ယင်ႇလိုၵ်ႉၵမ်ႉယၼ် တွၼ်ႈသိပ်းၸဵတ်း

ပီၼႆႉၵေႃႈ ဢေးၼၢင်းဢွၼ်ႇ သႅင်ၽွင်း လႆႈသွင်ၶူပ်ႇပၢႆယဝ်ႉသေ မေႃၶီႈမေႃယဵဝ်ႈႁင်းၵူၺ်းလႆႈယဝ်ႉလႄႈ မႄႈၵေႃႈဢမ်ႇတၼ်းတူၺ်းယဝ်ႉ လူဝ်ႇလဵင်ႉၼွင်ႉထႅင်ႈၼႆႁေ ဢဝ်ၵႂႃႇပွႆႇႁူင်းႁဵၼ်းယူႇ။

ၵႂႃႇႁူင်းႁဵၼ်းၵေႃႈ ၵေႃႉလဵၵ်ႉၼႃႇ ပေႃးပိူၼ်ႈၵႂႃႇသူင်ႇသေပွၵ်ႈၶိုၼ်းၼႆ ၵႆႉၵႆႉႁႆႈၸွမ်းပိူၼ်ႈတိၵ်းတိၵ်း၊ မၢင်ပွၵ်ႈၶူးပေႃးလႆႈၺွပ်းဝႆႉဢဝ်။ ၵွပ်ႈၼၼ်လႄႈ ပေႃႈမႄႈမၼ်းတေဢမ်ႇပေႃးၵႆႉၵႂႃႇသူင်ႇ တေၵႆႉၸႂ်ႉႁႂ်ႈပိူၼ်ႈၵႂႃႇသူင်ႇပၼ်ယဝ်ႉ။

ဝၼ်းၼိုင်ႈမၼ်းၵေႃႈယူႇၼိူဝ်ႁူင်းႁဵၼ်းသေ ႁၼ်ပေႃႈၶဝ်လဵပ်ႈၵႂႃႇတၢင်းႁူင်းႁဵၼ်းၼၼ်ႉ ၼႆၵေႃႈ မီႇၼႃႈမၼ်းႁႆႈဢွၵ်ႇမႃးယဝ်ႉ။ တႄႇဢဝ်ၼၼ်ႉမႃး ပေႃးၽၢၼ်ႇၵႂႃႇတၢင်းႁူင်းႁဵၼ်းၼႆ တေဢမ်ႇပၼ်ႁႂ်ႈမၼ်းလႆႈႁၼ် ပေႃးႁၼ်မိူဝ်ႈလႂ်တေႁႆႈႁေၶႂ်ႈမိူဝ်းႁိူၼ်း တႃႇသေႇ။

မၢင်ပွၵ်ႈဢမ်ႇၶႂ်ႈၵႂႃႇႁူင်းႁဵၼ်းၼႆၵေႃႈႁႆႈ လႆႈၶျေႃးလီလီသေၸင်ႇတေၵႂႃႇယဝ်ႉ တႃႇမၼ်းတေမိုတ်ႈႁူင်းႁဵၼ်းလႆႈၼၼ်ႉ လႆႈၸႂ်ႉၶၢဝ်းယၢမ်းႁိုင်ယူႇလိူၼ်သွင်လိူၼ်ၼႆႉ မၼ်းၸင်ႇတေမိုတ်ႈ။

ၸဝ်ႈပိုၼ်းႁၢၼ်ၵေႃႈ ပေႃးဝႃႈယဝ်ႉၵၢၼ်သွၼ်ၼႆၵေႃႈ လႆႈၶၢႆႉၵၢၼ်သေ မႃးပဵၼ်ၵႅမ် ၽူႈၵွၼ်းတပ်ႉၵွင် ႁူမ်ႇလူမ်ႈၼွၵ်ႈ ၼႆႁေလႄႈ လႆႈပဵၼ်ၵူၼ်းၸွႆႈတူၺ်းၸွႆႈၵုမ်းၵႂႃႇယူႇ။

—————————————————–

“ၸၢမ်ၽွင်း..”

