“တီႈႁူင်းႁဵၼ်း ႁဝ်းယၢမ်ႈယဝ်ႉတင်းဢူၺ်းၵေႃႉသေ ၸၼ်ၶႅၼ်မၼ်း ဢဝ်ၶႅၼ်မၼ်းၶတ်း ထိုင်တီႈမၼ်းပေႃးႁႆႈ ဢူၺ်းၵေႃႉ ဢၼ်လဵၼ်ႈၵေႃႉမၼ်းၼၼ်ႉၵေႃႈဝႃႈ ႁဝ်းၽိတ်းမၼ်းႁေ ၵႂႃႇလၢတ်ႈၼႄၶူး ၶူးၵေႃႈ ဢဝ်ၶွၼ်ႉယႂ်ႇဝႃႈယႂ်ႇႁႅမ်ပၼ်ႁဝ်း ၸဵပ်းဝႃႈၸဵပ်း ႁဝ်းသမ်ႉပေႃးႁႆႈတေႉဢိူဝ်ႈ။ မိူဝ်ႈၼၼ်ႉ ပေႃးဝႃႈႁဵတ်းသင်ၽိတ်းၼႆ ဢဝ်ၶွၼ်ႉႁႅမ်တိၵ်းတိၵ်းယဝ်ႉဝႃႈ ႁဝ်းၼႆႉယႂ်ႇမႃးၸွမ်းၶွၼ်ႉၼႆၵေႃႈဝႃႈယူႇယူဝ်ႉ။ တီႈႁိူၼ်းၼႆၵေႃႈ ပေႃးႁဵတ်းဢိတ်ႉၼိုင်ႈဢမ်ႇထုၵ်ႇ ပေႃးႁဵတ်းဢမ်ႇၶိုတ်းၸႂ်ၵေႃႈ ႁႅမ်၊ ပေႃးဝႃႈႁႆႈၼႆၵေႃႈႁႅမ် ပေႃးသူႁူႉၸၵ်း ၵူၼ်းဢၼ်ယၢမ်ႈႁၼ်ႁဝ်း မိူဝ်ႈၵေႃႉလဵၵ်ႉၼႆ ၶဝ်တေၶႆႈတႃႇသေႇ မိူဝ်ႈမႂ်းၵေႃႉလဵၵ်ႉ တင်းပေႃႈသူႁေ လမ်းႁႅမ်ၵၼ်ယူႇၸွမ်းၵိဝ်ႇၼၼ်ႉၼႃႇ ၼႆဢိူဝ်ႈ”
“ၶုၵ်းၸႂ်လႆႈမိူဝ်ႈႁဝ်းၵေႃႉလဵၵ်ႉမႃးယဝ်ႉ မိူဝ်ႈမႄႈႁဝ်းဢဝ်တွၵ်ႇလမ်းႁႅမ်ႁဝ်း ၼႂ်းၵၢင်ဝၢၼ်ႈၼၼ်ႉ လႅၼ်ႈပၼ်ၼႆႉပေႇၸႂ်ယဝ်ႉဝႃႈ ပီႈၼၢင်းႁဝ်းပေႃးလႆႈမႃးၵႅတ်ႇဢိူဝ်ႈ”
“သူၵႂႃႇႁဵတ်းသင်လႃႇႁမ်ႉ”
“ႁဝ်းၵႂႃႇႁဵတ်းႁင်ဢမ်ႇတွင်းယဝ်ႉဝႃႈ မဵဝ်းၵူၼ်းၵူႈပွၵ်ႈၼႆႉ ပေႃးလၢတ်ႈႁေဢမ်ႇထွမ်ႇ ၶဝ်ပေႃးႁႅမ်ယဝ်ႉၼႃႇ”
“ၼၼ်ႉယဝ်ႉ ၶႆႈၶိုၼ်းယဝ်ႉၵေႃႈ ႁၢင်ႈၸဵပ်းမႃးၵမ်းလဵဝ်ယဝ်ႉ”
“ၸႂ်ထိုင်ၵူၺ်းဢိူဝ်ႈႁဝ်းတႄႉ ၶဝ်ဢမ်ႇယူႇယဝ်ႉလူး”
“တေလႆႈၵွတ်ႇပၼ်ႁႅင်းၸႂ်ယူႇၼႄႇ”
“ဢိုမ်ႈ..”
