင်ၼၼ်ႉ”

“ၸၼ်ႁၢင်ႈ”

“ပေႃးႁဵတ်းယဝ်ႉၵေႃႈ ၸဵတ်ႉပႅတ်ႈၸွမ်းလေႃႇ ပေႃးလၢႆးယူႇသဵင်ႈ”

“ဢမ်ႇမေႃ”

“ဢဝ်ၽႅၼ်ႇမႃးၸဵတ်ႉလႄႈ”

မၼ်းၵေႃႈၵႂႃႇဢဝ်ၽႅၼ်ႇ မႃးထူယူႇတၢင်းႁိုင်ၵေႃႈဢမ်ႇမူတ်း ပႃႈႁိမ်းႁိူၼ်းႁၼ်မၼ်းၸဵတ်ႉယူႇလႄႈ

“မႂ်းႁဵတ်းႁင်လႃႇဢေးၼၢင်း”

“ပေႃႈႁဝ်းၸႂ်ႉၸဵတ်ႉၸိူဝ်းၼႆႉဝႃႇ”

“ပိူၼ်ႈဢဝ်ၸုပ်ႉၼမ်ႉႁေဢိူဝ်ႈမႂ်းၵေႃႈ”

မၼ်းၵေႃႈဢဝ်ၽႅၼ်ႇမႃးၸုပ်ႉၼမ်ႉႁေ ၸဵတ်ႉၵႂႃႇယဝ်ႉ။ မၼ်းပဵၼ်ႁိၼ်ၼဝ်ႈ ဢၼ်ၵဵပ်းမႃးၸွမ်းလိၼ်ၸိူဝ်းၼၼ်ႉၵူၺ်းလႄႈ လႆႈဝႃႈၸဵတ်ႉဢွၵ်ႇငၢႆႈယူႇ။

ယင်ႇလိုၵ်ႉၵမ်ႉယၼ် တွၼ်ႈသၢဝ်းပႅတ်ႇ

ႁိူၼ်းဢၼ်ဝႃႈၼၼ်ႉ တွၼ်ႈတႃႇ ၸဝ်ႈပိုၼ်းႁၢၼ်လႄႈ ၼၢင်းသိုဝ်ႉလူႇၼႆၵေႃႈ တိုၵ်ႉၸင်ႇႁႃမီးမႃးမိူဝ်ႈယူႇတီႈၼိူဝ်လွႆၼႆႉၵူၺ်းလႄႈ ပဵၼ်တီႈၸုၵ်းမၼ်ႈယင်ႇႁၢၵ်ႈမၼ်းဝႆႉယဝ်ႉသေ ၵႂႃႇတၢင်းလႂ်ယူႇတၢင်းလႂ်ၵေႃႈ ဢမ်ႇမိူၼ်ၼင်ႇတီႈႁိူၼ်းၼႆႉလႆႈတေႉဢိူဝ်ႈ။ ၸဝ်ႈပိုၼ်းႁၢၼ်ၵေႃႈ မိူဝ်ႈၵေႃႉလဵၵ်ႉ...

ယင်ႇလိုၵ်ႉၵမ်ႉယၼ် တွၼ်ႈသၢဝ်းၸဵတ်း

ယူႇၼႂ်းဝၢၼ်ႈၵေႃႈ လႆႈႁဵတ်းၵၢၼ်ၼႃႈဝၢၼ်ႈ ၼၢင်းသိုဝ်ႉလူႇၼၼ်ႉၵေႃႈ သမ်ႉမီးဝႆႉၼႂ်းမူႇၸုမ်းၼၢင်းယိင်းလႄႈ တီႈႁူင်းႁဵၼ်းၼၼ်ႉၵေႃႈ မူႇၸုမ်းၼၢင်းယိင်းၶဝ် ပွၵ်ႉၼိုင်ႈလႄႈပွၵ်ႉၼိုင်ႈ လႆႈပၼ်ႇပုတ်ႈၵၼ်သေၵႂႃႇႁဵတ်းယဝ်ႉ။ ၼၢင်းသိုဝ်ႉလူႇၼၼ်ႉၵေႃႈ...

ယင်ႇလိုၵ်ႉၵမ်ႉယၼ် တွၼ်ႈသၢဝ်းႁူၵ်း

ဝၢႆးသေႁဵတ်းႁိူၼ်းယဝ်ႉၼႆၵေႃႈ ႁၼ်ဝႃႈတီႈယူႇတီႈသဝ်းမၼ်းၵႂၢင်ႈၼႆသေ ပိူၼ်ႈၵေႃႈၽိူမ်ႉၵူၼ်းမႃးလႄႈ ၸဝ်ႈမွင်ႇၵေႃႈ ႁႂ်ႈမႃးယူႇၸွမ်းတီႈႁိူၼ်းၸဝ်ႈပိုၼ်းႁၢၼ်ၵႂႃႇ မီးၽူႈမၢႆ 3 ၵေႃႉ၊ မေႃယႃထႅင်ႈ...