“ဝႃႈ…ၸိူင်ႉႁိုဝ်”

“ႁိူၼ်းသူလႄႈတင်းႁူင်းႁဵၼ်းၼႆႉၵႆယူႇႁႃႉ”

“မိူဝ်ႈလႂ် မိူဝ်ႈလဵဝ်ႁႃႉ”

“မိူဝ်ႈသူၵေႃႉလဵၵ်ႉ တိုၵ်ႉၶီႈမုၵ်ႈယွႆႉယူႇၼၼ်ႉဢိူဝ်ႈ”

“ၵႆၽႅဝ်ၵႃႈ တူဝ်ႁဝ်းတိုၵ်ႉလဵၵ်ႉလဵၵ်ႉၵူၺ်းလူး”

“ႁဝ်းႁၼ်ၶႅပ်းႁၢင်ႈသူမိူဝ်ႈၵေႃႉလဵၵ်ႉ လီႁၵ်ႉပေႇၸႂ်”

“ႁၼ်မိူဝ်ႈလႂ်”

“မိူဝ်ႈႁဝ်းမိူဝ်းႁိူၼ်းသူၼၼ်ႉဢိူဝ်ႈ ပေႃႈသူဢဝ်ဢွၵ်ႇမႃးၼႄၼႃႇ”

“လီႁၵ်ႉၵူၺ်းဢိူဝ်ႈလေႃႇ လုၵ်ႈဢွၼ်ႇၵူၺ်းလူး”

“ပဵၼ်ၵူၼ်းလူင်ယဝ်ႉၵေႃႈ တိုၵ်ႉလီႁၵ်ႉယူႇ”

“တႅမ်ႈယဝ်ႉၼႄႇၸိူင်းသူ”

“တိုၵ်ႉမႃးထၢမ်သူယူႇၼႆႉၼႃႇ လုၵ်ႉတီႈႁိူၼ်းၵႂႃႇႁူင်းႁဵၼ်းၼႆႉၵႆမွၵ်ႈႁိုဝ်လႃႇ”

“ဢမ်ႇတွင်းယဝ်ႉၼႃ ပေႃးၸဵတ်းမူင်းၵေႃႈႁဝ်းၵႂႃႇယဝ်ႉၼႃႇ မၢင်ပွၵ်ႈၵေႃႈၸဵတ်းမူင်းၶိုင်ႈလိူဝ်လိူဝ်ၼႆႉၵေႃႈထိုင်ယဝ်ႉ”

“မိူဝ်ႈသူယူႇႁူင်းႁဵၼ်းၽၢၵ်ႇၼၼ်ႉဢိူဝ်ႈ ၸွင်ႇတွင်းလႆႈၼႄႇ”

“ၽႂ်တေႁဵတ်းႁိုဝ်တွင်း ဢၼ်ႁဝ်းတွင်းတႄႉ ပေႃႈမႄႈႁဝ်းမႃႇၵႂႃႇသူင်ႇႁေပွၵ်ႈၼၼ်ႉယဝ်ႉ”

“ၶေးၵႂႃႇသူင်ႇယူႇလႄႈသူဢမ်ႇတွင်းၵူၺ်းၵႃႈ”

“ဢၼ်ႁဝ်းတွင်းၼႆၼႃႇ ဢၼ်ႁဝ်းဢမ်ႇတွင်းတႄႉႁိုဝ်ၸၢင်ႈဝႃႈ”

“ၼၼ်ႉၽၢႆႇၶတ်းၼႆႉတႄႉ..ဢၼ်သူတွင်းသမ်ႉႁဵတ်းႁိုဝ်ၵႂႃႇလႃႇဢေႉ”