“ႁဝ်းလၢတ်ႈယင်းပႆႇသုတ်း”
“လၢတ်ႈထႅင်ႈလႄႈပေႃးၼၼ် ႁဝ်းတေတင်ႈၸႂ်သေထွမ်ႇလူး ၸိူင်းၵေႃႈႁဝ်းဢမ်ႇတႅမ်ႈယဝ်ႉၶမ်ႈၼႆႉ တေၼင်ႈထွမ်ႇလွင်ႈသူၵူၺ်းယဝ်ႉ”
“တႅမ်ႈၸိူင်းသူႁေလႄႈပေႃးၼၼ်”
“ဢမ်ႇ ထွမ်ႇသူလၢတ်ႈမႃးၵူၺ်းၵေႃႈ မိူၼ်တင်းႁဝ်းတႅမ်ႈယဝ်ႉ”
“ၸွင်ႇႁဝ်းတေလႆႈၵႃႈမၼ်းယူႇၼႄႇ”
“ပေႃးပေႉၸႂ်ဢဝ်ယူႇၵေႃႈ ဢဝ်လႄႈ မီးၵႃႈႁိုဝ်ၵေႃႈပၼ်သူမူတ်းယဝ်ႉ ပၼ်တၢင်းတူဝ်တင်းၸႂ်ဢိူဝ်ႈၼႆႉ”
“ႁဝ်းတေသိုပ်ႇလၢတ်ႈထႅင်ႈယဝ်ႉၼ ဝၢႆးသေႁဝ်းမိူဝ်းႁိူၼ်းၼႆၵေႃႈ မႄႈႁဝ်းႁေတင်း ပႃႈဢူၺ်းၵေႃႉႁဝ်းၼၼ်ႉ ဢဝ်ဢမ်ႇလၢတ်ႈတေႃႇၵၼ် ယွၼ်ႉႁဝ်းႁေယဝ်ႉဢိူဝ်ႈ ဝႃႈႁဝ်းၵႂႃႇႁဵတ်းႁင်းမၼ်းၼႆၼၼ်ႉၼႃႇ”
“လုၵ်ႈဢွၼ်ႇၽိတ်းၵၼ်ၵူၺ်းၵေႃႈ ၵူၼ်းလူင်သမ်ႉပေႃးၽိတ်းၵၼ်ယွၼ်ႉမၼ်းၼၼ်ႉ ပဵၼ်တေႉဢိူဝ်ႈၼေႃႈ”
“ပဵၼ်တေႉဢိူဝ်ႈ၊ လုၵ်ႈဢွၼ်ႇၼႆႉ လွင်ႈလဵၵ်ႉလဵၵ်ႉၵူၺ်းၵေႃႈ ၽိတ်းၵၼ်ယွၼ်ႉမၼ်းလႆႈၼႃႇၼႃ။ ပွၵ်ႈၼိုင်ႈ ႁဝ်းလႄႈတၢင်းဢူၺ်းၵေႃႉ လဵၼ်ႈၵိၵ်းၵွၵ်းၵၼ်ၼႂ်းသူၼ် သႂ်ႇၵႂႃႇသႂ်ႇမႃး မၼ်းမႃးယိမ် မၢၵ်ႇငႅပ်ႈႁူဝ်ၼႆယူဝ်ႉၼၼ်ႉ ႁဝ်းၵေႃႈဢမ်ႇပၼ် မၼ်းၵေႃႈယိမ်ႁႂ်ႈလႆႈႁေ မိူဝ်ႈတႄႇတႄႉတူပ်းၵၼ်ၵႂႃႇၵႂႃႇၶိုၼ်းၶိုၼ်း သႂ်ႇၵႂႃႇသႂ်ႇမႃး ႁဝ်းၶူပ်းပၼ်တႃမၼ်းႁေ ဢဝ်ႁႆႈမိူဝ်းႁိူၼ်းယဝ်ႉဢိူဝ်ႈ။ မၼ်းႁႆႈၵေႃႈ ႁဝ်းၵေႃႈႁႆႈႁေ ၵူၼ်းယူႇၸွမ်းပေႃႈႁဝ်း ႁၼ်ႁဝ်းႁႆႈၼႆၵေႃႈ ၼႅတ်ႈမႃးၶျေႃး