“မၢင်ပွၵ်ႈၵေႃႈ တေမီးလုင်းသေႃးၵႆႉၵႆႉဢဝ်လူတ်ႉမၼ်းႁေ ၵႂႃႇသူင်ႇလုၵ်ႈမၼ်းယဝ်ႉ ၶိုၼ်းၵႂႃႇသူင်ႇႁဝ်းပႃး”

“ပေႃးလူင်းႁူင်းႁဵၼ်းၵေႃႈ မၼ်းႁပ်ႉသူပႃးယူႇႁႃႉ”

“မိူဝ်ႈႁဝ်းလႄႈတင်းလုၵ်ႈမၼ်းယူႇႁူင်းႁဵၼ်းၽၢၵ်ႇၸွမ်းၵၼ်တႄႉ ႁပ်ႉယူႇ၊ ၽိူဝ်ႇလုၵ်ႈမၼ်းၶိုၼ်ႈၸၼ်ႉပႅတ်ႈႁဝ်းယဝ်ႉ မၼ်းၵေႃႈတေဢမ်ႇပေႃးလႆႈႁပ်ႉယဝ်ႉဝႃႈ ၶွင်ၶၢဝ်းယၢမ်းၶိုၼ်ႈႁူင်းႁဵၼ်း လူင်းႁူင်းႁဵၼ်းႁဝ်းၵေႃႈဢမ်ႇမိူၼ်ၵၼ်လႄႇ ဝၢႆးသေလုၵ်ႈမၼ်းၶိုၼ်ႈၸၼ်ႉယဝ်ႉတႄႉ ႁိုင်ႁိုင်ၼိုင်ႈပွၵ်ႈ ၸင်ႇၺႃးၶဝ်”

“သူသမ်ႉၵႂႃႇၸွမ်းၽႂ်ယဝ်ႉလႃႇ”

“ဢူၺ်းၵေႃႉႁဝ်းၵေႃႈ မႄႈၶဝ်ၵႂႃႇသူင်ႇယူႇလႄႈ မႄႈႁဝ်းၵေႃႈ ႁႂ်ႈႁဝ်းၵႂႃႇၸွမ်းၶဝ်ၵူၺ်းဢိူဝ်ႈ ပေႃးၶဝ်ၵႂႃႇႁပ်ႉလုၵ်ႈၶဝ်ၵေႃႈ မႃးၸွမ်းၶဝ်ၼၼ်ႉယိုင်ၼႃႇ ဢမ်ႇလႆႈၶီႇလူတ်ႉၵေႃႈ လွမ်ၶွႆၶဝ်ဝႆႉၵွၼ်ႇဢိူဝ်ႈ”

“ဢမ်ႇတွင်းၵွၼ်ႇႁႃႉ မိူဝ်ႈသူယူႇႁူင်းႁဵၼ်းၽၢၵ်ႇလႆႈႁဵတ်းႁင်”

“လႆႈလဵၼ်ႈ တႅမ်ႈလိၵ်ႈ ၼွၼ်းဝၼ်း ၵိၼ်ၶဝ်ႈ ပေႃးဝႃႈၼွၼ်းၼႆၵေႃႈ ဢမ်ႇၶႂ်ႈလပ်းၼႆႉတိုၼ်းဢမ်ႇလႆႈ ၶူးၶဝ်ပႃးၶွၼ်ႉႁေ ၽႂ်ဢမ်ႇၶႂ်ႈၼွၼ်းၼႆၵေႃႈ ၽတ်ႉသႂ်ႇဢိူဝ်ႈ ပေႃးဝႃႈႁူဝ်ၶမ်ႈၼႆ ပိူၼ်ႈတေၵႆႉလဵင်ႉတၢင်းၵိၼ် တႃႇၵူႇၸိူဝ်းၼႆႉ ၼိုင်ႈဝူင်ႈသွင်သၢမ်ဝၼ်းၼႆႉၵႃႈ ဢၼ်ႁဝ်းတွင်းတေႉၼႃ မႃးႁၼ်လုၵ်ႈဢွၼ်ႇတေႃႈလဵဝ် သွင်ၶူပ်ႇပၢႆ သၢမ်ၶူပ်ႇ သီႇၶူပ်ႇ ၼႆႉၵေႃႉလဵၵ်ႉၼႃႇ ႁဝ်းၼၼ်ႉ ႁဵတ်းႁိုဝ်ၵႂႃႇယူႇႁူင်းႁဵၼ်းႁင်းၵူၺ်းဢမ်ႇႁူႉ ပေႃႈမႄႈႁဝ်းပေႉႁတ်းပွႆႇဢဝ်”