သိုဝ်ႉၶဝ်ႈမုၼ်းမႃးလဵင်ႉႁေဢိူဝ်ႈ၊ ၽိူဝ်ႇမႃးထႅင်ႈဝၼ်း တႃမၼ်းၵေႃႈတူၺ်ႇပဵၼ်ႁွႆးၶဵဝ်ႈဝႆႉယူႇယဝ်ႉၼႃႇ ဢမ်ႇပူၼ်ႉႁေသၢမ်သီႇဝၼ်း ႁဝ်းသမ်ႉပေႃးမိူဝ်းလႄႇမၼ်းႁေ လဵၼ်ႈၵေႃႉမၼ်းၶိုၼ်းယဝ်ႉဝႃႈ”
“ႁၢႆႉတေႉဢိူဝ်ႈမေႃႉ..ႁမ်ႉဢၢပ်ႈၶီႈလေႇၵျႃႉလႃႇ”
“ၶီႈလေႇၽႅဝ်ၵႃႈ ပေႃးႁဝ်းဢမ်ႇလေႇပိူၼ်ႈၵေႃႈ ပိူၼ်ႈလေႇႁဝ်းၼၼ်ႉၼႃႇ ဝူၼ်ႉယဝ်ႉသမ်ႉပေႃးၶႂ်ႈပဵၼ်လုၵ်ႈဢွၼ်ႇၶိုၼ်းယဝ်ႉ၊ ၶိင်ႇၵိၼ်ၵေႃႈၵိၼ်ႁေ ၶိင်ႇၼွၼ်းၵေႃႈၼွၼ်း၊ ပေႃးပေႃႈမႄႈဢမ်ႇယူႇႁိူၼ်းၵေႃႈလေႇႁေၼၼ်ႉၼႃႇ”
“လႆႈဝႃႈသူၵေႃႈၵၢမ်ႇလီယူႇၼႃ”
“ၵၢမ်ႇလီၸိူင်ႉႁိုဝ်လႃႇ”
“သူတင်းလႆႈလဵၼ်ႈလႆႈလႄႇ လႆႈယူႇႁူင်းႁဵၼ်းၸဵမ်မိူဝ်ႈၵေႃႉလဵၵ်ႉလဵၵ်ႉၵွၼ်ႇ”
“သူလူး မိူဝ်ႈၵေႃႉလဵၵ်ႉပဵၼ်ၸိူင်ႉႁိုဝ်လႃႇ”
“မိူဝ်ႈၵေႃႉလဵၵ်ႉလဵၵ်ႉႁႃႉ ႁဝ်းမီးပီႈၼွင်ႉၼမ် တွင်းလႆႈတႄႉ ပီႈၼၢင်းႁဝ်းၵူၺ်းဢိူဝ်ႈဢဝ်ႁဝ်း လဵင်ႉၶဝ်ႈလဵင်ႉၼမ်ႉႁဝ်းယႂ်ႇမႃး၊ ၵႂႃႇလႄႇၼႆၵေႃႈ ၸေးႁဝ်းလူင်ၵႂႃႇဢိူဝ်ႈ။ ပေႃႈမႄႈႁဝ်းတႄႉၵေႃႈ ၵႂႃႇၸဝ်ႉမႃးၶမ်ႈ ႁဵတ်းၼၼ်တိၵ်းတိၵ်းၵူၺ်း။ ပေႃးဝႃႈၵေႃႉယႂ်ႇမႃးပေႉတူဝ်မႃးယဝ်ႉၼႆၵေႃႈ မႄႈႁဝ်းသမ်ႉပေႃးၵိူတ်ႇၼွင်ႉႁဝ်းမႃးထႅင်ႈယဝ်ႉ၊ ပီႈၼၢင်းႁဝ်းတႄႉ ၵုမ်ႇဢဝ်ၼွင်ႉတိၵ်းတိၵ်း။ ႁဝ်းတႄႉၵေႃႈ ပေႉတူဝ်ႁူႉၵႂၢမ်းမေႃၵႂႃႇမေႃပႆလႆႈႁင်းၵူၺ်းယဝ်ႉၵေႃႈ ပိူၼ်ႈပေႃးၸႂ်ႉႁဝ်းၵႂႃႇႁႃလဵင်ႉဝူဝ်းလဵင်ႉၵႂၢႆးယူႇယဝ်ႉၼႃႇ။ သမ်ႉဝႃႈလဵင်ႉဝူဝ်းလဵင်ႉၵႂၢႆးၼႆၵေႃႈ ၶွင်မီးတင်းဢူၺ်းၵေႃႉႁေၵႂႃႇမႃးၸွမ်းၵၼ် ပိူၼ်ႈႁဵတ်းႁဝ်းၵေႃႈႁဵတ်း ႁဝ်းၵေႃႈႁဵတ်းမႃးလႆႈယူႇ။ မၢင်ပွၵ်ႈတင်းၵႂၢႆးႁေ တင်းၵူၼ်းႁေ လဵၼ်ႈၵူမ်ႇလဵၼ်ႈလိၼ်ၵႂႃႇၸွမ်းၵၼ်ယူႇၵွၼ်ႇဢိူဝ်ႈ ဝူၼ်ႉၵႂႃႇဝူၼ်ႉမႃး ၽဝၼႆႉလႅပ်ႈတုၵ်ႉဝႆႉလူဝ်လူဝ် ၵူၺ်းသမ်ႉပေႉၵျေႃႇဝႆႉဢမ်ႇႁူႉယဝ်ႉ”
ၸၢမ်ၽွင်းၵေႃႈတင်ႈၸႂ်သေထွမ်ႇတေႉထွမ်ႇဝႃႈ ငဝ်းလိူၼ်ၵေႃႈ ၼင်ႇဢၼ်လွင်ႈၽဝမၼ်းယၢမ်ႈထူပ်းမႃးၼၼ်ႉ တေႃႉတႆႇၶႆႈၼႄၸူးၸၢမ်ၽွင်းယူႇ။
ဢၼ်ႁဝ်းႁူႉလိၵ်ႈႁူႉလၢႆး မေႃလိၵ်ႈမေႃလၢႆးယူႇၼႆႉၵေႃႈ ယွၼ်ႉပိူဝ်ႈႁဝ်း တုၵ်းၶႂ်ႈႁဵတ်းၸဝ်ႈသၢင်ႇႁေလႄႈ ၶဝ်ၵေႃႈလႆႈပွႆႇၵႂႃႇယူႇၵျွင်းတီႈဝၢၼ်ႈ ၵူၺ်းၵႃႈ ႁဝ်းသမ်ႉၶွႆပိူၼ်ႈမေႃဢၢၼ်ႇလိၵ်ႈႁေ ယွၼ်းမိူဝ်းယူႇၵျွင်းတီႈဝဵင်း ပေႃႈမႄႈၵေႃႈပွႆႇၵႂႃႇဢိူဝ်ႈ ၶွင်ဢမ်ႇလႆႈလဵင်ႉလႆႈသဵင်ႈၵႃႈမၼ်းၼင်ႇၵွၼ်ႇ ႁဝ်းၵႂႃႇယူႇၵျွင်းၸဵမ်မိူဝ်ႈပႅတ်ႇၶူပ်ႇၼႆႉၵႃႈ။ တီႈၵျွင်းၵေႃႈမီးၸဝ်ႈသၢင်ႇတင်းၼမ်ယဝ်ႉ ၵၢင်ၼႂ်ၵေႃႈ လႆႈလုၵ်ႉတုင်းသွမ်းၸဵမ်ၸဝ်ႉ ၵၢင်ဝၼ်းၵေႃႈႁဵၼ်းလိၵ်ႈတင်းဝၼ်းတင်းဝၼ်း ပဵၼ်ၸဝ်ႈသၢင်ႇ ႁႂ်ႈဢိုပ်းၼႆၵေႃႈဢမ်ႇဢိုပ်းၼင်ႇၵွၼ်ႇ ႁႂ်ႈဝႃႈလႆႈၵိၼ်ဢိမ်ႇၵိၼ်ဝၢၼ်ၼႆၵေႃႈ ဢမ်ႇၸႂ်ႈတႃႇသေႇ သင်တႅၵ်ႈတင်းဢၼ်ယူႇတီႈႁိူၼ်းတႄႉၵေႃႈ ၶႅၼ်းယူႇတေႉတေႉယဝ်ႉ။ လႆႈဝႃႈႁဝ်းၵေႃႈၵၢမ်ႇလီယူႇၵူၺ်း”