“သူၸွင်ႇယၢမ်ႈထၢမ်ၶဝ်ၵွၼ်ႇၼႄႇ”

“ထၢမ်ယူႇ ၶဝ်ၵေႃႈဝႃႈလူဝ်ႇလဵင်ႉၼွင်ႉ လူဝ်ႇႁႃငိုၼ်းၼႆၼၼ်ႉယိုင်”

“မိူဝ်ႈလႂ်မိူဝ်ႈလႆႈလၢတ်ႈယဝ်ႉၵေႃႈ တေလၢတ်ႈၼႄသူသေ ဢၼ်ႁဝ်းတွင်းလီလီမႃးၼႆႉ ပီထီႉသၢမ် ဢူၺ်းၵေႃႉ ဢၼ်ႁဝ်းၶိုၼ်ႈႁူင်းႁဵၼ်းၽၢၵ်ႇ ၸွမ်းၵၼ်ၼၼ်ႉၵေႃႈ ၶဝ်ၶိုၼ်ႈၸၼ်ႉပႅတ်ႈႁဝ်းမူတ်းယဝ်ႉသေ မိူဝ်ႈၼၼ်ႉ ႁဝ်းၶႂ်ႈၵေႃႉယႂ်ႇႁေၵႂႃႇယူႇၸွမ်းၶဝ်တေႉယဝ်ႉဝႃႈ၊ ၶူးသမ်ႉဝႃႈ ဢႃႇယုႁဝ်းတိုၵ်ႉလဵၵ်ႉၼႃႇ ပိူၼ်ႈဢမ်ႇပၼ်ႁဝ်းၵႂႃႇ။ ၵူၺ်းၵႃႈ ပေႃႈမႄႈႁဝ်းတႄႉ ပီထီႉ 3 ၼႆႉ ႁႂ်ႈႁဝ်းၵႂႃႇႁူင်းႁဵၼ်းႁင်းၵူၺ်းယဝ်ႉ။ ပေႃးဝႃႈ လုၵ်ႈဢွၼ်ႇၼႂ်းဝၢၼ်ႈၶဝ်ၵႂႃႇယဝ်ႉၼႆၵေႃႈ တင်းၸွင်ႈဢွၼ်ႇႁေၵင်ႈလူင်ၵႂႃႇတၢင်းလင်ၶဝ်ယဝ်ႉ ပိူၼ်ႈၵေႃႉယႂ်ႇသမ်ႉၵႂႃႇဝႆးလႄႈ ႁဝ်းၵေႃႉလဵၵ်ႉသမ်ႉဢမ်ႇၶိုတ်းပိူၼ်ႈ ပိူၼ်ႈပေႃးလႆႈပႂ်ႉဢိူဝ်ႈ”

ငဝ်းလိူၼ်ၵေႃႈတင်ႈၸႂ်ထွမ်ႇယူႇ

“တၢင်းၵႂႃႇႁူင်းႁဵၼ်းၼၼ်ႉသမ်ႉ ပေႃးၶၢဝ်းၾူၼ်ၼႆ လိၼ်ၵႆႉၵူၼ်ႇတႃႇသေႇလႄႈ ပေႃးလိၼ်ၵူၼ်ႇသမ်ႉဢုင် လႆႈတိုဝ်းတင်းသွၵ်းဢူတ်ႇသေ ယွၵ်းယွၵ်းလူင်ၵႂႃႇ ဢုင်ၵေႃႈ ၵႃႈလႆႈၵႂႃႇယဝ်ႉ။ ပွၵ်ႈၼိုင်ႈ မၼ်းဢုင်ႁႅင်းၼႃႇလႄႈ ႁဝ်းလူမ်ႇဢုင် ပဵင်းၵၢင်ၶႃၼႆယဝ်ႉၼႃႇ ၶူဝ်းၵေႃႈၵူမ်ႇၵႂႃႇမူတ်းဢိူဝ်ႈ ပိူၼ်ႈလႆႈမႃးၸၼ်ဢွၵ်ႇၸွႆႈယဝ်ႉ။ ပေႃးလူင်းႁူင်းႁဵၼ်းၵေႃႈ  ပိူၼ်ႈမိူဝ်း မိူဝ်းၸွမ်းပိူၼ်ႈ လုၵ်ႈဢွၼ်ႇၼင်ႇၵၼ် ဢွၼ်ၵၼ်ပႆမိူဝ်းၵႂႃႇၸိူင်ႉၼၼ်ၵူၺ်းၼႃႇ။ မၢင်ပွၵ်ႈၵေႃႈ ၶႂ်ႈမီးႁိူၼ်းၸမ်ၸမ်ႁူင်းႁဵၼ်းၸိူင်ႉပိူၼ်ႈၼႃႇ”

“သူလႆႈယူႇႁူင်းႁဵၼ်းၽၢၵ်ႇ ပဵၼ်လၢႆပီၵမ်းလဵဝ်လႃႇ”

“မွၵ်ႈသၢမ်ပီၼႆႉယဝ်ႉဝႃႈ ပိူၼ်ႈဢဝ်ႁဝ်းၶိုၼ်ႈၸၼ်ႉငဝ်ႈ လိူၵ်ႈလိူၵ်ႈႁဝ်းလႆႈယူႇၸၼ်ႉ B ၼႆဢိူဝ်ႈ”

“သမ်ႉမီးလၢႆၸၼ်ႉလႃႇၼၼ်”

“ၸၼ်ႉငဝ်ႈတေမီးယူႇ 3 ၸၼ်ႉ ပေႃးၵေႃႉယႂ်ႇ လႆႈလိၵ်ႈၼႆၵေႃႈ ယူႇၸၼ်ႉ A ပေႃးၵေႃႉလဵၵ်ႉလႆႈလိၵ်ႈတၢၼ်ႇတၢၼ်ႇၼႆၵေႃႈ ယူႇၸၼ်ႉ B ၸၼ်ႉ C တႄႉ ၶိုၼ်းတႄႇငဝ်ႈမိူၼ်ၼင်ႇယူႇႁူင်းႁဵၼ်းၽၢၵ်ႇၼၼ်ႉၵူၺ်း တွၼ်းႁေဝႃႈ ၵေႃႉယႂ်ႇမႃးထႅင်ႈဢိၼ်ႉႁေၵူၺ်း။ ၸၼ်ႉ C တႄႉ ဢမ်ႇလႆႈတွပ်ႇလိၵ်ႈ ၸၼ်ႉ A လႄႈ B တႄႉ လႆႈတွပ်ႇလိၵ်ႈသေၶိုၼ်ႈၸၼ်ႉလႆႈ”

“သူၵေႃႈလႆႈတွပ်ႇလိၵ်ႈႁေဢိူဝ်ႈပေႃးၼႆ”