“ပေႃးဢဝ်တၢင်းတုၵ်ႉၶဝႃႈတႄႉ ႁဝ်းဢမ်ႇၶိုတ်းၶီႈသူလေႃႇပေႃးၼႆ”
“ၵူၼ်းႁဝ်းမၼ်းဢမ်ႇမိူၼ်ၵၼ်လႆႈလူးသူ”
“ပေႃးဝႃႈတုၵ်ႉၼႆ မိူဝ်ႈၼၼ်ႉ ႁဝ်းတင်းဢမ်ႇဝူၼ်ႉဝႃႈ ၼႆႉမၼ်းပဵၼ်တုၵ်ႉၶႁႃႉ လိူဝ်သေဝႃႈ ႁဝ်းဢမ်ႇၶႂ်ႈႁဵတ်းသေဢိတ်းၼႆၵူၺ်းဢိူဝ်ႈ ပေႃးဝႃႈ လူင်းႁူင်းႁဵၼ်းမိူဝ်းယဝ်ႉ ၶဝ်လဵင်ႉမူႁိုဝ်လႃႇ ႁဝ်းလႆႈပဵၼ်ၵူၼ်းဢွႆႇၶဝ်ႈမူယဝ်ႉ။ ပေႃးဝႃႈဢမ်ႇလႆႈဢွႆႇၼႆၵေႃႈ ၺႃးၵႂၢမ်းလႃႇၵမ်းလဵဝ်ဢိူဝ်ႈ။ မၢင်ပွၵ်ႈၵေႃႈၺႃးၶွၼ်ႉၵွပ်ႈမၼ်းလူးၵွၼ်ႇ မိူဝ်ႈပဵၼ်လုၵ်ႈဢွၼ်ႇၼႆႉ မၼ်းၵေႃႈလီတေႉယဝ်ႉ ဢမ်ႇႁူႉတၢင်းတုၵ်ႉ ႁူႉဝႃႈၸဵပ်းၵေႃႈႁႆႈ၊ ဢမ်ႇၶႂ်ႈႁဵတ်းၵေႃႈၵူဝ်ၺႃးၵႂၢမ်းလႃႇၵူဝ်ၺႃးပွင်ႉလႄႈ ႁဵတ်းၵႂႃႇ။ ယူႇၵႂႃႇႁဵတ်းၼၼ် လူဝ်ႇႁဵတ်းႁင်ၵေႃႈႁဵတ်းၸိူင်ႉၼၼ် ဝၼ်းလႂ်ဝၼ်းၼၼ်ႉၵူၺ်း ႁဝ်းတင်းၶႂ်ႈယူႇမိူၼ်ၼၼ်ၵူၺ်းယဝ်ႉ”
“ယူႇမိူၼ်ၼၼ်ၵေႃႈလႆႈယူႇလူးသူ ၸၢင်ႈတေၵႂႃႇဝူၼ်ႉၼမ်သင် ၶႂ်ႈၵိၼ်ၵေႃႈၵိၼ် ၶႂ်ႈၼွၼ်းၵေႃႈၼွၼ်း ၶႂ်ႈၵႂႃႇၵေႃႈၵႂႃႇ လူဝ်ႇႁဵတ်းၵၢၼ်ၵေႃႈႁဵတ်းသေ ၸႂ်ထိုင်ႁဝ်းၵေႃႈ လၢတ်ႈတေႃႇႁေၼႆၼၼ်ႉၼႃႇ”
“ၽႂ်မႃႇၸႂ်ထိုင်သူသေၶႅၵ်း”
“ပေႃးၸႂ်သူဢမ်ႇမႃးထိုင်ႁဝ်း ႁဝ်းတေႁဵတ်းႁိုဝ်ၸႂ်ထိုင်သူလႃႇ ယူႇလၢႆလၢႆႁေ ႁႂ်ႈၸႂ်ထိုင်သူၼႆႉဢမ်ႇပဵၼ်လႆႈႁဝ်းဝႃႈ”
“ပဵၼ်လႆႈၼႃႇၵူၺ်းလေႃႇ”
“သူပဵၼ်ယူႇၵႃႈ”
“ပဵၼ်ဢိူဝ်ႈ”
“ၼၼ်ႉၼႃႇ…”
“သူၼႆႉတႄႉ ၶၢၼ်ႉလၢတ်ႈတေႃႇယဝ်ႉဝႃႈ”