“ၸႂ်ႈယဝ်ႉဝႃႈ ႁဝ်းတႄႉတၼ်းလႆႈယူႇပီလဵဝ်ၵူၺ်း မၢင်ၵေႃႉၵေႃႈလႆႈယူႇ 2 သၢမ်ပီၼႆႉ ၸင်ႇတေပူၼ်ႉ၊ ႁဝ်းတွင်းလႆႈ မိူဝ်ႈႁဝ်းၶိုၼ်ႈၸၼ်ႉ 1 ၼႆႉယူဝ်ႉ ႁဝ်းၵေႃႉလဵၵ်ႉၼႃႇႁေၵေႃႈ ၶူးၶဝ်မႃးလိူၵ်ႈၼႂ်းႁွင်ႈႁဝ်းဢိူဝ်ႈ ဝႃႈႁဝ်းၵေႃႉလဵၵ်ႉၼႃႇႁေၵေႃႈ ႁႂ်ႈႁဝ်းၵႂႃႇယူႇၸၼ်ႉငဝ်ႈၶိုၼ်းၼႆၼႃႇ ႁဝ်းသမ်ႉသိုဝ်ႈလႂ်သိုဝ်ႈၼၼ်ႉၵူၺ်းႁေလႄႈ ထႅင်ႈဝၼ်းၵေႃႈ ဢမ်ႇႁတ်းၶဝ်ႈႁွင်ႈႁဵၼ်းႁေ ၵႂႃႇယူႇၸၼ်ႉငဝ်ႈၸွမ်းပိူၼ်ႈၶိုၼ်း ပိူၼ်ႈသမ်ႉပေႃးလႆႈၵႂႃႇၶႆႈဢိူဝ်ႈ”

“သူၵေႃႉလဵဝ်ၵူၺ်းႁႃႉ”

“ဢၼ်ၶူးလိူၵ်ႈတႄႉမီးယူႇလၢႆၵေႃႉ ၵူၺ်းၵႃႈ ဢၼ်ၵႂႃႇတႄႉ မီးႁဝ်းၵေႃႉလဵဝ်ၵူၺ်းဢိူဝ်ႈ”

“ဢမ်ႇႁႆႈၵွၼ်ႇၼႄႇ”

“ဢမ်ႇတွင်းယဝ်ႉ လႅပ်ႈတေႁႆႈယူႇယူဝ်ႉ ပေႃးဢမ်ႇလၵ်ႉႁႆႈႁေၵေႃႈ”

“ပေႃးလႆႈယူႇၸမ်တႄႉ တေၵွတ်ႇဝႆႉႁေယဝ်ႉဝႃႈ”

“ယႃႇႁႃၵဝ်းၵၼ်ယူႇၼႆႉ”

“ၽႂ်ႁမ်ႉၵႂႃႇၶႆႈသူလႃႇ”

“ဢမ်ႇတွင်းယဝ်ႉဝႃႈ ပဵၼ်ၵူၼ်းၸၼ်ႉလဵဝ်ၵၼ်ၵူၺ်းၼင်ႇၵဝ်ႇ ၵူၺ်းၵႃႈ ၶဝ်ၵေႃႉယႂ်ႇလိူဝ်ႁဝ်း”

“ၽူႈၸၢႆးႁႃႉၽူႈယိင်း”

“ပဵၼ်ၽူႈၸၢႆး”

“လိုမ်းပႅတ်ႈသေလႄႈပေႃးၼၼ်”

“ၼၼ်ႉ ၵူၼ်းၼႆႉတႄႉ”

“တွင်းႁဝ်းဝႆႉၼႂ်းၸႂ်ၵေႃႈလႆႈယဝ်ႉၼႃႈ”

“မိူႍဝ်ႈပၢၼ်ပူၼ်ႉ ၵူၼ်းၵေႃႉယႂ်ႇၼႆႉၼမ်ၼႃႇလူင် ၺႃးပိူၼ်ႈၵဵပ်းမႃးႁဵတ်းသိုၵ်း တိုၵ်ႉၵေႃႉလဵၵ်ႉၼႃႇၼႆၵေႃႈ ဢဝ်မႃးပွႆႇႁူင်းႁဵၼ်းတိၵ်းတိၵ်းၼၼ်ႉၼႃႇ”

“သူယူႇႁူင်းႁဵၼ်းဢမ်ႇမီးၵေႃႉၵွၼ်ႇၼႄႇ”

“မီးၵႃႈ..”

“ၸွင်ႇၽိတ်းပိူၼ်ႈၵွၼ်ႇႁႃႉ”

“ပေႃးႁဝ်းလၢတ်ႈတႄႉ ယႃႇဝႃႈႁဝ်းၶႂ်ႈလိုပ်ႈသူၵွၼ်ႇၼႃ”

“ဢၢပ်ႈႁၢႆႉၵျႃႉ”

“တၢၼ်ႇတၢၼ်ႇမၼ်းၵူၺ်း”

ယင်ႇလိုၵ်ႉၵမ်ႉယၼ် တွၼ်ႈသၢမ်သိပ်း

ဝၢႆးသေမိူဝ်းၸႂ်းႁိူၼ်းၵႂႃႇၵူၺ်း ထႅင်ႈပီၸမ်သွင်ပီၼႆႉၵေႃႈ ၵေႃႉပဵၼ်မႄႈ ၸဝ်ႈပိုၼ်းႁၢၼ်ၼၼ်ႉ လူႉၵႂႃႇသေ မၼ်းၵေႃႈ လႆႈၶိုၼ်းမိူဝ်းၵႂႃႇထႅင်ႈႁင်းၵူၺ်းယဝ်ႉ။ သမ်ႉပဵၼ်ၶၢဝ်းႁိုဝ်ႉသေ ၾူၼ်ၵေႃႈမႃး...

ယင်ႇလိုၵ်ႉၵမ်ႉယၼ် တွၼ်ႈသၢဝ်းၵဝ်ႈ

ပီ 2011 ၵွပ်ႈယူႇၸပ်းဝႆႉလႅၼ်လိၼ်ၼႆလႄႈ တီႈႁိူၼ်းၸဝ်ႈပိုၼ်းႁၢၼ်ၶဝ်ၼၼ်ႉၵေႃႈ တူၵ်းယူႇဝႆႉၼႂ်းလိၼ်ထႆးသေ လႆႈၶၢႆႉတီႈယူႇၵႂႃႇယဝ်ႉ။ တေယူႇၼႂ်းဝၢၼ်ႈၸိူင်ႉပိူၼ်ႈၵေႃႈ သမ်ႉဢမ်ႇမီးတီႈယူႇယဝ်ႉလႄႈ ၸင်ႇဢွၼ်ၵၼ်ၶၢႆႉၵႂႃႇယူႇတီႈ ၼႂ်းသူၼ်ၶဝ်။...

ယင်ႇလိုၵ်ႉၵမ်ႉယၼ် တွၼ်ႈသၢဝ်းပႅတ်ႇ

ႁိူၼ်းဢၼ်ဝႃႈၼၼ်ႉ တွၼ်ႈတႃႇ ၸဝ်ႈပိုၼ်းႁၢၼ်လႄႈ ၼၢင်းသိုဝ်ႉလူႇၼႆၵေႃႈ တိုၵ်ႉၸင်ႇႁႃမီးမႃးမိူဝ်ႈယူႇတီႈၼိူဝ်လွႆၼႆႉၵူၺ်းလႄႈ ပဵၼ်တီႈၸုၵ်းမၼ်ႈယင်ႇႁၢၵ်ႈမၼ်းဝႆႉယဝ်ႉသေ ၵႂႃႇတၢင်းလႂ်ယူႇတၢင်းလႂ်ၵေႃႈ ဢမ်ႇမိူၼ်ၼင်ႇတီႈႁိူၼ်းၼႆႉလႆႈတေႉဢိူဝ်ႈ။ ၸဝ်ႈပိုၼ်းႁၢၼ်ၵေႃႈ မိူဝ်ႈၵေႃႉလဵၵ်ႉ...